1. Kyẽa bɔ yɛfa kae Yesu wue ne, nzuati yeɛ ɔte kyẽa bɔ yenwo hia yɛ paa wɔ afoɛ nanu ɔ? (Luka 22:​19, 20)

 YEHOWA ADANZEFOƐ de, kyẽa bɔ yɛfa yɛkae Yesu wue ne, ɔte kyẽa bɔ yenwo hia yɛ paa wɔ afoɛ nanu ɔ. Ofikyɛ, sɔ afahyɛ ne ngome yeɛ Yesu hãne kyɛ yeli ɔ. (Kenga Luka 22:​19, 20.) Nzu biekũ yeɛ ɔmaa sɔ kyẽa nanwo hia yɛ paa ɔ? Ɛmɔma yɛnea enu bie.

2. Nzuati yeɛ, yenwo hia yɛ paa kyɛ yɛkɔkae Yesu wue ne ɔ?

² Sɛ yɛkae Yesu wue ne a, ɔboka yɛ maa yɛdwenedwene mvasoɛ bɔ ɔwɔ so nanwo. Afei koso, bɔ yɛyɛ a okyire kyɛ yɛnye sɔ Yesu wue ne, ɔmaa yenwu ye. (2 Kor. 5:​14, 15) Sɛ yeyia nu kyɛ yɛkae Yesu wue ne a, ɔboka yɛ maa yɛne aliemaamɔ bɔ ngɔmmɔ, na ɛhẽne maa yenya “aworakyekyerɛ,” na yɛhyɛ yɛnwo ngunaen. (Rom. 1:12) Afoɛ biala, bɛbɔ bayakyi adesũa ne asɛnga hɔlɛ ne, ɛyɛ a benu pẽe ba sɔ afahyɛ nabo bie. Sɛ bɛba a, aliemaamɔ te bɛ nyunu ma bɛ, na bɛmaa bɛnye kã. Ɛhẽne ati, benu biemɔ wɔ berɛ a, benza bɛsĩ kõ. Afei, mmenia bɔ yɛto asaa yɛfrɛ bɛ maa bɛba bie ne koso, ɔnate ɔdɔ bɔ yɛda ye ali yekyire bɛ, ɔne dwudwolɛ bɔ betie nati, ɔmaa bɛnye gye paa. Yeti benu biemɔ wɔ berɛ a, ɛyɛ a bɛpene so kyɛ, yɛne bɛ sũa Bible ne. Ɛhe amukoraati boka so bie yeɛ ɔmaa kyẽa bɔ yɛfa yɛkae Yesu wue ne, yenni yenwo angorɛ koraa ne.

3. Sɛ yɛkae Yesu wue ne a, sɛɛ yeɛ ɔkã aliemaamɔ bɔ bɛwɔ ewiase mukoraati ne bɔ nu ɔ? (Nea foto ne.)

³ Afei koso, sɛ yɛkae Yesu wue ne a, ɔkã yɛne aliemaamɔ bɔ bɛwɔ ewiase mukoraati ne bɔ nu. Bɔ yeti yeɛ ɔte sɔ yeɛ ole kyɛ, sɛ odwu sɔ kyẽa ne a, Yehowa Adanzefoɛ bɔ bɛwɔ ewiase mukoraati ne kae Yesu wue ne, mmerɛ bɔ eyia ne aatɔ ɔ. Ɛyɛ a, yemukoraati yetie dwudwolɛ kõ, na ɛhẽne maa yenwu bɔ yeti yeɛ Yesu wue nanwo hia ɔ. Yɛbɔ nu yɛto dwein nyɔ yɛfa yɛye Yehowa ayɛ, na bɛfa paanoo ne nzãa ne bɛfa ebiala nyunu wɔ dwumadie nabo. Ebiekũ koso, yɛbɔ mbaeɛ 4 wɔ dwumadie nabo. Sɛ bɛbɔ mbaeɛ nanu biala beyie a, yemukoraati yesuro so “amen.” Sɔ kyẽa ne, asafo ahoroɛ bɔ bɛwɔ  ewiase mukoraati ne, bedi sɔ nhyehyɛɛ kõmaapɛ ne ala sĩ. Sɛ Yehowa ne Yesu Kristo nwu kyɛbɔ yemukoraati yahã yɛnwo yabɔ nu yedi sɔ afahyɛ ne a, ɔmaa bɛnye gye paa.

4. Nzu yeɛ yekosusu yenwo wɔ adesũa he anu ɔ?

⁴ Yede, yɛkɔyɛ sɛɛ né yahora yaboa yɛnwo yama kyẽa bɔ yɛfa yɛkae Yesu wue ne? Afei koso, yɛkɔyɛ sɛɛ né yahora yato asaa yafrɛ mmenia maa bawa bie? Ebiekũ koso, bɛbɔ bayakyi adesũa ne asɛnga hɔlɛ ne, yɛkɔyɛ sɛɛ né yahora yaboka bɛ? Yekonya edwirɛ hemɔ nwo mmuayɛɛ wɔ adesũa he anu. Ɛhẽne kɔboka yɛ maa yɛkɔboa yɛnwo yɛkɔma sɔ kyẽa bɔ yenwo hia paa ne.

YƐKƆYƐ SƐƐ NÉ YAHORA YABOA YƐNWO YAMA KYẼA BƆ YƐFA YƐKAE YESU WUE NE?

5. (a) Nzuati yeɛ odikyɛ yɛdwenedwene Yesu wue nanwo ɔ? (Edwein 49:​7, 8) (b) Nzu yeɛ asũa afi vidio bɔ yeɛ ole, Nzuati Yeɛ Yesu Wuli Ɔ nanu?

⁵ Nningyein bɔ odikyɛ yɛyɛ, na wamaa yaboa yɛnwo yama kyẽa bɔ yɛfa yɛkae Yesu wue ne, enu kõ bie nwo hia paa. Yeɛ ole kyɛ mvasoɛ bɔ ɔwɔ ye wue naso ne, yɛkɔdwenedwene yenwo ɔ. Sɛ nná Yesu wue ne ahɔ a, ahãa yɛngɔhora yengole yɛnwo yengofi bɔne ne ewue sa nu llé. (Kenga Edwein 49:​7, 8; nea vidio bɔ yeɛ ole, Nzuati Yeɛ Yesu Wuli Ɔ?) a Ɔwɔ nu kyɛ, né ɔlla ase mma Yehowa ne Yesu de, nakoso Yehowa hora yɛle sɔ nhyehyɛɛ ne maa Ɔwa ne oowu mane yɛ. (Rom. 6:23) Yeti bɔ Yehowa ne Yesu ayɛ ama yɛ ne, sɛ yɛkɔso yɛdwenedwene yenwo a, ɔkɔboka yɛ maa yɛkɔyɛ nningyein bɔ okyire kyɛ yɛnye sɔ Yesu wue ne ɔ. Yede, bɔ yeti yeɛ yɛkã kyɛ né ɔlla ase mma Yehowa ne Yesu kyɛ bɛkɔbɔ sɔ afɔleɛ ne, yekosusu yenwo kãa wɔ adesũa he anu. Nakoso Yesu ngõa bɔ ɔfa bɔle afɔleɛ mane yɛ ne, ɛmɔma yelimoa yɛnea bɔ okyire ɔ.

6. Nzuati yeɛ né odikyɛ Yesu wu ɔ?

⁶ Sɛ ebie sɛkye agyapadeɛ bie a, ɛyɛ a bɛdé esikaa bie befi sɔ sona ne berɛ bɛfa besi agyapadeɛ ne gyanu. Mmerɛ bɔ Yehowa bɔle Adam ne, né bɔne biala nne yenwo, yeti né ahãa ɔkɔtena ase daa. Nakoso mmerɛ bɔ Adam yɛle bɔne ne, yenwo atẽe bɔ ɔte sɔ ne fili yesa, na ye bosofoɛ ne koso, ebie hãne bɛ. Yeti ɔwale sɔ ne, né odikyɛ Yesu fa ye ngõa bɔ afɔleɛ, kyɛbɔ ɔkɔyɛ a Adam bosofoɛ kɔhora konya daa ngõa ɔ. Mmerɛ bɔ Yesu yɛle sɔ ne, né wayɛ kyɛbɔ watua agyapadeɛ bɔ Adam sɛkyele ye nanwo kerɛ ne. Yesu wɔ aseɛ he aso ne, “wanyɔ bɔne biala, yeɛ ngondombo dwirɛ biala amvi ye noa.” (1 Pet. 2:22) Yeti Yesu wuli ne, né bɔne biala nne yenwo. Adam koso, mmerɛ bɔ Yehowa bɔle ye ne, sɔ ala yeɛ né ɔte ɔ. Ɛhẽne ati, né Yesu kɔhora kɔfa ye ngõa kole Adam bosofoɛ kofi bɔne ne ewue nu.—1 Kor. 15:45; 1 Tim. 2:6.

7. Mmerɛ bɔ né Yesu wɔ aseɛ he aso ne, ɔhaw ahoroɛ beni yeɛ ɔtole ye ɔ?

⁷ Ɔhaw pẽe yeɛ ɔtole Yesu wɔ aseɛ he aso ɔ. Nakoso ɔhɔle so lili nahorɛ mane Yehowa. Mmerɛ bɔ né Yesu te akwalaa ne, né odikyɛ ɔkɔso brɛ yenwo ase ma ye awofoɛ bɔ bɔne wɔ bɛnwo ne. (Luka 2:51) Afei koso, mmerɛ bɔ né Yesu te abɛmaa ne, ebia né ye damvomɔ hyɛ ye kyɛ ɔyɛ nikyee bie bɔ ɔttemayé ɔ. Ɛhẽne ati, né odikyɛ ɔyere yenwo kora né wahora wali nahorɛ wama Yehowa. Ɛhẽne sĩ ne, mmerɛ bɔ Yesu nyini ɔɔyɛle abrandeɛ ne, né odikyɛ ɔyere yenwo kyɛbɔ ɔkɔyɛ a, ɔkɔhora kogyina nzɔhwɛ bɔ Satan Abɔnzam fa wale ye so ne noa ɔ. (Mat. 4:​1-11) Né Satan pena kyɛ ɔyɛ bɔ ɔkɔhora biala maa Yesu yɛ bɔne, kyɛbɔ ɔkɔyɛ a, Adam bɔne nanwo kerɛ ne ɔngɔhora ngotua ɔ.

8. Ɔhaw foforɛ beni yeɛ ɔtole Yesu ɔ?

⁸ Mmerɛ bɔ né Yesu kã nzɛmba ne, ɔhaw foforɛ koso tole ye. Yeɛ ole kyɛ, ye pɔfoɛmɔ tanene yenye, na bɛbɔle mmɔden kyɛ bekohũ ye. (Luka 4:​28, 29; 13:31) Afei koso, né asuafoɛ nemɔ taa di mvomsoɛ, yeti ne odikyɛ Yesu kɔso nya bɛnwo aboterɛ. (Mak. 9:​33, 34) Ebiekũ koso, mmerɛ bɔ né bedi Yesu dwirɛ bekokũ ye ne, bɛgorole yenwo, na bɛyɛle ye ayayadeɛ. Ɛhẽne sĩ ne, bɛbɔle ye asɛnnua nu, na ɔfale ɛyealɛ pẽe nu kora yeɛ owu ɔ. (Heb. 12:​1-3) Sɔ amaneɛ bɔ Yesu fale nu ne mukoraati  ne, Yehowa ammɔ yenwo waen sɔ mmerɛ ne. b—Mat. 27:46.

9. Nzuati yeɛ yekuro Yesu dwirɛ ɔ? (1 Petro 1:8)

⁹ Nahorɛ dwirɛ yeɛ ole kyɛ, Yesu nwuni amaneɛ kora yeɛ owu ma yɛ ɔ. Sɛ yɛdwenedwene kyɛbɔ ɔfale nningyein bɔle afɔleɛ kora yeɛ owu ma yɛ nanwo a, ɔmaa yekuro ye dwirɛ paa.—Kenga 1 Petro 1:8.

10. Ɛyealɛ beni yeɛ Yehowa fale nu kora yeɛ ɔma Yesu wu ma yɛ ɔ?

¹⁰ Yehowa koso, nzu yeɛ ɔfa bɔle afɔleɛ kora yeɛ ɔma ɔwa Yesu wu ma yɛ ɔ? Né Yehowa kuro ye dwirɛ, na né ɔla ye ahõne so paa. Sɛ yɛkɔhã a, né mvrama po mva b’afĩa. (Any. 8:30) Yede, nea kyɛbɔ né ɔkɔyɛ Yehowa yea kyɛ, ɔwa bɔ okuro ye dwirɛ ne, ɔfa ɔhaw pẽe nu wɔ aseɛ so ɔ. Afei koso, mmerɛ bɔ Yehowa nwuni kyɛ mmenia yɛ ɔwa ne ayayadeɛ, bɛye ye bɛma ná bɛgoro yenwo ne, ɔyɛle ye yea paa.

11. Kyẽa bɔ né bekũ Yesu ne, nzu yeɛ ɔmaa yenwu kyɛ ɔyɛle Yehowa yea paa ɔ?

¹¹ Ɛte awofoɛ bɔ ɛwa awu le hɔ? Sɛ sɔ a, yede sɛ ebie awa wu a, ɛse kyɛbɔ osi yɛ yea ɔ. Ɔwɔ nu, yelé gyidie kyɛ bekotingye bɛbɔ bawu ne, nakoso sɛ yɛnwoniɛ bie wu a, ɛyɛ a ɔyɛ yea paa. Ɛhe maa yenwu kyɛ, kyẽa bɔ Yehowa nwuni kyɛ bekũ ɔwa bɔ okuro ye dwirɛ wɔ afoɛ 33 Y.B. c nu ne, ɔyɛle ye yea paa.—Mat. 3:17.

12. Sɛ yɛkɔhora yɛkɔboa yɛnwo yɛkɔma kyẽa bɔ yɛkɔkae Yesu wue ne a, nzu yeɛ odikyɛ yɛyɛ ɔ?

¹² Ofi sɔ mmerɛ he kwaadwu kyɛ yɛkɔkae Yesu wue ne, bɔ mmɔden kyɛ ekosũa Yesu wue nanwo nikyee kɔhɔ sĩɛ. Sɛ ele abusũa koso a, ɛkɔhora kɔfa kɔyɛ Abusua Sõen. Ɛkɔhora kɔfa Nhoma a Yehowa Adansefo De Yɛ Nhwehwɛmu, anaa asafo nwomaa foforɛ bie kɔyɛ sɔ. d Afei koso, bayɛ Bible kengalɛ nwo nhyehyɛɛ bɔ ɔfa Yesu wue nanwo wɔ Kristofoɛ Abrabɔ ne Asɛnga—Adesũa Nwomaa nanu, na ɛhẽne koso, ɛkɔhora koli yesĩ. Kyẽa bɔ yɛkɔkae Yesu wue ne, ɛyɛ a bɛyɛ Daa Asɛm bɛfa bɛto jw.org. Yeti bɔ mmɔden kyɛ ɛkɔnea bie. Sɛ yɛ bɔbɔ yɛdimoa yɛboa yɛnwo yɛma kyẽa bɔ yɛkɔkae Yesu wue ne a, ɔkɔboka yɛ maa yɛkɔhora yɛkɔto asaa yɛkɔfrɛ mmeni pẽe maa bɛkoso bɛkɔwa bie.—Ɛsra 7:10.

MVASOƐ BƆ ƆWƆ SO KYƐ YƐKƆKAE YESU WUE NE, BOKA MMENIA MA BENWU YE

13. Sɛ yɛpena kyɛ yɛboka mmenia maa benwu mvasoɛ bɔ ɔwɔ Yesu wue naso a, nikyee bɔ olimoa beni yeɛ yɛkɔhora yɛkɔyɛ ɔ?

¹³ Mvasoɛ bɔ ɔwɔ so kyɛ yɛkɔkae Yesu wue ne, yɛkɔyɛ sɛɛ né yahora yaboka mmenia maa banwu ye? Nikyee bɔ olimoa bɔ yɛkɔhora yɛkɔyɛ yeɛ ole  kyɛ, yɛkɔto asaa yɛkɔfrɛ bɛ maa bɛ koso bɛkɔwa bie. Sɛ ɛhẽne la ahãmeɛ a, mmeni foforɛ biemɔ wɔ berɛ bɔ yɛkɔhora yɛkɔhworɔ bɛ dumaa, na yato asaa yafrɛ bɛ ɔ. Benu biemɔ yeɛ ole y’abusũafoɛ, bɛbɔ yɛne bɛ yɛ adwuma, bɛbɔ yɛne bɛ kɔ sukuu, anaa ebiala bɔ yɛse ye ɔ. Ebiekũ koso, sɛ krataa bɔ yɛfa yɛto asaa yɛfrɛ mmenia ne, yɛ deɛ ne yie po a, yɛkɔhora yɛkɔfa bɔ ɔwɔ intanɛt so nanwo link yɛkɔsɛnde bɛ. Sɛ yɛyɛ sɔ a, ɔkɔhora kɔboka mmeni pẽe maa bɛkɔwa dwumadie ne bie.—Nwo. 11:6.

14. Nzuati yeɛ odikyɛ yɛhyɛ da yɛto asaa yɛfrɛ mmenia bɔ yɛse bɛ ne, mmerɛ bɔ yɛkae Yesu wue ne?

¹⁴ Sɛ ɛpena kyɛ ɛto asaa frɛ ebie maa ɔba Yesu wue bɔ yɛkae nabo a, nnenya adwene llé kyɛ sona ne ngɔwa. Wɔde ma yɛnea edwirɛ bie bɔ osili ɔ. Aliemaa brasua bie gya bĩaa, nakoso ohũ ne tte Yehowa Danzeniɛ. Ohũ ne hãhyirele ye kyɛ, Yesu wue bɔ Yehowa Adanzefoɛ kɔkae sɔ afoɛ nanu ne, ɔkɔhɔ bie. Mmerɛ bɔ ɔhãne sɔ ne, ɔyɛle ɔye ne nwanwa paa. Nzuati ɔ? Ofikyɛ, né wato yesa wafrɛ ohũ ne mmerɛ pẽe kyɛ ɔbra sɔ dwumadie ne bie, nakoso né ɔmma. Yede nzu yeɛ ɔhãne ohũ ne maa ɔyɛle ye adwene kyɛ ɔkɔhɔ dwumadie nabo sɔ afoɛ ne ɔ? Ohũ ne hãne kyɛ: “Ebie yeɛ ɔhyɛle da tole asaa frɛle me ɔ.” Yede, nwa yeɛ ɔtole asaa frɛle ye ne? Ɔte asafo nu panyi bie bɔ ɔse bĩaa ne dada ɔ. Bĩaa ne hɔle dwumadie nabo sɔ afoɛ ne, na ofi berɛ ne, sɛ odwu mmerɛ biala bɔ bɛkae Yesu wue ne a, ɔkɔ bie.

15. Sɛ yɛto asaa yɛfrɛ mmenia maa bɛba Yesu wue bɔ yɛkae nabo a, nzu yeɛ odikyɛ yɛmaa ɔtena y’adwene nu ɔ?

¹⁵ Ma ɔtena w’adwene nu kyɛ, sɛ yɛkae Yesu wue ne a, mmenia bɔ yɛto asaa yɛfrɛ bɛ ne, benu biemɔ wɔ berɛ a, ɛyɛ a né bele edwirɛ biemɔ bɔ bɛpena kyɛ benya yenwo mmuayɛɛ ɔ. Bɛbɔ bɛwalle bie llé ne, bɛ paa yeɛ bɛtaa bebisa edwirɛ ɔ. Yeti edwirɛ bɔ ebia bekobisa ne, yɛkɔhora yekosusu yenwo, kyɛbɔ ɔkɔyɛ a yɛkɔma bɛ mmuayɛɛ bɔ enu la berɛ ɔ. (Kol. 4:6) Ebia bekobisa kyɛ: ‘Nzu yeɛ ɔkɔhɔ so wɔ dwumadie nabo ɔ?’ ‘Mmerɛ beni yeɛ bɛkɔpɔno ɔ?’ ‘Ɛmɔle ataadeɛ pɔtẽe bie bɔ odikyɛ ebie wura ba yebo anaa?’ ‘Odikyɛ metua esikaa bie kora né mahora mawa bie hɔ?’ Sɛ meba a, ngɔto kɔlɛhyɛn anaa? Yeti sɛ yɛto asaa yɛfrɛ ebie a, yɛkɔhora yekobisa ye kyɛ, “Ele edwirɛ bie bɔ ɛpena kyɛ ebisa fa dwumadie nanwo anaa?” Sɛ ɔkã kyɛ yóo a, odikyɛ yetie ye na yɛma yenwo mmuayɛɛ. Yɛkɔhora yɛkɔfa vidio biemɔ yɛkɔboka sona  ne. Ebie yeɛ ole, Kae Yesu Wue Ne, ɔne Nzu Yeɛ Ɔkɔ So Yɛ Wɔ Ahennie Asa So Ɔ? Afei koso, adesũa 28 bɔ ɔwɔ Nya Asetena Nu Anigye Daa! nwomaa nanu ne, ɔte kama paa. Ɛhẽne koso, yɛkɔhora yɛkɔfa yɛkɔboka sona ne.

16. Bɛbɔ bɛba Yesu wue bɔ yɛkae nabo ne, edwirɛ foforɛ benimɔ yeɛ bɛkɔhora bekobisa ɔ?

¹⁶ Mmenia bɔ bɛba Yesu wue bɔ yɛkae nabo ne, ɛyɛ a né benu biemɔ té le edwirɛ bɔ bɛpena kyɛ bebisa ɔ. Ebie yeɛ ole kyɛ: ‘Nzuati yeɛ ebiala anni paanoo ne, na wannõ nzãa ne bie ɔ?’ ‘Anaa nzuati yeɛ mmenia kãa bie yeɛ belili paanoo ne, na bɛnõne nzãa ne bie ɔ?’ Ebiekũ koso, bɔ yeti yeɛ yɛkae Yesu wue ne kõmapɛ wɔ afoɛ nanu ne, ebia né bɛpena kyɛ benwu ye. Ebiemɔ koso wɔ berɛ a, kyɛbɔ yɛkae Yesu wue ne wɔ nekaa bɔ bɛwɔ ne, ɛyɛ a né bɛpena kyɛ benwu ye kyɛ, sɔ ala yeɛ bɛyɛ ye wɔ ewiase mukoraati anaa. Ɔwɔ nu kyɛ aliemaa bɔ ɔkɔma dwudwolɛ ne kohyirehyire sɔ dwirɛ he mukoraati nu de, nakoso ebia bɛbɔ bɛwalle bie llé ne, nna yemukoraati yeɛ bɛkɔte yebo ɔ. Yeti sana yɛto yɛboase yekyirekyire benu. Afei koso edwirɛ bie wɔ jw.org so bɔ yenwa, Sɛnea Yehowa Adansefo Hyɛ Awurade Anwummere Aduan No Ho Fã No Ne Asɔre a Aka No De Nyɛ Pɛ. Adɛn Ntia? Edwirɛ bɔ ɔwɔ berɛ ne, ɔkɔboka yɛ maa yekohyirehyire edwirɛ bɔ bekobisa yɛ ne bie nu. Yeti ɛmɔma yɛyɛ bɔ yɛkɔhora biala kyɛ, yɛkɔboka mmenia bɔ bɛnye gye yenwo kyɛ bɛkonya daa ngõa ne, kyɛbɔ ɔkɔyɛ a Yesu wue bɔ yɛkae ne, bekonya so mvasoɛ ɔ.—Aso. 13:48.

BOKA BƐBƆ BAYAKYI ADESŨA NE ASƐNGA HƆLƐ NE

17. Sɛ asafo nu mbanyi nemɔ kɔhora kɔboka aliemaamɔ bɔ bayakyi adesũa ne asɛnga hɔlɛ ne a, nzu yeɛ odikyɛ bɛyɛ ɔ? (Hesekiel 34:​12, 16)

¹⁷ Bɛbɔ bayakyi adesũa ne asɛnga hɔlɛ ne, asafo nu mbanyi kɔyɛ sɛɛ né bahora baboka bɛ, mmerɛ bɔ yɛbaakae Yesu wue ne? Sɛ asafo nu mbanyi nemɔ ne bɛ dwudwo a, odikyɛ bɛmaa benwu ye kyɛ bɛdwene bɛnwo. (Kenga Hesekiel 34:​12, 16.) Kora bɔ yeɛ yɛkɔkae Yesu wue ne, ɛmɔbɔ mmɔden kyɛ ɛmɔkɔpena bɛ. Sɛ ɛmɔsa kã bɛ a, ɛmɔma benwu ye kyɛ ɛmɔkuro bɛ dwirɛ, na ɛmɔpena kyɛ ɛmɔboka bɛ maa bɛhyɛ adesũa ne asɛnga hɔlɛ bo biekũ. Ɛhẽne sĩ ne, ɛmɔto asaa bɛfrɛ bɛ ma bɛbra dwumadie ne bie. Sɛ bɛkora bɛba bie a, ɛmɔfa anigye bɛyɛ bɛ akwaaba. Dwumadie  ne sĩ ne, ɛmɔhɔ so bɛfa ɛmɔnye beli besĩ, ofikyɛ aliemaamɔ bɔ bɛte sɔ ne, bɛnwo hia Yehowa paa. Afei koso, ɛmɔboka bɛ kyɛbɔ ɔkɔyɛ a, bekosa bɛkɔkekã bɛnwo biekũ wɔ Yehowa sõen nu ɔ.—1 Pet. 2:25.

18. Aliemaamɔ bɔ bayakyi adesũa ne asɛnga hɔlɛ ne, nzu yeɛ yɛkɔhora yɛkɔyɛ yɛkɔfa yɛkɔboka bɛ ɔ? (Romanfoɛ 12:10)

¹⁸ Bɛbɔ bayakyi adesũa ne asɛnga hɔlɛ ne, sɛ bɛba Yesu wue bɔ yɛkae ne bie a, nzu yeɛ yɛyɛ a, okyire kyɛ yɛdwene bɛnwo ɔ? Odikyɛ yɛmaa benwu ye kyɛ yekuro bɛ dwirɛ, na yɛbu bɛ paa. (Kenga Romanfoɛ 12:10.) Ɛmɔma yɛkae kyɛ, ɛyɛ a né sɔ aliemaa nemɔ suro kyɛ sɛ bɛba a, ebia aliemaamɔ ngɔte bɛ nyunu ngɔma ma bɛ. Ɛhẽne ati yeɛ ɛyɛ a bɛmbena kyɛ bɛkɔwa adesũa ne. e Yeti sɛ bɛkora bɛba a, nnebisabisa bɛ dwirɛ biemɔ bɔ ɔkɔmaa bɛkɔfɛre ɔ, na nnɛkã edwirɛ bɔ ɔyɛ yea kyire bɛ. (1 Tɛs. 5:11) Aliemaamɔ mmrienzua ne mmrasua bɔ bayakyi adesũa ne asɛnga hɔlɛ ne, yekuro bɛ dwirɛ paa. Na besa bɛba maa yɛmu yɛbɔ nu yɛsõ Yehowa a, yɛnye kɔgye paa.—Edw. 119:176; Aso. 20:35.

19. Nzuati yeɛ mvasoɛ wɔ so kyɛ yɛkɔkae Yesu wue ne ɔ?

¹⁹ Ɔyɛ yɛ fɛ paa kyɛ, Yesu hãhyirele yɛ kyɛ yɛkae ye wue ne afoɛ biala ɔ. Ɔte dwumadie bɔ yɛmva yenni angorɛ koraa, ofikyɛ mmenia bɔ yɛto asaa yɛfrɛ bɛ maa bɛba ne, ɔboka yɛne bɛmu. (Yes. 48:​17, 18) Yehowa ne Yesu ayɛ bie ama yɛ paa, yeti yekuro bɛ dwirɛ. Yeti mmerɛ biala bɔ yɛkɔhɔ dwumadie nabo ne, né yɛfa yɛda Yehowa ne Yesu ase wɔ bɔ bayɛ bama yɛ nanwo. Afei koso, sɔ dwumadie ne kã yɛne aliemaamɔ mukoraati bɔ nu kyɛ abusũa kõ. Ebiekũ koso, mvasoɛ bɔ ɔwɔ Yesu wue naso, ɔne bɔ odikyɛ ebie yɛ kora né wanya daa ngõa ne, yɛboka mmenia maa benwu ye. Yeti afoɛ he, ɛmɔma yɛyɛ bɔ yɛkɔhora biala kyɛ, yɛkɔboa yɛnwo yɛkɔma kyẽa bɔ yɛkɔfa yɛkɔkae Yesu wue ne, ofikyɛ ɔte kyẽa bɔ yenwo hia paa wɔ afoɛ nanu ɔ!