ZÃMSGÃ YĨNGA 2
YƖƖLL 19 A Zeezi kũumã tẽegre
Y segla y meng raar ning sẽn tar yõod n yɩɩd yʋʋmdã pʋgẽ wã yĩng bɩ?
“Maand-y woto n tẽegd mam yelle.”—LUK 22:19.
D SẼN NA N BÃNGE
D na n yãa a Zeezi kũumã tẽegr sẽn tar yõod wʋsgã võore, d sẽn tõe n segl d meng to-to rẽ yĩnga, la d sẽn tõe n sõng neb a taabã to-to tɩ bãmb me wa Tẽegrã.
1. Bõe yĩng tɩ yaa a Zeezi kũumã tẽegr la daar ning sẽn tar yõod n yɩɩd yʋʋmdã pʋgẽ wã? (Luk 22:19, 20)
SÃ N yaa ne a Zeova Kaset rãmbã, a Zeezi kũumã tẽegr n yaa daar ning sẽn tar yõod n yɩɩd yʋʋmdã pʋgẽ. Yaa Tẽegrã bal la a Zeezi yeel a karen-biisã tɩ b maand yʋʋmd fãa. (Karm-y Luk 22:19, 20.) Bũmb wʋsg n kɩt tɩ d gũud a Zeezi kũumã tẽegr ne yãgbo. D na n gomã bõn-kãens yelle.
2. Bõe n kɩt tɩ d yãgdẽ tɩ Tẽegrã daar ta?
2 Tẽegrã sõngda tõnd tɩ d tags a Zeezi sẽn ki tɩ yɩɩ maoongã yõod sẽn ta zĩig ninga, la rẽ sẽn nafd tõnd to-to wã zugu. A tẽegda tõod bũmb nins d sẽn tõe n maan n wilg tɩ d sũur yaa noog ne a Zeezi maoongã. (2 Kor. 5:14, 15) Leb n yaa segb tõnd ne d tẽed-n-taasã sẽn paam n na n ‘keng taab raoodo.’ (Rom. 1:12) Yʋʋmd fãa, saam-biis la saam-bi-pogs wʋsg sẽn da pa le wat tigissã wata Tẽegrã. B sẽn deegd-b sõma Tẽegrã sasa wã kɩtdame tɩ kẽer yãk yam n lebg n wa a Zeova nengẽ. Sẽn paase, neb wʋsg sã n kelg Tẽegrã sõsgã, la b yã saam-biisã manesem sẽn yaa to-to wã kɩtdame tɩ b rat n zãms Biiblã. Rẽ fãa kɩtame tɩ Tẽegrã tar yõod wʋsg ne tõndo.
3. Wãn to la Tẽegrã sõngd tɩ tõnd ne d tẽed-n-taasã sẽn be dũniyã gill zugã tũud a Zeova ne yam a yembre? (Ges-y fotã me.)
3 D gũuda Tẽegrã daar ne yãgb me, bala a sõngda tõnd ne d tẽed-n-taasã sẽn be dũniyã gill zugã tɩ d tũud a Zeova ne yam a yembre. Dũniyã gill zugu, a Zeova Kaset rãmbã tigimda taab wĩndgã kõom poore. D fãa kelgda sõsg sẽn wilgd a Zeezi maoongã yõodo. D yɩɩnda yɩɩl a yiib n pẽg a Zeova, b pɩʋʋgda ne burã la divẽ wã d taoore, b pʋʋsda naoor a naas tɩ d pelg d pʋg n yeel tɩ “ãmiina” pʋʋsg fãa saabẽ. Tigimsã fãa na n maana rẽ na maan lɛɛr 24 pʋgẽ. Mams-y-yã a Zeova ne a Zeezi sũur sẽn yaa noog to-to, b sã n ne d sẽn naag taab yam a yembr n waoogd-b woto wã.
Tẽegrã sõngda tõnd ne d tẽed-n-taasã sẽn be dũniyã gill zugã tɩ d tũud a Zeova ne yam a yembre (Ges-y sull a 3) f
4. Bõe yell la d na n gom sõs-kãngã pʋgẽ?
4 Sõs-kãngã pʋgẽ, d na n leoka sogsg nins sẽn pʋgdã: Wãn to la d tõe n segl d sũyã Tẽegrã yĩnga? Wãn to la d tõe n sõng neb a taabã tɩ b rɩ a yõodo? Bõe la d tõe n maan n sõng neb nins sẽn pa le wat tigissã? Sogs-kãensã leoorã na n sõng-d lame tɩ d segl d mens daar-n-kãng sẽn tar yõod wʋsgã yĩnga.
WÃN TO LA D TÕE N SEGL D SŨYÃ TẼEGRÃ YĨNGA?
5. a) Bõe yĩng tɩ d segd n tags a Zeezi sẽn ki tɩ yɩ maoongã sẽn nafd tõnd to-to wã yelle? (Yɩɩn-sõamyã 49:7, 8) b) Video ning gom-zug sẽn yaa: Bõe yĩng t’a Zeezi ki? wã zãmsda tõnd bõe?
5 Bũmb a ye sẽn tar yõod wʋsg d sẽn tõe n maan n segl d sũyã Tẽegrã yĩnga, yaa d sẽn na n tags a Zeezi sẽn ki tɩ yɩ maoongã sẽn nafd tõnd to-to wã zugu. Tõnd da pa tõe n maan baa fʋɩ d toor n fãag d meng ne yel-wẽndã la kũumã ye. (Karm-y Yɩɩn-sõamyã 49:7, 8. Ges-y video ning gom-zug sẽn yaa: Bõe yĩng t’a Zeezi ki? wã me.) a A Zeova maana bũmb toor-toor sẽn na yɩl t’a Zeezi kõ a vɩɩmã n fãag tõndo. Pa yɩ nana ne a Zeova la a Zeezi fãa ye. (Rom. 6:23) D sã n bʋgsd bũmb nins a Zeova ne a Zeezi sẽn mong b mens tõnd yĩngã zugu, d sũur na n maneg n yɩɩ noog ne a Zeezi maoongã. D na n goma bũmb a wãn sẽn kɩt t’a Zeezi maoongã pa yɩ nana ne a Zeova la a Zeezi wã yelle. La pipi, a Zeezi maoongã yõod yaa bõe?
6. A Zeezi maoongã yõod yaa bõe?
6 A Zeezi maoongã yaa yaood ning a Zeova sẽn yao n na n lebs n da bũmb ning a Ãdem sẽn bõnã. D yaab a Ãdem ra yaa ned sẽn zems zãnga. A sẽn maan yel-wẽndã, a bõna vɩɩm sẽn kõn sa wã. La pa rẽ bal ye. A kɩtame t’a kambã me bõn vɩɩm sẽn kõn sa wã. A Zeezi kõo a vɩɩmã sẽn zems zãngã tɩ yɩ maoongo, sẽn na n yɩl n lebs n da bũmb ning a Ãdem sẽn bõnã. A Zeezi sẽn wa n be tẽngã zugã, “a pa tol n maan yel-wẽnde, la b pa wʋm zãmb goam a noorẽ me ye.” (1 Pɩy. 2:22) A Zeezi kũumã sasa t’a zemsa zãng wa a Ãdem sẽn da yaa to-to nand t’a maan yel-wẽndã.—1 Kor. 15:45; 1 Tɩm. 2:6.
7. Mak-bʋs la a Zeezi paam-yã, a sẽn wa n be tẽngã zugã?
7 A Zeezi sẽn wa n be tẽngã zugã a saka a Ba wã raab bũmb fãa pʋgẽ, baa rẽ maaneg sã n wa pa nana ne-a. A Zeezi yãadmẽ wã a ra segd n saka a roagdbã sẽn pa zems zãngã, baa yẽ meng sẽn da zems zãngã. (Luk 2:51) A sẽn wa n yaa bi-bɩɩgã, tõe tɩ b ra pẽdgd-a lame n dat t’a kɩɩs a roagdbã bɩ a Zeova, t’a ra segd n modg tɩ b ra tõog-a ye. A sẽn wa n lebg kãsmã, a ra segd n kɩɩsa a Sʋɩtãan sẽn da makd-a t’a maan yel-wẽndã, hal n yeel-a t’a maan bũmb sẽn na n wilg t’a pa le be Wẽnnaam poorẽ ye. (Mat. 4:1-11) A Sʋɩtãan ra rata ne a sũur fãa n kɩt t’a Zeezi maan yel-wẽnde, n pa tõog n kõ a vɩɩmã tɩ yɩ maoong ye.
8. Mak-bʋs me la a Zeezi paam-yã?
8 A Zeezi sẽn wa n moond koɛɛgã tẽngã zugã, a sega zu-loees a taaba. B nams-a lame hal n mak n na n kʋ-a. (Luk 4:28, 29; 13:31) A ra segd n modgame t’a karen-biisã pãn-komsmã ra koms a raood ye. (Mark 9:33, 34) B sẽn wa n kaood a Zeezi bʋʋdã, b pãb-a lame la b yaal-a. Rẽ poore, b kʋ-a-la wa b sẽn kʋʋd nin-wẽng to-to hal t’a nams wʋsgo. (Ebre. 12:1-3) A sẽn wa n be namsg ra-lukã zugã, a ra segd n tõoga toogã a yembr tɩ pa tũ ne a Zeova sõngr ye. b—Mat. 27:46.
9. Y tagsg yaa wãn ne a Zeezi sẽn maanã? (1 Pɩyɛɛr 1:8)
9 Sɩd-sɩdã, a Zeezi namsa wʋsg n yaool n kõ a vɩɩmã tɩ yɩ maoongo. D sã n tags a sẽn sak n nams woto fãa tõnd yĩngã, pa kɩt tɩ d maneg n nong-a wʋsg sɩda?—Karm-y 1 Pɩyɛɛr 1:8.
10. Bõe yĩng tɩ d tõe n yeel t’a Zeezi sẽn ki tɩ yɩ maoongã pa yɩ nana ne a Zeova me?
10 La a Zeova yẽ? Bõe la a sak n maan sẽn na yɩl t’a Zeezi tõog n kõ a vɩɩmã tɩ yɩ maoongo. A Zeova ne a Zeezi n yaa ba ne a bɩɩg ning sẽn nong taab n tɩ yɩɩdã. (Yel. 8:30) Tags-y n ges-y-yã a Zeova sũur sẽn sãam to-to, a sẽn wa n get b sẽn namsd a Zeezi woto fãa tẽngã zugã. A Zeova sẽn wa n getẽ tɩ b yaad a Biigã, n pa tẽed-a la b namsd-a wã, sãmbg kae tɩ sãama a sũur wʋsg ye.
11. Rɩk-y makr n wilg a Zeova sũur sẽn segd n sãam to-to a Zeezi kũumã sasa wã.
11 Roagd buud fãa biig sẽn zoe n maan kaalem mii rẽ sẽn sãamd sũur to-to. D kɩsa sɩd ne d sũur fãa tɩ sẽn ki-bã na n wa vʋʋgame. La baa ne rẽ, d ned sã n maan kaalem, d sũur sãamda wʋsgo. Rẽ sõngda tõnd tɩ d bãng a Zeova sũurã sẽn segd n sãam to-to yʋʋmd 33 soabã a sẽn wa n get a Bi-nongrã sẽn namsd hal n wa ki wã. c—Mat. 3:17.
12. Tẽegrã sã n wa kolgdẽ, bõe la d tõe n maane?
12 Nand tɩ Tẽegrã daar ta, y zak pʋgẽ Biibl zãmsgã sasa wall y meng Biibl zãmsgã sasa, y tõe n zãmsa bũmb toor-toor a Zeezi maoongã zugu. Tũnug-y ne Vaeesg sebre, a Zeova Kaset rãmbã yĩnga wall sɛb a taaba, n bao n bãng a Zeezi sẽn ki tɩ yɩ maoongã võor sõma n paase. d Modg-y me n tũ Biiblã kareng na-kẽndr Tẽegrã yĩng sẽn be Kiris-nebã vɩɩm la b tʋʋma: Tigissã na-kẽndr sebr pʋgẽ wã. Tẽegrã daare, bɩ y modg n ges daarã vɛrse b sẽn wɛgsã. D sã n segl d sũurã a Zeezi kũumã tẽegr yĩnga, d na n tõog n sõnga neb a taabã tɩ bãmb me rɩ a yõodo.—Ɛsd. 7:10.
SÕNG-Y NEB A TAABÃ TƖ B RƖ TẼEGRÃ YÕODO
13. Bõe n yaa pipi bũmb d sẽn tõe n maan n sõng nebã tɩ b rɩ Tẽegrã yõodo?
13 Wãn to la d tõe n sõng neb a taabã tɩ b rɩ Tẽegrã yõodo? Pipi bũmb d sẽn tõe n maan yaa d sẽn na n bool-ba. D na n boola neb nins d sẽn segd koɛɛgã mooneg zĩigẽ wã. Sẽn paase, d na n bao sebr n gʋls neb a taab d sẽn dat n bool yʋya. Tõe n yaa d roagdba, d tʋmd-n-taase, d karen-bi-taase, la neb a taaba. Baa d sã n pa tar boollã seb-vãad wʋsgo, d tõe n toola nebã lɩyẽ tɩ b kẽ ẽntɛrnetẽ wã n paame. Neb wʋsg tõe n sak n waame hal tɩ ling-du.—Koɛ. 11:6.
14. Rɩk-y makr n wilg tɩ f sã n kõ ned Tẽegrã booll sebre, a tõe n waame hal tɩ ling-fu.
14 Yãmb sã n kõ ned Tẽegrã booll sebre, tõe n kɩtame t’a sak n wa. Daar a ye, saam-bi-poak sɩd sẽn pa tũud a Zeova yeel-a-la ne sũ-noog t’a magd n na n yãag-a lame tɩ b kẽng Tẽegrã, hal tɩ ling-a. Bõe yĩng tɩ ling-a? Bala a bool-a-la naoor wʋsgo, la a zɩ n sak n kẽng ye. Bõe n kɩt t’a sak so-kãnga? A yeelame: “B kõo maan booll sebre.” A paasame tɩ yaa tigingã kasem-soab a ye yẽ sẽn mi n bool-a. Saam-bi-poakã sɩdã kẽngã Tẽegrã yʋʋm-kãnga, la yʋʋm wʋsg sẽn pʋgl rẽ.
15. D sã n wa boond neb tɩ b wa Tẽegrã, bõe la d pa segd n yĩmi?
15 Tẽeg-y tɩ neb nins d sẽn boondã tõe n tara sogsgo, sẽn yɩɩd fãa, b sã n nan pa wa d tigsga. Yɩta sõma tɩ d tags sogsg kẽer b sẽn tõe n sok yelle, la d sẽn na n leok to-to. (Kolo. 4:6) Wala makre, b kẽer tõe n sokda b mens yaa: ‘Bõe la b na n maan Tẽegrã sasa? Na n kaoosa lɛɛr a wãna? B yãka fut takɩ nebã sẽn segd n ning bɩ? Yaood n kẽeme bɩ? B na n wa pɩʋʋga ne lepr n kos ligd bɩ?’ Y sã n wa boond ned t’a wa tẽegrã, yɩta sõma tɩ y sok-a yaa: “Yãmb tara sokr bɩ?” Rẽ poor bɩ y leok sokr ning fãa a sẽn na n soke. Y leb n tõe n wilg-a-la video nins gom-zut sẽn yaa: D tẽeg a Zeezi kũumã, ne Bõe la b maand Rĩung roogẽ? n sõng-a t’a bãng d sẽn maand d tigissã to-to. Vɩɩmd-y wakat sẽn kõn sa! sebrã sak 28 wã me tara goam y sẽn tõe n tik n sõs ne-a.
16. Sogs-bʋs me la neb nins sẽn wat Tẽegrã tõe n soke?
16 Tẽegrã poore, neb nins sẽn dat n bãng n paasa na n tara sogsg a taaba. B tõe n yãame tɩ yaa neb a wãn bal n wãb burã la b yũ divẽ wã, pa rẽ bɩ ned baa a ye pa wãb burã la a yũ divẽ wã, tɩ b sokd b meng bõe yĩng tɩ yaa woto. B leb n tõe n sokda b meng naoor a wãn la b maand Tẽegrã yʋʋmdã pʋgẽ. Sẽn paase, b tõe n dat n bãnga a Zeova Kaset rãmbã tigissã fãa sã n yaa woto. Baa b sẽn na n gom bõn-kãensã wʋsg yell Tẽegrã sõsg sasa wã, sẽn wa-b pipi wã tõe n datame tɩ b maneg n bilg-b bũmb kẽer võore. Sõsg n be jw.org pʋgẽ n tõe n sõng-d tɩ d leok b sogsg kẽere. A gom-zugã yaa: “Bõe yĩng t’a Zeova Kaset rãmbã sẽn maand Soaalã zaabr dɩɩbã to-to wã yaa toor ne tũudum a taabã nebã?” Nand tɩ Tẽegrã ta, Tẽegrã sasa la a loogr poore, d na n maana d sẽn tõe fãa n sõng neb nins “sẽn tar yam ning sẽn zemsã” tɩ b rɩ Tẽegrã yõodo.—Tʋʋ. 13:48.
D SÕNG NEB NINS SẼN PA LE WAT TIGISSÃ
17. Wãn to la kãsem-dãmbã tõe n sõng sẽn pa le wat-b tigissã? (Ezekɩyɛll 34:12, 16)
17 Tẽegrã sã n wa kolgdẽ, wãn to la kãsem-dãmbã tõe n sõng neb nins sẽn pa le wat tigissã? Wilg-y tɩ b yell pak-y lame. (Karm-y Ezekɩyɛll 34:12, 16.) Nand tɩ Tẽegrã ta bɩ y modg n tɩ kaag b wʋsg wa y sẽn tõe tɛka. Wilg-y-b tɩ y nong-b lame la tɩ y rat n maana y sẽn tõe fãa n sõng-ba. Bool-y-b tɩ b wa Tẽegrã. B sã n wa bɩ y reeg-b sõma. Tẽegrã poore bɩ y ket n kaagd nin-kãensã d sẽn nongã wall y boond-ba, la y sõng-b ne sõngr ning fãa b sẽn dat sẽn na yɩl tɩ b lebg n wa a Zeova nengẽ.—1 Pɩy. 2:25.
18. Wãn to la d fãa tõe n sõng sẽn pa le wat-b tigissã? (Rom dãmbã 12:10)
18 Neb nins sẽn pa le wat tigissã sã n wa Tẽegrã, tigingã ned kam fãa tõe n sõng-b lame. Wãn to? D segd n deeg-b-la ne nonglem la waoogre, la d maan-b neere. (Karm-y Rom dãmb 12:10.) Tẽeg-y tɩ yɩl tɩ nin-kãensã lebg n wa Rĩungã roogẽ pa yɩ nana ne-b ye. Tõe tɩ b ra yɛɛsdame tɩ b pa na n deeg-b neer ye. e Ra sok-y-b sogsg sẽn na n ning-b yãnde, wall y gom goam sẽn tõe n sãam b sũur ye. (1 Tes. 5:11) Nin-kãensã yaa d tẽed-n-taase. D sã n paam tɩ b na n le naag-d n tũ a Zeova, yɩt-d-la noogo.—Yɩɩn. 119:176; Tʋʋ. 20:35.
19. D sã n kẽng a Zeezi kũumã tẽegre, bark-bʋs la d na n paame?
19 D sũur nooma a Zeezi sẽn yeel tɩ d tẽegd a kũumã yʋʋmd fãa wã. D wʋmda rẽ sẽn tar yõod wʋsgã võore. D sã n kẽng Tẽegrã, nafda tõnd mengã la neb a taabã wʋsgo. (Eza. 48:17, 18) Kɩtdame tɩ d sẽn nong a Zeova ne a Zeezi to-to wã paase. D wilgdame tɩ d sũur nooma ne bũmb nins b sẽn maan tõnd yĩngã. Paasda tõnd ne d tẽed-n-taasã zems-n-taarã pãnga. Sẽn paase, d tõogd n sõnga neb a taabã tɩ b bãng b sẽn tõe n maan to-to n paam bark nins a Zeezi maoongã sẽn kɩt tɩ d tõe n paamã. Bɩ d maan d sẽn tõe n fãa n segl d mens rõandã Tẽegrã sẽn yaa daar ning sẽn tar yõod n yɩɩd yʋʋmdã pʋgẽ wã yĩnga.
Y NA N LEOKAME TƖ BÕE?
-
Wãn to la d tõe n segl d sũyã Tẽegrã yĩnga?
-
Wãn to la d tõe n sõng neb a taabã tɩ b rɩ Tẽegrã yõodo?
-
Wãn to la d tõe n sõng sẽn pa le wat-b tigissã?
YƖƖLL 18 Bark pʋʋsgo, Kiris maoongã yĩnga
a Y sã n dat n paam sõss la video-rãmb nins yell b sẽn gom sõs-kãngã pʋgẽ wã, bɩ y kẽ jw.org n gẽese.
b Ges-y “Karemdbã sogsg” sẽn be yʋʋmd 2021 tʋʋl-nif kiuug Gũusg Gasgã pʋgẽ wã.
d Ges-y zĩ-gũbr ning gom-zug sẽn yaa: “ Y sẽn tõe n gẽese.”
e Ges-y fot-rãmbã ne zĩ-gũbr ning gom-zug sẽn yaa: “ Tigingã neb manesem yɩɩ wãna?” Saam-biig sẽn pa le wat tigissã sẽn yɛɛsd ne Rĩungã roog pʋgẽ kõom. La a wa n tõog n kẽeme. B reeg-a-la neere, t’a sũur noome.
f FOT-RÃMBÃ BILGRI.: A Zeova Kaset rãmbã sã n wa maand Tẽegrã dũniyã babg ninga, mikdame tɩ dũniyã babs a taabã neb ket n segenda b mense.
