1. Thangwe ranyi ntsiku ya Cikumbuso ni ntsiku yakufunika kwene-kwene ya pa gole? (Luka 22:19, 20)

 KWA WANTHU wa Yahova, ntsiku ya Cikumbuso njakufunika kwene-kwene pa gole. Ni msinda umweyu okha omwe Jezu adauza ateweri wace mwakubveka bwino kuti ambaucite. (Werengani Luka 22:19, 20.) Pana mathangwe mazinji yomwe yambaticitisa kudikhirira na mtima wentse ntsiku imweyi. Mbatiwoneni mathangwe manango.

2. Kodi ni mathangwe yaponi yomwe yambaticitisa kuti tidikhirire mwakukondwa ntsiku ya Cikumbuso?

² Cikumbuso cimbatithandiza kuwona kufunika kwa cakulombolera na bzisimbo bzomwe bzimbabwera thangwe ra cakulomboleraco. Bzimwebzi bzimbatikumbusa momwe tingalatizire mu njira zakusiyana-siyana kuti timbatenda ntsembe yomwe Jezu adaipereka. (2 Akolinto 5:14, 15) Ndipo Cikumbusoco cimbatipasambo mwayi wakuti ‘tilimbikisane’ na abale na mpfumakazi zathu. (Aroma 1:12) Abale na mpfumakazi azinji omwe adasiya kutsonkhana an’dzagumanikambo pa Cikumbuso. Thangwe ra lufoyi lomwe ambalatizidwa pa Cikumbuso, azinji ambabwerera kwa Yahova. Ndipo wanthu azinji ambadabwa na bzomwe ambawona, kubva, ndipo ambafunisisa kupfunza Bibliya. Bzentsenebzi bzimbacitisa kuti Cikumbuso cikhale cakufunika kwene-kwene kwa ifepano!

3. Kodi Cikumbuso cimbacitisa tani kuti abale pa dziko lentse akhale wakuphatana? (Onani cithunzi-thunzi.)

³ Tikufunisisambo kudzagumanika pa ntsiku imweyi thangwe tikudziwa kuti pa Cikumbuso timbakhala wakuphatana na abale na mpfumakazi zathu pa dziko lentse. Mboni za Yahova zimbatsonkhana dzuwa likamira pa dziko lentse la pantsi. Tentsenefe timbatetekera nkhani yomwe imbafotokoza mwakubveka bwino  kufunika kwa cakulombolera. Timbaimba nyimbo ziwiri zakutumbiza, timbafambisa bzizindikiro, bzomwe ni pau na vinyu, ndipo timbalewa “ameni” na mtima wentse m’mipembo minai yomwe imbacitidwa. Pa ntsiku imweyi, pa dziko lentse la pantsi, magwere yentse yan’dzakhala yakucita bzimwebzi. Kodi mukukwanisa kuwona momwe Yahova na Jezu ambakhalira wakukondwa akawona tentsenefe pa dziko lentse la pantsi tikuwatumbiza mwakuphatana mwa njira imweyi?

4. Kodi tin’cezerana ciyani mu nkhani ino?

⁴ Mu nkhani ino, tin’cezerana mibvunzo iyi: Kodi tingakonzekere tani mtima wathu pomwe ntsiku ya Cikumbuso ikufendera? Kodi tingathandize tani wanthu winango kuti agumane phindu na Cikumbusoco? Ndipo kodi tingathandize tani abale wathu omwe adasiya kutsonkhana? Mitawiro ya mibvunzo imweyi in’tithandiza kuti tikhale wakukonzeka pomwe ntsiku yakufunika kwene-kweneyi ikufendera.

KODI N’CIYANI COMWE TINGACITE KUTI TILATIZE KUTI TIMBATENDA CIKUMBUSO?

5. (a) Thangwe ranyi tin’funika kukumbukira bza kufunika kwa cakulombolera? (Salimo 49:7, 8) (b) Kodi imwepo mwapfunza ciyani na vidiyo yakuti Thangwe Ranyi Jezu Adafa?

⁵ Njira ibodzi yakufunika kwene-kwene ya momwe tingakonzekerere Cikumbuso ndiyo kukumbukira kufunika kwa ntsembe ya cakulombolera ya Jezu Kristu. Palibe bzomwe ifepano tingadacita kuti tibzipulumuse ku pikado na infa. (Werengani Salimo 49:7, 8; ndipo onani vidiyo yakuti Thangwe Ranyi Jezu Adafa?) a Ndipopa Yahova adacita makonzedwe yakuti Mwana wace apereke moyo wace kuti atipulumuse. Tingalewe kuti Yahova na Jezu adacita cinthu cakufunika kwene-kwene. (Aroma 6:23) Tikambakumbukira bzomwe Yahova na Jezu adaticitira, ifepano tin’dzapitiriza kutenda ntsembe ya cakulombolera. Bwerani tiwone kuti thangwe ranyi cimweci cikhali cinthu cakunesa kwene-kwene comwe Yahova na Jezu akhafunika kuticitira. Tsono cakuyamba, bwerani tiwone kuti cakulomboleraco n’ciyani maka-maka.

6. Kodi cakulombolera n’ciyani?

⁶ Cakulombolera ni cinthu comwe munthu angapereke pa kupagali cinthu cinango comwe cikhadagulisidwa kale. Mwamuna wakuyamba, Adamu, akhali wakulungamiratu pomwe adalengedwa. Pomwe iye adacita pikado, adaluza mwayi wakuti akhale na moyo wakusaya kumala ndipo adacitisambo kuti wana wace wentse aluzembo mwayi umweyu. Kuti Jezu agule pomwe bzomwe Adamu adaluza, iye adapereka moyo wace ninga ntsembe. Pomwe Jezu akhali pa dziko la pantsi pano, iye “alibe kucita pikado ndipo pamulomo pace palibe kucoka mafala yakunama.” (1 Pedru 2:22) Pomwe Jezu adafa, iye akhali wakulungamiratu ninga momwe Adamu akhaliri pomwe akhanati kucita pikado. Na tenepo, pakupereka moyo wace, Jezu adapagali moyo omwe Adamu adaluza. — 1 Akolinto 15:45; 1 Timotio 2:6.

7. Kodi ni mabvuto yaponi yomwe Jezu adagumana nayo pomwe akhali pa dziko la pantsi?

⁷ Pomwe Jezu akhali pa dziko la pantsi pano, iye akhabvera Yahova pa bzentse napo kuti nthawe zinango bzikhali bzakunesa. Napo kuti Jezu akhali mwana wakulungamiratu ndipo abereki wace akhali wakuperewera, iye nthawe zentse akhambawabvera. (Luka 2:51) Pomwe akhali tswaka, iye adapirira pomwe anzace akhambamungingimiza kuti aleke kukhala mwana wakubvera abereki wace ayai aleke kukhala wakukhulupirika kwa Yahova. Ndipo pomwe Jezu adakula, iye adafunikira kupirira mayezo ya Sathani, pomwe Sathaniyo akhafuna kuti iye aleke kubvera ndipo adacita kumuuziratu kuti aleke kukhala wakukhulupirika kwa Mulungu. (Mateu 4:1-11) Sathani akhafunisisa kucitisa Jezu kuti aleke kukhala wakubvera kuti atazire kupereka cakulombolera kuti apulumuse wanthu.

8. Kodi ni mabvuto yanango yaponi yomwe Jezu adagumana nayo?

⁸ Pomwe Jezu akhacita utumiki bwace pa dziko la pantsi, iye adagumana pomwe na mabvuto  manango. Anyamadulanthaka wace akhamutewera m’mbuyo ndipo akhafuna kumupha. (Luka 4:28, 29; 13:31) Iye adapirira bzakuphonya bza ateweri wace. (Marko 9:33, 34) Pomwe iye akhatongedwa mulandu napo kuti alibe kuphonya cinthu, adazunzidwa na kunyozedwa. Iye adabva kuwawa kwene-kwene pomwe adaphedwa ninga mbava. (Ahebereu 12:1-3) Iye akhafunikira kupirira mbali yakumalizira ya kuyezedwa kwace mwakusaya kuthandizidwa na Yahova. b — Mateu 27:46.

9. Kodi timbabva tani tikakumbukira bzomwe Jezu adaticitira? (1 Pedru 1:8)

⁹ Bzikuwonekeratu padeca kuti Jezu adabonera kwene-kwene kuti akwanise kupereka cakulombolera. Tikambakumbukira mabvuto yakusiyana-siyana yomwe Jezu adabvuma kugumana nayo kuti atilombole timbamufuna kwene-kwene. — Werengani 1 Pedru 1:8.

10. Kodi cakulombolera cidacitisa kuti Yahova abve tani?

¹⁰ Kodi n’ciyanimbo comwe Yahova adacita? Kodi ni mabvuto yaponi yomwe Yahova adabvuma kugumana nayo kuti Jezu apereke cakulombolera? Yahova na Jezu ali pa uxamwali bwakulimba kwene-kwene ninga uxamwali bomwe bumbakhala bulipo pakati pa pai na mwanace. (Mimwani 8:30) Ndokumbukirani momwe Yahova akhabvera pomwe akhawona Mwana wace akubonera na mabvuto yakusiyana-siyana pomwe akhali pa dziko la pantsi. Mwakusaya kupenukira, bzidamuwawa kwene-kwene Yahova pomwe adawona Mwana wace akuboneresedwa na kulambidwa

11. Fotokozani ciratizo comwe cikulatiza momwe Yahova adabvera pomwe Jezu adaphedwa.

¹¹ Pai ali-wentse omwe adafedwa mwana adabva kuwawa kwene-kwene pomwe adaluza mwana waceyo. Napo kuti timbakhulupira kuti wanthu omwe adafa an’dzamuka, bzimbatiwawa kwene-kwene munthu omwe timbamufuna akafa. Ndipo timbabva kuwawidwa mu mtima. Ciratizoci cikutithandiza kubvesesa momwe Yahova adabvera pomwe adawona Mwana wace akubonera acifika pa kufa mu gole la 33 EC. c — Mateu 3:17.

12. Kodi n’ciyani comwe tingacite zikasala sumana zing’ono-ng’ono kuti Cikumbuso cicitike?

¹² Pomwe Cikumbuso cikanati kufika, yambani kupfunza bzizinji bza cakulombolera pa pfunziro lanu la pamwekha ayai pa Kunamata kwanu kwa pa Banja. Phatisani basa Bukhu la Kufufudzira Nkhani la Mboni za Yahova ayai mabukhu manango kuti mudziwe bzinthu bzizinji pakulewa bza cakulombolera. d Kuthumizira bzimwebzi, mbatewezani programa ya kuwerengedwa kwa Bibliya pa nthawe ya Cikumbuso yomwe imbagumanika mu  Moyo Wathu Wacikristau na Utumiki — Kabukhu ka Mitsonkhano. Ndipo pa ntsiku ya Cikumbuso, lekani kudzayebwa kuwona vidiyo ya Kucezerana Vesi la Ntsiku. Tikakonzekera mtima wathu pomwe Cikumbuso cikufendera, tin’dzakhala wakukonzeka kuthandizambo wanthu winango kuti adzagumane phindu na Cikumbusoco. — Ezara 7:10.

THANDIZANI WINANGO KUTI AGUMANE PHINDU

13. Kodi ni cinthu ciponi cakuyamba comwe tingacite kuti tithandize wanthu winango kuti agumane phindu na Cikumbuso?

¹³ Kodi tingathandize tani winango kuti agumane phindu na Cikumbuso? Njira yakuyamba ni kuwacemerera ku Cikumbusoco. Kuthumizira pa kucemerera wanthu omwe timbawagumana mu utumiki, tingakonze lista ya wanthu omwe timbawadziwa kuti tidzawacemerembo. Wanthuwo angakhale adzinza wathu, anzathu wa ku basa, wa ku xikola na wanthu winango omwe timbawadziwa. Tikakhala tiribe micemo yakukwanira kuti tiwapase, tingawatumizire linki ya mcemoyo mu telefoni zawo. Tingadzadabwe kwene-kwene tikadzawona wanthu azinji akubwera! — Mpalizi 11:6.

14. Fotokozani momwe mcemo umbathandizira munthu payekha.

¹⁴ Imwepo mukamupasa munthu mcemo, iye angakomedwe kwene-kwene ndipo angafune kubwera. Ntsiku inango, mpfumakazi inango yomwe bayace ambanamata gereja inango adadabwa kwene-kwene pomwe bayaceyo adamuuza kuti angadayenda naye pabodzi ku Cikumbuso. N’thangwe ranyi iye adadabwa? Thangwe kazinji-kentse m’mbuyo, iye akhambamuuza kuti agumanikembo pa Cikumbuso, tsono mwamunayo akhabvuma lini. Tsono thangwe ranyi mwamunayo adadzabvuma? Iye adalewa kuti: “Ndatambira mcemo.” Ndipo adalewa kuti adapasidwa mcemoyo na mkulu munango wa gwere omwe akhamudziwa. Mwamunayo adagumanika gole limwero, ndipo adayambambo kumbagumanika magole yentse.

15. N’ciyani comwe tin’funika kumbakumbukira tikambacemera wanthu kuti abwere ku Cikumbuso?

¹⁵ Kumbukirani kuti imwepo mukacemera wanthu kuti abwere ku Cikumbuso, iwo angaticite mibvunzo yakulewa bza Cikumbusoco maka-maka bzikakhala kuti akanati kubwera kale pa mitsonkhano yathu. Ndipopa tingacite bwino kukumbukira mibvunzo yomwe iwo angacite ticikonzekera  momwe tingawatawirire. (Akolose 4:6) Mwa ciratizo, winango pinango angabzibvunze kuti: ‘N’ciyani cin’dzacitika pa msinda umweyu?’ ‘Kodi msinda umweyu umbamala nthawe zingasi?’ ‘Kodi nin’funika kubvala bzakubvala bza moda wanyi?’ ‘Kodi nin’funika kupagali kuti ndipite?’ ‘Kodi nin’dzafunikira kucita cakupereka pa Cikumbusoco?’ Pomwe mukucemerera munthu kuti abwere ku Cikumbuso, imwepo mungamubvunze kuti: “Kodi muna mbvunzo uli-wentse?” Patsogolo pace mutawireni mibvunzoyo. Ndipo mungaphatisembo basa mavidiyo yakuti Mbakumbukirani Infa ya Jezu na N’ciyani Cimbacitika mu Nyumba ya Umambo? kuti muthandize munthuyo kubvesesa momwe mitsonkhano yathu imbacitikira. Ndipo pfunziro 28 la bukhu lakuti Khalani na Moyo Wakukondwa Mpaka Kale-kale! lina nfundo zakuthandiza kwene-kwene zomwe tingaziphatise basa.

16. Kodi ni mibvunzo inango iponi yomwe wale omwe ambagumanika pa Cikumbuso angakhale nayo?

¹⁶ Cikumbusoco cikamala, pinango wale omwe mwawacemera angakhale na mibvunzo minango. Pinango iwo angabzibvunze kuti n’thangwe ranyi mbanthu ang’ono-ng’ono (penu alipo) ndiwo omwe ambadya bzizindikiro. Pinango angabzibvunze pomwe kuti n’kangasi timbacita Cikumbusoco. Ndipo pinango angafune kudziwa penu mitsonkhano yentse ya Mboni za Yahova imbacitidwa mu njira ibodzi-bodziyo. Napo kuti nfundo zinango zimbafotokozedwa pa nkhani ya Cikumbusoco, wale omwe abwera, pinango angafunikire kufotokozeredwa mu njira yakubveka bwino. Ndipo nkhani ya mu jw.org yomwe ina msolo wakuti “N’chifukwa Chiyani a Mboni za Yehova Mumachita Mwambo wa Mgonero wa Ambuye Mosiyana ndi Zipembedzo Zina?” ingatithandize kutawira mibvunzo inango. Tikufunisisa kucita ciri-centse comwe tingakwanise pomwe Cikumbuso cikanati kucitika na pomwe camala kuti tithandize wale “omwe ana mitima yabwino” kugumana phindu na Cikumbusoco. — Mabasa 13:48.

THANDIZANI WALE OMWE ADAWOFOKA MWAUZIMU

17. Kodi akulu angathandize tani wale omwe adasiya kutsonkhana? (Ezekiyeli 34:12, 16)

¹⁷ Pa nthawe ya Cikumbuso, kodi akulu angathandize tani wale omwe adasiya kutsonkhana? Alatizeni kuti mumbacita nawo thupo. (Werengani Ezekiyeli 34:12, 16.) Pomwe Cikumbuso cikanati kucitika, citani ciri-centse kuti  mucemere abale azinji omwe adasiya kutsonkhana kuti adzagumanikembo pa Cikumbuso. Auzeni kuti mumbacita nawo thupo ndipo mukufunisisa kuwathandiza. Acemereni kuti adzagumanikembo pa Cikumbuso. Iwo akabwera, atambireni na manja mawiri. Cikumbusoco cikamala, pitirizani kumbawazungira na kumbawaligaliri ndipo athandizeni pa ciri-centse comwe cingafunikire kuti abwerere pomwe kwa Yahova. — 1 Pedru 2:25.

18. Kodi tentsenefe tingathandize tani wale omwe adasiya kutsonkhana? (Aroma 12:10)

¹⁸ Abale na mpfumakazi wentse m’gwere angathandize wale omwe adasiya kutsonkhana omwe ambabwera pa Cikumbuso. Kodi iwo angacite tani bzimwebzi? Mwa kuwalatiza lufoyi, kudeka mtima na ulemu. (Werengani Aroma 12:10.) Kumbukirani kuti bzingakhale bzakunesa kwa abale amwewa kuyamba pomwe kutsonkhana. Pinango iwo angakhale na mantha na bzomwe abale m’gwere angawauze ayai kuwalewa. e Tenepo, lekani kumbawacita mibvunzo yomwe ingawacitise kubva manyazi ayai kuwasunamisa. (1 Atesalonika 5:11) Amwewa ni abale wathu m’cikhulupiro. Ifepano timbakomedwa kwene-kwene kutsonkhana pomwe pabodzi na iwo! — Salimo 119:176; Mabasa 20:35.

19. Kodi ni phindu liponi lomwe timbakhala nalo tikambakumbukira infa ya Jezu?

¹⁹ Timbatenda kwene-kwene Jezu Kristu pakutiuza kuti timbakumbukire infa yace gole liri-lentse ndipo timbabvesesa kuti n’thangwe ranyi bzimwebzi mpsakufunika. Tikacita bzimwebzi, timbagumana phindu ndipo timbathandizambo wanthu winango mu njira zakusiyana-siyana. (Zaiya 48:17, 18) Lufoyi lathu kwa Yahova na kwa Jezu limbathumizirika. Timbalatiza kuti timbatenda bzomwe iwo adaticitira. Timbakhala wakuphatana na abale na mpfumakazi zathu zacikristau. Ndipo tingathandizembo winango kupfunza momwe angagumanire bzisimbo bzomwe bzimbabwera thangwe ra cakulombolera. Tenepo, mbaticiteni bzentse bzomwe tingakwanise kuti tikhale wakukonzeka kudzagumanika pa Cikumbuso comwe cin’citika gole lino, yomwe ni ntsiku yakufunika kwene-kwene ya pa gole!