1. Mwahaya bwaddi muthupo wowubuwela okwa wa Yesu nlabo na vayekiwa na vayakani? (Lukaji 22:19, 20)

 NLABO nowubuwela okwa wa Yesu, nnakale nlabo nathima vanlubale navayekiwa wa Anamoona a Yehova. Mwaha wihina ola muthupo wavayekiwa Yesu aarumiliye anamahara aye wi yeregena. (Omwileri Lukaji 22:19, 20.) Iyo nihikanna dhithu dhinanithukulela ojheha nuuthaba kadda yaka nlabo nna. Nnere woona dhithu ndho.

2. Dhithu baani dhineriha wihina nlabo nowubuwela okwa wa Yesu nikale nathima wahiyo?

² Wubuwela okwa wa Yesu ononikavihera ohidduwala thima onna okwa wa Yesu. Teto ononubusedha makalelo owoniha otamalela wehu mwaha wa mukutho ola. (2 Cor. 5:14, 15) Ohiya eyo, nlabo nowubuwela okwa wa Yesu, nnokanna oneti ‘woolibihana mmodha ni mukwaye.’ (Rom. 1:12) Yaka dhatedhene, addibila ni arogola owinjhiva edduddumadhe epaddi yomuzimuni enowoona muthupo ola. Teto amodhaya, mwaha wakeliwa ni odhivela, enothoma omuhogolowela Yehova. Amodhaya enothoma wambela omuhudhera Bibiliya mwaha dhithu enoniwa ni eniwiwa vamuthuponi wowubuwela okwa wa Yesu. Ndha dhithu dhinanithukulela ohagalala nafiyaga nlabo nna!

3. Nimakalelo baani nnakalihu owiwanana nlabo nowubuwela okwa wa Yesu? (Osugwe fotu.)

³ Kubuwela makalelo nnakalihu owiwananeene elabo yaatene yavati, nlabo nowubuwela okwa wa Yesu. Anamoona a Yehova enotugumana nduwa namothelagamo mowiwanana ni kadda elabo. Aatene iyo nnovuruwana mwaha onawoga wodhela thima enna yowobola, nnowiba jhibo biili, enovira pawu vamodha ni vinyu, teto nnowakula “amem” ni murima wehu waatene naawakulaga malobelo mannayi eneriwana. Wapela elabo yaatene yavati, mulogo dhatedhene dhinowerana ethu emodhave. Onowanda wubuwela makalelo Yehova vamodha ni Yesu enakaliwa oohagalalene  yaanonaga nigaali owiwananeene wapela elabo yaatene, naathithimihaga aliwa ni makalelo yaala?

4. Ethu baani nnafunihu woona muwari mwa ohudhera wula?

⁴ Muwari mwa ohudhera wula, nnere wawakula makoho mannayi, nnande aavi wegeredha murima wehu nlabo nowubuwela okwa wa Yesu nahinathi ofiya? Nnakavihere aavi athu amodha opurelamo muthupo ola? Ki nnande wakavihera aavi ale edduddumadhe epaddi yomuzimuni? Dhowakula dha makoho ala, dhinere onikavihera okala owiwegeredhene nlabo nna navayekiwa nahinathi ofiya.

NNANDE AAVI WEGEREDHA MURIMA WEHU NLABO NOWUBUWELA OKWA WA YESU NAHINATHI OFIYA?

5. (a) Mwahaya bwaddi sapama opendda thima enna yowobola? (Salmo 49:7, 8) (b) Ethu baani ohudheriwe ni vidiyu Yesu akwele ddi?

⁵ Makalelo athima owegeredha murima wehu nlabo nowubuwela okwa wa Yesu nahinathi ofiya, fuudhela opendda thima onna mukutho wa okwa wa Yesu. Iyo kanaande wiwobola yekihu muukwani ni mutheegani. (Omwileri Salmo 49:7, 8; osugwe vidiyu Yesu akwele ddi?) a Yehova omuruma Yesu wihina avahe egumaye wi anobole. Yehova ni Yesu ehileva vanlubale. (Rom. 6:23) Naapenddaga ethu Yehova vamodha ni Yesu eneriliwa, otamalela wehu wodhela yowobola winowenjhedhedheya. Kabeni noone dhithu dhorusa vanlubale Yehova ni Yesu enerenliwa wihina enoobole. Mbwenye nahinathi woona dhithu ndho, kabeni nakule nikoho nna, yowobola ddiniyani?

6. Wihina muthengo wa yowobola oliviwe, ethu baani yahoweleya?

⁶ Yowobola muthengo onaliviwa wihina nikanne ethu naayelelihu. Mulobwana oobajha, Adawu, aali oologomana nupaddusiwa. Nuuthega, oliye vamodha ni odhulu waye oyelela ofuru wokalawo ni mukalakala. Vano, wihina nikanne dhithu dhimodhave Adawu ayeleliye, Yesu ovelela egumaye yologomana ninga mukutho. Mudhidhi Yesu agaali elabo yavati, ‘kerilena yothega, mulomo waye kuwawogile yowoota.’ (1 Ped. 2:22) Teto Yesu akwaga, aali oologomana, ndala ninga Adawu aaliye ahinathi otheega. Bumwahaya, nuuvelela egumaye ninga mukutho, Yesu ahiliva muthengo wa egumi yologomana Adawu aayeleliye. — 1 Cor. 15:45; 1 Tim. 2:6.

7. Makathamiho baani yanfwannye Yesu agaali velaboni yavati?

⁷ Mudhidhi agaali elabo yavati, Yesu ahimwiwelela Yehova mwadhatedhene, naarive malabo mamodha erusaga werana eyo. Yesu aali mwaana oologomana, mbwenye makolo aye yaali oohilogomana, naarive dhigaali ndo, oliye oohowela wawiwelela makolo aye. (Luc. 2:51) Yesu agaali muzombwe, oohowela okoodda owaddihedhiwa wihina ahawiwelele makolo aye obe okala oohiroromeleya wa Yehova. Vano nuukala pogo, Yesu oohowela okoodda dhoweha dha Saddana. Ddiyabo, afuna wihina Yesu ahimwiwelelege Yehova. (Mat. 4:1-11) Saddana ahiikoma wihina amuthukulele Yesu otheega wi anaande oliva muthengo wowobola.

8. Makathamiho baani mamodha yanfwannye Yesu agaali velaboni yavati?

⁸ Mudhidhi aaparaga mabasa oolaleya mwilaboni yavati, Yesu ahifwanyiwa makathamiho mamodha. Amwiddani aye yomuharahara teto yahixixa ompa. (Luc. 4:28, 29; 13:31) Ohiya eyo, oliye oohowela ovilelana dhoviriganiha dha anamahara aye. (Mar. 9:33, 34) Mudhidhi atorihiwaga, Yesu ahoonihiwa goyi ni ahinyemuliwa. Omakuthulo, oliye ahipiwa mwamakalelo abure ni owuukuliha. (Heb. 12:1-3) Oliye oohowela owanana dhoweha dhookuthula dha mwigumini mwaaye yeka, wula ahibareliwaga ni Yehova. b— Mat. 27:46.

9. Onakala aavi wapenddaga wodhela mukutho wa Yesu? (1 Pedro 1:8)

 ⁹ Mwebaribarene Yesu ahoonihiwa goyi vanlubale wihina anikwele. Nuubuwela dhithu dhatedhene Yesu eriliyena wihina anobole, eyo kinanithukulela iyo omudhivela vanlubale?— Omwileri 1 Pedro 1:8.

10. Dhithu baani Yehova aleviliye wihina anvelele mwanaye ninga yowobola?

¹⁰ Mbwenye ki wodhela Yehova? Dhithu baani Oliye aleviliye wihina Yesu anikwele? Yehova vamodha ni Yesu ehithabwa wandana waapitha athu aatene. (Pro. 8:30) Vano, kubuwela makalelo yaliwa yorusa Yehova omoona mwanaye afwanyiwaga dhoweha dhowinjhiva velaboni yavati. Mwebaribarene Yehova ahoona goyi vanlubale mudhidhi amoonaga mwanaye eddihiwaga nuubure, akooddiwaga ni onihiwaga goyi.

11. Ethu baani enanikavihera iyo wonelamo makalelo aali Yehova, Yesu nuukwa?

¹¹ Baabi obe mayi amuyelele mwanaye muukwani ehinona pamadhene widdela ni goyi muthu anakanniyena amuyelele mwaana muukwani. Iyo nihikanna nroromelo nooliba wodhela muselu wovenyihiwa anookwa. Naarive dhigaali ndo, muthu akwa, nnowukuwa vanlubale. Eyo enonikavihera wonelamo makalelo Yehova aaliye mudhidhi amoonaga mwanaye anathabwiye omudhivela onihiwaga goyi ofiyedha opiwa yaka ya 33 M.W c — Mat. 3:17.

12. Nnere ddi nlabo nowubuwela okwa wa Yesu nahinathi ofiya?

¹² Ononamo aavi obajha ohudhera wodhela yowobola va ohudhera wawo wavayeka obe mweragana webedha weenyu weemudhi? Omulabihedhe Guia de Pesquisa para Testemunhas de Jeová obe malivuru mamodha wihina onone dhithu dhowinjhiva wodhela yowobola. d Teto, omuharihege porogarama oomwileri Bibiliya owubuwela okwa wa Yesu anafwanyeya Mwana livuru nehu na mutugumano Egumi ni mabasa ehu eekiristawu. Teto nlabo nowubuwela okwa wa Yesu, kudduwale woona vidiyu ya ohudhera wa mambesi wa vayeka. Neegeredha murima wehu nlabo nowubuwela okwa wa Yesu nahinathi ofiya, nnere wanda wakavihera athu amodhaya opurelamo muthupo ola. — Esd. 7:10.

WAKAVIHERE AMODHA

13. Ethu baani yobajha nnahowelihu werana wi naakavihere athu woona muthupo wowubuwela okwa wa Yesu?

¹³ Nnande aavi wakavihera athu amodhaya opurelamo muthupo wowubuwela okwa wa Yesu? Nahinathi werana ethu-sithu, nnohowela  wawithana athu owinjhiva. Ohiya wawithanave athu nnafwanyihu nakala mmabasani oolaleya, iyo podi oleba lista naalebaga mandina aathu nnafunihu wawithana, ninga amudhihu, akwihu ooskola, oomabasani ni amodhaya. Naarive nihinna akonviti owinjhiva oopidiwa, podi wawinviyari link wihina emukitihe konviti amutelefonini. Mwebaribarene nnere otikina ni athu owinjhiva enafuna omurumedha konvitiya. — Ecl. 11:6.

14. Muthu amwakela konviti ayeene podi omuthukulela werana ddi?

¹⁴ Muthu di muthu aamwaakelaga konviti aye, eyo enomuhagalasa. Murogola dhaala ahitikina vanlubale numoona mamune, ahili Namoona a Yehova, numwakela konviti ni nuwoga wihina eere oyawo omuthuponi wowubuwela okwa wa Yesu. Mwahaya bwaddi murogola ola adhe atikinege? Mwaha oliye ahimwithanelawo dila dhowinjhiva, mbwenye oliye kaadhowesawo. Ki ethu baani yapadduwile olenddoola? Mamune eere omwaakela konviti ni namaholela mulogo aamunonne, vano oliye woona muthupo wowubuwela okwa wa Yesu yaka yele ni yaka dhowinjhivadhene dhoharela.

15. Ethu baani nahinahowelihu odduwala namwithanelaga muthu omuthuponi wowubuwela okwa wa Yesu?

¹⁵ Kudduwale wihina athu nnawithanihu podi okanna makoho, thabwathabwa akala kinoonege mutugumano dha Anamoona a Yehova. Yere okala yapama wawubuwela makoho naanonnihu wihina yere wawerana ni wegeredha makalelo owawakula. (Col. 4:6) Motajhiha, athu amodha podi wikoha: “Mutugumanoya oneedde aavi? Onamale mawora mangasi? Miyo podi owara bure-bure? Enohoweleya oliva ethu-sithu? Onere okala sokela?” Namwithanaga muthu wihina adhe oone muthupo wowubuwela okwa wa Yesu, iyo podi omukoha: “Ohukanna nikoho?” Namala naakule ethu muthuya anafuniye onona. Teto iyo podi olabihedha vidiyu Wubuwela okwa Yesu ni Nyumba Yomwene Munereya ddi? Wihina nimukavihere muthuya wonelamo makalelo dhineedda mutugumano dhehu. Ohiya eyo, ohudhera 28 na livuru Ofwanye egumi yohagalasa ya Malabo amatene! Nnowoga dhithu dhapama nnafunihu othapanya ni muthuya.

16. Makoho baani athu owinjhiva enoona muthupo wowubuwela okwa wa Yesu enakanniwana?

¹⁶ Yamala woona muthupo wowubuwela okwa  wa Yesu, athu owinjhiva yithaniwe wihina yoone muthupo ola podi wera enere okanna makoho owinjhiva. Aliwa podi wikoha mwahaya bwaddi kavo muthu atakunne pawu ni kavo omung’wile vinyu obe mwahaya bwaddi athu vang’ono baahi bitakunne pawu ni bimung’wile vinyu. Teto podi wera aliwa enowikoha, dila ngasi vayakani nnerihuna muthupo ola wowubuwela okwa wa Yesu, obe podi wera aliwa enere ofuna onona akala mutugumano dhatedhene dha Anamoona a Yehova dhineriwana ni makalelo mamodhave. Naarive akala dhithu dhimodha dhinosorihiwa muwari mwa mwaha oneriwana vamuthuponi wowubuwela okwa wa Yesu, podi wera muthuya anerege ofuna wonelamo pamadhene. Artigu anafwanyeya musayitini “A Ceia do Senhor — por que as Testemunhas de Jeová celebram de modo diferente?” Podi onikavihera wawakula makoho muthuya anniyena. Iyo nnafuna nerena ele nnandihu wihina naakavihere ale enna ‘efunelo yapama’ wihina epurelemo mutugumano ola, nahinathi ofiya labo nowubuwela okwa wa Yesu, labona nafiya ni navira.— Atos 13:48.

WAKAVIHERE ALE EDDUDDUMADHE EPADDI YOMUZIMUNI

17. Anamaholela mulogo enaakavihere aavi ale edduddumadhe epaddi yomuzimuni? (Ezequiel 34:12, 16)

¹⁷ Mudhidhi wowubuwela okwa wa Yesu, anamaholela mulogo enakavihera aavi ale edduddumadhe epaddi yomuzimuni? Aliwa podi werana eyo wodhela wooniha wihina enowathuwathuwela. (Omwileri Ezequiel 34:12, 16.) Nlabo nowubuwela okwa wa Yesu nahinathi ofiya, wilibihedhe werana ele onandiwe wihina wande othapanya ni ale edduddumadhe epaddi yomuzimuni. Woonihe wihina onowadhivela vanlubale ni wihina munoofuna wakavihera ni ele enahoweliwa. Mwawitanele wihina edhe yoone muthupo wowubuwela okwa wa Yesu, vano aliwa yadha, mwawakele nuudhivela. Vano nlabo nna navira, odidele wakavihera addibila ni arogola ala oofuneya ni werena ele enahoweleya wi mwakavihere emuhogolowele Yehova. — 1 Ped. 2:25.

18. Iyo aatene nnakavihere aavi ale edduddumadhe epaddi yomuzimuni? (Romanos 12:10)

¹⁸ Nimakalelo baani addibila ni arogola aatene ammulogoni enaakaviheriwa ale edduddumadhe  epaddi yomuzimuni enadha nlabo nowubuwela okwa wa Yesu? Iyo podi werana eyo wodhela waweddiha nuudhivela, nuupama vamodha ni nriho. (Omwileri Romanos 12:10.) Kudduwale wihina kahi ethu yokweya wihina addibila ni arogola ala oofuneya edhe Onyumbani Yomwene. Podi wera aliwa yowoova ohakeliwa ni makalelo apama. e Bumwahaya kuwoge ethu enaatotele manyazo obe yaapihe mbani. (1 Tes. 5:11) Addibila ni arogola ala, enomudhivela Yehova ndala ninga iyo. Iyo nnohagalala vanlubale mwaha aliwa ohogolowela omulabela Yehova vamodha ni iyo! — Sal. 119:176; Atos 20:35.

19. Mareeliho baani nnawakelihu mwaha wilibihedha wihina nubuwele okwa wa Yesu?

¹⁹ Enowoneleyamo mwahaya bwaddi Yesu adhe anilobege wihina nubuwelege okwa waye yaka dhatedhene, mweebaribarene, iyo vamodha ni athu amodhaya nnokavihereya mwaha woona muthupo ola. (Isa. 48:17, 18) Motajhiha, odhivela wehu ninnihuna ni Yehova vamodha ni Yesu onooliba, nnokanna ofuru wowoniha otamalela wehu mwaha wa ele Yehova ni Yesu enerenliwa, onoothabwa onaaddameliha ni addibilihu. Ohiya eyo, nnokanna ofuru wowakavihera athu amodhaya ohudhera wodhela yowobola ni okanna gari yowawakela mareeliho Yehova anaapaganyiye. Bumwahaya, nnafuna nerena dhatedhene nnandihu wihina niwegeredhe wi nikalevo nlabo nna nathima na vayakani — nlabo nowubuwela okwa wa Yesu!