1. ¿Por hanja xa mähyoni dä feni tatꞌä je̱ya näꞌä rä pa bi du rä Hesu? (Lucas 22:​19, 20).

 PA YÄ testigo rä Jeoba xa mähyoni dä beni näꞌä rä pa bi du rä Hesu. Nunä Fenäte tagi tatꞌä je̱ya. Ho̱nse̱ gehnä rä pa bi mända rä Hesu dä feni (hñeti Lucas 22:​19, 20, TNM). ¿Por hanja xa mähyoni dä feni nunä pa? Ma gä handihu̱.

2. ¿Por hanja yä testigo rä Jeoba o̱tꞌe rä Fenäte de rä du rä Hesu?

² Ora di ntinihu̱ ha nunä Fenäte, benꞌgägihu̱ te bi me̱fi rä Zi Dada Jeoba ꞌne rä Hesu po gekhu̱. ꞌNehe, dri fengägihu̱ de te mä forma dä za gä umbäbihu̱ njamädi po näꞌä bi me̱fi (2 Cor. 5:​14, 15). Ha nunä Fenäte di nupämfenihu̱ nꞌa ngu mä nꞌaa ko yä ku (Rom. 1:12). Tatꞌä je̱ya, ha nunä Fenäte tso̱ni nuꞌu̱ yä zi ku ya hingi ntini ha yä mhuntsꞌi ꞌne xä hye̱gi de dä me̱päbi rä Zi Dada Jeoba. Ora di ntini nuyu̱ yä ku, ko ndunthi rä mhäte tꞌumbäbi nꞌa rä hogä ꞌñehe, ꞌne rꞌa de gehyu̱ geꞌä xä japäbi xä me̱päbi mänꞌaki rä Zi Dada Jeoba. Ndunthi de nuꞌu̱ yä zi jäꞌi xä ntini po ri mu̱di ha nunä Fenäte, xä desidi dä ñꞌo ꞌnehe ha nunä ꞌñuu tsitsꞌi ha rä te pa nzäntho. Po nuya ꞌne märꞌa yä raso, yä testigo rä Jeoba o̱tꞌe nunä Fenäte tatꞌä je̱ya.

3. ¿Por hanja dä za gä eñhu̱ ge ha rä Fenäte de rä du rä Hesu di nheki hanja ꞌmu̱i unido yä testigo rä Jeoba? (Hyandi ꞌnehe yä foto).

³ Ko ndunthi rä johya di to̱ꞌmihu̱ dä zo̱ho̱ nunä pa tatꞌä je̱ya, ngeꞌä di pädihu̱ ge ha nunä pa —nuꞌmu̱ rä Hyadi ya ma dä yu̱i— po gatꞌho rä Xiꞌmhai yä testigo rä Jeoba ya xä muntsꞌi pa dä yꞌo̱tꞌe nunä Fenäte. Ha nunä Fenäte tꞌuni nꞌa rä thoꞌtsi habu̱ udi hängu rä muui pe̱ꞌtsi näꞌä bi me̱fi rä Zi Dada Jeoba ꞌne rä Hesu. ꞌNehe di thuti yoho yä jähñä, dri thoꞌtsi rä thuhme ꞌne rä binu, ꞌne di tꞌo̱tꞌe goho yä sadi. Ora huadi kada nꞌa de nuya yä sadi, gatꞌho di enähu̱ «amén» o «geꞌä dä njabu̱». Durante nuꞌu̱ 24 ora pe̱ꞌtsi nunä pa, geꞌä pe̱fi yä testigo rä Jeoba ha kada nꞌa de nuꞌu̱ yä mhuntsꞌi ja po gatꞌho rä Xiꞌmhai. ¿Dä za gi imäjinä hängu rä johya di senti rä Zi Dada Jeoba ꞌne rä Hesu ora handi ge di tꞌo̱tꞌe nunä Fenäte po gatꞌho rä Xiꞌmhai?

4. ¿Te mä ntꞌani ma gä thädihu̱?

 ⁴ Ha nunä ntꞌudi di nxadihu̱ ma gä thädihu̱ nuya yä ntꞌani: «¿Hanja dä za gä hokihu̱ mä mfenihu̱ ꞌne mä korasohu̱ pa xti zo̱ho̱ näꞌä rä Fenäte? ¿Hanja dä za gä fatsꞌihu̱ märꞌaa pa dä ntini ꞌne dä yꞌo̱de näꞌä ma dä tꞌudi ha nunä Fenäte? ¿Hanja dä za gä fatsꞌihu̱ nuꞌu̱ yä ku xä desanimä ꞌne xä hye̱gi de dä me̱päbi rä Zi Dada Jeoba?». Näꞌä ma gä pädihu̱ geꞌä ma dä maxkägihu̱ pa gä ñhokihu̱ pa xti zo̱ho̱ nunä pa.

¿HANJA DÄ ZA GÄ ÑHOKIHU̱ DENDE ÄNTE PA XTI ZO̱HO̱ NÄꞌÄ FENÄTE DE RÄ DU RÄ HESU?

5. a) ¿Por hanja xa mähyoni gä hudihu̱ ꞌne gä ntso̱ꞌmihu̱ hängu di bale näꞌä rä njutꞌi bi tꞌuni po gekhu̱? (Salmo 49:​7, 8). b) Mää te gä pädi de rä bideo ¿Por hanja bi du rä Hesu?

⁵ ¿Te dä za gä pe̱fihu̱ pa njabu̱ gä hokihu̱ mä mfenihu̱ ꞌne mä korasohu̱ pa xti zo̱ho̱ näꞌä rä Fenäte de rä du rä Hesu? Dä hogi gä hudihu̱ ꞌne gä ntso̱ꞌmihu̱ pa gä handihu̱ hängu di bale näꞌä rä bida bi uni rä Hesu. Po gekhu̱se̱ nunka ma xä za xtä kꞌotꞌihu̱ de rä pekado ꞌne de rä du (hñeti Salmo 49:​7, 8; hyandi ꞌnehe rä bideo ¿Por hanja bi du rä Hesu?). a Mi hyandi njabu̱ rä Zi Dada Jeoba bi desidi bä pe̱hni rä Tꞌu̱, ꞌne rä Hesu bi mꞌu̱i dispuesto bä ehe pa bi uni rä bida po gatꞌho yä jäꞌi. Hää, di yoho bi mꞌu̱i dispuesto bi gutꞌi nꞌa rä presio xi xä mädi po gekhu̱ (Rom. 6:23). Mu̱ njatꞌä gä benihu̱ näꞌä bi me̱fi rä Zi Dada Jeoba ꞌne rä Hesu, mänꞌa ma gä jamädihu̱ po näꞌä rä njutꞌi bi uniꞌu̱. Ma gä pädihu̱ mä nꞌa tu̱i de nunä njutꞌi.

6. ¿Tenguꞌä näꞌä rä rescate bi uni rä Zi Dada Jeoba po gatꞌho yä jäꞌi?

⁶ Näꞌä rä presio dri jutꞌi pa dri rekupera nꞌa rä kosa o nꞌa rä jäꞌi, fädi ngu rä rescate. Adán —näꞌä rä mu̱di ñꞌo̱ho̱— mrä perfecto nuꞌmu̱ rä Zi Dada Jeoba bi hyoki. Pe nuꞌmu̱ Adán bi desidi hindä yꞌo̱te rä Zi Dada Jeoba, bi ꞌme̱di näꞌä rä oportunida de dä mꞌu̱i pa nzäntho. Koꞌmu̱ Adán bi zokuäbi rä pekado gatꞌho nuꞌu̱ yä bätsi bi mꞌu̱i, ꞌnehe bi ꞌme̱di rä oportunida de dä me̱ꞌtsi nꞌa rä te pa nzäntho. Pa bi rekupera rä Zi Dada Jeoba näꞌä bi ꞌme̱di Adán, bä pe̱hni rä Tꞌu̱ pa bi uni näꞌä rä bida hinte mä pekado mi ñꞌoui (1 Ped. 2:22). Durante nuꞌu̱ yä je̱ya bi mꞌu̱kua ha rä Xiꞌmhai ꞌne asta xa mi du, rä Hesu hinte mä pekado bi yꞌo̱tꞌe. Hänge bi za bi uni rä te pa njabu̱ bi ñängägihu̱ de rä pekado ꞌne de rä du (1 Cor. 15:45; 1 Tim. 2:6).

7. ¿Te bi ñhandui rä Hesu nuꞌmu̱ bi mꞌu̱kua ha rä Xiꞌmhai?

⁷ Mäske rä Hesu bi ñhandui ndunthi yä tꞌo̱tꞌe xä ñhei ꞌne yä xuñha nuꞌmu̱ bi mꞌu̱kua ha rä Xiꞌmhai, näꞌä nzäntho bi yꞌo̱te rä Zi Dada Jeoba. Nuꞌmu̱ rä Hesu mrä tꞌu̱kä bätsi, pe̱ꞌtsi te bi yꞌo̱te nuꞌu̱ yä dada mäske nuꞌu̱ myä imperfecto (Luc. 2:51). ꞌNepu̱, nuꞌmu̱ rä Hesu ya mrä bäsjäꞌi, zäi ge bi mꞌu̱pu̱ märꞌa yä bäsjäꞌi nuꞌu̱ mi u̱ꞌti pa njabu̱ hindä yꞌo̱te yä dada o pa dä ꞌuengi de nuꞌu̱ yä mhända rä Zi Dada Jeoba. Nuꞌmu̱ ya bi ndäta jäꞌi rä Hesu, rä Diablo bi hñuꞌtsuäbi rꞌa yä tentasio pa dä fayabi rä Zi Dada Jeoba ꞌne asta bi yꞌapäbi ge go dä xo̱kämbeniꞌä (Mat. 4:​1-11). Rä Zithu mi ꞌmu̱i desidido dä japäbi rä Hesu dä peka kontra rä Zi Dada Jeoba, pa njabu̱ rä Hesu ya hinxä za xä gutꞌi mä pekadohu̱.

8. ¿Ndaꞌu̱ nuꞌu̱ märꞌa yä xuñha bi ñhandui rä Hesu?

⁸ Pe rä Hesu bi ñhandui märꞌa yä xuñha: nuꞌu̱ yä nkontra xa mi u̱tsa ꞌne mi amenäsa ko dä hyo (Luc. 4:​28, 29; 13:31). ꞌNehe bi uanta ora hingä geꞌä mi pe̱fi yä apostol (Mar. 9:​33, 34). Näꞌä rä pa bi tsꞌitsꞌi pa dä tho, xa bri ꞌmu̱ni, bri ꞌme̱tuäbi rä tsa, bri trata ngu nꞌa rä be ꞌne bi tsꞌu̱ti ha nꞌa rä zaa habu̱ xa bi sufri (Heb. 12:​1-3). Ora ya ma xä du, rä Zi Dada Jeoba bi hñäkuäbi gatꞌho näꞌä rä mfatsꞌi mi umbäbi, hänge rä Hesu pe̱ꞌtsi te bi ze̱tise̱ näꞌä sufrimiento asta xa bi du (Mat. 27:46). b

9. ¿Te di sentihu̱ ora di handihu̱ gatꞌho näꞌä bi me̱fi rä Hesu po gekhu̱? (1 Pedro 1:8).

 ⁹ Ja ngu di handihu̱ rä Hesu bi gutꞌi nꞌa rä presio xi xä mädi pa bi ñängägihu̱ de rä pekado ꞌne de rä du. Ora di handihu̱ gatꞌho näꞌä bi sufri rä Hesu po gekhu̱, ¿hänge di sentihu̱ rä mhäte po geꞌä ꞌne di jamädibihu̱? (Hñeti 1 Pedro 1:​8, TNM).

10. ¿Hängu bi gutꞌi rä Zi Dada Jeoba pa bi ñängägihu̱ de rä pekado ꞌne de rä du?

¹⁰ Pe xi rä Zi Dada Jeoba, ¿te bi mꞌu̱i dispuesto dä me̱fi po gekhu̱? Mähyoni gä benihu̱ ge rä Zi Dada Jeoba ꞌne rä Hesu xa mi mädi ꞌne mi pe̱ꞌtsi nꞌa rä hogä ntsitsꞌi entre geꞌu̱, ja ngu nunka xä mädi nꞌa rä dada ꞌne nꞌa rä tꞌu̱ (Prov. 8:30). ¿Dä za gi imäjinä te bi senti rä Zi Dada Jeoba nuꞌmu̱ bi hyandi hanja rä Tꞌu̱ xa bi sufri nuua ha rä Xiꞌmhai? Zäi ge xa bi u̱ rä mfeni ꞌne bi sufri ora bi hyandi ge rä Hesu bri ꞌmu̱ni, bri tꞌu̱tsa, bri ꞌme̱tuäbi rä tsa ꞌne bi tꞌo̱ꞌtuäbi ndunthi yä ntsꞌomꞌu̱i.

11. ¿Te mä kꞌoi dä za gä hutsꞌihu̱ pa gä imäjinähu̱ te bi senti rä Zi Dada Jeoba ora bi hyandi ge bi thopäbi rä Tꞌu̱?

¹¹ Toꞌo xä ꞌme̱di nꞌa rä bätsi ha rä du, dä za dä imäjinä hängu rä sufrimiento ꞌne rä dumu̱i bi senti rä Zi Dada Jeoba ha näꞌä rä je̱ya 33 ora bi hyandi bi thopäbi rä Tꞌu̱ (Mat. 3:17). c Mäjuäni ge nuju̱ di pädihu̱ ge nꞌa rä pa rä Zi Dada Jeoba ma dä gu̱tsꞌi gatꞌho nuꞌu̱ xä du. Pe mäske njabu̱, di sufrihu̱ ora tu nꞌa de nuꞌu̱ mä jäꞌihu̱ di mädihu̱.

12. ¿Te dä za gä pe̱fihu̱ dende nubye̱ änte de dä zo̱ho̱ rä Fenäte de rä du rä Hesu?

¹² Xi nuꞌi, ¿dä za gi ꞌueke ri tiempo dende nubye̱ pa gi nxadise̱ o ko ri familia de näꞌä rä njutꞌi bi uni rä Zi Dada Jeoba ꞌne rä Hesu? Usa rä Guía de estudio para los testigos de Jehová ꞌne nuꞌu̱ märꞌa yä he̱ꞌmi xä rꞌakägihu̱ rä hnini rä Zi Dada Jeoba. d ꞌNehe dä hogi gi hñeti nuꞌu̱ yä testo hutsꞌi habu̱ enä «Hñeti rä Biblia durante rä Fenäte de rä du rä Hesu» ehe ha rä Programä pa yä mhuntsꞌi de rä zänä märso ꞌne abril de rä 2024. ꞌNehe, ogi pumfri gi ku̱tꞌi ha jw.org pa gi hyandi näꞌä rä bideo di ꞌmo̱ꞌtse näꞌä rä pa de rä Fenäte. Mu̱ kada nꞌa de gekhu̱ gä o̱thu̱ ntsꞌe̱di po gä hokihu̱ mä mfenihu̱ ꞌne mä korasohu̱ dende änte, ma dä za gä fatsꞌihu̱ märꞌaa pa dä ntini kongekhu̱ ꞌne dä bädi ndunthi ha nunä Fenäte (Esd. 7:10).

MA GÄ FAXU̱ MÄRꞌA PA DÄ NTINI ꞌNEHE HA RÄ FENÄTE DE RÄ DU RÄ HESU

13. ¿Te dä hogi gä pe̱fihu̱ pa gä fatsꞌihu̱ märꞌaa dä ntini ha rä Fenäte?

¹³ Dä hogi gä mbitabihu̱ gatꞌho yä jäꞌi ora di po̱nihu̱ di predikahu̱. ꞌNehe dä za gä hokihu̱  nꞌa rä lista de gatꞌho nuꞌu̱ dä za gä mbitabihu̱: ngu mä familiahu̱, nuꞌu̱ yä jäꞌi di mpe̱huihu̱, yä yꞌoskuela, yä besinu, ꞌne gatꞌho nuꞌu̱ di pädihu̱. Mu̱ ya bi thege yä imbitasio, dä za gä pe̱hnihu̱ por telefono näꞌä rä imbitasio ja ha jw.org ꞌne ha rä aplicación JW Library. Mähyoni gä pe̱fihu̱ njabu̱ ngeꞌä hindi pädihu̱ hängu yä jäꞌi ma dä ntini kongekhu̱ (Ecl. 11:6).

14. ¿Te utkägihu̱ näꞌä bi thogi ko rä däme nꞌa rä zi nju?

¹⁴ Hindi pädihu̱ te ma dä logra nꞌa rä imbitasio ora di tsokuäbihu̱ yä jäꞌi. Nꞌa rä pa, nꞌa rä zi nju himi tsa dä gamfri näꞌä mi thogi: rä däme hingä mrä Testigo, pe bi ꞌñembäbi ge nubye̱ ma xä ntini ha rä Fenäte de rä du rä Hesu. Nunä zi nju ndunthi yä mꞌiki xki mbitabi rä däme pa dä ntini ha rä Fenäte pe näꞌä nunka xki ne. ¿Xibye̱ te bi ja rä däme por hanja nubye̱ hää mi ne dä ntini? Näꞌä jäꞌi bi xipäbi rä zi nju ge nꞌa rä anciano de rä mhuntsꞌi xki hñäꞌtsuäbi rä imbitasio. Koꞌmu̱ näꞌä anciano xki durämu̱i ꞌne xki hñäꞌtsuäbi rä imbitasio, dende geꞌmu̱ näꞌä jäꞌi di ntini ha rä Fenäte de rä du rä Hesu.

15. ¿Te dä hogi gä benihu̱ ora di mbitabihu̱ nꞌa rä jäꞌi dä ntini ha rä Fenäte de rä du rä Hesu?

¹⁵ Mähyoni gä benihu̱ ge ora di unihu̱ yä imbitasio, ndunthi yä jäꞌi hingi pädi tenguꞌu̱ mä mhuntsꞌihu̱ ꞌne nunka xä ntini ha nunä Fenäte. Po geꞌä, zäi ge pe̱ꞌtsi ndunthi yä ntꞌani ꞌne mähyoni gä pädihu̱ hanja gä thädihu̱ (Col. 4:6). Por ejemplo, zäi ge rꞌa yä zi jäꞌi di ñꞌani: «¿Te di tꞌo̱tꞌe ha nunä Fenäte? ¿Hängu ora ma dä dura? ¿Hanja di debe gä ñhee? ¿Pe̱ꞌtsi te gä jutꞌi rä entrada? ¿Ma dä tꞌadi rä bojä?». Mu̱ ya dä xipäbihu̱ näꞌä jäꞌi te di tꞌo̱tꞌe ha nunä Fenäte, dä hogi gä ambäbihu̱ mu̱ tobe pe̱ꞌtsä mä nꞌa rä ntꞌani. Dä za gä utihu̱ yä bideo Rä Fenäte de rä du rä Hesu ꞌne rä bideo ¿Te di tꞌo̱tꞌe ha rä Ngu de gä Mhuntsꞌi? ꞌNehe, ha rä mfistꞌofo ¡Johya pa nzäntho! ha rä lección 28 ehe te dä hogi gä xipäbihu̱ yä zi jäꞌi.

16. ¿Ndaꞌu̱ märꞌa yä ntꞌani dä za dä yꞌo̱tꞌe nuꞌu̱ yä zi jäꞌi ma dä ntini ha rä Fenäte?

¹⁶ Xti uadi rä Fenäte de rä du rä Hesu, zäi ge rꞌa yä zi jäꞌi ma dä me̱ꞌtsi mä ndunthi yä ntꞌani. Rꞌaa ma dä ñꞌani por hanja ndunthi de gekhu̱ hindä tsihu̱ de rä thuhme ꞌne de rä binu. Märꞌaa  ma dä ñꞌani hängu mꞌiki rä je̱ya di o̱thu̱ rä Fenäte de rä du rä Hesu. Rꞌaa ma dä ne dä bädi mu̱ geꞌä di pe̱fihu̱ ha gatꞌho nuꞌu̱ yä mhuntsꞌi di o̱tꞌehu̱ tatꞌä semänä. Mäske ha näꞌä discurso ma dä tꞌuni ma drä esplika ndunthi de nuya yä tꞌo̱tꞌe, rꞌa yä zi jäꞌi ne gä esplikabihu̱ mä nꞌa tu̱i. Pa gä thädihu̱ nuꞌu̱ yä ntꞌani, dä hogi gä usahu̱ näꞌä imformäsio ehe ha jw.org habu̱ enä «¿Por hanja yä testigo rä Jeoba o̱tꞌe näꞌä rä Fenäte de rä du rä Kristo, pe hingä ja ngu di ja märꞌa yä relijion?». Kada nꞌa de gekhu̱ di nehu̱ gä o̱thu̱ ntsꞌe̱di pa dende änte, durante ꞌne xti uadi nunä Fenäte, gä fatsꞌihu̱ yä zi jäꞌi dä ntini ꞌne dä benefisia de nunä Fenäte bi mända rä Hesu gä jahu̱ (Hech. 13:48).

MA GÄ FAXU̱ NUꞌU̱ YÄ ZI KU XÄ DESANIMÄ ꞌNE XÄ HYE̱GI DE DÄ NTINI HA YÄ MHUNTSꞌI

17. ¿Te dä za dä me̱fi yä anciano pa dä matsꞌi nuꞌu̱ yä zi ku xä desanimä ꞌne xä hye̱gi de dä me̱päbi rä Zi Dada Jeoba? (Ezequiel 34:​12, 16).

¹⁷ Änte xti zo̱ho̱ näꞌä rä pa de rä Fenäte de rä du rä Hesu, ¿te dä za dä me̱fi yä anciano pa dä matsꞌi nuꞌu̱ yä zi ku xä desanimä ꞌne xä hye̱gi de dä me̱päbi rä Zi Dada Jeoba? Mähyoni dä japäbi dä senti ge tuyämu̱i po geꞌu̱ ꞌne ge di mädi ndunthi (hñeti Ezequiel 34:​12, 16). Ancianohu̱, änte de nunä Fenäte hyonihu̱ gatꞌho nuꞌu̱ yä zi ku xä hye̱gi de dä ntini ha yä mhuntsꞌi. Xipäbihu̱ hängu gi turimu̱ihu̱ po geꞌu̱ ꞌne japäbihu̱ dä bädi ge gi ꞌmu̱ihu̱ dispuesto gi umbäbihu̱ rä mfatsꞌi. Mbitabihu̱ dä ntini ha rä Fenäte de rä du rä Hesu. Ora dä tso̱ni ha rä Ngu de gä Mhuntsꞌi, ko ndunthi rä mhäte umbäbihu̱ nꞌa rä hogä ꞌñehe. Xti thogi nunä pa de rä Fenäte, sigi gi hyonihu̱ nuꞌu̱ yä zi ku ꞌne umbäbihu̱ rä mfatsꞌi pa njabu̱ dä mengi ko rä Zi Dada Jeoba (1 Ped. 2:25).

18. ¿Hanja di debe gä tratahu̱ nuꞌu̱ yä zi ku xä hye̱gi de dä ntini ha yä mhuntsꞌi pe nubye̱ ma dä tso̱ni ha rä Fenäte de rä du rä Hesu? (Romanos 12:10).

¹⁸ Ha rä Fenäte de rä du rä Hesu, gatꞌho yä ku de rä mhuntsꞌi dä za gä mfatsꞌihu̱ pa ko rä mhäte, rä ñhojäꞌi ꞌne rä tꞌekꞌei gä umbäbihu̱ nꞌa rä hogä ꞌñehe nuꞌu̱ yä zi ku xä desanimä ꞌne xä hye̱gi de dä me̱päbi rä Zi Dada Jeoba (hñeti Romanos 12:​10, TNM). Mähyoni gä benihu̱ ge nuyu̱ yä zi ku, zäi ge xi xä japäbi xä ñhei dä mengi mänꞌaki ha nꞌa rä mhuntsꞌi. Zäi ge di  ntsa o tuyämu̱i de hanja yä ku ma dä trata. e Po geꞌä xa mähyoni gä benihu̱ ge hingä o̱tpäbihu̱ yä ntꞌani nuꞌu̱ ma dä japäbi dä ꞌme̱ yä tsa o hindä senti xä ñho (1 Tes. 5:11). Nuꞌu̱ xä desanimä ꞌne xä hye̱gi de dä me̱päbi rä Zi Dada Jeoba, tobe mä zi kuhu̱ ꞌne di rꞌakägihu̱ ndunthi rä johya ora di handihu̱ ge tso̱ni mänꞌaki ha rä Ngu de gä Mhuntsꞌi (Sal. 119:176; Hech. 20:35).

19. ¿Te mä benefisio bi hä rä Fenäte de rä du rä Hesu?

¹⁹ Po gatꞌho näꞌä ya dä handihu̱, ¿hänge di bale rä penä gä o̱tꞌehu̱ rä Fenäte de rä du rä Hesu ja ngu bi mända? Mu̱ gä ñhokihu̱ dende änte ꞌne gä pe̱fihu̱ gatꞌho näꞌä ya dä pädihu̱, ma gä hänihu̱ xi ndunthi yä jäpi tanto nuju̱ ngu märꞌa yä zi jäꞌi (Is. 48:​17, 18). Nunä Fenäte jakägihu̱ mänꞌa gä mädihu̱ ꞌne gä umbäbihu̱ njamädi rä Zi Dada Jeoba ꞌne rä Hesu po näꞌä bi me̱fi po gekhu̱. Nunä Fenäte jakägihu̱ gä muntsꞌihu̱ ꞌne gä mꞌu̱ihu̱ unido ko gatꞌho mä kuhu̱. ꞌNehe rꞌakägihu̱ rä oportunida de gä fatsꞌihu̱ märꞌa yä zi jäꞌi pa njabu̱ dä bädi te di debe dä me̱fi ꞌne njabu̱ dä hñäni ꞌnehe nuꞌu̱ yä jäpi bi hä näꞌä rä njutꞌi bi uni rä Zi Dada Jeoba ꞌne rä Hesu. Hänge ma gä sigihu̱ gä o̱thu̱ ntsꞌe̱di pa ko ndunthi rä johya ꞌne rä mhäte gä ntinihu̱ ha rä Fenäte de rä du rä Hesu.