1. ¿Imaraykun nisunman “Jesuspa wañupusqanta yuyarina p’unchayqa juj p’unchaykunamantapas aswan jatun p’unchaymi” nispa? (Lucas 22:​19, 20).

 JEHOVÁ Diospa testigonkunapaqqa Jesuspa wañupusqanta watapi juj kutita yuyariymi imamantapas aswan allin. Chay p’unchayqa manan ima p’unchaywanpas igualakunmanchu, chay sumaq p’unchayta yuyarinapaqmi Jesusqa kamachikurqan (leey Lucas 22:​19, 20). ¿Imakunan razón kanman chay jatun p’unchayta tukuy sonqowan suyakunapaq? Chaymantan kaypi yachasunchis.

2. ¿Imaraykun Jesuspa wañupusqanta yuyarina p’unchayta ancha kusisqa suyakushanchis?

² Chay jatun p’unchayta yuyariyqa allintan yanapawasun Jesuspa wañusqanpi yuyaymanananchispaq. Chay p’unchaykunan imaymanata ruwaspa rikuchinanchis kanqa Jesuspa wañupusqanmanta agradecido kasqanchista (2 Cor. 5:​14, 15). Chaymantapas chay p’unchaymi yanapawallanchistaq hermanonchiskunawan hermananchiskunawan sumaqta kallpacharinakunanchispaq (Rom. 1:12). Iñiyninkupi chiriyapuq hermanokunapas sapa watanmi jamunku chay p’unchayta yuyarinankupaq; paykunamanta wakinqa sumaqta chaskisqanchista rikuspa, munakusqanchista yachaspa iman Diospa llaqtanman kutimpunku. Juj runakunapas sumaqta chaskisqanchista rikuspa, chaypi yachachisqankuta uyarispa iman anchata admirakunku, jinaspa Biblia estudiayta qallarinku. Chayraykun chay p’unchayqa ancha jatun p’unchay noqanchispaqqa.

3. ¿Imaynatan Jesuspa wañupusqanta yuyarina p’unchaypi reparanchis Jehová Diospa llaqtan juj nisqalla kasqanta? (Qhaway kay parrafopaq fotokunata).

³ Maytachá munashanchis chay p’unchay chayamunantaqa. Chay p’unchaypin rikusunchis imaynas Diospa llaqtanpiqa juj nisqalla kanchis chayta. Entero pachantinpin Jehová Diospa testigonkunaqa  inti jaykuykuqtin jina Jesuspa wañupusqanta yuyarinanchispaq juñukusunchis. Chay juñunakuypiqa Jesuspa wañupusqanmantan juj sumaq yachachikuyta yachachikamun, chaymantapas juñunakuy qallarishaqtin tukukushaqtin iman juj takita takikun, t’antatapas vinotapas pasachinkun, tawa kutitan mañakuytapas ruwakun, chay qhepamanmi “amén” nispa nikun. Chhaynatan chay p’unchayqa entero pachantinpi llapa iñiq t’aqakunapi ruwakun. Pachantinpi chhaynata yupaychasqanchista rikuspaqa may kusisqachá Jehová Diospas Jesuspas kanku.

4. ¿Imakunamantan kaypi yachasunchis?

⁴ ¿Imaynatan sonqonchista preparasunman Jesuspa wañupusqan p’unchayta yuyarinapaq? ¿Imaynatan jujkunata yanapasunman chay p’unchayta noqanchiswan kuska yuyarinankupaq? ¿Imaynatan iñiyninkupi chiriyapuq hermanokunatapas yanapasunman? Chay tapuykunamantan kaypi yachasunchis. Chaykunamanta yachaymi yanapawasun chay jatun p’unchaypaq allin preparasqa kananchispaq.

¿IMAYNATAN SONQONCHISTA PREPARASUNMAN JESUSPA WAÑUPUSQAN P’UNCHAYTA YUYARINAPAQ?

5. a) ¿Imaraykun allinta yuyaymanananchis imatachus Jesús noqanchisrayku ruwarqan chaypi? (Salmos 49:​7, 8). b) ¿Imatan yacharqanki ¿Imaraykun wañuran Jesús? nisqa videomanta?

⁵ Chay jatun p’unchaypaq sonqonchista preparanapaqqa, imatachus Jesús noqanchisrayku ruwarqan chaypin allinta yuyaymanananchis. Noqallanchismantaqa manan jayk’aqpas atisunmanchu karqan juchamanta wañuymantapas librakuytaqa (leey Salmos 49:​7, 8; qhawallaytaq ¿Imaraykun wañuran Jesús? nisqa videotapas). a Manataq noqallanchismantaqa librakuyta atisunmanchu chayqa, Jehová Diosmi ancha munakusqan wawanta kachamurqan noqanchisrayku wañunanpaq, chhaynapin iskayninku juj jatun preciota pagarqanku (Rom. 6:23). Chaykuna ruwasqankupichus allinta yuyaymanasun chayqa, astawanmi Jesuspa wañupusqanta valorasun. Kunanqa qhawarisunchis imakunatas Jehová Diospas Jesuspas ruwarqanku noqanchisrayku chayta. Ñaupaqtaqa qhawarisunchis imakunatas ruwananku karqan librawananchispaq chayta.

6. ¿Imatan Jesús ruwarqan librasqa kananchispaq?

⁶ Adanqa mana ima juchayoqmi kamasqa karqan. Chhaynalla kanman karqan chayqa, wiñaypaqmi kausanman karqan. Ichaqa juchallikusqanraykun chinkachirqan chay wiñay kausayta, wawankunapas manañan atirqankuchu chay kausay chaskiytaqa. Adanpa imachus chinkachisqanta rantinanpaqmi Jesusqa ch’uya kausayninta sacrificiopi jaywarqan, arí jatun preciotan pagarqan. Kay pachapi kausashaspaqa Jesusqa “manan jayk’aqpas juchallikurqanchu, manataqmi siminpipas engañoqa karqanchu” (1 Ped. 2:22). Jesusqa wañupunan p’unchaykaman mana imapipas juchallikurqanchu, chhaynapin paypa kausayninqa qallariypi Adanpa kausayninwan kaqlla karqan (1 Cor. 15:45; 1 Tim. 2:6).

7. ¿Ima pruebakunapin Jesús tarikurqan kay pachapi kashaspa?

⁷ Kay pachapi kashaspaqa imaymana sasachakuypiña tarikurqan chaypas, lliupin Jesusqa Taytanta kasukurqan. Jesusqa ch’uya runan karqan, chaywanpas wawa kashaspaqa juchasapa tayta-mamantan kasukunan karqan (Luc. 2:51). Waynaña kashaqtinqa, yaqapaschá waynamasinkuna pantachiyta munarqanku, tayta-mamantapas Jehová Diostapas mana kasukunanpaqpaschá mat’ipayarqanku. Kuraqña kashaqtinpas, imaymana formapin Satanasqa payta pantachiyta munarqan (Mat. 4:​1-11). Satanasqa munasharqanpunin Jesús juchallikunanta, chhaynapi runakunata ama librananpaq.

8. ¿Ima pruebakunatawanmi Jesús aguantarqan?

⁸ Jesús kay pachapi kashaspaqa, imaymana pruebakunapiwanmi tarikurqan. Payta cheqnikuq runakunan qatikacharqanku, wañuchiyta iman munarqanku (Luc. 4:​28, 29; 13:31). Qatikuqninkunaq  mana allinkuna ruwasqankutapas aguantananmi karqan (Mar. 9:​33, 34). Wañunanpaq sentenciaqtinkupas imaymanata ruwaspan ñak’arichirqanku, asipayarqanku ima. Chaymantapas suwata jinan wañuchirqanku, nishutapunin paytaqa ñak’arichirqanku (Heb. 12:​1-3). Wañunan patapi kashaqtinpas, sapallantan Jehová Diosqa saqerparirqan, chhaynaqa Jesusqa sapallanñan imatapas aguantanan karqan (Mat. 27:46). b

9. ¿Imaynan sonqonchis kan Jesuspa sacrificio ruwasqanpi piensaqtinchis? (1 Pedro 1:8).

⁹ Yachamusqanchisman jina, Jesusqa jatun preciotan pagarqan librawananchispaq. Jesuspa llapa chaykuna ruwasqanpi piensaqtinchisqa, ¿manachu sonqonchis tanqawanchis astawanraq payta munakunanchispaq? (Leey 1 Pedro 1:8).

10. ¿Imakunatan Jehová Dios aguantarqan librasqa kananchispaq?

¹⁰ ¿Imaynan Jehová Dios tarikunman karqan Jesuspa ñak’arisqanta rikuspa? Yachasqanchis jina, Jehová Diosqa allintan munaytan apanakun wawan Jesuswanqa (Prov. 8:30). Chhaynaqa, maytachá paypa sonqonqa nanarqan Jesusta imaymanapi ñak’ariqta rikuspaqa. Jesustaqa maqaqku, sarunchaqku, pisichaqku, thoqaykuqku iman; chaykunata rikuspaqa maytapunichá Diosqa llakikurqan.

11. ¿Ima ejemplon yanapawasunman Jesús wañupushaqtin imaynachus Jehová Dios tarikurqan chayta allinta entiendenapaq?

¹¹ Pikunaqchus wawanku wañupurqan paykunaqa allintan yachanku imaynas chay nanay chayta. Yachanchisña kausarimpuy kananta, confianchisña chaypi chaypas, chay nanayqa mana chinkariqmi. Chhayna nanasqachá Jehová Diospas kasharqan jaqay 33 watapi nisán killapi ancha munakusqan wawan wañushaqtinqa (Mat. 3:17). c  

12. ¿Imakunatan ruwasunman Jesuspa wañupusqanta yuyarina p’unchay chayamunankama?

¹² Jesuspa wañupusqanta yuyarina p’unchay chayamunankama, ¿manachu astawan yachawaq Jesuspa imachus ruwasqanmanta? Yaqapaschá chayta estudiawaq sapallaykipi otaq familiapi estudiota aparispa. Qelqakuna t’aqwinapaq (Jehová Diospa testigonkunapaq) nisqawan yanapachikuy; kashanmi chaymanta rimaq juj qelqakunapas, chaykunata estudiay. d Diospaq kausasunchis nisqa qelqapipas kanqan programa chay p’unchaykunapi ima textokunatas leesunchis chaypaq, chaykunatapas leey. “Tutamantanta Diosta adorasqanchis” nisqapin lloqsimunqa chay p’unchaypaq juj  munay video, chaytapas qhaway. Sonqonchista allinta preparasun chay jatun p’unchaypaq chayqa, tukuy sonqomantan jujkunatapas yanapasun (Esd. 7:10).

¿IMAYNATAN JUJKUNATA YANAPARISUNMAN CHAY P’UNCHAYTA YUYARINANKUPAQ?

13. ¿Imakunatan ruwasunman jujkunapas noqanchiswan kuska Jesuspa wañupusqanta yuyarinankupaq?

¹³ ¿Imatan ruwasunman Jesuspa wañupusqan p’unchayta jujkunapas noqanchiswan kuska yuyarinankupaq? Chaypaqqa invitamunanchismi paykunata. Wasin-wasintan rakimunanchis chay p’unchaypaq invitacionta. Chaymantapas yaqapaschá juj listata ruwasunman, chaypitaq qelqasunman mayqen familianchiskunatachus, llank’anapipas escuelapipas mayqen compañerokunatachus invitayta munashanchis chayta. Invitacionninchis tukurukunqa chayqa, yaqapaschá celularninta apachisunman chay invitacionta. Manan yachanchischu paykunamanta mayqenchus jamunqa chayta (Ecl. 11:6).

14. ¿Imaraykun allinpuni pimanpas noqanchis kikinchispuni invitacionkunata qoy? Juj experienciata willay.

¹⁴ Invitacionkunata rakishaspaqa manan ninanchischu: “Manapaschá jamunqachu”, nispaqa. Chaypaq yachasunchis juj hermanaq qosanmanta. Payqa manas testigochu, juj kutinsi Jesuspa wañupusqan p’unchayta yuyarina kashaqtin qosanqa nisqa: “Jaku noqapiwan risunchis”, nispa. Jinas chay hermanaqa chay nisqanwan anchata admirakusqa. Ichaqa, ¿imaraykun admirakunman karqan? Payqa askha kutitas qosanta invitasqa juñunakuykunaman rinanpaq, ichaqa manas kasukusqachu. Chhaynaqa, ¿imaraykutaq kay kutipiri “jaku risun” nishanman karqan? Paymanqa juj reqsisqan umalliqsi juj invitacionta qosqa. Jinas payqa chay watapi risqa chay juñunakuyman, juj kutikunapipas risqas.

15. ¿Imakunapin piensarinanchis jujkunata invitamushaspa?

¹⁵ Wakin runamasinchisqa yaqapaschá primera vez juñunakuyman jamunqaku, chhayna kaqtinqa yaqapaschá imamantapas tapukuyta munanqaku. Chaymi noqanchisqa listollapuni kashananchis imatachus yachayta munanku chayta explicarinanchispaq (Col. 4:6). Yaqapaschá tapukunkuman: “¿Imatataq chaypiri ruwakun? ¿Jayk’a horataq chay juñunakuyri aparikunqa? ¿Imayna p’achasqataq chaymanri rina? ¿Jayk’atan  pagana chayman jaykunapaq? ¿Chay ukhupi qolqeta mañakunkuchu?”, nispa. Chaymi noqanchisqa atikuqtinqa tapurinanchis: “¿Imakunatapaschá yachayta munashanki?”, nispa; chhaynapi chayman jina chayta explicarinanchispaq. Chaymantapas yaqapaschá yanapachikusunman Jesuspa wañupusqanta yuyarisun nisqa videowan, ¿Imaynatan huñunakuyniyku aparikun? nisqa videowan ima. Qhawachisunmanmi Kusisqa kausay nisqa libropi 28 yachachikuytapas, chaypi imachus nisqanman jinataq paywan parlarisunman.

16. ¿Imatawanmi yaqapas tapukunkuman chay juñunakuyman jamuqkuna?

¹⁶ Chay juñunakuy qhepamanpas yaqapaschá imatawanpas tapukunqaku. Yaqapaschá tapukunqaku: “¿Imaraykun mana pipas t’antatapas ni vinotapas malliykunchu?”, nispa. Chaymantapas yaqapaschá niwasun: “¿Sapa kutillanchu kayta ruwakun? ¿Sapa juñunakuspachu kaykunata ruwankichis?”, nispa. Discursopiqa rimakunña chaykunamanta chaypas, yaqapaschá paykunaqa astawan yachayta munanqaku. Chaykunamanta yachachinapaqqa yanapachikusunmanmi jw.org paginapi “¿Imanaqtinmi Testigokuna juj religionkunamanta jujnirayta ruwanku Señorpa cenanta?” nisqa yachachikuywan. Tukuy atisqanchistan kallpachakunanchis manaraq chay juñunakuy chayamushaqtin, chay juñunakuy p’unchaypas, chay qhepamanpas, “wiñay kausayman apaq ñanninta llapa puriy munaqkunata” sumaqta yanapananchispaq (Hech. 13:48).

¿IMAYNATAN IÑIYNINKUPI CHIRIYAPUQ HERMANOKUNATA YANAPASUNMAN?

17. ¿Imaynatan umalliqkuna yanapankuman iñiyninkupi chiriyapuq hermanonchiskunata? (Ezequiel 34:​12, 16).

¹⁷ ¿Imaynatan umalliqkuna yanapankuman iñiyninkupi chiriyapuq iñiqkunata Jesuspa wañupusqanta yuyarina p’unchaykunapi? Paykunata sumaqta munayta qhawarispankun (leey Ezequiel 34:​12, 16). Umalliqkuna, manaraq chay p’unchay chayamushaqtin llapa chiriyapuq iñiqmasikunata maskhariychis. Paykunata tarispataq niychis: “Qankunamantan llakikuyku, tukuy atisqaykutan ruwasaqku qankunata yanapanaykupaq”, nispa. Invitaychis chay jatun juñunakuyman, jamuqtinkutaq munakuywan sumaqta chaskiychis. Chay qhepamanqa aman  paykunata qonqarparinkichischu, yanapashallaychis iñiyninkupi, chhaynapi Jehová Diosman kutimpunankupaq (1 Ped. 2:25).

18. ¿Imaynatan yanapasunman iñiyninkupi chiriyapuq hermanonchiskunata? (Romanos 12:10).

¹⁸ Llapanchismi yanapasunman chay jatun juñunakuyman jamuq iñiyninkupi chiriyapuq hermanonchiskunataqa. ¿Imaynatan chayta ruwasunman? Sumaqta, munakuywan, respetowan paykunata chaskispanchismi (leey Romanos 12:10). Allintan paykunapi piensarinanchis, paykunapaqqa manapaschá facilchu karqan chay juñunakuyman jamuyqa. “¿Millaytachu qhawariwanqakupas?” nispapaschá nisharqanku. e Chhaynaqa manan imatapas comuntaqa tapunanchischu, mana chayqa paqtapas sientechisunman p’enqachisunmanpas (1 Tes. 5:11). Paykunaqa hermanonchiskunan kanku, ¡may munaypunin paykunawan kuska Jehová Diosta adorayqa! (Sal. 119:176; Hech. 20:35).

19. ¿Imaraykun nisunman “Jesuspa wañupusqanta yuyariyqa allinninchispaqmi” nispa?

¹⁹ Kaypi yachasqanchis jina, Jesuspa wañupusqanta yuyarina p’unchayqa may munay p’unchaypunin. Razontachá Señor Jesusqa kamachiwarqanchis chay p’unchayta sapa watan yuyarinanchispaq. Rikumusqanchis jina, chay p’unchayqa imaymanapin yanapawanchis, jujkunatapas yanapanmi (Isa. 48:​17, 18). Chay p’unchayta yuyariymi yanapawanchis Jehová Diostapas Jesustapas astawan munakunanchispaq. Maytan paykunata “gracias” ninchis noqanchisrayku tukuy ima ruwasqankumanta. Chaymantapas chay p’unchaypiqa astawanmi iñiqmasinchiskunawan jujllachanakunchis, chaymantapas chay p’unchaykunapin jujkunatapas yanapanchis Jesuspa imachus ruwasqanta chaskikunankupaq. Chhaynaqa, tukuy atisqanchista kallpachakusun chay jatun p’unchaypaq listo kashananchispaq. Chay p’unchayqa watantinmanta aswan jatun p’unchaymi.