1. Kubayini isiKhumbuzo sililanga eliqakathekileko emnyakeni? (Lukasi 22:​19, 20)

 EBANTWINI bakaJehova, isiKhumbuzo sokufa kwakaKrestu lilanga eliqakatheke khulu emnyakeni. Kuphela kwesenzakalo uJesu ayala ngokunqophileko abafundi bakhe bona basenze. (Funda uLukasi 22:​19, 20.) Kuhlala kunamabanga amanengi asenza siqale phambili esiKhumbuzweni. Akhesicoce ngawo.

2. Ngimaphi amanye amabanga enza siqale phambili esiKhumbuzweni?

² IsiKhumbuzo sisisiza sicabangisise ngokuqakatheka kwesihlengo. Sisikhumbuza ngeendlela esingatjengisa ngazo ukuthi sithokoza khulu ngesihlengo. (2 Kor. 5:​14, 15) Sisinikela nethuba lokuthabela ‘ukukhuthazana’ nabafowethu nabodadwethu. (Rom. 1:12) Qobe mnyaka, abafowethu nabodadwethu abanengi esele balisile ukuza esifundweni bayeza esiKhumbuzweni. Ngebanga lokuphathwa ngethando nabeze esifundweni, abanye baqunte ukubuyela kuJehova. Kukulapho abanengi bakarwe ngilokho abakuzwako nabakubonako bese bafune ukuthoma ukufunda iBhayibheli. Koke lokhu kwenza isiKhumbuzo sikhetheke khulu kithi!

3. IsiKhumbuzo senza njani sibumbane ephasini loke? (Qala nesithombe.)

³ Siqala phambili esiKhumbuzweni ngombana siyazi ukuthi ngelangelo siyabumbana nabafowethu nabodadwethu ephasini mazombe. Ngesikhathi sesiKhumbuzo, aboFakazi  bakaJehova babuthana ndawonye lokha ilanga naliyozi phosa kunina. Soke silalela ikulumo ekhuluma ngokuqakatheka kwesihlengo. Sibhina iingoma ezimbili, sidlulise iimfanekiselo bese sithi “amen” ngokusuka ehliziyweni emthandazweni emine eyenziwako. Ngama-iri ama-24, woke amabandla enza okufanako. Ungacabanga ngethabo uJehova noJesu ababa nalo nabasibona soke sibumbene ngomqopho wokubadumisa ngendlela le.

4. Sizokucoca ngani esihlokwenesi?

⁴ Esihlokwenesi, sizokucoca ngemibuzo le: Singazilungiselela njani iinhliziyo zethu malungana nesiKhumbuzo? Singabasiza njani abanye bazuze kiso? Singabasiza njani laba abalise ukuza esifundweni? Iimpendulo zemibuzo le, zizosisiza silungiselele isenzakalo esikhethekilekwesi.

SINGAZILUNGISELELA NJANI IINHLIZIYO ZETHU MALUNGANA NESIKHUMBUZO?

5. (a) Kubayini kufuze sicabangisise ngokuqakatheka kwesihlengo? (IRhubo 49:​7, 8) (b) Ufundeni evidiyweni ethi, Kubayini UJesu Afa?

⁵ Enye yeendlela eziqakathekileko zokulungiselela iinhliziyo zethu malungana nesiKhumbuzo, kucabangisisa ngokuqakatheka kwesihlengo sakaJesu Krestu. Thina ngokwethu angekhe sakghona ukuzihlenga esonweni nekufeni. (Funda iRhubo 49:​7, 8; bukela nevidiyo ethi, Kubayini UJesu Afa?) a Yeke, uJehova wahlela bona uJesu anikele ngokuphila kwakhe ukusindisa thina. (Rom. 6:23) Nasilokhu sicabangisisa ngalokho uJehova noJesu abasenzele khona, sizokuthokoza khulu ngesihlengo. Sizokucoca ngezinto ezimbalwa ezibudisi khulu uJehova noJesu abazidelileko ngebanga lesihlengo. Kokuthoma, siyini isihlengo?

6. Siyini isihlengo?

⁶ Isihlengo linani elibhadelwako ukuthenga into elahlekileko. Umuntu wokuthoma owadalwako, u-Adamu, bekanganasono. Nakonako, akhenge azilahlekisele yena kwaphela ithuba lokuphila ngokungapheliko kodwana nabo boke abantwabakhe. Bona kuthengwe lokhu okwalahlwa ngu-Adamu, uJesu wanikela ngokuphila kwakhe kwaba sihlengo. UJesu nakasephasini, “akhenge enze isono namkha kufumaneke ukukhohlisa emlonyenakhe.” (1 Pit. 2:22) UJesu nakahlongakalako, bekanganasono njengo-Adamu ngaphambi kokobana one, yeke ngokunikela ngokuphila kwakhe, uJesu bekabhadela inanelo.—1 Kor. 15:45; 1 Thim. 2:6.

7. Ngiziphi iintjhijilo uJesu aqalana nazo nakasephasini?

⁷ UJesu nakasephasini, walalela uYise wezulwini nanyana aqalana neentjhijilo ezinengi. Nakasese mntwana, uJesu walalela ababelethi bakhe abanesono nanyana yena bekanganaso. (Luk. 2:51) Nakasese mumuntu omutjha, kwatlhogeka ajamelane negandelelo lokungalaleli namkha ukungathembeki. Nasele amdala, kwafuze ajamelane neenlingo zakaSathana, kuhlanganise nokulinga ukuthi uJesu uthembeke kangangani kuJehova. (Mat. 4:​1-11) USathana bekazimisele ukwenza uJesu one ukwenzela bona angakghoni ukubhadela isihlengo.

8. Ngiziphi ezinye iintjhijilo uJesu aqalana nazo?

⁸ Nakatjhumayelako ephasini, uJesu wakghodlhelelela ezinye iintjhijilo. Amanabakhe amhlunguphaza bewalinga nokumbulala. (Luk. 4:​28, 29; 13:31) Bekufuze akghodlhelelele imitjhapho yabalandeli bakhe. (Mar. 9:​33, 34) Nakagwetjwako, kwahlekiswa ngaye bewahlunguphazwa. Wabulawa ngendlela ebuhlungu nehlazisako. (Heb. 12:​1-3) Kwafuze akghodlhelele ingcenye yamaswaphela yokulingwa  kwakhe ngaphandle kwesivikelo sakaJehova. b—Mat. 27:46.

9. Sizizwa njani ngomhlatjelo kaJesu? (1 Pitrosi 1:8)

⁹ Yeke, lokhu kusenza sibone kuhle ukuthi uJesu watlhaga khulu bona sifumane isihlengo. Nasicabanga ngakho koke uJesu akudelileko bona sifumane isihlengo, lokho kwenza simthande khulu.—Funda yoku-1 kaPitrosi 1:8.

10. UJehova udele ini ngebanga lesihlengo?

¹⁰ Kuthiwani ngoJehova? Khuyini ebekazimisele ukuyidela ngokuzithandela ukwenzela bona uJesu abhadele isihlengo? UJehova noJesu batjhidelene khulu njengobaba nendodana. (IzA. 8:30) Akhucabange ukuthi uJehova wazizwa njani nakabona uJesu akghodlhelelela iintjhijilo ezinengi kangaka. Siyaqiniseka ukuthi uJehova wezwa ubuhlungu khulu nakabona indodanakhe iphathwa kumbi, abantu bangayifuni begodu ilingwa.

11. Sebenzisa isibonelo esitjengisa indlela ekungenzeka uJehova wazizwa ngayo nakabulawa uJesu.

¹¹ Nanyana ngimuphi umbelethi okhe wahlongalelwa mntwana, uyazi ukuthi kubuhlungu kangangani lokho. Sikholelwa ngokuqinileko ekuvusweni kwabafileko kodwana lokho akususi ubuhlungu esibuzwako bokuhlongakalelwa mumuntu esimthandako. Isibonelwesi sisiza sizwisise kuhle indlela uJehova ekungenzeka wazizwa ngayo nakabona iNdodanakhe ayithandako izwa ubuhlungu begodu ihlongakala ngesilimela saka-33 C.E. c—Mat. 3:17.

12. Khuyini esingayenza nasele kutjhidele isiKhumbuzo?

¹² Kusukela nje bekube siKhumbuzo, kubayini ungenzi isifundo somuntu mathupha namkha ukulotjha komndeni okukhuluma ngesihlengo? Sebenzisa Ithulusi Lokurhubhulula LaboFakazi BakaJehova (nange likhona ngelimi lakho) namkha usebenzise ezinye iinsetjenziswa zokufunda iBhayibheli bona ufumane imininingwana engeneleleko ngesihlokwesi. d Yenza nesiqinisekiso sokobana ulandela ihlelo lokufundwa kweBhayibheli kwesiKhumbuzo elifumaneka encwadini ethi, Ipilo Nomsebenzi WobuKrestu—Ihlelo Lomhlangano Webandla. Ngelanga lesiKhumbuzo, ungakhohlwa ukubukela ihlelo elikhethekileko lokuLotjha kweKuseni. Nasilungiselela iinhliziyo zethu malungana nesiKhumbuzo, sizokuba sebujamweni  obuhle bokusiza nabanye ukuthi bazuze.—Ezr. 7:10.

SIZA ABANYE BAZUZE

13. Ngiliphi igadango lokuthoma lokusiza abanye bazuze esiKhumbuzweni?

¹³ Singabasiza njani abanye bazuze esiKhumbuzweni? Igadango lokuthoma kubamema. Ukungezelela ebantwini esibatjhumayezako qobe, singenza irhelo labanye abantu esifuna ukubamema. Lingahlanganisa iinhlobo zethu, esisebenza nabo, esifunda nabo nabanye. Nanyana singanawo amakhophi aneleko wesimemo esigadangisiweko, singabathumelela i-link enesimemo. Kwazi bani ukuthi bangaba bangakhi abazokuza!—UMtj. 11:6.

14. Fanekisa indlela isimemo esingathinta ngayo abanye.

¹⁴ Nawumema umuntu, ungakuthathi kancani lokho ngombana mhlambe angakuthabela ukuza esiKhumbuzweni. Ngelinye ilanga, udadwethu onendoda engasuye uFakazi warareka khulu indodakhe nayimtjela ukuthi izokukhamba naye esiKhumbuzweni. Kubayini bekararekile? Ngombana besele ayimeme kanengi ngaphambilini kodwana ingavumi. Bekuyini umehluko nje? Indodakhe yathi, “Ngifumene isimemo,” yabe yamhlathululela ukuthi isinikelwe mdala webandla ebeyijayelene naye. Indodakhe yaya esiKhumbuzweni somnyaka loyo neseminyaka elandelako.

15. Khuyini esifuna ukuhlala siyikhumbula nasimemela abantu esiKhumbuzweni?

¹⁵ Khumbula ukuthi labo esibamemako bangaba nemibuzo—khulukhulu nangabe bayathoma ukuza emhlanganwenethu. Singacabanga ngemibuzo ekungenzeka bayibuze bese silungiselela iimpendulo zakhona. (Kol. 4:6) Ngokwesibonelo, abanye bangazibuza: ‘Khuyini ezokwenzeka esenzakalwenesi?’ ‘Sizokuthatha isikhathi esingangani?’ ‘Kumbathwa njani?’ ‘Kghani kukhitjhwa imali yokungena?’ ‘Kghani kuthathwa iminikelo?’ Nasimema umuntu ukuthi eze esiKhumbuzweni, singambuza ukuthi, “Kghani kukhona imibuzo onayo?” bese siphendula imibuzo angaba  nayo. Singasebenzisa nevidiyo ethi, Khumbula Ukufa KwakaJesu nethi Kwenzekani EWolweni LomBuso? ukusiza abantu babone ukuthi imihlanganwethu iragwa njani. Esifundweni 28 sencwadi ethi, Thabela Ukuphila Ngokungapheliko kunamaphuzu amahle esingakhuluma ngawo.

16. Ngimiphi eminye imibuzo labo abeza esiKhumbuzweni abangaba nayo?

¹⁶ Ngemva kokuthi beze esiKhumbuzweni, abantu abanekareko kungenzeka babe nemibuzo engeziweko. Nangabe bakhona abadle iimfanekiselo, kubayini bambalwa? Nange kungekho namunye odlileko, kubayini? Bangabuza nokuthi isiKhumbuzo sisibamba kangakhi. Bangafuna nokwazi ukuthi kghani yoke imihlangano yaboFakazi bakaJehova ibanjwa ngendlela efanako. Ngitjho nanyana ikulumo yesiKhumbuzo ikhuluma ngawo amaphuzo la, kungenzeka batlhoge ukuhlathululelwa ngokungeziweko. Isihloko esiku-jw.org esithi, “Kungani OFakazi BakaJehova Begcina ISidlo SeNkosi Sakusihlwa Ngendlela Ehlukile Kweyezinye Izinkolo?” singasisiza siphendule eminye imibuzo abanayo. Sifuna ukwenza koke esingakwenza—ngaphambi, hlangana nangemva kwesiKhumbuzo—ukusiza labo “abazimisele ukufumana ukuphila okungapheliko” bona bazuze esiKhumbuzweni.—IzE. 13:48.

SIZA LABO ABANGASEZI ESIFUNDWENI

17. Abadala bangabasiza njani labo abangasezi esifundweni? (Hezekiyeli 34:​12, 16)

¹⁷ Ngesikhathi sesiKhumbuzo, abadala bangabasiza njani abangasezi esifundweni? Batjengiseni ukuthi niyabathanda. (Funda uHezekiyeli 34:​12, 16.) Ngaphambi kwesiKhumbuzo, qinisekani ukuthi nivakatjhela abanengi ngendlela eningakghona ngayo. Baqinisekiseni ukuthi niyabathanda nokuthi nifisa ukubasiza ngendlela eningakghona ngayo. Bamemeni ukuthi beze esiKhumbuzeni. Nabezako, bamukeleni ngethando. Ngemva kwesiKhumbuzo, hlalani nikhuluma nabo benibasize ngendlela eningakghona ngayo bona babuyele kuJehova.—1 Pit. 2:25.

18. Soke singabasiza njani labo abangasezi esifundweni? (Roma 12:10)

 ¹⁸ Boke ebandleni bangasiza labo abangasezi esifundweni ukuthi babe khona esiKhumbuzweni. Njani? Ngokuthi babaphathe ngethando, ngomusa nangehlonipho. (Funda kwebeRoma 12:10.) Ukhumbule ukuthi izimvu ezithandekakwezi kungenzeka bezilokhu zizaza ukuza esifundweni. Kungenzeka bezisaba ukuthi angekhe zamukelwe kuhle. e Yeke, balekela ukubabuza imibuzo ehlazisako namkha engabazwisa ubuhlungu. (1 Thes. 5:11) Kufuze sikhumbule ukuthi bafowethu nabodwethu. Siyakuthabela ukulotjha nabo uJehova godu!—Rhu. 119:176; IzE. 20:35.

19. Ngiziphi iimbusiso ezilethwa kukhumbula ukufa kwakaJesu?

¹⁹ Siyathokoza ukuthi uJesu wathi sikhumbule ukufa kwakhe qobe mnyaka begodu siyabona ukuthi kubayini kuqakathekile. Nasiya esiKhumbuzweni, sizizuzisa thina besizuzise nabanye. (Isa. 48:​17, 18) Ithando lethu ngoJehova noJesu liyakhula. Sitjengisa ukuthi sithokoza kangangani ngalokhu abasenzele khona. Siqinisa ubungani bethu nabafowethu nabodadwethu. Singasiza nabanye bafunde ukuthi bangazithabela njani iimbusiso esizifumana ngebanga lesihlengo. Yeke, asenzeni koke esingakwenza ukulungela isiKhumbuzo somnyaka lo—ilanga eliqakatheke khulu emnyakeni!