1. Jesús Huañushcata Yarina Tandanajui o Conmemoraciondaca ¿imamandata cushijushpa shuyapanchi? (Lucas 22:​19, 20).

 JEHOVATA sirvijcunapaca, Jesús Huañushcata Yarina o Conmemoración punllaca importantepachami can. Jesusca cada huata caita rurachunmi mandashpa saquirca (Lucas 22:​19, 20​ta liipangui). Chai importante punllata shuyangapaca ashtaca razongunatami charipanchi. Huaquin razongunata ricupashunchi.

2. ¿Ima razongunamandata Conmemoración punllataca cushijushpa shuyapashcanchi?

² Jesús huañushcata yarina o Conmemoracionga, Jesuspa rurashca ninan valishca cashcata yarichun, ñucanchicuna imagutapash rurashpa Jesús huañushcamanda agradici ushashcata yarichunmi ayudan (2 Cor. 5:​14, 15). Ashtahuanbash ñucanchi huauquipanicunahuan randimanda animarishpa catichunmi ayudan (Rom. 1:12). Cada huatami inactivo huauquipanicuna Conmemoracionmanga rin. Chaipi caj huauquipanicuna juyaihuan chasquishcamandami huaquingunaca Jehovaman tigranata decidishca. Shinallata shuj gentecunapash chaipi imata ricushcata y imata uyashcata ninanda gushtaimandami Bibliata yachajunata decidin. Conmemoracionbi cai tucui cosascunata pasashcamandami Conmemoración punllaca ñucanchipaca importantepacha can.

3. Conmemoracionga ¿imashinata Jehovata sirvijcuna shujllashna tandanajushca cashcata ricuchin? (Fotocunata ricupangui).

³ Chai punllaca mundo enteropimi testigo de Jehovacunaca chai tandanajuitallata charin. Chaimandami chai punllataca cushijushpa shuyapanchi. Mundo enteromanda tucui testigo de Jehovacunallatami Conmemoraciondaca indi huashajushca jipa ruran. Tucuicunallatami Jesús huañushcamanda cuj discursotaca ali ali uyapanchi. Ishcai canticocunatapashmi candapanchi. Ashtahuanbash vinota y tandata nara yalichishpallatami Taita Diosman shuj mañaita rurapanchi. Shinaca chai tandanajuipica chuscu viajecunatami Jehová Diostaca mañapanchi. Chai mañaicunapica “amén” nipanchimi. Mundo enteromanda huauquipanicunapashmi chaitallata ruran.  Ñucanchicuna chaita ruranajujta ricushpaca de seguromi Jehová y Jesuspash ñucanchimanda cushijushca sintiringa.

4. Cai temapica ¿imatata yachajupashun?

⁴ Cai temapica huaquin yuyaicunamandami yachajupashun. Por ejemplo, Conmemoracionbaca ¿imashinata preparado caita ushapanchi? Shujcunapash cai Conmemoracionmanda beneficiarichunga ¿imashinata ayudaita ushapanchi? Inactivo huauquipanicunatapash ¿imashinata ayudaita ushapanchi? Nishca yuyaicunamandami yachajupashun. Cai yuyaicunamanda yachajunami Conmemoracionba listo cachun ayudanga.

CONMEMORACIONBACA ¿IMASHINATA LISTO CAITA USHAPANCHI?

5. a) ¿Imamandata Jesús ñucanchita salvangapaj huañushcapi pensarina capanchi? (Salmo 49:​7, 8). b) ¿Imamandata Jesusca huañurca? nishca videopi imata yachajushcata parlapai.

⁵ Jesusca paipa valishca causaitami ñucanchita salvangapaca curca. Caipi pensarinami conmemoración punllapa listo cachun ayudanga. Ñucanchimandallataca nuncapash na juchamanda y huañuimandaca salvaritaca ushapanchimanllu carca (Salmo 49:​7, 8​ta liipangui; shinallata ¿Imamandata Jesusca huañurca? nishca videotapash ricupangui). a Chaimandami Jehová Diosca paipa juyashca churita ñucanchimanda huañuchun cachamurca. Shinami paicunaca shuj valishca preciota paganshna shuj jatun sacrificiota rurarca (Rom. 6:23). Shinaca Jehová y Jesús ñucanchita salvangapaj imacunatalla rurashcapi pensarinaca ñucanchicuna paicunata ashtahuan valorachun agradicichunmi ayudanga. Catipica Jehová y Jesuspash ñucanchita salvangapaj imacunatalla rurangapaj dispuesto cashcatami ricupashun. Primeroca, Jesús ñucanchita salvangapaj imatalla rurashcatami yachajupashun.

6. Gentecunata salvangapaca Jesusca ¿imatata rurarca?

⁶ Pitapash secuestrajpi salvangapaca shuj valishca valishca preciotami pagan. Jehová Diosca Adán runataca perfectotami rurarca. Shinapash pecadota rurashpaca para siempre causana oportunidadtami chingachirca. Y paipa culpamandami paipa huahuacunapash para siempre causaitaca ñana usharca. Ashtahuanbash Adán runa para siempre causaita chingachishcamandami Jesusca paipa perfecto causaita cushpa shuj valishca preciota paganshna huañuna tucurca. Jesús cai alpapi causajushpaca “ima pecadotapash na rurarcachu. Umachingapaj llulla parlocunatapash na nircachu” (1 Ped. 2:22). Adán runaca jucha illa causaitami chingachirca. Shinapash Jesús paipa jucha illaj causaita cushpaca chai valortallatami pagarca (1 Cor. 15:45; 1 Tim. 2:6).

7. Jesusca ¿imacunatalla mishangapata esforzarina tucurca?

⁷ Jesús cai alpapi cashpaca ima llaquicunata charishpapash paipa Taita Jehová Diostaca tucuipimi cazurca. Jesusca perfecto cashpapashmi huahua cashpaca paipa juchayu taitamamapa mandashcacunata cazushpa viñana tucurca (Luc. 2:51). Jesustaca joven cajpica talvezpashmi shuj gentecunaca Jehovata y paipa taitamamacunata ama cazuchun imacunatapash nishpa atichishcanga. Shinapash Jesusca ama shujcunapa nishcacunata catingapami ninanda esforzarina tucushcanga. Shinallata Jesús ña edadta charijpica Jehovata ama cazuchunmi Diabloca paita tentangapaj munarca. Y chai tentacionda mishangapapashmi esforzarina tucurca (Mat. 4:​1-11). Diabloca, Jesús gentecunata ama salvachun munaimandami Jesustaca pecadopi urmachingapapacha munarca.

8. ¿Imacunatata Jesusca ashtahuan aguantana tucurca?

⁸ Jesús cai alpapi villachijushpaca shuj llaquicunatapashmi aguantana tucurca. Por ejemplo, Jesustaca contracunaca catiriashpami llaquichirca. Shinallata huañuchishunmi nishpapashmi amenazarca (Luc. 4:​28, 29; 13:31). Paipa discipulocunapa pandarishcacunatapashmi aguantana tucurca (Mar. 9:​33, 34). Shinallata paita huañuchingapaj juicionajuj horasca ninanda macashpami, paimanda burlarirca. Chai jipaca shuj shuhua runatashna  tratashpami llaquinaita sufrichishpa huañuchirca (Heb. 12:​1-3). Ashtahuanbash Jesús ña huañugrijuj horascunapica Jehová Diosca paitaca ñana ayudarcachu. Chaimandami ña huañunalla horaspica pailla chai llaquicunataca aguantana tucurca (Mat. 27:46). b

9. Jesús ñucanchita salvangapaj imacunatalla rurashcapi pensarishpaca ¿imashinata sintiripanchi? (1 Pedro 1:8).

⁹ Shinaca imashina ricupanchi Jesusca pipash na rurai ushana ashtaca cosascunatami, ñucanchita salvangapaca aguantashca. Chai tucui cosascunata rurashcata yarishpaca, paita juyana y ninanda agradicina munaimi ñucanchitaca shamun (1 Pedro 1:8​ta liipangui).

10. Jehová Diosca, Jesusta cai alpaman ñucanchimanda huañuchun cachamushpaca ¿imatata aguantana tucurca?

¹⁰ Jehová Diosca, Jesusta cai alpaman ñucanchimanda huañuchun cachamushpaca ¿imatata aguantana tucurca? Jehová y Jesusca paicunapuraca alipacha amigocunami can. Paicunashna llevarijcunaca pipash na tianllu (Prov. 8:30). Shinaca caipi pensaripashunchi: “Cashna alipacha llevarijcunamandaca shuj sufrijpica ¿imashinashi sintirirca? Jehová Diosca cai alpapi paipa churi Jesusta ninanda maltratajta, na ricunayachishpa ninanda sufrichijta ricushpaca ninandami llaquirishcanga”.

11. ¿Ima ejemplota Jesusta huañuchijpi Jehová Dios imashinapacha sintirishcata intindichunga ayudan?

¹¹ Shuj huahua huañushcata charij taitamacunaca, shuj huahuata pirdina shuj jatun llaqui cashcataca alimi intindin. Huañushcacuna causarinapi feta charishpa o crishpapashmi shuj juyashca persona huañujpica ninandami llaquiripanchi. Cai ejemplomi huata 33​pi Jesús ninanda sufrishpa huañujpi Jehová Dios imashinapacha sintirishcata intindichun ayudan (Mat. 3:17). c

12. Conmemoración punlla nara chayamujpillata ¿imatata rurana capanchi?

¹² Conmemoración punlla chayamungacamanga quiquinba estudio personalpi y adoración en familiapimi Jesús ñucanchita salvangapaj huañushcamanda temata ashtahuan yachajuita ushapanguichi. Shinallata Bibliamanda ashtahuan ali intindingapaj informacionguna nishcapi y shuj publicaciongunapipashmi cai temamanda ashtahuan yachajungapaj mascaita ushapangui. d Ashtahuanbash Jesuspa Chaquita Catishpa Causashunchi Yachachishunchi Tandanajuipi Yachajungapaj Hojapimi 2024 huatapa Conmemoracionba liina textocuna nishca partetapash liina capangui. Shinallata Conmemoración punllapipachami Conmemoracionba Tutamanda Bibliata Yachajungapaj programapash tiapan. Ama cungashpa ricupangui. Conmemoración  nara chayamujpillata ñamanda prepararishpaca shujcunatapashmi cai punllamanda beneficiarichun ayudai ushapashun (Esd. 7:10).

CONMEMORACIONMANDA SHUJCUNAPASH BENEFICIARICHUN AYUDAPASHUNCHI

13. Shujcunapash Conmemoracionmanda beneficiarichunga callaripica ¿imatata rurana capanchi?

¹³ Conmemoracionman shamushpa shujcuna beneficiarichunga ¿imatata rurana capanchi? Callaripica ñucanchicunaca cai tandanajuiman shamuchunmi invitana capanchi. Predicacionbi gentecunaman invitaciongunata saquishpapash, picunatalla invitangapaj munashcatami anotashpa shuj listagupi churaita ushapanchi. Por ejemplo, ñucanchi familiacunata, trabajomanda compañerocunata, escuelamanda compañerocunata o shuj rijsi gentecunatapashmi invitaita ushapanchi. Invitación hojacuna tucurijpica jw.org paginapi tiashca invitacionda ricuchunmi shuj enlaceta cachaita ushapangui. Tucui usharishcaguta invitapashunchi, picunalla cai invitacionda chasquishpa shamui ushanataca na yachapanchichu (Ecl. 11:6).

14. Shuj invitacionda personalmente pimanbash saquinaca ¿imapata ayudai ushan? Shuj experienciamanda parlapai.

¹⁴ Conmemoracionman pitapash invitashpaca, na shamungachu nishpaca na pensanachu capanchi. Shuj viajeca shuj panigupa na Testigo cusaguca na yashcapimi Conmemoracionmanga canhuanmi rigrini nishcarca. Shina nijpica paniguca na crijurcachu ¿imamandata shina pasarca? Paniguca ashtaca viajecunatami paipa cusagutaca Conmemoracionman jacu nishpa invitashcarca. Shinapash nunca na ringapaj munashcarcachu. Shinapash paipa cusaguca cai viajeca ¿imamandata Conmemoracionmanga ringapaj munajurca? Panigupa cusataca shuj rijsishca ancianomi huauquigumi Conmemoracionman richun invitashcarca. Chaimandami ringapaj munajushcarca. Chai viajemandaca panigupa cusaguca shuj huatacunapapashmi Conmemoracionmanga rishpa catirca.

15. Conmemoracionman shuj personata invitashpaca ¿imatata yaipi charina capanchi?

¹⁵ Caita yaripashunchi. Pitapash Conmemoracionman invitajpica chai personaca huaquin tapuicunatami charita ushan. Ashtahuanbachaca Salón del Reinoman nuncapash na rishcacunami huaquin tapuicunata charita ushan. Chaimandami ima tapuicunata charinapi pensarishpa y chai tapuicunata imashina contestanata aliguta pensarina capanchi (Col. 4:6). Por ejemplo paicunaca:  “Chai tandanajuipica ¿imatata ruranguichi?, ¿Mashna horasta paranguichi?, ¿Imashinata vistirishpa rina capani?, ¿Entradataca cobrapanguichichu?, O ¿Culquita mañanllu?” nishpami tapuita ushan. Chaimandami ima tapuigutapash charipanguichu nishpami tapuita ushapanchi. Shinallata imaguta cashpapash aligutami explicana capanchi. Shinallata Jesús Huañushcata Yarishunchi nishca videota y Ñucanchi tandanajuicunaca ¿imashinata can? nishca videotapashmi paicunaman ricuchingapaj utilizaita ushapanchi. Ashtahuanbash Cushilla causapashunchi nishca libropa lección 28​pica huaquin yuyaicunami paicunaman compartingapaj tian.

16. Conmemoracionman rishca personaca ¿imatata ashtahuan tapuita ushanga?

¹⁶ Conmemoracionman shamushca personaca talvezpashmi jipamanga ashtahuan tapuicunata charinga. Por ejemplo, “¿imashpata tucuicuna tandata na micun y vinota na ufian?” Shinallata, “Conmemoraciondaca huatapica ¿mashna viajetata ruranguichi?” O talvez, “¿tucui tandajuicunapichu chaitallata ruranguichi?” nishpami tapuita ushan. Conmemoracionba discursopi cai yuyaicunamanda parlajpipash, primera vez shamushcacunamanga talvezpashmi ashtahuan explicana minishtiringa. Paicunapa tapuicunata contestangapaca jw.org paginapi “Testigo de Jehovacunaca ¿imamandata shujta religiongunamandaca diferenteta Jesús huañushca punllataca yuyarin?” nishca tematapashmi utilizaita ushapanchi. Shinaca Jehovapa yachachishcacunata chasquingapaj munaj ali shungu gentecunataca, nara Conmemoración chayajpillata Conmemoración horaspi y yalishca jipapashmi cai tandanajuimanda beneficiarichunga tucui usharishcaguta rurashpa ayudangapaj munapanchi (Hech. 13:48).

INACTIVO HUAUQUIPANICUNATA AYUDAPASHUNCHI

17. Inactivo huauquipanicunata ancianocunaca ¿imashinata ayudaita ushan? (Ezequiel 34:​12, 16).

¹⁷ Conmemoración tiempopica ancianocunaca ¿imashinata inactivo huauquipanicunataca ayudaita ushan? Ancianocunaca paicunamanda preocuparishpa, juyaitami ricuchita ushan (Ezequiel 34:​12, 16​ta liipangui). Ancianocunaca Conmemoración nara chayamujpillatami inactivo huauquipanicunataca cayachina can. Shinallata cangunamandaca ninandami preocuparipanchi, quiquingunata ayudangapami tucui usharishcaguta rurangapaj munapanchi nipangui.  Conmemoracionman invitashcamanda shamujpica juyaihuan chasquipangui. Y chai jipapash Jehovaman tigrana munaita charichun paicunataca espiritualmente ayudashpa catingapaj esforzaripangui (1 Ped. 2:25).

18. Inactivo huauquipanicunataca ¿imashinata tucuicunallata ayudaita ushapanchi? (Romanos 12:10).

¹⁸ Congregacionmanda tucui huauquipanicunapashmi Conmemoracionman shamushca inactivo huauquipanicunataca ayudaita ushapanchi. Paicunataca juyaihuan, respetohuan, aliguman tratashpami ayudaita ushapanchi (Romanos 12:10​ta liipangui). Ñucanchicunaca cai huauquipanicunapa cai tandanajuiman shamuna difícil cashcatami yarina capanchi. Paicunaca talvezpashmi huauquipanicunaca, “¿ñucataca imashinashi chasquihuanga?” yashpa preocupado cashcanga. e Chaimandami imapash nali sintichina tapuicunataca na rurana capanchi (1 Tes. 5:11). Paicunaca ñucanchi huauquipanicuna cashpami catin. Paicunahuan cutin Jehovata adorai ushashcamandami ninanda cushijupanchi (Sal. 119:176; Hech. 20:35).

19. Jesús huañushca punllata yarishpaca ¿ima beneficiocunatallata charipanchi?

¹⁹ Cai temapica imamanda Jesuspa huañushca punllata yarina importantepacha cashcatami ricupashcanchi. Jesuspa huañushca punllata yarinaca ñucanchipa y shuj gentecunapashmi ashtaca beneficio cashca (Is. 48:​17, 18). Ñucanchitaca, Jehová Diosta y Jesusta ashtahuan juyachunmi ayudan. Shinallata paicuna ñucanchicunamanda imacunatalla rurashcata ashtahuan agradicichun, huauquipanicunahuan ashtahuan unido cachun, shuj gentecunamanbash Jesús huañushcamanda bendiciongunata chasquingapaj imacunatalla rurana cashcata yachachichunbashmi ayudan. Shinaca Conmemoración punllapa ñamanda listo cangapaj esforzaripashunchi.