1. Ena anua dee Doonu Nyɛŋiabu Loo Luh Jizɔs lu dee a kuī ee dɛ̄dɛɛ̄ dee bu zua a? (Luk 22:​19, 20)

 KIIKƐ̄ pya nɛɛ Jɛhova le, dee Doonu Nyɛŋiabu Loo Luh Kraist lu dee a kuī ee dɛ̄dɛɛ̄ dee bu zua. Aba doonu ama na Jizɔs bee kɔ nɛ pya a wee ye nyɔɔnɛ dumɛ kɔ ba a doo a. (Buū Luk 22:​19, 20.) A ɛrɛ pya nu anua i ɛmadɛɛ̄ lo edoo lo doonu. Doraa i naa ɛp pio ɛɛ.

2. Pio ena anua i wee ɛrɛ taɛ lo edoo Doonu Nyɛŋiabu Loo Luh Jizɔs a?

² Doonu Nyɛŋiabu Loo Luh Jizɔs yerebah i nɛ kɔ i kɛɛrɛ kɛ̄ waara zɔɔ a’agara kuī sa dɔbiī doo. A nyɛŋia i bu pya sīdee i dap tɔgɛ nia loo waara zɔɔ Jizɔs. (2 Kɔr 5:​14, 15) A doonage kɔ pya i wuga nɛɛdam le nɛɛwa le ii i ɛrɛ dee lo enɛ “e’aga beenyiɛ” ɛnia ii. (Rom 1:12) Bu ziī ziī zua, pya nɛɛ a naa bee sina enɔānu ale uwe zue ue wee si. Pio aba wee obia lu wee taāŋabah Jɛhova nyɔɔbee kɛ̄ alu esu baɛbah wa suā doo. E gbɛnɛ-edo pya aā nɛɛ ba ɛrɛ taɛ wee bɔātɛ̄ kiā nyɔɔ dee dum ama nyɔɔbee nu ba muɛ sa dā. Nu anua Doonu Nyɛŋiabu Loo Luh Jizɔs lu nu a kuī loo dɛ̄dɛɛ̄ ii lo!

3. Bu mɛ sīdee na Doonu Nyɛŋiabu Loo Luh Jizɔs doo kɔ pya i wuga a le bu dɛ̄dɛɛ̄ nyɔuwe a gbaaloo ziī a? (Ɛpnage foto.)

³ Naa kɛɛrɛnage kɛ̄ Doonu Nyɛŋiabu Loo Luh Jizɔs doo kɔ pya i wuga a le dɛ̄dɛɛ̄ kɛ̄ bu nyɔuwe a gbaaloo ziī doo. Lo dee, bu yube nyɔuwe, Pya Ekeebee Jɛhova wee gbaa bɔŋia sɔ̄ zue edɔa kii kɛ̄. Dɛ̄dɛɛ̄ ii wee gbaɛ̄tɔ̄ ekɔaue a kɔ siībahdɛɛ̄ kɛ̄ waara zɔɔ a’agara lu gbɛnɛ doo. I wee uɛ baɛ ka yɔɔ lo eleera bee Bari, tɛ̄ma fituru le mii, sa i wee doo “amen” loo nia sɔ̄ kara alu eyere. Bu nu alu 24 awa, dɛ̄dɛɛ̄  bɔŋanaloo Pya Nɛɛ Kraist wee gbaa doo aba nu. O dapge kɛɛrɛ kɛ̄ bu Jɛhova le Jizɔs ɛɛ doo sɔ̄ ba muɛ kɔ dɛ̄dɛɛ̄ ii gbaaloo sa wa nɛ ka bu lo sīdee ama ni?

4. Ena i kɔnia bu ekobee ue ama a?

⁴ Bu ekobee ue ama, i agara pya ebip a kɔ: Bu mɛ sīdee na i kpɛ̄naloo i beenyiɛ baɛma Doonu Nyɛŋiabu Loo Luh Jizɔs a? Mɛ sīdee na i dap yerebah nɛ pya dɔɔ̄na kɔ ba a ɛrɛ biī aāloo a? E bu mɛ sīdee na i dap yerebah nɛ pya a naa sina enɔānu ale uwe zue ue a? Ture pya ebip ama eyerebah i nɛ kɔ i kpɛ̄naloo baɛ doonu a kuī gbɛnɛ ama.

BU MƐ SĪDEE NA I KPƐ̄NALOO I BEENYIƐ BAƐMA DOONU NYƐŊIABU LOO LUH JIZƆS A?

5. (a) Ena anua i ɛrɛ ekɛɛrɛ nyɔɔ kɛ̄ waara zɔɔ a’agara dɔbiī doo a? (Le-yɔɔ 49:​7, 8) (b) Ena o nɔ aāloo vidio a kura E Na Anua Jizɔs Bee U Ani?

⁵ Ziī sīdee a kuī kaāna lo i dap kpɛ̄naloo i beenyiɛ baɛma Doonu Nyɛŋiabu Loo Luh Jizɔs na tɛ̄maloo e’ɛrɛ ekɛɛrɛ nyɔɔ kɛ̄ waara zɔɔ a’agara Jizɔs Kraist dɔbiī doo. Ii le ebee dap agara aba ii lɛɛ kɛ̄bah pɔrɔ le luh. (Buū Le-yɔɔ 49:​7, 8; sinage ee vidio a kura E Na Anua Jizɔs Bee U Ani?) a Nyɔɔwo, Jɛhova le Jizɔs doo waara zɔɔ a kuī kaāna sɔ̄ a bee nɔɔ kɔ Jizɔs a nɛ ye dum nyɔɔ dɛ̄dɛɛ̄ ii. (Rom 6:23) Kɛ̄ i kiisī lo e’ɛrɛ ekɛɛrɛ nyɔɔ nu Jɛhova le Jizɔs bee i su waāna zɔɔ bee doo, kɛ̄ i kiinagesī lo etɔgɛ nia loo waara zɔɔ a’agara doo lo. I gaa le kɛɛrɛ bu pio nu a bee su bah Jɛhova le Jizɔs lo edoo lo waara zɔɔ a’agara. Mɛ bu tua dɔ, ena alu edoo lo e’agara i a?

6. Ena alu edoo lo e’agara i a?

⁶ Waara zɔɔ na nu alu ekpɛ lo eyaɛ nu a bee pe. Adam alu tua nɛɛ a bee lu edɛm bee mmana sɔ̄ a bee lu edɛm ye. Sɔ̄ a bee si pɔrɔ, a bee doo kɔ alɛ le pya ye miɔŋɔ a peere dee ba bee ɛrɛ lo etɔɔ̄ dum anaatah. Lo e’obia ɛrɛ nu Adam bee pee, Jizɔs bee su ye dum a mmana waāna zɔɔ. Bu dɛ̄dɛɛ̄ tɔɔ̄dum Jizɔs a nyɔɔ kɛnɛkɛ̄, “a naa bee doo lɔgɔ pɔrɔ; lɔgɔ kiāŋana naa bee lu egbī ye muɛ nyɔɔnu.” (1 Pit 2:22) Sɔ̄ Jizɔs bee u, ye dum a mmana bee dɔ zɔ̄ŋia dɛɛ̄ dum Adam bee peere.—1 Kɔr 15:45; 1 Tim 2:6.

7. Pio amunu doā-ɛp na Jizɔs bee kpesī sɔ̄ a bee le a kɛnɛkɛ̄ a?

⁷ Jizɔs bee kiisī lo egbaɛ̄tɔ̄loo ye Tɛ a le bunyɔɔ bu dɛ̄dɛɛ̄ nu a doo kaɛlɛɛ pya keekee taāŋa a bee kpesī sɔ̄ a bee le a kɛnɛkɛ̄. Sɔ̄ Jizɔs bee le nwiī, a bee tɔɔ̄ kɛɛ̄ sa gbaɛ̄tɔ̄loo ye tɛ le ye ka ba naa mmana kereadoo a bee lu nɛɛ a mmana sɔ̄ a mɛā. (Luk 2:51) Sɔ̄ a bee le zege, a bee lu ebɛɛ̄ kɔ a amana ezū a aabah pya ye gbo lo ba bee dap gbī kɔ a lɛɛbeekɛɛ̄ ye tɛ le ka ale lu nɛɛ a naa bɔ ture nyiɛ loo nɛ Jɛhova. Sɔ̄ enyima tura nɛɛ, a bee kpesī keekee doā-ɛp a aabah Setan lo a le pɔrɔ edɔɔ̄, gbaānageloo sɔ̄ a bee lu edoā ye ɛp kɔ aa tɔɔ̄ agara nɛ Bari. (Mat 4:​1-11) Setan bee kpɛ̄naloo lo edoo kɔ Jizɔs a si pɔrɔ lokwa a naa dap kpɛ lo waara zɔɔ a’agara.

8. Pya amunu dɔɔ̄na doā-ɛp na Jizɔs bee egerebu loo a?

⁸ Bu esiatam Jizɔs a nyɔɔ kɛnɛkɛ̄, a bee egerebu kɛ̄bah pya dɔɔ̄na doā-ɛp. Pya ye nɛɛ baa bee ye tɛ̄ŋaloo sa gbīnage efɛ ye. (Luk 4:​28, 29; 13:31) A bee egerebu loo tɛɛ̄ ekwɔ pya a wee ye nyɔɔnɛ dumɛ. (Maak 9:​33, 34) Sɔ̄ aa bee lu ebiaɛ ye biaɛ loo, bee lu etɔg ye sa ye nua nu mɔm. Lɛɛ  bu gbɛnɛ ezialoo alu efɛ ye bu bɔp kɛɛ. (Hib 12:​1-3) A bee kpesī kpɛdumɛ doā-ɛp a bee ye lu loo nyɔɔ ye loo, e Jɛhova naa bee ye kpega. b—Mat 27:46.

9. Waara zɔɔ Jizɔs tɔɔ̄ i loo doodoo wa? (1 Pita 1:8)

⁹ Bu kaka, Jizɔs bee tɔga gbɛnɛ lo ewaara i zɔɔ bee. Ekɔ kɛkɛɛrɛ bu loo waara zɔɔ a’agara lo Jizɔs bee doo naa doo kɔ i agɛrɛbah ye wereloo ni?—Buū 1 Pita 1:8.

10. Ena a bee su bah Jɛhova lo enɛ lo a’agara a?

¹⁰ E kiiloo Jɛhova ni a? Ena alɛ bee nɛ lokwa Jizɔs dap kpɛ lo waara zɔɔ a’agara a? Gbanialoo Jɛhova le Jizɔs ɛrɛ ee ɛrɛgebah gbanialoo a dap le yɛɛ nwiī le tɛ. (Kam 8:30) Nyɔɔwo, naa kɛɛrɛ kɛ̄ nu bee tɔɔ̄loo Jɛhova doo sɔ̄ a bee muɛ sɔ̄ Jizɔs gaa kpesī keekee doā-ɛp bie a kɛnɛkɛ̄. Baɛbaɛ beenyiɛ naale loo kɔ a bee ziloo Jɛhova kaāna lo emuɛ sɔ̄ aa lu etɔg ye Nwiīnɛɛdam, ye kiī, sa ye doā-ɛp.

11. Naa nɛ edoba lo etɔgɛ kɛ̄ nu bee dap tɔɔ̄loo Jɛhova sɔ̄ aa bee lu efɛ Jizɔs doo.

¹¹ Ɛrɛgebah tɛ ale ka lo wa nwiī e’ua dap suā leere kɛ̄ lo kɛ̄tɔɔ̄ ziloo nɛɛ doo. I ɛrɛ e’agatɛ̄ yira bu aakɛ̄ bu luh, mɛ lo ama naa doo kɔ i aa ɛrɛ ezialoo sɔ̄ nɛɛ i wereloo u. Edoba ama yerebah i nɛ kɔ i dap dābeeloo kɛ̄ nu bee tɔɔ̄loo Jɛhova doo sɔ̄ a bee muɛ ye wereloo Nwiīnɛɛdam a gaa tɔga sa u bu zua 33 C.E. c—Mat 3:17.

12. Ena i dap doo sɔ̄ i e’ina gaa tɔɔ̄ waɛloo Doonu Nyɛŋiabu Loo Luh Jizɔs a?

¹² Aā anyaawo mmɛ dee Mɛmorial, ena anua oo nɔɔ lo e’ɛrɛ enɔānu Baibol nyɔɔ oloo ale Enɔānu Butɔ lo a dɛɛa nyɔɔ waara zɔɔ a’agara a? Su kpa a kura Research Guide for Jehovah’s Witnesses (lo a le bu o muɛ̄ ue) ale pya dɔɔ̄na kpa esu nɔā Baibol gbiātɛ̄ pya nu a toga akiiloo waara zɔɔ a’agara. d Gbaāloo wo, muɛ kɔ o nyɔɔnɛ buū Baibol A Kuu Mɛmorial dookɛ̄ alu enɔɔ doo bu i kpa a kura I Tɔɔ̄dum Pya Nɛɛ Kraist Le I Tam Zue Ue—Kpa Enɔānu. E dee Mɛmorial, o aa ibere lo esi ee Keebee Nu A Le Nɛ Dee. Sɔ̄ i kpɛ̄naloo i beenyiɛ baɛma dee Doonu Nyɛŋiabu Loo Luh Jizɔs, edoo kɔ i dap yerebah nɛ pya dɔɔ̄na kɔ ba a ɛrɛ biī aāloo lo doonu.—Ezra 7:10.

 YEREBAH NƐ PYA DƆƆ̄NA KƆ BA A ƐRƐ BIĪ AĀLOO

13. Tua ena i dap doo lo eyerebah nɛ pya dɔɔ̄na kɔ ba a ɛrɛ biī aāloo doonu Mɛmorial a?

¹³ Bu mɛ sīdee na i dap yerebah nɛ pya dɔɔ̄na kɔ ba a ɛrɛ biī aāloo Mɛmorial a? Tua nu i dap doo na lo ekue wa. Gbaāloo kue pya nɛɛ sɔ̄ i gaa si tam zue le-yereue aā ziī tɔ yii ziī, i dapnage ɛm bee pya nɛɛ i gbī ekue serekɛ̄. I dap ɛm bee pya i manamana, pya i gbo kɛ̄tam, pya i gbo tɔkpa, le pya dɔɔ̄na nɛɛ i suā loo. Kereadoo ii ɛrɛ gbɛnɛ-edo kpa kue lo edɔɔ̄, i dap wa nɛ link lo edoo kɔ ba a ɛrɛ lo kpa kue bu wa fon ale kɔmputa. Mɛɛ na a suā yira buā nɛɛ esi a?—Eklis 11:6.

14. Naa nɛ edoba a tɔgɛ kɛ̄ nɛ kpa kue nɛɛ o suā loo ɛrɛ ekpo doo.

¹⁴ Lo o nɛ kpa kue Doonu Nyɛŋiabu Loo Luh Jizɔs nɛɛ o suā loo edap ye zū kɔ a si. A ɛrɛ dee a bee lu nyɛŋialoo ziī wuga nɛɛwa lo ye dam naa wee taāŋabah Jɛhova sɔ̄ ye dam bee ye kɔ nɛ kɔ a gaa nɔɔ lo enyɔɔnɛ ye si Doonu Nyɛŋiabu Loo Luh Jizɔs. Ena anua a bee ye lu nyɛŋia loo a? Nu anua na bee ebee ye kue gbɛnɛ-edo sɔ̄ akii adumɛ mɛ a naa wee yiga esi. Mɛ ena a doo kɔ a nyaana nyiɛ ani? A kɔ “bee lu enɛ mɛ kpa kue,” sa baatɛ̄ kɔ a bee le ziī nɛɛ kanɛɛ a suāloo na a bee ye kue a. Ye dam bee si lo doonu bu lo zua sa sinage bu pya dɔɔ̄na zua a nyɔɔnɛ.

15. Ena i nyɛŋiabu sɔ̄ i gaa kue pya nɛɛ loo Mɛmorial a?

¹⁵ Nyɛŋiabu kɔ pya i kue dap ɛrɛ ebip, eetɔɔ̄ na lo ba sii wee si i enɔānu lɔgɔ sɔ̄. A bɔloo kɔ i kɛɛrɛbu pya ebip ba dap bip sa kpɛ̄naloo lo e’agara wa nɛ. (Kɔl 4:6) Bu edoba, pio aba dap bip kɔ: ‘Ena elu edoo bie lo doonu a?’ ‘Lo doonu enyɔɔdɛɛ̄ doodoo wa?’ ‘Ɛrɛ dua bɛloo elu egbī kɔ alu eyaa ni?’ ‘A ɛrɛ kpugi a wee lu ekpɛ lɛɛ o gae yii lo kɛ̄ ni?’ ‘Wee lu etɛrɛ kpugi fɛrɛ ni?’ Sɔ̄ i gaa kue nɛɛ loo Mɛmorial, i dap ye bip kɔ, “Ekɔ o ɛrɛ ziī ebip ni?” Lɛɛ o agara ɛrɛgebah ebip a bip ye nɛ. I dapnage su vidio a kura Nyɛŋiabu Loo Luh Jizɔs le lo a kura Ena a wee lu Edoo bie i Tɔ Nɔ̄nu Buɛ̄-mɛnɛ ani? yeābah nɛ lo  nɛɛ kɔ a suā kɛ̄ a wee lu esere bahloo pya i enɔānu doo. Gbaāloo wo, 28 nuenɔ bu kpa a kura Ɛrɛ Ekpeloo Dum Mmɛ Deedee! doo kɔ i suā pio le nu i dap wa nyɔɔnɛ kɔnia.

16. Dɔɔ̄na pya amunu ebip na pya a si Mɛmorial dap bip a?

¹⁶ Pya aā nɛɛ ba ɛrɛ taɛ dap sikɛ̄ ɛrɛ pya dɔɔ̄na ebip sɔ̄ ba e’aara lo Mɛmorial. Ba dap bip nu anua lɔgɔ nɛɛ naa de sa ɔ̄ ale nu anua aba nwīepoo nɛɛ na a de sa ɔ̄ mii le fituru alu esu daā lo doonu a. Ba dapnage bip kuma sɔ̄ i wee doo doonu ama. E ba dapnage gbī esuā lo a le a wee lu e’aagebaloo dɛ̄dɛɛ̄ enɔānu Pya Ekeebee Jɛhova bu aba lo sīdee. Kere a wee lu ekɔ nu akiiloo gbɛnɛ-edo ebip ama bu ekɔaue a wee lu enɛ bie Doonu Nyɛŋiabu Loo Luh Jizɔs, pya aā nɛɛ dap gbī esuā yereloo. Ekobee ue a kura “Why Do Jehovah’s Witnesses Observe the Lord’s Supper Differently From the Way Other Religions Do?” a le nyɔɔ jw.org dap i yerebah nɛ lo e’agara pio pya wa ebip ama. Lee kɔ i doo ɛrɛgebah nu i dap lɛɛ Mɛmorial gae sudɔ, sɔ̄ a gaa sudɔ, le sɔ̄ i e’aara lo eyerebah nɛ pya a bee lu esere “loo dum a naatah” kɔ ba a ɛrɛ biī aāloo doonu ama.—Doonu 13:48.

YEREBAH NƐ PYA A NAA GAA SINA ENƆĀNU ALE UWE ZUE UE

17. Bu mɛ sīdee na pya kanɛɛ dap yerebah nɛ pya a naa sina enɔānu le uwe zue ue a? (Ezekiel 34:​12, 16)

¹⁷ Sɔ̄ Doonu Nyɛŋiabu Loo Luh Jizɔs, bu mɛ sīdee na pya kanɛɛ dap yerebah nɛ pya a naa sina enɔānu ale uwe zue ue a? Tɔgɛ wa kɔ o kuūe wa dɛɛ̄loo. (Buū Ezekiel 34:​12, 16.) Lɛɛ Mɛmorial gae sudɔ, gbiaā kɛ̄ edoo inaloo gbɛnɛ-edo aba. Doo kɔ ba a suā kɔ bui were wa loo sa ɛrɛ taɛ lo eyerebah wa nɛ bu ɛrɛgebah sīdee bui dap. Kue wa loo Mɛmorial. E lo ba si, faaba wa loo sa su baɛ bah wa suā. Sɔ̄ elua e’aa Mɛmorial, kiisī lo e’ina loo pya i wereloo wuga nɛɛdam le nɛɛwa ama sa wa yerebah nɛ ɛrɛgebah kɛ̄ ba ɛrɛ ebɛɛ̄ lokwa ba obia pii Jɛhova.—1 Pit 2:25.

18. Bu mɛ sīdee na dɛ̄dɛɛ̄ ii dap yerebah nɛ pya nɛɛ a naa sina enɔānu ale zue ue a? (Pya Rom 12:10)

 ¹⁸ Dɛ̄dɛɛ̄ nɛɛ a le bu bɔŋanaloo dap yerebah nɛ pya a naa sina enɔānu ale uwe zue ue kɔ ba a si Mɛmorial. Bu mɛ sīdee? Tɛ̄maloo etɔgɛ wereloo, fɛgɛ le enwadɛɛ̄ wa kumaloo. (Buū Pya Rom 12:10.) Nyɛŋiabu kɔ a bee le aa dap agabah pya i wereloo ama lo esikɛ̄ si enɔānu. Naadaba bɔɔ bee wa aa kɔ a naale elu esu wa leere. e Nyɔɔwo o aa wa bip pya ebip edoo kɔ kɛɛ a bɔp wa ale kɔ nu ekiɛ̄ wa. (1 Tɛs 5:11) Pya nɛɛ ama lu pya i wuga nɛɛdam le nɛɛwa bu yira. Bu i ɛɛ lo esikɛ̄ wa nyɔɔnɛ gbaa taāŋabah Bari dɔɔ̄na sɔ̄!—Yɔɔ 119:176; Doonu 20:35.

19. Pya amunu biī na a le bu nyɛŋiabu loo luh Jizɔs a?

¹⁹ A ɛɛrɛ i bu kɔ Jizɔs kɔ i doo doonu nyɛŋiabu loo ye luh bu ziī ziī zua, sa i muɛ nu anua doonu ama kuī gbɛnɛ. Sɔ̄ i si doonu ama, a dɔbiī i nɛ sa dɔnage biī nɛ pya dɔɔ̄na bu booboo sīdee. (Ais 48:​17, 18) A doo kɔ i agɛrɛbah wereloo Jɛhova le Jizɔs. I tɔgɛ kɛ̄ pya nu ba edora i nɛ i nia doo. A doo kɔ i agɛrɛtɛ̄ gbanialoo i ɛrɛ loo pya i wuga bu yira. E i dapnage yerebah nɛ pya dɔɔ̄na kɔ ba a suā nu ba edoo lokwa ba dap ɛrɛ pya leelee a aaloo waara zɔɔ a’agara. Nyɔɔwo, dooraa i doo kuma kɛ̄ i dap doo lo ekpɛ̄naloo baɛ Doonu Nyɛŋiabu Loo Luh Jizɔs a bu zua ama, lo alu doonu a i kuī loo eera bu ziī ziī zua!