1. Ndaŵa yanji siku ya Cikumbuso ni siku yofunika ngako ya pa caka? (Luka 22:​19, 20)

 KWA ATUMIKI a Yehova, siku yokumbukila imfwa ya Yesu ni siku yofunika ngako ya pa caka. Uyu niye tyala mwambo wamene Yesu euzhya ophunzila ŵake kuti akocita. (Ŵelengani Luka 22:​19, 20.) Tili na vifukwa vosiyanasiyana vutipangisha kuyembekezela mwacidwi siku ya Cikumbuso. Lomba, tiyeni tilaŵizhyane viyakine mwa vifukwa ivi.

2. Kansi viyakine mwa vifukwa vutipangisha kuyembekezela mwacidwi siku ya Cikumbuso ni votyani?

² Cikumbuso cutiyavya kusinkhasinkha pa kufunika kwa nsembe ya dipo na madaliso yati tikapeze cifukwa ca nsembe iyi. Cutikumbusha za njila zatingaoneshelemo kuti tuyamikila nsembe ya dipo. (2 Akor. 5:​14, 15) Ndipo cutipasa soti mwai ‘wolimbikishana’ na akwasu na azilongosi. (Aro. 1:12) Caka ciliconse, akwasu na azilongosi amene efooka opezeka pa Cikumbuso. Ayakine owelela kwa Yehova akaona mwatuŵalandilila mwacikondi. Ndipo ŵanthu anyinji amene osangalala na zakuona koma soti zaakumvwa pa cocitika ici, osonkhezelewa kuyamba kuphunzila Baibo. Tetyo, niye cifukwa cake siku ya Cikumbuso ni yofunika ngako kuli seo.

3. Kansi Cikumbuso cutigwilizanisha tyani monga akwasu na azilongosi pacalo conse? (Onani soti cithunzithunzi.)

³ Tuyembekezela soti mwacidwi siku ya Cikumbuso cifukwa tuziŵa kuti pa siku iyi, tukatizhyana na akwasu na azilongosi pacalo conse. Mboni za Yehova pacalo conse, zukumana pamozi zuŵa payuloŵa. Tonse tumvwishila ku nkhani yamene yugogomezela pa kufunika kwa dipo. Tuimba nyimbo ziŵili zacitamando, tupitishamo mkate na vinyu ndipo mofumila pansi pa mtima, tulaŵila kuti “ame” ku mapemphelo okwanila 4  opelekewa. M’maawazi tyala 24 n’kuti mipingo yonse yacita cimozimozi. Ganizilani tyala mwakumvwila Yehova na Yesu kuona kuti capamozi, tuŵalemekeza mwa njila iyi.

4. Kansi tilaŵizhyane cinji m’nkhani ino?

⁴ M’nkhani ino, tilaŵizhyane makonsho aŵa: Kansi tingakonzekeleshe tyani mtima wasu cifukwa ca Cikumbuso? Kansi tingayavye tyani ayakine kupindula na cocitika ici? Ndipo tingayavye tyani akwasu na azilongosi amene efooka? Mayankho a makonsho aŵa atiyavye kukonzekela cocitika ici camene ni cofunika ngako.

KANSI TINGAKONZEKELESHE TYANI MTIMA WASU CIFUKWA CA CIKUMBUSO?

5. (a) Ndaŵa yanji tufunika kusinkhasinkha pa nsembe ya dipo? (Salimo 49:​7, 8) (b) Kansi mwephunzilanji kufumila mu vidyo yakuti Ndaŵa Yanji Yesu Ecifwa?

⁵ Imozi mwa njila zofunika ngako zatingakonzekeleshemo mtima wasu cifukwa ca Cikumbuso, ni mwa kusinkhasinkha pa kufunika kwa nsembe ya dipo ya Yesu Khristu. Pa seo seka, sembe tiliyokwanishe kuziombola ku ucimo na imfwa. (Ŵelengani Salimo 49:​7, 8; onani soti vidyo yakuti Ndaŵa Yanji Yesu Ecifwa?) a Tetyo, Yehova epanga makonzedwe akuti Yesu apeleke moyo wake monga dipo kuti atiombole. Onse aŵili, Yehova na Yesu eonesha kuzitana kukulu ngako. (Aro. 6:23) Kusinkhasinkha pa zeciticitila Yehova na Yesu kutiyavya kuti tikoyamikila nsembe ya dipo. Lomba, tilaŵizhyane vinthu vitontho vovuta vamene Yehova na Yesu enze okonzeka kuticitila. Koma coyamba, kansi dipo yenzoyangizhyilapo cinji?

6. Kansi dipo yeyangizhyilapo cinji?

⁶ Dipo ni malipilo opelekewa pofuna kuombola cinthu ciyakine. Munthu woyamba Adamu, enze wangwilo pecilengewa. Koma pecicimwa, etaya mwai wonkhala na moyo wosasila osati tyala wake yeka, koma na wa ŵana ŵake onse. Pofuna kuombola zecitaya Adamu, Yesu epeleka moyo wake wangwilo monga dipo. Pa nthawi yonse yeenze pacalo, Yesu “aliyocite cimo, ndipo mkamwa mwake muliyopezeke cinyengo.” (1 Pet. 2:22) Yesu pecifwa, enze wangwilo monga ni mweenzele Adamu akaliyocimwa. Tetyo, mwa kupeleka moyo wake, Yesu ekwanisha kulipila moyo wecitaya Adamu.—1 Akor. 15:45; 1 Tim. 2:6.

7. Kansi ni mayeselo ayakine otyani yecikumana nayo Yesu peenze pacalo?

⁷ Yesu epitilizhya kunkhala wokhulupilika kuli Ausuwake akululu mosasamala kanthu za mavuto yecikumana nayo peenze pacalo. Yove enze wangwilo koma makolo ŵake enzeve ungwilo. Olo n’tetyo, enzoŵamvwila. (Luka 2:51) Monga wacilumbwana, enzofunika kucita zonse zaangakwanishe kuti apitilizhye kunkhala womvwila koma soti wokhulupilika. Ndipo pecikula, enzofunika kugonjesa mayeselo ofumila kuli Satana Maleŵania wamene enzomuyesa kuti aleke kunkhala wokhulupilika kwa Mulungu. (Mat. 4:​1-11) Satana enze wosimikizhya kucitisha kuti Yesu acimwe na colinga cakuti asakwanishe kupeleka dipo.

8. Kansi ni mayeselo ayakine otyani yecipilila Yesu?

⁸ Peenzocita utumiki wake pacalo, Yesu ekumana soti na mayeselo ayakine. Mwacisanzo, adani ŵake enzomunzunza ndipo eyesa kumupaya. (Luka 4:​28, 29; 13:31) Ndipo enzofunika kupilila kusoŵa ungwilo kwa ophunzila ŵake. (Mko. 9:​33, 34) Pa usiku wakuti mailo apaiwe, yove enzunziwa nonyozewa. Pavuli pake, epacikiwa pa cimuti monga ni nyankapondo ndipo ecimvwa kuŵaŵa ngako. (Aheb. 12:​1-3) Kuyangizhyila apo, esilizhya mbali yosilizhyila ya moyo wake pa yove yeka, paliye citetezo ca Yehova. b—Mat. 27:46.

9. Kansi tukumvwa tyani tikaganizila nsembe ya Yesu? (1 Petulo 1:8)

 ⁹ N’zoonekelatu kuti Yesu evutika ngako kuti apeleke dipo. Tikaganizila zinthu zonse zecicita Yesu kuti apeleke dipo, zutisonkhezela kumukonda.—Ŵelengani 1 Petulo 1:8.

10. Kansi Yehova enze wokonzeka kuzitana cinji na colinga cakuti dipo ipelekewe?

¹⁰ Nanga tyani Yehova? Kansi enze wokonzeka kuzitana cinji kuti Yesu apeleke dipo? Yehova na Yesu ali pa ushamwali wotang’a ngako monga ni wamene unkhala pakati pa atata na mwana. (Miy. 8:30) Ganizilani tyala mwecimvwila Yehova kuona kuti Yesu opilila mayeselo anyinji peenze pacalo. Mosakaikila, cemuŵaŵa ngako kuona Mwana wake onzunziwa, okaniwa noyesewa.

11. Fotokozani cisanzo coonesha mwecimvwila Yehova peciona Yesu opaiwa.

¹¹ Kolo iliyonse yamene yetaikiliwapo mwana wake mu imfwa, yuziŵa bwino cisoni cunkhalapo ngati munthu wataikiliwa mwana. N’cendi kuti tili na ciyembekezo ca ciukililo, koma izi zusilizhya lini cisoni catunkhala naco ngati tataikiliwa wokondeka wasu mu imfwa. Cisanzo ici cutiyavya kumvwisha mwecimvwila Yehova kuona Mwana wake ovutika na kufwa mu 33 C.E. c—Mat. 3:17.

12. Kansi tufunika kucita cinji m’mawiki akuti Cikumbuso casala patontho?

¹² Kuyambila lomba mpaka pa nthawi ya Cikumbuso, yesani kuphunzila zinyinji zokhuza dipo pamucita phunzilo ya pamweka na pa kulambila kwa pa banja. Mungaseŵenzeshe Buku Lofufuzila Nkhani la Mboni za Yehova (ngati ilimo m’cilaŵilo canu) olo zofalisa ziyakine na colinga cakuti muimvwishe bwino nkhani iyi. d Kuyangizhiyila apo, nkhalani osimikizhya kukonkha ndandanda yoŵelenga Baibo ya pa nthawi ya Cikumbuso yamene yupezeka mu Kabuku ka Msonkhano wa Umoyo na Utumiki. Ndipo pa siku ya Cikumbuso, osati mukaluŵe kuonelela pulogilamu yapadela ya Kulambila Kwa m’Mawa. Ngati tukonzekelesha mtima wasu cifukwa ca Cikumbuso, tinkhale pa malo abwino oyavyako ayakine kuti nao akapindule na cocitika ici.—Eza. 7:10.

YAVYANI AYAKINE KUTI AKAPINDULE

13. Kansi ni cinthu coyamba cotyani catufunika kucita kuti tiyavye ŵanthu kupindula na Cikumbuso?

¹³ Kansi tingayavye tyani ayakine kupindula  na Cikumbuso? Cinthu coyamba catufunika kucita ni kuŵaitila kuti akapezekepo. Kuyangizhyila pa kuitila ŵanthu ŵatukumana nao nthawi zonse mu utumiki, tingaitile soti ŵanthu ŵatuziŵa kale. Izi zuyangizhyilapo abanja ŵasu, ŵatuseŵenza nao, ŵatuphunzila nao na ayakine. Olo kuti tingankhale lini na tumapepa tokwanila topulintiwa twaciitano, tingaŵatumizhyile linki pa cipangizo calomba. Payakine tingadabwe kuona kuti anyinji apezekapo.—Mla. 11:6.

14. Fotokozani cisanzo coonesha kuti ngati tapasa munthu kapepa kaciitano, zingamusonkhezele kuti akapezekepo.

¹⁴ Ngati tapasa munthu kapepa ka ciitano, payakine angasonkhezelewe kuti akapezekepo pa Cikumbuso. Siku iyakine, kalongosi muyakine wamene mulume wake ni Mboni lini, edabwa ngako pamene mulume wake emuuzhya kuti akapezekepo pa Cikumbuso. Ndaŵa yanji edabwa? N’cifukwa cakuti nthawi zinyinji kuvuli, kalongosi uyu enzokonda kumuitila kuti akapezekepo, koma yove enzopezekapo lini. Kansi n’cinji cemusonkhezela kuti akapezekepo pa nthawi iyi? Elaŵila kuti mkulu muyakine weenzoziŵana naye, emupasa kapepa kaciitano. Munalume uyu epezeka pa Cikumbuso caka ici koma soti vyaka viyakine vinyinji vokonkhapo.

15. Kansi tufunika kukumbukila cinji patuitila ŵanthu ku Cikumbuso?

¹⁵ Tufunika kukumbukila kuti ŵanthu ŵatingaitile ku Cikumbuso, angankhale na makonsho makamaka ngati akaliyopezekapo pa imozi mwa misonkhano yasu. Tetyo, tingacite bwino kuganizila makonsho yaangatikonshe nokonzekela mwatingayankhile. (Akol. 4:6) Mwacisanzo, payakine angozikonsha kuti: ‘Kansi n’cinji cati cikacitike pa cocitika ici?’ ‘Kansi cikatole nthawi itali tyani?’ ‘Kansi nufunika kuvwala vovwala votyani?’ ‘Kansi nikafunike kulipila ndalama?’ ‘Kansi pakankhale kupitishamo mbale?’ Patuitila munthu ku Cikumbuso, tingacite bwino kumukonsha kuti, “Kansi muli na makonsho alionse?” Ndipo ngati alipo, tufunika kuyankha makonsho ŵake onse. Tingaseŵenzeshe soti mavidyo akuti Kumbukilani Imfwa ya Yesu na yakuti Kansi n’Cinji Cucitika ku Ng’anda ya Ufumu? kuti tiyavye munthu kumvwisha  mwayucitikila misonkhano yasu. Ndipo phunzilo 28 mu buku ya Sangalalani na Moyo Kosasila! ili na mfundo zabwino zatingalaŵizhyane na ŵanthu.

16. Kansi ŵala amene angapezekepo pa Cikumbuso, angafune soti kuziŵa cinji?

¹⁶ Pavuli pa Cikumbuso, ŵanthu acidwi angankhale na makonsho oyangizhyilika. Payakine angafune kuziŵa cifukwa cake ni ŵanthu tyala atontho, (ngati alipo) amene alya na kumwa viphiphiliso. Angafune soti kuziŵa kuti tucita kangani Cikumbuso. Ndipo payakine angafune kuziŵa ngati misonkhano yonse ya Mboni za Yehova yucitika cimozimozi. Olo kuti zinyinji mwa mfundo izi zufotokozewa m’nkhani ya Cikumbuso, ŵanthu acidwi angafunike soti kuŵafotokozela momvwika bwino. Nkhani ya pa jw.org ya m’Chichewa ya mutu wakuti “N’chifukwa Chiyani a Mboni za Yehova Mumachita Mwambo wa Mgonero wa Ambuye Mosiyana ndi Zipembedzo Zina?” ingatiyavye kuyankha ayakine mwa makonsho ŵao. Tufunika kucita zonse zatingakwanishe siku ya Cikumbuso ikaliyofwika, pa siku ya Cikumbuso koma soti pavuli pa Cikumbuso kuti tiyavye ŵanthu a “maganizo abwino” kupindula na cocitika ici.—Mac. 13:48.

YAVYANI AKWASU NA AZILONGOSI AMENE EFOOKA

17. Kansi akulu angayavye tyani akwasu na azilongosi amene efooka? (Ezekieli 34:​12, 16)

¹⁷ Pa nyengo ya Cikumbuso, kansi akulu angayavye tyani akwasu na azilongosi amene efooka? Njila imozi ni mwa kuonesha kuti osamala za ove. (Ŵelengani Ezekieli 34:​12, 16.) Siku ya Cikumbuso ikaliyofwika, mungacite bwino kuitila akwasu na azilongosi anyinji amene efooka. Mukoŵasimikizhyila kuti musamala za ove na kuti mufunishisha kuŵayavya mwamungakwanishile. Tetyo, mukaŵaitile kuti akapezekepo pa Cikumbuso ndipo ngati akawele, mukaŵalandile mwacikondi. Pavuli pa Cikumbuso, mukapitilizhye kuonana na akwasu na azilongosi noŵapasa thandizo yauzimu yaangafunikile kuti awelele kwa Yehova.—1 Pet. 2:25.

18. Kansi tonse tingayavye tyani akwasu na azilongosi amene efooka? (Aroma 12:10)

¹⁸ Tonse mumpingo, tingayavye akwasu na  azilongosi amene efooka kuti akapezekepo pa Cikumbuso. Motyani? Mwa kucita nao zinthu mwacikondi, mwacifundo koma soti mwaulemu. (Ŵelengani Aroma 12:10.) Tufunika kukumbukila kuti payakine cenze covuta kwa akwasu na azilongosi aŵa kuti apezekepo pa Cikumbuso. Payakine enzocita wowa poganiza kuti alandiliwe lini bwino. e Tetyo, tufunika kupewa kucita zinthu zamene zingaŵacitishe nsoni olo kulaŵila mau amene angaŵakhumudwishe. (1 Ates. 5:11) Akwasu na azilongosi aŵa ni okhulupilila ayasu. Ndipo tusangalala kulambila soti nao Yehova pamozi.—Sal. 119:176; Mac. 20:35.

19. Kansi tupindula tyani cifukwa cokumbukila imfwa ya Yesu?

¹⁹ Tuyamikila ngako kuti Yesu etiuzhya kuti tikokumbukila imfwa yake caka ciliconse ndipo tumvwisha cifukwa cake kucita izi n’kofunika. Tikapezeka pa Cikumbuso, tuzipindulisha seka koma soti ayakine m’njila zinyinji. (Yes. 48:​17, 18) Mwacisanzo, cikondi casu pa Yehova na Yesu cukula. Tuonesha kuti tuyamikila pa zeciticitila. Tutang’isha ushamwali wasu na okhulupilila ayasu. Ndipo payakine tingayavye ayakine kuziŵa zaangacite kuti akopindula na madaliso yamene yokwanishika cifukwa ca dipo. Lekani kuti ticite zonse zatingakwanishe kuti tikonzekele Cikumbuso ca caka cino, camene ni siku yofunika ngako ya pa caka.