1. Молан Шарнымаш кас ийыште эн кугу событий? (Лукан 22:19, 20).

 ИЕГОВАН калыкшылан Иисус Христосын колымыжым шарнымаш кас — кажне ийын эн кӱлешан событий. Тиде касым веле Иисус эртараш кӱштен. (Лукан 22:19, 20 лудын лекса.) Тиде событийым вучаш мемнан икмыняр амал уло. Айста нунын гыч икмыняржым ончен лектына.

2. Каласыза икмыняр амалым, молан ме Шарнымаш касым чот вучена.

² Шарнымаш кас мыланна тӱлен налмын акше нерген шонкалаш полша. Тудо шарныкта мыланна, кузе ме Иисусын надыржылан тауштымынам ончыктен кертына (2 Кор. 5:14, 15). Тыгак пырля погынен, ме икте-весынам пеҥгыдемдена (Рим. 1:12). Кажне ийын Шарнымаш касыш шуко иза-ака толеш, кудышт вашлиймашыш коштмым чарненыт. Шокшын вашлиймына нунын шӱмыштым тарвата, да южышт Иегова деке пӧртылаш решенийым луктыт. Тыгак касыш уна-влакат толыт. Нунын гыч шукыштлан чот келша, мом нуно тушто колыт да ужыт. Тиде нуным Библийым шымлаш кумылаҥда. Чыла тидлан кӧра ме Шарнымаш касым чот аклена!

3. Кузе Шарнымаш кас уло тӱня мучко илыше иза-ака-влакым иктеш уша? (Тыгак сӱретым ончыза.)

³ Тыгак шоналтыза, кузе Шарнымаш кас уло тӱня мучко илыше иза-ака-влакым иктеш уша. Уло тӱня мучко Иегован Таныкше-влак кечын шинчымыж деч вара тиде ойыртемалтше событийыш погынат. Ме колыштына библийысе ойлымашым, мыняр чот тӱлен налмаш кӱлешан. Кок моктымаш мурым мурена да икте-весыланна кинде ден йошкар аракам пуэдена. Тиде вашлиймаште ныл кумалтыш мутым колаш лиеш, кудыж деч вара ме уло кумылын «аминь» мутым ойлена. Тыгай радам почеш Шарнымаш кас иктаж 24 шагат коклаште уло тӱня мучко чыла погынымаште эртаралтеш. Ме  ик калык семын Иегова ден Иисусым чапландарена. Шоналтыза веле, кузе нуно тидым ужын куанат!

4. Тиде статьяште мом лончылен налына?

⁴ Тиде статьяште ме тыгай йодыш-влаклан вашмутым налына: Кузе Шарнымаш каслан шӱмнам ямдылаш? Кузе уна-влаклан тиде кас деч пайдам налаш полшаш? Мом ме ыштен кертына тыгай иза-ака-влаклан, кудышт уже икмыняр жап вашлиймашыш огыт кошт? Чыла тиде йодышлан вашмут-влак мыланна ты кӱлешан событийлан ямдылалташ полшат.

ШАРНЫМАШ КАСЛАН ШӰМНАМ КУЗЕ ЯМДЫЛАШ?

5. а) Молан мыланна тӱлен налмаш нерген шонкалаш кӱлеш? (Псалом 48:8, 9). б) «Молан Иисус колен?» видеоролик гыч мом те пален налында?

⁵ Шарнымаш каслан шке шӱмнам ямдылашлан эн ончыч Иисус Христосын надырже нерген шонкалаш кӱлеш. Ме сулык ден колымаш деч шке нигунамат утлен она керт ыле. (Псалом 48:8, 9 лудын лекса; тыгак «Молан Иисус колен?» видеороликым ончыза a.) Сандене Иегова мемнан верч шке Эргыжым пуэн. Иеговаланат, Иисусланат тидым ышташ куштылго лийын огыл (Рим. 6:23). Нунын мемнан верч ыштымышт нерген шукырак шонкалена гын, тиде мемнам тӱлен налмым эше чотрак аклаш тарата. Тиде статьяште ме ончен лектына, мо тыгай тӱлен налмаш. Тыгак шкаланна шарныктена, мемнам тӱлен налашлан Иегова ден Иисуслан мом ышташ логалын.

6. Мо тыгай тӱлен налмаш, да молан тудо кӱлын?

⁶ Тӱлен налмаш — тиде йомдарымым пӧртылташлан акым тӱлымаш. Икымше пӧръеҥ, Адам, эн ончыч сулыкдымо лийын, но вара сулыкым ыштен. Тыге тудо курымеш илаш йӧным шкат йомдарен, икшывыж-влакымат тиде йӧн деч посна коден. Адамын чыла йомдарымыжым пӧртылташлан Иисус надырлан шке сулыкдымо илышыжым пуэн. Мландыште илен, «языкым Тудо ыштен огыл, Тудын йылмыж гыч чояланымаш шоктен огыл» (1 Пет. 2:22). Кунам Иисус колен, тудо лач тыгай сулыкдымо лийын, могай Адам сулыкым ыштымыж деч ончыч лийын. Тыге Иисус Адамын сулыкдымо илышыжлан келшен толшо акым тӱлен (1 Кор. 15:45; 1 Тим. 2:6).

7. Мландыште илымыж годым Иисус могай нелылык ден тӱкнен?

⁷ Мландыште илыме годым Иисус эре кавасе Ачажым колыштын, эсогыл кунам тидым ышташ куштылго лийын огыл. Иисус сулыкдымо йоча лийын, а ача-аваже сулыкан лийыныт. Туге гынат тудо нуным колыштын (Лук. 2:51). Самырык лиймыж годым тудым, очыни, иктаж-кӧ ача-аважым колыштмым чарнаш але Юмын иктаж-могай законжым пудырташ таратен. Но Иисус тыгай еҥ-влакым колыштын огыл. Кугу лиймыж годым тудлан Диаволын алгаштарымыже ваштареш шогаш кӱлын. Тиде тушман эсогыл тудлан Юмым ужалаш темлен (Матф. 4:1—11). Иисус сулыкым ыштыже манын, Сатана шуко вийым пыштен. Сатана шке цельышкыже шуэш ыле гын, Иисус айдеме тукымым тӱлен налын ок керт ыле.

8. Иисусын могай эше тергымашыже лийын?

⁸ Служитлаш тӱҥалмыж годымат Иисус тергыме лийын. Тушманже-влак тудым поктылыныт да икмыняр гана пушташ тӧченыт (Лук. 4:28, 29; 13:31). Тудлан тунемшыж-влакын йоҥылышыштым чыташ кӱлын (Мар. 9:33, 34). Судитлыме годым Иисусым мыскыленыт да воштылыныт. Тудым преступник семын индырен казнитленыт (Евр. 12:1—3).  Меҥгыште кечымыж годым Иисус тергымашым шкетын эртен — Иегован аралымыж деч посна (Матф. 27:46) b.

9. Иисусын надырже нерген шонымыда годым могай шижмашда лектеш? (1 Петрын 1:8).

⁹ Чынак, мемнам тӱлен налашлан Иисуслан шуко орланаш логалын. Кунам ме шонена, мом тудо мемнан верч ышташ ямде лийын, шӱмна йӧратымаш да тауштымаш дене темеш. (1 Петрын 1:8 лудын лекса.)

10. Айдеме тукымым тӱлен налашлан Иеговалан мом ышташ логалын?

¹⁰ Айдеме тукымым тӱлен налашлан Иеговалан мом ышташ логалын? Иегова ден Иисус Эргыжын чот лишыл кыл кучымашышт. Нунын гай кыл кучымаш тӱняште ик ача ден эргынат уке (Прит. 8:30). Шоналтыза гына, могай Иегован шижмашыже лийын, кунам тудо Иисусын шуко орланымыжым ужын. Иегован чонжо чот корштен, кунам тудын Эргыж дене несправедливый лийыныт, тудым пагален огытыл да тудын дене чот торжа лийыныт.

11. Мо мыланна умылаш полша, Иегован могай шижмашыжым Иисусын колымыжо шочыктен?

¹¹ Ача ден авалан йочаштын колымыжо — эн кугу ойго. Ылыжмашлан пеҥгыде ӱшанымашат шӱм-чон корштымашым ок кораҥде. Тиде пример умылаш полша, могай Иегован шижмашыже лийын, кунам тудо ужын, кузе йӧратыме Эргыже орланен кола (Матф. 3:17) c.

12. Шарнымаш кас марте кодшо жапым кузе кучылташ лиеш?

¹² Шарнымаш кас марте шуко жап кодын огыл. Тиде жапым тӱлен налмаш нерген шукырак пален налашлан кучылташ лиеш. Тидым шкевуя але еш дене шымлымаш годым ышташ лиеш. «Путеводитель по публикациям Свидетелей Иеговы» манме справочникым але вес публикаций-влакым кучылтса d. Тыгак «Христиан илыш ден служымашна» паша тетрадьыште пуымо график почеш Библийым лудса. А Шарнымаш кас кечын лӱмын лукмо эрденысе кумалмаш выпускым ончалаш ида мондо. Шӱмнам кӱлеш семын ямдылена гын, тунам весе-влаклан умылаш полшен кертына, могай пайдам нунылан Шарнымаш кас конда (Езд. 7:10).

УНА-ВЛАКЛАН ШАРНЫМАШ КАС ДЕЧ ПАЙДАМ НАЛАШ ПОЛШЫЗА

13. Шарнымаш кас еҥ-влаклан пайдам кондыжо манын, ме мом ыштен кертына?

¹³ Шарнымаш кас еҥ-влаклан пайдам кондыжо манын, ме мом ыштен кертына? Эн  ончыч нуным ӱжын кертына. Мутат уке, Шарнымаш кас нерген ме еҥ-влаклан служымаште каласена. Но тыгак ме ончылгочак шонен кертына, кӧм палыме-влак гыч тиде событийыш ӱжаш лиеш. Тиде, мутлан, родына-влак, пырля пашам ыштыше-влак, пырля тунемше-влак лийын кертыт. Печатлыме ӱжмашна-влак пытат гынат, нунылан электронный версийлан ссылкым колташ лиеш. Ме ӧрын кертына, мыняр шуко еҥ толын кертеш! (Эккл. 11:6).

14. Айдемылан ӱжмашым пуэда гын, тиде могай пайдам конден кертеш?

¹⁴ Ӱжмашым налмылан кӧра айдеме Шарнымаш касыш толаш кумылаҥдыме лийын кертеш. Теве ик пример. Ик ака чот ӧрын, кунам Танык огыл марийже тудлан каласен: «Мый Шарнымаш касыш тый денет пырля каем». Молан ака ӧрын? Молан манаш гын, ончыч тудо марийжым шуко гана ӱжын, но весыже мияш келшен огыл. Можо вара вашталтын? Марийже каласен: «Ончал, мыланем ӱжмашым пуэныт». Тудлан ик палыме верысе кугурак иза ӱжмашым пуэн улмаш. Тиде пӧръеҥ Шарнымаш касыш ту гана веле огыл толын, тылеч вара тудо эше шуко ий Шарнымаш касыш коштын.

15. Еҥ-влакым Шарнымаш касыш ӱжын, мо нерген мыланна шарныман?

¹⁵ Шарнымаш касыш ӱжмӧ-влакын шуко йодышышт лийын кертеш, поснак нуно вашлиймаштына нигунамат лийын огытыл гын. Ончылгочак шоналташ лиеш, могай йодышым нуно пуэн кертыт, да вашмутым ямдылаш лиеш (Кол. 4:6). Мутлан, иктаж-кӧ йодын кертеш: «А кузе тиде мероприятий эртаралтеш? Мыняр шагат тудо шуйна? А тушко мияшлан мом чийыман? Пурашлан оксам тӱлаш кӱлеш мо? Тушто лийше еҥ-влак деч оксам погаш тӱҥалыт мо?» Айдемым Шарнымаш касыш ӱжын, ме тудын деч йодын кертына: «Можыч, тендан иктаж-могай йодышда-влак улыт?» Йодышыжо лиеш гын, вашмутым пуыза. Тыгак «Иисус Христосын колымыж нерген шарнымаш» да «Вашлиймаш залыште мо ышталтеш?» манме видеоролик-влакым ончыкташ лиеш. Тушечын айдеме пален кертеш, кузе вашлиймашна-влак  эртаралтыт. А эше «Курымеш куанен илыза!» книган 28 урокышто шуко шонымаш уло, кудыжым айдемылан ончыкташ лиеш.

16. Шарнымаш кас деч вара уна-влакын могай йодышышт лектын кертеш?

¹⁶ Еҥ-влакын Шарнымаш кас деч вара у йодыш-влак лектын кертыт. Очыни, нуно огыт умыло, молан иктат киндым кочкын огыл да йошкар аракам йӱын огыл але икмыняр еҥ веле тидым ыштен. Тыгак нуно йодын кертыт: «Мыняр чӱчкыдын те Шарнымаш касым эртареда? Чыла вашлиймашда тидын семынак эртаралтеш мо?» Нине йодыш-влаклан вашмут Шарнымаш касыште лийше ойлымаште лиеш гынат, очыни, еҥ-влаклан сайрак умылтараш кӱлеш лиеш. Тидлан мыланна «Молан Иегован Таныкше-влак вес религий-влак дене таҥастарымаште Господьын кас кочкышыжым вес семын эртарат?» манме статья полшен кертеш. Кӧ чын корныш шогалнеже, нунылан Шарнымаш кас деч ончыч, Шарнымаш кас годым да Шарнымаш кас деч вара шкенан могырна гыч чылажымат ыштымына шуэш (Ап. паш. 13:48, УТ).

ПОГЫНЫМАШЫШ КОШТАШ ЧАРНЫШЕ-ВЛАКЛАН ПОЛШЫЗА

17. Кузе кугурак иза-влак полшен кертыт тыгай иза-ака-влаклан, кӧ вашлиймашыш коштмым чарнен? (Иезекииль 34:12, 16).

¹⁷ Кузе Шарнымаш кас жапыште кугурак иза-влак полшен кертыт тыгай иза-ака-влаклан, кӧ вашлиймашыш коштмым чарнен? Нунылан йӧратымашдам ончыктыза. (Иезекииль 34:12, 16 лудын лекса.) Шарнымаш кас деч ончыч кажныжлан йыҥгырташ тыршыза. Те нуным йӧратеда манын ӱшандарыза да полшаш кумылна уло манын каласыза. Нуным Шарнымаш касыш ӱжса, а кунам нуно толыт, шокшын вашлийза. Нине шергакан иза-ака-влаклан Иегова деке пӧртылаш полшаш манын, Шарнымаш кас деч вара нунын дене кылым умбакыжат кучыза (1 Пет. 2:25).

18. Мемнан гыч кажныже вашлиймашыш коштмым чарныше-влаклан мом ыштен кертеш? (Римлян-влаклан 12:10).

¹⁸ Мемнан гыч кажныже вашлиймашыш коштмым чарныше-влаклан мом ыштен кертеш? Кунам нуно Шарнымаш касыш толыт,  нунылан йӧратымашым, порылыкым да пагалымашым ончыктыза. (Римлян-влаклан 12:10 лудын лекса.) Шарныза: нине шергакан иза-ака-влаклан вашлиймашыш толаш, очыни, куштылго лийын огыл. Можыч, нуно лӱдыныт, кузе нуным вашлийыт e. Сандене нунылан вожылтарыше йодыш-влакым ида пуэде да ида ойло тыгайым, мо нунылан шӱм-чон корштымашым конден кертеш (1 Фес. 5:11). Нине иза-ака-влак мемнан духовный ешна улыт. Ме чот куанена, вет угыч нунын дене пырля Юмылан служитлена! (Пс. 118:176; Ап. паш. 20:35).

19. Иисусын колымыжым шарнымаш могай пайдам конда?

¹⁹ Иисус мыланна кажне ийын тудын колымыжым шарнаш кӱштен. Ме тиде йӧным чот аклена. Шарнымаш касыште лияш чот кӱлешан. Тиде мыланнат, весе-влакланат пайдам конда (Ис. 48:17, 18). Мемнан Иеговам да Иисусым йӧратымашна эше чотрак вияҥеш. Тыгак ме нунылан ончыктена, мыняр чот нунын мыланна ыштымыштым аклена. Тулеч моло ме иза-ака-влак дене эше лишылрак лийына. А эше ме весе-влаклан пален налаш полшена, могай ончыкылык Христосын надыржылан кӧра нуным вуча. Шарнымаш кас — ийыште эн кугу событий. Айста тиде событийлан сайын ямдылалтына!