1. Pabia ku Memorial i dia mas importanti di anu? (Lukas 22:​19, 20)

 PA POVU di Jeova, Memorial di mortu di Kristu i dia mas importanti di anu. I uniku dia ku Jesus manda si sigiduris pa lembra del. (Lei Lukas 22:​19, 20.) No ta sta ku presa di mati Memorial, pabia di manga di motivus. No jubi alguns delis.

2. Kal ki alguns motivus ku pui no ta sta ku presa di mati Memorial?

² Memorial ta judanu pensa fundu na balur di resgati. I ta lembrantanu maneras ku no pudi mostra di kuma no da balur pa sakrifisiu di Jesus. (2 Kor 5:​14, 15) Tambi i ta da tudu ermons ku irmas oportunidadi di “fortifika n̈utru.” (Rom 1:12) Kada anu, manga di inativus ta mati Memorial. Alguns ta disidi riba pa Jeova pabia e risibidu diritu. Tambi manga di jintis ku sta interesadu ta misti kumsa studa Biblia pabia di ke ke oja i ku ke ke obi. Es tudu ta fasi pa Memorial sedu un dia spesial pa nos!

3. Kuma ku Memorial ta uni no ermons ku irmas na mundu ntidu? (Jubi tambi foto.)

³ Pensa tambi na kuma ku Memorial ta uni no ermons ku irmas na mundu ntidu. Konformi sol na kai na mundu ntidu, Tustumuñas di Jeova ta junta pa fasi Memorial. Anos tudu no ta obi un diskursu ku ta fala di importansia di resgati. No ta kanta dus kantikus pa ngaba Jeova, no ta pasa pon ku biñu, tambi no ta fala “amen” di tudu korson pa kuatru orasons. Serka di 24 ora, tudu kongregasons ta fasi mesmu kusa. Bu pudi imaẑina  kontentamentu di Jeova ku Jesus ora ke ojanu na mundu ntidu na ngaba elis des manera?

4. Ke ku no na bin fala del nes studu?

⁴ Nes studu, no na bin fala des purguntas: Kuma ku no pudi purpara no korson pa Memorial? Kuma ku no pudi juda utrus pa e benefisia del? Tambi kuma ku no pudi juda kilis ku sedu inativus? Respostas des purguntas na judanu sta pruntu pa es dia importanti dimas.

KUMA KU NO PUDI PURPARA NO KORSON PA MEMORIAL?

5. (a) Pabia ku no dibi di pensa na balur di resgati? (Salmu 49:​7, 8) (b) Ke ku bu aprindi di video Ke ku Manda Jesus Muri?

⁵ Un di maneras mas importanti di purpara no korson pa Memorial i pensa na balur di sakrifisiu di resgati di Jesus Kristu. No ka pudi fasi nada pa liberta no kabesa di pekadu ku mortu. (Lei Salmu 49:​7, 8; jubi tambi video Ke ku Manda Jesus Muri?) a Pa kila, Jeova fasi pa Jesus da si vida pa salbanu. Es i un kusa ku kusta elis ciu dimas. (Rom 6:23) Konformi no na pensa fundu na sakrifisiu ku Jeova ku Jesus fasi pa nos, no mas ta da balur pa resgati. No na jubi alguns kusas difisil ku Jeova ku Jesus staba dispostu pa fasi pa nos. Purmeru, no na fala di ke ku sta nkluidu na resgati?

6. Ke ku resgati signifika i pabia ku Jesus da resgati?

⁶ Resgati i un pres ku pagadu pa torna kumpra un kusa. Purmeru omi Adon seduba perfeitu kontra i kumpudu. Kontra i fasi pekadu i pirdi speransa di tene vida ku ka ta kaba, i ka so pa rel, ma tambi pa tudu si fijus. Pa torna kumpra ke ku Adon pirdi, Jesus da si propi vida perfeitu suma sakrifisiu. Na tudu si vida li na Tera, Jesus “ka fasi pekadu, nin na si boka nganu ka obidu.” (1 Ped 2:22) Oca Jesus muri, si vida perfeitu seduba suma vida ku Adon pirdi. — 1 Kor 15:45; 1 Tim 2:6.

7. Kal kusas ku testa Jesus ocal na Tera?

⁷ Ocalba na Tera, Jesus obdisi si Pape ku sta na seu na tudu, mesmu oca i seduba difisil fasil. Jesus seduba un mininu perfeitu, i si papes seduba imperfeitu, ma mesmu asin i obdisi elis. (Luk 2:51) Suma joven, i pirsisaba di luta kontra kualker preson ki pudiba tene di disobdisi o sedu infiel. Tambi ocal garandi, Jesus dibi di manti firmi kontra tentasons di Satanas Diabu, nkluindu ataki diretu ki fasi kontra el pa i disa di sedu fiel pa Deus. (Mat 4:​1-11) Satanas staba disididu pa pui Jesus peka, pa i ka pudi paga resgati.

8. Kal utrus testis ku Jesus nguenta?

⁸ Duranti si ministeriu na Tera, Jesus nguenta utrus testis. Si inimigus pirsigil i e tenta matal. (Luk 4:​28, 29; 13:31) I dibi di nguenta falias di si sigiduris. (Mar 9:​33, 34) Oca ku si vida staba na pirigu i kastigadu i gozadu. Dipus i sufri ciu, i matadu suma un kriminosu. (Eb 12:​1-3) Oca ki staba na staka di turtura i tenba ku nguenta sufrimentu garandi ku si propi forsa, sin proteson di Jeova. b — Mat 27:46.

9. Kuma ku sakrifisiu di Jesus ta fasiu sinti? (1 Pedru 1:8)

 ⁹ Na bardadi, Jesus sufri ciu pa pudi danu resgati. Sera ki no ka ta sinti amor garandi pa Jesus, ora ku no pensa na kuma ku di livri vontadi i sakrifika ciu pa nos? — Lei 1 Pedru 1:8.

10. Kal ki kustu di resgati pa Jeova?

¹⁰ Ke gora di Jeova? Ke ku Jeova staba dispostu pa sakrifika pa pudi paga resgati? Jeova ku Jesus teneba un amisadi forti ku n̈utru, suma di un pape ku si fiju. (Dit 8:30) Pensa so na kuma ku Jeova sinti oca i oja Jesus na nguenta manga di situasons difisil kontra i staba na Tera. Jeova dibi di sinti dur garandi di oja si Fiju na sufri, maltratadu i negadu.

11. Usa un isemplu pa mostra kuma ku Jeova dibi di sinti kontra Jesus matadu.

¹¹ Kualker pape o mame ku si fiju muri, sibi diritu kal ki dur garandi ku no ta sinti di pirdi un fiju. No tene fe forti na resureison, ma kila ka ta kaba ku dur ku no ta sinti ora un algin ku no ama muri. Es isemplu ta judanu ntindi kuma ku Jeova dibi di sinti ki dia ki oja si Fiju ki ama na sufri i muri na anu 33 EK. c — Mat 3:17.

12. Ke ku no pudi fasi na semanas antis di Memorial?

¹² Di li pa Memorial, pabia ku bu ka na fasi un programa di studu pesual o di adorason na familia ku na fala di resgati? Usa Gia di Piskisa pa Tustumuñas di Jeova o utrus publikason pa sibi mas aserka di resgati. d Tambi, tene sertesa di kuma bu sigi programa di leitura di Biblia pa Memorial ku ta sta na No Vida Kriston ku No Ministeriu — Manual pa Runion. Tambi na dia di Memorial, ka bu diskisi jubi programa spesial, ku sedu, programa spiritual di parmaña. Ora ku no purpara no propi korson pa Memorial, no ta konsigi juda utrus benefisia del tambi. — Esd 7:10.

JUDA UTRUS BENEFISIA DI MEMORIAL

13. Kal ki purmeru kusa ku no pudi fasi pa juda utrus benefisia di Memorial?

¹³ Kuma ku no pudi juda utrus pa e benefisia di Memorial? Purmeru kusa  ku no pudi fasi i kumbida elis. Alen di kontakta jintis ku no ta oja na pregason, no pudi fasi un lista di jintis ku no kunsi i kumbida elis. Esis pudi nklui no familias, no kolegas di tarbaju, no kolegas di skola ku utrus. Mesmu si no ka tene manga di konvitis mprimidu, no pudi manda link di konviti eletroniku. Kin ku sibi kantu jintis ku na bin! — Ekl 11:6.

14. Da isemplu di kuma ku da un algin ku bu kunsi konviti, pudi tene un bon rusultadu.

¹⁴ Ka bu njuti nunka rusultadu di da un algin ku bu kunsi konviti. Un dia, un irma ku si omi ka sedu Tustumuña di Jeova, fika surprendidu oca ku si omi falal di kuma i na bai ku el pa Memorial. Pabia ki i fika surprendidu? Pabia manga di anus atras, i ta kumbidal pa mati Memorial, ma nunka i bai. Ma ke ku pui i muda es bias? I fala sin: “N risibi un konviti.” I splikal di kuma un ansion ki i kunsi kumbidal. Omi mati Memorial ki anu, i manga di anus dipus.

15. Ke ku no pirsisa di lembra del ora ku no na kumbida jintis pa Memorial?

¹⁵ Lembra di kuma kilis ku no kumbida pudi tene purguntas, prinsipalmenti si nunka e ciga di mati no runions. I na sedu bon pensa antis na purguntas ke pudi fasi i purpara pa ruspundi elis. (Kol 4:6) Pur isemplu, alguns pudi punta: ‘Ke ku na kontisi na ki dia?’ ‘Kantu tempu ku programa ta dura?’ ‘Sera ki i ten regras di kuma ku N dibi di bisti?’ ‘Sera ki N dibi di paga pa yentra?’ ‘Sera ki N na pididu pa da ofertas?’ Ora ku no kumbida un algin pa Memorial, no pudi so puntal: “Sera ki bu tene purgunta?”, dipus ruspundi kualker purgunta ki fasi. No pudi tambi usa videos Lembra di mortu di Jesus ku Ke ku Ta Akontisi Na Salon di Renu? pa judal ntindi kuma ku no runions ta fasidu. Lison 28 di livru Bu Pudi Tene un  Vida Filis pa Sempri! tene manga di bon ideias ku no pudi usa.

16. Kal utrus purguntas ku kilis ku mati Memorial pudi fasi?

¹⁶ Kilis ku sta interesadu pudi fasi utrus purguntas, dipus di mati Memorial. Talves e pudi punta pabia ku alguns kume pon i bibi biñu, o pabia ku ningin ka fasil. E pudi tambi punta kantu bias ku no ta fasi Memorial. Tambi e pudi misti sibi si tudu runions di Tustumuñas di Jeova ta fasidu di mesmu manera. Nin si manga des purguntas faladu del na diskursu di Memorial, nobus pudi pirsisa di mas splikason. Artigu na jw.org ku tene tema “A Ceia do Senhor – porque é que as Testemunhas de Jeová a celebram de modo diferente?” pudi judanu ruspundi alguns purguntas ke fasi. No misti fasi tudu ku no pudi antis, duranti i dipus di Memorial pa juda ‘kilis ku na bardadi sta dispostu’ pa benefisia di Memorial. — At 13:​48, Tradução do Novo Mundo.

JUDA INATIVUS

17. Kuma ku ansions pudi juda kilis ku sedu inativus? (Ezekiel 34:​12, 16)

¹⁷ Na tempu di Memorial, kuma ku ansions pudi juda kilis ku sedu inativus? Bo mostra di kuma bo ta preokupa ku elis. (Lei Ezekiel 34:​12, 16.) Antis di Memorial, kontakta maioria di inativus. Konta elis di kuma bo ta preokupa ku elis i bo misti juda elis. Bo kumbida elis pa Memorial. Si e bin mati Memorial, bo risibi elis diritu. Dipus di Memorial, bo kontinua manti kontaktu ku es kiridus ermons ku irmas, i da elis ajuda spiritual ke pirsisa del pa e riba pa Jeova. — 1 Ped 2:25.

18. Kuma ku anos tudu no pudi juda inativus? (Romanus 12:10)

¹⁸ Tudu jintis na kongregason pudi juda inativus ku mati Memorial. Di kal manera? Ora ku no trata elis ku amor,  bondadi i ku rispitu. (Lei Romanus 12:10.) Lembra di kuma i pudi sedu difisil pa es kiridus ermons ku irmas mati runions. Talves e pudi medi di kuma e ka na risibidu diritu. e Pa kila, ivita fasi purguntas ku na pui elis burguñu o fala un kusa ku na pui elis fika mal. (1 Tes 5:11) Es ermons ku irmas i no ermons na fe. No kontenti di sta mas juntu ku elis pa adora Jeova! — Sal 119:176; At 20:35.

19. Kal benefisiu ku no ta tene di lembra di mortu di Jesus?

¹⁹ No fika kontenti pa manera ku Jesus falanu pa no lembra di si mortu kada anu, i no ntindi pabia ku es i importanti dimas. Ora ku no mati Memorial, no ta benefisia no kabesa i juda utrus di manga di maneras. (Isa 48:​17, 18) No ta aumenta no amor pa Jeova ku Jesus. No ta mostra di kuma no da balur pa ke ke fasi pa nos. No ta pertusi mas di no ermons ku irmas. Tambi no pudi juda utrus sibi kuma ke pudi tene bensons ku resgati na tisi. Pa kila, no fasi tudu ku no pudi pa sta pruntu pa Memorial des anu, ku sedu dia mas importanti di anu!