1. Akin ya say Memoryal so sankaimportantian ya agew ed interon taon? (Lucas 22:19, 20)

 PARAD sikatayo ran Tasi nen Jehova, say Memoryal na impatey nen Jesu-Kristo so sankaimportantian ya agew ed interon taon. Ayan okasyon labat so ingganggan nen Jesus ya tinaon ya nodnonoten na saray papatumbok to. (Basaen so Lucas 22:19, 20.) Kanian tatalaranan tayo itan! Amayamay so rason no akin ya espisyal so Memoryal. Pantongtongan tayoy pigara ed saratan.

2. Anto ray pigaran rason akin et espisyal so Memoryal?

² Kada Memoryal, napapanonotan tayo no akin ya importante so dondon tan no anto ray gawaen tayo pian naipanengneng tayon misatsalamat tayo ed impansakripisyo nen Jesus. (2 Cor. 5:14, 15) Tsansa met itan pian napaseseg tayo ray agagi tan napaseseg da tayo met. (Roma 1:12) Kada Memoryal, amayamay so inaktibo ya onaatendi. Say arum ed sikara et apakilos ya ompawil ed si Jehova lapud maar-aro iran in-welcome na agagi. Dakel met so interesado ya nampa-Bible study ta manbilib ira ed saray naobserbaan tan arengel da. On, talagan espisyal so Memoryal!

3. No Memoryal, akin et ekstraordinaryo so pankakasakey tayon sanaagi ed interon mundo? (Nengnengen met so litrato.)

³ Isip mo pa met so ekstraordinaryon pankakasakey tayo kada Memoryal. Amin ya Tasi nen Jehova et mantitipon legan  ya kalkalnan onseselek so agew diad nanduruman pasen ed interon mundo. Saksakey ya paliwawa so narengel tayo tungkol ed dondon. Mangansion tayoy duaran Kingdom song, ipasa tayo ray emblema, tan interon puso tayon ibaga so “amen” ed apatiran pikakasi. Diad loob na 24 oras, ontan ya ontan so gawaen na amin ya kongregasyon diad interon mundo. Kasin naiimadyin moy liket nen Aman Jehova tan Jesus no nanenengneng dan gagawaen tayo irayan amin kada Memoryal? Seguradon makakaimis ira lapud nankakasakey tayon nantitipon pian napagalangan ira.

4. Antoy pantongtongan tayo ed sayan artikulo?

⁴ Pantongtongan tayo ed sayan artikulo irayan tepet: Panon tayon naiparaan so puso tayo parad Memoryal? Antoy gawaen tayo pian natulongan tayo ray interesado ya minabang ed sayan okasyon? Panon tayon natulongan iray inaktibo? No amta tayoy ebat ed sarayan tepet, naiparaan tayoy sarili tayo parad sayan sagradon okasyon.

PANON TAYON NAIPARAAN SO PUSO TAYO PARAD MEMORYAL?

5. (a) Akin et importantin dalepdepen tayoy kaimportantian na dondon? (Salmo 49:7, 8) (b) Antoy naaralan mo ed video ya Akin ya Inatey si Jesus?

⁵ Say sakey ya nagawaan tayo pian naiparaan tayoy puso tayo parad Memoryal et no dalepdepen tayoy kaimportantian na dondon bagat nen Jesu-Kristo. Agtayon balot nadondon so sarili tayo ed epekto na kasalanan tan patey. (Basaen so Salmo 49:7, 8; nengnengen met so video ya Akin ya Inatey si Jesus?) a Kanian nanggawa na paraan si Jehova pian nadondon itayo. Inter toy bilay na mismon Anak to. (Roma 6:23) On, balbaleg so insakripisyo nen Jehova tan Jesus parad sikatayo. No dalepdepen tayo itan, mas napabli tayo so dondon. Pantongtongan tayo no anto ray intepel nen Jehova tan Jesus pian niiter so dondon. Amtaen tayo ni balet no antoy labay ya ibaga na dondon tan no akin ya kailangan tayo itan.

6. Antoy labay ya ibaga na dondon, tan akin et kailangan tayo itan?

⁶ Say dondon et bayar ya kaukolan mon iter pian nabawim so sakey ya bagay. Pinalsa nen Jehova ya perpekto so unonan too, si Adan. Pero nen nankasalanan si Adan, abalang toy ilalo ton manbilay na andi-anggaan tan adamay so amin ya magmaliw ya ananak to. Imbayar nen Jesus so perpekton bilay to pian nabawi so abalang nen Adan. Nen wadiad dalin si Jesus, “anggapoy ginawa ton kasalanan” anggad impatey to. (1 Ped. 2:22) Lapud satan, abayaran na perpekton bilay to so perpekton bilay ya abalang nen Adan.​—1 Cor. 15:45; 1 Tim. 2:6.

7. Anto ran subok so inarap nen Jesus nen wadiad dalin?

⁷ Dakel ya subok so dinalan nen Jesus nen wadiad dalin, pero nansiansian matoor ed Ama tod tawen tan inunor toy amin ya ipapagawa To. Nen ugaw ni Jesus, kaukolan toy manpasakop ed saray atateng to. Subok iman ta perpekto si Jesus, pero aliwan perpekto si Jose tan Maria. (Luc. 2:51) Nen tinedyer la, ompan kaukolan ton labanan so mauges ya impluensya na arum. Tan nen adulto la, kaukolan toy manindigan pian makapanmatoor ed Dios, lalo la ta arap-arapan ya tinukso nen Satanas a Diablo. (Mat. 4:1-11) Labay nen Satanas ya mankasalanan si Jesus pian agto nabayaran so dondon.

8. Anto ni ran subok so inanosan nen Jesus?

⁸ Nen inggapo la nen Jesus so ministeryo to  diad dalin, dakel ni ran subok so inanosan to. Amayamay so kinmontra ed pampupulong to, binusol da, tan binantaan da ni ingen ya pateyen da. (Luc. 4:28, 29; 13:31) Inanosan to met iray aliwliwan ugali na saray papatumbok to. (Mar. 9:33, 34) Nen sikatoy lilitisen ed korte na saray Judio, minaltrato tan ininsulto da, insan da senentensiaan bilang mauge-uges ya kriminal. Makapabaing so impamatey dad sikato! (Heb. 12:1-3) Legan ya akapasak si Jesus ed panamairapan a poste, sikatoy agprinotektaan nen Jehova tan pinaulyanan ton manirap. b​—Mat. 27:46.

9. Antoy naliliknam diad amin ya ginawa nen Jesus pian nabayaran so dondon? (1 Pedro 1:8)

⁹ On, dakel so irap ya dinalan nen Jesus pero intepel to iratan ya amin pian nabayaran so dondon. Makapa-touch anto? No isipen mon amin so ginawa nen Jesus parad sika, seguradon mas naar-arom.​—Basaen so 1 Pedro 1:8.

10. Anto ray intepel nen Aman Jehova pian nadondon itayo?

¹⁰ Si Aman Jehova ey? Anto met iray intepel to pian nabayaran nen Jesus so dondon? No isipen tayoy elet na aroan nen Jehova tan Jesus, anggapoy makapipara ed inka-close dan sanama. (Pro. 8:30) Kanian imadyin mo pay alikna nen Jehova legan ton nanenengneng ya maniirap so inad-aro ton Anak. Seguradon singa duduyoken so puso to!

11. Anton alimbawa so sarag tayon isipen pian walay ideya tayo ed alikna nen Jehova nen inatey si Jesus?

¹¹ Ampaipait ed sakey ya ateng no ompatey so anak to. Anggano amta tayon walay kioli, ansakisakit nin siansia no walay ompatey ya inad-aro tayo. Seguradon ontan met so alikna nen Jehova nen anengneng toy impanirap tan impatey na inad-aro ton Anak nen Nisan 14, 33 C.E. c​—Mat. 3:17.

12. Antoy marakep ya gawaen tayo ed saray agew antis na Memoryal?

¹² Diad sarayay ontutumbok ya agew antis na Memoryal, marakep no i-personal study o i-family worship tayo so tungkol ed dondon. Usar yoy Giya ed Pan-research na Saray Tasi nen Jehova o arum nin publikasyon tayo pian na-research yo iray aralem ya katuaan ya konektado ed dondon. d Maabig met no tumboken yo  may eskedyul na babasaen ed Biblia parad Memoryal ya walad Workbook ed Aral. Tan diad mismon agew na Memoryal, agyo lilingwanan ya bantayan so espisyal ya Morning Worship program. No akaparaan so puso tayo parad Memoryal, napakilos itayon tulongan so arum pian minabang met ira ed satan.​—Esd. 7:10.

TULONGAN SO ARUM YA MINABANG ED MEMORYAL

13. Antoy unonan gawaen tayo pian natulongan tayoy arum ya minabang ed Memoryal?

¹³ Antoy gawaen tayo pian natulongan tayoy arum ya minabang ed Memoryal? Siempre unona ed amin, imbitaan tayo ra. Aliwan saramay walad teritorya tayo labat so sarag tayon imbitaan. Imbitaan tayo met iray kakanayon, katrabaho, kaklase, tan arum nin naisip tayo. Ilistam iray labay mon imbitaan pian anggapoy nalingwanan mo. No bilang ta onkulang so inimprintan imbitasyon, i-share mo may link na electronic ya imbitasyon. Man-imbita ka labat. Malay mo, dakel manaya ed sikara so onatendi!​—Ecl. 11:6.

14. Akin et marakep no imbitaan tayon personal iray kabat tayo? Mangiter na alimbawa.

¹⁴ Duman-duma no personal tayon imbitaan ed Memoryal iray kabat tayo. Imanoen iyan eksperiensya: Aminsan, abigla so sakey ya sister ta imbaga na mister ton aliwan Tasi ya plano toy onatendi ed Memoryal. Akin et abigla? On ta aminpiga to lan itatagar nensaman pero agnin balot inmatendi. Akin balet et labay toy onatendi natan? “Akaawat ak na imbitasyon,” so kuan to. Inter kuno itan na elder ya kabat to. Inmatendi so mister to ed Memoryal diad saman ya taon tan ed tinmutumbok ni ran taon.

15. Antoy tandaan tayo no mangiimbita tayo parad Memoryal?

¹⁵ No mangiimbita tayo parad Memoryal, tandaan tayo ya ompan wala ray tepet na saray iimbitaan tayo, lalo la no agda nin balot asali so akiaral. Kanian isipen tayo la no anto ray nayarin itepet da tan iparaan tayo lay ebat. (Col. 4:6) Singa bilang, ompan itepet da: ‘Antoy nagawa ditan ey?’ ‘Pigaran oras itan?’ ‘Antoy isulong?’ ‘Walay bayar?’ ‘Ompan  kerewan yo kami na donasyon?’ Marakep no tepetan tayo la iray iimbitaan tayo no kasin walay tepet da tan ebatan tayo lan tampol. Pian walay ideya da no antoy nagagawa diad saray pantitipon tayo, sarag tayon ipabantay may video ya Nodnonoten so Impatey nen Jesus tan Antoy Gagawaen Diad Kingdom Hall? Rebyuen tayo met so leksion 28 na libron Panliketan so Bilay ya Anggapoy Anggaan! ta dakel so punto ditan ya nayarin nausar tayo diad pangimbita tayo.

16. Anto ni ray nayarin itepet na saray inmatendi ed Memoryal?

¹⁶ Kayari na Memoryal, ompan wala ni ray tepet na saray interesado ya first time day inmatendi. Ompan mankelaw ira no akin ya pigpigara odino anggapo ni ingen so angan na tinapay tan inminum na alak. Ompan labay dan naamtaan no maminpiga tayon gagawaen so Memoryal tan no kasin ontan so amin ya aral tayo. Nayarin say arum ya tepet da et atalakay met la ed paliwawa, pero ompan kailangan da ni kaaruman ya eksplinasyon. Pian naebatan tayoy tepet da, marakep no rebyuen tayo may artikulo ed jw.org ya “Akin et Midumaan ed Arum a Relihyon so Panseselebra na Saray Tasi nen Jehova ed Pangdem na Katawan?” Komon ta antis, legan, tan kayari na Memoryal et gawaen tayoy anggaay nayarian tayo ya tulongan iray “walaan na dugan kipapasen na puso.”​—Gawa 13:48.

TULONGAN IRAY INAKTIBO

17. Antoy gawaen na saray elder pian natulongan da iray inaktibo? (Ezequiel 34:12, 16)

¹⁷ Sikayo ran elder, antoy gawaen yo pian natulongan yo ray inaktibo no panaon na Memoryal? Ipalikna yoy panangaro tan malasakit ed sikara. (Basaen so Ezequiel 34:12, 16.) Antis na Memoryal, gawa yoy anggaay nayarian yon pasyaren ira. Ibaga yo ya inar-aro yo ra tan labalabay yo ran tulongan. Imbitaan yo rad Memoryal. No inmatendi ira, ipalikna yon welcome ira. Kayari na Memoryal, itultuloy yo ran pasyaren tan kontaken, tan tulongan yo ran ombiskeg lamet ed espiritual ya anggad makapawil ira ed si Jehova.—1 Ped. 2:25.

18. Anto ray nagawaan tayon amin pian natulongan iray inaktibo? (Roma 12:10)

 ¹⁸ Amin tayo ed kongregasyon et walay nagawaan tayo pian natulongan iray inaktibo ya inmatendi ed Memoryal. Ipanengneng tayod sikaray panangaro, kamaongan, tan respeto. (Basaen so Roma 12:10.) Tandaan ya sarayan inaktibo et nantipon na pakpel tan nilabanan day baing da pian makaatendi ra. Ompan aburido ira ya nahusgaan ira tan ag-ira pansinen na agagi. e Kanian alwaran tayoy panagsalita tayo. Seguradoen tayo ya ag-ira nasakitan o nabaingan ed ibaga o itepet tayo. (1 Tes. 5:11) Agtayo komon lilingwanan ya agagi tayo ni ran siansia. Labalabay tayo ran nakaiba lamet ya mandayew ed si Jehova.​—Sal. 119:176; Gawa 20:35.

19. Anto ray marakep ya resulta no nodnonoten tayoy impatey nen Jesus?

¹⁹ Maong labat ta ingganggan nen Jesus ya tinaon tayon nodnonoten so impatey to. Dakel so maabig ya resulta na iyatendi tayo ed Memoryal. (Isa. 48:17, 18) Lalo tayon naaaro si Aman Jehova tan Jesus. Naipapanengneng tayo ya misatsalamat tayo ed amin ya ginawa ra parad sikatayo. Lalo met ya onaapit so liknaan tayo ed saray agagi. Tan natutulongan tayoy arum pian minabang ira ed dondon. Manparaan tayon maong sirin parad sayan Memoryal​—say sankaimportantian ya agew ed sayan taon!