1. U mulandu ci uno uwanda wa Ciusyo wacindamila sana umu mwaka? (Luka 22:​19, 20.)

 UKU yantu yakwe Yeova, uwanda wa kuzevya imfwa yakwe Yesu wacindama sana umu mwaka. Ciusyo caya pa vintu ivicindame vino Yesu wanenyile alondezi yakwe ukulacita. (Belengini Luka 22:​19, 20.) Kuli imilandu iingi ino tukulondela ukuzanwa uku Ciusyo. Lekini tulande pa milandu imwi.

2. I milandu ci imwi ino tukulondela sana ukuzanwa uku Ciusyo?

² Ciusyo cikatwazwa ukulaelenganya pali vino ilambo lyacindama na pa mapaalo yano tulapokelela uku nkoleelo. Cikatwiusyako ni nzila zino tungalangilamo ukuti tukataizya pi ilambo lyakwe Yesu. (2 Kol. 5:​14, 15.) Ciusyo cikalenga twaipakizya ‘ukukomelezyanya’ na ina alino na ya nkazi. (Loma 1:12.) Cila mwaka, antu aingi aatonte yakazanwa uku Ciusyo. Yamwi yakatandika ukulongana apa mulandu nu kutemwa kuno tukayalanga nga iza uku Ciusyo. Vino antu aakazanwako yakalola nu kuvwa vikalenga yalonda ukutandika ukusambilila Baibo. Cii cikalenga twalondesya ukuzanwa uku Ciusyo.

3. Uzye Ciusyo cikalenga uli tulemane na ina na ya nkazi umu insi yonsi? (Loliniko ni cikope.)

³ Tukulondesya sana ukuzanwa uku Ciusyo pano cikalenga tuye sana alemane na ina na ya nkazi umu nsi yonsi. Ya Nte Yakwe  Yeova umu nsi yonsi pa wanda uu yakakolongana lino ilanzi lyawa. Nupya antu yonsi aakazanwako yakauvwa ilyasi ilikalanda pali vino ilambo lyacindama. Tukaimba inyimbo ziili izyakulumbanya Umwene, ukupisyamo ivinkolanya, tukapepa amapepo 4 nu kulanda ukuti ameni ukwi pepo lyonga na lyonga. Umu wanda onga, ivilongano vyonsi vikacita vikwene. Yeova na Yesu yakauvwa ningo nga yalola tukuombela pamwi lino tukwiusya imfwa yakwe Yesu.

4. I vyani vino tumasambilila umu cipande cii?

⁴ Umu cipande cii tumaasuka amauzyo yaa: Uzye tungapekanya uli imyenzo itu uku Ciusyo? Tungazwa uli yauze ukuipakizya? Nupya tungazwa uli atonte? Amasuko uku mauzyo yaa yamatwazwa ukuipekanya uku cintu cii icicindame.

UZYE TUNGAPEKANYA ULI IMYENZO ITU UKU CIUSYO?

5. (a) U mulandu ci uno tulinzile ukulaelenganyizizya pali vino ilambo lyacindama? (Masamu 49:​7, 8.) (b) I vyani vino mwasambilila kuli vidyo iyakuti U Mulandu ci Uno Yesu Wafwilile?

⁵ Inzila yonga ino mungapekanyizizyamo imyenzo inu uku Ciusyo, u kulaelenganya sana pali vino imfwa yakwe Yesu yacindama. Sweineco, tutanga tuipususye uku luyembu ni mfwa. (Belengini Masamu 49:​7, 8; tambini na vidyo iyakuti U Mulandu ci Uno Yesu Wafwilile?) a Fwandi Yeova watumile Yesu ukwizapeela umi wakwe ukuti atutuule uku luyembu ni mfwa. (Loma 6:23.) Nga tukwelenganya sana pali vino Yeova na Yesu yaipeelisye, tulataizya sana api lambo. Tumalanda apa vintu vino Yeova na Yesu yatucitiile. Ica kutandikilapo, lekini tulande pali vino ilambo likapiliula.

6. Uzye ilambo likapiliula cani?

⁶ Imfwa yakwe Yesu tungaikolanya uku lupiya luno yakalipila ukuti yawezye cimwi icaponzile. Lino Leza waumvile Adamu umuntu wa kutandikilapo wali u mumalilike. Lino Adamu wayembwike, waponzizye umi umalilike pamwi nu wa yana yakwe. Pakuti Leza awezye umi umalilike uno Adamu waponzizye, watumile Yesu ukwizapeela umi wakwe umalilike ilambo. Lino Yesu wali pano nsi, “atatazile acite uluyembu, nupya atatazile alande ivya ucenjezi.” (1 Pet. 2:22.) Vino Yesu wali umumalilike, lino wafwile walipile umi umalilike uno Adamu waponzizye.—1 Kol. 15:45; 1 Tim. 2:6.

7. A mezyo ci yamwi yano Yesu wapisilemo lino wali pano nsi?

⁷ Lino Yesu wali pano nsi watwalilile ukuya uwa cisinka kuli Isi uwa kwi yulu asi mulandu nu kweziwa kuno weziwanga. Lino Yesu wali umwance uvwilanga avyazi yakwe aatali amalilike nanti icakuti wene wali umumalilike. (Luka 2:51) Lino wali umwance, walondekwanga ukuombesya ukukanalondelela amunenanga ukucita ivintu ivyali nu kumulenga ukukanauvwila avyazi yakwe alino na Yeova. Nupya lino Yesu wakuzile, walondekwanga ukucimvya matunko aafumanga kuli Satana aali nu kumulenga ukukanatwalilila ukuya uwa cisinka kuli Leza. (Mate. 4:​1-11) Satana walondanga Yesu ukuyembuka pakuti Yesu atapeela ilambo.

8. Iintazi ci na zyuze zino Yesu wazizimizye?

⁸ Lino Yesu waombanga umulimo wa kusimikila, wazizimizye intazi na zyuze. Yamucuzyanga nupya yalondanga nu kumukoma. (Luka 4:​28, 29; 13:31) Waombanga na antu ataali amalilike. (Mako 9:​33, 34) Lino wali mupipi nu kufwa, yamucuzyanga nu kumuma. Nupya yamuzewanyizye nu kumukoma  wa cipondo. (Aeb. 12:​1-3) Lino wali umupipi nu kufwa, wazizimizye intazi zyonsi zino wakweti ukwaula ukuti Yeova amucingilile. b—Mate. 27:46.

9. Uzye tukayuvwa uli pali vino Yesu watufwilile? (1 Pet. 1:8)

⁹ Umu cumi Yesu wacuzile sana pakuti atufwile. Nga twelenganya pali vino Yesu waipeelisye ukwizatufwila, tukamutemelwako sana—Belengini 1 Petulo 1:8.

10. I vyani vino Yeova waitemiilwe ukucita pakuti Yesu aize atufwile?

¹⁰ Nga Yeova wene i vyani vino wacisile? I vyani vino Yeova waitemiilwe ukucita pakuti Yesu aize atufwile? Yeova na Yesu yakwata ucuza upalamisye sana ukaya pali isi nu mwana. (Mapi. 8:30) Elenganyini pali vino Yeova uvwanga lino walolanga Yesu akucula. Ukwaula nu kutwisika, Yeova uvwile sana uyi lino waweni kuno Yesu akucula.

11. Langililini vino Yeova uvwanga lino Yesu waculanga.

¹¹ Umuvyazi wensi uwafwilwapo umwana wamanya vino cikauvwika umwana nga wafwa. Twakwata utailo ukome umu kutuutuluka, nomba cii cisisisyapo uyi uno tukauvwa ndi cakuti wino twatemwa wafwa. Cii cingatwazwa ukuvwikisya vino Yeova uvwile lino waweni Umwanakwe akucula nu kufwa apa wanda uwa umu 33 C.E. c—Mate. 3:17.

12. I vyani vino tulinzile ukulacita lino kwasyala amanda anono kuti kuye Ciusyo?

¹² Ukutandika likwene alino na lino kulaya Iciusyo, uzye mutanga mutandike ukuisambilizya alino nu kupanga amapepo yalupwa akulanda sana apa Ciusyo? Mwaomvya Ibuku Ilya Kwazwa Inte Zyakwe Yeova Ukulondelezya Ivyeo nanti ukuomvya mpapulo zyuze apa kumanya ivingi apa mfwa yakwe Yesu. d Nupya mwalondela utantiko wa kubelenga Baibo umu manda ya Ciusyo ukaya umu kabuku kakuti Swe Ina Klistu nu Mulimo Witu—Kabuku Kakuomvya pa Kulongana. Nupya apa wanda wakuzevya Ciusyo, mutakilile ukutamba vidyo iiyele iya Mapepo ya Katondo. Ndi cakuti twapekanya imyenzo itu uku Ciusyo, tulaazwa yauze ukuipakizya.—Ezila 7:10.

MWAAZWA YAUZE UKUIPAKIZYA

13. I cintu ci ica kutandikilapo cino mulinzile ukucita pakuti mwazwe yauze ukuipakizya Ciusyo?

¹³ Tungazwa uli yauze ukuipakizya Iciusyo? Ica kutandikilapo, ukuyama uku Ciusyo.  Ukulunda pali yano tukazana umu mulimo wa kusimikila, tungalemba mazina ya antu yano twamanya yano tukulonda tukaame. Pa yantu yayo pangaya ya lupwa, yano tukaomba nayo, yano tukasambilila nayo, alino na antu yauze yano twamanya. Ndi cakuti tutakweti utupepala utwingi utupulintwe utwakwamilapo antu, tungaomvya linki. Tungazunguka ukulola vino antu aingi yangatemwa ukwizazanwako.—Kasa. 11:6.

14. Langililini vino ukwama umwi uku Ciusyo kungalenga alondesya ukuzanwako.

¹⁴ Ndi cakuti mwama umwi uku Ciusyo, angalondesya ukuzanwako. Nkazi umwi wino iya asi Nte, wazungwike lino iya wamunenyile ukuti alazanwako uku Ciusyo. I cani icalenzile azunguke? Pano pa miku iingi uku cisila, wakomelezyanga iya ukuzanwako lelo atatazile azanweko. Nomba i cani icalenzile azumile umuku uu? Watiile eluda wino wamanyile wamupeezile akapepala akakumwamilapo. Iya wakwe nkazi wii wazanyileko uku Ciusyo umwaka uwa nupya watwalilile ukuzanwako pa myaka iingi.              

15. I vyani vino tulinzile ukulaelenganyapo lino tukwama antu uku Ciusyo?

¹⁵ Tulinzile ukulaiusya ukuti yano tukaama yangakwata mauzyo, sana sana ndi cakuti yatatala yazanwapo uku kulongana kwitu. Fwandi tulinzile ukwelenganyizizya limwi pa mauzyo yano yanguzya na vino tungasuka. (Kolo. 4:6) Wakwe, yamwi yakauzya ukuti: ‘I vyani ivilacitika pa Ciusyo?’ ‘Uzye ukulongana kulatalimpa uli?’ ‘I vyakuzwala vya musango ci vino ndinzile ukuzwala?’ ‘Uzye ndinzile ukulipila pakuti nzanweko?’ ‘Uzye kulaya ukusonkesya impiya?’ Lino mukwama umuntu uku Ciusyo, mungamuzya ukuti, “Uzye imukwata mauzyo ali yonsi?” lyene mulinzile ukwasuka mauzyo yano amauzya. Nupya tungaomvya na vidyo yakuti Mwaiusya Imfwa Yakwe Yesu ni yakuti I Vyani Vikacitika pa Ng’anda ya Wene? pa kwazwa umuntu ukumanya vino ukulongana kwitu kukaya. Nupya umwi sambililo 28 umwi ibuku lyakuti  Mungaya ni Nsansa Manda Pe! mwaya ivisinka ivisuma vino tungalanzyanya nayo.

16. A mauzyo ci nayauze yano antu yano itwama uku Ciusyo yangakwata?

¹⁶ Pa cisila ca Ciusyo, apya aatiyazanwako limwi yangakwata mauzyo nayuze. Limwi yanguzya umulandu uno antu anono sile (ndi cakuti kuli atiyalya) ali yano iyalya ivinkolanya. Yangalonda nu kumanya imiku ino tukazevya Iciusyo. Nupya yangalonda nu kumanya ndi cakuti ukulongana konsi kwakwe ya Nte Yakwe Yeova kukaya vikwene. Nanti cakuti vyonsi vii yakavilandapo nu mwi lyasi lya Ciusyo, apya yangatemwa ukumanyilapo navyuze. Icipande ica pa jw.org icakuti “U Mulandu ci Uno Ya Nte Yakwe Yeova Yakazevezya Icakulya Ica Manguzi Ica Mwene Umu Nzila Ipusaneko na Vino Amu Mipepele Yuze Yakacita?” cingatwazwa ukwasuka mauzyo yamwi yano yanguzya. Tukalonda ukucita vyonsi vino tungacita, lino Iciusyo citatala catandika, pa Ciusyo, na pa cisila ca Ciusyo, pakuti twazwe ‘yonsi aakalondesya’ ukuvwa ukuipakizya Iciusyo.—Mili. 13:48.           

MWAAZWA AATONTE

17. Uzye ya eluda yangazwa uli aatonte? (Ezekelo 34:​12, 16)

¹⁷ Uzye ya eluda yangazwa uli aatonte umu nsita ya Ciusyo? Mwayalanga ukuti mwaikako mano. (Belengini Ezekelo 34:​12, 16.) Lino Iciusyo citatala cafika, mwaezya ukulanda na aatonte aingi. Mwayanena ukuti mwaikako mano nupya mukalondesya ukuyazwa. Mwayama uku Ciusyo. Ndi cakuti yiza uku Ciusyo, mwayazengela ni nsansa. Pa cisila ca Ciusyo, mwatwalilila ukulanzyanya na ina yaa na ya nkazi nu kuyazwa muli ukapepa pakuti yawele kuli Yeova.—1 Pet. 2:25.

18. Uzye swensi umu cilongano tungazwa uli aatonte? (Loma 12:10)

¹⁸ Swensi kwene umu cilongano tungazwa aatonte aakazanwa uku Ciusyo. Tungacita uli vivyo? Tungacita vivyo ndi cakuti tukuyalanga ukutemwa, cikuuku, alino nu kuyacindika. (Belengini Loma 12:10.) Mwaiusya  ukuti aina na ya nkazi yaa, cikayatalila ukutandika ukulongana nupya. Limwi yakatiina ukuti yatalayapokelela ningo umu cilongano. e Fwandi mutayuzya mauzyo angalenga yuvwe insonyi nanti ukulanda vimwi ivingalenga yuvwe uyi. (1 Tesa. 5:11) Aina na ya nkazi yaa aa kapepa yanji. Tukaya ni nsansa ukupepela pamwi nayo nupya.—Masa. 119:176; Mili. 20:35.

19. I visuma ci ivikacitika nga tukwiusya imfwa yakwe Yesu?

¹⁹ Tukataizya pali vino Yesu watunenyile ukulaiusya imfwa yakwe cila mwaka nupya twamanya umulandu uno ukucitila vii kwacindamila. Nga twazanwako, tukaipakizya ivintu ivisuma nupya tukaazwa yauze ukuipakizya umu nzila izipusane pusane. (Eza. 48:​17, 18) Tukatemelwako Yeova na Yesu. Tukalanga ukutaizya pali vino yatucitila. Tukakomya ucuza witu na ya kapepa yanji. Nupya tungazwa na yauze ukumanya vino yangacita pakuti yakaipakizye mapaalo yano ilambo likalenga twaipakizya. Fwandi lekini tucite vyonsi vino tungakwanisya ukucita pakuti tuipekanyizizye limwi uku Ciusyo ca uno mwaka, uwanda ucindamisye umu mwaka.