1. ¿Tiquʼn a qʼij te Conmemoración mas nim toklen toj abʼqʼi? (Lucas 22:​19, 20).

 AJU qʼij mas nim toklen kye tmajen Jehová, aju Conmemoración tiʼj tkyimlen Jesús. Oʼkx nabʼitz lu kyaj tqʼamaʼn Jesús tuʼn ttzaj qnaʼn (kjawil uʼjit Lucas 22:​19, 20). Qaj tuʼn tpon tbʼanel qʼij lu. Qo xnaqʼtzan tiʼj tiquʼn.

2. ¿Tiquʼn qaj tuʼn tpon kanin qʼij te Conmemoración?

² In nonin Conmemoración qiʼj tuʼn qximen tiʼj jniʼ toklen chojbʼil bʼant tuʼn Jesús ex in tzaj tnaʼn qe tzeʼn jaku txi qqʼoʼn chjonte tiʼj (2 Cor. 5:​14, 15). Ax ikx in tzaj tqʼoʼn ambʼil qe tuʼn qten kyukʼil erman ex «kbʼajel qkyuwsan qibʼ qxolx» (Rom. 1:12). Tkyaqil abʼqʼi, ateʼ nim inactivo in che pon toj Conmemoración ex ateʼ junjuntl in kubʼ kyximen tuʼn kymeltzʼaj tukʼil Jehová tuʼnju in kubʼ kyyekʼin erman tbʼanel kymod kyukʼil. Nya oʼkxju, ax ikx ateʼ nim xjal in che jaw labʼin tiʼjju in nok kykeʼyin ex tiʼjju in nok kybʼiʼn. Tuʼntzunju, in kubʼ kyximen tuʼn kyxnaqʼtzan tiʼj Tyol Dios. Tuʼn tkyaqil jlu, in nok Conmemoración te jun qʼij nim toklen.

3. ¿Tzeʼn in nonin Conmemoración tuʼn tok qqʼoʼn qwitz tiʼj mujbʼabʼil at toj ttnam Jehová? (Ax ikx qʼonka twitza tiʼj foto).

 ³ Ax ikx, qaj tuʼn tpon qʼij lu tuʼnju in nok qqʼoʼn qwitz tiʼj mujbʼabʼil at toj ttnam Jehová. Twitz tkyaqil Txʼotxʼ, in nok kychmon kyibʼ testigo de Jehová akux in kux bʼaj Qʼij toj junjun lugar. Qkyaqilx in nok qbʼiʼn jun chikʼbʼabʼil in yolin tiʼj chojbʼil, in xi qbʼitzin kabʼe bʼitz, in nikʼx qʼoʼn pan ex vino ex tuʼn tkyaqil qanmi in xi qqʼamaʼn «ikxwitju» tiʼj kyaje naʼj Dios. In bʼant tkyaqil jlu kyuʼn congregación toj junx qʼij. In kubʼ tnaʼn Jehová ex Jesús nim tzalajbʼil aj tok kyqʼoʼn kywitz kyiʼj kykyaqil qeju in xi kyqʼoʼn chjonte kye.

4. ¿Tiʼ kʼelel qnikʼ tiʼj toj xnaqʼtzbʼil lu?

⁴ Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu: ¿Tzeʼn jaku bʼaj qbʼinchaʼn qten tiʼj Conmemoración? ¿Tzeʼn jaku qo onin kyiʼj xjal tuʼn kypon? Ex ¿tzeʼn jaku qo onin kyiʼj inactivo tuʼn kyten? Qa ma qo xnaqʼtzan kyiʼj xjel lu, kʼonil qiʼj tuʼn tbʼaj qbʼinchaʼn qten tiʼj qʼij mas nim toklen.

¿TZEʼN JAKU BʼAJ QBʼINCHAʼN QTEN TIʼJ CONMEMORACIÓN?

5. a) ¿Tiquʼn nim toklen tuʼn qximen tiʼj jniʼ toklen chojbʼil? (Salmo 49:​7, 8). b) Qʼamantza tiʼ ma tzʼel tnikʼa tiʼj toj video ¿Tiquʼn kyim Jesús?

⁵ Jun kyxol qe tiʼ nim toklen jaku bʼant quʼn tuʼn tbʼaj qbʼinchaʼn qten tiʼj Conmemoración, aju qa ma qo ximen tiʼj jniʼ toklen chojbʼil bʼant tuʼn Jesús. Mlay bʼant tuʼn qtzaqpaj tiʼj il ex kamik qjunalx (kjawil uʼjit Salmo 49:​7, 8; ax ikx qʼonka twitza tiʼj video ¿Tiquʼn kyim Jesús?). a Tuʼntzunju, kubʼ t-ximen Jehová tuʼn tkyim Tkʼwal tuʼn qpaj. Kykabʼil bʼant jun matij chojbʼil kyuʼn (Rom. 6:23). Qa mas ma qo ximen tiʼjju bʼant tuʼn Jehová ex Jesús qiʼj, mas kʼokel qqʼoʼn toklen chojbʼil. Atzun jaʼlo, qo xnaqʼtzan kyiʼj junjun tiʼ bʼant tuʼn Jehová ex Jesús qiʼj. Pero tnejel, qo yolil tiʼj tiʼ t-xilen chojbʼil.

6. ¿Tiʼ bʼant tej ttzaj qʼoʼn chojbʼil?

⁶ Atz in yolin chojbʼil tiʼj jun tiʼ in xi qʼet tuʼn ttzaj qlaqʼoʼn jun tiʼ juntl maj. Tzʼaqli Adán tej tkubʼ tbʼinchaʼn il, pero mintiʼ xi qʼoʼn ambʼil te tuʼn tanqʼin te jumajx ex kye qe t-xeʼchil tuʼnju bʼinchan il. Tuʼn tten juntl maj aju otoq txi tnajsaʼn Adán, xi tqʼoʼn Jesús tchwinqlal tzʼaqli te chojbʼil. Toj tkyaqil ambʼil tej tanqʼin Jesús twitz Txʼotxʼ «mintiʼ jun il o tbʼincha [ . . . ] ex mintiʼ o tma jun yol te sbʼubʼl» (1 Ped. 2:22). Tzʼaqli Jesús tej tkyim ik tzeʼn te Adán. Tuʼntzunju, ax chojbʼil xi tqʼoʼn ik tzeʼn otoq txi tnajsaʼn Adán (1 Cor. 15:45; 1Tim. 2:6).

7. Qʼamantza jun nya bʼaʼn ok weʼ Jesús twitz.

⁷ Tej tten Jesús twitz Txʼotxʼ, xi tbʼiʼn Tman toj tkyaqil maske ok weʼ twitz nim nya bʼaʼn. Tzʼaqli Jesús tej kʼwalxtoq, pero xi tbʼiʼn qe tman maske nya tzʼaqliqe (Luc. 2:51). Ex tej kuʼxun, bʼalo xi qʼamaʼn te kyuʼn txqantl tuʼn miʼn txi tbʼiʼn qe tman moqa tuʼn miʼn tten tzʼaqli twitz Jehová. Ax ikx tej tchʼiy Jesús, ok toj joybʼil tuʼn Satanás ex xi tqʼamaʼn te tuʼn miʼn tten tzʼaqli twitz Jehová (Mat. 4:​1-11). Bʼant jlu tuʼn Satanás tuʼntzun miʼn txi tqʼoʼn Jesús aju chojbʼil.

8. ¿Alkye junjuntl prueba ok weʼ Jesús twitz?

⁸ Ax ikx ok weʼ Jesús kywitz junjuntl prueba tej tpakbʼan. Jun techel, e ok lepeʼ aj qʼoj tiʼj ex kyajtoq tuʼn tkubʼ kybʼyoʼn (Luc. 4:​28, 29; 13:31). Ex iltoq tiʼj tuʼn  tikʼx kypaltil t-xnaqʼtzbʼen tuʼn (Mar. 9:​33, 34). Tej tok toj juicio, ok kʼixbʼisan ex e xmayin tiʼj. Yajxitl, kubʼ bʼyoʼn ik tzeʼn jun nya bʼaʼn xjal ex ikʼx nim yajbʼil tuʼn (Heb. 12:​1-3). Tej chʼinxtoq tkyim Jesús, mintiʼ xqʼuqin Jehová tiʼj. Tuʼntzunju, ikʼx tkyaqil nya bʼaʼn tuʼn tuʼn tex tipumal (Mat. 27:46). b

9. ¿Tiʼ in kubʼ qnaʼn tiʼj chojbʼil bʼant tuʼn Jesús? (1 Pedro 1:8).

⁹ Ikʼx nim yajbʼil tuʼn Jesús tej t-xi tqʼon tibʼ tuʼn tkyim. Aj qximen tiʼj tkyaqilju bʼant tuʼn, in chʼiy qkʼujlabʼil tiʼj (kjawil uʼjit 1 Pedro 1:8).

10. ¿Tiʼ bʼant tuʼn Jehová tuʼntzun ttzaj tqʼoʼn chojbʼil tuʼn qklet?

¹⁰ ¿Tiʼ bʼant tuʼn Jehová tuʼntzun ttzaj tqʼoʼn chojbʼil bʼant tuʼn Jesús? Ik tzeʼn ojtzqiʼn quʼn, at jun tbʼanel tamiwbʼil Jehová tukʼil Jesús, aju Tkʼwal (Prov. 8:30). Tuʼntzunju, qo ximen tiʼj tiʼ kubʼ tnaʼn Jehová tej tok tkeʼyin Jesús tej tok weʼ twitz nim nya bʼaʼn tej tten twitz Txʼotxʼ. Jaku txi qqʼamaʼn qa tzaj nim tbʼis Jehová tej t-xi qʼamaʼn nya ax tok yol tiʼj Tkʼwal, tej tel ikʼun ex tej tbʼaj kʼixbʼisan.

11. Qʼamantza jun techel in tzaj tyekʼin tiʼ kubʼ tnaʼn Jehová tej tkyim Tkʼwal.

¹¹ Ojtzqiʼn kyuʼn mambʼaj o kyim jun kykʼwal jniʼ bʼis in kubʼ kynaʼn aj tbʼaj jlu. Ax tok, ojtzqiʼn quʼn qa che kjawil anqʼin kyimni, pero nya a t-xilen jlu qa mlayx kubʼ qnaʼn bʼis aj tkyim jun xjal kʼujlaʼn quʼn. Tuʼn techel lu, in nel qnikʼ tiʼj bʼis kubʼ tnaʼn Jehová tej tkyim Tkʼwal kʼujlaʼnxix tuʼn ex tej tikʼx kʼixkʼoj tuʼn toj abʼqʼi 33 (Mat. 3:17). c

12. ¿Tzeʼn jaku tzʼajbʼen ambʼil quʼn akux in pon qʼij te Conmemoración?

¹² Akux in pon qʼij te Conmemoración, jaku xnaqʼtzana tjunalxa moqa kyukʼil toj tjaya tiʼj chojbʼil. Tuʼn tel mas tnikʼa tiʼj xnaqʼtzbʼil lu, jaku tzʼajbʼen Onbʼil tuʼn kyxnaqʼtzan testigos de Jehová tuʼna moqa junjuntl uʼj. d Ax ikx, jaku che jaw tuʼjina taqikʼ Tyol Dios tiʼj Conmemoración, aʼyeju in che kanet quʼn toj Uʼj te aqʼuntl toj chmabʼil Kyanqʼibʼil Okslal ex Kypakbʼabʼil. Ex miʼn tzikʼ tnaʼl tuʼna tuʼn tok tqʼoʼn twitza tiʼj adoración matutina tiʼj Conmemoración. Qa ma bʼaj qbʼinchaʼn qten  tiʼj qʼij lu, jaku qo onin kyiʼj txqantl (Esd. 7:10).

QO ONIN KYIʼJ TXQANTL TUʼN KYTEN TOJ CONMEMORACIÓN

13. ¿Tiʼ jaku bʼant quʼn tuʼn qonin kyiʼj xjal tuʼn kyten toj Conmemoración?

¹³ ¿Tzeʼn jaku qo onin kyiʼj txqantl tuʼn kyten toj Conmemoración? Tnejel, bʼaʼn tuʼn t-xi qqʼoʼn txokbʼil kye. Nya oʼkx jaku txi qqʼoʼn txokbʼil toj pakbʼabʼil, ax ikx jaku bʼaj qbʼinchaʼn jun lista kyiʼj xjal qaj tuʼn t-xi qqʼoʼn txokbʼil kye. Ik tzeʼn qe toj qja, qe qukʼil toj aqʼuntl, toj escuela ex junjuntl. ¿Yajtzun qa ma che kubʼaj txokbʼil? Jaku tzʼajbʼen enlace tiʼj txokbʼil quʼn. Qa ma bʼant jlu quʼn, jaku qo jaw labʼin tiʼj jniʼ xjal jaku che pon toj Conmemoración (Ecl. 11:6).

14. Qʼamantza jun techel in tzaj tyekʼin qa tbʼanel aj t-xi qqʼoʼn txokbʼil tiʼj jun xjal.

¹⁴ Miʼn kubʼ qximen qa nya nim toklen jun txokbʼil in xi qqʼoʼn. Jaw labʼin jun ermana tej t-xi tqʼamaʼn tchmil te qa kxeltoq toj Conmemoración. ¿Tiquʼn? Tuʼnju otoq txi tqʼoʼn ermana nim maj txokbʼil tiʼj ex mintiʼtoq in xiʼ. ¿Tiquʼntzun chʼexpaj t-ximbʼetz tchmil ermana? Tzaj tchikʼbʼaʼn tchmil ermana qa ojtzqintoq jun ansyan tuʼn ex otoq txi tqʼoʼn txokbʼil tiʼj. Pon tchmil ermana toj Conmemoración aju ex kyoj txqantl.

15. ¿Tiʼ jaku bʼaj tiʼj jun xjal toj Conmemoración?

¹⁵ Aj t-xi qqʼoʼn txokbʼil tiʼj jun xjal tuʼn tpon toj Conmemoración, jakulo tzaj tqanin junjun xjel, mas qa naʼmx tten jun maj toj jun chmabʼil. Tuʼntzunju, bʼaʼn tuʼn qximen tiʼjju jaku tzaj tqanin ex tzeʼn jaku txi qtzaqʼweʼn (Col. 4:6). Jun techel, bʼalo jaku kubʼ t-xjelin jlu: «¿Tiʼ in bʼant toj Conmemoración? ¿Jniʼ ambʼil in ten? ¿Tzeʼn qxbʼalun kʼokel? ¿Ilpe tiʼj tuʼn t-xi chjet tuʼn qokx? ¿In jawpe chmet pwaq?». Tbʼanel tuʼn t-xi qqanin te xjal qa at jun t-xjel ex jaku txi qtzaqʼweʼn aju taj tuʼn tel tnikʼ tiʼj. Ax ikx, jaku che ajbʼen video quʼn Nabʼitz Tkyimlen Jesucristo  ex ¿Tiʼ in bʼaj toj jun Ja te Chmabʼil? Nya oʼkxju, ax ikx jaku qo yolin tukʼil xjal kyiʼj junjun nabʼil in che kanet quʼn toj libro Tzalaja tiʼj tanqʼibʼila toj xnaqʼtzbʼil 28.

16. ¿Tiʼ junjuntl tiʼ jaku tzaj tqanin xjal qe?

¹⁶ Ya otoq ten xjal toj Conmemoración ex jakulo tzaj tqanin junjun xjel. Bʼalo jaku tzaj tqanin tiquʼn ni jun in xi twaʼn pan ex in xi tkʼan vino. Jakulo tzaj tqanin jteʼ maj in kubʼ qikʼsaʼn Conmemoración. Tajlo tuʼn tel tnikʼ tiʼj qa ax jlu in bʼant quʼn kyoj kykyaqil chmabʼil. Ax tok, in tzaj qʼoʼn tqanil tiʼj jlu toj chikʼbʼabʼil te Conmemoración, pero tajlo xjal tuʼn tok tbʼiʼn mas tqanil. Tuʼn t-xi qqʼoʼn tzaqʼwebʼil kyiʼj xjel lu, jaku tzʼajbʼen xnaqʼtzbʼil lu quʼn «¿Tiquʼn junxitl alkye tten in kubʼ kyikʼsaʼn testigos de Jehová aju Wabʼj te Qale te Jesús kywitz txqantl okslabʼil?», aju at toj jw.org. Qaj tuʼn t-xi qbʼinchaʼn tkyaqilju jaku bʼant quʼn toj ambʼil te Conmemoración tuʼn qonin kyiʼj xjal at jun «tbʼanel kyanmi» (Hech. 13:​48, TNM).

QO ONIN KYIʼJ INACTIVO

17. ¿Tzeʼn jaku che onin ansyan kyiʼj inactivo? (Ezequiel 34:​12, 16).

¹⁷ ¿Tzeʼn jaku che onin ansyan kyiʼj inactivo toj ambʼil te Conmemoración? In bʼant kyuʼn aj kyximen kyiʼj (kjawil uʼjit Ezequiel 34:​12, 16). Aqeye ansyan, tbʼanel qa ma che yoline kyukʼil inactivo naʼmxtoq tok Conmemoración. Kyqʼamanxe kye qa in che ximane kyiʼj ex qa jaku txi kybʼinchaʼne noq tiʼxku tuʼntzun kyonine kyiʼj. Kyqʼonxe txokbʼil kyiʼj tuʼn kypon toj Conmemoración. Qa ma che pon, kykʼamoʼnxe tukʼil kʼujlabʼil. Aj tkubʼaj Conmemoración, jaku che yoline kyukʼil ex jaku txi kyqʼoʼne onbʼil kye tuʼntzun kymeltzʼaj juntl maj tukʼil Jehová (1 Ped. 2:25).

18. ¿Tzeʼn jaku qo onin qkyaqilx kyiʼj inactivo? (Romanos 12:10).

¹⁸ Kykyaqil erman jaku che onin kyiʼj  inactivo aj kypon toj Conmemoración. Jaku bʼant kyuʼn aj tkubʼ kyyekʼin kykʼujlabʼil, tbʼanel kymod ex aj tok kyqʼoʼn kyoklen (kjawil uʼjit Romanos 12:10). Qnaʼntz, bʼalo kwest in nela toj kywitz inactivo tuʼn kypon juntl maj toj jun chmabʼil. Bʼalo in tzaj bʼaj kykʼuʼj tiʼj kymod erman kbʼel kyyekʼin kyukʼil. e Tuʼntzun, miʼn txi qqanin junjun xjel kye aju jaku kubʼ kynaʼn nya bʼaʼn tuʼn (1 Tes. 5:11). Kukx in che ok inactivo te qerman ex in qo tzalaj tuʼnju in qo kʼulin junx te Jehová kyukʼil (Sal. 119:176; Hech. 20:35).

19. ¿Tzeʼn in nonin qiʼj aj tkubʼ qikʼsaʼn tkyimlen Jesús?

¹⁹ Ik tzeʼn ma qo xnaqʼtzan tiʼj, mintiʼ in qo jaw labʼin tiʼj tiquʼn tqʼama Jesús tuʼn tkubʼ qikʼsaʼn tkyimlen tkyaqil abʼqʼi. Qa ma kubʼ qikʼsaʼn, kʼonil qiʼj ex kyiʼj txqantl xjal (Is. 48:​17, 18). Ax ikx, kʼonil qiʼj tuʼn tok qkʼujlaʼn mas Jehová ex Jesús. Nya oʼkxju, ax ikx in tzaj tqʼoʼn ambʼil qe tuʼn tkubʼ qyekʼin qa in xi qqʼoʼn chjonte kye tiʼjju o bʼant kyuʼn qiʼj. Ex in nonin tuʼn qten junx kyukʼil erman ex tuʼn qonin kyiʼj xjal tuʼn tel kynikʼ tiʼj tiʼ jaku bʼant kyuʼn tuʼn ttzaj kykʼamoʼn kʼiwlabʼil in tzaj tqʼoʼn chojbʼil. Tuʼntzunju, bʼaʼn tuʼn tok tilil quʼn tuʼn tbʼaj qbʼinchaʼn qten tiʼj Conmemoración, aju qʼij mas nim toklen toj abʼqʼi.