1. Engvângin nge Hriatrengna chu kum khata ni pawimawh ber a nih? (Luka 22:19, 20)

 JEHOVA mite tân Krista thih Hriatrengna nî chu kum khata ni pawimawh ber a ni a. Chu nî chu Isua’n hmang chhunzawm zêl tûra a zirtîrte hnêna thu a pêk awmchhun a ni. (Luka 22:19, 20 chhiar rawh.) Hriatrengna nî nghahhlelh chhan tam tak kan nei a. Chûng zînga ṭhenkhat chu i lo enho vang u.

2. Hriatrengna hun kan nghahhlelh chhan ṭhenkhat chu eng nge ni?

² Hriatrengna inkhâwm chuan tlanna hlutna ngaihtuah tûrin min ṭanpui a. Isua inthawina chunga kan lâwmzia lantîr theih dân kawng tam tak min hriat nawntîr a ni. (2 Kor. 5:14, 15) Chu bâkah, chu chuan kan unaute nên “inthlamuan tawn theihna” hun remchâng min pe bawk. (Rom 1:12) Kum tin hian, rawngbâwlnaa tel tawh lote pawh an rawn tel ṭhîn a. Unaute’n hmangaihna nei taka an lo lawm avângin ṭhenkhat chu Jehova hnênah an kîr leh hial a ni. Tichuan, tuina nei tam tak pawh an thil hmuh leh an thu ngaihthlâkte avângin, nunna kawng zawh ṭan tûra chêttîrin an awm a. Chuvângin, Hriatrengnain kan thinlunga hmun pawimawh tak a luah chu thil mak a ni lo!

3. Engtin nge Hriatrengnain khawvêl puma unaute a inpumkhattîr? (Milem en bawk rawh.)

³ Hriatrengnain khawvêl puma unaute a inpumkhattîr dân chu ngaihtuah bawk ang che. Khawvêl pumah Jehova Thuhretute chu nî a tlâk rualin kan inhmukhâwm a. Tlanna a pawimawhzia târ langtu thusawi chu kan ngaithla a. Tichuan, fakna hla pahnih sain, chhang leh uain chu kan inhlân chhâwng a,  ṭawngṭaina palite chu thinlung takin kan “amen” bawk a ni. Dârkâr 24 chhûngin kohhran zawng zawngte chuan chutiang chiah chuan an hmang a. Jehova leh Isua’n hetianga anmahni kan chawimawi tih an hmuh huna an lâwm dân tûr chu i mitthla thei em?

4. He thuziakah hian eng nge kan sawiho vang?

⁴ He thuziakah hian zawhna pathum kan sawiho vang: Engtin nge Hriatrengna atâna kan thinlung kan buatsaih theih? Engtin nge Hriatrengna hlâwkpui tûrin mi dangte kan ṭanpui theih? Engtin nge rawngbâwlnaa tel tawh lote chu kan ṭanpui theih? Hêng zawhnate chhânna hian chu hun serh pawimawh tak atâna inpeih tûrin min ṭanpui ang.

ENGTIN NGE HRIATRENGNA ATAN KAN THINLUNG KAN BUATSAIH THEIH?

5. (a) Engvângin nge tlanna hlutna chu kan ngaihtuah ang? (Sâm 49:7, 8) (b) Engvângin Nge Isua A Thih? tih video aṭangin eng nge i zir?

⁵ Hriatrengna atâna kan thinlung kan buatsaih theih dân kawng pawimawh tak pakhat chu Isua Krista inthawina hlutzia ngaituahna hi a ni a. Keimahni chuan engtikah mah sual leh thihna ata kan intlan thei ngai lo vang. (Sâm 49:7, 8 chhiar rawh; Engvângin Nge Isua A Thih? tih video chu en bawk rawh.) a A Fapain kan tâna a nun a pêkna tûr chu buatsaihin, Jehova leh Isua’n inpêkna nasa tak an lantîr a. (Rom 6:23) Kan tâna an inpêkna chungchâng kan chhût ngun poh leh tlanna chu kan ngai hlu lehzual dâwn a ni. Tûnah chuan, Jehova leh Isua min tihsak thil ṭhenkhatte kan sawiho vang a. Mahse, a hmasain tlannaah chuan eng nge tel?

6. Tlannaah chuan eng nge tel?

⁶ Tlanna chu thil eng emaw neih lêt leh nâna a man pêk hi a ni a. Mihring hmasa ber Adama chu ṭha famkima siam a ni. Mahse, thil a tihsual khân chatuana nun theihna thilpêk chu amah leh a thlah zawng zawngte’n an chân ta a. Adama hloh tâk chu nei lêt leh tûrin Isua’n a nun ṭha famkim a hlân a. Leia a awm chhûng zawng khân “ani chuan thil rêng a tisual lo va, a kaah ngamthlêmna a awm hek lo.” (1 Pet. 2:22) Isua a thih khân ṭha famkim a ni a; chuvângin, a nun hlutna chu Adama hloh tâk nên a intluk chiah a ni.—1 Kor. 15:45; 1 Tim. 2:6.

7. Leia a awm laia Isua fiahna tawh ṭhenkhat chu eng nge ni?

⁷ Isua chuan leia a awm lai khân fiahna chi hrang hrang tâwk mah se, a Pa vâna mi thu a zâwm tlat a. Naupang a nih lai khân, mi ṭha famkim ni mah se, ṭha famkim lo a nu leh pate thuneihna hnuaia a intukluh a ngai a ni. (Lk. 2:51) Tleirâwl a nihin, thuawih lo tûr leh rinawm lo tûra nawrna eng pawh chu a do a ngai a. A puitlin hnuah pawh a rinawmna chunga fiahna pawh tiamin, Diabol Setana thlêmnate chu a do a ngai bawk. (Mt. 4:1-11) Isua’n tlanna a pêk theih loh nân Setana chuan thil tihsualtîr a tum nghet tlat a ni.

8. Isua’n eng fiahna dangte nge a tawh?

⁸ Isua chuan leia rawng a bâwl lai khân fiahna dangte pawh a tâwk a. Tihduhdahna a tawrh bâkah, a nun atâna dinhmun hlauhawm tak tawh châng a nei a ni. (Lk. 4:28, 29; 13:31) A zirtîrte ṭhat famkim lohna chu a dawhtheih a ngai bawk a. (Mk. 9:33, 34) A chung thu rêlsak a nih lai khân sawisak leh diriam a ni a. Chumi hnuah, a na thei ang ber leh a zahthlâk thei ang bera tihhlum a ni. (Heb. 12:1-3) Chu bâkah, a nun tâwp lamah fiahnate chu Jehova vênhimna tel lova chhel taka a tawrh ngai bawk a ni. b—Mt. 27:46.

9. Isua inthawina chu engtin nge kan ngaih? (1 Petera 1:8)

 ⁹ Isua’n tlanna pe tûrin thil tam tak a tuar tih a chiang hle a. Kan tâna inhuam taka a nun a hlanna kan ngaihtuah hian, ani chu kan hmangaih lehzual a ni lâwm ni?—1 Petera 1:8 chhiar rawh.

10. Tlanna pe tûrin Jehova’n eng inpêkna nge a neih?

¹⁰ Jehova chungchângah eng nge kan hriat theih? Isua’n tlanna a pêk theih nân eng thil nge phal taka a hlan? Jehova leh Isua chuan pafa inlaichînna nghet ber an nei a. (Thuf. 8:30) Isua’n leia fiahna chi hrang hrang a tawh laia Jehova tawrh dân tûr chu han ngaihtuah teh. A Fapain dik lo taka cheibâwlnate, mite hnâwlnate leh, hrehawmnate a tawrh khân a rilru a na hle ngei ang.

11. Isua tihhlum a nih laia Jehova tawrh dân tûr târ langtu entîrna pe rawh.

¹¹ Thihnaa fate chân tawh nu leh pate chuan chutiang chânnain tawrhna nasa tak a thlenzia an hria ang a. Thawhleh beiseina nghet tak nei mah ila, chu chuan hmangaih takte thihna avânga tawrhna chu a la bo thei chuang lo. Hei hian C.E. 33 c nipui laia, hrehawm tam tak tuara a Fapa duh tak thihna a hmuh laia Jehova tawrh dân tûr chu hre thiam tûrin min ṭanpui a ni.—Mt. 3:17.

12. Hriatrengna thlen hma chawlhkârahte eng nge kan tih theih?

¹² Tûn aṭanga Hriatrengna lo thlen hmain, engvângin nge tlanna ṭanchhana mi mal inzirna, a nih loh leh chhûngkuaa Pathian biakna in neih loh vang? Chumi chungchâng tam lehzuala hre tûrin Jehova Thuhretute Tâna Zir Bingna Hmanrua leh Bible zirna ṭanpuitu dangte chu hmang ang che u. d Chu bâkah, Kan Kristian Nun leh Rawngbâwlna—Inzirna Lehkhabu- a Hriatrengna Bible chhiarna hunduan chu zui u la. Tichuan, Hriatrengna nîa a bîk taka buatsaih Morning Worship program chu en ngei bawk ang che u. Hriatrengna atâna kan thinlung kan lo buatsaih hian keimahniin kan hlâwkpui bâkah, mi dangte pawh hlâwkpui tûrin kan ṭanpui thei a ni.—Ezr. 7:10.

HLAWKNA NEI TURIN MI DANGTE CHU ṬANPUI RAWH

13. Hriatrengna hlâwkpui tûra mi dangte kan ṭanpui theih dân rahbi hmasa ber chu eng nge ni?

¹³ Hriatrengna inkhâwm hlâwkpui tûrin engtin nge mi dangte chu kan ṭanpui theih?  Rahbi hmasa ber chu, chumia tel tûra sâwm hi a ni. Rawngbâwlnaa kan mi tawhte bâkah, mi dang sâwm kan duhte hming chu kan ziak chhuak thei a. Chûng zîngah chuan kan chhûngte, kan hnathawhpuite, kan school kalpuite leh, mi dangte an tel thei a ni. Sâwmna lehkha chhutchhuah sa kan nei tam tâwk lo a nih pawhin, a link chu kan thawn thei a. Kan beisei aia tam an lo tel mai thei asin!—Thur. 11:6.

14. kan hmêlhriatte sâwmnain thil a tihtheihzia entîrna pe rawh.

¹⁴ Kan hmêlhriatte sâwmna pawhin nasa takin thil a ti thei a. Ni khat chu, unaunu pakhat chuan Thuhretu ni lo a pasalin Hriatrengnaa tel a tum thu a hrilh chuan mak a ti hle a ni. Engvângin nge? A chhan chu, tûn hmain vawi tam tak a lo sâwm tawh a; mahse, a pasal chu Hriatrengnaah a tel ngai lo. Chumi ṭum chuan engin nge tidanglam? “Sâwmna lehkha ka dawng a,” tiin tualchhûnga a hmêlhriat kohhran upa pakhatin sâwmna a pêk thu a sawi a. A pasal chu chumi kum leh a hnu kum tam tak chhûng Hriatrengna inkhâwmah a tel ta a ni.

15. Hriatrengna inkhâwma tel tûra mite kan sâwm hunah eng nge kan hriat reng ang?

¹⁵ Kan mi sâwmte chu a vawi khatna atâna rawn inkhâwm an nih chuan zawhna ṭhenkhat an nei thei tih hre reng ang che. Min zawh mai theih zawhnate atân kan lo inbuatsaih lâwk thei a. (Kol. 4:6) Entîr nân, mi ṭhenkhat chuan: ‘Hriatrengna chu engtin nge in hman ṭhin?’ ‘Engtia rei nge ni ang?’ ‘Eng nge ka hâk ang?’ ‘Luh man a awm em?’ ‘Thawhlâwm khawn a ni ang em?’ tihte an ngaihtuah thei a. Chuvângin, Hriatrengnaa tel tûra mite kan sâwm hunah, “Zawh duh i nei em?” tia zâwtin an zawhnate chu kan chhânsak thei a ni. Chu bâkah, Isua Thihna Hre Reng Rawh tih leh Kingdom Hall-ah Eng Nge Thleng Ṭhîn? tih video-te hmangin kan inkhâwm dân hre thiam tûrin kan ṭanpui thei a. Chatuanin I Hlim Thei! tih lehkhabu zirlai 28-naah chuan kan sawipui theih tûr thu pawimawh tam tak a chuang bawk a ni.

16. Hriatrengnaa lo inkhâwmte’n eng zawhna dangte nge an neih mai theih?

 ¹⁶ Hriatrengna inkhâwma an tel hnuah, tuina nei mi tharte chuan zawhna dangte an nei thei a. Chhang leh uain eitu an awm loh chhan emaw, mi tlêm tê chauhvin an ei chhan emaw chu an ngaihtuah thei a ni. Kum khata Hriatrengna kan hman zât chu hriat an duh thei bawk a. Chu bâkah, Jehova Thuhretute inkhâwm zawng zawng chu Hriatrengna inkhâwm anga hman a nih leh nih loh hriat an duh thei bawk. Chûng zawhnate chu Hriatrengna thusawia târ lan ṭhin ni mah se, lo inkhâwm tharte chuan chiang lehzuala hrilhfiah an mamawh thei a. JW.ORG-a “Engvângin Nge Jehova Thuhretute Lalpa Zanriah Hman Dân Chu Kohhran Dangte Hman Dân Nên A Inan Loh?” tih thuziak chuan an zawhna ṭhenkhat chhâng tûrin min ṭanpui thei a ni. He hun pawimawh tak hi ‘rilru dik tak neite’n’ an hlâwkpui theih nâna ṭanpui tûrin kan tih theih apiang chu, Hriatrengna thlen hma, Hriatrengna hun chhûng leh, Hriatrengna hnuahte tih kan duh a ni.—Tirh. 13:48, NWT.

RAWNGBAWLNAA TEL TAWH LOTE CHU ṬANPUI RAWH

17. Engtin nge upate’n rawngbâwlnaa tel tawh lote chu an ṭanpui theih? (Ezekiela 34:12, 16)

¹⁷ Hriatrengna hun chhûngin, engtin nge upate’n rawngbâwlnaa tel tawh lote chu an ṭanpui theih? An ngaihsakzia lantîrna hmangin a ni. (Ezekiela 34:12, 16 chhiar rawh.) Hriatrengna hmain chutiang mi a tam thei ang ber chu biak pawh tum la. I hmangaihzia leh i theih ang anga ṭanpui i duhzia hriat chiantîr la, Hriatrengnaa tel tûrin sâwm ang che. An rawn tel chuan ṭha takin lo lâwm la. Hriatrengna hnuah pawh anni chu be pawh zêlin, Jehova hnêna kîr leh tûra an mamawh thlarau lam ṭanpuina eng pawh chu pe ang che.—1 Pet. 2:25.

18. Engtin nge rawngbâwlnaa tel tawh lote chu kan ṭanpui theih? (Rom 12:10)

¹⁸ Kohhrana mi tinte pawhin rawngbâwlnaa tel tawh lote chu an ṭanpui thei a ni. Engtin  nge? Anni chu hmangaih tak, ngilnei tak leh, zah taka cheibâwlna hmangin a ni. (Rom 12:10 chhiar rawh.) Chûng berâm duhawm takte tân inkhâwma rawn tel leh chu thil huphurhawm tak a ni thei tih hria la. Ṭha taka lawm hlawh loh an hlau pawh a ni thei. e Chuvângin, zahna thlen thei zawhna zawh chu pumpelh la, an rilru tina thei thute sawi lo tûrin fîmkhur ang che. (1 Thes. 5:11) Anni chu kan Kristian unaute an ni a. Kan ruala Jehova an rawn be leh thei hi kan va lâwm tak êm!—Sâm 119:176; Tirh. 20:35.

19. Isua thih hriatrengna chu eng kawngtein nge kan hlâwkpui?

¹⁹ Isua’n kum tina Hriatrengna hmang tûra thu min pêk avângin kan lâwm a; chumi pawimawh êm êm chhan pawh kan hria a ni. Hriatrengna inkhâwma kan tel hian keimahni leh mi dangte’n kawng tam takin kan hlâwkpui a. (Is. 48:17, 18) Jehova leh Isua chu kan hmangaih lehzual a. An thil min tihsakte avânga kan lâwmzia kan lantîr a ni. Kan Kristian unaute nêna kan inlaichînna pawh kan tinghet lehzual a. Chu bâkah, tlanna zâra lo awm malsâwmnate dawng tûrin mi dangte chu kan ṭanpui thei bawk a ni. Chuvângin, Hriatrengna—kum khata ni pawimawh ber—atâna inpeih tûrin kan tih theih apiang i ti ang u!