1. Mesoriẹ ẹdẹ Ẹkarorhọ Uhwu i Jesu o rhiẹ ẹdẹ rọ mai ghanren uvuẹn ẹgbukpe na? (Luke 22:​19, 20)

 HARẸN ihworho i Jehova, Ẹkarorhọ Uhwu i Jesu yẹ ẹdẹ rọ mai ghanren uvuẹn ẹgbukpe na. Irueruo ọrana ọvo yẹ oborẹ i Jesu o jurhi rẹn idibo yi nẹ aye i vwobọrhọ. (Se Luke 22:​19, 20.) Ọwan a hẹrhẹ ọke re ne ruẹ Ẹkarorhọ na fọkiẹ iroro buebun. Jene yono kpahen ezẹko usuẹn aye.

2. Me yẹ iroro ezẹko ra lẹrhẹ ọwan hẹrhẹ ẹdẹ Ẹkarorhọ na?

² Ẹkarorhọ na ọ ha userhumu rẹn ọwan roro kpahen ọghanronmẹ otan na. Ọ karorhọ ọwan izede ene ru dje ọdaremẹro phia fọkiẹ izobo i Jesu. (2 Cor. 5:​14, 15) Ọ ji yẹ ọwan uphẹn ra na “bọn omoma ọwan” ọrhẹ imizu ukoko na gbanhon. (Rom. 1:12) Kẹgbukpe kẹgbukpe, imizu ri ha erhirhiẹ furhiemu a rhiẹ Ẹkarorhọ na. Ezẹko i tobọ vwo ẹhẹn aye ina ghwẹrioma bru i Jehova, fọkiẹ izede sasasa re dedirẹ aye. Habaye, ihworho ri vwo omamerhomẹ kpahen urhomẹmro na, na tuẹn uyono i Baibol rhọ fọkiẹ oborẹ aye i mẹrẹnren ji rhon. Ọrana yọ soriẹ Ẹkarorhọ na o rhiẹ irueruo oghẹnrensan rẹn ọwan ephian!

3. Marhẹ irueruo Ẹkarorhọ na o ru ku imizu akpọ ephian kuẹgbe? (Ni ifoto na.)

³ Ji roro kpahen oborẹ Ẹdẹ Ẹkarorhọ na o ru ku ọwan kuẹgbe. Iseri Jehova uvuẹn ọsoso akpọ na e koko ruẹ Ẹkarorhọ na uvuẹn owuọwọn. Ọwan e rhon ẹmro ro dje kpahen oborẹ otan na ọghanren te. Ọwan a so ijoro ọgbeva, kpare enyo ọrhẹ ibrẹdi na, na nẹrhomo ọgbọ ẹnẹ, ji ruẹ “isẹ” obẹtaye. Ọsoso ikoko na ephian ye ruẹ irueruo na lele izede owu uvuẹn ẹdẹ owu na. Wu na sabu roro kpahen  aghọghọ ri Jehova ọrhẹ Jesu e vwo ọke aye a mẹrẹn ọwan ra họghọ rẹn aye izede omaran?

4. Me ye ne yono kpahen uvuẹn urhomu-ẹmro ọnana?

⁴ Uvuẹn urhomu-ẹmro ọnana, ene yono kpahen enọ enana: Marhẹ ene ru mwuegbe ẹhẹn ọwan hẹrhẹ Ẹkarorhọ na? Marhẹ ene ru ha userhumu rẹn awọrọ mẹrẹn erere nie? Marhẹ ene ru ha userhumu rẹn imizu furhiemu? Ẹkpahenrhọ rẹn enọ enana ina ha userhumu rẹn ọwan mwuegbe hẹrhẹ irueruo oghẹnrensan ọnana.

MARHẸ ENE RU MWUEGBE ẸHẸN ỌWAN HẸRHẸ ẸKARORHỌ NA?

5. (a) Mesoriẹ o fo ne roro kpahen ọghanronmẹ otan na? (Psalm 49:​7, 8) (b) Me wu yono nẹ ividio na Mesoriẹ i Jesu o Hwu?

⁵ Izede ọghoghanren owu ene ru mwuegbe hẹrhẹ irueruo na, yẹ ọrẹ ene roro kpahen ọghanronmẹ izobo otan i Jesu Kristi. Manẹ ọwan ọvo i vwa sabu simi oma ọwan nẹ ọdandan ọrhẹ uhwu-u. (Se Psalm 49:​7, 8; ni ividio na Mesoriẹ i Jesu o Hwu?) a Omarana, Jehova no ruẹ ẹkwaphiẹrhotọre ọghoghanren rẹ Ọmọyen ono hwu rẹn ọwan. (Rom. 6:23) Ọke erhe roro kodo kpahen oborẹ i Jehova ọrhẹ Jesu i ruru, no mwu ọwan vwo ọdaremẹro okokodo kpahen otan na. Ene yono kpahen ekwakwa egbogbanhon ezẹko ri Jehova ọrhẹ Jesu i rhiẹromẹrẹn fọkiẹ ọwan. Ọrẹn ọrukaro, me yẹ otan na o surhobọmwu?

6. Me yẹ otan na o surhobọmwu?

⁶ Otan yẹ osa ra kwa na sabu rharhumu dẹ emru. Ọhworhare ọrukaro, ro rhiẹ Adam, ohworho rọ gbare ọke ra ma yen. Ọke ro ruẹ ọdandan, nọ kpare uphẹn ro no rhirhiẹ ye bẹmẹdẹ fughwẹ, omaran ji te emọyen ephian. Neneyo a sabu rharhumu dẹ oborẹ Adam ọ kpare fughwẹ, Jesu nọ ha arhọ ọgbagba ye kpahontọre ze izobo. Uvwrọke i Jesu o nyerẹn uvuẹn otọrakpọ na, o “ruẹ ọdanda-an, ọ jeghwai phiẹ ihworho rhọ-ọ.” (1 Pet. 2:22) Ọke i Jesu o hwu hin, nọ ha arhọ ọgbagba ye kwosa oborẹ Adam ọ kpare fughwẹ.—1 Cor. 15:45; 1 Tim. 2:6.

7. Me yẹ edamuni ezẹko ri Jesu ọ dẹrughwaroghwu ọke rọ ha otọrakpọ na?

⁷ Jesu ọ huvwele i Jehova ọrẹ kerhirhiẹ kerhirhiẹ, udabọ edamuni ro rhiẹromẹrẹn ọke rọ ha otọrakpọ na. Ọke rọ ha ọmọvwerhe, Jesu ọ huvwele eri vwiẹriẹ ri vwa gba, dedevwo ọye ohworho rọ gbare. (Luke 2:51) Ọke rọ ha idama, ọ ji tiẹn ọhiẹn sansan rọ nọ lẹrhiẹ ja huvwele yanghene fuevwan kpahen Jehova. Ọke ri Jesu o rhiẹ omirẹghwa, ọ tiẹn edamuni ri nẹ abọ Echu rhe, kugbe ọke rọ ta riẹn nọ tiẹn i Jehova. (Matt. 4:​1-11) Echu ọ damoma rọ nọ lẹrhẹ i Jesu ruẹ ọdandan, neneyo ọ jọ sabu kwosa otan na.

8. Edamuni erọrọ ego yi Jesu o vwo edirien?

⁸ Ọke i Jesu ọ wian owian aghwoghwo na, o vwo edirin edamuni sansan. O rhiẹromẹrẹn ẹkparehaso, a ji djofẹn uhwu mwuien. (Luke 4:​28, 29; 13:31) O ji nyerẹn ghele erhirhiẹ ijẹgba idibo yi. (Mark 9:​33, 34) Ọke re mwuien ra damiẹ nẹ, ne rurie gbalogbalo ji haye djechẹẹ. Ọke oru, na kanren riẹn mwu orhan jerẹ ohi, nọ ji rioja omamọ. (Heb. 12:​1-3) Ọdamuni Jesu rọ kẹta, ọye ọvo yo vwo edirien vabọ ẹruete i Jehova. b—Matt. 27:46.

9. Marhẹ oma o ru ọwan kpahen izobo i Jesu? (1 Peter 1:8)

 ⁹ Itiọrurhomẹmro, Jesu ọ rioja omamọ nọ sabu kwosa otan na. Oma ọ vwọ dabu merhen ọwan ọke re roro kpahen izobo ri Jesu o zeri fọkiẹ ọwan?—Se 1 Peter 1:8.

10. Me yi Jehova o ruru nọ sabu tiobọnu otan na?

¹⁰ Ni Jehova vwo? Me yo ruru neneyo i Jesu ọ sabu kwosa otan na? Jehova ọrhẹ Jesu i vwo obọdẹn onyerẹnkugbe rọ ha uvwre ọsẹ ọrhẹ ọmọ. (Prov. 8:30) Omarana, roro kpahen oborẹ oma o ruẹ i Jehova, ọke ro ni Jesu ro vwo edirin edamuni sansan uvuẹn otọrakpọ na. O vwo ẹfro-o, ọ miami Jehova omamọ ọke ra ha oja riẹ i Jesu, ra tiẹn, ọrhẹ ọke ra damiẹ.

11. Ha udje dje kpahen oborẹ oma o ru i Jehova ọke re kpe i Jesu mwu orhan.

¹¹ Ọmiọmọ rẹ ọmọyen o hwu dẹ ne, o rhe oborẹ o miama te ọke ọmọ na o hwu. Dedevwo e vwo esegburhomẹmro kpahen ẹrhọmọnuhwu na, ọrẹn ọ miama ọke ohworho re vwo ẹguọlọ kpahen orho hwu. Udje ọnana, ọ ha userhumu rẹn ọwan vwẹruọ oborẹ oma o ruẹ i Jehova ọke ro ni Jesu rọ rioja, jeghwai hwu uvuẹn ẹdẹ 33 C.E. c—Matt. 3:17.

12. Me ya na sabu ru uvwre ikprughwre ri lele fiẹ Ẹkarorhọ na?

¹² Uvwrọke ọnana ye fiẹ Ẹdẹ Ẹkarorhọ na, damoma yono kpahen otan na ọke we ruẹ uyono omobọ yanghene Ogame Ekrun. Ha ọbe na Research Guide for Jehovah’s Witnesses ruiruo, (orhianẹ wu vworie uvuẹn edjadjẹ ọnọ) yanghene ẹbe ukoko na erọrọ ri dabu dje kpahen otan na. d Habaye, nyalele ẹkwaphiẹrhotọre isese i Baibol Ẹkarorhọ Uhwu i Jesu, rọ ha Akpenyerẹn Ọwan Ilele Kristi Ọrhẹ Iruo Uvie Na—Ọbe-Owian Uyono. Uvuẹn ẹdẹ Ẹkarorhọ na, karorhọ ni ividio ẹkwaphiẹrhotọre Ogame Urhiọke ẹdẹ ọrana. Erhe mwuegbe ọmudu ọwan hẹrhẹ Ẹkarorhọ na, ọnọ ha userhumu rẹn ọwan lẹrhẹ awọrọ mẹrẹn erere nie rhe.—Ezra 7:10.

HA USERHUMU RẸN AWỌRỌ MẸRẸN ERERE

13. Me yẹ emru ọrukaro re ne ruo na sabu ha userhumu rẹn awọrọ mẹrẹn erere nẹ Ẹkarorhọ na?

¹³ Marhẹ ene ru ha userhumu rẹn awọrọ mẹrẹn erere nẹ Ẹkarorhọ na? Udjoghwẹ ọrukaro, yẹ ọrẹ ana ha use rẹn aye. Haba ọrẹ ana ha use rẹn ihworho ra mẹrẹnren  uvuẹn aghwoghwo na, o ji fo na ya edẹ ihworho ra na ha use riẹn. Aye ina sabu rhiẹ ihworho ekrun ọwan, ere lele wian, ere lele riẹ isukuru kugbe, yanghene awọrọ. Ọrhọ tobọ rhianẹ e vwo ọbe use na-a, ana sabu dje link ọbe use na vwe aye nyoma ifonu. Ọnọ sabu gbe ọwan unu ọke ra na mẹrẹn ihworho ri na rhiẹ irueruo na!—Eccl. 11:6.

14. Dje kpahen erere rọ havwiẹ arha ha ọbe use na ruiruo.

¹⁴ Wu rha ha use rẹn ohworho rhiẹ Ẹkarorhọ na, ọnọ sabu vwo ẹhẹn rọ nọ rhe. Ẹdẹ owu, no gbe omizu ọmase owu unu ro rhirhiẹ oghwa re riẹ ẹga sansan, ọke esa ye ro vwo rhiẹ Oseri Jehova, ọ ta taghene ono lelie riẹ Ẹkarorhọ na. Mesoriẹ o gbe yi unu? Fọkime omizu ọmase na ọ ha use riẹn ọgbọ buebun ne no riẹ Ẹkarorhọ na, ọrẹn o vwo kwe nya-a. Mesoriẹ ọ guọlọ nya ọnana? Esa na nọ tare taghene: “A ha ọbe use riẹn,” nọ ji ta taghene ọkpako owu ro rheri yọ ha use riẹn. Nẹ ẹgbukpe ọrana rhe, esa na no riẹ Ẹkarorhọ na.

15. Me ya guọlọ karorhọ ọke ra ha use rẹn awọrọ rhiẹ Ẹkarorhọ na?

¹⁵ Karorhọ taghene ihworho ra ha use riẹn, ina sabu vwo enọ kpahen irueruo na—maido, orhianẹ aye ji riẹ uyono ukoko ọwan dẹ-ẹ. Omarana, o fori ne roro kpahen enọ aye ina sabu nọ, ji mwuegbe ẹkpahenrhọ ra na haphia. (Col. 4:6) Jerẹ udje, ihworho ezẹko ina sabu roro: ‘Me yọ nọ phia uvuẹn irueruo na?’ ‘Marhẹ ono jiri te?’ ‘Aruẹ ewun ọgo mi ne kurhọ?’ ‘Mi na kwosa vwẹre mi ki nya?’ ‘Ana kwosa ọke re ruẹ irueruo na?’ Ọke ra ha use rẹn ohworho nọ rhiẹ Ẹkarorhọ na, ana sabu nọ yen, “Wu vwo onọ owuorowu?” jeghwai kpahenrhọ enọ ro vwori. Ana ji sabu kporo ividio na Karorhọ Uhwu i Jesu ọrhẹ Me ọye ruẹ Uvuẹn Aghwẹlẹ Uvie? rẹn aye, nọ userhumu rẹn aye vwẹruọ oborẹ e ruẹ iyono ọwan lele. Habaye, ọbe na Riamerhen Akpenyerẹn Bẹmẹdẹ! uyono 28 ọ yẹre ọwan ihwẹnmro eghoghanren buebun ra na sabu ha ruiruo.

16. Enọ erọrọ ego yẹ ihworho ri rhiẹ Ẹkarorhọ na ina sabu nọ?

 ¹⁶ Eri vwo omamerhomẹ kpahen urhomẹmro na i rhe nẹ Ẹkarorhọ na rhe, aye ina sabu vwo enọ erọrọ. Aye ina sabu rhe roro kpahen oborẹ ọsoriẹ o rhiẹ ihworho krẹn yi riẹ ibrẹdi na, ji da enyo na (orhianẹ o vwo ọro vwobọrhọ ye). Aye ina ji sabu roro kpahen uchunu ọgbọ re ruẹ irueruo na. Ọkezẹko, aye i guọlọ rhe sẹ izede omaran ye ruẹ ọsoso uyono ukoko Iseri Jehova. Dedevwo ana ta kpahen ihwẹnmro erana buebun uvuẹn Ẹkarorhọ na, ọrẹn eri rheri obọ na i ji guọlọ taghene e djeyi fiotọre rẹn aye. Urhomu-ẹmro na “Why Do Jehovah’s Witnesses Observe the Lord’s Supper Differently From the Way Other Religions Do?” rọ ha jw.org, ọnọ ha userhumu rẹn ọwan kpahenrhọ enọ aye ezẹko. Ọwan i guọlọ ruẹ oborẹ ana sabu ru ephian—bọmọke, uvwrọke ọrhẹ ọke Ẹkarorhọ na orho vwoba ne—na ha userhumu rẹn eri “vwo omamọ ẹhẹn” mẹrẹn erere nẹ irueruo na.—Acts 13:48.

HA USERHUMU RẸN IMIZU FURHIEMU

17. Marhẹ ekpako ine ru ha userhumu rẹn imizu furhiemu? (Ezekiel 34:​12, 16)

¹⁷ Marhẹ ekpako ine ru ha userhumu rẹn imizu furhiemu uvwrọke Ẹkarorhọ na? Are i dabu kpomavi rẹn aye. (Se Ezekiel 34:​12, 16.) Bọmọke ọke Ẹkarorhọ na ono te, damoma ha use rẹn imizu furhiemu buebun wu na sabu se. Yẹ aye imwẹro taghene wu vwo ẹguọlọ kpahen aye, ji guọlọ ha userhumu rẹn aye ọrẹ kizede kizede. Ha use rẹn aye rhiẹ Ẹkarorhọ na. Aye i rha rhe, dede aye sasasa. Ọke irueruo na orho fuen, damoma kọn bru aye, ji ha userhumu aye i guọlọre rẹn aye nẹ aye i sabu ghwẹrioma bru i Jehova.—1 Pet. 2:25.

18. Marhẹ ọwan ephian ine ru ha userhumu rẹn imizu furhiemu? (Romans 12:10)

¹⁸ Imizu ephian uvuẹn ukoko na, ina sabu ha userhumu rẹn imizu furhiemu  ri rhiẹ Ẹkarorhọ na. Izede ọgo? Nyoma aye ine dje ẹguọlọ, uruemru esiri, ọrhẹ ọghọ rẹn aye. (Se Romans 12:10.) Karorhọ taghene ọnọ sabu bẹn rẹ imizu enana ina rhiẹ uyono ukoko. Ọkezẹko, ofẹn o mwu aye kpahen oborẹ imizu na ine dede aye lele. e Omarana, wu vwa nọ aye enọ ri na lẹrhẹ ofa ro aye, yanghene tẹmro ri na suẹ ẹkuọn rẹn aye-e. (1 Thess. 5:11) Ọwan ọrhẹ imizu enana ya ga i Jehova kuẹgbe. Oma ọ merhen ọwan ra na rharhumu kwomakugbe ga i Jehova!—Ps. 119:176; Acts 20:35.

19. Erere ego ya na mẹrẹn arha karorhọ uhwu i Jesu?

¹⁹ Oma ọ merhen ọwan re rhe taghene Jesu o vwo ẹkwaphiẹrhotọre re ne ruẹ Ẹkarorhọ Uhwuie kẹgbukpe kẹgbukpe. Ọke erhe riẹ irueruo na, ọwan ọrhẹ awọrọ ya mẹrẹn erere izede buebun. (Isa. 48:​17, 18) Ẹguọlọ re vwo kpahen Jehova ọrhẹ Jesu nọ gbanhanrhọ. Ọwan e ji dje ọdaremẹro phia kpahen oborẹ aye i ru rẹn ọwan ne. E ruẹ onyerẹnkugbe ọwan rhẹ imizu ukoko na gbanhan. Habaye, ana sabu ha userhumu rẹn awọrọ yono oborẹ aye ine ru mẹrẹn erere nẹ otan na. Jenẹ ọwan ephian i ru oborẹ ana sabu ru, ne mwuegbe hẹrhẹ Ẹkarorhọ ọrẹ ẹgbukpe ọnana—ro rhiẹ ẹdẹ rọ mai ghanren uvuẹn ẹgbukpe na!