1. Qaagooshshu Ayyaana ayirrinsanni barri diru giddo lowo geeshsha baxxinoha ikkinohu mayiraati? (Luqaasi 22:19, 20)

 YIHOWA mannira Kiristoosi reyo qaagooshshe ayirrinsanni barri diru giddo lowo geeshsha baxxino barraati. Yesuusi harunsaanosi ayirrissanno gede hajajino ayyaani konne callaati. (Luqaasi 22:19, 20 nabbawi.) Qaagooshshu Ayyaana quqquxamme agadhineemmo gede assannonkehu lowo korkaati no. Hanni konni giddo mito laˈno.

2. Qaagooshshu Ayyaana quqquxamme agadhineemmo gede assannonkehu mitu korkaati maati?

² Qaagooshshu Ayyaani wodote kakkalo afidhino waaga hiincineemmo gede kaaˈlannonke. Kuni ayyaani Yesuusite wodote kakkalora galatu noonketa leellinsheemmo doogga qaangeemmo gede assannonke. (2 Qor. 5:14, 15) Qoleno ammanate roduuwinke ledo “mimmitonke jawaachinsheemmo” faro fanannonke. (Rom. 1:12) Diru kiiro ayyaanaamittetenni qiiddinori batinyu roduuwi konne gambooshshe dagganno. Mitu isinni roduuwu anga fante haadhinonsa daafira galagalte Yihowawa higgino. Konni gambooshshiwa lainorinna macciishshinori hasatto noonsaha batinye manna heeshshote doogora haˈra hanafanno gede kakkayisinonsa. Kuni baalu coyi Qaagooshshu Ayyaana quqquxamme agadhineemmo gede assannonke!

3. Qaagooshshu Ayyaani alamete doyichora noo roduuwa mitto assannohu hiittoonniiti? (Misileno lai.)

³ Hanni Qaagooshshu Ayyaani alamete doyichora noo roduuwa mitto assanno garano hendo. Alamete doyichora noori Yihowa Farciˈraasine arrishsho eˈanno woyite ayyaana ayirrisate gamba yitanno. Baalunku wodo afidhino waaga luphi assite leellishshanno lallawo macciishshineemmo. Konni gambooshshiwa lame galatu faarso faarsineemmo, timanna woyine doyissinanni hattono  huuccinannite shoole huuccattora woˈma giddonkenni “hamiiˈni” yineemmo. Alamete doyichora noo songuwa baala 24 saate giddo mittu gari biddishsha harunsitanno. Hanni Yihowanna Yesuusi konni garinni mittimmatenni insa ayirrinsanna laˈanno woyite mageeshshi geeshsha hagiidhitannoro hedi!

4. Konni birxichira maa xiinxallineemmo?

⁴ Konni birxichira aante noo xaˈmuwa xiinxallineemmo: Qaagooshshu Ayyaanira wodananke qixxeessiˈra dandiineemmohu hiittoonniiti? Wolootu konni ayyaaninni horo afidhanno gede kaaˈla dandiineemmohu ma garinniiti? Ayyaanaamittetenni qiiddinore kaaˈla dandiineemmohu hiittoonniiti? Kuri xaˈmuwara qollanni dawaro tenne lowo geeshsha hasiissanno yannara qixxaambeemmo gede kaaˈlitannonke.

QAAGOOSHSHU AYYAANIRA WODANANKE QIXXEESSIˈRA DANDIINEEMMOHU HIITTOONNIITI?

5. (a) Wodote kakkalo afidhino waaga hiinca hasiissannonkehu mayiraati? (Faarso 49:7, 8) (b) Yesuusi Reyinohu Mayiraati? yitanno viidiyonni maa rosootto?

⁵ Qaagooshshu Ayyaanira wodananke qixxeessiˈra dandiineemmote kaajja doogga giddo mitte Yesuusi Kiristoositi wodote kakkalo afidhino waaga hiincate. Ninke uminkenni cubbunna reyotenni horo gata didandiineemmo. (Faarso 49:7, 8 nabbawi; Yesuusi Reyinohu Mayiraati? yitanno viidiyono lai.) a Hakko daafira Yihowa Yesuusi ninke daafira heeshshosi sayise aanno gede asse kakkalo qixxeessinonke; tini Yihowanna muxxe Beettisi lowo waaga baattanno gede assitino. (Rom. 6:23) Yihowanna Yesuusi baattinonke waaga hiincinummo kiiro wodote kakkalo albinni roore naandeemmo. Yihowanna Yesuusi wodote kakkalo qixxeessate baattino waagi giddo gama ronseemmo. Hanni balanxe wodote kakkalo maatiro laˈno.

6. Wodote kakkalo maati?

⁶ Wodo mitto coye galagalle qoˈlate baantanni waagaati. Umi manchi Addaami kalaqaminohu guuta ikkeeti. Isi cubbo loosi woyite umisi calla ikkikkinni sirchisi baalu hegere heeshsho hexxo hooganno gede assino. Addaami huninore qolate Yesuusi guuta heeshshosi kakkalo asse shiqishino. Yesuusi uullate aana noo yannara “mitto cubbono diloosino; afiisinni sao difultino.” (1 Phe. 2:22) Yesuusi reyi woyite kakkalo asse uyinoti guuta heeshsho Addaami huninote ledo taalote.—1 Qor. 15:45; 1 Xim. 2:6.

7. Yesuusi uullate aana noo yannara iillinosihu mitu fonqoli maati?

⁷ Yesuusi uullate aana noo yannara lowo fonqoli iillisirono iimi Annisira ammaname heeˈrino. Yesuusi guuta ikke ilaminoha ikkirono, guuta ikkitinokki annisinna amasi fushshitino biddishshira maahoyye yee hajajama hasiissinosi. (Luq. 2:51) Isi shiimu noo yannara hajajamannokki woy ammanamannokki gede assannosi fonqolo baala gargadha hasiissinosi. Qoleno isi lophe jawa ikke noo yannara Sheexaanu Daawuloosi Yihowara ammanamannokki gede assate xaaddote shiqishinosihanna wole fonqolo qeela hasiissinosi. (Mat. 4:1-11) Sheexaanu Yesuusi wodo baatannota hoolate cubbo loosanno gede assate murciˈrino.

8. Yesuusi dandee sainohu wolu fonqoli hiikkonneeti?

⁸ Yesuusi uullate aana soqqami yannara wole fonqolono dandee saino. Iso daramanno gede assinoonnisi hattono shinannisita kulle waajjishiinshoonnisi. (Luq. 4:28, 29; 13:31) Qoleno harunsaanosita guuntete xeˈne dandee heeˈra hasiissinosi. (Maq. 9:33, 34) Iso qarru amade noosi yannara shetinsoonnisi hattono qacifantoonnisi. Hakkiinni beebba assiˈne shollinshe shinoonnisi. (Ibi. 12:1-3) Isi jeefote iillinosi qarra Yihowa kaaˈlo nookkiha umisinni dandee saˈˈa hasiissinosi. b—Mat. 27:46.

9. Yesuusite wodote kakkalo daafira mayi macciishshamannohe? (1 Pheexiroosi 1:8)

 ⁹ Addanko, Yesuusi wodo ikkate lowo waaga baatino. Yesuusi ninkera yee umisi fajjonni assinore baalare hiincanke iso lubbora banxeemmo gede dikakkayissannonke?—1 Pheexiroosi 1:8 nabbawi.

10. Yihowa wodo qixxeessate baatino waagi maati?

¹⁰ Yihowana? Yesuusi wodo baatanno gede Yihowa umisi fajjonni assinori maati? Yihowaranna Yesuusira annunna beettu mereero heeˈranno gedeehu kaajju jaaloomi noonsa. (Law. 8:30) Hakko daafira, hanni Yesuusi uullate aana heeˈreenna batinyu fonqoli iillannasi laiti Yihowa hiitto ikkinoro hedi. Yihowa Beettosi beebba assiˈnanna, gimbannasinna fonqolu iillannasi lai woyite lowo geeshsha xissiisiˈrinoti dihuluullissannote.

11. Yesuusa shini woyite Yihowara mayi macciishshaminosiro leellishanno lawishsha kuli.

¹¹ Qaaqqonsa shiiˈrino anninna ama shiiˈra mageeshshi geeshsha xissiissiˈnanni gede assitannoro seekke afino. Kaote hexxora kaajjado ammana noonke; hatto yaa kayinni shiiˈneemmo woyite dixissiisiˈneemmo yaa diˈˈikkitino. Kuni lawishshi 33 M.D. Yihowa baxanno Beettisi qarrame reyanna lai woyite mageeshshi geeshsha xissiisiˈrinoro huwanteemmo gede kaaˈlannonke. c—Mat. 3:17.

12. Qaagooshshu Ayyaanira albaanni noo lamalara maa assa dandiineemmo?

¹² Qaagooshshu Ayyaanira albaanni noo lamalara hojju xiinxalloˈne woy maatete magansiraˈne yannara wodote daafira xiinxallate woˈnaalle. Wodote daafira leddine afate Yihowa Farciˈraasineta Xiinxallote Kaaˈlitanno Borro woy wole borro horoonsiˈra dandiitinanni. d Qoleno Kiristaanu Heeshshonna Soqqansho—Xiinxallote Maxaafichora kulloonnita Qaagooshshu Ayyaanita Qullaawu Maxaafi niwaawe pirogiraame horoonsidhe. Qaagooshshu Ayyaani barra shiqqannota baxxitinota Soodo Magansiˈra pirogiraame laˈˈano deˈinoonte. Qaagooshshu Ayyaanira wodananke qixxeessiˈneemmoha ikkiro wolootuno konni ayyaaninni horo afidhanno gede kaaˈla dandiineemmo.—Izi. 7:10.

WOLOOTU HORO AFIDHANNO GEDE KAAˈLENSA

13. Wolootu Qaagooshshu Ayyaaninni horo afidhanno gede kaaˈlate assa dandiineemmohu umi coyi maati?

¹³ Wolootu Qaagooshshu Ayyaaninni horo afidhanno gede kaaˈla dandiineemmohu hiittoonniiti? Tenne assa dandiineemmoti umi  doogo konni ayyaanira insa koyisate. Soqqansho fulleemmo woyite hasaawinseemmo mannano agurranna konni ayyaanira koyinseemmo manna borreessine amaxxa dandiineemmo. Lawishshaho fiixanke, ledonke rossannore, ledonke loossannorenna woloota koyisa dandiineemmo. Garihu attammoonnihu koyishshu woraqati hooginkero nafa koyinseemmo mannira elektirooniksete uduunnichi widoonni linke soya dandiineemmo. Koyinseenna mageeshshi manni daaro mayi afino!—Ros. 11:6.

14. Egenninoommo mannira koyishshu woraqata aa kaaˈlitanno gara leellishanno lawishsha kuli.

¹⁴ Egenninoommo mannira koyishshu woraqata aa kaaˈlitannota deˈinoonte. Mitto barra ammaˈnotenni bebbeehantino maate giddo heedhannoti mitte rodoo minaannise Qaagooshshu Ayyaana haˈrara hedinota kuliseta dhagge assidhino. Ise dhagge assidhinohu mayiraati? Korkaatuno konni albaanni Qaagooshshu Ayyaana daanno gede duucha higge koyissinosiha ikkirono daye diegennino. Isi xa daanno gede assinosiri maati? Isi egenninohu mittu songote cimeessi Qaagooshshu Ayyaaniha koyishshu woraqata uyinosita coyiˈrino. Kuni minaanni hakko dironna hakkuyi gedensaanni lowo diro Qaagooshshu Ayyaana haˈrino.

15. Manna Qaagooshshu Ayyaanira koyinseemmo woyite heda hasiissannonke coyi maati?

¹⁵ Qaagooshshu Ayyaanira koyinseemmo manni hakko iso gambooshshenke daye egenninokkiha ikkiro mite xaˈmo xaˈmankera dandaannota heda hasiissannonke. Hakko daafira insa xaˈmitankera dandiitanno xaˈmuwa seekkine hedanna dawaro qolate qixxaawa hasiissannonke. (Qol. 4:6) Lawishshaho mitu manni togo yee xaˈmara dandaanno: ‘Konni gambooshshiwa maa maa assinanni? Gambooshshu meˈˈe saatenni goofanno? Hiittoo uddano uddiˈra hasiissanno? Gambooshsheho woxe baantanni? Mutsuwaate gamba assinanni?’ Mitto mancho Qaagooshshu Ayyaanira koyinseemmo woyite togo yine xaˈma dandiineemmo: “Huluullinohe coyi no?” Hakkiinni xaˈmanno xaˈmora dawaro qolate woˈnaalle. Hasaawinseemmo manchi gambooshshe assiˈneemmo gara afanno gede kaaˈlate Yesuusi Reyo Qaagi yitannotanna Gambooshshu Addaraashenkera Maa Maa Assinanni? yitanno viidiyo horoonsiˈra dandiineemmo. Qoleno Hegerera Hagiidhitanni Heeˈra Dandaatto!  yaanno maxaafira roso 28te hasaawinseemmo manchira kula dandiineemmoti batinye kaajja hedo no.

16. Qaagooshshu Ayyaanira daanno manni wole hiikkuri xaˈmuwa xaˈmara dandaanno?

¹⁶ Qaagooshshu Ayyaani gedensaanni hasatto noonsahu haarote dayino manni wole xaˈmuwa xaˈmara dandaanno. Insa ‘Timanna woyine qamasanno manni hooginohu woy shiimu manni callu qamasinohu mayiraati?’ yite xaˈmitara dandiitanno. Qoleno insa Qaagooshshu Ayyaana meekki meekkita ayirrinseemmoro afa hasidhannoha ikkara dandaanno. Hattono insa baalanka gambooshshe assiˈneemmohu mittu garinniitironna teˈee afa hasidhannoha ikkara dandaanno. Kuri xaˈmuwa giddo duuchate Qaagooshshu Ayyaani lallawo shiqqu yannara dawaro qolloonniha ikkirono haarote dagginori ledde afa hasidhannoha ikkara dandaanno. JW.ORG aana fulinohu “Yihowa Farciˈraasine Mootichu Hurbaate Ayirrissanno Gari Wole Ammaˈnowiinni Baxxannohu Mayiraati?” yaanno birxichi haarote dagginori xaˈmitannote mite xaˈmora dawaro qolate kaaˈlankera dandaanno. Qaagooshshu Ayyaanira albaanni, Qaagooshshu Ayyaani yannaranna Qaagooshshu Ayyaani gedensaanni “wodaninsa hegere heeshsho aanno halaali widira dooinori” konni ayyaaninni horo afidhanno gede kaaˈlate dandiinummore baala assa hasiˈneemmo.—Soq. 13:48, NW.

AYYAANAAMITTETENNI QIIDDINORE KAAˈLE

17. Songote cimeeyye ayyaanaamittetenni qiiddinore kaaˈla dandiitannohu hiittoonniiti? (Hiziqeeli 34:12, 16)

¹⁷ Qaagooshshu Ayyaani woggara songote cimeeyye ayyaanaamittetenni qiiddinore kaaˈla dandiitannohu hiittoonniiti? Insara heddannota leellishshe tenne assa dandiitanno. (Hiziqeeli 34:12, 16 nabbawi.) Qaagooshshu Ayyaanira albaanni dandiitini deerrinni ayyaanaamittetenni qiiddinore batinye roduuwa hasaawisate woˈnaalle. Baxxinanninsatanna dandiitini deerrinni insa kaaˈla hasidhinannita buuxissensa. Qaagooshshu Ayyaanira koyissensa. Dagguro iibbado giddonni haadhensa. Qaagooshshu Ayyaani gedensaanni kuri muxxe roduuwinke ledo xaada agurtinoonte; hattono insa Yihowawa higganno gede kaaˈlate hasiisannonsare baala assitine kaaˈlensa.—1 Phe. 2:25.

18. Ninke baalunku ayyaanaamittetenni qiiddinore kaaˈla dandiineemmohu hiittoonniiti? (Roomu Sokka 12:10)

 ¹⁸ Songote giddo noori baalunku Qaagooshshu Ayyaana daggannore ayyaanaamittetenni qiiddino roduuwa kaaˈla dandiitanno. Hiittoonni? Insara baxillenna shaqqille hattono ayirrinseemmonsata leellinshe tenne assa dandiineemmo. (Roomu Sokka 12:10 nabbawi.) Kuri muxxe roduuwi gambooshshe daate hobbi ruxxi yitara dandiitannota deˈinoonte. Insa, ‘Songote giddo noori mayitaekka?’ yite waajjitara dandiitanno. e Hakko daafira insa saalfattanno gede assannore xaˈma woy xissiisidhanno gede assannore coyiˈra qorophino. (1 Tes. 5:11) Insa ammanate roduuwankeeti. Insa ledo galagalle Yihowa magansiˈra hagiirsiissannonke!—Far. 119:176; Soq. 20:35.

19. Yesuusi reyo qaangummoro afiˈneemmo hoˈro maati?

¹⁹ Yesuusi diru kiiro reyosi qaagooshshe ayirrinseemmo gede hajajinonke daafira galanteemmosi; qoleno tenne assa hasiissannota ikkitinohu mayiraatiro anfoommo. Hatto assineemmoha ikkiro ninkeno wolootuno batinye doogganni hoˈro afiˈneemmo. (Isa. 48:17, 18) Yihowaranna Yesuusira noonke baxilli lexxanno. Insa assitinonkere lowo geeshsha naandeemmota leellinsheemmo. Ammanate roduuwinke ledo noonke jaaloomi kaajjanno. Qoleno wolootu Yesuusi wodonni hoˈro afiˈra dandiitanno gara rossanno gede kaaˈlineemmo. Hakko daafira baalunku diru giddo noohu lowo geeshsha baxxino barrira yaano Qaagooshshu Ayyaanira qixxaawate dandiinummore baala assino!