1. Ha yini siku dzra xidzrimuxo dzri li dzra lisima ka lembe? (Luk. 22:19, 20)

 KA VHANU va Yehovha, siku dzra xidzrimuxo i siku dzra lisima swinene ndzreni ka lembe. I xiyentxakalu xa xin’we lexi Yesu a leletiki hi ku kongoma leswaku hi xi xiyisisa. (Dondzra Luka 22:19, 20.) Hi ni swivangelo swinyingi leswi hi yentxaka hi dzri lavisela hi manyawu siku dzra xidzrimuxo. A hi voneni swin’we swa swone.

2. He swini swivangelo leswi yentxaka siku dzra xidzrimuxo dzri li dzra lisima?

² Xidzrimuxo xi hi pfuna ku yanakanyisisa hi ndlela leyi xitizrulo xi nga xa lisima ha yone xi tlhela xi hi dzrimuxa ndlela leyi hi nga kombisaka ku tlangela ha yone xitlhavelo xa Yesu. (2 Kor. 5:14, 15) Xi tlhela xi hi nyika mukhandlu wa ku tikholisa hi ku “tiyisana” ni vamakwezru. (Rom. 1:12) Lembe ni lembe vamakwezru lava holiki va kumeka ka xidzrimuxo. Hi kola ka ku yamukeliwa hi ndlela ya lizrandzru ka xidzrimuxo, van’wana va teka xiboho xa ku tlhelela ka Yehovha, kasi van’wana va teka xiboho xa ku sungula dondzro ya Bibele hi mhaka ya leswi va nga swi twa ni ku swi vona ka xidzrimuxo. Hinkwaswu leswo, swi yentxa leswaku xidzrimuxo xi va xa lisima kwezru.

3. Xana xidzrimuxo xi hi yentxa hi va ni wumun’we ni vamakwezru misaveni hinkwayu hi ndlela yini? (Tlhela u vona mufoto.)

³ Tlhela u yanakanya hi ndlela leyi xidzrimuxo xi hi tlhanganisaka ha yone ni vamakwezru a misaveni hinkwayu. Timboni ta Yehovha ta tlhangana a misaveni hinkwayu nkama lowu dambu dzri pelaka. Hinkwezru hi yingiseta wukaneli lebyi kombisaka lisima dzra xitizrulo. Hi yimbelela tinsimu tibidzri ta ku dzrumisa, hi fambisa swifanekiselo hi gama hi ku “amen” hi mbilu hinkwayu ntsrhaku ka mune wa swikhongoto. Ndzreni ka 24 wa mawora, mabandla hinkwawu ma va na ma yentxe leswo.  Xana wa yi yanakanya ndlela leyi Yehovha na Yesu va nyonxaka ha yone hi ku hi vona na hi tlhanganile a misaveni hinkwayu?

4. Hi ta vona yini ka xidondzro lexi?

⁴ Ka xidondzro lexi, hi ta kambisisa swivutiso leswi landzrelaka: Hi nga lulamisela mbilu yezru hi ndlela yini akuva hi hlalela xidzrimuxo? Hi nga va pfunisa kuyini van’wana akuva va buyeliwa? Hi nga va pfunisa kuyini vamakwezru lava holiki? Tinhlamulo ta swivutiso leswi ti ta hi pfuna ku tilulamiselela xiyentxakalo lexi xa lisima.

HI NGA LULAMISELA MBILU YEZRU HI NDLELA YINI AKUVA HI HLALELA XIDZRIMUXO?

5. (a) Ha yini hi fanele ku yanakanyisisa hi lisima dzra xitizrulo? (Amapsalma 49:7, 8) (b) U dondzre yini ka vhidiyu ledzri liki Ha Yini Yesu A File?

⁵ Yin’we ya tindlela ta lisima ta ku lulamisela mbilu yezru akuva hi hlalela xidzrimuxo i ku yanakanyisisa hi lisima dzra xitlhavelo xa xitizrulo xa Yesu Kriste. A ku na lexi a hi ta xi yentxa akuva hi tihuluxa ka xidoho ni lifu. (Dondzra Amapsalma 49:7, 8; tlhela u vona vhidiyu ledzri liki: Ha Yini Yesu A file?) a Yehovha a zrumele Yesu leswaku a nyikela wutomi byake leswaku a hi huluxa. Yehovha na Yesu va tikazrate ngopfu. (Rom. 6:23) Nkama lowu hi yanakanyisisaka hi leswi Yehovha na Yesu va nga hi yentxela swone, ku tlangela kwezru ka xitizrulo ku ta ya ku yengeseleka. Hi ta vona yin’we ya mintxhumu leyi Yehovha na Yesu va hi yentxeliki yone. Kambe ku sungula, a hi kambisiseni leswaku i yini xitizrulo?

6. Xana a ku patsreka yini ka xitizrulo?

⁶ Xitizrulo i mali leyi hakeliwaka akuva ku tlhelisiwa ntxhumu wa kukazri. Wanuna wa ku sungula Adamu, a vumbiwe na a hetisekile. Loko a dohile, yene ni vanake va luzekeliwe hi mukhandlu wa ku hanya hi la ku nga helikiki. Xileswo, akuva hi kuma leswi Adamu a swi luziki, Yesu a nyikele wutomi byake lebyi hetisekiki swanga xitlhavelo. Nkama lowu na a ha hanya lani misaveni, Yesu “a nga dohanga, nambi mazritu ya wukanganyisi a ma kumekanga a non’wini wake”. (1 Pet. 2:22) Nkama lowu Yesu a nga fa, a wutomi byake a byi hetisekile ku fana ni bya Adamu na a nga si doha. Xileswo, hi ku va a nyikele wutomi byake Yesu a kote ku hakela wutomi lebyi hetisekiki lebyi Adamu a byi luziki.—1 Kor. 15:45; 1 Tim. 2:6.

7. He swini swikazrato leswi Yesu a lavisaniki na swone loko a ha li lani misaveni?

⁷ Nkama lowu Yesu a a li lani misaveni a a yingiseta Yehovha ka hinkwaswu nambileswi a swi kazrata ku yentxa leswo. A ve n’wana lweyi a a hetisekile, kambe vapswele vake a va nga hetisekanga, nambitanu a a fanela ku va yingiseta. (Luk. 2:51) Swi djule kuva Yesu a hlula nkutxetelo wa ku biha wa ku va a nga yingiseti vapswele vake a tlhela a nga dumbeki ka Yehovha loko a ha li mumpshwa. Na a li mukulu, Sathana a mu dzringile akuva a tsrhika ku yingiseta Yehovha. (Mat. 4:1-11) Sathana a a tiyimisele ku yentxa leswaku Yesu a doha akuva a nga ha swi koti ku hakela xitizrulo.

8. He swini swikazrato swin’wana leswi Yesu a lavisaniki na swone?

⁸ Ka wutizreli byake bya lani misaveni, Yesu a khalute hi ka swiyimu swin’wana swa ku kazrata. Valala vake va mu xanisile nakone va zame ku mu dlaya. (Luk. 4:28, 29; 13:31) Handle ka leswo, swi djule kuva a lavisana ni ku kala ku hetiseka ka vadondzrisiwa vake. (Mar. 9:33, 34) Loko a yavanyisiwile, Yesu a biwile a tlhela a zrukiwa. Hi wugamu a dlayiwe hi ndlela ya tihanyi ni ya ku vavisa ngopfu swinene. (Heb. 12:1-3) Swi djule kuva a tiyiselela mindzringo ya wugamu a wuton’wini byake wuswake  na a nga sizreleliwi hi Yehovha. b—Mat. 27:46.

9. U titwisa kuyini loko u yanakanyisisa hi xitizrulo? (1 Petro 1:8)

⁹ Handle ka ku ganaganeka Yesu a xaniseke ngopfu, akuva a nyikela wutomi byake hi nkonta yezru. Loko hi yanakanyisisa hi ku tikazrata hinkwaku loku Yesu a ku yentxiki hi mhaka yezru, hi ya hi mu zrandzra ngopfu swinene.—Dondzra 1 Petro 1:8.

10. Xana Yehovha a tikazrate hi ndlela yini akuva a nyikela xitizrulo?

¹⁰ Yehovha ke, swi djule kuva a tikazrata hi ndlela yini akuva Yesu a hakela xitizrulo? Yehovha na Yesu va ni wuxaka bya le kusuhi swinene ku tlula wuxaka lebyi nga kone makazri ka papayi ni n’wana. (Amapr. 8:30) Yanakanya ndlela leyi swi mu kazrateliki ha yone Yehovha ku vona n’wanake na a lavisana ni swiyimu swa ku kazrata lani misaveni. Handle ka ku ganaganeka swi mu vavise ngopfu swinene ku vona n’wanake na a hluphiwa, a yaliwa a tlhela a xaniseka.

11. I yini lexi nga hi pfunaka ku twisisa ndlela leyi Yehovha a titwiki ha yone loko Yesu a fa.

¹¹ Vapswele va ku tiva ha hombe ku vavisa loku tisiwaka hi ku feliwa hi n’wana. Hi ni lipfumelo ledzri tiyiki ka ku pfuxiwa ka vafi. Nambitanu, loko mhunu a fa hi twa ku vavisa ngopfu a mbilwini. Leswo swi hi pfuna ku twisisa ndlela leyi Yehovha a titwiki ha yone loko a vona n’wanake lweyi a zrandzrekaka na a hlupheka a tlhela a fa hi lembe dzra 33 N.Y. c—Mat. 3:17.

12. Hi nga yentxa yini ka mavhiki ya le kusuhi ni xidzrimuxo?

¹² Swi ngo yini ku sukela swoswi u sungula ku dondzra hi xitizrulo xa Yesu ka dondzro yaku ya ximhunu kumbe ka wugandzreli bya ndangu? Tizrisa Nkongomiso Wa Ku Hamba Wusetxhi Wa Timboni Ta Yehovha kumbe buku dzrin’wana akuva u tiva leswi yengetelekiki mayelanu ni xitizrulo. d Nakone landzrelisisa xiyimiso xa ku dondzra ka Bibele xa xidzrimuxo lexi kumekaka ka Xibukwana Xa Ntlhanganu Wa—Wutomi Ni Wutizreli Byezru Bya Wukriste. Nakone hi siku dzra xidzrimuxo, u nga dzrivali ku hlalela Wugandzreli Bya Ni Mixo Bya Ku Hlawuleka. Loko hi tilulamisela ha hombe timbilu tezru akuva hi ya xidzrimuxweni, hi ta swi kota ku pfuna van’wana leswaku va londzrovota xiyentxakalo lexo.—Ezr. 7:10.

 PFUNA VAN’WANA

13. He wini ntxhumu wa ku sungula lowu hi fanelaka ku wu yentxa akuva hi pfuna van’wana ku hlalela xidzrimuxo?

¹³ Hi nga va pfuna hi ndlela yini van’wana akuva va susa londzrovoto ka xidzrimuxo? Xa ku sungula, hi zranga hi ku zramba vhanu. Handle ka ku zramba ntsena lava hi va kumaka a nsin’wini, hi nga hamba nxaxamelo wa mavito ya lava hi navelaka ku va zramba va ku fana ni maxaka, lava hi tizraka na vone, swidondzrikulozri ni van’wana. Nambiloko hi nge na swizrambu leswi dzringaniki hi xivizri, hi nga va zrumelela link hi ka matelefone. Hi ta hlamalisiwa hi nhlayu ya vhanu lava taka yamukela.—Ekles. 11:6.

14. Ha yini ku zramba mhunu lweyi u mu tivaka hi ku kongoma swi pfuna?

¹⁴ Loko hi zramba mhunu lweyi hi mu tivaka hi ku kongoma, swi nga ha mu khumba. Makwezru wa kukazri wa xisati lweyi nuna wake a kalaka a nga mu tizreli Yehovha, a hlamalile loko a mu byela leswaku a a ta va kone xidzrimuxweni. Ha yini a hlamalile? Hikusa a a mu zrambe hi makhambi ya ku siyanasiyana kambe a a ngi ngi pfumela. Kutani ke yentxeka yini swoswi? Nuna wake a yamukele xizrambu xa nkulu wa bandla lweyi a a mu tiva, xileswo a hlalele xidzrimuxo hi lembe ledzro ni ka malembe lama landzreliki.

15. I yini leswi hi fanelaka ku swi tekela nhlokweni loko hi zramba mhunu ka xidzrimuxo?

¹⁵ Dzrimuka leswaku lava hi va zrambaka va nga ha va ni swivutiso swa kukazri, ngopfungopfu loko va ngi ngi ya a ndlwini ya wugandzreli. Swi nga va swinene ku yanakanyisisa hi swivutiso leswi va nga ha swi yentxaka ni ku tilulamisela akuva hi va hlamula. (Kol. 4:6) Hi xikombiso, van’wana va nga ha vutisa leswi: ‘Wu ta hambiwa hi ndlela yini ntlhanganu lowu?’ ‘Wu ta teka nkama wa ku gama kwini?’ ‘Ni nga yambala hi ndlela yin’wana ni yin’wana?’ ‘Ni fanela ku hakela?’ ‘Ku ta vani minhlengo?’ Loko hi zramba mhunu akuva a ya xidzrimuxweni, hi nga ha mu vutisa leswaku “xana u ni xivutiso xa kukazri?” Kutani hi mu hlamula leswi a navelaka ku swi tiva. Hi nga ha tlhela hi tizrisa vhidiyu ledzri liki: Dzrimuka  Lifu Dzra Yesu ni ledzri liki Ku Yentxeka Yini A Ndlwini Ya Mfumu? Akuva u pfuna vhanu ku twisisa ndlela leyi mintlhanganu yezru yi fambisaka xiswone. Handle ka leswo, a xidondzro 28 xa Buku ledzri liki Hanya Hi Ku Nyonxa Hi La Ku Nga Helikiki! xi ni tinhla ta lisima leti u nga ti tizrisaka akuva u komba mhunu lweyo.

16. He swini swivutiso leswi lava hlalelaka xidzrimuxo va nga ha vaka na swone?

¹⁶ Ntsrhaku ka xidzrimuxo, swi nga yentxeka vanyingi lava taka zrambiwa va ta va ni swivutiso swinyingi. Swi nga yentxeka va tivutisa leswaku ha yini ku nge na mhunu lweyi a diki pawu ni ku nwa vhinyu, kumbe ha yini va ve vatsrongo lava swi yentxiki leswo. Nakone swi nga yentxeka va tivutisa leswaku hi lembe hi xi hlalela kangani xidzrimuxo, kumbe leswaku mintlhanganu hinkwayu ya Timboni ta Yehovha yi yentxiwa hi ndlela leyi fanaka. Nambileswi tin’wana ta timhaka leti, ku buliwaka ha tone ka wukaneli bya xidzrimuxo, swi nga yentxeka lweyi u mu zrambiki a djula ku tiva leswi yengetelekiki. Nhlokomhaka leyi liki: Hikwalaho Ka Yini Timbhoni Ta Yehovha Ti Nga Endli Xilalelo Xa Hosi Ku Fana Ni Tikereke Tin’wana? Leyi kumekaka ka site dzra Jw.org yi nga hi pfuna ku hlamula swivutiso leswi va nga ha vaka na swone. Hi djula ku yentxa hinkwaswo leswi hi nga swi kotaka na xidzrimuxo xi nga si tlhasa, hi nkama wa xizrimuxo ni loko xi khalutile akuva hi pfuna “lava kombisiki leswaku va swi djula”, akuva va susa londzrovoto ka ntlhanganu lowu.—Mint. 13:48.

PFUNA LAVA HOLIKI

17. Xana vakulu va nga va pfuna hi ndlela yini lava holiki hi tlhelo dzra moya? (Ezekiel 34:12, 16)

¹⁷ Hi nguva ya xidzrimuxo, vakulu va bandla va nga va pfuna hi ndlela yini lava holiki? Kombisani leswaku ma zron’weka ha vone. (Dondzra Ezekiel 34:12, 16.) Na siku dzra xidzrimuxo dzri nga si na tlhasa, yentxa hinkwaswu leswi u nga swi kotaka akuva u bula ni vhanu vanyingi lava holiki. Va zrambani ka xidzrimuxo nakone loko va va kone va kombisani lizrandzru. Ntsrhaku ka xidzrimuxo, tamani mi kombisa leswaku ma zron’weka hi vhanu lava  nakone yentxani leswi vilelekaka akuva mi va pfuna ku tlhelela ka Yehovha.—1 Pet. 2:25.

18. Xana hine hinkwezru hi nga va pfuna hi ndlela yini lava holiki? (Varoma 12:10)

¹⁸ Xana hinkwavu bandleni va nga yentxa yini akuva va pfuna lava holiki hi siku dzra xidzrimuxo? Hi nga yentxa leswo hi ku va kombisa lizrandzru, wunene ni xihlonipho. (Dondzra Varoma 12:10.) Dzrimuka leswaku swi nga yentxeka swi va kazratelile vamakwezru lava va ku zrandzreka ku tlhelela a ndlwini ya wugandzreli. e Swi nga yentxeka va txhave kuva va nga yamukeliwi hi ndlela leyinene. U nga txhuki u hlaya leswi taka va kwatisa ni ku va khomisa tingana. (1 Tes. 5:11) Vamakwezru lava va mu zrandzra Yehovha ku fana na hine. Swa hi nyonxisa ngopfu ku tlhela hi gandzrela Yehovha kun’we na vone!—Amaps. 119:176; Mint. 20:35.

19. Xana hi buyeliwa hi yini hi ku dzrimuka lifu dzra Yesu?

¹⁹ Nakunene swa twala ku va Yesu a hi lelete ku dzrimuka lifu dzrake lembe dzrin’wana ni dzrin’wana, swanga hi leswi hinkwezru hi buyeliwaka hi ku yentxa leswo. (Eza. 48:17, 18) Hi xikombiso, lizrandzru dzrezru ha Yehovha na Yesu dzri ya dzri tiya, hi va ni mukhandlu wa ku tlangela hi leswi va hi yentxeliki swone, nakone hi ya hi va kusuhi ni vamakwezru. Handle ka leswo hi ni mukhandlu wa ku pfuna van’wana akuva na vone va dondzra mayelanu ni xitizrulo va tlhela va va ni mukhandlu wa ku yamukela matovoko lawa Yehovha a hi nyikaka wone. Xileswo, a hi yentxeni hinkwaswu akuva hi lulamela siku ledzri dzra lisima ka lembe ku nga xidzrimuxo xa lifu dzra Kriste!