1. ¿Jasche ri Unaʼtabʼalil ri ukamikal ri Jesús are ri riqbʼal ibʼ che más nim ubʼanik che kbʼan cho ronojel ri uwach Ulew? (Lucas 22:19, 20).

 SIBʼALAJ nim ubʼanik chkiwach ri upatanelabʼ ri Jehová ri Unaʼtabʼalil ri ukamikal ri Jesús. Are waʼ ri xubʼij ri Jesús che knatajisaxik (chasikʼij Lucas 22:19, 20). ¡Qas kqaj che kopan wajun qʼij riʼ! ¿Jasche? Chqilampeʼ jasche.

2. ¿Jasche kqaj che kopan ri qʼij re ri Unaʼtabʼalil ri ukamikal ri Jesús?

² Ri Unaʼtabʼalil ri ukamikal ri Jesús kojutoʼo rech kojchoman chrij che ri tojbʼal mak nim ubʼanik. Kunaʼtajisaj chqe ri kojkunik kqabʼano rech kqamaltyoxij che ri Jesús xuya ri ukʼaslemal rumal qech (2 Cor. 5:14, 15). Xuqujeʼ kojutoʼo rech kojkʼojiʼ kukʼ ri qachalal y kqaya qachuqʼabʼ chbʼil taq qibʼ (Rom. 1:12). Ronojel taq junabʼ kʼi chke ri qachalal che kiyaʼom kan upatanixik ri Jehová keʼopan pa ri Unaʼtabʼalil ri ukamikal ri Jesús y rumal che kqakʼut loqʼoqʼebʼal chke jujun kkimajij chi upatanixik ri Jehová. Y jujun taq winaq sibʼalaj kkimay ri kkilo y kkito rumal laʼ kkaj kkimajij jun etaʼmanik chrij ri Biblia. Qastzij che wariʼ kubʼano che ri Unaʼtabʼalil ri ukamikal ri Jesús nim ubʼanik chqawach.

3. ¿Jas kubʼan ri Unaʼtabʼalil ri ukamikal ri Jesús che qatoʼik rech kqil ri junamil che kʼo pa ri utinamit ri Jehová? (Xuqujeʼ chawilaʼ ri wachbʼal).

³ Kqaj che kopan wajun qʼij riʼ rumal che chilaʼ kilitaj wi ri junamil che kʼo chuxoʼl ri utinamit ri Dios. Cho ronojel ri uwach Ulew ri testigos rech Jehová kkimulij kibʼ are chiʼ kqaj bʼi ri qʼij. Qonojel kqata ri chʼabʼal che nim ubʼanik  che kyaʼik, kqabʼixoj kebʼ bʼixonem, kqʼaxex ri kaxlanwa y ri vino, y rukʼ ronojel qanimaʼ kqabʼij «amén» pa ri kajibʼ chʼawem che kbʼanik. Xa pa 24 horas konojel ri congregaciones kkinataj ri ukamikal ri Jesús. ¿La kojchoman chrij ri kikotemal che kkinaʼ ri Jehová y ri Jesús are chiʼ kojkilo che cho ronojel ri uwach Ulew kqabʼan wariʼ?

4. ¿Jas kqil na pa wajun kʼutunem riʼ?

⁴ Pa wajun kʼutunem riʼ kqatzalij na uwach ri preguntas riʼ: ¿jas kqabʼano rech kqeyej are chiʼ kopan ri unaʼtabʼalil ri ukamikal ri Jesús?, ¿jas kqabʼan che kitoʼik nikʼaj chik rech kkiriq utzilal? y ¿jas kqabʼan che kitoʼik ri kiyaʼom kan upatanixik ri Jehová? Unikʼoxik wariʼ kojutoʼo rech utz kqabʼan che reyexik wajun qʼij riʼ.

¿JAS KQABʼANO RECH KQEYEJ ARE CHIʼ KOPAN RI UNAʼTABʼALIL RI UKAMIKAL RI JESÚS?

5. a) ¿Jasche rajawaxik kojchoman chrij ri tojbʼal mak? (Salmo 49:7, 8). b) Chabʼij jas xawetaʼmaj pa ri video ¿Jasche xkam ri Jesús?

⁵ Jun jastaq che kojkunik kqabʼano rech kqeyej che kopan ri Unaʼtabʼalil ri ukamikal ri Jesús are che kojchoman chrij che ri ukamikal ri Jesús sibʼalaj nim ubʼanik. Kojkun taj xaq qatukel kojel chuxeʼ ri kamikal y ri makaj (chasikʼij Salmo 49:7, 8; xuqujeʼ chawilaʼ ri video ¿Jasche xkam ri Jesús?). a Rumal laʼ ri Jehová xuya ri ukʼaslemal ri Jesús rumal qech, ri e kebʼ nim xkitojbʼej wi (Rom. 6:23). Are chiʼ más kojchoman chrij ri xkibʼan ri Jehová y ri Jesús pa qawiʼ, más nim kqil wi ri tojbʼal mak. Chanim riʼ kqil na jujun chke ri e jastaq che xkibʼan ri Jehová y ri Jesús pa qawiʼ. Are kʼu nabʼe kojchʼaw na chrij ri ubʼanik ri tojbʼal mak.

6. ¿Jas xbʼan che uyaʼik ri tojbʼal mak?

⁶ Jun tojbʼal are ri kkojik rech ktzalix jun jastaq o ktzoqopix jun winaq. Ri nabʼe achi Adán, tzʼaqat are chiʼ xbʼanik. Are kʼu, are chiʼ xmakunik wariʼ xubʼano che xkamik y xuqʼaxej kan ri kamikal chke ri ralkʼwal. Rech kriqitaj chi jumul ri xsachik, ri Jesús rajawaxik xuya ri tzʼaqatalaj ukʼaslemal. Are chiʼ ri Jesús xkʼojiʼ cho ri uwach Ulew, «man kʼo ta mak xubʼano, mawi ne xriq taj subʼunik pa uchiʼ» (1 Ped. 2:22). Tzʼaqat ri ukʼaslemal are chiʼ xkamik, rumal laʼ kjunamataj rukʼ ri kʼaslemal che xutzaq ri Adán (1 Cor. 15:45; 1 Tim. 2:6).

7. Chabʼij jujun chke ri kʼax che xuriq ri Jesús.

⁷ Are chiʼ ri Jesús kʼa nitzʼ na y paneʼ kʼo jun tzʼaqat ukʼaslemal xniman chke ri utat unan che ajmakibʼ. Y xunimaj ronojel ri xubʼij ri Jehová che paneʼ xuriq kʼax (Luc. 2:51). Y are chiʼ ala chik weneʼ xtaqchiʼx kumal nikʼaj chik rech kniman ta chke ri utat unan y kniman ta che ri Jehová. Y are chiʼ nim chik ri Satanás xutaqchiʼj rech kuya kan upatanixik ri Jehová y rech kukʼut ta chi ri usukʼilal che (Mat. 4:1-11). Ri Satanás xraj che ri Jesús xmakunik rech kuya ta ri ukʼaslemal che tojbʼal mak.

8. ¿Jas nikʼaj chi kʼax xuriq ri Jesús?

⁸ Ri Jesús xuriq chi nikʼaj kʼax are chiʼ xupatanij ri Jehová. Jun kʼutbʼal, xtereneʼx kumal ri ukʼulel y xkibʼij che che kkikamisaj (Luc. 4:28, 29; 13:31). Xuchʼij ronojel ri xesach wi ri utijoxelabʼ (Mar. 9:33, 34). Are chiʼ xqʼat tzij puwiʼ che kkamisaxik, xbʼan kʼax che y xtzeʼx uwach. Tekʼuriʼ xkikamisaj junam rukʼ jun elaqʼom y sibʼalaj xuriq kʼax (Heb. 12:1-3). Y are chiʼ xa jubʼiqʼ chi kraj kkamik, xtoʼ ta chi rumal ri  Jehová y rumal laʼ utukel rajawaxik xuchʼij ri kʼax che xbʼan che (Mat. 27:46). b

9. ¿Jas kqanaʼo are chiʼ kojchoman chrij ri xubʼan ri Jesús pa qawiʼ? (1 Pedro 1:8).

⁹ We kqilo ri Jesús nim xutojbʼej wi rech xojresaj chuxeʼ ri makaj y ri kamikal. Are chiʼ kojchoman chrij ronojel ri kʼax che xuriq ri Jesús rumal qech, wariʼ kubʼano che kqaloqʼoqʼej rukʼ ronojel qanimaʼ (chasikʼij 1 Pedro 1:8).

10. ¿Jas xubʼan ri Jehová rech xojresaj chuxeʼ ri makaj y ri kamikal?

¹⁰ ¿Jas rajawaxik xubʼan na ri Jehová rech xojresaj chuxeʼ ri makaj y ri kamikal? Qas qetaʼm che ri Jehová y ri Jesús kʼo jun utzalaj achilanik chkixoʼl (Prov. 8:30). Rumal laʼ chojchoman chrij ri kʼax che xunaʼ ri Jehová are chiʼ xrilo che ri uKʼojol sibʼalaj xbʼan kʼax che cho ri uwach Ulew. Qastzij riʼ che sibʼalaj xbʼisonik are chiʼ xrilo che xbʼan kʼax che ri uKʼojol y che xxutuxik.

11. ¿Jas kʼutbʼal kojtoʼwik rech kqachʼobʼ ri xunaʼ ri Jehová are chiʼ xkamisax ri Jesús?

¹¹ Ri kaminaq jun kalkʼwal qas kinaʼom riʼ ri bʼis che kkinaʼ jujun tat nan are chiʼ kkam jun kalkʼwal. Paneʼ qetaʼm che kekʼastaj na ri kaminaqibʼ, are kʼu wariʼ kubʼan taj che mat kojbʼisonik are chiʼ kkam jun qafamiliar che sibʼalaj kqaloqʼoqʼej. Wariʼ kukʼut chqawach che ri Jehová sibʼalaj xbʼisonik are chiʼ xkam ri uKʼojol pa ri junabʼ 33 (Mat. 3:17). c

12. ¿Jas kqabʼano rech utz kqabʼan che ukojik ri tiempo are chiʼ majaʼ kopan ri unaʼtabʼalil ri ukamikal ri Jesús?

¹² Utz riʼ we kakoj atiempo rech kabʼan investigar más pa ri awestudio personal o pa ri qʼijilanik re ri familia chrij ri tojbʼal mak are chiʼ majaʼ kopan ri qʼij re ri Unaʼtabʼalil ri ukamikal ri Jesús. Chakojoʼ ri Tobʼanik chike ri testigos rech Jehová rech kketaʼmaj más o nikʼaj chi wuj che kchʼaw más chrij ri Unaʼtabʼalil ri ukamikal ri Jesús. d Xuqujeʼ chasikʼij ri textos che ksikʼix pa ri Unaʼtabʼalil ri ukamikal ri Jesús che kʼo pa ri wuj Qachak xuqujeʼ Qakʼaslemal ri oj Cristianos. Y masach pa ajalom rilik ri adoración matutina che nim ubʼanik re ri Unaʼtabʼalil ri ukamikal ri Jesús. We kqatijoj apan qibʼ y kojchoman chrij, kojkun riʼ keqatoʼ ri nikʼaj chik (Esd. 7:10).

 CHEQATOʼO RI NIKʼAJ CHIK RECH KKIRIQ UTZILAL RUKʼ RI UNAʼTABʼALIL RI UKAMIKAL RI JESÚS

13. ¿Jas nabʼe rajawaxik kqabʼano rech keqatoʼ ri nikʼaj chik che uriqik ri utzilal che kuyaʼ ri Unaʼtabʼalil ri ukamikal ri Jesús?

¹³ ¿Jas kqabʼan che kitoʼik ri nikʼaj chik rech kkiriq utzilal rumal ri Unaʼtabʼalil ri ukamikal ri Jesús? Nabʼe, rajawaxik keqabʼan invitar. Xaq xiw ta kqajach ri sikʼinik chke ri winaq, xaneʼ utz we kqatzʼibʼaj ri kibʼiʼ jachin taq ri kqaj keqabʼan invitar, weneʼ qafamiliares, qachiʼl pa ri chak, pa ri escuela o winaq che kqachʼobʼ kiwach. We kʼo ta chi ri wuj re sikʼinik qukʼ, kojkunik kqataq bʼi jun enlace chke. Qetaʼm taj jachin taq ri kkaj keʼopanik (Ecl. 11:6).

14. ¿Jas kʼutbʼal kkʼutuwik che ri winaq kkiriq utzilal are chiʼ kqaya ri sikʼinik chke?

¹⁴ Kqachomaj taj che kʼo ta jun kopanik are chiʼ kqaya jun sikʼinik. Jun qachalal ixoq sibʼalaj xumayo are chiʼ ri rachajil xubʼij che che kbʼe rukʼ pa ri Unaʼtabʼalil ri ukamikal ri Jesús. ¿Jasche? Rumal che kʼi mul ubʼim che che kbʼe rukʼ are kʼu ri areʼ kraj taj. ¿Jas kʼu che xraj xbʼek? Ri rachajil xubʼij che che are jun kʼamal bʼe xyaʼow ri sikʼinik che. Ri rachajil ri qachalal xbʼe pa wajun Unaʼtabʼalil ri ukamikal ri Jesús y pa nikʼaj chik.

15. ¿Jas rajawaxik kojchoman chrij are chiʼ kqasikʼij jun winaq pa ri Unaʼtabʼalil ri ukamikal ri Jesús?

¹⁵ Chnaʼtaj chqe che are chiʼ kqabʼan invitar jun winaq pa ri Unaʼtabʼalil ri ukamikal ri Jesús weneʼ kubʼan jujun preguntas chqe, más na we kʼo ta nijun mul bʼenaq. Rumal laʼ utz che kojchoman apan chrij ri preguntas che weneʼ kubʼan chqe y chojchoman chrij ri kqabʼan che utzalixik uwach (Col. 4:6). Jun kʼutbʼal, weneʼ kutaʼ chqe: «¿Jas kbʼan chilaʼ? ¿Jampaʼ horas kuchʼijo? ¿Jas atzʼyaq kkoj bʼik? ¿La ktoj ri okibʼal? ¿La ktaʼ pwaq?». Rumal laʼ utz che kqataʼ che ri winaq che xqabʼan invitar we kʼo upreguntas. Xuqujeʼ kojkunik kqakʼut ri videos chuwach Chqanaʼtaj ri ukamikal ri Jesús y ¿Jas kbʼan pa jun Ja rech Ajawbʼal? Xuqujeʼ pa ri kʼutunem 28 re ri wuj Kʼaslemal  kʼo ta ukʼisik kʼo jujun taq tobʼanik che kojkunik kqakʼut chuwach ri winaq.

16. ¿Jas nikʼaj chi preguntas weneʼ kchoman ri winaq chrij are chiʼ kopan pa ri Unaʼtabʼalil ri ukamikal ri Jesús?

¹⁶ Weneʼ ri winaq kubʼan chi más preguntas are chiʼ xbʼe pa ri Unaʼtabʼalil ri ukamikal ri Jesús. Weneʼ kraj kretaʼmaj jasche nijun xutij ri vino y ri kaxlanwa, jampaʼ mul kbʼan ri Unaʼtabʼalil ri ukamikal ri Jesús y we amaqʼel kbʼan pa taq ri e riqbʼal ibʼ. Paneʼ pa ri chʼabʼal che nim ubʼanik re ri Unaʼtabʼalil ri ukamikal ri Jesús kqʼalajisax jubʼiqʼ chrij wariʼ, are kʼu weneʼ ri winaq kraj kretaʼmaj más. Rech kqatzalij uwach jujun preguntas che kubʼan chqe kojkunik kqakoj ri kʼutunem re jw.org «¿Jasche ri testigos rech Jehová jun wi ri kkibʼan che unaʼtasaxik ri ukamikal ri Jesús?». Kqaj kqakoj qachuqʼabʼ che kitoʼik ri winaq che kʼo jun utz kanimaʼ rech kkiriq utzil rumal, are chiʼ majaʼ kopan ri qʼij re ri Unaʼtabʼalil ri ukamikal ri Jesús, are chiʼ tajin kbʼanik y are chiʼ qʼaxinaq chik (Hech. 13:48).

CHEQATOʼO RI KIYAʼOM KAN UPATANIXIK RI JEHOVÁ

17. ¿Jas kkibʼan ri kʼamal taq bʼe che kitoʼik ri kiyaʼom kan upatanixik ri Jehová? (Ezequiel 34:12, 16).

¹⁷ ¿Jas kkibʼan ri kʼamal taq bʼe rech kekitoʼ ri kiyaʼom kan upatanixik ri Jehová are chiʼ kopan ri unaʼtabʼalil ri ukamikal ri Jesús? Kkikʼut chkiwach che kel kikʼuʼx chke y che kekaj (chasikʼij Ezequiel 34:12, 16). Kʼamal taq bʼe, chiwilaʼ jachin taq ri kiyaʼom kan upatanixik ri Jehová, cheʼitzukuj y cheʼichʼabʼej. Chibʼij chke che kixok il chke y che kiwaj keʼitoʼo. Chibʼij chke che keʼopan pa ri Unaʼtabʼalil ri ukamikal ri Jesús y are chiʼ keʼopanik cheʼikʼulaj rukʼ utzilal. Y are chiʼ qʼaxinaq chi ri Unaʼtabʼalil ri ukamikal ri Jesús kiya ta kan kitoʼik ri qachalal riʼ rech kkipatanij chi jumul ri Jehová (1 Ped. 2:25).

18. ¿Jas kojkunik kqabʼan qonojel rech keqatoʼ ri kiyaʼom kan upatanixik ri Jehová? (Romanos 12:10).

¹⁸ Qonojel kojkunik keqatoʼ ri kiyaʼom kan upatanixik ri Jehová y che keʼopan pa  ri Unaʼtabʼalil ri ukamikal ri Jesús. ¿Jas kqabʼan che kitoʼik? Are chiʼ kqakʼut chkiwach che nim keqil wi y keqaloqʼoqʼej (chasikʼij Romanos 12:10). Chnaʼtaj chqe che ri loqʼalaj taq qachalal riʼ xkikoj kichuqʼabʼ rech xetzalij chi jumul pa ri riqbʼal ibʼ. Weneʼ xechoman chrij ri kbʼan che kikʼulaxik kumal ri qachalal. e Rumal laʼ keqataqchiʼj taj rech kkibʼij jastaq chqe y kqabʼij ta jastaq chke che utz ta kkito o kubʼan kʼax chke (1 Tes. 5:11). Ri e areʼ e qachalal y sibʼalaj kojkikotik are chiʼ ketzalij loq rech junam kqaqʼijilaj ri Jehová (Sal. 119:176; Hech. 20:35).

19. ¿Jas utzilal kqariqo are chiʼ kqanaʼtajisaj ri ukamikal ri Jesús?

¹⁹ Rukʼ ronojel ri qetaʼmam chik kqachʼobʼo jasche ri Jesús xubʼij kanoq che rajawaxik kqanaʼtajisaj ri ukamikal ronojel taq junabʼ. Are chiʼ kqabʼano kuya utzilal chqe xuqujeʼ chke ri winaq (Is. 48:17, 18). Kojutoʼo rech más kqaloqʼoqʼej ri Jehová y ri Jesús. Xuqujeʼ kojutoʼ che ukʼutik che kqamaltyoxij ronojel ri kibʼanom ri Jehová y ri Jesús pa qawiʼ. Kubʼano che más keqaloqʼoqʼej ri qachalal y keqatoʼ ri winaq rech kketaʼmaj ri rajawaxik kkibʼano rech kkiriq ri tewchibʼal che kuya ri ukamikal ri Jesús. Rumal laʼ chqakojoʼ qachuqʼabʼ rech kojkʼojiʼ pa wajun riqbʼal ibʼ riʼ che nim ubʼanik.