ECIGABI C’OKUYIGA CA 2
LWIMBO 19 Chakula cha Mangaribi cha Bwana
K’Ocirheganyize oku Lusiku lw’Obulagirire Bwenene omu Mwaka?
“Mukâjira ntyo kube kukankengera.”—LK. 22:19.
EBI ECI CIGABI CISEGIZE
Olole bulya gurhi entimanano y’Okukengera olufû lwa Yezu eba ya bulagirire bwenene, gurhi rhwakacirheganya kuli yo, na gurhi rhwakarhabala abandi lyo bayisha kw’eyo ntimanano.
1. Bulya gurhi olusiku lw’Okukengera olufû lwa Yezu lo luba lusiku lw’obulagirire bwenene omu mwaka? (Luka 22:19, 20)
ABANTU ba Yehova banabone oku olusiku lw’Okukengera olufû lwa Kristu lo lusiku lw’obulagirire bwenene omu mwaka. Lone lusiku lw’omwaka Yezu arhegesire abanafunzi bage bakakengera. (Osome Luka 22:19, 20.) Haba birhumire binji birhuma rhwalindirira olusiku lw’Okukengera olufû lwa Yezu. Lekagi rhuganirire birhumire biguma na biguma muli byo.
2. Birhumire bihi biguma na biguma birhuma rhwalindirira olusiku lw’Okukengera olufû lwa Yezu?
2 Okukengera olufû lwa Yezu kunarhurhabale rhurhanye bwenene oku bulagirire bw’engombôlo. Kunarhukengeze enjira rhwakayerekanamwo oku rhuvuzire omunkwa oku nterekêro ya Yezu. (2 Kr. 5:14, 15) Kandi kunarhuhe obulyo bw’‘okuhânana omurhima’ na bene wirhu na bali birhu. (Rm. 1:12) Ngasi mwaka, bene wirhu na bali birhu banji balesire emikolo y’ecigamba banayishe kw’eyo ntimanano. Ciru baguma na baguma bashumibwe okugalukira Yehova bulya bayegerezibwe n’obushagaluke. Na bantu banji basimisibwe n’okuli banashumibwe okurhondera balambagira omw’ibarabara lihêsire ebwa buzine enyanya z’ebi babona n’okuyumva. Ebyo byoshi binarhume entimanano y’Okukengera olufû lwa Yezu yaba yago-yago kuli rhwe!
3. Gurhi entimanano y’Okukengera olufû lwa Yezu erhuma rhwaba n’ecinyabuguma haguma na bene wirhu na bali birhu b’omw’igulu lyoshi? (Olole n’enfoto.)
3 Kandi, orhanye gurhi entimanano y’Okukengera olufû lwa Yezu erhuma rhwaba n’ecinyabuguma haguma na bene wirhu na bali birhu b’omw’igulu lyoshi. Abahamirizi ba Yehova banarhimanane lyo bakengera olufû lwa Yezu erhi izuba lirhondera lyazika bunyi-bunyi omw’igulu lyoshi. Rhweshi rhunayumvirhize ehotuba esegize obulagirire bw’engombôlo. Rhunayimbe nyimbo ibirhi z’okuha Yehova obukuze, rhunageze omugati n’idivayi, n’okuderha “amen” n’omurhima goshi oku masala ani gajirwa. Omu nsa hofi 24, ebigamba byoshi by’omu igulu binabe byajijire ntyo. Ka wanarhanya omwishingo Yehova na Yezu baba nago erhi babona rhweshi omu igulu lyoshi rhwabakuza omu kujira ntyo?
Entimanano y’Okukengera olufû lwa Yezu enarhume rhwaba n’ecinyabuguma haguma na bene wirhu na bali birhu omw’igulu lyoshi (Olole ecifungo ca 3) f
4. Bici rhwaganirira mw’eci cigabi?
4 Mw’eci cigabi, rhwaganirira aga madoso: Gurhi rhwakarheganyamwo omurhima gwirhu lugenda entimanano y’Okukengera olufû lwa Yezu? Gurhi rhwakarhabalamwo abandi lyo bayunguka n’eyo ntimanano? Na gurhi rhwakarhabalamwo abalesire emikolo y’ecigamba? Amashuzo g’ago madoso garhurhabala lyo rhuba rhucirheganyize lugenda eyo ntimanano y’obulagirire bwenene.
GURHI RHWAKARHEGANYAMWO OMURHIMA GWIRHU LUGENDA ENTIMANANO Y’OKUKENGERA OLUFÛ LWA YEZU?
5. (a) Bulya gurhi rhushinganine rhukarhanya bwenene oku bulagirire bw’engombôlo? (Ennanga 49:7, 8) (b) Bici wayizire kugerera evideo edesire, Bici Byarhumâga Yezu Afâ?
5 Nguma y’omu njira z’obulagirire bwenene rhwakarheganyamwo omurhima gwirhu lugenda entimanano y’Okukengera olufû lwa Yezu, kuli kurhanya bwenene oku bulagirire bw’enterekêro y’engombôlo yage. Oku bwirhu rhwene, nta mango rhwakahashire okucicungula kurhenga omu caha n’omu lufû. (Osome Ennanga 49:7, 8; olole n’evideo edesire, Bici Byarhumâga Yezu Afâ?) a Yehova n’Omugala muzigirwa Yezu baciyimire binji bwenene lyo Yezu ahâna obuzine bwage erhi rhwe rhurhuma. (Rm. 6:23) Oku rhwagendekera rhwarhanya bwenene kw’ebi Yehova na Yezu baciyimire, ko rhwanagendekera rhwashagalukira engombôlo. Rhwaganirira bintu bisungunu byone omu bintu Yehova na Yezu baciyimire lyo bahâna engombôlo. Cikone burhangiriza, bici engombôlo yal’ihûnyire?
6. Engombôlo byo bici, na bulya gurhi Yezu ye wal’ishinganine okuyilyula?
6 Engombôlo liri ibeyi omuntu akalyula ly’agombôla kantu kalebe. Omuntu murhangiriza, Adamu, ali mwimana erhi alemwa. Erhi ajira ecaha, acihegeza obulangalire bw’okulama ensiku n’amango abuhegeza n’abana bage boshi. Ly’ebi Adamu ahezagya bigombôlwa, Yezu ahâna obuzine bwage bwimana nterekêro. Omu kalamo kage koshi hano igulu, Yezu “arhajiraga caha, n’obulyalya burhabonekaga omu kanwa kage.” (1 Pt. 2:22) Erhi Yezu afâ, obuzine bwage bwimana bwal’ishushine bwinja-bwinja n’obuzine Adamu ahezagya.—1 Kr. 15:45; 1 Tm. 2:6.
7. Mazibu gahi maguma na maguma Yezu alwisize amango ali hano igulu?
7 Amango Yezu ali hano igulu, arhumikire Yehova omu ngasi kantu, ciru n’omu mango kwali kazibu okujira ntyo. Amango Yezu ali mwana, al’igwasirwe arhumikire ababusi bage barhali bimana, ciru akaba abusirwe mwimana. (Lk. 2:51) Amango ali mwana w’omushuko, al’ishinganine ahagalike ngasi mashumi gakarhumire arharhumikira ababusi bage erhi arhabe mwishwekerezi kuli Yehova. N’erhi aba akola mukulu, al’igwasirwe ahagalike Shetani Ibilisi wamushumikaga ajire ecaha na ciru amubwira n’obwalagale oku aleke okuba mwishwekerezi kuli Yehova. (Mt. 4:1-11) Shetani al’ihizire okushumika Yezu ajire ecaha ly’arhag’iba n’obuhashe bw’okulyula engombôlo.
8. Gandi mazibu gahi Yezu alembire?
8 Amango g’omukolo gwage hano igulu, Yezu alembire agandi mazibu. Abashombanyi bage bamulibuzize banalonza okumuniga. (Lk. 4:28, 29; 13:31) Al’igwasirwe alembere obuzamba bw’abanafunzi bage. (Mk. 9:33, 34) Amango akag’isambisibwa, alibuzibwe bwenene n’okushekerwa. Buzinda, anigwa omu njira ya malumwa manji bwenene na ya kubonesa nshonyi. (Hb. 12:1-3) Al’igwasirwe alembere ecigabi cizinda c’irhangulo lyage oku buhashe bwage yene, buzira bulanzi bwa Yehova. b—Mt. 27:46.
9. Gurhi rhuciyumva lugenda enterekêro ya Yezu? (1 Petro 1:8)
9 Kobinali, Yezu alibusire bwenene ly’ahâna engombôlo. Erhi rhurhanya oku bintu byoshi Yezu ayemire okujira erhi rhwe rhurhuma, rhunaciyumve rhumuzigire bwenene.—Osome 1 Petro 1:8.
10. Bici Yehova aciyimire ly’engombôlo elyulwa?
10 Gurhigi lugenda Yehova? Bici ayemire okuciyima lyo Yezu alyula engombôlo? Yehova na Yezu bajira obwîra bwa hofi-hofi bwenene bwakabaho egarhi k’omwana n’ishe. (Mig. 8:30) Orhanyagye gurhi Yehova aciyumvirhe erhi abona Yezu alembera mazibu manji bwenene amango ali hano igulu. Buzira karhinda, Yehova ayumvirhe malumwa manji bwenene erhi abona Omugala ajirirwa kubi, alahirwa, n’okulibuzibwa.
11. Okolese olwiganyo ly’oyerekana gurhi Yehova agwasirwe abe aciyumvirhe erhi Yezu anigwa.
11 Ngasi mubusi wafîrirwe n’omwana wage aba amanyire amababale manji bwenene galerhwa n’okufîrwa n’omwana. Rhujira obuyemere busezire omu bulangalire bw’obufûke, cikone oko kurharhuma rhurhayumva malumwa manji erhi rhufîrwa n’omuzigirwa wirhu. Olo lwiganyo lurhurhabire okuhugûkwa gurhi Yehova agwasirwe abe aciyumvirhe erhi abona Omugala alibuzibwa n’okufâ omu mwaka gwa 33 Kano Kasanzi Kirhu (K.K.K.). c—Mt. 3:17.
12. Bici rhwakajira omu migobe y’embere z’olusiku lw’Okukengera olufû lwa Yezu?
12 Embere olusiku lw’Okukengera olufû lwa Yezu luhike, ka wanapanga okuyiga lugenda engombôlo omw’ifunzo lyawe wene erhi omu Nterekêro yinyu y’Omulala? Ly’oyiga binji lugenda ogo mwanzi, okolese ecitabu Musaada wa Kutafuta Habari kwa Ajili ya Mashahidi wa Yehova, erhi ebindi bicapo birhurhabala okuyiga Ebibliya. d Kandi, ocihangane okukulikira eprograme y’obusomi bw’Ebibliya buyerekire Okukengera olufû lwa Yezu eri omu Ibugu ly’Entimanano—Omukolo n’Akalamo k’Omukristu. N’olusiku lw’Okukengera olufû lwa Yezu, orhayibagiraga okulola evideo y’enterekêro yago-yago y’esezi. Erhi rhwakarheganya omurhima gwirhu lugenda entimanano y’Okukengera olufû lwa Yezu, rhwanahasha okurhabala abandi lyo nabo bayunguka nayo.—Ezr. 7:10.
ORHABALE ABANDI LYO BAYUNGUKA
13. Kantu kahi karhanzi rhwakajira lyo rhurhabala abandi bayunguke n’entimanano y’Okukengera olufû lwa Yezu?
13 Gurhi rhwakarhabalamwo abandi lyo bayunguka n’entimanano y’Okukengera olufû lwa Yezu? Kobinali, akantu karhanzi rhwakajira kuli kubalalika. Ahanyuma n’okulalika abantu rhurhimanana nabo omu mukolo gw’amahubiri, rhwanajira eliste y’abandi bantu rhwalalika. Kwa lwiganyo, abantu b’omu mulala gwirhu, abirhu banyakazi, abirhu banafunzi n’abandi. Ciru akaba rhurhagwerhi milali minji y’akaratasi, rhwanabarhumira e lien y’omulali gw’ecielektronike. Nkaba rhwanasomerwa okubona bantu banji bashuzize oku mulali gwirhu!—Muh. 11:6.
14. Ohâne olwiganyo luyerekine obuhashe bw’omulali wakaha omuntu ye nnene.
14 Omulali wakaha omuntu ye nnene gwanaba na buhashe bunji kulusha oku orhanyize. Lusiku luguma, mwali wirhu muguma ojira iba orhaba Muhamirizi asomerwa bwenene erhi iba amubwira n’obushagaluke oku apanzire okugenda haguma naye oku ntimanano y’Okukengera olufû lwa Yezu. Bulya gurhi asomeragwa? Bulya kanji-kanji omu mango gageraga, akag’imuha omurhima oku aje kw’eyo ntimanano, cikone arhayijagako ciru n’eriguma. Bicigi byarhumire lero ashanja entanya zage? Adesire ntya: “Bampire omulali gwani nie nnene,” anahugûlira mukage oku mugula muguma bal’imanyine naye wa mw’eyo eneo ye wamulalisire. Oyo mulume aja oku ntimanano y’Okukengera olufû lwa Yezu mw’ogo mwaka anajira ntyo omu myaka minji enyuma z’aho.
15. Bici rhulonzize rhukakengera amango rhuli rhwalalika abandi oku ntimanano y’Okukengera olufû lwa Yezu?
15 Okakengera oku abantu rhulalika nkaba banaba bagwerhe amadoso bakarhudosa, bwenene erhi akaba barhalisag’ija oku ntimanano yirhu ciru n’enguma. Co cirhumire kwanaba kwinja rhurhanye oku madoso bakarhudosa n’okucirheganya okugashuzako. (Kl. 4:6) Kwa lwiganyo, hali abakacidosa ntya: ‘Bici byajirikana kw’eyo ntimanano?’ ‘Nsa zinga yayusa?’ ‘Ka hali emishangi mpunyirwe okuyambala?’ ‘Ka byahûna okulipa lyo njamwo?’ ‘Ka bahûna entûlo?’ Amango rhuli rhwalalika muntu mulebe oku ntimanano y’Okukengera olufû lwa Yezu, rhwanamudosa kone ntya, “Ka hali idoso ogwerhe?” na buzinda oshuze amadoso omuntu akaba agwerhe. Kandi rhwanakolesa evideo edesire, Rhukakengera Olufû lwa Yezu na Bici Bijirwa Aha Nyumpa y’Entimanano? lyo rhurhabala omuntu ahugûkwe gurhi entimanano zirhu zijirwa. N’isomo lya 28 ly’ecitabu Oshagalukire Akalamo Ensiku n’Amango! liri mw’eyindi myanzi minja rhwakaganirira.
16. Gandi madoso gahi abantu bayishire oku ntimanano y’Okukengera olufû lwa Yezu bakacidosa?
16 Enyuma z’okuja oku ntimanano y’Okukengera olufû lwa Yezu, abantu bahyahya basimisibwe nkaba banaba n’agandi madoso bakarhudosa. Nkaba banacidosa bulya gurhi bantu basungunu bone (erhi ciru ntanye) walire omugati n’okunywa idivayi. Kandi nkaba banacidosa kanga rhukengera olufû lwa Yezu omu mwaka. Na kandi nkaba banalonza okumanya erhi ntyo kw’entimanano zoshi z’Abahamirizi ba Yehova zijirwa. Ciru akaba madoso manji muli ago ganashuzibwe oku ntimanano y’Okukengera olufû lwa Yezu, nkaba abahyahya banaba balagirire oku mahugûlo manji. Omwanzi guli oku jw.org gudesire, “Bulya Gurhi Abahamirizi ba Yehova Bajira Ishega ly’Ebijingo lya Nnawirhu Lubero n’oku Agandi Madîni Gajira?” gwanarhurhabala okushuza oku madoso gabo maguma na maguma. Rhulonzize rhujire ebi rhwakanahasha embere z’Okukengera olufû lwa Yezu, amango g’okulukengera, n’enyuma z’aho lyo rhurhabala balya “bagwerhe irala” bayunguke n’eyo ntimanano.—Ebj. 13:48, NWT.
ORHABALE ABALESIRE EMIKOLO Y’ECIGAMBA
17. Gurhi abagula bakarhabalamwo abalesire emikolo y’ecigamba? (Ezekiyeli 34:12, 16)
17 Omu migobe y’embere n’enyuma z’Okukengera olufû lwa Yezu, gurhi abagula bakarhabalamwo balya balesire emikolo y’ecigamba? Mwe bagula, mubayerese oku mubashibirire. (Osome Ezekiyeli 34:12, 16.) Embere z’olusiku lw’Okukengera olufû lwa Yezu, mucihangane okulambagirira banji nk’oku binahashikine. Mubayemeze n’obwalagale oku mubazigire munalonzize okubarhabala omu ngasi njira mwakanahasha. Mubalalike oku ntimanano y’Okukengera olufû lwa Yezu. N’erhi bakayisha, mubayegereze n’obushagaluke. Enyuma z’olusiku lw’Okukengera olufû lwa Yezu, mugendekere mwalambagirira erhi kuhamagala abo bene wirhu na bali birhu bazigirwa, n’okubaha ngasi burhabale bw’ekiroho balagirireko lyo bagalukira Yehova.—1 Pt. 2:25.
18. Gurhi rhweshi rhwakarhabalamwo abalesire emikolo y’ecigamba? (Abaroma 12:10)
18 Abantu boshi omu cigamba banarhabala abalesire emikolo y’ecigamba bayishire oku ntimanano y’Okukengera olufû lwa Yezu. Gurhi bakabarhabalamwo? Omu kubajirira omu njira y’obuzigire, ya lukogo, na ya bukenge. (Osome Abaroma 12:10.) Okengere oku ebyo bibuzi by’engulo ndarhi byanaba byakag’irhindira okucib’iyisha oku ntimanano. Nkaba bakag’iyoboha oku barhayegerezibwe bwinja. e Co cirhumire, omanye orhabadosagya amadoso gakababonesa nshonyi erhi kuderha kantu kalebe kakabasarhaza. (1 Ts. 5:11) Abo bene wirhu na bali birhu baba birhu bemezi. Rhunashagaluke okucib’iharamya Yehova haguma nabo!—Enna. 119:176; Ebj. 20:35.
19. Bunguke buhi rhuba nabo omu kukengera olufû lwa Yezu?
19 Rhuvuzire omunkwa okubona Yezu ajijire omupango lyo rhukakengera olufû lwage ngasi mwaka. Erhi rhujira ntyo, rhunacilerhere obunguke n’okubulerhera abandi omu njira nyinji. (Iz. 48:17, 18) Rhunayushule obuzigire bwirhu kuli Yehova na Yezu. Rhunayerekane oku rhuvuzire omunkwa bwenene kw’ebi barhujirire. Rhunazibuhye obwîra bwirhu haguma na bene wirhu na bali birhu. Kandi nkaba rhwanarhabala abandi bayige gurhi nabo bakashagalukira emigisho engombôlo ehashisize okuba nayo. Lekagi rhujire ebi rhwakanahasha byoshi lyo rhucirheganya lugenda olo lusiku lw’obulagirire bwenene omu mwaka, ko kuderha olusiku lw’Okukengera olufû lwa Yezu!
GURHI RHWAKAJIRA LYO . . .
-
rhurheganya omurhima gwirhu lugenda olusiku lw’Okukengera olufû lwa Yezu?
-
rhurhabala abandi bayunguke n’eyo ntimanano?
-
rhurhabala abalesire emikolo y’ecigamba?
LWIMBO 18 Tuko na Shukrani juu ya Bei ya Ukombozi
a Okolese ahantu h’okujirira obusagasi oku jw.org ly’obona emyanzi n’evideo ziyerekinwe mw’eci cigabi.
b Olole ecigabi cidesire, “Amadoso g’Abantu Basoma Ebitabu Birhu” omw’Ilabiro ly’Akalalizi ly’Omwezi gwa 4, 2021.
c Olole ecitabu Mkaribie Yehova, cig. 23, cif. 8-9.
d Olole ecisanduku cidesire, “ Ebi Wakajirira Obusagasi.”
e Olole enfoto n’ecisanduku cidesire “ Gurhi Ecigamba Cajijire?” Mwene wirhu muguma walesire emikolo y’ecigamba ali arhindira okuja omu Nyumpa y’Obwami, cikone amahima oboba bwage. Amayegerezibwa n’omwishingo amanashagalukira okuba haguma n’ababo bemezi.
f AMAHUGÛLO G’ENFOTO : Amango abantu ba Yehova bali bajira entimanano y’Okukengera olufû lwa Yezu omu eneo nguma y’igulu, bene wabo na bali babo b’omu gandi maeneo g’igulu bali bacirheganya lugenda eyo ntimanano yago-yago.
