1. Nda mɛ lá ti dangɔ bɛ na bi ti kwá tɛ Yezo adu bi ti ngbondoni ti ya bulu nɛ? (Luka 22:19, 20)

 KA TƐ awa kwa tɛ Yehova, lá ti dangɔ bɛ na bi ti kwá tɛ Yezo adu bi kɔi mɛ ngbondoni na ya bulu na lo tɛ ala. Ni du bombi kɔi ti ngbondoni mɛndó Yezo yɔ ya, ava lo li la. (Di Luka 22:19, 20.) E ndo kũ na bɛ e ndozu lá ti dangɔ bɛ na bi ti kwá tɛ Yezo na lo ti aye gba. Zia e ba ambanga aye ni.

2. Ambanga ye mɛ ndo to e ya, e sepala na lá ti dangɔ bɛ na bi ti kwá tɛ Yezo nɛ?

² Dangɔ bɛ na bi ti kwá tɛ Yezo ndo za e ya, e gbɔ̃ li e na ndo nda mɛ tɔ̃ngɔ azi adu ngbondoni na lo tɛ e, nga na anzɔ̃ kpale zu mɛ ni na hɛ̃ngɔ e. Ni ndo li ya, e da bɛ e na se mɛ elengbi ti hɛ̃ngɔ sia kɔli na lo ti kwá tɛ Yezo. (2 Kɔr. 5:14, 15) Ni ndo hɛ̃ nga e nzɔ̃ tangɔ ligɛrɛ ti “sangbingɔ ngunu” bɛ ayata kɔli ná ayata wali. (Roma 1:12) Ayata kɔli ná ayata wali gba mɛndó anzɛ̃ na ya nyingɔ ko, ala ndo ga bombi ti dangɔ bɛ na bi ti kwá tɛ Yezo. Na lo mɛ ya, ando li kpale tɛrɛ la na songo na ngoi ti dangɔ bɛ na bi ti kwá tɛ Yezo ko, ambanga ni ndo mu ekateli ti diringɔ fãni mɛndɛ̃ vɔrɔngɔ Yehova. Wa azi gba ndo kamwa na aye mɛ ala ndo hũ, ala ndo ma na ngoi ti dangɔ bɛ na bi ti kwá tɛ Yezo, ni ndo li ya, ala banda Mandangɔ Ngbangɔ. Ta ni du ye ti kamwangɔ ma, dangɔ bɛ na bi ti kwá tɛ Yezo adu ye ti ngbondoni na lo tɛ e!

3. Lá ti dangɔ bɛ na bi ti kwá tɛ Yezo ndo bombi e ná ayata ti lɛ gigi zu ndoni kɔi ngasia?

³ E ndo kũ lá ti dangɔ bɛ na kwá tɛ Yezo na bɛ e ndozu na lo mɛ ya, e hĩnga ya, e na lingɔ bombi ndoni kɔi na ayata kɔli ná ayata wali ti lɛ gigi zu. Atɛmwɛ tɛ Yehova ndo bombi tɛrɛ la ndoni kɔi ti dangɔ bɛ na bi ti kwá tɛ Yezo na lɛ gigi zu na ngoi mɛ lá ndo ti. E ndo landa diskur kɔi mɛ ndo kambisa nda mɛ kwá tɛ Yezo adu ngbondoni na lo tɛ e. E ndo ye abia sɛ ti gondangɔ na Yehova, na  gesi ando ɔ na mapa ná vinyɔ, wa e ndo ye “amen” na bɛ e kɔi na nda asambela siɔ mɛ ando li na ngoi niko. Na lá ti dangɔ bɛ na bi ti kwá tɛ Yezo ko, abombi ti lɛ gigi zu ndo li bombi ti dangɔ bɛ na bi ti kwá tɛ Yezo lɛ ni kɔi abɛse ala li ni na ngoi mɛ aɔngbi. Mɔ ndo da bɛ mɔ na dengɔ bɛ mɛ Yehova ná Yezo ndo ma na ngoi mɛ ala ndo hũ e ndo bombi tɛrɛ e ndoni kɔi ti gondangɔ ala na lá ti dangɔ bɛ na bi ti kwá tɛ Yezo?

4. Aye mɛ ndɛ e na mandangɔ nɛ?

⁴ Na ya tɛnɛ mɛ, e na tɛnɛngɔ tɛnɛ na ndo ahũnda mɛ: Ngasia la, elengbi ti lɛkɛngɔ bɛ e na lo ti dangɔ bɛ na bi ti kwá tɛ Yezo nɛ? Ngasia la elengbi ti zangɔ azi mɛndɛ̃ ti nɛngɔ ya, ala lua nzɔ̃ kpale na lo ni nɛ? Wa ngasia la elengbi ti zangɔ ayata kɔli ná ayata wali mɛndó ala nzɛ̃ na ya nyingɔ ya, ala ga e da bɛ e na bi ti kwá tɛ Yezo nɛ? Gbinya ti ahũnda niko na zangɔ e ya, e lɛkɛ tɛrɛ e, wa e du dã na lo ti bi niko ti ngbondoni.

NGASIA LA, ELENGBI TI LƐKƐNGƆ BƐ E NA LO TI DANGƆ BƐ NA BI TI KWÁ TƐ YEZO NƐ?

5. (a) Nda mɛ ayɔ ya e gbɔ̃ li e na ndo tɔ̃ngɔ ya, ni du ngbondoni nɛ? (Nzembo 49:7, 8) (b) Wangɔ mɛ mɔ lua na ndo video mɛ bɛli tɛnɛ ni tɛnɛ ya, Mpo na nini Yesu akufaki nɛ?

⁵ Ndenge kɔi mɛ elengbi ti lɛkɛngɔ na bɛ e na ngoi ti dangɔ bɛ na bi ti kwá tɛ Yezo adu na gbɔ̃ngɔ li e na ndo valɛrɛ mɛ kwá tɛ lo na ni. Ta e nvɛ̃ni elengbi ti tɔ̃ngɔ tɛrɛ e kaya siɔ kpale ná kwá ma. (Di Nzembo 49:7, 8; ba nga video Mpo na nini Yesu akufaki?) a Na lo ni la, Yehova mundó ebongiseli ti nɛngɔ ya, Yezo ga kpi kwá na lo tɛ e. (Roma 6:23) Se e gbɔ̃ li e gba na ndo ye mɛndó Yehova ná Yezo ali na lo tɛ e ko, e nga na sepalangɔ na tɔ̃ngɔ gba. Na pɔsɔ ti gesi, e na mandangɔ ye mɛndó Yehova ná Yezo ali na lo tɛ e. Kanda ti uzu, zia e ba bere tɔ̃ngɔ alengbi na nɛ?

6. Tɔ̃ngɔ ndo fa nɛ?

⁶ Tɔ̃ngɔ du ye mɛ ahɛ̃ ti vɔ̃ngɔ na ye kɔi. Na ngoi mɛndó Nzapa li Adamu ko, lo ndó na tɛrɛ ti lengbingɔ. Wa na ngoi mɛndó lo li siɔ kpale ko, lo zangandó nzɔ̃ tangɔ li gɛrɛ ti dungɔ na dungɔ lɛ ngɛ̃́ ti kaka, ta bo na lo tɛ lo kɔi ma, kanda nga na lo tɛ atara lo. Ti nɛngɔ ya, alua ye mɛndó Adamu zi gere ko, Yezo hɛ̃ndó dungɔ lɛ ngɛ̃́ tɛ lo ti lengbingɔ ti nɛngɔ ya atɔ̃ e. Na ngoi mɛndó Yezo ge lɛ sese ko, na ya dungɔ lɛ ngɛ̃́ tɛ lo zu, “ta lo lindó siɔ kpale ma, wa ta lo tɛnɛ ngandó nvɛ̃ni ma.” (1 Pet. 2:22) Na ngoi mɛndó lo kpi ko, lo ndó na tɛrɛ ti lengbingɔ nga ma se mɛndó Adamu na ni uzu ti lo lingɔ siɔ kpale.​—1 Kɔr. 15:45; 1 Tim. 2:6.

7. Kpengba kpale mɛndó Yezo tengbi na ni na ngoi mɛndó lo ge lɛ sese nɛ?

⁷ Ngoi mɛndó Yezo ga ge lɛ sese ko, lo tɔndɔndó To lo na ya akpale zu, abɛse na ngoi mɛndó ni du kpengbani lingɔ ni. Yezo ndó na tɛrɛ ti lengbingɔ, kanda awa dũngɔ lo ndó na tɛrɛ ti zangangɔ lengbingɔ, abɛse ngaso ko, lo tɔndɔndó ala. (Luka 2:51) Ngoi mɛndó lo ti palanga ko, azi kpãndó ka tɛ lo ndozu ya, lo zia tɔndɔngɔ awa dũngɔ lo, wa lo ko nga nyɔ ndia tɛ Yehova, abɛse ngaso ko, ta lo lindó ni ma. Wa na ngoi mɛndó lo ti kangba ko, Satana zabolo tarandó lo ya, lo li siɔ kpale, ti nɛngɔ ya, ta lo ngbã mbilimbili ka tɛ Nzapa ma. (Mat. 4:1-11) Satana lindó zu ti nɛngɔ ya, Yezo li siɔ kpale wa ta lo tɔ̃ azi ma.

8. Kpengba kpale mɛndɛ̃ mɛndó Yezo gbe bɛ lo na ya ni nɛ?

⁸ Ngoi mɛndó lo ga ge lɛ sese ko, Yezo gbendó bɛ lo na ya atara gba. Awa kula tɛ lo atarandó lo, wa ala sepala ngandó hongɔ lo. (Luka 4:28, 29; 13:31) Lo tengbi ngandó na kpale ti zangangɔ lengbingɔ tɛ ava lo. (Mar. 9:33, 34) Ngoi mɛndó afa ngbanga tɛ lo ko, asɔ̃ndó lo, asambwisa ngandó lo. Na gesi, ahɛ̃ndó lo pɛnɔ kpengbani, wa lo kpindó kwá ti kamɛnɛ. (Aeb. 12:1-3) Lo gbendó bɛ lo na ya kpengba pɛnɔ ti ndani mɛndó lo tengbi  na ni, zangangɔ ya, Yehova za lo. b​—Mat. 27:46.

9. E ndo ma tɛrɛ ngasia na lo ti kwá tɛ Yezo nɛ? (1 Petro 1:8)

⁹ Ni du nvɛ̃ni bɛta kpale ya, ti nɛngɔndó ya, Yezo tɔ̃ e ko, ta ni dundó ye ti wele ma. Ngoi mɛ e ndo gbɔ̃ li e na ndo pɛnɔ zu mɛndó Yezo hũ na lo tɛ e ko, ta ni ndo to e ya, e di ye lo fãni mɛndɛ̃ gba ma?​—Di 1 Petro 1:8.

10. Yehova mandó tɛrɛ lo ngasia na lo ti kwá tɛ Yezo nɛ?

¹⁰ Ye mɛ Yehova li ti nɛngɔ ya, Yezo ga tɔ̃ azi nɛ? Yehova ná Yezo na mangbi kɔi mɛ kpengbani mɛ ndo du ka popo tɛrɛ to ná nyi. (Mas. 8:30) Binga li mɔ na ndo se mɛndó Yehova ma na tɛrɛ lo na ngoi mɛndó lo ndo hũ Yezo ndo hũ apɛnɔ ndɛ̃ ndɛ̃ ndɛ̃ ge lɛ sese. Ta kitɛ da ma ya, Yehova mandó sɔngɔ bɛ na ngoi mɛndó lo hũ ando sɔ̃ Nyi lo, ando hɛ̃ lo pɛnɔ, nga na tara mɛndó lo tengbi na ni.

11. Hɛ̃ se lɛlo kɔi mɛ ndo fa se mɛndó Yehova ma na tɛrɛ lo na ngoi mɛndó aho Yezo.

¹¹ Ato ayangambi zu ko la ayangambi tɛ la kpili ko, ala hĩnga se mɛ zo ndo ma na vundu kpengbani na ngoi mɛ nyingambi kpi ti ala. E na loyengɔ ti kpengbani ya, ayata e mɛ kpili na songɔ, kanda ta ni ndo hã sɔngɔ bɛ mɛ e ndo ma na ngoi mɛ zo ndo kpi ti e ma. Ndakisa niko za e ti hĩngangɔ se mɛndó Yehova ma na sɔngɔ bɛ na ngoi mɛndó lo hũ Nyi lo mɛ lo ndo ye lo mawoma ndo hũ pɛnɔ, wa lo kpi nga na ya bulu ti 33 N.E. c​—Mat. 3:17.

12. Ye mɛ elengbi ti lingɔ na ya pɔsɔ uzu ti nɛngɔ ya, lá ti dangɔ bɛ na bi ti kwá tɛ Yezo alengbi nɛ?

¹² Uzu ti nɛngɔ ya e da bɛ e na bi ti kwá tɛ Yezo ko, nda mɛ ta e nvɛ̃ni elengbi ti mungɔ ngoi ti mandangɔ kpale mɛ aba tɔ̃ngɔ, bere e li sambela ti ndasewa na ndoni ma nɛ? Wa salela Buku ya bolukiluki mpo na Batatoli ya Yehova bere ambeti mɛndɛ̃ mɛ ndo kambisa tɛnɛ ti ya Ngbangɔ mɛ alengbi ti kambisangɔ kpale gba na ndo tɔ̃ngɔ. d Wa landa nga aprɔgramɛ ti dingɔ Ngbangɔ na ngoi ti dangɔ bɛ na bi ti kwá tɛ Yezo mɛ kaya Mokanda ya likita Bomoi mpe mosala ya bokristo. Wa na lá ti dangɔ bɛ na bi ti kwá tɛ Yezo ko, ta bɛ mɔ li na bangɔ video ti tɛxtɛ du jour ti dangɔ bɛ na bi ti kwa tɛ Yezo ma. Ngoi mɛ e ndo lɛkɛ bɛ e na lo ti dangɔ bɛ na bi ti kwá tɛ Yezo ko, e na dungɔ na likoki ti zangɔ azi mɛndɛ̃ ti nɛngɔ ya, ala nvɛ̃ni lua nga nzɔ̃ kpale na lo ti kwá tɛ Yezo.​—Ezr. 7:10.

 ZA AZI MƐNDƐ̃ TI NƐNGƆ YA, ALA LUA NZƆ̃ KPALE NA LO TI KWÁ TƐ YEZO

13. Ye ti uzu mɛ elengbi ti lingɔ ti nɛngɔ ya, e za azi mɛndɛ̃ ya, ala lua nga nzɔ̃ kpale na lo ti lá ti dangɔ bɛ na bi ti kwá tɛ Yezo nɛ?

¹³ Ngasia la elengbi ti zangɔ azi mɛndɛ̃ ya, ala lua nzɔ̃ kpale na lo ti kwá tɛ Yezo nɛ? Ye ti uzu, adu ilingɔ ala. Hãngɔ azi mɛ e ndo pa tɛnɛ hɛ̃ ala zingɔ, elengbi ti lingɔ listɛ tɛ azi zu mɛ e hĩnga ala ti nɛngɔ ya, e ili nga ala na lo ti bi niko. Ka popo tɛrɛ azi niko, alengbi ti dungɔ azi ti kartie, afɔ̃ e ti kwa, nga na akwa e ti kalasi. Abɛse ta e na papie ti ilingɔ na azi gba ma ko, elengbi nga ti ilingɔ ambanga ni na lége ti telefɔnɛ. E na kamwangɔ ti hũngɔ ndenge mɛ azi gba na gangɔ bombi ti dangɔ bɛ na bi ti kwá tɛ Yezo​—Mos. 11:6.

14. Fa nzɔ̃ kpale mɛ ilingɔ azi na lo ti dangɔ bɛ na bi ti kwá tɛ Yezo ndo hɛ̃.

¹⁴ Ngoi mɛ e ili zo kɔi ya lo ga bombi ti dangɔ bɛ na bi ti kwá tɛ Yezo ko, ngoi mɛndɛ̃ ni na tongɔ lo ya, lo ga. Lá kɔi ndó ko, nyita wali kɔi mɛ ta kɔ lo tɛmwɛ tɛ Yehova ma ko, lo kamwandó na ngoi mɛ kɔ lo tɛnɛ hɛ̃ lo na yakɛ zu ya, ni ná lo na gwengɔ bombi ti dangɔ bɛ na bi ti kwá tɛ Yezo. Lo kamwãndó na lo nɛ? Na lo mɛ ya, na ya abulu gba mɛ aɔ ko, nyita wali ndo yɔndó ka ti kɔ lo ya, ani gwe bombi, kanda ta kɔ lo ndo yendó gwengɔ ma. Ye mɛ li ya, lo ye gwengɔ nɛ? Kɔ lo tɛnɛ ya “ahɛ̃ndó mbi invitasiɔ̃ ti papie” wa lo kambisa ya, biazo kɔi ti ya bombi mɛ ahĩnga lo nzɔ̃ni la aili lo. Kɔ wali niko alandandó bombi ti dangɔ bɛ na bi ti kwá tɛ Yezo ti ya bulu niko, nga na abulu mɛndɛ̃ gba so pɛ ni.

15. Ye mɛ ta bɛ e lengbi ti lingɔ na ni ma na ngoi mɛ e ndo ili azi ya, ala ga bombi ti dangɔ bɛ na bi ti kwá tɛ Yezo nɛ?

¹⁵ E hĩnga ya, azi mɛ e ndo ili ala ko, ngoi mɛndɛ̃ ala ndo du na ando ti hũndangɔ​—na ndo akpale mɛ aba dangɔ bɛ na bi ti kwá tɛ Yezo, gba ni se du ya, adu fãni ti uzu ti ala gangɔ bombi ni. Ni la, elengbi ti gbɔ̃ngɔ li e nzɔ̃ni na ndo ahũnda mɛ ala ndo hũnda na e, wa e lɛkɛ nga agbinya ti nzɔ̃ni ti nɛngɔ ya, e hɛ̃ ala. (Kɔl. 4:6) Na ndakisa, ngoi mɛndɛ̃ ambanga ni ndo hũnda ya: ‘Ye mɛ ndo ɔ na ngoi ti dangɔ bɛ na bi ti kwá tɛ Yezo nɛ?’ ‘Ando mu ngoi kɛ̃?’ ‘Bɔngɔ mɛ ngasia la, mbi lengbi ti yungɔ nɛ?’ ‘Afuta falanga wa ali bombi ni?’ ‘Mbi na hɛ̃ngɔ falanga na ngoi mɛ mbi ndo landa bombi ni?’ Ngoi mɛ e ili azi ya, ala ga bombi  ti dangɔ bɛ na bi ti kwá tɛ Yezo ko, ayɔ ya, e hũnda ala na ndo mɛ: “Mɔ na ando ti hũndangɔ?” Wa se ala hɛ̃ gbinya ti hũnda niko ko, mɔ lengbi ti salelangɔ avideo Kanisá liwa ya Yesu, nga na Aye mɛ ndo ɔ ka ya da Lo-Gbia nɛ? Za azi ti nɛngɔ ya, ala hĩnga se mɛ kpale ndo ɔ na ni ka bombi. Nga na wangɔ 28 ti buku Du na dungɔ lɛ ngɛ̃́ bwai na bwai! Mbeti niko na akpale ti ngbondoni gba mɛ elengbi ti mandangɔ na azi.

16. Ambanga ahũnda mɛ azi mɛ ndo ga bombi ti dangɔ bɛ na bi ti kwá tɛ Yezo ndo hũnda nɛ?

¹⁶ Na pɛ dangɔ bɛ na bi ti kwá tɛ Yezo ko, azi mɛ aga bombi ti dangɔ bɛ na bi ti kwá tɛ Yezo ti fãni ti uzu, ala lengbi nga ti hũndangɔ ando. Ngoi mɛndɛ̃ ala lengbi ti hũndangɔ ndo mɛ, nda mɛ ta zo kɔi atɛ mapa bere lo nyɔ vinyɔ ma nɛ, bere nda mɛ (bo azi yakere) ka popo tɛrɛ ala la atɛ mapa wa ala nyɔ nga vinyɔ nɛ. Ngoi mɛndɛ̃ ala lengbi ti hũndangɔ bere bombi ti ndangɔ bɛ na bi ti kwá tɛ Yezo ndo li tɛrɛ lo fãni kɛ̃. Ala ndo gi nga hĩngangɔ bere bombi tɛ Atɛmwɛ tɛ Yehova ndo li tɛrɛ lo zu lɛ ni kɔi. Abɛse ngaso ko, ambanga ni gba ka popo tɛ la ndo ma tɛnɛ ti ngbondoni na ngoi mɛ nyita kɔi ndo li diskur ti dangɔ bɛ na bi ti kwá tɛ Yezo, wa ngoi mɛndɛ̃ azi mɛ aga ti fãni ti uzu na gwɛ̃ ti hĩngangɔ akpale gba na ndo kwá tɛ Yezo. Di tɛnɛ mɛ akpã kaya jw.org mɛ bɛ li tɛnɛ ni tɛnɛ ya: “Mpo na nini Batatoli ya Yehova basalaka elambo ya Nkolo ndenge moko te na mangomba mosusu?” Ni lengbi ti zangɔ e ya, e hɛ̃ azi gbinya ti nzɔ̃ni na ambanga ndo mɛ ala ndo hũnda na e. E ye lingɔ zu mɛ e ye lingɔ​—uzu ti dangɔ bɛ e na bi ti kwá tɛ Yezo, na ngoi ti lingɔ ni, nga na pɛ lingɔ ni, ti nɛngɔ ya, e za azi “mɛndó na seliye ti nzɔ̃ni” ti nɛngɔ ya ala lua nzɔ̃ kpale na lo ti bombi ni.​—Aw. 13:48.

ZA AZI MƐ NZƐ̃ NA YA NYINGƆ

17. Ngasia lá abiazi alengbi ti zangɔ ayata mɛ anzɛ̃ na ya nyingɔ nɛ? (Ezekiele 34:12, 16)

¹⁷ Na ngoi ti dangɔ bɛ na bi ti kwá tɛ Yezo, nda mɛ ayɔ ya, abiazi agwe ba azi mɛ anzɛ̃ na ya nyingɔ nɛ? Fa na ala ya, mɔ ndo kpã likebi na ndo ala. (Di Ezekiele 34:12, 16.) Uzu ti e dangɔ bɛ e na bi ti kwá tɛ Yezo ko, ayɔ ya, e ili azi gba se alengbi. Tɛnɛ hɛ̃ ala ya, mɔ ndo kpã likebi tɛ mɔ ndo la, wa mɔ ye nga zangɔ ala na lége zu. Ili la ya, ala ga bombi ti dangɔ bɛ na bi ti kwá tɛ Yezo. Se ala ga ko, tɛnɛ hɛ̃ ala ya, ĩ du na gangɔ nzɔ̃ni. Na pɛ  dangɔ bɛ na bi ti kwá tɛ Yezo ko, e ngbã lá kwɛ gwengɔ bangɔ ayata kɔli ná ayata wali bere zangɔ ala na tɛ ti nyingɔ mɛ ala na gwɛ̃ ni, ti nɛngɔ ya, ala diri lɛkɛ mangbi tɛ ala ná Yehova.​—1 Pet. 2:25.

18. Ngasia la, e zu elengbi ti zangɔ azi mɛ anzɛ̃ na ya nyingɔ nɛ? (Roma 12:10)

¹⁸ Ayata zu ti ya bombi alengbi ti zangɔ ayata mɛ anzɛ̃ na ya nyingɔ ya, ala ga bombi ti dangɔ bɛ na bi ti kwa tɛ Yezo. Na lo nɛ? Na lingɔ ye tɛrɛ la na songo, na zungɔ na tɛrɛ nga na tɔndɔngɔ. (Di Roma 12:10.) Ta bɛ e li na ni ma ya, ngoi mɛndɛ̃ ayata niko ndo binga bɛ la ti gangɔ bombi. Ngoi mɛndɛ̃ mbɛtɔ ti tɛnɛ mɛ ayata ti ya bombi na tɛnɛngɔ hɛ̃ ala ndo gbɔ̃ ala. e Ni la, ta e hũnda ala na ndo mɛ alengbi ti hɛ̃ngɔ ala mbɛtɔ bere e tɛnɛ tɛnɛ mɛ alengbi ti hɛ̃ngɔ ala sɔngɔ bɛ ma. (1 Tes. 5:11) Ayata kɔli ná ayata wali adu azi mɛ e ndo kpã bɛ e na ndo ala. E na dengɔ bɛ ti vɔrɔngɔ Yehova ndoni kɔi na ala fãni mɛndɛ̃!​—Nz. 119:176; Aw. 20:35.

19. Nzɔ̃ kpale mɛ elengbi ti luangɔ na lo ti kwá tɛ Yezo nɛ?

¹⁹ E ndo hɛ̃ sia kɔli na lo ti tɛnɛ mɛ Yezo tɛnɛ hɛ̃ e ya, e ndo da bɛ e na bi ti kwá tɛ lo na ya bulu kɔi kɔi? Ngoi mɛ e ndo da bɛ e na bi ti kwá tɛ Yezo ko, e ná azi mɛndɛ̃ e ndo lua anzɔ̃ kpale na ndenge gba. (Yis. 48:17, 18) Songo tɛ e na ndo Yehova ná Yezo ndo mai. E ndo fa ya, e ndo hɛ̃ sia kɔli mawoma na lo ti ye mɛ Yehova ná Yezo ali na lo tɛ e. E ndo li ya, mangbi tɛ e na ayata kɔli ná ayata wali ati kpengbani. Wa elengbi ti zangɔ azi mɛndɛ̃ ti nɛngɔ ya, ala manda se mɛ ala lengbi ti luangɔ nzɔ̃ sulu na lége ti tɔ̃ngɔ. Zia ya, e li zu mɛ elengbi ti lingɔ wa e du nga dã ti dangɔ bɛ e na bi ti kwá tɛ Yezo na ya bulu mɛ!