1. ¿Kenke tlauel tijpatiitaj nopa tonali kema tikilnamikij Cristo imikilis? (Lucas 22:19, 20).

 TOTEOTSIJ itekipanojkauaj tlauel tijpatiitaj kema tikilnamikij Jesús imikilis. Jesús technauatik ma tikilnamikikaj nopa tonali (xijpoua Lucas 22:19, 20). ¡Tlauel tijnekij ma asi nopa tonali! Ma tikitakaj kenke.

2. ¿Kenke tlauel tijnekij ma asi nopa tonali kema tikilnamikisej Cristo imikilis?

² Kema tikilnamikij Cristo imikilis, techpaleuia ma tijpatiitakaj pampa techmakixtijkej. Nojkia techilnamikilia kenijkatsa uelis tijnextisej tijtlaskamatiliaj Jehová pampa Jesús temaktilik inemilis (2 Cor. 5:14, 15). Uan ipan nopa tonali tiitstokej ininuaya toikniuaj uan timoyolchikauaj (Rom. 1:12). Sejse xiuitl, miakej katli mouejkatlalijtokej tlen Jehová monechikouaj, uan se keskij sampa kitekipanouaj pampa toikniuaj kinextiaj kinikneliaj. Uan miakej maseualmej kinpaktia kema monechikouaj touaya uan nopa tlamachtili tlen moixtoma, yeka peuaj momachtiaj Biblia. Nochi ni tlamantli kichiua tlauel ma tijpatiitakaj nopa tonali.

3. ¿Kenijkatsa timosentikapaleuiaj kema tikilnamikij Cristo imikilis? (Nojkia xikita tlaixkopinkayotl).

³ Nojkia tlauel tijchiaj ma asi nopa tonali pampa techpaleuia ma tikitakaj kenijkatsa timosentikapaleuiaj. Ipan nochi Tlaltipaktli Jehová itlajtoltemakauaj mosentiliaj kema ya  kalaktok tonati. Tijkakij se tlamachtili kampa kiixtomaj kenke tlauel ipati pampa techmakixtijkej, tiuikaj ome uikatl, tijpanoltiaj nopa pantsi uan nopa vino uan tikijtouaj “amén” ipan nopa naui tlamaijtoli tlen mochiua. Uan san ipan 24 horas, tikilnamikij Cristo imikilis ipan nochi Tlaltipaktli. Jehová uan Jesús tlauel yolpakij kema kiitaj ipan nochi Tlaltipaktli tikinueyichiuaj.

4. ¿Tlake tikitasej ipan ni tlamachtili?

⁴ Ipan ni tlamachtili tijnankilisej ni tlajtlanili: ¿kenijkatsa uelis tijkualchijchiuasej toyolo kema ayamo moilnamiki Cristo imikilis? ¿Kenijkatsa uelis tikinpaleuisej sekinok nojkia ma kiilnamikikaj Cristo imikilis? Uan, ¿kenijkatsa uelis tikinpaleuisej katli mouejkatlalijtokej tlen tlanechikoli? Tlaj timoiljuiaj ipan nopa tlamantli, techpaleuis ma timokualchijchijtokaj.

¿KENIJKATSA UELIS TIJKUALCHIJCHIUASEJ TOYOLO?

5. 1) ¿Kenke moneki timoyoliljuisej ipan tlen Jehová uan Jesús kichijkej? (Salmo 49:7, 8). 2) Xikijto tlake tijyekok tlen nopa video ¿Kenke mijki Jesús?

⁵ Uelis tijkualchijchiuasej toyolo, tlaj timoyoliljuiaj kenke tlauel ipati pampa Jesús temaktilik inemilis. Toseltsitsij amo ueltoskia timomakixtisej tlen tlajtlakoli uan mikilistli (xijpoua Salmo 49:7, 8; nojkia xikita nopa video ¿Kenke mijki Jesús?). a Jehová kinejki iKone ma temaktili inemilis. Uajka, Jehová uan Jesús monejki kichiuasej se keski tlamantli uan kiampa techmakixtijkej (Rom. 6:23). Tlaj timoyoliljuiaj ipan tlen Jehová uan Jesús kichijkej, más tijpatiitasej pampa techmakixtijkej. Ma tikitakaj se keski tlamantli tlen Jehová uan Jesús kichijkej. Achtoui ma tikitakaj tlake kichijkej uan kiampa techmakixtijkej.

6. ¿Tlake kichijki Jesús uan kiampa techmakixtik?

⁶ Jehová kititlanki iKone uan kiampa kiixtlajki tlen Adán kipolok. Kema Jehová kichijchijki, Adán amo eliyaya tlajtlakole. Pero kema tlajtlakolchijki, ya uan ikoneuaj ayokmo ueliskiaj itstosej nochipa. Jesús temaktilik inemilis uan kiampa techpaleuik sampa ma tijpiakaj tlen Adán kipolok. Kema Jesús itstoya ipan Tlaltipaktli “axkema tlajtlakolchijki niyon axaka kikajkayajki” (1 Ped. 2:22) Uan kema mijki, amo eliyaya tlajtlakole sanse kej Adán, kema ayamo tlajtlakolchiuayaya. Yeka kema temaktilik inemilis uelki kiixtlajki tlen Adán kipolok (1 Cor. 15:45; 1 Tim. 2:6).

7. Xikijto se keski tlaouijkayotl tlen Jesús kiixnamijki.

⁷ Kema Jesús itstoya ipan Tlaltipaktli, nochipa kineltokak iTata maske kiixnamijki miak tlaouijkayotl. Kema Jesús eliyaya okichpil, kikajki itatauaj ma kiyakanakaj maske eliyayaj tlajtlakolejkej (Luc. 2:51). Uan kema eliyaya piltelpokatsi, uelis sekij kitetsopayayaj uan kiiljuiyayaj ayokmo ma kinneltoka itatauaj uan ma kiixpano Jehová. Teipa, Satanás nojkia kiyejyekok pampa kinekiyaya ma kitlauelkaua Jehová (Mat. 4:1-11). Satanás kinekiyaya Jesús ma tlajtlakolchiua uan kiampa ayokmo ueliskia temaktilis inemilis.

8. ¿Tlake sekinok tlaouijkayotl kiixnamijki Jesús?

⁸ Kema Jesús tlajtolmoyajki, nojkia kiixnamijki sekinok tlaouijkayotl. Ikualankaitakauaj kinekiyayaj kimiktisej (Luc. 4:28, 29; 13:31). Uan itokilijkauaj miakpa mokuapolouayayaj (Mar. 9:33, 34). Uan kema tekichiuanij kitlajtolsenkajkej, tlauel kitlaijiyouiltijkej uan kipinajtijkej. Teipa kimiktijkej  kej kinmiktiyayaj katli kichiuayayaj tlen amo kuali uan tlauel tlaijiyouik (Heb. 12:1-3). Uan kema nechka mikiskia, Jehová ayokmo kipaleuik, yeka monejki iselti kiijiyouis tlen kipanoyaya (Mat. 27:46). b

9. ¿Tlake tijyolmatij kema timoiljuiaj ipan tlen Jesús kichijki? (1 Pedro 1:8).

⁹ Jesús tlauel tlaijiyouik pampa kinejki techmakixtis. Kema timoiljuiaj ipan nochi tlen kichijki, kichiua más ma tikiknelikaj (xijpoua 1 Pedro 1:8).

10. ¿Tlake monejki kiijiyouis Jehová pampa kinejki techmakixtis?

¹⁰ ¿Tlake monejki kiijiyouis Jehová uan kiampa Jesús ueliskia techmakixtis? Jehová tlauel kiiknelia iKone (Prov. 8:30). Ma timoiljuikaj tlake kiyolmatki kema kiitak Jesús kiixnamikiyaya miak tlaouijkayotl. Uelis tlauel kiyolkokok kema kiitak kenijkatsa kikualankaitayayaj uan kitlaijiyouiltiyayaj iKone.

11. ¿Tlake techpaleuia ma tijkuamachilikaj tlen Jehová kiyolmatki kema kimiktijkej Jesús?

¹¹ Tetajmej tlauel kinyolkokoua kema miki se ininkone. Maske kuali titlaneltokaj uan timotemachiaj moyolkuisej katli miktokej, kema miki se katli tlauel tikikneliaj, tlauel timokuesouaj uan techyolkokoua. Nopa techpaleuia ma tijkuamachilikaj tlake kiyolmatki Jehová ipan xiuitl 33, kema kiitak kenijkatsa kitlaijiyouiltijkej uan kimiktijkej iKone (Mat. 3:17). c

12. ¿Tlake uelis tijchiuasej kema ayamo tikilnamikij Cristo imikilis?

¹² Maske ayamo asi nopa tonali kema tikilnamikisej Cristo imikilis, kema timomachtis moselti o ininuaya mochampoyouaj uelis inkiitasej kenijkatsa techpaleuia pampa Jesús techmakixtik. Kema timomachtis, uelis tijtekiuis Tlen ika momachtiaj Jehová itlajtoltemakauaj o sekinok amatlajkuiloli. d Nojkia xijpoua nopa tlapoualistli tlen mopoua kema tikilnamikij Cristo imikilis tlen uala ipan pilamochtsi Tlen tijchiuasej ipan tlanechikoli Kej Timonejnemiltiaj uan Titlajtolmoyauaj. Nojkia xikita tlen tlamachtiaj ika ijnalok ipan nopa tonali. Tlaj tijkualchijchiuaj toyolo kema ayamo tikilnamikij Cristo imikilis, nojkia uelis tikinpaleuisej sekinok (Esd. 7:10).

 MA TIKINTLANEUIKAJ SEKINOK

13. ¿Tlake moneki tijchiuasej tlaj tijnekij tikinpaleuisej sekinok nojkia ma monechikokaj kema tikilnamikisej Cristo imikilis?

¹³ Uelis tikinpaleuisej sekinok nojkia ma monechikokaj kema tikilnamikisej Cristo imikilis tlaj tikintlaneuij. Maske uelis titetlaneuisej kema titlajtolmoyauasej kajkalpa, nojkia uelis tikijkuilosej ajkia tijnekij tikintlaneuisej. Uelis tikintlaneuisej touikaljuaj, katli ininuaya titekitij, katli ininuaya timomachtiaj o sekinok katli tikinixmatij. Uan tlaj ayokmo tijpiaj nopa amatl tlen ika titetlaneuij, uelis tikintitlanilisej se enlace uan kiampa tikintlaneuisej. ¡Uelis miakej kena kinekisej yasej! (Ecl. 11:6).

14. Ika se neskayotl, xikijto kenijkatsa uelis tikinpaleuisej sekinok kema tikinmakaj nopa pilamatsi tlen ika titetlaneuij.

¹⁴ Amo kema ma timoiljuikaj san tlapik tikinmakaj maseualmej nopa pilamatsi tlen ika titetlaneuij. Se tonali, iueue se tosiuaikni kiiljuik yaskia iuaya kema kiilnamikiskiaj Cristo imikilis. Nopa tosiuaikni mosentlachilik pampa miakpa kitlanejtoya iueue uan amo kinektoya yas. ¿Kenke ipan nopa tonali kena kinejki? Iueue kiiljuik se ueuejtlakatl kimakatoya se pilamatsi tlen ika titetlaneuij. Yeka ipan nopa tonali monechikok uan teipa nojua kiampa kichijki.

15. ¿Tlake moneki tikilnamikisej kema tijtlaneuij se akajya?

¹⁵ Kema tijtlaneuij se akajya katli amo kema monechikojtok touaya, uelis kinekis kimatis se keski tlamantli. Yeka ma timoiljuikaj tlake kineki kimatis uan kenijkatsa uelis tikixtomilisej (Col. 4:6). Uelis motlajtlania: “¿Tlake kichiuaj nopaya? ¿Keski horas uejkauaj? ¿Kenijkatsa moneki nimoyoyontis? ¿Moneki nitlaxtlauas? ¿Tlajtlanij tomij?”. Ma tijtlajtlanikaj tlake kineki kimatis uan ma tikixtomilikaj. Nojkia uelis tijnextilisej nopa videos Ma tikilnamikikaj Cristo imikilis uan ¿Tlake tijchiuaj ipan Kali kampa timosentiliaj? Ipan tlamachtili 28 tlen amochtli ¡Nochipa xiitsto ika pakilistli!, uelis tijpantis se keski tlamantli tlen uelis tikiljuis katli tijtlaneuis.

16. ¿Tlake sekinok tlamantli uelis kinekisej kimatisej katli yasej kema tikilnamikisej Cristo imikilis?

 ¹⁶ Tlaj katli tijtlanejkej yaui kema tikilnamikij Cristo imikilis, uelis kinekis kimatis sekinok tlamantli. Uelis kinekis kimatis kenke san se keskij o amo aka kikuajki nopa pantsi uan kiijik nopa vino. Nojkia, uelis kinekis kimatis keski uelta tikilnamikij Cristo imikilis ipan se xiuitl uan tlaj nochipa kiampa tijchiuaj kema timonechikouaj. Maske ipan nopa tlamachtili toikni kiixtoma nopa tlamantli, uelis nopa maseuali kinekis más kuali ma tikixtomilikaj. Kema tikixtomilisej tlen kineki kimatis, uelis tijtekiuisej nopa tlamachtili “¿Kenke Jehová itlajtoltemakauaj amo kiilnamikij Cristo imikilis sanse kej kichiuaj sekinok religiones?”, tlen eltok ipan jw.org. Tijnekij tijchiuasej nochi tlen tiuelij kema ayamo tikilnamikij Cristo imikilis, kema asis nopa tonali uan kema ya panotos, kiampa uelis tikinpaleuisej katli kipiaj “kuali ininyolo” nojkia ma monechikokaj touaya (Hech 13:48).

MA TIKINPALEUIKAJ KATLI MOUEJKATLALIJTOKEJ

17. ¿Kenijkatsa ueuejtlakamej uelis kinpaleuisej katli mouejkatlalijtokej? (Ezequiel 34:12, 16).

¹⁷ Ueuejtlakamej uelis kinpaleuisej katli mouejkatlalijtokej kema nechka tikilnamikisej Cristo imikilis. Yeka moneki kinextisej kintekipachoua tlen kinpano uan kinikneliaj (xijpoua Ezequiel 34:12, 16). Ueuejtlakamej, xijchiuakaj kampeka inkamanaltisej ininuaya nochi katli mouejkatlalijtokej. Xikiniljuikaj inmechtekipachoua tlen kinpano uan inkinekij inkinpaleuisej. Xikintlaneuikaj ma yakaj kema tikilnamikisej Cristo imikilis uan tlaj yasej, kuali xikinselikaj. Uan maske ya panotos nopa tonali, nojua xikinkamanaljuikaj uan xikinpaleuikaj sampa ma kitekipanokaj Jehová (1 Ped. 2:25).

18. ¿Kenijkatsa uelis tikinpaleuisej katli mouejkatlalijtokej? (Romanos 12:10).

¹⁸ Nochi uelis tikinpaleuisej katli mouejkatlalijtokej, tlaj kuali tikinseliaj kema tikilnamikisej Cristo imikilis, tlaj tijnextiaj tikinikneliaj uan tikintlepanitaj (xijpoua  Romanos 12:10). Ma tikilnamikikaj, nopa toikniuaj uelis kimatkej ouij sampa monechikosej touaya. Uelis motekipachouayayaj pampa amo kimatiyayaj kenijkatsa tikinseliskiaj. e Yeka, amo ma tikijtokaj yon ma tikintlajtlanikaj tlen kichiuas amo kuali ma kiyolmatikaj (1 Tes. 5:11). Inijuantij elij toikniuaj uan tlauel tiyolpakij pampa sampa tijueyichiuaj Jehová ininuaya (Sal. 119:176; Hech. 20:35).

19. ¿Kenijkatsa techpaleuia kema tikilnamikij Cristo imikilis?

¹⁹ Tlauel kuali pampa Jesús technauatik ma tikilnamikikaj imikilis sejse xiuitl. Kema kiampa tijchiuaj, techpaleuia uan nojkia kinpaleuia sekinok (Is. 48:17, 18). Techpaleuia más ma tikiniknelikaj Jehová uan Jesús, uan ueli tijnextiaj tlauel tikintlaskamatiliaj tlen kichijkej. Nojkia, ipan nopa tonali, timosentikapaleuiaj ininuaya toikniuaj uan tikinpaleuiaj sekinok maseualmej ma kimatikaj tlake moneki kichiuasej uan tlaj kinekij kiselisej nopa tlateochiualistli pampa Jesús temaktilik inemilis. Yeka ma tijchiuakaj nochi tlen moneki, kiampa timokualchijchijtosej kema tikilnamikisej Cristo imikilis, pampa nopa tonali tlauel ipati.