1. Mwomwo ika chilika chaKwanuka Kufwa chaMwata chapwila hichilika chachilemu chikuma mumwaka? (Luka 22:​19, 20)

 KULI vatu jaYehova, chilika chaKwanuka Kufwa chaKulishitu chapwa hichilika chachilemu chikuma mumwaka. Chikiko kaha chilika chize Yesu alwezele vaka-kumukavangiza valingenga. (Tangenu Luka 22:​19, 20.) Kuli vyuma vyavivulu vize vyatulingisa tupwenga kuchilika kana. Tushimutwilenu havyuma vimwe.

2. Vyuma vimwe muka vyeji kutulingisanga tufwile kupwa kuchilika chaKwanuka Kufwa chaMwata?

² Chilika chaKwanuka Kufwa chaMwata cheji kutukafwanga tushinganyeke hakulema chandando yakusokola. Cheji kutwanukisanga tumone jijila twatela kusolwelamo ngwetu twasakwilila Yesu hawana wenyi. (Koli. 2, 5:​14, 15) Cheji kutukafwanga nawa ‘tulikolezeze’ navandumbwetu. (Loma 1:12) Vandumbwetu vakuzeya veji kwizanga kuchilika kana mwaka himwaka. Vamwe veji kufwilanga kukinduluka kuli Yehova mwomwo yakuvatambula nachisambo. Kaha vatu vakuwahilila vavavulu veji kuputukanga kutambuka mujila yakuya kukuyoya hakuvakunyula kuvyuma veji kumonanga navize veji kwivwanga. Evi vikiko vyalingisa chilika chaKwanuka Kufwa chaMwata kupwa chachilemu chikuma kuli yetu.

3. Uno chilika chaKwanuka Kufwa chaMwata cheji kununganga ngachilihi vandumbwetu mukaye kosena? (Talenu nawa muvwimbimbi.)

³ Shinganyekenu nawa omwo chilika chaKwanuka Kufwa chaMwata cheji kutununganga hamwe navandumbwetu mukaye kosena. Vinjiho jaYehova mukaye kosena veji kulikungulwilanga hamwe hakulembalemba chalikumbi. Tuvosena tweji kwivwililanga kuchihande chize cheji kushindakanyanga hakulema chandando yakusokola. Tweji kwimbanga myaso yivali yakwalisa Kalunga, nakuhichisamo vifwanyisa, nakuhanjika namichima yetu yosena ngwetu “amene” kukulomba chiwana. Vikungulwilo vyosena vyeji kulinganga mwomumwe kafwe mulikumbi limwe  kaha. Achishinganyekenu kuwaha eji kwivwanga Yehova naYesu, hakutumona tunalinungu hamwe nakuvavumbika mujila kaneyi.

4. Vyuma muka natushimutwila muchihande chino?

⁴ Muchihande chino, natushimutwila havihula vino: Tunahase kulizanga ngachilihi mumichima vyachilika chaKwanuka Kufwa chaMwata? Uno tunahase kukafwa ngachilihi vakwetu vakanganyale kuchilika kana? Kaha tunahase kukafwa ngachilihi vandumbwetu vaze vazeya? Vyuma natukumbulula kuvihula kanevi navitukafwa tulizange vyachilika kanechi chajila.

TUNAHASE KULIZANGA NGACHILIHI MUMICHIMA YETU VYACHILIKA CHAKWANUKA KUFWA CHAMWATA?

5. (a) Mwomwo ika twatela kushinganyekela hakulema chandando yakusokola? (Samu 49:​7, 8) (b) Vyuma muka munalinangula kuvindiyo yakwamba ngwavo Mwomwo Ika Yesu Afwililile?

⁵ Jila yimwe yayilemu chikuma twatela kusolwelamo ngwetu tunalizange mumuchima vyachilika chaKwanuka Kufwa chaMwata shina, kushinganyeka hakulema chandando yakusokola yaYesu Kulishitu. Tachikizenu ngwenu katweshi kuhasa kulisokola etu vavene kushili nakukufwako. (Tangenu Samu 49:​7, 8; talenu nawa vindiyo yakwamba ngwavo Mwomwo Ika Yesu Afwililile?) a Yehova alongesele vyuma mangana Yesu ahane kuyoya chenyi atusokole. Shikaho, Yehova naYesu valisuwile mwamunene chikuma. (Loma 6:23) Nge natushinganyekanga chikuma omwo Yehova naYesu valisuwile hali yetu, kaha nachitukafwa tuvasakwilile chikuma handando yakusokola. Natushimutwilenu havyuma vimwe vize Yehova naYesu valisuwile kuhitamo mangana vatusokole. Oloze tuvangilenu kushimutwila hachihula chino: Uno vyuma muka alisuwile Kalunga naYesu hakutuhana ndando yakusokola?

6. Vyuma muka alisuwile Yesu hakutuhana ndando yakusokola?

⁶ Ndando yakusokola yapwa ndando navafweta hakusaka kukindulwisa chuma. Alama uze apwile mutu watete apwile wakukupuka. Omu alingile shili, ajimbalishile kuyoya chenyi chahaya myaka nechi chavana venyi vosena. Hakusaka kukindulwila chuma chize ajimbalishile Alama, Yesu alisuwile kuhana kuyoya chenyi chakukupuka kupwa wana wachimuna wakuvatula. Omu Yesu apwile hano hamavu, “kalingile shiliko, kaha mukanwa kenyi kavawanyinemo makuliko.” (Petu. 1, 2:22) Omu Yesu afwile, kuyoya chenyi chalitombwele nakuyoya chize Alama ajimbalishile.—Koli. 1, 15:45; Chimo. 1, 2:6.

7. Vyeseko vimwe muka vize Yesu amwene omu apwile hano hamavu?

⁷ Yesu atwalileho lika kwononoka Ise wamwilu chamokomoko nakumona vyeseko vyavivulu omu apwile hano namavu. Omu Yesu apwile kanyike, aliluwile kuli visemi jenyi vakuhona kukupuka numba tuhu ikiye apwile wakukupuka. (Luka 2:51) Omu apwile mukweze, ahonesele vyeseko vize vyasakile kumulingisa alikange chipwe kuhona kupwa wakushishika. Kaha omu Yesu apwile mukulwane, ahonesele vyeseko vyakufuma kuli Satana Liyavolo, kuhakilako vene navyeseko vize vyesekele kushishika chenyi kuli Kalunga. (Mateu 4:​1-11) Satana afwililile kulingisa Yesu alinge shili mangana ahone kuhana ndando yakusokola.

8. Vyeseko muka vikwavo vize omikile Yesu?

⁸ Yesu omikile nawa vyeseko vikwavo omu apwile nakuzata mulimo wenyi wakwambulula hano hamavu. Vamufumbukililenga nakusaka kumujiha. (Luka 4:​28, 29; 13:31) Atalilililenga chikoki tumbaji twenyi omu valimbenjelenga. (Mako 9:​33, 34) Omu apandamine kwakamwihi nakuhana kuyoya chenyi, vamuyanjishile nakumusaula. Kufumaho, vamujihile mujila yayipi, kaha nawa yakasautu. (Hepe. 12:​1-3) Omikile chikuma kumakumishilo akuyoya chenyi hano hamavu, chakuzeneka kumukinga kuli Yehova. b—Mateu 27:46.

9. Uno kulisuula chaYesu cheji kutukafwanga tumona chuma muka? (WaPetulu 1, 1:8)

 ⁹ Chikupu vene, Yesu ayanjile chikuma mangana ahane ndando yakusokola. Omu tweji kushinganyekanga havyuma vyosena alisuwile Yesu kutulingila, cheji kutukafwanga tumone ngwetu atuzanga chikuma.—Tangenu WaPetulu 1, 1:8.

10. Uno Yehova alisuwile ngachilihi hakuhana ndando yakusokola?

¹⁰ Uno Yehova alisuwile ngachilihi mangana Yesu afwete ndando yakusokola? Yehova naYesu vatwama nausoko wakukola chikuma ngana muze chapwa kuli chisemi walunga namwenyi. (Vishi. 8:30) Jino achishinganyekenu omwo evwile Yehova hakumona Yesu anakuhita muvyeseko vyavivulu omu apwile hano hamavu. Chikupu vene, Yehova evwile kumuchima kukola kumona Mwanenyi navamuyanjisa nakumukana nakumweseka.

11. Hanenu chakutalilaho musolole omwo Yehova evwile omu Mwanenyi vamujihile.

¹¹ Visemi vaze vafwisaho lyehi mwana vatachikiza kanawa omwo cheji kuvizanga nge mwana nafu. Numba tuhu twatwama nalutalililo lwakusanguka, oloze echi kachatulingisa tuhone kulishona nge tunafwisa mutu twazangako. Chakutalilaho kana chatukafwa tutachikize omwo Yehova evwile hakumona Mwanenyi uze azanga ali nakuyanda nakufwa haNyisane 14, 33 C.E. c—Mateu 3:17.

12. Vyuma muka twatela kulinga halwola lwakukokela kuchilika chaKwanuka Kufwa chaMwata?

¹² Kuputuka vene oholyapwa nakuheta kuchilika chaKwanuka Kufwa chaMwata munahase kulinangula vyavivulu kutalisa kundando yakusokola hachilongesa chenu chauka chipwe chatanga. Zachisenu Chinoma Chakukafwa Vinjiho jaYehova Kuhehwojola chipwe Mikanda yakukafwa kulinangula Mbimbiliya mangana muwane vyavivulu hachihande kana. d Kaha nawa, munahase kukavangiza kunoneka chakutanga Mbimbiliya chaKwanuka Kufwa chaMwata chize chili muMukanda waKukunguluka chaChiyoyelo naMulimo waVaka-Kulishitu. Kaha halikumbi lyaKwanuka Kufwa chaMwata, kanda kukavulyama kutala vindiyo yakulipwila yaKukekesa Chisoneka chaLikumbi naChimeneko. Shikaho, nge natulizanga mumichima yetu vyachilika chaKwanuka Kufwa chaMwata, nachitulingisa nayetu tukafweko vakwetu vakanganyale kuchilika kana.—Ezela 7:10.

KAFWENU VAKWENU VAKANGANYALE

13. Chuma muka chatete twatela kulinga mangana tukafwe vakwetu vakanganyale kuchilika chaKwanuka Kufwa chaMwata?

¹³ Vyuma muka twatela kulinga mangana  tukafwe vakwetu vakanganyale kuchilika chaKwanuka Kufwa chaMwata? Chuma chatete shina, kuvasanyika kuchilika. Omu natusanyika vatu vaze tweji kuwananga shimbu yosena muwande, tunahase nawa kusoneka majina avatu vaze twatachikiza mangana navakiko tuvasanyike kuchilika. Vatu kana vanahase kupwa vausoko wetu, navakwetu vaka-milimo, navakwetu vaka-shikola navatu veka vaze twatachikiza. Numba nge natukahona kupwa namapapilo amavulu akusanyika vatu, oloze tunahase kukavatumina liki hamakina avo. Pamo vatu vavavulu navakakulako kanawa.—Kwambu. 11:6.

14. Hanenu chakutalilaho chasolola nganyo yatwama hakusanyika mutu kuchilika chaKwanuka Kufwa chaMwata.

¹⁴ Kanda kushinganyeka ngwenu vatu namusanyika kaveshi kukezako. Likumbi limwe, ndumbwetu wapwevo uze asomboka kulunga uze kapwa Chinjihoko, alikomokelele omwo evwile lunga lyenyi mwamulweza ngwenyi, mwakaya nenyi hamwe kuchilika chaKwanuka Kufwa chaMwata. Mwomwo ika alikomokelele? Mwomwo kunyima namusanyikanga mapapa kakavulu oloze akanyinenga. Jino vyuma muka vyalumukile halwola kanelu? Lunga lyenyi ambile ngwenyi: “Vananguhane lipapilo lyakungusanyika kuchilika.” Ou lunga alumbunwinyine puwenyi ngwenyi, mukulwane muchikungulwilo, uze atachikiza kanawa ikiye amuhanyine lize lipapilo. Ou lunga ayile kuchilika mumwaka kana uze, namyaka yayivulu yize yakavangijileho kulutwe.

15. Vyuma muka twatela kwanuka nge tuli nakusanyika vatu vezenga kuchilika chaKwanuka Kufwa chaMwata?

¹⁵ Anukenu ngwenu vatu vaze namusanyika vanahase kumihulisa vihula chikumanyi nge kanda vapwengangaho lyehi kukunguluka chetu. Shikaho, nachipwa chamwaza kushinganyeka havihula vanahase kutuhulisa nakupwa vakulizanga kuvikumbulula. (Kolo. 4:6) Chakutalilaho, vamwe vanahase kuhulisa ngwavo: ‘Vyuma muka navikasoloka hakukunguluka kana?’ ‘Uno nachikambata lwola lungahi?’ ‘Uvwalo muka wakutamo kuvwala?’ ‘Uno veji kufwetesanga tahi?’ ‘Kutala navakahitamo nakutambula jimbongo tahi?’ Nge tuli nakusanyika mutu kuchilika chaKwanuka Kufwa chaMwata, kaha twatela kumuhulisa ngwetu, “Kutala uliko nachihula tahi?” kufumaho kumbululenu vihula nahase kumihulisa. Tunahase nawa kuzachisa vindiyo yakwamba ngwavo, Kwanuka  Kufwa chaYesu nayaVyuma Muka Vyeji Kusolokanga haZuvo yaWangana? mangana tukafwe mutu atachikize omwo kukunguluka chetu veji kuchitwaminyinanga. Kaha nawa muchilongesa 28 chamukanda waLivwise Kuwaha Kuyoya Haya Myaka mwatwama vishina vyamwaza vize munahase kulwezako mutu kana.

16. Vihula muka vikwavo vanahase kuhulisa vatu vaze veji kwizanga kuchilika chaKwanuka Kufwa chaMwata?

¹⁶ Vatu vakuwahilila vanahase kupwa navihula vyeka vize vanahase kutuhulisa, nahanyima yakupwa kuchilika chaKwanuka Kufwa chaMwata. Vanahase kuhulisa ovyo vatu vavandende kaha (nge kuvapwanga) valilanga kuvifwanyisa. Vanahase kuhulisa nawa mapapa tweji kulinganga chilika kana. Kaha nawa vanahase kufwila kutachikiza numba nge kukunguluka chosena chaVinjiho jaYehova veji kuchilinganga mujila yoyimwe. Numba tuhu vishina kana veji kuvilumbununanga muchihande chaKwanuka Kufwa chaMwata, oloze vatu vavahya veji kufwilanga kuvalumbunwina vyavivulu. Chihande chili ha jw.org chakwamba ngwavo, “Mwomwo Ika Vinjiho jaYehova Veji Kulingilanga Chilika chaKulya chaMwata chaChingoloshi Mujila Yakulihandununa naMauka Eka Akwitava?” chinahase kutukafwa kukumbulula vihula vimwe navatuhulisa. Shikaho, tweji kukilikitanga chikuma shimbu kanda chilika chaKwanuka Kufwa chaMwata, nahalwola lwachilika kana, nahanyima yachilika, mangana tukafwe vatu vaze vali “namichima yamwaza” vanganyale kuchilika kana.—Vili. 13:48.

KAFWENUNGA VAZE VANAZEYE

17. Uno vakulwane muchikungulwilo vanahase kukafwa ngachilihi vandumbwetu vaze vazeya? (Ezekele 34:​12, 16)

¹⁷ Uno vakulwane muchikungulwilo vanahase ngachilihi kukafwa vandumbwetu vakuzeya mungonde yaKwanuka Kufwa chaMwata? Sololenu ngwenu mwavazakama. (Tangenu Ezekele 34:​12, 16.) Shimbu kanda likumbi lyachilika fwilenu kutambukila vosena vaze vazeya chipwe kuvatumina shinga. Valwezenu ngwenu mwavazanga chikuma kaha muli nakufwila kuvakafwa mukala jila. Vasanyikenu kuchilika chaKwanuka Kufwa chaMwata. Kaha nge naveza kuchilika, vatambulenu nachisambo. Fwilenu kutambukilanga ava vandumbwetu nahanyima yachilika chaKwanuka Kufwa chaMwata, nakuvakolezeza  kushipilitu mangana vakinduluke kuli Yehova.—Petu. 1, 2:25.

18. Uno tuvosena tunahase kukafwa ngachilihi vandumbwetu vakuzeya? (Wavaka-Loma 12:10)

¹⁸ Vatu vosena muchikungulwilo vanahase kukafwa vaze vazeya vaze naveza kuchilika chaKwanuka Kufwa chaMwata. Mujila muka? Hakuvasolwela zangi, nalikoji nakavumbi. (Tangenu Wavaka-Loma 12:10.) Anukenu ngwenu ava vandumbwetu pamo chavakaluhwilile kuputuka cheka kukunguluka. Pamo vapwile nakwivwa woma ngwavo, kaveshi kuvatambula nachisamboko. e Shikaho, kanda kuvahulisa vihula vize navivevwisa sonyi chipwe kuhanjika mazu aze nawavevwisa kupihyako. (Teso. 1, 5:11) Anukenu ngwenu ava vandumbwetu hivakwetu vaka-kwitava. Tweji kuwahililanga kulemesela cheka hamwe navo Kalunga.—Samu 119:176; Vili. 20:35.

19. Vyuma muka vyamwaza tweji kulivwisanga kuwaha mwomwo yakwanuka kufwa chaYesu?

¹⁹ Chikupu vene twasakwilila Yesu hakutulweza twanukenga kufwa chenyi mwaka himwaka. Kulinga ngocho, nachitunganyalisa etu, nakunganyalisa vakwetu nawa mujijila jajivulu. (Isa. 48:​17, 18) Kaha nawa tweji kuzanganga chikuma Yehova naYesu. Tweji kusololanga nawa kusakwilila chetu havyuma vatulingila. Tweji kupandamanga nawa chikuma kuli vandumbwetu. Kaha chinahase kutulingisa tukafwe vakwetu vaputuke kulivwisa kuwaha vyuma vyamwaza, vize tweji kulivwisanga kuwaha etu mwomwo yandando yakusokola. Shikaho tuzatenu noho hakumina ngolo jetu mangana tupwenga vakulizanga kukapwa kuchilika chaKwanuka Kufwa chaMwata chize chapwa chachilemu chikuma mumwaka.