KJOAʼMIYA XI CHOTʼAYA 2
KJOAJNDA 19 Je Kjoabichile Nainá
A jetibijnandalai nga kjoaʼaítsjenya Kjoabiyale Cristo
“Kʼoatʼiaon kuibi jméni nga nda kʼoéjintakonsínináo” (LUC. 22:19).
XI TÍNCHJA̱NI
Ánni nga nʼio tjínnile kjoandosin nga faʼaitsjenya Kjoabiyale Cristo. Jméni xi sʼiaan nga tongini kuiyondaa nga koanngián nga kui nichxin, kʼoa jósʼin kuinyakoaa xi kjaʼaí nga kʼoati katafi.
1. Ánni nga kui xi ngisa chjí ʼyañá nga faʼaitsjenya Kjoabiyale Cristo (Lucas 22:19, 20).
NʼIO chjí ʼyaa ñá xi choʼndale Jeobá maa nga nikjaʼaitsjenyá Kjoabiyale Cristo nga xki̱ nó. Tokui xi kʼoakitso Jesús nga si̱kjaʼaitsjenyá nga xki̱ nó (tʼexkiai Lucas 22:19, 20). a Kataʼyala kʼa ánni nga nʼio choyanilee nichxin jebi.
2. Ánni nga nʼio choyanilee nichxin nga faʼaitsjenya Kjoabiyale Cristo.
2 Nga nikjaʼaitsjenyá Kjoabiyale Cristo kui nikjaʼaitsjenjiaan jokji chjíle nga kisikasén Niná je xi tsakʼéchjíntjainá. Kʼoati bʼailee kjoanda je Jesús nga kitsjoa kjoabijnachonle (2 Cor. 5:14, 15). Nkjín ndsʼee bichó nga kui nichxin kʼoa bʼainganʼiongañálee xíngiaa (Rom. 1:12). Nga kui nichxin nkjín ndsʼee xi jekisikatío xále Niná bichó. Nga nda chjoeyaa ndsʼee jebi nkjín xi je Jeobá síxá ijngokʼanile. Kʼoa chjota xi bichó nga kui nichxin, nga be jmeni xi ma, kʼoati mamele kotʼaya Biblia. Kuinga nʼio chjí ʼyañá nga faʼaitsjenya Kjoabiyale Cristo.
3. Ánni kʼoabixónñá nga jtín sʼin biyoaa jngo tjíjtsa Sonʼnde nga faʼaitsjenya Kjoabiyale Cristo (kʼoati chótsenlai sén xi faʼaitʼa).
3 Nʼio choyalee nga kui nichxin nga̱ ʼyañá nga kʼoati kʼia koatiojtín ngatsʼi ndsʼee xi tjío jngo tjíjtsa Sonʼnde. Kʼianga jekantjai Tsʼuí jngo kjoanokjoaya faʼa xi kui nchja̱ni jókji chjíle nga tsakʼéchjíntjainá Jesús. Jao kʼa jndaa, nikʼatolee nioxtila kao vino je xíngiaa, kʼoa ño kjoabʼetsʼoa satío. Kʼoakatama bixónñá nga jngó jngó kʼa sʼejna kjoabʼetsʼoa. Jotjín mani jtín xi tjío jngo tjíjtsa Sonʼnde síkjaʼaitsjenya Kjoabiyale Cristo. Nʼiojin tsjoa satío kon je Jeobá kao Jesús nga kʼoasʼin chʼasjengʼaa jngo tjíjtsa Sonʼnde nga kui nichxin.
Kʼianga faʼaitsjenya Kjoabiyale Cristo yaa ʼyanile nga jtín sʼin tiyoaa jngo tjíjtsa Sonʼnde (Chótsenlai párrafo 3) k
4. Jmé xi chótʼayajiaan i̱ kjoaʼmiya jebi.
4 I̱ kjoaʼmiya jebi kui tʼatsʼe jebi chótʼayajiaan: Jósʼiaan nga tongini kuiyondalee nga kjoaʼaítsjenya Kjoabiyale Cristo. Jméni xi sʼiaan nga kuinyakoaa xi kjaʼaí nga kʼoati katafi kjoajtín jebi. Kʼoa jósʼin kuinyakoaa xi jekisikatío xále Niná. Nga kui jebi chótʼayajiaan ngisaa jchaa josʼiaan nga kuiyondalee nga kjoaʼaítsjenya Kjoabiyale Cristo.
JÓSʼIAAN NGA TONGINI KUIYONDALEE NGA KJOAʼAÍTSJENYA KJOABIYALE CRISTO
5. 1) Ánni nga nʼio chjínile nga si̱kjaʼaitsjenjiaan nga tsakʼéchjíntjainá Jeobá kao Jesús (Salmo 49:7, 8). 2) Tʼeyanajmí jméni xi bakóyali je video Ánni nga kʼiensíni Jesús.
5 Nga si̱kjaʼaitsjenjiaan jokji chjíle nga kitsjoa kjoabijnachonle Jesús, kʼoasʼin koakoñá nga tibiyondalee nga kjoaʼaítsjenya kjoabiyale. Tsa toñá alikui koa̱nná chʼa̱sjentjé yaoná tʼatsʼe jée kao kjoabiya (tʼexkiai Salmo 49:7, 8; b kʼoati chótsenlai video Ánni nga kʼiensíni Jesús c). Kuinga kitsjoaʼndeni Jeobá nga kʼien ʼNdíle nga kʼoasjentjainá, ninga nʼio tse kjoama̱ kisʼengile nga jao nga kʼoakisʼin (Rom. 6:23). Kʼianga si̱kjaʼaitsjenjiaan jmeni xi kisʼin Jeobá kao Jesús xi tʼatsaan ngisaa chjí jchaa nga tsakʼéchjíntjainá. Chótʼayajinla choaa jokji kjoama̱ tsakʼéngi je Jeobá kao Jesús nga tsakʼéchjíntjainá. Kuila títjon kataʼyaa jósʼin tíjna nga koanchjíntjé.
6. Jósʼin tíjna nga tsakʼéchjíntjainá je Jeobá kao Jesús.
6 Kʼianga kitsjoa kjoabijnachonle je Jesús, kui tsakʼéchjí Jeobá jmeni xi kisicha Adán. Kʼianga koannda je Adán chjotatsjení, tonga kʼianga tsakajngijée alikui tikoan tsakʼejnani ngantsjai nichxin. Kʼoa kʼoati kisicha kjoanda jebi ngatsʼi ntje̱le. Kʼianga koanchjíntjai jmeni xi kisicha je Adán, kui kjoabijnachonle Jesús kitsjoa. Jokji tse tsakʼejna Jesús i̱ Sonʼnde “likui tsajngi jée, ni kinchjajin énchʼanacha” (1 Ped. 2:22). Kʼianga kʼien Jesús chjotatsjení, josʼin chjotatsje je Adán kʼianga kje bajngijéejin, kuinga koan kisijndani kjoabijnachon xi kisicha Adán (1 Cor. 15:45; 1 Tim. 2:6).
7. Tikʼaxki̱ kʼai jmé kjoa xi jaʼatojin Jesús.
7 Kʼianga tsakʼejna Jesús i̱ Sonʼnde kisitjosonle Jeobá ngantsjai ninga kʼia nga kjoa jaʼatojin. Tobʼelañá, kʼianga sʼa ʼndí kji Jesús kisitjosonle xijchále ninga chjotajéelani (Luc. 2:51). Kʼoa kʼianga sʼa xti, kʼoajinti kisʼe chjota xi kʼoakitsole nga tsín katasítjosonle xijchále kʼoa nga tsín kixi katafitʼale Niná. Kʼoa kʼianga jekoanjchínga kʼoati tsakʼetʼale je Na̱i nga̱ kui xi koanmele nga katabajngijée kʼoa nga tsín kixi katafitʼale Niná (Mat. 4:1-11). Je Na̱i kui xi koanmele nga katabajngijée Jesús ánni nga tsín koa̱n kʼoechjíntjaininá.
8. Jmésa kjoa xi jaʼatojin Jesús.
8 Kʼianga kitsoyason Jesús kʼoati tse kjoa jaʼatojin. Tobʼelañá, je chjotakontrale kitjenngike kʼoa kʼoakitso nga sikʼien (Luc. 4:28, 29; 13:31). Kʼoati kiskale jñani tsín nda kisʼin je chjotatjenngile (Mar. 9:33, 34). Kʼianga kinijtsoʼa totaon tsaʼya kʼoa tsaʼyasin. Tsee kjoañʼai kinikjaʼá nga kinikʼien nga̱ jo chjotaché kinikao (Heb. 12:1-3). Kʼianga tojeme kuiyá, je Jeobá tsakʼasjexinle nganʼiole, kʼoa totsʼee nganʼio kisichjén nga kichokjoajinle (Mat. 27:46). d
9. Jósʼe tokoán nga ʼyaa jokji kjoañʼai tsakjaʼá Jesús nga tsakʼéchjíntjainá (1 Pedro 1:8).
9 Nʼio tse kjoañʼai tsakjaʼá Jesús nga tsakʼéchjíntjainá. Kʼianga nikjaʼaitsjenjiaan jokji kjoañʼai tsakjaʼá xi totʼatsaan ngisaa tsjoacha maa (tʼexkiai 1 Pedro 1:8). e
10. Jméni xi kisʼin Jeobá nga koan tsakʼéchjíntjainá.
10 Jmé xi kisʼin Jeobá nga koan tsakʼéchjíntjainá Jesús. ʼYañá nga je Jeobá kao Jesús nʼio tsjoake xínkjín, tojosʼin tsjoake xínkjín jngo nʼai kao ʼndíle (Prov. 8:30). Nʼiojin aon koanle je Jeobá kʼianga tsabe jme xi koantʼain Jesús, nga totaon tsaʼya kʼoa nga kʼoasikji kjoañʼai kinikjaʼá nga kinikʼien.
11. Jmé choa̱ xi bakóyaná jokisʼe kon Jeobá kʼianga kinikʼien Jesús.
11 Je xijchá xi jekisicha jngo ʼndíle be josatío tokoán nga kui kjoa bitjatojiaan. Ningalani makjainná nga kjoaʼáyanile xi jekʼien, tojo aon maná kʼianga xíngiaa biya. Jebi kui bakóyaná jokisʼe kon Jeobá nga nó 33 kʼianga kinikʼien je ʼNdíle (Mat. 3:17). f
12. Jméni xi koa̱n sʼiaan nga tongini kuiyondalee nga kjoaʼaítsjenya Kjoabiyale Cristo.
12 Kʼianga kjesa bichójin nichxin nga kjoaʼaítsjenya Kjoabiyale Cristo, chʼa̱sjeʼai nichxin nga chótʼayajin tʼatsʼe kjoabʼechjíntjai nga toji kʼoa tsa kʼiaje̱ nga chotʼayajtíon kao familiali. Kui tichjain Xo̱n xi síchjén testigole Jeobá kʼianga jme xi básjaiya. Kʼoati koa̱n si̱chjain xo̱n xi kjaʼaísanile xi Énle Niná yʼangini nga ngisa nda koa̱njinli tʼatsʼe kjoabʼechjíntjai. g Tʼexkiai je texto xi maxkia nga kui xomana xi faʼaitʼa Xo̱n xi tjítʼa jme xi chotʼayá ya kjoajtín: Tʼatsʼe chjotale Cristo kao Xále Niná. Kʼoa kʼianga kui nichxin nga kjoaʼaítsjenya Kjoabiyale Cristo chótsenlai je video xi kui tínchja̱ni je texto xi maxkia nga kui nichxin. Tsa tongini kuiyondaa nga kjoaʼaítsjenya Kjoabiyale Cristo ngisaa nda kuinyakoaa xi kjaʼaí (Esd. 7:10).
KʼOAKʼUÍNLEE XI KJAʼAÍ NGA KATAFI NGA KJOAʼAÍTSJENYA KJOABIYALE CRISTO
13. Jméni xi sʼiaan nga kuinyakoaa xi kjaʼaí nga katafi nga kjoaʼaítsjenya Kjoabiyale Cristo.
13 Koaan kʼoakʼuínlee xi kjaʼaí nga kʼoati katafi nga kjoaʼaítsjenya Kjoabiyale Cristo. Ningalani kʼoailee chjota je xo̱n xi bʼabí nga faʼaitsjenya Kjoabiyale Cristo, kʼoati koa̱n kʼoétʼaxoaan ʼyáni xi mená kʼoakʼuínlee nga katafi. Tobʼelañá, je xi xíngiaa mani, xi ñatjen nixá, xi ñatjen mangián skuela kʼoa tsa ʼyasani xi kjaʼaí. Kʼoa tsa kjoe̱ je xo̱n xi si̱kʼabía koaan ya tjen página xi tíjnaná ya Internet si̱kasénnilee chjota. Tsakuini nichxin kuicho je chjota nga kʼoakʼuínlee (Ecl. 11:6).
14. Tikʼaxki̱ jósʼin bichómani nga fayolee chjota je xo̱n xi nikʼabía nga faʼaitsjenya Kjoabiyale Cristo.
14 Alikui kʼoasʼin si̱kjaʼaitsjeen nga tsín koai je chjota xi xo̱n fayolee kʼianga faʼaitsjenya Kjoabiyale Cristo. Tobʼelañá, tokʼoakoanle tichjaa kʼianga kʼoakitso xʼinle nga koai nga kjoaʼaítsjenya Kjoabiyale Cristo. Je tichjaa kʼoatsontsjaile je xʼinle nga xki̱ nó nga katafi nga faʼaitsjenya Kjoabiyale Cristo, tonga tsínkʼia fi. Chjota jebi kʼoakitso nga jngo xi chjotajchínga sʼin tíjna kitsjoale je xo̱n xi fayoaa kʼoa kuinga koanmenile ki. Saʼnda nga kʼia, je xʼinle tichjaa ki ntsjaintsjai nga faʼaitsjenya Kjoabiyale Cristo.
15. Jméni xi machjén nga si̱kjaʼaitsjeen kʼianga fayolee xo̱n chjota nga faʼaitsjenya je Kjoabiyale Cristo.
15 Kʼianga kʼoaʼmilee chjota nga katafi nga faʼaitsjenya Kjoabiyale Cristo, tjínjinkʼa xi kui skónanginá jméni xi nʼia nga kui nichxin, ngisaa tsa tokʼia koaitítjon. Kuinga tongini si̱kjaʼaitsjenjiaan jméni xi kʼuínlee tsa jme xi skónanginá (Col. 4:6). Tobʼelañá, tsakui skónanginá jméni xi ma nga biyojtián nga kui nichxin. Jókji tse chotʼayá. Jókjoan najño xi chʼakjá. A machjí nga bitjasʼeen kʼoa a tao̱n sʼeña. Koaan kʼoakʼuínlee je xi fayolee xo̱n nga kʼuínyalee tsa jme xi tsín majinle. Kʼoati koa̱n koakolee je video Si̱kjaʼaitsjenyá je kjoabiyale Jesús kao video Jméni xi ma kʼianga biyojtínjin. Kʼoati koa̱n kui chja̱kaonajmíñá jmeni xi tso kjoaʼmiya 28 xi tsʼe libro Koaan nda kuiyoaa ngantsjai nichxin.
16. Jmésani xi tsakui nichxin skónanginá je chjota xi bichó nga faʼaitsjenya Kjoabiyale Cristo.
16 Kʼianga jekjoetʼa nga kjoaʼaítsjenya Kjoabiyale Cristo tsakui nichxin tjínsa xi skónangi je chjota xi kabichó. Tsakui nichxin kui skónangi ánni nga tsín ʼbini vino je xi bichó kʼoa nga tsín kjenni je nioxtila. Tsakui nichxin kui skónanginá jókji tse nikjaʼaitsjenyañá Kjoabiyale Cristo. Kʼoa tsakui skónangije̱ tsa kʼoama ngantsjai nga biyojtián. Ninga ya ʼmiyaná jebi kʼianga faʼa je kjoanokjoaya nga faʼaitsjenya Kjoabiyale Cristo, machjén nga kʼuínyandalee je chjota. Kʼianga kʼuínyalee jmeni xi skónanginá koaan si̱chjén jmeni xi faʼaitʼa ya jw.org, jolani je xi tso: “Ánni nga tsín mangósonsíni josʼin síkjaʼaitsjenya je testigole Jeobá je Cenale Nainá kao xi kjaʼaí religión”. Koaan kʼuínyalee je chjota xi ñaki kʼoatjío kon nga mele skoe̱ xi tʼatsʼe jebi, nga tikuini nichxin nga kjoaʼaítsjenya Kjoabiyale Cristo, tsa tongini kʼoa tsa kʼiaje̱ nga jekafaʼato (Hech. 13:48).
KUINYAKOAA XI JEKISIKATÍO XÁLE NINÁ
17. Jméni xi koa̱n sʼin je xi chjotajchínga sʼin tjío nga kuinyakao xi jekisikatío xále Niná (Ezequiel 34:12, 16).
17 Je ndsʼee xi chjotajchínga sʼin tjío tjínnele kuinyakao je ndsʼee xi jekisikatío xále Niná kʼianga faʼaitsjenya Kjoabiyale Cristo. Koaan koakole nga mandosinle xi tʼatsʼe (tʼexkiai Ezequiel 34:12, 16). h Xi chjotajchínga sʼin tiyo, tjasjao je ndsʼee xi jekisikatío xále Niná kʼianga kjesa faʼaitsjenyajin Kjoabiyale Cristo. Kʼoatʼinlao nga makjáojinno xi tʼatsʼe kʼoa nga meno kuinyakao. Kʼoatʼinlao nga katafi nga kjoaʼaítsjenya Kjoabiyale Cristo. Kʼiatsa kuicho nda chjoéyao. Kʼianga jekjoaʼato nga kjoaʼaítsjenya Kjoabiyale Cristo tosi tonda tangínni̱xatʼao kʼoa tinyakao nga katasíchriantʼa ijngokʼale Jeobá (1 Ped. 2:25).
18. Jósʼin koa̱n kuinyakoaa ngatsʼiaa xi jekisikatío xále Niná (Romanos 12:10).
18 Ngatsʼiaa xi tiyoaa ya jinjtín koaan kuinyakoaa je ndsʼee xi jekisikatío xále Niná xi kuicho nga kjoaʼaítsjenya Kjoabiyale Cristo. Koakolee kjoanda kao kjoatsjoacha (tʼexkiai Romanos 12:10). i Kuenta sʼiaan nga ñʼai koa̱nle ndsʼee jebi nga koai ijngokʼa kjoajtín, kʼoa kuinjin síkjáojin jókuitsole ndsʼee nga skoe̱ ijngokʼa. j Kuinga tsín koa̱n kui kʼoakʼuínnilee jmeni xi chʼao kʼoe kon (1 Tes. 5:11). Tojo ndsʼee mani ninga jekisikatío xále Niná kʼoa tsjoa satío tokoán nga ñatjen ʼyaxkón ijngokʼá Jeobá (Sal. 119:176; Hech. 20:35).
19. Jósʼin basenkaoná nga nikjaʼaitsjenyá Kjoabiyale Cristo.
19 Je Jesús kʼoakitso nga tjínnele si̱kjaʼaitsjenyá kjoabiyale nga xki̱ nó. Nga kʼoanʼia, nkjín koya josʼin binyakaoná kʼoa binyakao xi kjaʼaí nga̱ majinná jokji chjíle nga kʼienntjainá (Is. 48:17, 18). Kʼoati basenkaoná nga ngisa tsjoacha maa je Jeobá kao Jesús. Kʼoa kʼoasʼin bakoñá nga bʼailee kjoanda jmeni xi tjíosʼín xi totʼatsaan. Ngisaa jtín sʼin biyoaa kao je ndsʼee kʼoa kʼoati binyakoaa chjota nga majinle jmé xi tjínnele sʼin nga so̱kole kjoanda xi kjoaʼaíkao Niná nga kʼienntjainá je Jesús. Kuinga machjénni nga tongini kuiyondaa nga kjoaʼaítsjenya Kjoabiyale Cristo nó jebi. Nga̱ tokui nichxin jebi xi ngisasa nʼio chjíle.
JMÉ XI KAMAJINLI
-
Jósʼiaan nga tongini kuiyondaa nga kjesa faʼaitsjenyajin Kjoabiyale Cristo.
-
Jméni xi sʼiaan nga kʼoati kuinyakao xi kjaʼaí nga kʼienntjainá je Jesús.
-
Jósʼin koa̱n kuinyakoaa xi jekisikatío xále Niná.
KJOAJNDA 18 Kʼoailee kjoanda Niná tʼatsʼe kjoabʼechjíntjai
a Lucas 22:19, 20: “Kiskoé nioxtila, kitsjoa kjoanda, kisixkoa̱, kitsjoale chjotale, kitso: Jebi yaona ní xi tsjoa xi tʼatsaon, kʼoatʼiaon kuibi jméni nga nda kʼoéjintakonsínináo. 20 Kʼia nga jetsakjen, kʼoatisʼin kisʼin kao je cho̱tsín, kitso: Je cho̱tsínbi jé ní xi kjoachjotse xi bʼendakoa kao njínna xi xíjten tʼatsaon”.
b Salmo 49:7, 8: “Nijngojinla xi koa̱nle kʼoasjentjai jngo ndsʼe̱, kʼoa ni koa̱njinla jngo kjoabʼechjíntjai tsjoále Niná xi tʼatsʼe ndsʼe̱, 8 (kʼoa jotjín tjínnele koa̱nchjíntjai je kjoabijnachonle nikʼiajinla kuichole chjíle)”.
c Yaa jw.org koa̱nsjaili je kjoaʼmiya kao video xi bʼaxki̱ i̱ kjoaʼmiya jebi. Tʼetʼai joʼmi xi kjoásjai jñani tíjna xi jo lupa kji.
d Chótʼai jñani “Tjínkʼa xi kjonangi” tso, xi faʼaitʼa Xo̱n xi Bájinkonná xi tsʼe abril 2021.
e 1 Pedro 1:8: “Alikui tsaʼyao Jesucristo, tonga tjaochanío. Makjainno xi tʼatsʼe nga je, nda tsa tsín tiʼyao ndʼaibi. Kjimatsjoano kao jngo kjoatsjoa xi niʼyajin xi be, xi nʼio tjínle kjoajeya”.
f Chótʼai je libro Acerquémonos a Jehová, capítulo 23, párrafo 8 kao 9.
g Chótʼai je recuadro “ Xi koa̱n chótʼayá”.
h Ezequiel 34:12, 16: “Sikuindaña je barréna tojo sʼín xi cho̱ koʼnda nga masjaile je barréle xi ngaʼi̱ ngaján tjíotsoma kʼoa nga síkjen. Kjuíkʼaña ngakjijnda ʼnde jñani kitsaoba kʼianga yojbi koanchon kʼoa kisʼejna njio njio. 16 Je xi kicha koasjaiña, je xi kitsaoba kjoaʼaikaoña, je xi kitsiʼaon koajtéjonña kʼoa tsjoanganʼiole je xi tsínle nganʼio. Tonga je xi yʼai kjoan kʼoa xi taja kjoan sikjesonña. Kʼoa kjoañʼai tsjoale”.
i Romanos 12:10: “Katamatsjoachao xíngio joni nga ndsʼao. Ngisa títjon jchaxkón xikʼa joni tsa tijonnio”.
j Chótsenlai sén xi faʼaitʼa kao recuadro “ Jókisʼin je ndsʼee xi tjío ya jinjtín”. Jngo ndsʼee xi jekisikʼéjna xále Niná alikui titsoni kon nga faʼasʼen ya Ndʼia jña chotʼayá, tonga faʼasʼenni nga maskanni. Nda kjoeya je ndsʼee kʼoa ndani sʼe kon nga jemani.
k XI TÍNCHJA̱NI SÉN XI FAʼAITʼA: Tjín ʼnde jñani jetjíosíkjaʼaitsjenya Kjoabiyale Cristo je ndsʼee tonga jña xin ʼnde sʼaa tjíobationda nga kʼoati sʼin.
