TSHIENA-BUALU TSHIA KULONGA 2
MUSAMBU WA 19 Didia dia Mukalenge
Ukadi mudiakaje bua dituku dia mushinga mukole dia tshidimu etshi anyi?
“Tungunukayi ne kuenza nunku bua kumvuluka.”—LUKA 22:19.
TSHIPATSHILA
Mona bua tshinyi tudi tuangata Tshivulukilu ne mushinga wa bungi menemene, mutudi mua kudilongolola, ne mutudi mua kubikila bantu bakuabu bua kubuelamu.
1. Bua tshinyi dituku dia Tshivulukilu ndituku dia mushinga mukole dia mu tshidimu? (Luka 22:19, 20)
BUA bantu ba Yehowa, dituku dia Tshivulukilu ndituku dia mushinga wa bungi menemene mu matuku a mu tshidimu. Ke tshibilu tshimuepele tshivua Yezu mutumine bayidi bende dîyi bua kuikala kusekelela. (Bala Luka 22:19, 20.) Kudi malu a bungi adi atusaka bua kuindila dituku edi ne muoyo kuulu kuulu. Tukonkononayi amue a kudiwu.
2. Mmalu kayi atu atusaka bua kuindila dituku dia Tshivulukilu ne muoyo kuulu kuulu?
2 Tshivulukilu tshidi tshituambuluisha bua kuelangana meji a mulambu wa tshia kupikulangana natshi. Tshidi tshituvuluija mishindu ya kuleja dianyisha bua mulambu wa Yezu. (2 Kol. 5:14, 15) Tshidi tshitupetesha kabidi mpunga ya “kukankamijangana” ne bena Kristo netu. (Lomo 1:12) Bantu ba bungi bakadi balekele kubuela mu bisangilu batu babuela mu Tshivulukilu tshidimu tshionso etshi. Bamue batu bafika kudiangata dipangadika dia kualukila mu bulelela, bua muvuabu babakidilamu ne disanka. Bantu ba bungi batu batuadija too ne kulonga Bible bua malu adibu bamonamu ne bateleje. Malu onso aa ke adi enza bua Tshivulukilu tshikale tshibilu tshia pa buatshi kutudi.
3. Mmunyi mutu Tshivulukilu tshisangisha bana betu ba pa buloba bujima pamue? (Tangila kabidi tshimfuanyi.)
3 Ela kabidi meji a mudi Tshivulukilu tshitusangisha mu buobumue pa buloba bujima. Bantemu ba Yehowa ba pa buloba bujima batu babuela mu Tshivulukilu padi dîba dienda dibuela, bilondeshile muaba ne muaba. Tuetu bonso tutu tuteleja muyuki udi uleja mushinga udi nawu mulambu wa tshia kupikulangana natshi. Tutu tuimba misambu ibidi ya kutumbisha nayi Nzambi, tupitshisha diampa ne mvinyo, tuamba “amen” ne muoyo mujima panyima pa masambila onso anayi atubu benza. Munkatshi mua mêba 24, bisumbu bionso bitu bienda bienza tshibilu etshi. Elabi meji disanka ditu Yehowa ne Yezu bumvua, padibu batumona tuetu bonso badisangishe mu buobumue tuenda tubatumbisha mushindu au!
Tshivulukilu tshitu tshisangisha bena Kristo ba pa buloba bujima pamue (Tangila tshikoso 3) f
4. Ntshinyi tshituamona mu tshiena-bualu etshi?
4 Mu tshiena-bualu etshi netuandamune nkonko eyi: Mmunyi mutudi mua kulongolola muoyo wetu bua Tshivulukilu? Mmunyi muditshi mua kuambuluisha bantu bakuabu batudi tubikila? Mmunyi mutudi mua kuambuluisha bantu bakadi balekele kubuela mu bisangilu ne kuyisha? Mandamuna a nkonko eyi neatuambuluishe bua kudilongolola bua tshibilu tshia pa buatshi etshi.
MMUNYI MUTUDI MUA KULONGOLOLA MUOYO WETU BUA TSHIVULUKILU?
5. a) Bua tshinyi tudi ne bua kuelangana meji a mushinga udi nawu mulambu wa tshia kupikulangana natshi? (Misambu 49:7, 8) b) Filme wa Bua tshinyi Yezu wakafua? mmukulongeshe tshinyi?
5 Umue wa ku mishindu mitambe buimpe itudi mua kulongolola muoyo wetu bua Tshivulukilu, ngua kuelangana meji a mushinga udi nawu mulambu wa tshia kupikulangana natshi wa Yezu Kristo. Katuena mua kudipikula ku mpekatu ne lufu tuetu nkayetu to. (Bala Misambu 49:7, 8; tangila kabidi filme wa Bua tshinyi Yezu wakafua?) a Yehowa ne Muanende bakafila tshintu tshia mushinga mukole menemene; tshintu atshi ke mulambu wa Yezu udi utusungila. (Lomo 6:23) Tuetu tuelangana meji a mulambu udi Yehowa ne Yezu bafile, netuanyishe tshia kupikulangana natshi bikole. Netuakule bua malu makese avua Yehowa ne Yezu badipangishe bua kufila mulambu wa tshia kupikulangana natshi. Tshia kumpala, bivua bilombe Yehowa ne Yezu tshinyi bua kufila tshia kupikulangana natshi?
6. Kufila tshia kupikulangana natshi kuvua kulomba tshinyi?
6 Tshia kupikulangana natshi, ntshintu tshidibu bafila tshidi ne mushinga mukumbanangane ne wa tshintu tshitudi tukuula. Pavua Nzambi mufuke Adama, uvua ne muoyo mupuangane. Pakenzaye mpekatu, wakadijimijila yeye ne bana bende diakalenga dia kupeta muoyo wa tshiendelele. Bua kukuula muoyo mupuangane uvua Adama mujimije au, Yezu wakafila wende muoyo mupuangange. Pavua Yezu pa buloba, “kavua muenze mpekatu ne kabavua basangane dishima mukana muende nansha.” (1 Pet. 2:22) Wakafua mupuangane anu bu muvua Adama kumpala kua kuenza mpekatu. Pakalambulaye muoyo wende au, wakafuta muoyo uvua ne mushinga mukumbanangane ne uvua Adama mujimije.—1 Kol. 15:45; 1 Tim. 2:6.
7. Ngimue ntatu kayi ivua Yezu mutuilangane nayi pa buloba?
7 Yezu wakatumikila Yehowa mu malu onso pavuaye pa buloba too ne pavuaye mu ntatu ivua miambe kumupangisha bua kumutumikila. Pavua Yezu muana, uvua mupuangane; nansha nanku uvua utumikila baledi bende bavua bapange bupuangane. (Luka 2:51) Pavuaye tshitende, wakakandamena bantu bavua pamuapa bamusaka ku dibenga kutumikila baledi bende anyi ku dibenga kushala ne lulamatu kudi Yehowa. Pakavuaye muntu mukole, Satana Diabolo wakamuteta bua enze mpekatu; kujingaye too ne bua anyange lulamatu luende kudi Yehowa, kadi Yezu wakamukandamena. (Mat. 4:1-11) Satana uvua mudisuike bua kuenzeja Yezu mpekatu, bua apangile mua kufuta mulambu wa tshia kupikulangana natshi.
8. Yezu uvua munanukile mu ntatu kayi mikuabu?
8 Pavua Yezu pa buloba, wakatantamena mateta makole. Bena lukuna bende bakamukengesha kujingabu ne bua kumushipa. (Luka 4:28, 29; 13:31) Uvua mutantamene dipanga bupuangane dia bayidi bende. (Mâko 9:33, 34) Pakavuaye pa kufila muoyo wende, bakamukengesha bibi menemene, kumupuekeshabu milongo; pashishe kumushipabu anu bu muenzavi. (Eb. 12:1-3) Wakananukila mu makenga a pakavuaye pa kukuula muoyo ku bukole buende yeye nkayende Yehowa kayi umukuba to. b—Mat. 27:46.
9. Mmunyi mutudi tumvua bua mulambu wa Yezu? (1 Petelo 1:8)
9 Kakuyi mpata, Yezu wakakenga bikole kumpala kua kufila tshia kupikulangana natshi. Patudi tuela meji a muvua Yezu mutufuile, kabienaku bitusaka bua kumunanga bikole menemene anyi?—Bala 1 Petelo 1:8.
10. Bua Yehowa kufila tshia kupikulangana natshi, bivua bimulombe tshinyi?
10 Tuakulabi bua Yehowa. Biakamulomba tshinyi bua kuitaba bua kufila Yezu bu tshia kupikulangana natshi? Yehowa ne Yezu badi mu malanda makole a buena atu pankatshi pa tatu ne muana. (Nsu. 8:30) Ela meji a muvuabi bitonde Yehowa pavuaye umona basubisha muanende pa buloba. Uvua ne kanyinganyinga ka bungi pavuaye umona benzela muanende malu mabi, bamubenga, ne bamukengesha.
11. Fila tshilejilu tshia muvua Yehowa mua kuikala mumvue pavuabu bashipe Yezu.
11 Muledi yonso ukadi mufuishe muana, mmumanye bimpe mutubi bitapa ku muoyo. Nansha mutudi ne ditabuja dikole dia ne: bafue nebabishibue ku lufu, kufuisha muntu kutu anu kutonda bikole. Bualu ebu budi butuambuluisha bua kumvua kanyinganyinga kavua Yehowa mua kuikala mumvua pavuaye umona bakengesha muanende munanga ne bamushipa mu 33 P.Y. c—Mat. 3:17.
12. Ntshinyi tshitudi mua kuenza mbingu mikese kumpala kua Tshivulukilu?
12 Kutuadijila ku mpindieu too ne dituku dia Tshivulukilu, kuenaku mua kudilongela malu a tshia kupikulangana natshi anyi kualonga mu ntendelelu wa mu dîku anyi? Enza makebulula mu Mukanda wa makebulula wa Bantemu ba Yehowa bikalawu mu muakulu wenu anyi uenze mu mikanda yetu mikuabu bua kulonga bualu ebu mu buondoke. d Wikale kabidi mudiakaje bua kulonda programe wa dibala dia Bible bua Tshivulukilu udi mu Mabeji a tshisangilu tshia Nsombelu ne mudimu wetu wa buena Kristo. Kupu muoyo bua kutangila programe wa pa buende wa Ntendelelu wa mudinda bua Tshivulukilu dituku dia Tshivulukilu to. Patudi tulongolola mioyo yetu bua Tshivulukilu, nebilue bipepele bua kuambuluisha bakuabu bua babuelamu pabu.—Eze. 7:10.
AMBULUISHA BAKUABU BUA KUBUELA MU TSHIVULUKILU
13. Mbualu kayi bua kumpala bua tuetu kuenza bua kuambuluisha bakuabu bua kubuela mu Tshivulukilu?
13 Mmunyi mutudi mua kuambuluisha bakuabu bua babuele mu Tshivulukilu? Bualu bua kumpala butudi ne bua kuenza, nkubabikilamu. Pa kumbusha bantu batutu tupeta mu buambi, tudi mua kufunda kabidi mêna a bantu batudi mua kubikila mu Tshivulukilu. Tshilejilu, balela betu, bena mudimu netu, balongi netu, anyi bantu bakuabu. Nansha tuetu katuyi ne mabeji a dibikila nawu bantu a bungi, tudi mua kutumina bantu lien wawu mu biamu. Nganyi udi bushuwa mumanye bungi bua bantu babuela mu Tshivulukilu?—Muam. 11:6.
14. Fila tshilejilu tshidi tshileja mushinga udi nawu dibeji dia dibikila.
14 Kuedi meji ne: dibeji dia dibikila diudi upesha muntu kadiena ne mushinga to. Dituku dikuabu, muanetu wa bakaji wakakema pavua bayende uvua kayi Ntemu mumuambile ne: neabuele nende mu Tshivulukilu. Bua tshinyi bualu abu buvua bumukemeshe? Bualu ukavua mumulombe misangu ya bungi bua kubuela mu Tshivulukilu, kadi kayi anu witaba to. Kadi ntshinyi tshiakasaka bayende au bua kuitaba musangu eu? Udi wamba ne: “Bavua bampeshe dibeji dia dibikila kudi mukulu wa mu tshisumbu tshia ba mukajanyi umvua mutuilangane nende.” Wakabuela mu Tshivulukilu tshidimu atshi ne bidimu bikuabu bia bungi biakalonda.
15. Ntshinyi tshitudi ne bua kuikala natshi mu meji patudi tubikila bantu mu Tshivulukilu?
15 Tumanyayi ne: bantu batudi tubikila mu Tshivulukilu nebatuele nkonko, nangananga pikalabu kabatu banji kubuela mu tshimue tshia ku bisangilu bietu to. Nanku tudianjila kuela meji a nkonko yatuelabu ne tudilongolole bua kubandamuna. (Kolos. 4:6) Tshilejilu, bamue badi mua kuikala badiebeja ne: ‘Ntshinyi tshienzeka mu Tshivulukilu?’ ‘Netshienze mêba anga?’ ‘Batu baluata mushindu kayi?’ ‘Nebandombe makuta bua kubuelamu anyi?’ ‘Nebasangishamu makuta anyi?’ Patudi tubikila muntu mu Tshivulukilu, tudi mua kumuebeja patupu ne: “Udi ne nkonko anyi?” Pashishe tumuandamunayi. Tudi mua kumuleja kabidi filme wa: Vuluka lufu lua Yezu ne wa Tshitu tshienzeka ku Nzubu wa Bukalenge ntshinyi? bua kuleja mutu bisangilu bietu bienzeka. Mu dilongesha dia 28 dia mukanda wa Shala ne muoyo kashidi! mudi malu mimpe atudi mua kuambila bantu.
16. Bantu badi babuele mu Tshivulukilu badi pamuapa mua kudiela nkonko kayi?
16 Bantu batu babuela mu Tshivulukilu bua musangu wa kumpala, badi mua kutuela nkonko panyima patshi pikala malu avuabu balondamu mabasankishe. Badi mua kuikala badiebeja bua tshinyi anu bantu bakese ke bavua badie diampa, banue ne mvinyo. Pamuapa batu badiebeja kabidi bungi bua misangu itutu tuenza Tshivulukilu. Badi mua kuikala badiebeja bikala bisangilu bionso bia Bantemu ba Yehowa bienzeka anu mushindu umue umue au. Nansha mutubu bumvuija malu a bungi a ku atudi batele aa mu Tshivulukilu, bantu batu babuelamu bua musangu wa kumpala batu bajinga bua babumvuije malu a bungi. Tshiena-bualu tshia mu jw.org tshia ne: Bua tshinyi Bantemu ba Yehowa batu benza Didia dia Mukalenge dishilangane ne dia bitendelelu bikuabu? tshidi mua kutuambuluisha bua kuandamuna imue ya ku nkonko yatuelabu. Tutu tuenza muetu muonso bua kuambuluisha bantu badi “bakaje muoyo wabu” bua kumanya malu a bungi a mu Tshivulukilu, kumpala kuatshi, paditshi tshienzeka, ne panyima patshi.—Bien. 13:48.
AMBULUISHA BAKADI BALEKELE BISANGILU NE KUYISHA
17. Bakulu badi mua kuambuluisha bantu bakadi balekele bisangilu ne kuyisha mushindu kayi? (Yehezekele 34:12, 16)
17 Mmunyi mudi bakulu mua kuambuluisha bantu bakadi balekele kuyisha ne kubuela mu bisangilu tshikondo tshia Tshivulukilu? Balejayi munudi babanange. (Bala Yehezekele 34:12, 16.) Kumpala kua Tshivulukilu, dienzejayi bua kubikila ba bungi banudi bamanye koku mushindu. Balejayi munudi nubatabalela ne munudi basue kubambuluisha. Babikilayi mu Tshivulukilu. Bobu baluamu, nubakidile ne musangelu. Panyima pa Tshivulukilu, ikala uya kubatangila anyi ubabikila ku telefone; ubambuluisha ne malu a mu Bible adibu nawu dijinga bua bapingane kudi Yehowa.—1 Pet. 2:25.
18. Mmunyi mudi yonso wa kutudi mua kuambuluisha bantu bakadi balekele bisangilu ne kuyisha? (Lomo 12:10)
18 Bantu bonso ba mu tshisumbu badi mua kuambuluisha bantu bakadi balekele bisangilu ne kuyisha bua kubuela mu Tshivulukilu. Mushindu kayi? Padibu babenzela malu ne dinanga, bulenga, ne babanemeka. (Bala Lomo 12:10.) Manyayi ne: bana betu aba badi mua kuikala belakana bua kupingana mu bisangilu. Pamuapa badi mua kuikala bumvua buôwa bua ne: kabakubakidila bimpe to. e Nunku kubedi nkonko idi mua kubatondesha nsombelu, anyi kufidi mandamuna adi mua kubatapa ku muoyo to. (1 Tes. 5:11) Manyayi ne: bantu abu mbena Kristo netu. Tudi ne disanka dia kutendelela Yehowa pamue nabu.—Mis. 119:176; Bien. 20:35.
19. Kuvuluka lufu lua Yezu kudi kutupetesha masanka kayi?
19 Kabiena bikemesha bua muvua Yezu mulongolole malu bua tuikale tuvuluka lufu luende musangu umue ku tshidimu to. Patudi tuenza Tshivulukilu, tshidi tshituambuluisha tuetu ne bantu bakuabu mu mishindu ya bungi. (Yesh. 48:17, 18) Tudi tunanga Yehowa ne Yezu bikole. Tudi tuleja mutudi tuanyisha tshidibu batuenzele. Tudi tukolesha bulunda buetu ne bena Kristo netu. Tudi mua kuambuluisha bakuabu bua bapete pabu masanka adi tshia kupikulangana natshi tshitupetesha. Tuetu bonso tuenze tshitudi mua kuenza bua kuikala badiakaje bua kubuela mu Tshivulukilu tshia tshidimu etshi tshikala dituku dia mushinga mukole dia mu tshidimu!
MMUNYI MUTUDI MUA . . .
-
kulongolola muoyo wetu bua Tshivulukilu?
-
kuambuluisha bantu bakuabu bua kubuela mu Tshivulukilu?
-
kuambuluisha bantu bakadi belekele bisangilu ne kuyisha?
MUSAMBU WA 18 Dianyisha bua tshia kutupikula natshi
a Bua kupeta biena-bualu ne filme idibu bambe mu tshiena-bualu etshi, buela mu jw.org, ufunde tshiudi ukeba mu kazubu ka kukebela.
b Tangila tshiena-bualu tshia “Nkonko ya babadi” mu Tshibumba tshia Nsentedi tshia 4/2021.
c Tangila mukanda wa Semena pabuipi ne Yehowa, nshap. 23, tshik. 8, 9.
d Tangila kazubu ka “ Ngenyi ya mua kuenza makebulula.”
e Tangila bimfuanyi ne kazubu ka “ Tshivua bena mu tshisumbu benze.” Muanetu wa balume ukavua mulekele bisangilu welakana bua kubuela mu Nzubu wa Bukalenge, kadi udi ulekela kuelakana ubuelamu. Bamuakidila ne disanka, utuadija kuyukila ne bena Kristo nende.
f DIUMVUIJA DIA BIMFUANYI: Bantu ba Yehowa benda benza Tshivulukilu padi eku bena Kristo nabu ba mu matunga makuabu benda badilongolola bua tshibilu tshia pa buatshi atshi.
