NSOLO WA PFUNDZIRO 2
NYIMBO 19 Cakudya Cancidodo ca Mbuya
Khunganyikani Cincino Toera Mugumanike pa Ntsiku Yakufunika Kakamwe ya Caka
“Pitirizani kucita pyenepi toera mundikumbukire.”—LUKA 22:19.
PINAFUNA IFE KUPFUNDZA
Tinapfundza kuti thangwi yanji Cikumbuso ndi cakufunika kakamwe, tinakhunganyika tani, pontho tinaphedza tani anango toera agumanikembo pa Cikumbuso.
1. Thangwi yanji ntsiku ya Cikumbuso ndi yakufunika kakamwe ya caka? (Luka 22:19, 20)
KUNA atumiki a Mulungu, ntsiku inakumbuka iwo kufa kwa Yezu, ndi yakufunika kakamwe pa caka. Ndi ntsiku ineyi basi idalonga Yezu kuti anyakupfundzace asafunika kuikumbukira. (Lerini Luka 22:19, 20.) Pali na mathangwi mazinji anaticitisa kukumbuka kufa kwa Yezu. Tendeni tione mangasi.
2. Ndi api mathangwi anango anaticitisa kufuna kugumanika pa Cikumbuso?
2 Cikumbuso cisatiphedza kunyerezera kufunika kwa ciomboli. Ico cisatikumbusa pinthu pinafunika ife kucita toera kupangiza kuti tisapereka takhuta thangwi ya ntsembe ya Yezu. (2 Akor. 5:14, 15) Ico cisatipasambo mwai ‘wakuwangisana’ na abale na alongo athu. (Aroma 1:12) Pyaka pyonsene abale na alongo azinji adasiya kusonkhana na ife, asagumanika pa Cikumbuso. Thangwi yakutsalakanwa mwaufuni pa Cikumbuso, anango asabwerera kuna Yahova. Anthu azinji asadzumatirwa na pinaona iwo na pinabva iwo, natenepa iwo asatoma kupfundza Bhibhlya. Pyenepi pyonsene pisapangiza kuti Cikumbuso ndi cakufunika kakamwe kuna ife!
3. Cikumbuso cisatiphedza tani toera tikhale akuphatana na abale athu pa dziko yonsene yapantsi? (Onanimbo foto.)
3 Ife tisadikhirambo kugumanika pa Cikumbuso, thangwi tisadziwa kuti pa ntsiku ineyi ife tisakhala akuphatana na abale na alongo pa dziko yonsene yapantsi. Mboni za Yahova pa dziko yonsene yapantsi, zisasonkhana mu ndzidzi unabira dzuwa toera kukumbuka kufa kwa Yezu. Tonsene tisabvesera nkhani inapangiza kuti thangwi yanji ciomboli ndi cakufunika. Ife tisaimba nyimbo toera kusimba Mulungu, tisafambisa nkate na vinyu, pontho tisacita “ameni” pakumala kwa phembero ibodzi na ibodzi. Maphembero onsene anacitwa ndi manai. Pa ntsiku ineyi mipingo yonsene pa dziko yapantsi isacita pibodzi pyene. Kodi musanyerezera kutsandzaya kunakhala na Yahova pabodzi na Yezu angationa mbatiasimba munjira ineyi mwakuphatana?
Cikumbuso cisatiphedza toera tikhale akuphatana na abale na alongo athu pa dziko yonsene yapantsi (Onani ndima 3) f
4. Tinapfundzanji mu nsolo uno?
4 Mu nsolo uno, tinatawira mibvundzo iyi: Tinakhunganya tani ntima wathu toera kugumanika pa Cikumbuso? Tinacitanji toera anthu anango aphedzeke na Cikumbuso? Pontho tinaphedza tani ale adasiya kusonkhana na kumwaza mphangwa? Mitawiro ya mibvundzo ineyi inatikhunganya toera tigumanike pa Cikumbuso ca kufa kwa Yezu.
TINAKHUNGANYA TANI NTIMA WATHU TOERA KUGUMANIKA PA CIKUMBUSO?
5. (a) Thangwi yanji tisafunika kunyerezera pyakufunika kwa ciomboli? (Masalmo 49:7, 8) (b) Mwapfundzanji mu vidhyu yakuti Thangwi Yanji Yezu Afa?
5 Njira ibodzi yakufunika kakamwe yakukhunganya ntima wathu ndi kunyerezera kufunika kwa ntsembe ya ciomboli ya Yezu Kristu. Tekhene nee mbatidakwanisa kupulumusika ku madawo na kufa. (Lerini Masalmo 49:7, 8; onanimbo vidhyu ya nsolo wakuti Thangwi Yanji Yezu Afa?) a Natenepa, Yahova acita masasanyiro toera Yezu apereke umaso wace toera kutipulumusa. (Aroma 6:23) Yahova pabodzi na Yezu, alipa ntengo ukulu kakamwe toera kutiphedza. Tinganyerezera kakamwe ntengo ukulu udalipa Yahova na Yezu toera kutipulumusa, ife tinaona kuti ciomboli ndi cakufunika kakamwe. Ife tinaona pinthu pingasi pyakunentsa kakamwe pidacita Yahova na Yezu toera kutipulumusa. Mbwenye pakutoma, tendeni tione kuti ciomboli cisaphatanizanji?
6. Kodi ntsembe ya ciomboli isaphatanizanji?
6 Ciomboli ndi ntengo unalipwa toera kuombola cinthu cidaluzika. Mamuna wakutoma, Adhamu, akhali wakusowa madawo mu ndzidzi udacitwa iye. Pidadawa Adhamu, iye pabodzi na anace onsene aluza nkhombo yakukhala m’maso kwenda na kwenda. Toera kulipa pidaluza Adhamu, Yezu apereka umaso wace wakusowa madawo ninga ntsembe. Pikhali iye pa dziko yapantsi, Yezu “nee acita madawo, pontho pamulomo pace nee pabuluka mafala authambi.” (1 Ped. 2:22) Yezu pidafa iye akhali waungwiro, ninga Adhamu akhali waungwiro mbadzati kudawa, natenepa pidapereka iye umaso wace ninga ntsembe ya ciomboli, Yezu alipa umaso udaluza Adhamu.—1 Akor. 15:45; 1 Tim. 2:6.
7. Ndi mayesero api adathimbana na Yezu pikhali iye pa dziko yapantsi?
7 Yezu apitiriza kubvera Babace wakudzulu, mwakukhonda tsalakana mayesero mazinji adatamba iye pa dziko yapantsi. Pikhali iye mwana, Yezu akhabvera anyakubalace akusowa ungwiro, maseze iye akhali wakusowa madawo. (Luka 2:51) Pikhali iye m’phale iye akhafunika kupirira mayesero toera apitirize kukhala wakubvera na wakukhulupirika. Pidakula iye, Yezu apitiriza kukhala wakukhulupirika mu ndzidzi ukhayeserwa iye na Sathani Dyabo, maseze Sathani ampanga toera asiye kukhala wakukhulupirika kuna Mulungu. (Mat. 4:1-11) Sathani akhali dzololo toera kucitisa kuti Yezu adawe toera acimwane kulipa ntengo wa umaso wace toera atiombole.
8. Ndi mayesero api anango adapirira Yezu?
8 Pikhamwaza iye mphangwa pa dziko yapantsi, Yezu apirira mayesero akusiyana-siyana. Anyamalwa ace antcinga, pontho ayesera kumupha. (Luka 4:28, 29; 13:31) Iye akhafunikambo kupirira madodo a anyakupfundzace akusowa ungwiro. (Marko 9:33, 34) Mu ndzidzi ukhayeserwa iye, akhathabuswa, pontho akhasingirirwa. Iye akhomerwa pamuti ninga phanga mwakupasa manyadzo, mbabva kupha kakamwe. (Aheb. 12:1-3) Iye akhafunika kupirira mayesero onsene ekhene, mwakusowa citsidzikizo ca Yahova. b—Mat. 27:46.
9. Tisapibva tani thangwi ya ntsembe ya ciomboli ya Yezu? (1 Pedhru 1:8)
9 Mwandimomwene, Yezu athabuka kakamwe toera kupereka umaso wace ninga ciomboli. Tinganyerezera pyonsene pidacita Yezu toera kutipulumusa, ufuni wathu kuna iye usathimizirika.—Lerini 1 Pedhru 1:8.
10. Kodi Yahova apibva tani pidapereka iye Mwanace ninga ntsembe?
10 Ndiye tanimbo Yahova? Ninji pidacita Yahova toera Yezu apereke umaso wace ninga ntsembe ya ciomboli? Yahova na Yezu asafunana kakamwe. (Mis. 8:30) Nyerezerani kuti Yahova akhapibva tani mu ndzidzi ukhaona iye Yezu mbakapirira mayesero mazinji pa dziko yapantsi. Mwakukhonda penula, Yahova atsukwala kakamwe pidaona iye Mwanace mbakatsalakanwa mwakuipa, kupwazwa na kuthabuswa.
11. Longani citsandzo toera kupangiza mabvero adakhala na Yahova pidaphiwa Yezu.
11 Anyakubala onsene adaferwa na anawo, asadziwa mwadidi kubva kupha kunakhala na munthu angaferwa na mwanace. Ife tisakhulupira kuti anthu adafa, anadzalamuswa muli akufa, mbwenye pyenepi nee pisamalisa kutsukwala kunakhala na ife tingaferwa na munthu anafuna ife. Citsandzo ceneci, cisatiphedza kubvesesa mabvero adakhala na Yahova, mu ndzidzi ukhaona iye Mwanace wakufunika mbakathabuka na kufa mu caka ceneci ca 33 Pakumala Kubalwa kwa Kristu. c—Mat. 3:17.
12. Tisafunika kucitanji masumana mangasi Cikumbuso mbacidzati kufika?
12 Kutomera lero mpaka pa ntsiku ya Cikumbuso, musaona tani kupfundza pizinji thangwi ya ciomboli pa pfundziro yanu mwekha peno Pakulambira Kwa Banja? Phatisirani Bukhu Inaphatisira Mboni za Yahova Pakufufudza peno mabukhu athu anango toera kupfundza pizinji thangwi ya ciomboli. d Pontho, lerini mavesi a Bhibhlya adaikhwa mu Programu ya Misonkhano ya Umaso Wathu Wacikristu na Utumiki pa sumana ya Cikumbuso. Pa ntsiku ya Cikumbuso, lekani kuduwala kuona vidhyu yakupambulika inapangiza Kulambira Kunacitwa Namacibese. Ife tingakhunganya ntima wathu toera tigumanike pa Cikumbuso, tinakwanisambo kuphedza anango toera aphindule na Cikumbuso ceneci.—Esd. 7:10.
PHEDZANI ANANGO TOERA APHINDULE NA CIKUMBUSO
13. Ndi cinthu cipi cakutoma cinafunika ife kucita toera anango aphedzeke na Cikumbuso?
13 Tinacitanji toera anango aphindule na Cikumbuso? Cinthu cakutoma cinafunika ife kucita, ndi kuacemera toera agumanikembo pa Cikumbuso. Kusiyapo pyenepi, ife tinakwanisa kucemera anthu anadziwa ife toera agumanikembo pa Cikumbuso. Anthu anewa asaphataniza abale athu, andzathu akubasa, andzathu akuxikola na anango anadziwa ife. Khala nee tiri na micemerero mizinji yakudhindwa, tinakwanisa kuatumizira linki ya ncemerero. Ife nee tisadziwa kuti ndi anthu angasi anafuna kugumanika.—Ekle. 11:6.
14. Longani citsandzo cinapangiza kufunika kwa kupasa munthu ncemerero.
14 Mungacemera munthu toera agumanike pa Cikumbuso, panango iye anabwera. Mulongo unango wakuti mamunace nee ndi Mboni wa Yahova, ntsiku inango adzumatirwa pidampanga mamunace kuti anagumanikambo pa Cikumbuso. Thangwi yanji adzumatirwa? Thangwi kale akhampanga kazinji kene toera agumanike, mbwenye iye nee akhatawira. Mphapo thangwi yanji ulendo uno iye atawira? Thangwi acemerwa na nkulu wa mpingo akhadziwana na iye. Iye alonga: “Nkulu wa mpingo unoyu andipasa ncemerero.” Mamuna wa mulongo unoyu agumanika pa Cikumbuso caka ceneci, buluka penepo nee adjombabve mu pyaka pidatowera.
15. Tisafunika kukumbukanji mu ndzidzi unacemera ife anthu toera agumanike pa Cikumbuso?
15 Kumbukani kuti anthu anacemera ife, panango anakhala na mibvundzo,—makamaka khala adzati kugumanika kale pa misonkhano yathu. Mphyadidi kunyerezera mibvundzo yakuti panango anaicita, mbatikhunganyika toera kuitawira. (Akol. 4:6) Mwacitsandzo, panango anango anabvundzika: ‘Ninji pinafuna kucitika kweneko?’ ‘Nsonkhano unoyu unamala ndzidzi ungasi?’ ‘Ndisafunika kubvala nguwo za ntundu wanji?’ ‘Ndisafunika kulipa kobiri toera ndigumanike pa nsonkhano unoyu?’ ‘Pa nsonkhano unoyu panacitwa nsonkho-nsonkho?’ Tingacemera munthu toera agumanike pa Cikumbuso, ife tisafunika kumbvundza: “Muli na mbvundzo?” buluka penepo tisafunika kutawira mibvundzo yonsene yakuti panango anakhala nayo. Ife tinakwanisambo kuphatisira vidhyu yakuti: Kumbukani Kufa Kwa Yezu na Ninji Pinacitwa pa Nyumba ya Umambo? toera kumpangiza kuti misonkhano yathu isacitwa tani. Pontho nsolo 28 wa bukhu Tsandzayani na Umaso Kwenda na Kwenda! uli na maonero mazinji adidi akuti tinakwanisa kuaphatisira pakucedza naye.
16. Ndi mibvundzo ipi yakuti ale anagumanika pa Cikumbuso panango anakhala nayo?
16 Pakumala kugumanika pa Cikumbuso, anthu anewa panango anakhala na mibvundzo inango. Iwo panango anabvundzika: Thangwi yanji basi ene ndi anthu akucepa anadya nkate na kumwa vinyu? Panango iwo anabvundzikambo kuti tisakumbuka kangasi kufa kwa Yezu. Panango iwo anafunambo kudziwa khala misonkhano yonsene ya Mboni za Yahova isacitwa munjira ibodzi ene. Maseze pinthu pizinji pisalongwa pa nkhani ya Cikumbuso, anthu anewa panango anafuna mphangwa zakuthimizirika toera abvesese mwadidi. Nsolo unagumanika mu jw.org wakuti “A Ceia do Senhor – porque é que as Testemunhas de Jeová a celebram de modo diferente?” unatiphedza toera kutawira inango mwa mibvundzo ineyi. Tisafunika kucita pyonsene pinakwanisa ife Cikumbuso mbacidzati, mu ndzidzi wa Cikumbuso na Cikumbuso cingamala toera kuphedza anthu anewa ‘ali na mitima yadidi’ kuti aphindule na Cikumbuso.—Mabasa 13:48.
PHEDZANI ANTHU ADASIYA KUSONKHANA NA KUMWAZA MPHANGWA
17. Akulu a mpingo anaphedza tani ale adasiya kumwaza mphangwa na kusonkhana? (Ezekiyeli 34:12, 16)
17 Akulu a mpingo anaphedza tani ale adasiya kusonkhana na kumwaza mphangwa ntsiku ya Cikumbuso mbidzati kufika? Pangizani kuti musaafuna. (Lerini Ezekiyeli 34:12, 16.) Cikumbuso mbacidzati kucitika, ligaririni azinji pingakwanisika. Pangizani kuti musaafuna, pontho muli dzololo toera kuaphedza pingafunika. Acemereni toera agumanike pa Cikumbuso. Iwo angabwera, atambireni mwadidi. Cikumbuso cingamala, pitirizani kucedzera abale na alongo anewa, pontho citani pyonsene pinakwanisa imwe toera kuaphedza kuti abwerere kuna Yahova.—1 Ped. 2:25.
18. Ife tonsene tinaphedza tani ale adasiya kumwaza mphangwa na kusonkhana? (Aroma 12:10)
18 Onsene mu mpingo anakwanisa kuphedza ale adasiya kumwaza mphangwa na kugumanika pa misonkhano toera agumanike pa Cikumbuso. Munacita tani pyenepi? Mungaatsalakana mwaufuni, mwakukoma ntima na mwacilemedzo. (Lerini Aroma 12:10.) Kumbukani kuti abale anewa panango ananyinyirika toera kubwera pontho ku misonkhano. Panango iwo anagopa mbanyerezera kuti nee anatambirwa mwadidi. e Natenepa calirani kucita mibvundzo yakupasa manyadzo, peno kulonga pinthu pyakuti pinaatsukwalisa. (1 Ates. 5:11) Abale na alongo anewa ndi anyakukhulupira andzathu. Tisatsandzaya kakamwe kulambira pontho Yahova pabodzi na iwo!—Mas. 119:176; Mabasa 20:35.
19. Tisaphedzeka tani tingakumbuka kufa kwa Yezu?
19 Ife tisapereka takhuta na masasanyiro adacita Yezu Kristu toera tikumbuke kufa kwace pyaka pyonsene, pontho tisabvesesa kuti thangwi yanji pyenepi ndi pyakufunika. Tingagumanika pa Cikumbuso tisaphedzeka, pontho tisaphedzambo anango munjira zakusiyana-siyana. (Iza. 48:17, 18) Ufuni wathu kuna Yahova na Yezu usathimizirika. Tisapangiza kuti tisapereka takhuta kakamwe thangwi ya pidacita iwo kuna ife. Tisawangisa uxamwali wathu na abale na alongo. Pontho tinakwanisambo kuphedza anango, toera aone kuti anatsandzaya tani na nkhombo zinafuna kukhala na ife thangwi ya Ciomboli. Tendeni ticite pyonsene pinakwanisa ife, kuti tikhunganyike toera tigumanike pa ntsiku ya Cikumbuso yakuti ndi yakufunika kakamwe ya caka!
MUNATAWIRA TANI?
-
Tinakhunganyika tani toera tigumanike pa Cikumbuso?
-
Tinaphedza tani anango toera aphindule na Cikumbuso?
-
Tinaphedza tani abale na alongo adasiya kusonkhana na kumwaza mphangwa?
NYIMBO 18 Tisapereka Takhuta Thangwi ya Ciomboli
a Toera kugumana misolo na mavidhyu analongwa mu nsolo uno, ndokoni mu jw.org pa khundu yakuti sakani, lembani nsolo wa bukhu peno vidhyu inasaka imwe.
b Onani “Mibvundzo Inacitwa na Anyakuleri” mu Ncenjezi wa Abril 2021
c Onani bukhu yakuti Achegue-se a Jeová, nsolo 23, ndima 8-9.
d Onani bokosi “ Maonero Toera Kusaka Mphangwa.”
e Onani mafoto na bokosi “ Anthu mu Mpingo Anacitanji?” M’bale akunyinyirika toera kupita n’Nyumba ya Umambo, mbwenye iye asakunda mabvero anewa. Iye akutambirwa mwadidi, pontho akutsandzaya na abale na alongo anango.
f MAFALA ANAFOKOTOZA FOTO: Mu ndzidzi wakuti abale na alongo anango akucita Cikumbuso m’madziko anango, abale na alongo a m’madziko anangombo ali kukhunganyika toera agumanike pa Cikumbuso.
