1. Mukunda natshi lusugu lua Guwunguluga Gufua gua Yesu luana khala lusugu lua ndando mu givo? (Luka 22:19, 20)

 LUSUGU lua Guwunguluga Gufua gua Klisto, luana khala lusugu lua ndando mu givo mukunda nu Matemue a Yehowa. Phamba yene ndaga yabalega ndando Yesu wawambelele alandudi enji ha gulandula gutshita. (Tanga Luka 22:19, 20.) Gudi nu ndaga jiavula jiana gututuma ha gutshita Guwunguluga Gufua gua Yesu. Tuzuelelenu ndaga jiko mukatshi dia ndaga jiene.

2. Ndaga jitshi jiana gututuma ha Guwunguluga Gufua gua Yesu?

² Guwunguluga Gufua gua Yesu guana gutukuatesa ha gutangigiza luholo mulambu wa Yesu udi nu ndando, nu gubonga tuana heta mukunda nu mulambu wene. Guana gutuwunguluisa nji maluholo tuajiya guhana Yehowa mersi mukunda nu mulambu wa Yesu. (2 Kol. 5:14, 15) Luko, guana gutuhana luendu lua ‘gudikolesa hamoshi’ nu aphangi a mala nu a akhetu. (Roma 1:12) Givo nu givo, aphangi avula alebele gale mu nyuma anaza nji mu gudibungisa guene. Ako ana zula desizio dia guvutuga gudi Yehowa, luholo aphangi ana guayamba nu gisemo giagasue. Athu ako avula ana gudihula mu ndaga ana mona nu jinyi ana vua, ndaga jiene jiana guatuma ha guzula desizio dia gusendesa gulonguga Biblia. Ndaga eji jiagasue, jiana buisa Guwunguluga Gufua gua Yesu ndaga yandando mukunda nu esue!

3. Mu luholo lutshi Guwunguluga Gufua gua Yesu guana bungisa aphangi a ha mavu a mudidi? (Tala nji gifuenesa.)

³ Tangiza nji luholo Guwunguluga Gufua gua Yesu guana gutubungisa hamoshi nu aphangi a mala nu a akhetu a ha mavu agasue. Ha mavu a mudidi Matemue a Yehowa ana gudibungisa ha Guwunguluga Gufua gua Yesu, tangua kumbi diana sendesa gushiwuga mage-mage. Mukut’etu agasue tuana landula diskur diana monesa egi gibawu gidi nu ndando. Tuana yimba ngimbo mbadi ha gutumbuisa  Yehowa, tuana balegesa mapha nu vinyo. Mukut’etu agasue tuana taya nji “amen” gu isambu nguana yana kalegewa mu gudibungisa guene. Mu matangua 24, mahungu agasue a Matemue a Yehowa mbaalandula programe ya luholo lumoshi. Tangiza luholo Yehowa nu Yesu ana gudivua, tangua ana gutumona gudibungisa hamoshi ha guatumbuisa mu luholo elu!

4. Itshi tuza mumona mu longo edi?

⁴ Mu longo edi, tuza mutadila mihu eyi: Luholo lutshi tuajiya gulondega matangi etu mukunda nu Guwunguluga Gufua gua Yesu? Luholo lutshi tuajiya gukuatesa athu ako ha guheta gubonga gua ndaga yene? Luholo lutshi nji tuajiya gukuatesa athu anyi alebele gale mu nyuma? Mvutu jia mihu eyi jiza gutukuatesa ha gudilondega mukunda nu ndaga eyi ya ndando.

LUHOLO LUTSHI TUAJIYA GULONDEGA MATANGI ETU MUKUNDA NU GUWUNGULUGA GUFUA GUA YESU?

5. (a) Mukunda natshi tudi naye gutangigiza mu ndando ya gibawu? (Ngimbo 49:7, 8) (b) Longo ditshi wazudi mu video Mukunda Natshi Yesu Wafuile?

⁵ Ndaga yabalega ndando tuajiya gutshita ha gulondega matangi’etu mukunda nu Guwunguluga Gufua gua Yesu, idi gutangigiza ndando ya mulambu wahanele Yesu Klisto. Gushigo nga ndaga imoshi tuakhalele naye gutshita ha gudikatula mu uhiga wa gubola nu wa gufua. (Tanga Ngimbo 49:7, 8; tala nji video Mukunda Natshi Yesu Wafuile?) a Hene Yehowa walondele ndaga hagula Yesu ahane monyo wenji ha gutuhuluisa, mukut’awo agasue atshitshile diago ndaga imoshi ya ndando. (Roma 6:23) Gula tudi mutangigiza ndaga Yehowa nu Yesu akalegele mukunda nu esue, mbayitutuma ha guahana mersi mukunda nu gibawu. Mu longo edi, tuza muzuelela malamba azonda Yehowa nu Yesu atshiginyile ha guhana gibawu. Uvi, tutadilenu thomo gula gibawu gidi mukotelesa itshi?

6. Gibawu gidi itshi?

⁶ Gibawu gidi ndando ana futa ha gukula gima gimoshi ngenyi. Adama wakhalele muthu watagana tangua Nzambi wamufugile. Uvi tangua gakalegele gubola, watotesele luendu luenji lua gujinga mayilago nu lua an’enji agasue. Ha guheta luendu lunu Adama watotesele, Yesu wahanele monyo wenji watagana gifua mulambu. Tangua Yesu wakhalele ha mavu, “gatshitshilego gubola, gazuelelego nga mbimbi imoshi ya mambo mukano dienji.” (1 Phet. 2:22) Tangua Yesu wafile, wakhalele muthu watagana gifua luholo Adama wakhalele gutuama dia gukalagala gubola. Hene luholo luatshiginyile muene guhana monyo wenji gifua mulambu, Yesu wafutshile ndando ya monyo unu Adama watotesele.​—1 Kol. 15:45; 1 Tim. 2:6.

7. Malamba ako atshi Yesu watagenele nawo tangua diakhalele muene ha mavu?

⁷ Tangua Yesu wakhalele ha mavu, wakhalele mutumagela Yehowa mu ndaga jiagasue ikhale tangua yakhalele lamba ha guyitshita. Yesu wakhalele muthu watagana; mvuaji jienji jiakhalelego athu atagana, uvi walanduile guatumagela. (Luka 2:51) Hakhalele muene muvuala yajiya gukhala egi athu ako akhalele gumushinjiga ha gutuna gutumagela mvuaji jienji nga Yehowa, uvi gatshiginyilego. Hakudile Yesu, wakhalele naye gutshita ngolo ha gutuna gubua mu miheto ya Satana Diabulu yago wamuwambelele haphelo egi atune gutumagela Nzambi. (Mat. 4:1-11) Satana wakhalele mutshita yagasue ha gubuisa Yesu mu gubola hagula gafutshigo gibawu.

8. Yesu wakolesele mu malamba atshi ako?

⁸ Tangua Yesu wakhalele mutshita mudimo wa gulongesa watagenele nu malamba ako. Mbalagaji jienji jiakhalele gumusagesa, akambele nji gumushiya. (Luka 4:28, 29; 13:31) Wakhalele nji mukolesela mu guleba gua alandudi enji. (Mako 9:33, 34) Tangua amusophesele amukhokhele gu mutshi nu amuseguluile. Gungima amushiyile gifua mbundudi, gufua gua lamba diago. (Heb. 12:1-3) Yesu wakolesele lamba dia gisugishilo dia monyo wenji muene hakhenji, Yehowa gamubambelego. b​—Mat. 27:46.

9. Ndaga Yesu watshitshile ha guhana monyo wenji mukunda nu esue yana gututuma ha gutshita itshi? (1 Phetelo 1:8)

 ⁹ Idi yadiago egi Yesu wamonele malamba avula ha guhana monyo wenji gifua mulambu. Tangua tuana tangigiza malamba agasue Yesu watshiginyile gumona ha guhana monyo wenji mukunda nu esue, yana gututuma ha gumuzumba muavula diago.​—Tanga 1 Phetelo 1:8.

10. Lamba ditshi Yehowa watshiginyile ha guhana Yesu gifua mulambu?

¹⁰ Lamba ditshi Yehowa watshiginyile ha guhana Yesu gifua mulambu? Yehowa nu Yesu ana khala nu ufuta wakola gifua luholo tata mumoshi wajiya gukhala nu ufuta wakola nu mun’enji wa yala. (Ish. 8:30) Tangiza gale luholo Yehowa wavile gikenene tangua diakhalele muene mumona Yesu mukolesela mu malamba avula ha mavu. Yehowa wavile diago gikenene ha gumona luholo athu akhalele mumonesa mun’enji lamba nu luholo amutunyile. Idi yadiago egi ndaga yene yamuhanele lamba, luholo gakhalele mumona athu musagesa mun’enji nu luholo amutunyile.

11. Hana gifezegeselo gidi mumonesa luholo Yehowa wadivile tangua Yesu washiyiwe.

¹¹ Mvuaji wagasue wafishile gale mona, wana gujiya muabonga gikenene giakola muthu wana khala nagio gula wafisa mona. Tuana khala nu gutshigina guakola mu felela dia gufumuzumuga, uvi gula muthu tuana zumba wafua, tuana vua gikenene. Gifezegeselo egi gidi gutukuatesa ha gukotelesa luholo Yehowa wadivile, tangua diamonele muene mun’enji gakhelele muzumba mumona malamba nu gufua mu sungi ya printemps mu givo 33 G.Y. c​—Mat. 3:17.

12. Itshi tuajiya gutshita gutuama egi tuhete mu lusugu lua Guwunguluga Gufua gua Yesu?

¹² Sendese mangino uu nu mu sungi ya Guwunguluga Gufua gua Yesu, tshita ngolo ha gulonguga ndaga jiavula jiatadila gibawu mu gulonguga guaye hakhaye nga mu gukombelela guenu gua mu fami. Kalegela Guide de recherche pour les Témoins de Jéhovah (gula mudi nayo mu zuelelo dienu) nga mikanda yetu iko ha gujiya ndaga jiavula jiatadila gibawu. d Nga ndo landula nji programe ya lutango lua Biblia mukunda nu Guwunguluga Gufua gua Yesu, yana zoga mu Lujingu nu Mudimo wa Uklisto​—Mukanda wa Gukalegela mu Gudibungisa. Mu lusugu lua Guwunguluga Gufua gua Yesu, ubuitshigo mutshima ha gutala programe ya ndando ya Gukombelela gua Mugimenegena. Gula tualondega matangi’etu mukunda nu Guwunguluga Gufua gua Yesu, mbatukuatesa athu ako ha guheta gubonga gua ndaga yene.​—Ez. 7:10.

 KUATESA ATHU AKO HA GUHETA GUBONGA GUA GUWUNGULUGA GUFUA GUA YESU

13. Ndaga itshi ya thomo tuajiya gutshita ha gukuatesa athu ako ha guheta gubonga gua Guwunguluga Gufua gua Yesu?

¹³ Luholo lutshi tuajiya gukuatesa athu ako ha guheta gubonga gua Guwunguluga Gufua gua Yesu? Ndaga ya thomo idi, guatamega ha guza mu gudibungisa guene. Gula tuatamega athu tuana tagana nawo muavula mu mudimo wa gulongesa, tuajiya nji gusonega majina a athu ako tuana jiya ha guatamega nji. Yajiya gukhala enya fami yetu, mafut’etu a mudimo, ana khalasa dietu nga athu ako tuana jiya. Ikhale tushigo nu ba emvitasio avula a papie, tuajiya gutumina athu ba lien mu telefone. Tuajiya gudihula ha gumona athu avula muza mu gudibungisa guene!​—Mulo. 11:6.

14. Mukunda natshi idi nu ndando ha guya muhana emvitasio? Hana gifezegeselo.

¹⁴ Gula aye hakhaye waya muhana muthu emvitasio, yajiya gumuhana nzala ya guza. Phangi mumoshi wa mukhetu mulumi’enji gashigo Temue wa Yehowa, wadihudile tangua yala muene wamuwambelele egi muene nji udi naye guya mu gudibungisa gua Guwunguluga Gufua gua Yesu. Mukunda natshi phangi muene wa mukhetu wadihudile? Handaga mbala jiavula wakhalele gumutamega ha guya, uvi muene wakhalele mutuna. Itshi yamutumine ha gusombegesa matangi’enji? Yala muene wazuelele egi: “Amuhanele emvitasio ya papie” gudi mukulu mumoshi adijiyile n’enji. Yala muene wayile mu gudibungisa gua Guwunguluga Gufua gua Yesu gua mu givo giene, gungima walanduile nji guya.

15. Itshi tushigo naye gujimbila tangua tudi mutamega athu ha guza mu gudibungisa gua Guwunguluga Gufua gua Yesu?

¹⁵ Jiyenu egi athu tuana hana emvitasio ajiya gutuhula mihu gula idi mbala yawo ya thomo ya guza mu gudibungisa guene. Hene, tuajiya gutangigiza mihu ajiya gutuhula nu gudilondega ha guahana mvutu. (Kol. 4:6) Ha gufezegesa athu ako ajiya gutuhula egi: ‘Ndaga itshi mbayikalegewa guene?’ ‘Mbayizula matangua guvula gutshi?’ ‘Luholo lutshi ngudi naye gusudiga?’ ‘Ngudi naye gufuta mbongo ha gungina?’ ‘Gula ngeza mu gudibungisa guene mbaangutoga musomo?’ Gula tuatamega muthu ha guza mu gudibungisa gua Guwunguluga Gufua gua Yesu, tuajiya gumuhula egi: “Udi nu mihu ba?” gula watshigina tuajiya gumuhana mvutu gu mihu yenji. Tuajiya nji gukalegela video Guwunguluga Gufua gua Yesu nu  video Ndaga tshi jiana balega mu Inzo ya Ufumu? ha gukuatesa athu tudi muta nawo maga ha gujiya luholo tuana kalagala gudibungisa guetu. Luko, mukanda Heta Monyo wa Ivo nu Ivo! mu longo 28 mudi nu ndaga jiko jiavula jiabonga tuajiya gukalegela ha gukuatesa muthu tudi muta n’enji maga.

16. Mihu itshi iko athu adi muza mu gudibungisa gua Guwunguluga Gufua gua Yesu ajiya gukhala nayo?

¹⁶ Gula athu adi musuanguluga nu giamatshidia aza mu gudibungisa gua Guwunguluga Gufua gua Yesu, ajiya gukhala nu mihu iko ya guhula. Ajiya gutuhula egi mukunda natshi nga muthu mumoshi nu gudia ndo dipha nga gunua vinyo, nga ndo mukunda natshi phamba athu azonda adi dipha nu anui vinyo. Ajiya nji gutuhula egi mbala gutshi tuana tshita Guwunguluga Gufua gua Yesu. Ajiya gukamba gujiya gula gudibungisa guagasue gua Matemue a Yehowa guana kalegewa luholo lumoshi. Ikhale ndaga jiavula mukatshi dia ndaga eji jiana zuelewa mu diskur dia Guwunguluga Gufua gua Yesu, uvi athu anyi ana guza mbala ya thomo ajiya gukhala nu funu ya gujiya ndaga jiko jiavula. Longo didi nu muto wa lumene egi: “Pourquoi les Témoins de Jéhovah célèbrent-ils le Repas du Seigneur différemment des autres religions?” mu jw.org, diajiya gutukuatesa ha guhana mvutu gu mihu iko athu ene atuhudi. Tudi mutshigina gutshita ngolo ha gukuatesa athu adi nu “mitshima yatagana” gutuama, mu tangua dia Guwunguluga Gufua gua Yesu nu gungima ha guheta gubonga gua ndaga yene.​—Makal. 13:48.

KUATESA ATHU ALEBELE GALE MU NYUMA

17. Luholo lutshi akulu ajiya gukuatesa aphangi alebele gale mu nyuma? (Ezekiele 34:12, 16)

¹⁷ Luholo lutshi akulu ajiya gukuatesa athu alebele gale mu nyuma mu sungi ya Guwunguluga Gufua gua Yesu? Khalenu mumonesa egi muana gudisagesa mukunda nu ene. (Tanga Ezekiele 34:12, 16.) Gutuama dia Guwunguluga Gufua gua Yesu, tshitenu ngolo ha guya mutala aphangi anyi alebele gale mu nyuma. Awambelenu egi muana guazumba nu mudi mutshigina guakuatesa. Atamegenu ha guza mu gudibungisa gua Guwunguluga Gufua gua Yesu. Gula eza, ayambenu nu gisemo giagasue. Gungima dia Guwunguluga Gufua gua Yesu, landulenu guya guatala nga guatamega gu telefone. Akuatesenu nu ima adi nayo funu hagula ajiya guvutuga gudi Yehowa.​—1 Phet. 2:25.

18. Luholo lutshi mukut’etu agasue tuajiya gukuatesa aphangi alebele gale mu nyuma? (Roma 12:10)

¹⁸ Luholo lutshi aphangi agasue mu hungu ajiya  gukuatesa aphangi alebele gale mu nyuma gula aza mu gudibungisa gua Guwunguluga Gufua gua Yesu? Gula adi guakalegela ndaga nu guzumba nu gisemo nu guanemesa. (Tanga Roma 12:10.) Mujimbilago egi matangua ako yajiya gukhala lamba gudi aphangi awa ha gusendesa guza luko mu gudibungisa gua mu hungu. Matangua ako, ana vua woma egi gula avutuga aphangi mbaashigo guayamba muabonga. e Hene tuahudigo mihu yajiya guahana musonyi nga guzuela ndaga imoshi yajiya guasagesa. (1 Tes. 5:11) Aphangi awa a mala nu a akhetu adi aphangi’etu Aklisto. Tudi nu gusuanguluga ha gukombelela luko Yehowa hamoshi nawo!​—Ngi. 119:176; Makal. 20:35.

19. Gubonga gutshi tuajiya guheta gula tuaya mu gudibungisa gua Guwunguluga Gufua gua Yesu?

¹⁹ Tudi nu gusuanguluga luholo Yesu watuwambelele ha guwunguluga gufua guenji givo nu givo, tuana jiya nji mukunda natshi ndaga yene idi nu ndando. Gula tuaya mu gudibungisa guene, tuana heta gubonga nu tuana kuatesa nji athu ako mu maluholo a gudisha. (Yesh. 48:17, 18) Tuana kudisa guzumba guetu mukunda nu Yehowa nu Yesu. Tuana guahana mersi yavula mukunda nu ndaga atukalegele. Tuana kolesa ufuta wetu nu aphangi’etu a mala nu a akhetu. Tuajiya nji gukuatesa athu ako hagula ene nji ajiya guheta gubonga gua mulambu wa Yesu. Mukut’etu agasue tutshitenu ngolo ha gudilondega mukunda nu gudibungisa gua Guwunguluga Gufua gua Yesu gua givo egi. Handaga gudi lusugu luabalega ndando mu givo!