1. Eaa te Akamaaraanga i riro ei ei rā maata roa atu o te mataiti? (Luka 22:​19, 20)

 KO TE Akamaaraanga i te mate o Iesu, te rā maata roa atu o te mataiti no te iti tangata o Iehova. Ko teia ua te akamaaraanga ta Iesu i akaue i tana au pipi kia akono. (E tatau ia Luka 22:​19, 20.) Maata te tumu kia tapapa atu tatou i te Akamaaraanga e ka uriuri tatou i te reira.

2. Eaa te au tumu ka tapapa atu tatou no te Akamaaraanga?

² Ka tauturu te Akamaaraanga ia tatou kia akamanako i te puapinga o te atinga oko. Ka tauturu katoa te reira ia tatou kia akaari i te tu āriki rekareka no te atinga oko o Iesu. (2 Kori. 5:​14, 15) E atianga te reira kia piri ki te au taeake e te au tuaine e “kia pumaana oki . . . i to tatou akarongo.” (Roma 1:12) I te au mataiti, e maata te au taeake kua paruparu i te pae vaerua tei tae mai. Kua akakeuia tetai pae kia oki mai kia Iehova no te aroa ta ratou i kite. E maata te aronga ou tei umere i ta ratou i kite e i akarongo e kua inangaro i te apii i te Pipiria. No reira tatou i akaperepere ei i te Akamaaraanga!

3. Akapeea te Akamaaraanga me taokotai i to tatou au taeake takapini i teianei ao? (Akara katoa i te tutu.)

³ Akamanako katoa akapeea te Akamaaraanga me taokotai i to tatou au taeake i teianei ao. I te ra e opu ra takapini i te ao, ka uipa te Au Kite o Iehova no te Akamaaraanga. Ka akarongo te katoatoa i te akoanga tei  akakite mai i te puapinga o te oko. Ka imene tatou e rua imene akapaapaa, ka tu’a i te oroa, ka raveia e ā pure e ka taopenga te katoatoa “amene.” I roto i te 24 ora, kua aru te au putuputuanga katoatoa i teia akanoonooanga. Akamanako ana i te ngakau rekareka o Iehova e Iesu, te kite anga ia tatou i te akapaapaa anga ia raua.

4. Eaa ta tatou ka uriuri i roto i teia atikara?

⁴ I teia atikara, ka pau tatou i teia au uianga: Akapeea tatou me tapapa i to tatou ngakau no te Akamaaraanga? Akapeea tatou me tauturu i tetai ke kia puapingaia? E akapeea tatou me tauturu i te au taeake kua paruparu i te pae vaerua? Ka tauturu teia atikara ia tatou kia akapapa no teia akakoroanga puapinga roa atu.

AKAPEEA TATOU ME TAPAPA I TO TATOU NGAKAU NO TE AKAMAARAANGA?

5. (a) Eaa ta tatou ka akamanako no te atinga oko? (Salamo 49:​7, 8) (e) Eaa taau i apii mai mei te vitio Eaa a Iesu i Mate ei?

⁵ Tetai ravenga puapinga kia tapapa i to tatou ngakau no te Akamaaraanga, na te akamanako anga i te puapinga o te atinga oko o Iesu. Kare e rauka ia tatou i te oko ia tatou uaorai mei te ara e te mate. (E tatau ia Salamo 49:​7, 8; akara katoa i te vitio Eaa a Iesu i Mate Ei?) a No reira kua akanoo a Iehova ia Iesu kia akaatinga i tona oraanga no tatou. E tutaki maata ta raua i rave. (Roma 6:23) Me akamanako tatou i ta Iehova e Iesu i rave no tatou, ka maata atu to tatou āriki rekareka i te oko. Ka uriuri tatou i tetai au apinga ta Iehova e Iesu i rave. Inara te mea mua, eaa te atinga oko?

6. Eaa te ō maira i roto i te atinga oko?

⁶ Ko te atinga oko tetai apinga tei tutakiia kia oko mai i tetai apinga. E tangata apa kore a Adamu i tona angaia mai anga. Inara te ara anga aia, kua ngere aia i te ora mutu kore nona e tana uanga. Kua akaatinga a Iesu i tona oraanga apa kore ei oko mai i ta Adamu i ngere. I to Iesu oraanga i te enua nei, kare rava aia “i rave i te ara, kare ua e pikikaa i kitea i tona vaa.” (1 Pete. 2:22) No reira i tona matenga, kua tutaki a Iesu i ta Adamu i ngere na te akaatinga anga i tona oraanga apa kore.—1 Kori. 15:45; 1 Timo. 2:6.

7. Eaa te au timataanga tei tupu kia Iesu iaia i te enua nei?

⁷ Noatu te au timataanga tei tupu kia Iesu i te enua nei, kua kauraro aia ki tona Metua i te rangi. I tona tamariki anga, kua akarongo aia ki tona nga metua apa ua. (Luka 2:51) Noatu tona tu apa kore i tona mapu anga, kua akakoromaki aia i te au taomianga kia akarongo kore. Kia maata mai aia, kua patoi a Iesu i te au timataanga e te māroanga a Satani te Tiaporo, kia tiratiratu kore ki te Atua. (Mata. 4:​1-11) Kua tauta pakari a Satani i te timata ia Iesu kia ara e kia kore e tutaki i te oko.

8. Eaa te au timataanga ke atu ta Iesu i akakoromaki?

⁸ I te tuatau o tana angaanga orometua, kua akakoromaki a Iesu i tetai au timataanga ke. Kua takinokino tona au enemi iaia e kua kimi ravenga i te tamate iaia. (Luka 4:​28, 29; 13:31) Kua akakoromaki aia i te tu apa ua o tana au pipi. (Mare. 9:​33, 34) E i tona akavaanga, kua aviriia e kua tamamaeia aia. Aru mai kua akautungaia aia ei tangata rave kino e kua tamateia na roto i tetai ravenga rikarika.  (Ebe. 12:​1-3) E i mua ake ka mate ei a Iesu, kua akaatea a Iehova i tana paruruanga, kia akakoromaki aia e tae ua atu ki te openga. b—Mata. 27:46.

9. Eaa toou manako no runga i te atinga oko o Iesu? (1 Pete. 1:8)

⁹ Taka meitaki, kua mamae maata a Iesu ei tutaki i te atinga oko. Me akamanako tatou i ta Iesu i akaatinga no tatou, ka akaperepere maata atu tatou iaia.—E tatau ia 1 Petero 1:8.

10. Eaa ta Iehova i rave ei tutaki i te atinga oko o Iesu?

¹⁰ Akapeea a Iehova? Eaa tana i akaatinga no te tutaki i te atinga oko o Iesu? E pirianga vaitata to Iehova e Iesu ei Metua e ei tamaiti. (Mase. 8:30) E akamanako i reira i ta Iehova i kite ia Iesu e akakoromaki ra i te au timataanga i te enua nei. E mea papu e kua mamae tikai to Iehova ngakau i te kite i tana tamaiti te takinokinoia anga e te timataia anga.

11. Akakite mai i tetai akaraanga te akaari maira i to Iehova mamae ngakau te tamateia anga a Iesu.

¹¹ Kua kite meitaki tetai metua i te mamae ngakau e te taitaia me takake tana tamaiti. Noatu ka irinaki papu tatou i te tuakaouanga, ka vai rai te mamae ngakau e te mii me mate to tatou akaperepere. Ka tauturu teia ia tatou kia mārama i to Iehova mamae ngakau iaia e akara ra i tana tamaiti, te takinokinoia anga e te tamateia anga i taua rā ra i te 33 T.N. c—Mata. 3:17.

12. Eaa ta tatou ka rave i teia taime e tae ua atu ki te rā Akamaaraanga?

¹² I mua ake ka tae mai te rā Akamaaraanga, penei ka rave koe i tetai apii Pipiria naau uaorai me kore te Akamorianga Ngutuare no runga i te atinga oko. E taangaanga i te Research Guide for Jehovah’s Witnesses (me kua uriia ki roto i toou reo) me kore tetai au puka Apii kia kimikimi oonu atu no runga i teia. d Pera katoa, e aru i te papaanga no te Tatau Pipiria i roto i te Oraanga Kerititiano e te Angaanga Orometua—Puka Angaanga no te Uipaanga. E i te rā o te Akamaaraanga, e akara i te vitio takake no te Akamorianga Popongi. Me tapapa tatou i to tatou ngakau no te Akamaaraanga, ka rauka i reira ia tatou i te tauturu i tetai ke kia puapingaia mei te reira.—Ezera 7:10.

 TAUTURU I TETAI KE KIA PUAPINGAIA

13. Eaa te takainga mua ta tatou ka rave ei tauturu i tetai ke kia puapingaia mei te Akamaaraanga?

¹³ Akapeea tatou me tauturu i tetai ke kia puapingaia mei te Akamaaraanga? Te mea mua, e pati ia ratou kia tae mai. Kapiti mai i te tu’a anga i te patianga, e tata i te ingoa o te aronga taau i kite kia pati ia ratou. Pera katoa te ingoa o te kopu tangata, oa angaanga, oa apii e tetai ke. Me pou taau patianga e tuku atu i te link kia ratou. Ka poitirere koe i te aronga ka āriki mai!—Kohe. 11:6.

14. Akatutu mai i te puapinga me tauta tatou i te oronga i tetai patianga ki te tangata.

¹⁴ Ka puapingaia ta tatou tauta anga i te oronga tika atu i te patianga ki te tangata. Tetai akaraanga, kua poitirere tetai tuaine kare tana tane i te Kite te karanga anga aia e ka aere atu aia ki te Akamaaraanga. Eaa te tuaine i poitirere ei? No te mea e pati ua ana aia i tana tane i mua ana, kare ra aia i āriki mai ana. Eaa te tuke i teia taime? Karanga tana tane, “Kua orongaia mai taku patianga.” Akamārama aia, e na tetai tangata pakari tana i matau i pati iaia. Kua tae tana tane ki te Akamaaraanga i tera mataiti e te au mataiti i aereia mai.

15. Eaa ta tatou ka akamaara me pati atu i te tangata ki te Akamaaraanga?

¹⁵ E akamaara penei ka ui mai te tangata i te au uianga—me ko te taime mua teia ka aere mai ratou ki te Akamaaraanga. E akamanako i ta ratou ka ui mai e e akapapa i te pauanga. (Kolo. 4:6) Ei akaraanga, penei ka ui mai ratou: ‘Eaa te ka raveia i reira?’ ‘Eaa te roa?’ ‘Eaa te tu akamanea anga?’ ‘Ka tutaki ainei au?’ ‘E ko’i moni ana kotou?’ Me pati tatou i te tangata ki te Akamaaraanga, penei ka ui tatou “E uianga taau?” e oti e pau i te reira. Penei e akaari i te nga vitio Akamaara i te Mate o Iesu e Eaa te Raveia Ana i ko i te Are Uipaanga Patireia? i te akamārama i ta tatou au uipaanga. E  e maata te au manako meitaki i roto i te apii 28 o te puka Oraanga Mataora e Tuatau Ua Atu!

16. Eaa te au uianga ta te aronga ou ka ui mai no te Akamaaraanga?

¹⁶ I muri ake i te Akamaaraanga, penei e uianga takake ta te aronga ou. Penei ka ui mai ratou eaa te tumu kare e tangata i kai i te oroa, me kore e iti ua te aronga i kai i te reira. Ka ui mai ratou eia taime ka raveia te Akamaaraanga. Penei ka inangaro ratou i te kite me e aiteite ua te au uipaanga a te Au Kite o Iehova. Noatu ka pauia teia au uianga i roto i te akoanga o te Akamaaraanga, penei e mea meitaki kia akamārama atu i te reira kiaia. Ka tauturu te atikara “Eaa i Tuke ei ta te Au Kite o Iehova Akamaaraanga i te Kaikai a te Atu ki ta te au Akonoanga Ke?” i runga i te jw.org ia tatou kia pau i ta ratou au uianga. I te tuatau o te Akamaaraanga—kia tauta pakari tatou i te tauturu “i te aronga akonoia” kia puapingaia mei te Akamaaraanga.—Anga. 13:48.

TAUTURU I TE AU TAEAKE KUA PARUPARU

17. Akapeea te aronga pakari me tauturu i te au taeake kua paruparu i te pae vaerua? (Ezekiela 34:​12, 16)

¹⁷ I te tuatau o te Akamaaraanga, akapeea te aronga pakari me tauturu i te au taeake kua paruparu i te pae vaerua? Akaari i te aroa kia ratou. (E tatau ia Ezekiela 34:​12, 16.) I mua ake i te Akamaaraanga, e tauta i te atoro atu ia ratou. E akapapu i toou aroa no ratou e toou inangaro i te tauturu ia ratou. E pati ia ratou kia tae mai ki te Akamaaraanga. E me tae mai ratou, e āriki pumaana atu ia ratou. I muri ake i te Akamaaraanga, e atoro akaou i teia au taeake e te au tuaine akaperepere, e e oronga i te tauturu kia oki mai ratou kia Iehova.—1 Pete. 2:25.

18. Akapeea tatou pouroa me tauturu i te au taeake kua paruparu i te pae vaerua? (Roma 12:10)

¹⁸ Ka rauka ia tatou pouroa i te tauturu i te au taeake kua paruparu te akarongo kia tae mai ki te Akamaaraanga. Akapeea? E akaari i te aroa, te tu takinga  meitaki e te akangateitei. (E tatau ia Roma 12:10.) Akamaara penei e ngata ia ratou i te oki mai ki te uipaanga. E kua mataku ratou e kare ratou e ārikiia mai. e No reira auraka e ui i te au uianga te ka taakama ia ratou e te ka akatupu i te mamae kia ratou. (1 Tesa. 5:11) E au taeake e e au tuaine akaperepere ratou no tatou. Ka mataora tatou i te akamori kapiti akaou kia ratou!—Sala. 119:176; Anga. 20:35.

19. Eaa te au akameitakianga me akamaara tatou i te mate o Iesu?

¹⁹ Mataora tatou i ta Iesu akaueanga kia akono i te Akamaaraanga o tona mate i te au mataiti. Ia tatou e rave ra i teia, ka puapingaia tatou e tetai ke. (Isa. 48:​17, 18) Ka maata atu to tatou inangaro ia Iehova e Iesu. Akaari katoa tatou i to tatou tu āriki rekareka no ta raua i rave. Ka akaketaketaia to tatou pirianga ki te au taeake e te au tuaine. E ka tauturu tatou i tetai ke kia rauka te au akameitaki anga no te atinga oko. No reira e rave i taau ka rauka, kia akapapa no te Akamaaraanga o teia mataiti—ko te rā maata roa atu o te mataiti!