1. Muloñadi ifuku daChanukishu chidekalila ifuku dalema nankashi muchaaka? (Luka 22:​19, 20)

 KUDI antu jaYehova, ifuku dakwanuka kufwa kwaKristu hiifuku dalema nankashi muchaaka. Dichidika hohu chayilejeliyi Yesu akakumulondela nindi eleña. (Tañenu Luka 22:​19, 20.) Twatalilaña ichi Chanukishu muloña wayuma yimu. Tuhanjekenu yuma yimu haniyi yuma.

2. Yumanyi yaleteshaña tutalileña Chanukishu?

² Chanukishu chatukwashaña kutoñojoka hachalemena ifutu danyiloña. Chatwanukishaña njila mutunateli kumwekeshela kusakilila hamulambu waYesu. (2 Kor. 5:​14, 15) Chatwinkaña cheñi kukooleka ‘kwakudikolesha’ nawamanakwetu niahela. (Rom. 1:12) Chaaka nichaaka, azeya kuspiritu niwena enzaña nakupompa. Amakwawu chayisañumunaña nikufunta kudi Yehova muloña wakuyitambwila chachiwahi. Nawa antu amavulu adi namuchima wakufwila kudiza ekalaña nampwila yakukeña kutachika kwenda munjila yaya kuwumi muloña wayuma yamonañawu nikutiya. Dichaleteshaña tulemesheña nankashi ifuku daChanukishu!

3. Chanukishu chatunuñañeshaña ñahi hamu nawamanakwetu niahela mukaayi kejima? (Talenu cheñi mwevulu.)

³ Toñojokenu cheñi Chanukishu chichatunuñañeshaña hamu nawamanakwetu niahela mukaayi kejima. AYinsahu jaYehova mukaayi kejima apompaña neyi itena hidikuhuma. Wejima wetu twatiyililaña kumpanji yahoshaña hachalemena ifutu danyiloña. Twembaña tumina twakushimeka tuyedi, twahitañeshañamu yifwikija nawa twakulaña chakufuma hamuchima kukulomba  kuwana netu “ameni.” Mumaora 24 hohu, muyipompelu yejima elaña chuma chochimu. Fwikijenu muzañalu watiyañayi Yehova niYesu neyi atumona tunanuñañani hamu nakuyilemesha muniyi njila.

4. Yumanyi yitukuhanjeka muchinu chibaaba?

⁴ Muchinu chibaaba, tukuhanjeka hanawa malwihu: Tunateli kudiloñeshela ñahi chadimu henohu Chanukishu kanda? Tunateli kukwasha ñahi amakwawu kuhetelamu kuChanukishu? Nawa tunateli kukwasha ñahi ana azeya kuspritu? Ñakwilu yanawa malwihu yikutukwasha kwikala adiloñesha nanichi chidika chajila.

TUNATELI KUDILOÑESHELA ÑAHI CHADIMU HENOHU CHANUKISHU KANDA?

5. (a) Muloñadi chitwatela kutoñojokela hakulema kwefutu danyiloña? (Isamu 49:​7, 8) (b) Yumanyi yimunadizili kuvidiyo yinakwila nawu Muloñadi Chafwililiyi Yesu?

⁵ Njila yimu hanjila jasweja kulema yinateli kutukwasha kudiloñeshela chadimu henohu Chanukishu kanda hikutoñojoka hakulema kwamulambu wefutu danyiloña daYesu Kristu. Hitwadi kutwesha etu aweni kudikuula kunshidi nikukufwaku. (Tañenu Isamu 49:​7, 8; talenu cheñi vidiyo yinakwila nawu Muloñadi Chafwililiyi Yesu?) a Yehova hamu niMwanindi ahanini mulambu walema chikupu kuhitila mukwiteja Yesu kuhana wumi windi kukoola etu. (Rom. 6:23) Neyi tutoñojokaña chikupu hayuma yatwililawu kudi Yehova niYesu, tukusakililaña nankashi hefutu danyiloña. Tukuhanjeka hohu yuma yantesha yadiña yakala yatwilililiwu kudi Yehova niYesu. Ilaña henohu kanda, tuhanjekenu ntahi hayuma yadibombeleli mwifutu danyiloña.

6. Yumanyi yabombeleli mwifutu danyiloña?

⁶ Ifutu danyiloña hiwufwetu wafwetañawu neyi kudi chuma chinakukeña kukuulawu. Iyala watachi, Adama, wadiña wawanina hampinji yamuleñeliwu. Chakoñeliyi nshidi, wajimbesheli kukooleka kwakwikala nawumi wahaya nyaaka, bayi kwindi hohuku, ilaña nikwawanyanindi. Hakwila atambuli chuma chajimbesheliyi Adama, Yesu wahanini wumi windi wawanina kwikala mulambu. Hadiñayi hanu hamaseki, Yesu “hakoñelihu nshidiku, nawa mukanwa kindi hiyawaninimu makudiku.” (1 Pet. 2:22) Hampinji yafwileñayi Yesu, wumi windi wawanina wesekeni chikupu nawumi wajimbesheliyi Adama.—1 Kor. 15:45; 1 Tim. 2:6.

7. Kwesekanyi kwahitilimu Yesu hadiñayi hamaseki?

⁷ Yesu watwalekelihu kwovwahila Tata yindi wamwiwulu hela chakwila wahitileña mukweseka kwakuvulu hampinji yadiñayi hanu hamaseki. Hadiñayi kansi, Yesu wovwahilileña wunlomboli wawanvwali jindi abula kuwanina hela chakwila yena wavwalikili wawanina. (Luka 2:51) Hadiñayi kampululu, wakeñekeleña kuumika ikakeja dawantu adi kuletesha abuleña kwovwahila anvwali jindi hela kumuletesha abuli kwikala washinshika kudi Yehova. Chakuliliyi, Yesu wamukaanini Satana hampinji yamwesekeliyi nindi akoñi nshidi nihampinji yamulejeliyi nindi afumpi kashinshi kindi kudi Nzambi. (Mat. 4:​1-11) Satana wakeñeleña chikupu nindi Yesu akoñi nshidi kulonda akañanyi kufweta ifutu danyiloña.

8. Kwesekanyi kukwawu kwomikiliyi Yesu?

⁸ Hazatileñayi mudimu windi hanu hamaseki, Yesu womikili kweseka kukwawu. Amukabishileña nawa akeñeleña kumujaha. (Luka 4:​28, 29; 13:31) Wadiña nakuumika yiluwa yakoñeleñawu akakumulondela. (Maku 9:​33, 34) Hampinji yamuhitañesheleñawu nakumwihujola, amukabishileña nankashi nikumuseha. Kuhiñahu amujahili munjila yayeña nawa yakasawuntu. (Heb. 12:​1-3) Womikili nkawindi kweseka kwakukumishaku, chakadi kumukiña kudi Yehova. b—Mat. 27:46.

9. Twatiyaña ñahi namulambu waYesu? (1 Petulu 1:8)

 ⁹ Mwamweni, Yesu wakabakeni nankashi hakwila ahani ifutu danyiloña. Komana hitwaswejelañaku kumukeña Yesu neyi tutoñojoka hachadihaniniyi yomweni chakufuma hamuchima kukoola etuku?—Tañenu 1 Petulu 1:8.

10. Yumanyi yeliliyi Yehova hakwila ifutu danyiloña adihani?

¹⁰ Indi Yehova? Chumanyi chahaniniyi chakufuma hamuchima hakwila Yesu afweti ifutu danyiloña? Yehova niYesu adikunda chikupu, kudikunda kwekala hohu hakachi katata yawantu namwanindi. (Yish. 8:30) Hanu dinu fwikijenu Yehova chatiyileñayi hakumona Yesu nakuumika kukala kwakuvulu hadiñayi hanu hamaseki. Chakadi nikujina, chamukatili nankashi Yehova hakumona Mwanindi anakumukabisha, anakumukaana nikumweseka.

11. Shimunenu chakutalilahu chinakumwekesha chatiyiliyi Yehova hamujahiliwu Yesu.

¹¹ Nvwali wejima wafwishahu dehi mwana, weluka chichatiyakanaña neyi mwana nafwi. Twakuhwelela chikupu netu kwakekala kusañuka, ilaña chumichi hichamanishaña chikela chekalaña kumuchima wetu neyi tufwisha ntaña yetuku. Ichi chakutalilahu chinatukwashi kwiluka chatiyiliyi Yehova hamweniyi Mwanindi akeñayi nakukabakana nikufwa hadina ifuku mu 33 C.E. c—Mat. 3:17.

12. Chumanyi chitwatela kwila mumpinji yakutwala kuChanukishu?

¹² Kufuma lelu nakushika hefuku daChanukishu, kwila mutachika kudizilahu nsañu yayivulu hefutu danyiloña hakudiza kwankawenu hela haKudifukula kwaChisaka nehi? Zatishenu Chitwa chaKukwasha aYinsahu jaYehova haKusandujola Nsañu hela nyikanda yikwawu yashindamena haBayibolu yinateli kuyikwasha kusandujola chikupu haniyi nsañu. d Cheñi, londelenu ndandanda yakutaña Bayibolu mumpinji yaChanukishu yidi muChihandilu niMudimu Wanetu AkaKristu—Mukanda waKupompa. Nawa hefuku daChanukishu, bayi mwakavulamena kutala progiramu yadimena yaKudifukula kwaNtetemenaku. Neyi tudiloñeshela chadimu henohu Chanukishu kanda, chikutupelela kukwasha akwetu kulonda niwena akahetelimu kuChanukishu.—Ezera 7:10.

KWASHENU AMAKWAWU HAKWILA AKAHETELIMU

13. Chumanyi chatachi chitwatela kwila hakwila tukwashi amakwawu kwinza kuChanukishu?

¹³ Tunateli kukwasha ñahi amakwawu kulonda akahetelimu kuChanukishu? Chakadi nikujina,  chuma chatachi, hikuyitambika kuChanukishu. Kubombela hakutambika antu itwawanaña mpinji yejima mumudimu wakushimwina, tunateli kusonekahu majina awantu itweluka kulonda tuyitambikiku niwena. Mudi awa antu munabombeli antaña jetu, antu itwazataña nawu, akwetu akashikola niantu amakwawu. Hela chakwila tudana makopi akupulinta amavulu ayipapilu yakutambika nachu antu, amakwawu tunateli kuyitemeshela malinki hamafoni. Mukukasumuka antu amavulu anenzi!—Mukwa. 11:6.

14. Shimunenu chuma chamwekeni chinakumwekesha chichalemena kutambika muntu kuChanukishu.

¹⁴ Neyi mumutambika muntu enu aweni kwinza kuChanukishu, chinateli kumusañumuna kwinza kunichi chidika. Ifuku dimu, muhela wukweti nfumwindi wabula kwikala Chinsahu wahayamini chamulejeliwu kudi nfumwindi nawu anakuya hamu kuChanukishu. Chumanyi chaletesheli ahayami? Muloña kunyima wamutambikili kakavulu kuya kuChanukishu, ilaña wayileñaku wanyi. Chumanyi chaletesheli akeñi kuya kuChanukishu haniyi mpinji? Wahosheli nindi: “Anyinkeli chipapilu chakutambika nachu antu kuChanukishu,” walumbulwili nindi amutambikili kudi mukulumpi wamuchipompelu wumu adilukiliyi nindi. Munichi chaaka kushilahu niyaaka yayivulu yalondelelihu, nfumwindi wayileña kuchanukishu.

15. Chumanyi chitwatela kwanukaña neyi tutambika antu kuChanukishu?

¹⁵ Anukenu nenu, hadaha anateli kwikala namalwihu akukeña kutwihulawu kutalisha haChanukishu, sweje-e neyi kanda apompeñahu dehi nanetu. Tukwila chiwahi neyi tutoñojokela chadimu hamalwihu anateli kutwihulawu nikwiluka chitwatela kuyakula. (Kol. 4:6) Chakutalilahu, amakwawu anateli kwihula nawu: ‘Yumanyi yakamwekana hanichi chidika?’ ‘Chikasenda maora añahi?’ ‘Twatela kuvwala yakuvwala yamuchidinyi?’ ‘Mali añahi itwatela kufweta hakwila akatwiteji kunichi chidika?’ ‘Kwakekala kuhana mali hampinji yakupompa?’ Neyi tunakutambika muntu kuChanukishu, twatela kumwihula netu, “Mudihu namalwihu?” kuhiñahu dinu twakula malwihu anateli kwihulayi. Tunateli cheñi kuzatisha vidiyo yaAnukenu Kufwa kwaYesu niyaYumanyi Yamwekanaña Hetala daWanta? kulonda  tumukwashi muntu eluki chitwapompaña. Nawa mukudiza 28 kwamukanda waMunateli Kwikala naMuzañalu Haya Nyaaka! mwekala yikuma yayivulu yayiwahi yitunateli kuzatisha hakumukwasha muntu.

16. Malwihwinyi amakwawu anateli kwihulawu antu anenzi kuChanukishu?

¹⁶ Hanyima yakwila anapompi dehi Chanukishu, antu akweti mpwila yakudiza chalala anateli kwikala namalwihu amakwawu. Anateli kwihula chaletesha kubuli kwikala muntu hela wumu wada dinkendi nikunwa vinyu, hela chaletesha antu antesha hohu adi dinkendi nikunwa vinyu. Anateli cheñi kwihula kulonda eluki mapampa añahi itwekalaña naChanukishu. Nawa hadaha akukeña kwiluka neyi chakwila kupompa kwawaYinsahu jaYehova kwejima dichikwekalaña. Hela chakwila iyi yikuma yayivulu ayilumbululaña kudi nhoshi mumpanji yaChanukishu, antu anenzi nakupompa katachi akukeñeka tuyilumbulwili nsañu yayivulu haniyi yikuma. Chibaaba chidi ha jw.org chidi namutu nawu “Mulandu Nshi Ifyo Inte sha kwa Yehova Bacita Umulaalilo wa kwa Shikulu Fyapusanina ne fyo Imipepele Imbi Icita?” chinateli kutukwasha kwakula malwihu amakwawu anatwihuliwu. Twatela kuzata hakumina ñovu jetu henohu Chanukishu kanda, hampinji yaChanukishu nihanyima yaChanukishu kulonda tukwashi antu adi “nanyichima yashinshika” kuhetela munichi chidika.—Yilw. 13:48.

KWASHENU AZEYA

17. Akulumpi anateli kukwasha ñahi azeya? (Ezekeli 34:​12, 16)

¹⁷ Mumpinji yaChanukishu, akulumpi anateli kukwasha ñahi ana azeya? Yakamenenu chikupu. (Tañenu Ezekeli 34:​12, 16.) Henohu Chanukishu kanda, zatenu hakumina ñovu jenu kulonda muhanjeki nawamanakwetu azeya amavulu. Yilejenu nenu mwayakamenaña nawa munakukeña kuyikwasha munjila yidi yejima yimukutwesha. Yitambikenu akenzi kuChanukishu. Neyi enza, yitambwilenu namuzañalu. Hanyima yaChanukishu, twalekenuhu kwikala nampinji yakuhanjeka nanawa amanakwetu niahela itwakeña, nawa yikwashenu kuspiritu munjila yidi yejima yikuyikwasha kufunta kudi Yehova.—1 Pet. 2:25.

18. Wejima wetu tunateli kukwasha ñahi azeya? (ARoma 12:10)

 ¹⁸ Ejima muchipompelu anateli kukwasha azeyi anenzi kuChanukishu. Munjilanyi? Kuhitila mukuyimwekeshela kukeña, luwi nikalemesha. (Tañenu ARoma 12:10.) Anukenu nenu chatela chayikalilaña awa amanakwetu niahela kwinza nakupompa. Hadaha achiinaña nawu akuyitambwila chiwahi wanyi. e Dichi tondolwelenu kuyihula malwihu akuyitiyisha nsonyi hela kuhosha mazu akuyikata kumuchima. (1 Tes. 5:11) Awa amanakwetu niahela hiyakwetu akakwitiya. Twatiyaña kuwaha kudifukwila cheñi hamu nawu!—Mas. 119:176; Yilw. 20:35.

19. Yumanyi yayiwahi yafumaña mukwanuka kufwa kwaYesu?

¹⁹ Twasakililaña chikupu chatulejawu kudi Yesu nindi twanukeña kufwa kwindi hachaaka-hachaaka, nawa tweluka chumichi chichalemena. Neyi twila mwenimu, tukuhetelamu nawa tukukwasha akwetu munjila jajivulu. (Isa. 48:​17, 18) Twaswejelañaku kumukeña Yehova niYesu. Twamwekeshaña chitwasakililaña hayuma yatwililawu. Twadikundaña chikupu nawamanakwetu niahela. Nawa tunateli kukwasha amakwawu niwena eluki yuma yayiwahi yitwatambwilaña muloña wefutu danyiloña. Dichi wejima wetu tuzati hakumina ñovu jetu kudiloñesha kwanuka Chanukishu chachinu chaaka, ifuku dalema nankashi muchaaka!