1. Sostar si i Comemorarea o mai baro ghies anda o bărș? (Luca 22:19, 20)

 O MAI baro ghies anda o bărș anda le manușa le Iehovasche pa sea i phuv, si o ghies cana anen penghe amintea catar o merimos le Isusosco. Si o corcoro evenimento cai o Isus poruncisardea te încăras-les. (Citisar Luca 22:19, 20.) Si amen but motivea caște ajucăras i Comemorarea. Te dichas chichiva anda lende.

2. Sostar ajucăras i Comemorarea?

² I Comemorarea ajutil amen te gândisaras amen so bari buchi cărdea o Isus anda amende cana dea peschi viața sar jertfa. Cado ghies cherel amen te hachiaras sar daisaras te sicavas că lesco sacrificio si cuci anda amende. (2 Cor. 5:14, 15) Si vi iech ghies pherdo bucuria mașcar amare phrala, cana „zuriaras-ame iech averes”. (Rom. 1:12) Ande fiesavo bărș, aven but phrala inactivi ca i Comemorarea. Cana dichen că le phrala primisaren-len anda sea o ilo, chichiva alosaren te aven parpale co Iehova. Sa cadea, but manușa interesime așen uimime catar so dichen hai așunen, hai cadea camen te astaren te phiren vi von po drom la viațaco. Sea cadal buchia cheren amen te ajucăras anda sea o ilo i Comemorarea.

3. Sar chidel amen ande iech than hai sar zuriarel amaro phralicanimos i Comemorarea? (Dich vi le imagini.)

³ Te gândisaras amen vi sar i Comemorarea chidel amen ande iech than sea le phralen hai sar zuriarel amaro phralicanimos pe sea i phuv. Ando timpo so o cham mechel-pe tele ande fiesavi rig la phuveachi, Le Martori le Iehovasche chiden-pe caște anen penghe amintea catar o merimos le Isusosco. Savore așunas iech cuvântarea cai sicavel so bari buchi si că samas chinde parpale anda o păcato prin i răscumpărarea, ghilabas dui ghilea anda așarimos, das vast vastestar o manro hai i mol hai phenas „Amin” pala fiesavo anda le ștar manglimata phende. Ande  24 ceasuria sea le congregații anda sea i lumea încăren cadea i Comemorarea pala cado modelo. Te gândisaras amen so bari bucuria pherel o ilo le Iehovasco hai le Isusosco cana dichen sar sicavas lenghe pachiv unime savore pe sea i phuv!

4. Anda so va avela te das duma ande cado articolo?

⁴ Ande cado articolo, va avela te das duma anda cadal trin pușimata: Sar daisaras te pregătisaras amaro ilo anda i Comemorarea? Sar daisaras te ajutisaras vi averen te țârden miștimata anda i Comemorarea? Hai so daisaras te cheras anda amare phrala cai sile inactivi. Le răspunsuri cadale pușimatande va ajutina amen te avas pregătime anda cado ghies sfânto.

SAR DAISARAS TE PREGĂTISARAS AMARO ILO ANDA I COMEMORAREA?

5. a) Sostar trebulas te gândisaras amen ca so bari buchi si i răscumpărarea? (Psalmo 49:7, 8) b) So sichilean anda o materialo video Sostar mulea o Isus?

⁵ Iech anda le mai lașe moduri te pregătisaras amaro ilo anda i Comemorarea si te gândisaras amen so bari buchi cărdea o Isus Cristos anda amende prin i răscumpărarea. Corcore ci daisardeamas niciechdata te hastravas amen anda o păcato hai o merimos. (Citisar Psalmo 49:7, 8; dich vi o materialo video Sostar mulea o Isus?) a Cadea că o Iehova dea pesche cuci șiaves te merel anda amende. (Rom. 6:23) Chichi beșas mai but hai gândisaras amen ca so cărde o Iehova hai o Isus caște chinen amen parpale anda o păcato, cadichi mai but dichas cuci i răscumpărarea. Mai dur, va avela te dichas chichiva phare buchia cai trebuisarde o Iehova hai o Isus te cheren-len caște cheren posibilo i răscumpărarea. Tha mai anglal, te dichas so si i răscumpărarea.

6. So si i răscumpărarea?

⁶ I răscumpărarea si o prețo pochindo caște chinel-pe vareso parpale. O iechto manuș, o Adam, sas-lo perfecto cana sas-lo cărdo. Cana păcătuisardea, vo hasardea i posibilitatea te trail veșnico na numai anda peste tha vi anda sea lesche șiave. Caște chinel parpale so o Adam hasardea, o Isus dea peschi viața perfecto sar răscumpărarea. Sea leschi viața sar manuș pi phuv, o Isus „ci cărdea păcato, hai ande lesco mui ci arachlea-pe athaimos”. (1 Pet. 2:22) Cana mulea o Isus sas-lo perfecto, cadea sar sas vi o Adam angla so te păcătuil. Cadea că, cana dea peschi viața sar jertfa vo daisardea te pochinel o prețo caște chinel amen parpale anda o păcato hai o merimos. (1 Cor. 15:45; 1 Tim. 2:6)

7. Prin so zumaimata nachlea o Isus cana sas-lo pi phuv?

⁷ Cana sas-lo pi phuv, o Isus așundea vi mai dur pesche Dadestar cerisco, chiar cana ci sas lesche ușoro. Sar țâno șiavorro cai cărdilea perfecto, vo trebuisardea te așunel pesche dadestar hai pesca deiatar cai sas-le imperfecți. (Luca 2:51) Sar tărno șiavo, daștil-pe că vo trebuisardea te așel contra le presiuni te na așunel pesche dadestar sau deiatar sau chiar le Iehovastar. Hai sar baro manuș, o Isus trebuisardea te așel contra le athaimata le Satanosche, cai camlea te cherel-les te na mai așel loialo le Devlesche. (Mat. 4:1-11) O Satan dea sea peschi zor te cherel le Isusos te păcătuil, caște na mai daștil te pochinel i răscumpărarea.

8. Prin so aver pharimata nachlea o Isus?

⁸ Cana cărdea peschi buchi pi phuv, o Isus nachlea vi prin aver pharimata. Vo nachlea prin persecuții hai butivar lesche dușmani rodenas te mudaren-les. (Luca 4:28, 29; 13:31) Sa cadea, vo trebuisardea te suportil le covlimata pesche continuatorenghe. (Mar. 9:33, 34) Cana sas lesche cărdi i cris, vo sas-lo mardo  hai prasado. Pala codoia, vo nachlea prin bare ducha hai sas-lo mudardo sar iech criminalo. (Evr. 12:1-3) Cana sas-lo po stâlpo de tortură vo trebuisardea te nachel corcoro părdal cado pharimos bi te avel ferime le Iehovastar. b (Mat. 27:46)

9. So si ande amaro ilo cana gândisaras amen ca so cărdea o Isus anda amende? (1 Petru 1:8)

⁹ Hachiaras ciaces că o prețo pochindo le Isusostar caște chinel amen parpale anda o păcato sas zurales baro. Cana gândisaras amen so bari buchi sas-lo gata o Isus te cherel anda amende, amari iubirea anda leste bariol vi mai but. (Citisar 1 Petru 1:8.)

10. So prețo sas-lo gata o Iehova te pochinel ca o Isus te daștil te del peschi viața anda amende?

¹⁰ Tha so prețo sas-lo gata o Iehova te pochinel ca o Isus te daștil te del peschi viața anda amende? Le Iehovas hai le Isusos silen o mai zuralo phanglimos cai daștil te avel mașcar iech dad hai lesco șiavo. (Prov. 8:30) Cadea că te gândisaras amen, chichi de duchado sas-lo o Iehova cana dichlea le Isusos sar nachel prin bare pharimata. O ilo le Iehovasco sas-lo phagărdo duchatar cana le manușa phirade-pe nasul lesche Șiavesa hai cana sas-lo mudardo ande bare ducha.

11. Den iech exemplo cai sicavel so sas ando ilo le Iehovasco cana o Isus sas-lo mudardo.

¹¹ Orisavo dad sau dei cai hasardea ando merimos pesche șiavorres jianel mișto so bari duch anel cadaia. Si amen iech pachiamos zuralo ando jiuvindimos, tha cadaia ci chosel i duch anda amaro ilo cana varecon drago amenghe merel. Cado exemplo ajutil amen te hachiaras so simțosardea o Iehova cana dichlea pesche cuci Șiaves sar merel, ando ghies de 14 Nisan 33 a.e. c (Mat. 3:17)

12. So daisaras te cheras ji ca i Comemorarea?

¹² Ji ca i Comemorarea, avelas mișto te cheres tuche timpo te sichios mai but buchia andai răspumpărarea corcoro sau ca i închinarea andi familia. O Ghido de cercetare andal Martori le Iehovasche sau aver instrumentea anda o studio daștin te ajutin tut te prinjianes mai mișto cado subiecto. d De chi zor te încăres tut catar i planificarea anda i citirea la Bibliachi andai Comemorarea, cai arachel-pe ando Caieto andai întrunirea „Amari viața creștino hai predicarea”. Sa cadea, na bâstăr te diches i închinarea  de teharin anda o ghies cana si i Comemorarea. Sea cadal buchia va ajutina tut te pregătis chio ilo hai te ajutis vi averen te țârden miștimata andai Comemorarea. (Ezra 7:10)

TE AJUTISARAS VI AVEREN TE ȚÂRDEN MIȘTIMATA

13. Savi si i dintuni buchi cai daisaras te cheras-la ca vi aver te țârden miștimata andai Comemorarea?

¹³ Sar daisaras te ajutisaras vi averen te țârden miștimata andai Comemorarea? Ando iechto than trebul te acharas-len. Va avela te das invitații le manușenghe anda o teritorio, tha vi chichiva manușenghe cai prinjianas-len deja. Daisaras te cheras amenghe iech lista codolența cai camas te acharas-len: amare neamuri, le colegi catar i buchi sau catar i școala hai vi averen. Cana ci arăsăn amenghe le invitații tipărime, daisaras te bișialas iech linko caring o formato electronico andai invitația. Con jianel sode but jene va avena! (Ecl. 11:6)

14. Sicaven prin iech exemplo o zuralimos cai si iecha invitația dini personalo.

¹⁴ Te na bâstras niciechdata so but daștil te cherel iech invitația cai das-la personalo varecasche. Iech ghies, iech phei saveaco rrom ci silo Martoro sas-li uimime cana laco rrom dea-pe baro hai phendea lache că camel te jial vi vo lasa ca i Comemorarea. La pheiache ci avilea lache te pachial so așunel anda codoia că voi achardea-les mai butivar, tha ci gălea. Sostar alosardea vo te cherel cadai buchi acana? Laco rrom phendea: „Sas manghe dini iech invitația ando vast”. Iech phuro localo, cai prinjianelas-les, dea-les iech invitația tipărime. O rrom cadala pheiaco gălea ca i Comemorarea ande codo bărș tha vi but bărșa pala codoia.

15. So trebul te încăras ande amari goghi cana acharas le manușen ca i Comemorarea?

¹⁵ Te încăras ande amari goghi că codolen cai acharas-len ca i Comemorarea daștin te aven-len pușimata vi mai but dacă ci sas-le niciechdata ca amare întruniri. Cadea că, si mișto te avas pregătime anda le pușimata cai daștinas te șion-len. (Col. 4:6) Daștil-pe că chichiva va camena te jianen sar si i Comemorarea, sode va încărela, dacă trebun te hureaven-pe ande iech anumime felo, dacă manghen-pe sau  chiden-pe love. Pala so das iech invitația, daisaras te phenas le manușesche: „Si tut pușimata anda i Comemorarea?”. Daisaras te folosiaras vi le materialea video Te anas-amenghe amintea le merimastar le Isusosco hai So întâmplol-pe ande-ch sala le Regatoschi? caște ajutisaras le manușes te hachiarel sar si amare întruniri. Andi lecția 28 anda o lil Bucurisar-tu viațatar anda sea o timpo! si șucar sicaimata anda save daisaras te das duma ande iech than.

16. So aver pușimata daștin te aven codolen cai aven ca i Comemorarea?

¹⁶ Pala so aven ca i Comemorarea, codolen neve daștin te aven-len vi aver pușimata. Sar exemplo, va camena te jianen sostar ci lea chonic andal embleme sau sostar numai chichiva cărde cadaia. Sa cadea, daștinas te pușen amen chichi-var încăren i Comemorarea hai dacă sea amare întruniri încăren-pe sa cadea. Si ciaces, ca but anda cadal pușimata del-pe răspunso andi cuvântarea catar i Comemorarea. Cu sea cadala, daștil-pe că trebul te das duma anda mai but buchia codolența neve. O articolo pa jw.org „Sostar încăren le Martori le Iehovasche diferime i cina le Raieschi sar aver religii?”, daștil te ajutil amen te das răspunso ca chichiva anda lenghe pușimata. Camas te cheras sea so încărel amendar – angla i Comemorarea, ando timpo so încărel-pe hai vi pala codoia – te ajutisaras codolen cai silen „o ilo lașio”. (Fap. 13:48)

TE AJUTISARAS CODOLEN CAI SILE INACTIVI

17. Sar daștin le phure te ajutin codolen inactivi? (Ezechiel 34:12, 16)

¹⁷ Sar daștin le phure te ajutin codolen inactivi andel curche angla i Comemorarea? Harnes, sicaven lenghe iubirea. (Citisar Ezechiel 34:12, 16.) Angla i Comemorarea, roden te den duma chichi mai bute phralența inactivi. Phenen lenghe că sile cuci anda tumende hai că camen te ajutin-len orisoia daștin. Pala codoia, acharen-len ca i Comemorarea. Dacă jian, ajucăren-len hai primin-len anda sea o ilo. Pala i Comemorarea, den-len mai dur telefono hai jian te dichen cadale drago phralen hai pheian. Zuriaren-len hai cheren sea so  daștin caște ajutin-len te aven parpale co Iehova. (1 Pet. 2:25)

18. Sar daisaras savore phrala hai pheia andai congregația te ajutisaras codolen inactivi? (Romani 12:10)

¹⁸ Savore phrala hai pheia andai congregația daștin te ajutin codolen inactivi cai aven ca i Comemorarea. Sar? Cana phiraven-pe lența iubireasa, lașimasa hai cana sicaven lenghe pachiv. (Citisar Romani 12:10.) Te na bâstras că von sile amare gugle phrala hai că, daștil-pe că sas lenghe pharo te aven ca i întrunirea. Chichiva anda lende daștil-pe că gândisarde-pe că ci va avena primime mișto. e Cadea că, ci trebulas te cheras-len te avel lenghe lajiav. Te na șioas lenghe pușimata sau te phenas vareso cai daștilas te duchavel-len. (1 Tes. 5:11) Te sicavas lenghe că iubisaras-len anda sea o ilo sar orisave phrales. Sam zurales bucurime te anas închinarea le Iehovasche pale ande iech than lența! (Ps. 119:176; Fap. 20:35)

19. So miștimata si amen cana jias ca i Comemorarea?

¹⁹ Mulțumisaras anda sea o ilo că o Isus poruncisardea amenghe te anas amenghe andi goghi lesco merimos ande fiesavo bărș! Cana jias ca i Comemorarea țârdas miștimata na numai amen tha vi aver jene. (Is. 48:17, 18) Sar exemplo, amari iubirea anda o Iehova hai anda o Isus bariol vi mai but. Sa cadea, sicavas chichi de cuci si anda amende so cărde von ande amaro miștimos hai zuriaras amaro amalimos le phralența. Mai but, daisaras te ajutisaras vi averen te hachiaren sar daștin te țârden vi voni von le miștimata cai sile posibilo numai anda codoia că o Isus mulea anda amende. Cadea că, te pregătisaras amen anda i Comemorarea, o mai baro ghies anda o bărș!