MWAHA WOOSOMIYA 2
NCIPO 19 Yoolya ya Ohiyu ya Apwiya
Mwiitthenkace wiira nvirihe nihuku nootepa ukhalana ifayita no nantano
“Nhihiyerere upanka ila nkuupuwelelaka.”—LUKA 22:19.
ITTHU INHALEEHU WIITTHUCA
Ninaahala woona nlattuni wuupuwelela ukhwa wa Kristu ikhanlyaaya itthu yuulupale, ni manannani ninhaleehu wiitthenkaca wiira nivirihe nno nihukunno ni ninhala waakavihera cani akhunanihu wiira yuupuwelele ukhwa wa Yesu.
1. Kontha isiyani ukati wo Nuupuwelelo nikhanlyaaya nihuku nootepa ukhalana ifayita wo khula mwaakha? (Luka 22:19, 20)
NIHUKU no wuupuwelela ukhwa wa Kristu apoovu a Yehova anoona ukhala nihuku nootepa ukhalana ifayita no khula mwaakha. Nno phi nihuku nimoca paahi Yesu aarumilyaawe attharyaawe wiira yuupuwelele. (Nsome Luka 22:19, 20. a) Hi ninoona upica uphiya nihuku ninhaleehu wuupuwelela ukhwa wawe. Nlattuni? Nlattu wo citthu cinci. Nttwee noopele mwaha nnyo citthunnyo.
2. Isiyani inniiriha woona ukhalana ifayita cinene nihuku no Nuupuwelelo?
2 Wuupuwelela ukhwa wa Yesu unaanikavihera wuupuwela wiira itthu ipankilyaawe ikhanle itthu yofayita cinene. Ciicammo, unaanuupusera mananna owoonihera usukhuru wiivaherera wawe wiira anoopole. (2 Akor. 5:14, 15) Uhiya commo, unuupuweleloni, nikhanle nipuro ninkhalaneehu ukati wiira “nilipihane.” (Aroo. 1:12) Khula mwaakha, mayamunna enci ahiile ulalyeera anaawa woona nuupuwelelo ni akiina nlattu wowaakheleliya saana Usalau, anaalakela unturuwela Yehova. Akiina, anaalakela upacera usoma Ibiiblya nlattu wo itthu yoonilyaaya ni yiiwilyaaya unuupuweleloni. Phimaana, khuntikhiniha, neeraka wiira ninoona ukhala nofayita cinene nno nihukunno!
3. Manannani ninkhaleehu nkhayi ni owaataana nihuku nonuupuwelelo? (Nwehe ilatarato.)
3 Muupuwele ciicammo mananna hiiva ninkhaleehu owaataana ntuninyani motheene nihuku nonuupuwelelo. Masaahiti a Yehova o mapuro oovirikana ntuninyani motheene anaathukumana ucoocilo ncuwa ninakenle Otheene cihu ninawiiwa utaphuleliyaka mwaha unoonihera ifayita irinaaya woopoliya wihu. Hi ninawiipa icipo piili, inaavirihiya iphaawu ni iviinyu ni ninawiira “Amem” ninrimeehu wotheene ukati unlompiyaaya ikwaha cese. Nihuku nenno, maloko otheene o ntuninyani anaahala upanka itthu imocaaru. Nnaakhitiri wuupuwela mananna Yehova ni Yesu antteeliyaaya ni cineecoonaaya yanoonaka ninari nkhayi naataanaka ni naattitthimihaka ayo manannaayo?
Ntuninyani motheene nihuku no Nuupuwelelo mayamunna otheene ankhala nkhayi ni owaataana (Nwehe iparaagarafu 3) k
4. Ninhala wiitthucani nhina ula mwahoola?
4 Nhina ula mwahoola, ninaahala woopela mwaha ala makohwaala: Manannani ninhaleehu utthenkaca nrimeehu wiira noone Nuupuwelelo na Kristu? Ninhala waakavihera cani akhunanihu ukumihera ifayita uyo nthukumanooyo? Ni ninhala waakavihera cani ale ahiile urwaa umikutthaanoni awula wuulalyeerani? Waakhuliya waya ala makohwaala unaahala unikavihera ukhala owiitthenkaceene naphiyaka nno nihuku nuulupalenno.
MANANNANI NINHALEEHU UTTHENKACA NRIMEEHU WIIRA NOONE NUUPUWELELO NA KRISTU?
5. a) Kontha isiyani ninlamuliyeehu wuupuwela ifayita irinaaya woopoliya wihu? (Isaalimu 49:7, 8) b) Isiyani mwiitthucileenyu nhina ividiyu Yesu khwenleni?
5 Inanna imoca yofayita cinene yootthenkaca nrimeehu wiira noone Nuupuwelelo na Kristu ukhanle wuupuwela ifayita irinaaya wiivaherera wa Yesu Kristu wiira anoopole. Khiivo yaahaleehu ukhitiri upanka wiira niicoopole mmatampini wihu ni wiira nihikhwe. (Nsome Isaalimu 49:7, 8; b Moone ciicammo ividiyu Yesu khwenleni? c) Yehova honveleeliha Yesu wiira avahe ukumyaawe wiira anoopole. Yehova ni Yesu ahopanka itthu yuulupale cinene. (Aroo. 6:23) Nuupuwelaka itthu Yehova ni Yesu inipankenlyaaya, ninaatepa waasukhuru. Nttwee noone citthu coorika Yehova ni Yesu cinipankenlyaaya. Masi nihinaaya upacera, woopoliya ikhanle isiyani?
6. Isiyani yaalamuliya upankiya wiira noopoliye?
6 Woopoliya unkhala toko iperesu ntthu inlivaawe wiira ahokoloseriye itthu yeemesenryaawe awula yaatumihilyaawe. Nlopwana oopacera, Atamu, aari oohipahuwa ukati wompiyaawe. Uvara wawe itampi, uyo hataa ciicammo ucuulwaawe uhohaleela ukumi woohimala. Vano wiira iturusiye itthu Atamu ihononacilyaawe, Yesu hovaha ukumyaawe woohipahuwa. Ukati waaryaawe va watuninyani va, Yesu “khavanre matampi ni hataa kikhumile itthu yootakhala wamalakuni wawe.” (1 Pet. 2:22) Ukati Yesu khwilyaawe, aari oohipahuwa, khampa Atamu aaryaawe hinavara matampi. Phimaana, Yesu hokhitiri uliva iperesu yookumi woohipahuwa Atamu uhalenlyaawe.—1 Akor. 15:45; 1 Tim. 2:6.
7. Marikarikoni Yesu yaananaawe ukati waaryaawe watuninyani?
7 Ukati Yesu waaryaawe va watuninyani va, uyo ammwiiwelela Yehova nhina citthu cotheene, hataa ukhala wiira yaari itthu yoorika. Yesu aari mwaana oohipahuwa masi asipaapaawe yaari oopahuwa, masi waahookhala commo, uyo anwiiwelela asipaapaawe. (Luka 2:51) Ukati Yesu waaryaawe mmirawo, ahaana avilelaka ukhanyererihiya naathu akiina wiira hiwiiwelele athumwaane oohinnyara, anumwaane ni Yehova. Ukati woonuwilyaawe, Yesu ahonkhottela Sotwani, kontha khaapheela uhiya umwiiwelela Yehova Nluku. (Mat. 4:1-11) Sotwani aholakela unvariha matampi Yesu wiira hinoopole.
8. Marikarikoni-tho Yesu yaanannyaawe?
8 Ukati Yesu waalalyeeraawe va watuninyani va, uyo yahonkhumelela marikariko menci. Awaanannyaawe yaanonlupattha ni yaholakela umwiiva. (Luka 4:28, 29; 13:31) Uhiya commo, uyo ahaana avilelaka upahuwa waattharyaawe. (Mark. 9:33, 34) Ukati Yesu waahukhumwiyaawe, uyo ahottarusiya ni ahopankiya citthu cohaaya. Wiimaleloni, uyo aheeviya nimananna oohiloka ni oowereeha nrima. (Mabere. 12:1-3) Uyo ahaana waanana veekha citthu cankhumelela wiimaleloni ukumyaawe, woohikhikiceriya ni Nluku. d—Mat. 27:46.
9. Nyuuva nneecoona cani moopuwelaka wiivaherera wa Yesu Kristu? (1 Peturu 1:8)
9 Khweeliini, Yesu yahonkhumelela masakha menci wiira avahe ukumyaawe wiira anoopole. Hiiva noopuwelaka citthu cotheene coorika Yesu pankilyaawe wiira anoopole, unfenta wihu unaatepa wuunuwa.—Nsome 1 Peturu 1:8. e
10. Manannani Yehova nooponlyaawe?
10 Vano Yehova? Isiyani ipankilyaawe wiira Yesu akhitiri unoopola? Yehova ni Yesu anawaataana khampa mwaana ni athumwaane. (Miru. 8:30) Vano, muupuwele mananna Yehova ceecoonaawe ukati waamoonaawe mwanawe aananaka citthu cinci va watuninyani va. Khweeliini, uyo hohuva cinene nlattu woomoona mwanawe ahuvihiyaka, athanyiyaka ni ahuvaka venci.
11. Isiyani inhala unikavihera ucuwela mananna Yehova ceecoonnyaawe umoona wawe Yesu akhwaaka?
11 Nnyari khweliye mwanawe naacuwela sana-saana mananna cinweryaaya nrima. Hi ninawaamini wiira unaahala ukhala wunwelelihiya waatthu ookhwa. Hataa nicuwelaka ni naaminiki wiira ntthu khwile naahala wunwelelihiya, hi unaaniwerya nrima cinene. Iyo itthwiiyo inaanikavihera cinene ucuwela mananna Yehova ceecoonnyaawe ukati waamoonaawe mwanawe anfentaawe ahuvaka ni akhwaaka. f—Mat. 3:17.
12. Isiyani inlamuliyeehu upanka nihinaphiya nihuku no Nuupuwelelo?
12 Nyuuva nnoonela cani upacera nenna co usomasoma nhina woopoliya wihu nihinaphiya nihuku no Nuupuwelelo? Nyuuva pooti usomasoma ukati woopanka usoma wo veekha awula wuuswalini waamuci. Nvarele nteko Guia de Pesquisa para Testemunhas de Jeová awula ikaruma cihu cikhwaawe wiira ncuwele saana nhina woopoliya wihu. g Ciicammo, pooti uvarela nteko iporokaraama yoosoma Ibiiblya ukati wo Nuupuwelelo inkhumela nhina Makhalelo ni Miteko Ceekristau—Mwaalivuru o Mikutthaano. Ni nihuku no Nuupuwelelo, nhiliyale woona ividiyu yo uswali woowicisu. Natthenkacaka nrimeehu wiira noone Nuupuwelelo, hiiva ciicammo ninaahala ukhitiri waakavihera akhwiihu ukumihera ifayita uyo nkutthaanooyo.—Estra 7:10.
MWAAKAVIHERE AKHWIINYU
13. Isiyani inlamuliyeehu upacera upanka wiira naakavihere atthu akiina woona Nuupuwelelo?
13 Manannani ninhaleehu waakavihera akhunanihu ukumihera ifayita Nuupuwelelo no nookhwa a Kristu? Nihinaphiya nno nihukunno, khweeliini ninawaalattula aatthu. Ni uhiya paahi waalattula atthu ninaaphwanyeehu wuulalyeerani, hiiva ciicammo pooti wanantikheehu macina aatthu ninhaleehu waalattula, toko asimuciihu, atthu anaavaraneehu nteko, anaasomaneehu ucikolani ni atthu akiina. Hataa nihikhalanaka malattulo owimpirimiriya ootosera, hiiva pooti wanaaveleelihereehu ilinki yo mwinternetini. Napankaka commo, khawancuwaanya! Pooti ukhalaka wiira atthu enci anaahala uwa!—Ekles. 11:6.
14. Kontha isiyani uvaha waalattula atthu anaacuweleehu unaareera?
14 Ntthu mwanlattulaka woohikhala wuulalyeerani, uyo pooti utthuna nlattulo. Anuunwiihu amoca yahokhala ootikhinihiya uwiiwa waya awannyaya ahinonswalela Yehova yiiraka wiira yanhala urwaa u Nuupuweleloni. Nlattuni yaatikhinihiyaaya? Kontha ayo yahaalattula ikwaha cinci wiira yoone Nuupuwelelo, masi ayo khayaarwaa. Vano isiyani yeerannyeele ila ikwaheela? Awannyaya yahovahiya nlattulo no Nuupuwelelo ni humu mmoca yancuwelaaya. Ni khweeli ayo yahorwaa u Nuupuweleloni ule mwaakhoole ni myaakha cinci wahoolo.
15. Isiyani inlamuliyeehu wuupuwela nanlattulaka ntthu wiira awoone Nuupuwelelo?
15 Nhiliyale wiira atthu nnaalattuleenyu pooti ukhalana makoho, venci-venci wakhalaka wiira khanapaca urwaa u Salau yo Umwene. Unaareera wuupuwela makoho anhalaaya atthunaka upanka ni wiitthenkaca wiira niwaakhule saana. (Akol. 4:6) Akhwaawe pooti ukohaka co: ‘Unrwaa ukhala cani uyo nthukumanooyo?’ ‘Unhala uviriha iwoora kavi?’ ‘Pooti wanwaraaka khula ikuwo inhala ukicivela?’ ‘Unaaliviya?’ ‘Unaalepelaniya nsurukhu?’ Phimaana, nanlattulaka ntthu wiira oone Nuupuwelelo, unaareera unkoha co: “Nhaanana itthu yoopheela ukoha?” ni mwaakhule itthu impheelaawe ucuwela ntthuuyo. Ciicammo, pooti wanvareleenyu nteko ividiyu Wuupuwelele ukhwa wa Yesu ni Inkhumelela Isiyani Nsalauni Yoomwene? wiira munkavihere ntthuuyo ucuwela mananna cintthenkaciyaaya mikutthaano cihu. Ciicammo, mpantta 28 wo nlivuruni Mphwanye Utteeliya Uhimmala! cihaavo myaha comaana cooreera unthoonyihera ntthuuyo.
16. Makohoni atthunaka ale yoonile nuupuwele ankhalanaaya?
16 Yoonaka Nuupuwelelo, atthu anlattuliya atthunaka pooti upanka makoho makiina-tho. Atthunaka ayo anaakoha nlattuni ihikhuuriyaaya iphaawu ni ihiwuriyaaya iviinyu. Awula, nlattuni atthu vakaani paahi phikhunre ni phiwunrye? Ni atthunaka ayo pooti wiikoha wiira nimpanka Nuupuwelelo ikwaha kavi khula mwaakha ni atthunaka anaapheela ucuwela wakhala wiira mikutthaano co Masaahiti a Yehova cotheene cinkhala mananna mamocaaru toko Nuupuwelelo. Uhookhalaru wiira citthu cikiina toko nnyo cinaahimiya ukati untaphuleliyaaya mwaha wo Nuupuwelelo, atthunaka ntthuuyo nopheela ucuwela sana-saana awula nopheela wiiweeha. Mwaha “A Ceia do Senhor – porque é que as Testemunhas de Jeová a celebram de modo diferente?” nsayitini jw.org, pooti unikavihera waakhula makoho makhwaawe ntthuuyo nohalaawe ukhalana. Hi nimpheela upanka yotheene inkhitiriihu nihinaphiya nihuku no Nuupuwelelo, ninaphiile ni ninavinre. Nimpheela upanka commo wiira naakavihere ale “ampheela wiitthuca” ukumihera ifayita uyo nkutthaanooyo.—Mite. 13:48.
MWAAKAVIHERE ALE AHIILE URWAA UMIKUTTHAANONI NI WUULALYEERANI
17. Manannani mahumu anhalaaya waakavihera ale ahiile urwaa umikutthaanoni ni wuulalyeerani? (Ezekiyeli 34:12, 16)
17 Ukati wo Nuupuwelelo, mahumu anhala woonihera cani wiira anawaawacera saana ale ahiile urwaa umikutthaanoni ni wuulalyeerani? Mahumu, nwoonihere ayo atthwaayo wiira nnawaawawecera. (Nsome Ezekiyeli 34:12, 16. h) Nihinaphiya nihuku no Nuupuwelelo, mpanke yotheene inkhitiriinyu wiira nwoopane mwaha ayo atthwaayo wakhitirya. Mwaahimerye ni nwoonihere wiira ayo anaafentiya ni wiira nyuuva nnaapheela waakavihera nhina yotheene inhalaaya upheela ukaviheriya. Mwaalattule wiira yoone Nuupuwelelo, ni yakhala wiira anaahala ukhitiri uwa nwaakhelele saana. Vano waviraka nkutthaanooyo nhihiyerere waakavihera ayo mayamunna ni mayanuunu ofayitaayo, ni mpanke yotheene inhala ukhitirya wiira anturuwele Yehova.—1 Pet. 2:25.
18. Manannani otheene cihu ninhaleehu waakavihera ale ahiile urwaa umikutthaanoni ni wuulalyeerani? (Arooma 12:10)
18 Manannani otheene wanlokoni anlamuliyaaya waakavihera ale ahiile urwaa umikutthaanoni ni wuulalyeerani anhala urwaa unuupuweleloni? Pooti wampankeehu iyo naawaceraka ninifento, nuunamaana ni niihisimu. (Nsome Arooma 12:10. i) Muupuwele mananna waarikenlyaaya wiira aturuwele u Salau yo Umwene. Atthunaka ayo yaanawoova wiira khayaahala waakheleliya saana. j Nhuulume itthu inhala uwiiriha ayo ukhala niihaaya ni waawereeha nrima. (1 Atesal. 5:11) Ayo mayamunnaayo ni mayanuunwaayo ananfenta Yehova khampa cinonfenteehu. Hi unaanitteela nrima nlattu ayo wooturuwela unswalela Yehova nkhayi ni hi!—Isaa. 119:176; Mite. 20:35.
19. Ifayitani inkhalaneehu nlattu wowuupuwela ukhwa wa Yesu Kristu?
19 Ihaavo isariya Yesu yoonilepela wiira nuupuwele ukhwa wawe khula mwaakha. Ni khweeliini, hiiva ni atthu akhwaawe anaaphwanyera ifayita woopoliya wihu. (Isai. 48:17, 18) Wootakihera, unfenta wihu Yehova ni Yesu unaatepa ulipa, ninaakhalana ukati wowoonihera waasukhuru wihu nlattu wo citthu cinnipankelaaya ni ninaatepa waataana nimayamunneehu. Uhiya commo, nihaana ukati wowaakavihera akhunanihu ciicammo ucuwela woopoliya wihu ni ukhalana iparakha yowaakhela itthuvo Yehova nokhuluvelihaawe. Vano, nttwee nipanke inkhitiriihu wiira niitthenkace nihinaphiya nihuku nootepa ukhalana ifayita no nantano: nihuku nowuupuwelela ukhwa wa Yesu Kristu!
MANANNANI . . .
-
ninhaleehu utthenkaca nrimeehu wiira noone Nuupuwelelo?
-
ninhaleehu waakavihera akhunanihu ukumihera ifayita uyo nkutthaanooyo?
-
ninhaleehu waakavihera atthu ahiile urwaa umikutthaanoni ni wuulalyeerani?
NCIPO 18 Ninaasukhuru nlattu wo woopoliya
a Luka 22:19 Ciicammo, ahocisa iphaawu imoca, aholompa, ahomyaaniha ni ahaavaha, eeraka: “Ila inthoonyera irutthwaaka impheelaaka uvaha wiira mphwanye ifayita. Nhihiyerere upanka ila nkuupuwelelaka.” 20 Inanna imoca anamalihaleene ulya yoolya yo uhiyu, ahovaha ikoophu, eeraka: “Ila ikoophu ila inhimya nleehano no naanaano nipankiye ni iphomyaaka, inhala umwarusiya wiira yuuphanyiheni ifayita.”
b Isaalimu 49:7 Khaavo nhala ukhitiri umoopola munnaawe, hataa khaavo nokhitiri unliva Nluku wiira amoopole munnaawe, 8 (Iperesu inlamuliya uliviya wiira woopoliye ukumyaaya ikhanle yuulupale cinene, phimaana ayo khanhala ukhitiri uliva).
c Wiira mphwanye myaha ni ividiyu cihimiye ula mwahoola, nkele nsayitini jw.org, nrwee nipuro nintothiya citthu ni mwantikhe murwaaya mwahooyo awula ividiyu iyo.
d Nwehe mwaha “Makoho Anamasoma” nhina Ukhalenla yo Abril yo 2021.
e 1 Peturu 1:8 Uhookhalaru wiira khannapaca umoona, nyuuva nnanfenta. Uhookhalaru wiira nna va khannomoona, nyuuva nnamwaamini ni unawuutteelani nrima cinene, utteeliya uhinkhitirya uttonkaciya ni woottitthima.
f Nwehe ilivuru Achegue-se a Jeová, ikapiitulu. 23, iparaagarafu 8-9.
g Nwehe ikwaaturu “ Mananna oototha.”
h Ezekiyeli 34:12 Kinaahala uwacera ikhontwaa caka toko makampuci nophwanya ikhontwaa cawe caarimenle ni nowacera. Kinaahala woopola mapuro otheene waamwarenlyaaya nihuku no mahutte ni nihuku nopiphi. 16 Kinaahala utotha ikhontwaa irimenle, kinaahala uturusa ihapuwale, kinaahala utthukaca nikhwatta naya ile inhala urakala ni kinaahala ulipiha ile inhala woocya, masi kinaahala umalamaliha ikhontwaa yooneneva ni yokuru. Nnya mi kinaahala uhukhumu.
i Arooma 12:10 Nthoonyeranaka nifento no mayamunna, nwacerane saana. Nhiweherere wiira akhwiinyu apacere wuuttitthimihani, masi mpacere nyuuva waattitthimiha akhwiinyu.
j Nwehe ilatarato ni ikwaaturu “ Manannaayo caakheleliyaaya wanlokoni” Munna mmoca ahiile urwaa umikutthaanoni ni wuulalyeerani naasanka hinaaya ukela Nsalawuni yo Umwene, masi uyo naakhitiri umalamaliha woova wawe. Uyo nawaakheleliya saana ni nawiicoona wiira ri uwaani.
k ILATARATO: Ukati apoovu a Yehova anoonaaya Nuupuwelelo mphantte nkiina wo ntuninyani, mayamunna ni mayanuunu olapo cikiina anawiitthenkaca wiira naayo yoone uyo nthukumanooyo.
