1. Mwafwa bika litangwa lya Canukiso likelyo litangwa lya seho manene mu mwaka? (Luka 22:19, 20)

 KU BANU ba Yehova, litangwa lya Kwanuka Kutsa kwa Kristu likelyo litangwa lya seho manene mu mwaka. Cikeco lika cilika cashikile Yesu bangamba bendi ngwendi bacilinge-linge. (Tandeni Luka 22:19, 20.) Kuli byuma byabingi bikatulingisa tushungwiye kukala ku Canukiso. Tusimutwiyeniko ha bimo.

2. Byuma muka bimo bikatulingisa tushungwiye kukala ku Canukiso?

² Canukiso cikatulingisa tusinganyekesese ha seho ya ndando ya kupatula. Cikatwanukisa bingila bimo bitwasa kumweselamo kukandelela mwafwa ya mulambu wa Yesu. (2 Kori 5:14, 15) Cikatukwasa lalo kukala na simbu ya “kulitakamesa” na bandolome na bandokazi betu. (Loma 1:12) Mwaka na mwaka, bandolome na bandokazi betu baje banelukila munima nabo bakakunguluka. Bamo bakelukila na kuli Yehova mwafwa ya kubatambula mwamubwa. Co banu babangi ba bimbunge byabibwa mubakazibi nambe kumona bikakalako, bakashangumuka kwenda mu ngila ije itwala ku kuyoya. Ebi binapu byuma bimo binalingisa Cilika ca Kwanuka Kutsa kwa Yesu cipwe ca kulitila!

3. Canukiso cikatukwatasanesa bati na bandolome na bandokazi betu mu kaye koshe? (Taleni na cikupulo.)

³ Acisinganyekeni lika Canukiso mucikatulingisila tulikwatasane na bandolome na bandokazi betu mu kaye koshe. Bakaleho ba Yehova bakalikungulula hamo litangwa mulikai na kulauka kamandondo-kamandondo mu mitambela ya kuliseza-seza ya kaye. Tubaboshe tukatolilila ku ñanda ije ikamwesa seho ya ndando ya kupatula. Tukembi myaso ibali ya kushangazala Njambi,  kwitisamo bifwisa nambe ngwetu likende na binyu, na kwendeka “ameni” ku malombelo awana. Mu maola a kweta lika ku 24, bikungulukilo byoshe bikalingi byuma bya kulifwa. Acisinganyekeni mwakalizibila Yehova na Yesu mubakatumono twalikwatasana mu kubamwesa kasingimiko na kubakandelela.

4. Bika bitusimutwiya muno mu cilongesa?

⁴ Muno mu cilongesa tusimutwiya ha bihula binatako: Twasa kulibwahesela bati Canukiso? Twasa kukwasa bati bakwetu mangana nabo bawane bukwasi ku Canukiso? Co twasa kukwasa bati bakwetu baje banazeye? Kuwana bikumbululo ku bihula ebi kutukwasa kulibwahesela mwamubwa eci cilika ca seho manene.

TWASA KULIBWAHESELA BATI CANUKISO?

5. (a) Mwafwa bika tunapande kusinganyekesesa ha seho ya ndando ya kupatula? (Samu 49:7, 8) (b) Bika bimunalilongesa ku vidio ya Bika Byatsililile Yesu?

⁵ Imo ya bingila byakama bitwasa kulibwaheselamo Canukiso inapu kusinganyekesesa ha seho ya ndando ya kupatula ya Yesu Kristu. Ngwe yetulika ngwe kutwasele kulipatula ku bubi na kutsa. (Tandeni Samu 49:7, 8; kengeni na vidio ya Bika Byatsililile Yesu?) a Yehova wabwahesele ngwendi Munendi yazema aije na kututsila. Co Yehova na Yesu balyanene mu ngila yakama manene. (Loma 6:23) Kusinganyekesesa manene ha kulyana kwa Yehova na Yesu kutulingisa tukandelele manene kuli bakebo ha kubwahesa ndando ya kupatula. Tusimutwiyako ha byuma bimo byabikalu byalingile Yehova na Yesu mu kubwahesa ndando ya kupatula. Mu kushangumuka, bika byalibungilile mu kwana ndando ya kupatula?

6. Ndando ya kupatula yambateselele bika?

⁶ Ndando ya kupatula yapwa fweto ibafweta mu kushaka kwilwisa cuma cimo. Munu wakulibanga Adama wapwile wa kulumbunuka mubamutangele. Mwalingile bubi, kasele lalo kuyoya myaka yoshe. Co na bana na batekulwila bendi boshe nabo kubasele kulinga ngoco. Yesu wanene mulambu wa kuyoya kwendi kwa kulumbunuka mangana buyoye bwa kulumbunuka bwazimbalesele Adama bwiluke. Ha simbu yakele hano hasi, Yesu “kalingile bubi, co mu kanwa kendi kumwakele makuli.” (1 Pita 2:22) Ha simbu yatsile, Yesu wapwile wa kulumbunuka ngwe mwapwililile Adama simbu kanda alinge bubi. Co omwo wanene kuyoya kwendi wafwetele fweto ya kwilwisa buyoye bwazimbalesele Adama.—1 Kori 15:45; 1 Timo 2:6.

7. Byeseko muka bimo byaliwanene nabyo Yesu mwakele hano hasi?

⁷ Mwakele hano hasi, Yesu watwaleleleleho kupwa wa kulongwa kuli Ishe nameme waliwanene na byeseko bya kuliseza-seza. Mwapwile mwanike, Yesu wononokele bisemi bendi baje kubapwile ba kulumbunuka nameme wasemukile oku wa kulumbunuka. (Luka 2:51) Co mwakele na kukola, katabesele bakwabo kumungumuna na kumulingisa ajeneke kwononoka bisemi bendi na kujeneka kupwa wa kulongwa kuli Yehova. Mwakolele, Yesu wabyanenene Satana Liyabolo uje wamwesekele mu kushaka ngwendi ecele kupwa wa kulongwa kuli Njambi. (Mate 4:1-11) Satana wakele na cilengo ca kulingisa Yesu alinge bubi na kwonowa kufweta ndando ya kupatula.

8. Byeseko muka bikwabo byaliwanene nabyo Yesu?

⁸ Kuli byeseko bikwabo byaliwanene nabyo Yesu mwakele na kulinga cipangi cendi hano hasi. Bitozi bendi bamuyandesele na kushaka kumutsiya. (Luka 4:28, 29; 13:31) Yesu walifwitile lalo na kujeneka kulumbunuka kwa baka-kumukabangeya. (Maki 9:33, 34) Mubakele na kumusompesa simbu kanda bamutsiye, Yesu bamupupangele, kumubulumuna na kumushendumuna. Kutundaho, bamutsiile mu ngila yaibi ngwe cikenya, co wazibile manene kubabala.  (Hebe 12:1-3) Wakolesele mu ceseko cendi camamaneselelo kwa kujeneka Yehova kumunyungilila. b—Mate 27:46.

9. Mulambu wa Yesu ukatulingisa tulizibe bati? (1 Pita 1:8)

⁹ Kufweta ndando ya kupatula kwalingisile Yesu ayande manene. Kuma kusinganyekesesa ha byuma byalingile Yesu omwo walyanene kututsila kukutulingisa tumuzeme manene ndi?—Tandeni 1 Pita 1:8.

10. Yehova walizibile bati ha kubwahesa ndando ya kupatula?

¹⁰ Batico Yehova? Mwafwa bika twendeka ngwetu Yehova walyanene omwo Yesu wanene ndando ya kupatula? Yehova na Yesu balizema manene ngwe cisemi mwanasa kulizemena na munendi. Bakebo balizema manene kutubakana nomu mubakalingila banu. (Visi 8:30) Co acisinganyekeni mwalizibilile Yehova mwakele na kumona Yesu aliwana na byeseko bya kuliseza-seza hano hasi. Twakulahela ngwetu walizibile manene kubabala ku mbunge mwamwene Munendi bamubyana, bamweseka na kumuyandesa.

11. Endekeni cakumwenako cimwesa mwalizibilile Yehova ha simbu ibatsiile Yesu?

¹¹ Cisemi woshe uje natsisa mwana azibuka kubabala kwanasa kuziba munu ku mbunge mwafwa ya busiwa bwa kutsisa mwana. Nameme twakulahela mu kushula ngwetu batsi bakasanguka, kulinga ngoco kukwesi kumanesa busiwa butukazibi nga twatsisa munu itwazema. Eci cakumwenako citukwasa kuzibisisa mwalizibilile Yehova mwakele na kumona Munendi yazema ayanda na kutsa ha litangwa lije lya Nisani 14, 33 C.E. c—Mate 3:17.

12. Bika bitwasa kulinga mu simbu ya kushwenya ku Canukiso?

¹² Mu matangwa anasalako kweta na hatukela na Canukiso, mwasa kukala na cilongesa ca munu endilika nambe Kulemesa kwa Naanga kuje kunemana ha biñanda byendeka ha ndando ya kupatula. Mwasa kupangesa mabulu etu amo anemana ha Mbimbiliya aje amikwasa kuzibisisa mwamubwa. d Kutundaho, lingeni mwoshe mumwasela kukabangeya cinoneko ca kutanda Bisoneka bya Canukiso cije cili mu Mukanda wa Biwano bya Buyoye Bwetu Baka-Kristu na Cipangi Cetu. Co ha litangwa lya Canukiso, keti mukebale kukenga progiramu ya kulitila ya kwilula Cisoneka ca Litangwa ije ikakalako. Nga tulibwahesela  Canukiso, tukwasa na bakwetu nabo bawane bukwasi ku cilika ca seho manene eci.—Ezela 7:10.

KWASENI BAKWENI NABO BAWANE BUKWASI KU CANUKISO

13. Cuma muka cakulibanga citwasa kulinga mu kukwasa bakwetu nabo bawane bukwasi ku Canukiso?

¹³ Twasa kukwasa bati bakwetu nabo bawane bukwasi ku Canukiso? Twasa kubwahesa mukana wa banu batuzibuka na kubalanya. Aba banasa kupwa batukapanga nabo, batukobela nabo sikola nambe banu beka batuzibuka. Nameme hamo kutwesi na mapapelo a kulanyesa banu a kupulinta, twasa kutumina banu linki kupangesa foni nambe likina lyeka. Mwalinga byuma, banu babangi basa kutambula cilanyo cetu na kwija ku Canukiso.—Kwambu 11:6.

14. Aneni cakumwenako cimwesa seho ya kulanya banu ku Canukiso.

¹⁴ Kwana banu lipapelo lya kubalanya ku Canukiso nambe kubatumina linki kwa seho manene. Litangwa limo, ndokazi umo uje wakala mu naanga ya bulombelo bwa kuliseza-seza wakasamene manene muka-limbo lyendi mwamulekele ngwendi nendi aya ku Canukiso. Bika byamukasamesele? Ou ndokazi wakasamene mwafwa ha bisimbu byabingi walanyele muka-limbo lyendi ku Canukiso, oloni kakele na kuyako. Co byuma byatengulukile bati? Muka-limbo lyendi ngwendi watambwile cilanyo. Wendekele ngwendi mukulunu umo mu cikungulukilo uje yalizibukile nendi ikeye wamulanyele. Co kushwa bene olyo litangwa, ou munalume watwaleleleleho kukala ku Canukiso ha myaka yaingi.

15. Bika bitunapande kwaka mu bisinganyeka omwo tulanya banu ku Canukiso?

¹⁵ Anukeni ngweni banu batukalanya banasa kulihula bihula bimo, maneneni nga kanda bakunguluke netu. Tulinga mwamubwa nga tusinganyekesesa ha bihula bibanasa kwihula na kulibwahesela bikumbululo. (Kolo 4:6) Cakumwenako, bamo banasa kulihula bikalingiwako, simbu icikambata cilika caco, bizalo na sholwesi inapande, indi banapande kufweta asina bakalako, nambe indi kukakala kwanako bimbongo mubakakalako. Nga tuli na kulanya munu ku Canukiso, twasa kumwihula ngwetu, “Yanini indi muli na bihula ha cilika caco eci?” Co twasa  kukumbulula oco cihula nambe bihula. Co lalo twasa kupangesa vidio ya Anukeni Kutsa kwa Yesu na ya Bika Bikalingiwa ku Njubo ya Bumwene? mangana tumukwase kuzibisisa bikalingiwa ku biwano byetu. Kutundaho, cilongesa 28 mu libulu lya Likuweni Kuyoya Myaka Yoshe! cili na bisimpi byabibwa bitwasa kusimutwiya na banu.

16. Bihula muka bikwabo bibanasa kukala nabyo baje bakaija ku Canukiso?

¹⁶ Munima ya kukala ku Canukiso, baje bakakalako lwakulibanga banasa kukala na bihula bikwabo. Hamo banasa kulihula binalingisa kukale lika banu babandondo baje banali na kunwa bifwisa, nga kubanakala. Co lalo banasa kulihula indi lungai lutukalingi Canukiso mu mwaka. Banasa lalo kushaka kuzibuka indi biwano byoshe bya Bakaleho ba Yehova mukemwo mubyafwila. Nameme bwingi bwebi byuma bakabisimutwiya mu ñanda ya Canukiso, baje banashangumuka ololo kukalako banasa kutonda kumulumbunwina lalo. Ñanda ili ha jw.org ya mutwe wa “Mwafwa Bika Bakaleho ba Yehova Bakalingi Cilika ca Kulya kwa Mwene kwa Mangwezi mu Ngila ya Kuliseza na Bulombelo Bukwabo?” yasa kutukwasa kukumbulula bihula bimo bibanasa kwihula banu. Tushaka kulinga mwoshe mutwasela simbu kanda Canukiso cikaleko, hamolika na ha simbu ya cilika eci na munima yaco mangana tukwase banu “ba bimbunge byabibwa” kuwanako bukwasi.—Bili 13:48.

KWASENI BAJE BANAZEYE

17. Bakulunu basa kukwasa bati baje banazeye? (Ezekiyele 34:12, 16)

¹⁷ Bakulunu basa kukwasa bati baje banazeye ha simbu ya Canukiso? Basa kulinga ngoco nga bamwesa ngwabo babaka mbunge. (Tandeni Ezekiyele 34:12, 16.) Simbu kanda Canukiso cete, esekeni kusimutwiya nabo boshe nga citaba. Bamweseni ngweni mwabaka mbunge, co lalo mushaka kubakwasa mu ngila yoshe-yoshe imwasa. Balanyeni ku Canukiso. Co nga baneja, batambuleni na nzanzu. Munima ya Canukiso, twaleleleniho kwendela aba bandolome na bandokazi nambe kusimutwiya nabo na kubana bukwasi bubatonda ku sipilitu mangana belukile kuli Yehova.—1 Pita 2:25.

18. Tubaboshe twasa kukwasa bati baje banazeye? (Loma 12:10)

 ¹⁸ Boshe mu cikungulukilo basa kukwasa baje banazeye nga baneja ku Canukiso. Mu ngila muka? Kwitila mu kubamwesa cizemo, ngozi na kasingimiko. (Tandeni Loma 12:10.) Anukeni ngweni hakulibanga kunasa kubakaluwila kwija lalo ku biwano. Hamo banasa kulishoshomwena ngwabo hamo kubabatambula mwamubwa nga banejako. e Ngeci, keti mubehule bihula bije byasa kubazibisa shwamwa nambe kubazibisa kubabala ku mbunge. (1 Tesa 5:11) Nameme banelukila munima, oloni anga bandolome na bandokazi betu. Co tubwahelela manene kulemeselamo hamo nabo Njambi lalo!—Samu 119:176; Bili 20:35.

19. Bubwa muka buli mu kwanuka kutsa kwa Yesu?

¹⁹ Twakandelela manene Yesu mwanatushiki ngwendi tulinge-linge cilika ca kwanuka kutsa kwendi mwaka na mwaka. Kuli bukwasi bwakama butwasa kuwana yetu hamolika na bakwetu mwafwa ya kukala oku ku cilika. (Isaya 48:17, 18) Kulinga ngoco lalo kutulingisa tuzeme manene Yehova na Yesu. Co lalo nga tukala oku ku cilika tumwesa ngwetu twakandelela kuli bakebo ha byuma bibanatulingila. Kutundaho, kulinga ngoco kutulingisa tulikwatasane manene na bandolome na bandokazi betu. Twasa lalo kukwasa bakwetu kumona byuma bibalingisa base kulikuwa bibezikiso binaija mwafwa ya ndando ya kupatula. Ngeci, tulingeni mwoshe mutwasela kulibwahesela litangwa lya Canukiso ca uno mwaka lije linapu lya seho manene mu mwaka woshe!