1. Busanaki ekiro ky’Eryibuka oluholo lwa Yesu ky’ekiro ky’omughaso munene omo mwaka wosi? (Luka 22:19, 20)

 OKO BIMIRI ba Yehova Ekiro ky’Eryibuka oluholo lwa Yesu ky’ekiro ky’omughaso munene omo mwaka. Ky’ekiro kikulu kighuma kisa ekyo Yesu abwira abigha biwe burora-rora ati babye bakyibuka. (Soma Luka 22:19, 20.) Hane emyatsi mingyi eyikaleka itwalindirira n’omuhwa ekiro ky’Eryibuka oluholo lwa Yesu kihike. Tukanaye oko mighuma ya kuyo.

2. Ni myatsi milebe yahi yo yikaleka itwalindirira ekiro ky’Eryibuka oluholo lwa Yesu n’omuhwa munene?

² Omuhindano w’Eryibuka oluholo lwa Yesu akatuwatikaya erilengekania oko bughuli bw’embanulo n’emiyisa mingyi eyo yikatuletera. Omuhindano oyo akatuwatikaya eryibuka esyonzira esyo twangakanganiryamo erisima lyetu busana n’eriyiherera lya Yesu. (2 Kor. 5:14, 15) Kandi akatuha akanya “k’erisikania mitima.” (Rom. 1:12) Obuli mwaka abaghala n’abali betu bangyi abatesyakola bakahika oko muhindano oyo. Nibya n’abandi ba kubo bakabya bakokibwa n’obutseme bunene oko muhindano oyo, ekyo kikabakuna eritasyasubira Yehova. Abandu bangyi abanzisibwe n’ekwenene, bakaswekera ebyo bakowa n’ebyo bakalangira oko muhindano oyo, n’ekyo kikabakuna erigha eBiblia. Kyo kikaleka Eryibuka oluholo lwa Yesu ikyabya kiro ky’omughaso munene okw’itwe!

3. Omuhindano w’Eryibuka oluholo lwa Yesu akatuhira ati omo bughuma n’abaghala na bali betu b’omo kihugho kyosi? (Ulebaye n’epitsa.)

³ Terisyalengekania n’oko kino. Omuhindano w’Eryibuka oluholo lwa Yesu akatuhira omo bughuma n’abaghala n’abali betu b’omo kihugho kyosi. Omo kihugho kyosi, Abimiri ba Yehova bakakola omuhindano omo biharo by’eyo bali eryuba ryabilenga. Itwe bosi tukakwama omukania owakakanganaya omughaso w’embanulo. Tukimba esyonyimbo ibiri, itwalabya omukati n’edivai n’eribugha tuti “amina” erilua oko mutima oko misabe ini eyikatekawa. Omo syosaha nga 24, esyondeko syosi sikabya isyamabikola emyatsi  mighumerera eyo. Terilengekania Yehova na Yesu nga bakabya n’obutsema bungahi, bakalangira itwe bosi omo kihugho tukasikyabo omwihindana omo bughuma oko muhindano w’Eryibuka oluholo lwa Yesu!

4. Omo mwatsi ono tukendikania okuki?

⁴ Omo mwatsi ono, tukendisubirya oko mabulyo ano: Twangateghekania omutima wetu wo tuti busana n’omuhindano w’Eryibuka oluholo lwa Yesu? Twangawatikya abandu bo tuti batoke eribane endundi omo muhindano oyo? Kandi twangawatikya tuti ababirileka erikola? Ebisubiryo bw’oko mabulyo ayo, bikendituwatikya eribya itunayiteghekire oko muhindano w’omughaso munene oyo.

TWANGATEGHEKANIA OMUTIMA WETU WO TUTI BUSANA N’ERYIBUKA OLUHOLO LWA YESU?

5. (a) Busanaki ni ky’omughaso erilengekania oko bughuli bw’embanulo? (Esyonyimbo 49:7, 8) (b) Mughukighaki omo video Yesu mwahola busanaki?

⁵ Sitwangatokire n’ahake eriyilusya omo bukobe bw’erilolo n’oluholo. Neryo okw’ekyo, enguma y’oko syonzira esyo mughaso munene esyo twangateghekaniryamo omutima wetu oko muhindano w’Eryibuka oluholo lwa Yesu, ry’erilengekania ngoko, eriyiherera lya Yesu Kristo ni ly’obughuli bunene kutsibu. (Soma Esyonyimbo 49:7, 8; ulebaye n’evideo Yesu Mwahola Busanaki?) a Yehova mwakola endegheka Yesu atuholere busana n’eritusabula. Yehova na Yesu mubaligha erisigha emyatsi mingyi omwatsi oyo atoke eritokekana. (Rom. 6:23) Ngoko tukendibya tukalengekania oko ebyo Yehova na Yesu baligha erisighania busana netu, ko tunemwendibya n’erisima linene tutya oko mbanulo. Tukendikania oko myatsi milebe eyabya yikalire erikola oko Yehova na Yesu busana netu. Aliwe okwitsuka embanulo niki?

6. Embanulo niki?

⁶ Embanulo ye ndihi eyikalihawa busana n’erikombola ekindu ekilwe ikyabirihera. Omughulu omundu w’erimbere ye Adamu ahangyikawa, abya mundu uyuhika-hikene. Abere akola erilolo mwaherya olusunzo lw’erisyabyaho kera na kera; okw’iye n’oko bana biwe bosi. Yesu mwaherera engebe yiwe eyihika-hikene busana n’eriliha ebyo Adamu aheraya. Omo ngebe yiwe yosi, Yesu “mwatakola erilolo, n’amabehi mwatasungika omo buno bwiwe.” (1 Pet. 2:22) Omughulu Yesu ahola, abya mundu uyuhika-hikene ngoko Adamu anabya embere akole erilolo neryo omwiherera engebe yiwe, Yesu mwatoka eriliha engebe eyo Adamu aheraya.​—1 Kor. 15:45; 1 Tim. 2:6.

7. Omughulu Yesu abya oko Kihugho mwalengwako omo nzira syahi?

⁷ Nomo Yesu analengawako omughulu abya oko kihugho, mwasighala mutaleghula oko Tata wiwe w’elubula omo nzira eyihikene. Yesu abya mwana oyuhikene aliwe ababuti biwe isibahika-hikene. Nomo byanabya bitya inyakowabo. (Luka 2:51) Omughulu abya mulwana, kitokekene mwataligha abandi bamukune eritendibya akowa ababuti biwe kutse erileghula oko Yehova. N’omughulu Yesu akula mwayikasa erilwa n’amalengwako wa Sitani Diabolo ng’erimukuna erikola erilolo kutse endibya ng’amamubwira burora-rora ati aleghule oko Mungu. (Mat. 4:1-11) Sitani abya ayisoghire kundu erikuna Yesu erikola erilolo imwatendisyatoka eriliha embanulo.

8. Yesu mwayiyinia oko yindi myatsi yahi eyikalire?

⁸ Omughulu Yesu abya akakola omubiiri wiwe w’oko kihugho, mwayiyinia n’oko wandi malengywako. Mwendereribwa n’esyonzighu siwe esyabya sikasonda erimwita. (Luka 4:28, 29; 13:31) Mwabya akahanda omutima busana n’obulema bw’abigha biwe. (Mar. 9:33, 34) Omughulu babya bakasonda erimwita, mubamwaghalia kutsibu n’erimuhemula. N’enyuma sy’aho, mwahola oluholo olulumire kutsibu kandi olukita sisoni. (Ebr. 12:1-3) N’amaghali wiwe w’omwiso-mwiso mwayiyinia kugho iyuwene-wene butsira obuwatikya bwa Yehova. b​—Mat. 27:46.

9. Eriyiherera lya Yesu, likatukuna erikolaki? (1 Petro 1:8)

 ⁹ Kilangirikire ndeke-ndeke ngoko Yesu mwaghalwa kutsibu busana n’eriliha embanulo. Tukabya twalengekania oko ebyo Yesu akola busana netu, tukamwanza kutsibu.​—Soma 1 Petro 1:8.

10. Yehova mwaligha erisighania emyatsi hayi embanulo yitoke eritekwa?

¹⁰ Ibwa tubughe tutiki oko Yehova? Ni myatsi yahi eyo Yehova aligha erisighania Yesu atoke eriliha embanulo? Yehova na Yesu babya n’obwira bwa hakuhi kutsibu ng’obwira obukabya omo kati-kati ka Baba n’omwana wiwe. (Misyo 8:30) Neryo terilengekania hake, Yehova abya akayowa ati omughulu abya akalangira Yesu akayiyinia omo maligho mangyi awamuhikira omughulu abya oko kihugho? Ahate eritika-tika mukyabya kikaghalya Yehova yo kutsibu erilangira omughala wiwe akakolerwa muhanda n’eryaghalibwa.

11. Teka eky’erileberyako ekikakanganaya Yehova ng’anganabya imwayowa ati omughulu Yesu itawa.

¹¹ Omubuti wosi-wosi oywabiriherya omwana wiwe omo luholo, anasi ngoko eriherya omwana kikaletera obulighe bunene kutsibu. Twikirirye ngoko abaholi bosi bakendisyalubuka aliwe ekyo sikiribughaho obulumi obo, tukabya nabo omughulu omundu oyo twanzire akahola. Ekyo kyamatuwatikya erilangira Yehova nga mwayowa ati omughulu omughala wiwe mwanzwa abya akaghalwa n’erihola oko mwaka 33 M.W. c​—Mat. 3:17.

12. Ni myatsi yahi eyo twanganakola amayenga malebe embere omuhindano w’Eryibuka oluholo lwa Yesu ahike?

¹² Eritsuka lino wanganatsuka erigha bingyi oko mbanulo omo programe yaghu y’eriyighisya kutse omwiramya lyenyu ly’eka, erihika ekiro ky’Eryibuka oluholo lwa Yesu. Ukolesaye ekitabu Musaada wa Kutafuta Habari kwa Ajili ya Mashahidi wa Yehova kutse ekindi kitsapo ekikakanaya oko Biblia ekyangakuwatikya eriminya omwatsi w’embanulo wo buli. d Kandi uyikase erikwama obusomi bw’eBiblia b’omughulu w’Eryibuka oluholo lwa Yesu obukasa omo Omubiiri n’engebe y’Omukristo​—Akatabu k’omuhindano. Omo kiro ky’Eryibuka oluholo lwa Yesu isiwibirirawa erikwama Eprograme Eyembaghane ey’Eriramya ry’omo asubui. Twamabiteghekania omutima wetu wo ndeke oko muhindano w’Eryibuka oluholo lwa Yesu, itukendisyatoka eriwatikya n’abandi eribana endundi omo muhindano oyo.​—Ezra 7:10.

UWATIKAYE ABANDI ERIBANA ENDUNDI OKO MUHINDANO W’ERYIBUKA OLUHOLO LWA YESU

13. Twamanza eriwatikya abandi eribana endundi omo muhindano w’Eryibuka olohulo lwa Yesu, omwatsi w’erimbere ogho twangakola ni wahi?

¹³ Twangawatikya abandi bo tuti batoke eribana endundi oko muhindano w’Eryibuka oluholo lwa Yesu? Eky’erimbere ry’eribakokya  oko muhindano oyo. Eritomekako abandu abo tubeghere erihindana nabo tukatula engulu, twanganahandika amena w’abandu abo tukendisyakokya. Abandu abo banganabya abatunga betu, abo tukakola nabo omubiiri, abakolo balikyetu n’abandi. Nomo twangabya ituwite oko mwaliko mike eyitsapisibwe, twanganatumira omundu ye lien eyikendimukolya oko mwaliko owe kielektronike. Nindi yowangaminya nga nibangahi abakendisyahika oko muhindano oyo!​—Omug. 11:6.

14. Teka eky’erileberyako ekikakanganaya ngoko eriha omundu y’omwaliko si heryagho.

¹⁴ Kwesi eriha omundu y’omwaliko wiwe-wiwe ow’erimubirikira oko muhindano w’Eryibuka oluholo lwa Yesu kikatula oko mutima. Kiro kighuma mwali wetu mwasweka iba wiwe oyute Mwimiri wa Yehova akamubwira ngoko anemuyiteghekania erisyaenda haghuma naye oko muhindano w’Eryibuka oluholo lwa Yesu. Mwali wetu oyo mwasweka kundi abya inyabirimubirikira ngendo nyingyi oko muhindano w’Eryibuka oluholo lwa Yesu aliwe isyalyatahika n’oko mughuma. Neryo niki kyo kyaleka iba wiwe inyabindula amalengekania? Mwabugha ati: “Nabiribana omwaliko waghe.” Mwabwira omukali wiwe ngoko omusyakulu mughuma w’endeko oyubabeghereko yulyamuha omwaliko oyo. Omwaka oyo, iba wa mwali wetu oyo mwahika oko muhindano w’Eryibuka oluholo lwa Yesu kandi lwalola embere erihika kugho omo myaka mingyi eyakwama.

15. Omughulu tukakokaya omundu oko muhindano w’Eryibuka oluholo lwa Yesu, litolere itwibukaki?

¹⁵ Eky’eriminya kya kino: abo ukakokaya banganabya n’amabulyo​—kutsibu-tsibu bamabya isibalibatahika oko mihindano yetu. Neryo kwesi kyuwene iwalengekania embere oko mabulyo agho banganabulya n’eriteghekania ebisubiryo bya kugho. (Kol. 4:6) Abaghuma ba kubo banganabulya bati: ‘Emyatsi yikendibya yiti oko muhindano oyo?’ ‘Akendibugha esyondambi singahi?’ ‘Omundu atolere inyambala ati?’ ‘Omundu akaliha singahi eringira?’ ‘Bakendisyalabya ekibo kye sadaka?’ Omughulu tukakokaya omundu oko muhindano w’Eryibuka oluholo lwa Yesu, twanganamubulya lisa tuti: “Unawite oko mabulyo?” Neryo itwasubirya oko mabulyo agho akenditubulya. Eriwatikya omuhulikiriri waghu eriminya emihindano yetu nga yikakolawa yiti, wanganakolesya evideo Eryibuka oluholo lwa Yesu na Oko Kisenge ky’Obwami kukakolawaki? Esomo 28 ye kitabu  Tsemera engebe kera na kera! nayo yinemo emyatsi mingyi eyuwene eyo twangakaniako.

16. Abakahika oko muhindano w’Eryibuka Oluholo lwa Yesu, banganabya n’awandi mabulyo wahi?

¹⁶ Enyuma sy’omuhindano w’Eryibuka oluholo lwa Yesu, abahya-bahya abanzisibwe abalyahika kugho banganabya n’awandi mabulyo. Banganayibulya bati: Busanaki abandu bake basa bo bakalya oko amukati n’erinywa oko divai, kutse nibya muhatitabya n’omundu n’omughuma oyukalya oko mukati n’erinywa oko divai? Kandi banganayibulya nga tukakola omuhindano oyo gho kangahi. Kutse bangananza eriminya emihindano yosi y’Abimiri ba Yehova nga yikanakolawa yitya. Nomo emyatsi eyo yikanakanibawako omo mukania w’ekiro ky’Eryibuka oluholo lwa Yesu, aliwe omuhya-muhya angananza erikangiribwa bingyi oko myatsi eyo. Omwatsi owakabanika oko jw.org owabuyire ati: “Busanaki Abimiri ba Yehova bakibuka akalyo k’erigholo-gholo k’oMukama omo nzira eyisighene n’ey’ebindi bisomo?” anganatuwatikya erisubirya oko mabulyo wiwe. Embere sy’omuhindano w’Eryibuka oluholo lwa Yesu, n’omughulu w’omuhindano oyo n’enyuma sy’omuhindano oyo, twanzire erikola ngoko twangatoka eriwatikya abali “n’omutima owanzire eryangirira ekwenene” eribana endundi omo muhindano oyo.​—Emib. 13:48.

UWATIKAYE ABABIRILEKA ERIKOLA N’ENDEKO

17. Abasyakulu b’endeko bakawatikaya bati ababirileka erikola? (Ezekieli 34:12, 16)

¹⁷ Omo mughulu w’omuhindano w’Eryibula oluholo lwa Yesu, abasyakulu b’endeko bangawatikya bati ababirileka erikola haghuma n’endeko? Mukanganayebo ngoko mubatsomene. (Soma Ezekieli 34:12, 16.) Embere omuhindano oyo ahike, muyikase eriyasungana n’abangyi ba kubo ngoko mwanganatoka. Mukanganayebo ndeke-ndeke ngoko mubatsomene kandi ngoko mwanzire erikola ebyosi-byosi ebyo mwangatoka eribawatikya. Mubabirikire oko muhindano w’oluholo lwa Yesu. Bamabihika kugho, mukokayebo n’omuhwa. Enyuma sy’omuhindano isimwaleka erilenderera abaghala n’abali betu abo kandi mubahe obuwatikya b’obunya-kirimu obo bangalaghako batoke erisubira Yehova.​—1 Pet. 2:25.

18. Itwe bosi omo ndeko twangawatikya tuti ababirileka erikola? (Abanya Roma 12:10)

¹⁸ Abandu bosi omo ndeko banganawatikya  abarilileka erikola abakahika oko Muhindano w’Eryibuka oluholo lwa Yesu. Bati? Banganakola batya omwibakolera omo lwanzo n’omutima mubuya n’erisikya. (Soma Abanya Roma 12:10.) Mwibuke ngoko kyanganabya ikyabirikala oko baghala betu n’abali betu abo twanzire eritsuka erihindana. Banganabya ibakasagha bati endeko siyendisyabakokya ndeke. e Neryo kwesi isiwababulaya amabulyo awangaleka ibatayowa ndeke kutse erikola ekyosi-kyosi ekyangabahitania. (1 Tes. 5:11) Abaghala n’abali betu abo ni baramya balikyetu. Tukatsema eritasyaramya Yehova haghuma nabo!​—Esy. 119:176; Emib. 20:35.

19. Omughulu tukibuka oluholo lwa Yesu tukabana endundi yahi?

¹⁹ Tukasima kutsibu kundi Yesu mwatusaba eribya tukyibuka oluholo lwiwe obuli mwaka. Kandi twabiriyilangirira ngoko ekyo ni ky’omughaso munene, omughulu tukahindano oko muhindano w’Eryibula oluholo lwa Yesu tukabana endundi n’abandi kutya. (Isa. 48:17, 18) Olwanzo wetu oko Yehova n’oko Yesu lukakula. Tukabakanganaya ngoko tukasima kutsibu busana n’ebyosi ebyo batukolera. Tukabya bira kutsibu haghuma n’abaghala n’abali betu. Kandi omwikola tutya twanganawatikya n’abandi nabo balebaye nga banganakolaki batoke erisyabana oko myatsi mibuya eyikatokekana busana n’embanulo. Neryo kyesi muleke itwe bosi tukole ebyosi ebyo twangatoka tutoke eribya itunayiteghekire Eryibuka oluholo lwa Yesu ery’omo mwaka ono​—ekiro ekyo kyo kikendisyabya ky’omughaso munene kutsibu omo mwaka ono!