1. Wuarom es daut Owentmol de wichtichsta Dach em Joa? (Luk. 22:19-20).

 DAUT Aundenkjen aun Jesus sienen Doot es de wichtichsta Dach em Joa fa Jehowa siene Deena. Dit es daut eensje Toopkomen, waut Jesus uzhent bestalt haft, daut siene Nofolja daut hoolen sullen (läs Lukas 22:19-20). Daut jeft veschiedne Uasoaken, wuarom wie ons to daut Owentmol freien. Räd wie mol von eenjet.

2. Wuarom frei wie ons aul to daut Owentmol?

² Daut Owentmol halpt ons denkjen, woo väl wieet daut Leesjelt es. Daut halpt ons uk denkjen, woo wie opp veschiedne Wäaj wiesen kjennen, daut wie fa Jesus sien Opfa dankboa sent (2. Kor. 5:14-15). Doa kjennen de Breeda un Sestren sikj uk omzajcht Moot toospräakjen un “mootja woaren” (Reem. 1:12). Jieda Joa komen soone toom Owentmol, waut sikj mol von de Vesaumlunk trigjjetrocken haben. Wäajen äant doa soo leeftolich oppjenomen woat, komen väle soogoa trigj no Jehowa. Väl Menschen fangen uk aun, de Bibel to studieren, wäajen dee daut soo sea jleichen, waut dee doa seenen un hieren. Dauts nich toom wundren, wuarom daut Owentmol fa ons soo besonda es!

3. En woone Stekjen sent wie aun dän Dach von daut Owentmol met onse Breeda äwa de gaunze Welt veeent? (See uk daut Bilt.)

³ Wie freien ons uk to daut Owentmol, wiels wie aun disen Dach met onse Breeda un Sestren oppe gaunze Welt toop dautselwje doonen. Biem Sonnenunjagank komen Jehowa siene Zeijen oppe gaunze Welt toop. Dee horchen no eene Räd, wua daut utjelajcht woat, woo wichtich daut Leesjelt es. Wie sinjen twee Leeda toom Gott lowen, daut Broot un de  Wien woaren romjerieekjt un wie sajen von gaunzen Hoaten to vea Jebäda “Amen”. En benna 24 Stund woaren aule Vesaumlungen dautselwje jedonen haben. Denkj mol han, woo sea Jehowa un Jesus sikj motten freien, wan dee seenen, daut wie äant veeent opp dise Wajch ieren!

4. Waut woa wie en disen Artikjel derchgonen?

⁴ En disen Artikjel woa wie dit seenen: Woo kjenn wie ons fa daut Owentmol reedmoaken? Woo kjenn wie aundre halpen, eenen Nutzen von daut Owentmol to haben? Un woo kjenn wie dee halpen, waut sikj von de Vesaumlunk trigjjetrocken haben? Dise Froagen to beauntwuaten woat ons halpen, reed to sennen fa dit sea wichtje Toopkomen.

WOO KJENN WIE ONS FA DAUT OWENTMOL REEDMOAKEN?

5. (a) Wuarom sell wie doaräwa nodenkjen, woo väl wieet daut Leesjelt es? (Psalm 49:8-9). (b) Waut kaust du lieren von daut Video Wuarom must Jesus stoawen?

⁵ Wan wie doaräwa nodenkjen, woo wieetvoll Jesus Christus sien Leesjelt es, dan kjenn wie ons eent von daut baste fa daut Owentmol reedmoaken. Wie wudden selfst kjeenmol von de Sind un dän Doot loosjekomen sennen (läs Psalm 49:8-9; see uk daut Video Wuarom must Jesus stoawen?). a Jehowa haft daut soo enjerecht, daut Jesus sien Läwen jeef, om ons to raden. Fa Jehowa un uk fa Jesus wia daut een grootet Opfa (Reem. 6:23). Je dolla wie doaräwa nodenkjen, waut Jehowa un Jesus fa ons jedonen haben, je mea woa wie daut Leesjelt räakjnen. Wie woaren nu mol een poa von dee Sachen seenen, waut Jehowa un Jesus daut Leesjelt jekost haft. Oba daut ieeschte woa wie seenen, waut bie daut Leesjelt met en wia.

6. Waut es bie daut Leesjelt met en?

⁶ Een Leesjelt es een Pries, waut eena betolt toom waut trigjkjeepen. Adam wia de ieeschta Mensch, waut jemoakt wort, un wia volkomen. Oba aus hee sindjen deed, vespälden hee un uk siene Kjinja daut eewje Läwen. Om daut trigjtokjeepen, waut Adam veloaren haud, jeef Jesus sien ieejnet, volkomnet Läwen aus Opfa. “Jesus haud kjeene Sind jedonen, äwa siene Leppen sent kjeene Läajes jekomen”, aus hee oppe Ieed wia (1. Pet. 2:22). Un aus Jesus storf, wia hee volkomen, krakjt soo aus Adam ea wia, ea hee jesindicht haud. Met sien Opfa betold Jesus dän Pries fa daut Läwen, waut Adam veloaren haud (1. Kor. 15:45; 1. Tim. 2:6).

7. Waut fa schwoaret must Jesus oppe Ieed beläwen?

⁷ Aus Jesus oppe Ieed wia, wia hee Jehowa emma jehuarsom, wan daut uk nich emma leicht wia. Aus Kjint wia hee volkomen un haud onvolkomne Elren, oba hee wia dee doawäajen emma jehuarsom (Luk. 2:51). Aus Jugentlicha must hee doamet foadich woaren, wan aundre am beräden wullen, siene Elren ooda Jehowa ojjehuarsom to woaren. Un aus groota Mensch haud Jesus jäajen dän Soton to kjamfen, waut am hinjalestich aufproowen wull ooda soogoa jlikjtoo säd, daut hee Gott ontru woaren sull (Mat. 4:1-11). Soton wull, daut Jesus onbedinjt eene Sind bejinkj, daut dee daut Leesjelt nich betolen kunn.

8. Waut fa schwoaret must Jesus noch beläwen?

⁸ En sienen Deenst oppe Ieed wort hee wieda aufjeprooft. Siene Jäajna vefoljden am un wullen am dootmoaken (Luk. 4:28-29; 13:31). Hee must uk met de Onvolkomenheit von siene Nofolja foadich woaren (Mar. 9:33-34). Un aus hee verem Jerecht wia, deeden se am sea vespotten un kjwälen. Dan wort hee opp eene sea grausome Wajch hanjerecht un must soo  stoawen, daut et toom schämen wia (Heb. 12:1-3). Un daut latste Stootskje aun dän Liedenspol must hee noch met sien schwoaret auleen foadich woaren – onen Jehowa siene Help (Mat. 27:46). b

9. Woo jeit die daut, wan du äwa Jesus sien Opfa nodenkjst? (1. Petrus 1:8).

⁹ Om daut Leesjelt to betolen, haft Jesus secha sea väl must lieden. Kjrie wie doaderch nich eene groote Leew fa am, wan wie doaräwa nodenkjen, waut hee fa ons jedonen haft? (läs 1. Petrus 1:8 un Footnoot).

10. Woo jinkj Jehowa daut, aus Jesus storf?

¹⁰ Woo wia daut bie Jehowa? Waut wia hee reed opptojäwen, daut Jesus daut Leesjelt betolen kunn? Denkj mol han, woo daut mott fa Jehowa jewast sennen, aus hee sach, daut sien Sän oppe Ieed soo sea lieden must. Daut jeft nich noch eenen Voda un eenen Sän, waut soo enj vebungen sent aus Jehowa un Jesus (Spr. 8:30, NW). Kjeen Twiewel, daut Jehowa daut wee deed, aus hee sach, daut sien Sän schlajcht behaundelt, aufjewäsen un aufjeprooft wort.

11. Waut von Biespel wiest, woo Jehowa sikj mott jefeelt haben, aus Jesus hanjerecht wort?

¹¹ Jieda Poa Elren, waut daut beläft haft, daut äa Kjint jestorwen es, weeten, woo schwoa daut es. Wie jleewen faust doaraun, daut de Doodes oppstonen woaren, oba doavon gonen de Weedoag nich wajch, daut wäa jestorwen es. Dit Biespel wiest, woo Jehowa sikj dän Dach aune 33 n.Chr. mott jefeelt haben, aus hee sach, daut sien leewa Sän lieden un stoawen must (Mat. 3:17). c

12. Waut kjenn wie en de Wäakjen ver daut Owentmol doonen?

¹² Proow von nu bat daut Owentmol en dien perseeneljet ooda en daut Famieljenstudium mea äwa daut Leesjelt to lieren. Bruck doatoo de Help toom nosieekjen fa Jehova siene Zeijen ooda aundre Bieekja, wua du dit Teema deep studieren kaust. d Läs uk aul de Bibelvarzhen en daut Bibelläsen fa daut Owentmol, waut en Ons christeljet Läwen un Deenst – Schoolheft steit. Un vejät uk nich, aun dän Dach von daut Owentmol de besondre Morjenaundacht to kjikjen. Wan du die fein reedmoakst fa daut Owentmol, woascht du uk aundre halpen kjennen, daut dee doa eenen Nutzen von haben kjennen (Esra 7:10).

 AUNDRE HALPEN, EENEN NUTZEN VON DAUT OWENTMOL TO HABEN

13. Waut es daut ieeschte, woo wie aundre halpen kjennen, eenen Nutzen von daut Owentmol to haben?

¹³ Woo kjenn wie aundre halpen, eenen Nutzen von daut Owentmol to haben? Na, daut ieeschte mott wie dee enloden. Wie kjennen ons daut oppschriewen, wäm wie noch wudden jleichen entoloden, buta dee, waut wie em Prädichtdeenst enloden. Daut kaun wäa von ons Frintschoft, Oabeitspoatna, Schoolpoatna un aundre sennen, waut wie kjanen. Mau rajcht wan wie nich jenuach jedrekjte Enlodungen haben, kjenn wie dee eene Enlodunk äwa Fon schekjen. Wäa weet, woo väl von dee komen woaren! (Liera 11:6).

14. Waut deit daut aun aundre, wan wie dee eenen Enlodungszadel jäwen? Jeff een Biespel.

¹⁴ Wäm eenen Enlodungszadel jäwen, kaun väl mea aun dän doonen, aus wie denkjen. Eene Sesta, dee äa Maun nich eent von Jehowa siene Zeijen es, wundad daut sea, aus äa Maun säd, daut hee wull met ar toop nom Owentmol foaren. Wuarom wundad ar daut? Wäajen see am ea ieremol enjelot haud, oba hee haud daut kjeenmol jedonen. Wuarom wia daut nu aundasch? Wäajen hee eenen Enlodungszadel kjrieech. Hee säd, daut een Eltesta von de Vesaumlunk, dän hee kjand, am eenen Enlodungszadel jejäft haud. De Maun wia dit Joa biem Owentmol un uk de näakjste väle Joaren.

15. Waut well wie em Denkj hoolen, wan wie de Menschen toom Owentmol enloden?

¹⁵ Vejät nich, daut soone, waut wie enloden, veleicht Froagen haben, besonda wan dee noch nich bie eent von onse Toopkomes jewast sent. Wie sellen äwalajen, waut vonne Froagen dee veleicht haben, un ons reedmoaken toom dee beauntwuaten (Kol. 4:6). Veleicht wundren dee: “Waut woat bie daut Owentmol jedonen? Woo lang dieet daut? Woo mott ekj mie auntrakjen? Mott ekj betolen toom doa nennkomen? Woat doa Jelt jefoddat woaren?” Wan wie wäm toom Owentmol enloden, dan kjenn wie eefach froagen, “Hast du irjent Froagen?”, un dee dan beauntwuaten. Wie kjennen uk de Videos  Denkjt aun Jesus sienen Doot un Woo es daut en de Vesaumlungshiesa von Jehova siene Zeijen? brucken toom dänjanjen wiesen, woo onse Toopkomes aufjehoolen woaren. Un en daut 28. Kapitel von daut Buak Een scheenet Läwen fa emma! sent uk feine Iedeeen, waut wie dänjanjen wiesen kjennen.

16. Waut fa Froagen kjennen deejanje veleicht haben, waut daut ieeschte mol toom Owentmol komen?

¹⁶ Soone, waut toom ieeschte mol biem Owentmol sent, haben nodäm veleicht noch mea Froagen. Dee wundren veleicht, wuarom bloos weinich ooda kjeene von daut Broot un dän Wien neemen. Dee wundren veleicht uk, woo foaken wie daut Owentmol hoolen. Un dee jankat veleicht to weeten, aus aule Toopkomes von Jehowa siene Zeijen opp dise Wajch aufjehoolen woaren. Bie de Owentmolsräd woat von dise Sachen jerät, oba eena mott eenen Nieen daut veleicht noch dietelja utlajen. Om eenje von dise Froagen to beauntwuaten, kaun eena dän Artikjel opp jw.org brucken, “Wuarom fieren Jehova siene Zeijen daut Owentmol aundasch aus aundre Gloowes?” Wie wellen ver un bie daut Owentmol un uk nodäm aules doonen, waut wie kjennen, toom deejanje halpen, waut “rajcht enjestalt” sent, daut dee kjennen eenen Nutzen von dit Toopkomen haben (Apj. 13:48).

DEE HALPEN, WAUT SIKJ VON DE VESAUMLUNK TRIGJJETROCKEN HABEN

17. Woo kjennen de Eltestasch deejanje halpen, waut sikj trigjjetrocken haben? (Hesekiel 34:12, 16).

¹⁷ Woo kjennen de Eltestasch ver daut Owentmol soone halpen, waut sikj von de Vesaumlunk trigjjetrocken haben? Wies dee, daut du om äant todoonen best (läs Hesekiel 34:12, 16). Proow ver daut Owentmol met soo väl aus mäajlich von dee to räden. Saj dee, daut du äant waut räakjenst un äant soo goot aus mäajlich halpen west. Kroag dee no daut Owentmol, un wan dee dan komen, dan nemm dee leeftolich opp. Proow dise Breeda un Sestren no daut Owentmol to besieekjen un beed dee aun, daut du äant em jeisteljen halpen woascht, daut see kjennen trigj no Jehowa komen (1. Pet. 2:25).

18. Woo kjenn wie aula soone halpen, waut sikj trigjjetrocken haben? (Reema 12:10).

 ¹⁸ Woo kjennen aule enne Vesaumlunk bie daut Owentmol soone halpen, waut sikj trigjjetrocken haben? Doaderch, daut dee dee leeftolich un met Respakjt behaundlen (läs Reema 12:10). Denkj doaraun, daut dise Breeda daut veleicht es schwoa jewast, wada no een Toopkomen to komen. Veleicht haben dee Angst jehaut, daut äant nich wudd fein oppjenomen woaren. e Proow dee nich Froagen to stalen, wuamet dee sikj ommaklich feelen, ooda irjentwaut to sajen, waut dee kunn weedoonen (1. Tess. 5:11). Dise Breeda un Sestren sent je doch onse Gloowesbreeda. Wie freien ons, wada met äant toop Jehowa auntobäden! (Psa. 119:176; Apj. 20:35).

19. Woo kjemt ons daut togood, daut Aundenkjen aun Jesus sienen Doot to fieren?

¹⁹ Es daut nich scheen, daut Jesus daut soo enjerecht haft, daut wie daut Aundenkjen aun sienen Doot jieda Joa aufhoolen kjennen? Wan wie bie daut Owentmol sent, kjemt ons selfst un uk aundre daut opp veschiedne Wäaj togood (Jes. 48:17-18). Onse Leew woat emma jrata fa Jehowa un Jesus. Wie wiesen doamet uk, woo väl wie daut räakjnen, waut dee fa ons jedonen haben. Wie woaren uk emma jratre Frind met onse Breeda un Sestren. Un wie kjennen veleicht uk aundre halpen to vestonen, waut see doonen kjennen, daut äant daut Leesjelt togood kjemt. Well wie aules doonen, waut wie kjennen, om reed to sennen fa daut Owentmol dit Joa – daut es de wichtichsta Dach em Joa!