1. Awanda ci wuno wacindama mu mwaka? (Luka 22:​19, 20)

 UWANDA wakwizucizya imfwa ya kwe Yesu, awanda uwucindame nkaninye ku wantu wa kwe Yehova. Wo-o awuli uwanda vye wuno Yesu wanenile awasambi wakwe ukuti wazevya. (Wazyani Luka 22:​19, 20.) Kwawa imilandu imivule yino yikalanda pe vino icizusyo cacindamila. Lekani tulandeko pe yimwi.

2. Amilandu ci yino ukuzanilwa ku cizusyo kwacindamila?

² Icizusyo cikalenga twakwelenganya pe vino inzuwi yacindama, ni vizima vino vyafumamo. Cikatwizusyako inzila zino tungalanjizizyamo ukuti tukasalifya pa nzuwi ya kwe Yesu. (2 Kor. 5:​14, 15) Swinya cikalenga awanawitu na wankazi awawa nu longo lwa kupocelela “ukwavwa ukulikonga.” (Roma. 1:12) Cinji acakuti awanawitu na wankazi awavule wano waleka ukulongana wakazanwako. Swinya pa mulandu na vino wakawapocelela icete nu kuwalanjizya ulukundo, wamwi wakatalika ukulongana na swinya. Asa vyo-o vitupu, awantu awavule wakatalika ukusambilila Baibolo nga walola nu kukunda vino wasambilila pa cizusyo. Vyonsinye vyo-o vino twalandapo, vikalenga icizusyo ukuwa acicindame kwe sweswe.

3. Uzye icizusyo cikatulemenkanya wuli ponga na wanawitu na wankazi ukuzinguluka insi yonsinye? (Lolani ni cikope.)

³ Yelenganyani vino icizusyo cikatulemenkanya ponga na wanawitu na wankazi ukuzinguluka insi yonsinye. Inte zya kwe Yehova wakatalika ukuzevya imfwa ya kwe Yesu pano ilanzi lyaya mu kwinjila. Pe ko-o ukuzevya pakawa ni lyasi lino likanda umulandu wuno inzuwi yacindamila. Tukakwimbila indwimbo ziwili izyakulumbanya Yehova nga nu kupepa amapepo 4 swinya pansizi yi pepo tukati “ameni.” Wonye avino amawungwe yonsinye yakacita  pe wo-o uwanda. Yelenganyani vino e Yehova ne Yesu wakayivwa awa nsansa nga walola vino swensinye tukuwalumbanya mwe yo-o inzila.

4. Avyani vino twandi tusambilile mwe co-o icipande?

⁴ Mwe co-o icipande twalanda pa mawuzyo yakuti: uzye tungapekanizizya wuli imyezo yitu pano icizuzyo citani cifike? Uzye tungacita wuli pakwavwa wanji ukuzanwako? Swinya tungavwa wuli awanawitu na wankanzi wano watonta ukuzanwako? Ukumanya ivyasuko kwe ya-a amawuzyo kwandi kutwavwe ukuyipekanizizya kwe ko-o ukulongana ukucindame.

VINO TUNGAYIPEKANIZIZYA LYANKANI KU CIZUSYO

5. (a) Amulandu ci wuno tuzipizile twakwelenganya pa nzuwi? (Amalumbo 49:​7, 8) (b) Avyani vino mwasambilizile mwe vidyo ya kuti Acani Cino Yesu Wafwizile?

⁵ Inzila yonga yino tungayipekanizizyamo ku cizusyo, akwelenganya pe vino inzuwi ya kwe Yesu yacindama. Sweweneco tutakwetipo amaka ayakuyiluwula ku luwembu ni mfwa. (Wazyani Amalumbo 49:​7, 8; lolani ne vidyo yakuti Acani Cino Yesu Wafwizile?) a Acino e Yehova watantisile ukuti e Yesu ayize atuluwule. Co-o cikulanjizya ukuti wonsinye wawili, watupile inzuwi. (Roma. 6:23) Fwandi nga tukwelenganya pe vino e Yehova ne Yesu watucitila, lyo tukulanjizya ukuti tukasalifya. Lekani nomba tulandeko pa vintu vimwi iviwome vino e Yehova ne Yesu wayikundizile ukucita pano watupanga inzuwi. Katutalicile ukulanda pe vino vyasanzyamo mu nzuwi.

6. Uzye inzuwi acani, swinya amulandu ci wuno Yesu wapezile inzuwi?

⁶ Inzuwi acifuta mulandu nanti indalama zino zikalipilwa pa kuti waminyosezye cimwi. E Adamu walinji amupwililike pano wamwelewuzile vye. Nomba walile wawembuka, atasovizye vye uwumi wakwe uwupwililike lelo wasovizye nu wumi wa wana wakwenye. Acino e Yesu wapile uwumi wakwe uwupwililike ngati anzuwi pa kuti anyosye cino Adamu wasovizye. Pano Yesu walinji munsi, “atatela awembuke kamwi; swinya mumulomo wakwe mutatela mufume uwufi wumwi.” (1 Pet. 2:22) E Yesu wafwile nu wumi uwupwililike ngati awulyanye vino Adamu walinji pano atani awembuke. Fwandi inzuwi yakwe ayino yalinji nu kulipila pa wumi uwupwililike wuno Adamu wasovizye.—1 Kor. 15:45; 1 Tim. 2:6.

7. Antazi ci zino Yesu wakweti pano walinji munsi?

⁷ Pano e Yesu walinji munsi, watwalilizile ukuwa ni civwila kwe Yisi, asa mulandu na melezyo yano wapitangamo. Nanti acakuti walinji amupwililike wivwilanga awakwasi wakwe wano watalinji awapwililike. (Luk. 2:51) Swinya pano walinji amulumendo, atakoncelelanga wano wangalanga walondanga ukuti aleke ukwivwila awakwasi wakwe nu kuleka ukuwa ni cisinka kwe Yehova. Cinji acakuti pano Yesu wakuzile, welezyanga na maka ukukanila e Satana wino wamwelezyanga ukuti awembucile Yehova nu kuleka ukuwa uwa cisinka. (Mat. 4:​1-11) Cino Satana wavwambisyanga acakuti e Yesu awembuke pa kuti atapa uwumi wakwe ngati anzuwi.

8. Antazi ci zinji zino Yesu wapisilemo?

⁸ Kwalinji intazi na zinjinye zino Yesu wapisilemo pano walinji munsi. Awalwani wakwe wamulwisyanga nu kuvwamba ukuti wamukome. (Luk. 4:​28, 29; 13:31) Swinya wasipicizyanga na kwe vino awasambi wakwe waluvyanyanga. (Mar. 9:​33, 34) Wamucuzyanga nkaninye nu kumulengulula. Cinji acakuti wamukomile ngati acipondo swinya wafwile imfwa imbipe. (Hebe. 12:​1-3) Uwanda wuno wafwile, wasipicizizye  intazi ukwasowa nu kuti e Yehova amwavwe. b—Mat. 27:46.

9. Tukayivwa wuli nga twelenganya pe vino Yesu wacisile pa kuti vye atufwile? (1 Peter 1:8)

⁹ E Yesu wacuzile nkaninye pa kuti vye ape uwumi wakwe ngati anzuwi. Nga twelenganya pe vyonsinye vino wacisile pa kuti atufwile, tukamukundilako.—Wazyani 1 Peter 1:8.

10. Uzye Yehova wayivwanga wuli pano walolanga vino Yesu wapitangamo?

¹⁰ Lekani tulandeko pe Yehova. Avyani vino wayikundizile ukucita pa kuti e Yesu ape uwumi wakwe ngati anzuwi? E Yehova ne Yesu wawa aviwuza ivilemenkane nkaninye ngati awulyanye vino cikawa ku mukwasi wa consi nu mwana wakwe umulumendo. (Imilu. 8:30) Yelenganyani vino Yehova wayivwanga pano walolanga e Yesu akusipicizya intazi munsi. Ukwasowa nu kuvwilika, e Yehova wivwanga uwuwi nkaninye ukulola kuno wakucuzya umwana wakwe, wakumulengulula nga nu kumwelezya.

11. Landani pa cakulolekako cino cikulanjizya vino Yehova afwile wayivwanga pano walolanga umwana wakwe akucula munsi.

¹¹ Awakwasi wano wafwilwapo umwana, wamanya vino cikakwivwika nga cakuti ica musango wo-o cacitika. Kweni twawa ni suwilo lya kuti kuliwa ukuzyulupuka, lelo nanti ciwe wo-o, cikaluma nkaninye nga cakuti wino wakunda wafwa. Vyo-o vino twalandapo vingatwavwa ukulola vino Yehova wayivwanga pano walolanga umwana wakwe akucula swinya na pano wafwile pa nisani 14 mu 33 C.E. c—Mat. 3:17.

12. Avyani vino tuzipizile ukucita nga cakuti Icizusyo capalamila?

¹² Pano icizusyo capalamila mwayisambilizya pa nzuwi pano muli pa mapepo ya lupwa nanti pi sambililo lya palwinu. Pa kumanya ivivule pe lyo-o ilyasi, mungawomvya ibuku lyakuti, Icitabo ca Kwafwa Inte sha kwa Yehova Ukusanga Ifyebo nanti amabuku yanji yano yakalanda pa nzuwi. d Mwasinincizya ukuti mukuwazya amawaliko ya mu mpindi ya Cizusyo yano wakatuwicila mu Akalibuku ka Imikaliile ya Wina Klistu nu Mulimo Wuno Tukawomba. Swinya pa wanda wa Cizusyo, mutakwiwilila ukutamba Amapepo ya Mutondo Tondo. Nga twayipekanizizya kucili ku Cizusyo, ciliwatupepucila ukwavwako wanji ukwiza mu kuzanwako.—Ezra 7:10.

 MWAKWAVWAKO WANJI

13. Acani cino tuzipizile ukutalicila ukucita pakwavwa wanji ukuzanwa ku Cizusyo?

¹³ Uzye tungavwa wuli wanji ukuzanwa ku cizusyo? Ica kutalicila, tuzipizile ukuwita. Tutazipizile ukupelela vye pakwita wano tukawizizya, lelo tuzipizile ukwita na walyanye wano twamanya pa kuti nawo wize wazanweko. Pe wa-a pangawa wa lupwa lwitu, wano tukawomba nawo, wano tukasambilila nawo apano na wantu vye wanji. Nga cakuti utupepala twakuwitilako twasila, tungawatumila e linki ukuwomvya iviwombelo ivilekane lekane. Tukakwita wonsinye amuno tusimanya wano wangiza wazanweko.—Ekawi. 11:6.

14. Landani pa wucindami wuno wawa mukulalika awantu wonsinye ku Cizusyo.

¹⁴ Mutavwilika ukuti wamwi wano mwalalika watanga wazanweko ku cizusyo. Ku cakulolelako, e nkazi wumwi wino watwalwa kwe wino asilongana camuzungusizye nkaninye pano umulume wamunenile ukuti wandi azanweko ku Cizusyo. Acani cino calenzile azunguke? Amuno pa myaka imivule wamulalikanga ukuti azanweko ku Cizusyo lelo wakananga. Nga pa-a peni cani calenzile azumile ukuzanwako? Watili, “wampile akapepala kakunjitilako ku Cizusyo.” Wino wamupile we eluda wumwi wino wamanyine sana. Wazanilweko ku Cizusyo swinya watwalilizile ukuzanwako na mu myaka yino yakonsilepo.

15. Avyani vino tuzipizile twakwizuka pano tukwita awantu ku Cizusyo?

¹⁵ Mwakwizuka ukuti wano tukakwita wangawa na mawuzyo, maka maka nga cakuti wasitela wazanwepo mu kulongana. Fwandi Cingazipa ukwelenganya pa mawuzyo yano wangatukolowozya nu kupekanizizya kucili vino tungawasuka. (Kolo. 4:6) Ku cakulolelako, wamwi wangakolowozya ukuti: ‘Avyani vino vikacitika pe konye ukulongana?’ ‘Uzye tulimala amaawazi yanga?’ ‘Avizwalo vya musango ci vino tuzipizile ukuzwala?’ ‘Uzye kuliwa ukulipila pa kwinjila?’ ‘Uzye kuliwa ukupa icawila?’ Pano mukulalika awantu ku Cizusyo, mwawakolowozya ukuti, “Uzye kuli amawuzyo yamwi yano mungatemwa ukukolowozya?” Nga cakuti wakweti, mungawasuka. Swinya pa kuwavwa ukumanya  vino ukulongana kukawa mungawomvya e vidyo yakuti Ukwizuka Imfwa ya kwe Yesu ni yakuti Uzye Acani Cino Cikacitika pa Ng’anda ya Wufumu? Swinya mwi buku lyakuti Ungikala Amanda Pe! mwisambililo 28, mwawa ivisinka ivizima nkaninye vino mungawomvya pa kuwavwa.

16. Amawuzyo ci na yanji yano awapya wano wazanwa ku Cizusyo wangatukolowozya?

¹⁶ Pansizi ya Cizusyo, awapya wangakunda ukutukolowozyako amawuzyo yamwi. Ncepamwi wangalonda ukumanya umulandu wuno wamwi wakalila umukate nu kumwa waini ne wamwi pole. Swinya mpindi zimwi wangakolowozya pa miku yino tukazevya Icizusyo. Cinji acakuti ncepamwi wangatemwa ukumanya nga cakuti Inte zya kwe Yehova ukuzinguluka insi yonsinye wakalongana icili conganye. Nanti acakuti ivisinka ivivule wakavilanda mwi lyasi lya Cizusyo, awapya wamwi wangavwambisya ukuwalondololelako na vinji. Icipande ca pa jw.org icakuti “Amulandu ci Wuno Inte zya kwe Yehova Wapusanila na Macalici Yanji pe Vino Wakacita Pakuzevya Icakulya ca Manguzi ice Tatakulu?” cingamyavwa ukwasuka amawuzyo yamwi yano wangakolowozya. Tuzipizile ukucita vyonsinye vino tungakumanizya, pano Icizusyo citani cifike, pano tukulongana, na pansizi ya Cizusyo, pakwavwa wano wawa “ni mwezo imizima” ukuyitopwa.[NWT] —Imili. 13:48.

MWAKWAVWA WANO WATONTA

17. Uzye wa eluda wangavwa wuli wano watonta? (Ezekiel 34:​12, 16)

¹⁷ Wa eluda, mungavwa wuli wano watonta mu mpindi ya Cizusyo? Muzipizile mwawawikako sana amano. (Wazyani Ezekiel 34:​12, 16.) Pano Icizusyo citani cifike, mwawatumilako ama foni nu kuwatandalila. Mwawanena ukuti mwawakunda swinya mukavwambisya ukuwavwa. Cinji acakuti, muzipizile ukuwitako na ku Cizusyo. Nga cakuti wakumanisya ukuzanwako, mwawapocelela ni nsansa. Na pansizi ya Cizusyo nye, mutazipizile ukuleka ukuwatandalila nanti ukuwatumila ama foni. Mwawavwa mwe vyonsinye vino wakulondekwa pakunyoka kwe Yehova.—1 Pet. 2:25

18. Uzye swensinye mwi wungwe tungavwa wuli awatonte? (Waroma 12:10)

¹⁸ Swensinye mwi wungwe tungavwa awatonte  wano wazanilwe ku Cizusyo. Tungacita wo-o, ukupitila mukuwalanjizya ukuti twawakunda, ukuwa ni cikuku kwe woliwo nu kuwacindika. (Wazyani Waroma 12:10.) Wa-a awanawitu na wankazi, mpindi zimwi cingawawomelela ukutalika ukuzanwa mukulongana na swinya. Wangakwelenganya ukuti ncepamwi wataliwapocelela icete. e Fwandi nga cakuti wiza, tutazipizile ukuwakolowozya amawuzyo yano yangalenga wivwe insoni nanti ukulanda vino vingawalumisya umwezo. (1 Tes. 5:11) Mwakwizuka ukuti, nawonye awantu wa kwe Yehova ndi vino sweswenye. Swinya tukakwivwa icete nkaninye nga twalola watalika ukulongana naswinya!—Amalu. 119:176; Imili. 20:35.

19. Avizima ci vino vyawa mukwizucizya imfwa ya kwe Yesu?

¹⁹ Uzye mwawa uwuzima uwuli wonsinye mukwivwila vino Yesu watunenile ukuti twakwizucizya imfwa yakwe cila mwaka? Amuno wawa. Tukazanamo ivizima swinya tukakwavwa na wanji mu nzila impusane pusane ukuzanamo ivizima. (Ayize. 48:​17, 18) Cinji acakuti, lyo tukulanjizya ukuti twakunda e Yehova ne Yesu nu kuti tukasalifya pe vino watucitila. Asa vyo-o vitupu, ukuzanwako kukatulemenkanya ponga na wanawitu na wankazi. Tungavwa na wanji ukumanya vino wangacita pa kuti nawo wazanemo ivizima vino tukayitopwa pa mulandu vye ni nzuwi. Lekani twacita vyonsinye vino tungakumanisya pano tukuyipekanizizya ku Cizusyo, uwanda uwucindame nkaninye mu mwaka.