1. Why nao Memorial hem wanfala barava important day lo year? (Luke 22:​19, 20)

 FOR celebratem Memorial lo dae blo Christ, hem wanfala barava important day lo year for pipol blo Jehovah. Hem only event wea Jesus komandim olketa follower blo hem for duim. (Readim Luke 22:​19, 20.) Iumi garem staka reason for luk forward for Memorial. Bae iumi storyim samfala reason.

2. Wat nao samfala reason wea mekem iumi luk forward lo Memorial?

² Memorial hem helpem iumi for ting abaotem why ransom hem important. Hem remindim iumi for luksavve lo olketa samting wea iumi savve duim for showim iumi tinghae lo sakrifaes blo Jesus. (2 Cor. 5:​14, 15) And tu, hem taem wea evri brata and sista savve enjoyim wei for “strongim narawan.” (Rome 1:12) Evri year, staka wea inactive attendim Memorial. Samfala disaed for kam bak lo Jehovah bikos olketa brata and sista hapi for welkamim olketa. And staka wea interest tinghae lo wat olketa herem and lukim and olketa laek for studyim Bible. Evri samting hia mekem Memorial hem barava spesol samting lo iumi!

3. Hao nao Memorial hem mekem iumi wan mind witim olketa brata and sista evriwea lo world? (Lukim tu piksa.)

³ Iumi luk forward tu lo Memorial bikos iumi savve lo datfala day iumi wan mind witim olketa brata and sista blo iumi evriwea lo world. Olketa Jehovah’s Witness evriwea lo world hipap tugeta bihaen sun go daon. Iumi evriwan herem wanfala tok wea storyim why ransom hem important. Iumi singim tufala song for praisem Jehovah, pasim bred and wine, and sei “amen” lo fofala prea from heart blo iumi. Insaed 24 hour, evri kongregeson bae followim sem pattern. Imaginim hapi  wea Jehovah and Jesus kasem taem tufala lukim iumi wan mind witim evri brata and sista lo full world for honorim tufala.

4. Wat nao bae iumi discussim lo disfala article?

⁴ Lo disfala article, bae iumi discussim olketa kwestin hia: Hao nao iumi savve redyim heart blo iumi for Memorial? Hao nao iumi savve helpem olketa narawan for kasem gud samting from Memorial? And hao nao iumi savve helpem olketa wea inactive? For kasem ansa for olketa kwestin hia, bae helpem iumi for redi for disfala important day.

HAO NAO IUMI SAVVE REDYIM HEART BLO IUMI FOR MEMORIAL?

5. (a) Why nao iumi shud ting abaotem olketa gud samting wea iumi kasem from ransom? (Psalm 49:​7, 8) (b) Wat nao iumi lanem from disfala video Why Nao Jesus Hem Dae?

⁵ Wanfala barava important wei for iumi redi for Memorial, hem for ting abaotem olketa gud samting wea iumi kasem from ransom sakrifaes blo Jesus Christ. Tru samting nao, hem hard for iumi duim eniting for mekem iumi free from sin and dae. (Readim Psalm 49:​7, 8; lukim tu video Why Nao Jesus Hem Dae?) a So Jehovah and Jesus duim big samting for iumi, Jehovah arrange for Jesus givim laef blo hem for sevem iumi. (Rome 6:23) Taem iumi gohed meditate abaotem wat Jehovah and Jesus duim, bae iumi barava appreciatim ransom. Distaem bae iumi storyim samfala samting wea no isi wea Jehovah and Jesus willing for duim for provaedem ransom for iumi. Bat firstaem, bae iumi storyim wat nao ransom hem minim?

6. Wat nao ransom hem minim?

⁶ Ransom hem price wea samwan givim for peim bak samting. Firstfala man Adam, hem garem perfect laef taem God creatim hem. Taem Adam sin, hem lusim nao chance for laef olowe and evri pikinini blo hem tu. So for peim bak wat Adam lusim, Jesus mas sakrifaesim perfect laef blo hem. Taem Jesus stap lo earth, “no enitaem hem duim sin and no enitaem hem laea.” (1 Pet. 2:22) Taem Jesus dae, hem perfect olsem Adam bifor hem sin. So taem Jesus sakrifaesim laef blo hem, hem fit for peim price for perfect laef wea Adam lusim.—1 Cor. 15:45; 1 Tim. 2:6.

7. Taem Jesus lo earth, wat nao samfala test wea hem kasem?

⁷ Taem Jesus stap lo earth, hem gohed for obeyim Dadi blo hem lo heven nomata hem kasem staka test. Taem Jesus smol, hem gohed obeyim parents blo hem wea no perfect nomata hem perfect. (Luke 2:51) Taem hem teenager, hem need for againstim eni pressure wea maet mekem hem for no obey or for no faithful. Taem Jesus adult, hem mas againstim olketa temptation from Satan. And samfala temptation hem olketa direct attak from Satan for stopem hem for loyal lo God. (Matt. 4:​1-11) Satan laekem tumas for mekem Jesus sin mekem hem no fit for peim datfala ransom.

8. Wat nao olketa nara hard taem wea Jesus mas deal witim?

⁸ Taem Jesus duim ministry blo hem lo earth, hem feisim staka test. Olketa enemy persecutim hem and laek for killim hem dae. (Luke 4:​28, 29; 13:31) Hem mas deal tu witim wik point blo olketa aposol blo hem. (Mark 9:​33, 34) Taem olketa kotem hem, olketa killim hem nogud and tok spoelem hem. Then hem kasem bigfala pain and olketa killim hem dae olsem wanfala criminal. (Heb. 12:​1-3) Taem Jesus hange lo torture-stake, hem mas deal seleva witim bigfala pain wea kasem hem bikos  Jehovah no protectim hem nao from datwan. b—Matt. 27:46.

9. Hao nao iumi ting abaotem samting wea Jesus duim? (1 Peter 1:8)

⁹ Tru nao, Jesus barava safa bifor hem peim datfala ransom. Taem iumi ting abaotem staka samting wea Jesus willing for duim for iumi, hem mekem iumi for barava lovem hem.—Readim 1 Peter 1:8.

10. Wat nao Jehovah willing for duim mekem Jesus savve peim datfala ransom?

¹⁰ Wat nao Jehovah willing for duim mekem Jesus savve peim datfala ransom? Frenship wea Jehovah and Jesus garem barava klos olsem hao wanfala dadi savve fren witim son blo hem. (Prov. 8:30) Ting abaotem hao Jehovah feel taem hem lukim Jesus deal witim staka hard taem lo earth. Taem Jehovah lukim pipol treatim nogud Son blo hem, rejectim, and hem safa tumas, datwan mas mekem Jehovah kasem bigfala pain.

11. Storyim example wea showimaot hao Jehovah mas feel taem hem lukim Jesus safa and dae.

¹¹ Wanfala parents wea pikinini blo hem dae, hem barava minim gud bigfala sorre feeling wea samwan garem taem hem lusim pikinini blo hem. Hem tru, iumi garem strong faith lo resurrection, bat datwan no finisim sorre feeling wea iumi garem taem iumi lusim wanfala loved wan. Disfala example helpem iumi for minim hao Jehovah feel taem hem lukim Son blo hem wea hem lovem tumas hem safa and dae lo Nisan 14, 33 C.E. c—Matt. 3:17.

12. Wat nao iumi savve duim during lo olketa week bifor Memorial?

¹² Start distaem go kasem day blo Memorial, hao if iu garem wanfala personal study project or Famili Worship project wea focus lo ransom? Iusim Research Index for Olketa Jehovah’s Witness (if hem available lo languis blo iu) or olketa nara pablikeson for duim deep study abaotem disfala topic. d And tu, hem gud for followim Memorial Bible reading schedule wea stap lo Christian Laef and Ministry blo Iumi—Meeting Buk. And lo day blo Memorial, no forget for watchim datfala spesol Morning Worship program. Taem iumi redyim heart blo iumi for Memorial, iumi bae fit for helpem olketa wea interest for kasem gud samting from datwan tu.—Ezra 7:10.

 HELPEM OLKETA NARAWAN FOR KASEM GUD SAMTING

13. Wat nao first samting wea iumi savve duim for helpem olketa narawan kasem gud samting from Memorial?

¹³ Hao nao iumi savve helpem olketa narawan for kasem gud samting from Memorial? First samting, hem for invaetem olketa. Iumi savve invaetem olketa wea iumi meetim lo ministry. And tu, iumi savve mekem list lo olketa wea iumi laek invaetem, olsem olketa relative, workmate, skulmate, and olketa narawan wea iumi savve lo olketa. Nomata sapos iumi no garem inaf printed copy blo invitation, iumi savve sendem link for olketa. Maet iumi sapraes hao staka maet disaed for attend!—Eccl. 11:6.

14. Why nao hem important for givim invitation lo samwan? Storyim example.

¹⁴ Taem iu givim invitation for samwan, datwan maet mekem hem for laek kam lo Memorial. Wanday, wanfala sista sapraes taem hasband blo hem wea no Witness sei bae hem attendim Memorial witim hem. Why nao hem sapraes? Bikos staka taem hem bin talem lo hasband bat no enitaem hem attend. Wat nao mekem hasband for laek attend? Hem sei: “Mi kasem wanfala invitation.” Hasband blo hem storyim hao hem kasem invitation from wanfala elder wea hem savve lo hem. Datfala hasband attendim Memorial lo datfala year and staka year moa bihaen.

15. Taem iumi invaetem pipol for kam lo Memorial, wat nao iumi shud tingim?

¹⁵ Hem gud for iumi tingim hao samwan wea iumi invaetem maet garem olketa kwestin, especially if no enitaem olketa attendim eni meeting blo iumi. So iumi savve redi for ansarem eni kwestin wea olketa maet garem. (Col. 4:6) For example, samfala maet wonder: ‘Wat nao bae happen lo datfala program?’ ‘Bae hem gohed for hao long?’ ‘Wat kaen kaleko nao mi shud werem?’ ‘Hao, bae mi pei for attend?’ ‘Hao, bae olketa askem kolekson?’ Taem iumi invaetem samwan for Memorial, hem gud for iumi askem hem, “Iu garem eni kwestin?” and then ansarem eni  kwestin wea hem maet garem. Iumi savve iusim tufala video hia tu Rememberim Dae Bilong Jesus and Wanem Nao Mifala Duim Long Kingdom Hall? for helpem hem minim hao iumi duim olketa meeting blo iumi. And leson 28 blo Enjoyim Laef for Olowe! buk, garem olketa nara point wea iumi savve storyim witim hem.

16. Wat moa samfala kwestin wea olketa wea attendim Memorial maet garem?

¹⁶ Afta olketa attendim Memorial, maet olketa niu wan hia wea interest garem samfala kwestin moa. Maet olketa wonder why nao no eniwan kaikaim bred or drinkim wine, or why tu-thri pipol nomoa kaikaim bred and drinkim wine. Olketa maet laek savve tu hao many taem nao iumi celebratem Memorial. And sapos evri meeting blo iumi Olketa Jehovah’s Witness, iumi conductim lo sem wei. Nomata olketa point hia kamap finis lo Memorial tok, maet olketa niu wan hia needim moa explanation. Datfala article lo jw.org wea garem title “Why Nao Wei wea Olketa Jehovah’s Witness Duim Lord’s Supper Hem Difren From Olketa Nara Religion?” savve helpem iumi for ansarem samfala kwestin blo olketa. Iumi laek for duim best blo iumi for helpem olketa bifor, during, or afta lo Memorial. Taem iumi duim datwan, iumi helpem olketa wea “laekem laef olowe” for kasem gud samting from datfala program.—Acts 13:48.

HELPEM OLKETA WEA INACTIVE

17. Hao nao olketa elder savve helpem olketa wea inactive? (Ezekiel 34:​12, 16)

¹⁷ During lo taem blo Memorial, hao nao olketa elder savve helpem olketa wea inactive? Duim samting wea showimaot iu kea for olketa. (Readim Ezekiel 34:​12, 16.) Bifor Memorial, traem best for contactim staka lo olketa. Talem olketa dat iu kea for olketa and laek for helpem olketa. Invaetem olketa for attendim Memorial. Afta lo Memorial, gohed visitim or ringim olketa brata and sista hia, and provaedem spiritual help wea olketa needim mekem olketa kam bak lo Jehovah.—1 Pet. 2:25.

18. Hao nao iumi evriwan savve helpem olketa wea inactive? (Rome 12:10)

 ¹⁸ Iumi evriwan lo kongregeson savve helpem olketa inactive wan wea attendim Memorial. Hao nao iumi savve helpem olketa? Taem iumi showimaot love, kaen, and respectim olketa. (Readim Rome 12:10.) Tingim hao maet hem no isi for olketa hia for kam lo meeting. Maet olketa fraet nogud iumi talem or duim eni samting wea no kaen lo olketa. e So iumi shud no askem olketa kaen kwestin wea maet mekem olketa feel shame or feel nogud. (1 Thess. 5:11) Olketa brata and sista hia olketa part lo spiritual famili blo iumi. Iumi hapi for worshipim Jehovah tugeta moa witim olketa!—Ps. 119:176; Acts 20:35.

19. Wat nao olketa gud samting wea iumi kasem from iumi rememberim dae blo Jesus?

¹⁹ Iumi barava hapi hao Jesus talem iumi for rememberim dae blo hem each year, and iumi understandim why datwan important. Taem iumi attendim Memorial, iumiseleva and olketa narawan kasem staka gud samting. (Isa. 48:​17, 18) Iumi strongim go moa love blo iumi for Jehovah and Jesus. Iumi duim samting wea showimaot iumi appreciatim wat tufala duim for iumi. Iumi fren klos go moa witim olketa brata and sista. And iumi helpem olketa narawan for savve abaotem hao olketa tu savve enjoyim olketa blessing wea ransom mekem hem possible. So iumi evriwan laek duim best blo iumi distaem, for redi for Memorial dis year, wea hem wanfala barava important day lo year!