1. Manino ty Fahatiarova ro andro tena miavaky? (Lioka 22:19, 20)

 ANDRO tena miavaky amy vahoakin’i Jehovah ty Fahatiarova ty nahafatesan’i Kristy. Io avao ro fotoa nandidian’i Jesosy hoe tokony hankalazan’ny mpanori-dia azy. (Vakio Lioka 22:19, 20.) Misy antony maromaro mahavy antsika tea manatriky Fahatiarova, fa ty sisany amy raha rezay avao ro hodinihintsika.

2. Ino ty antony sisany mahavy antsika tea manatriky Fahatiarova?

² Manampy antsika ty Fahatiarova mba hametsivetsy hoe tena lafovily ty vilim-panavota. Mampitiaro antsika raha io hoe ino ty azontsika atao mba hampisehoa hoe mankasitraky ty soro nataon’i Jesosy tsika. (2 Kor. 5:14, 15) Afaky ‘mifampahery’ amy rahalahy noho anabavintsika reo koa tsika amy fotoa io. (Rom. 1:12) Maro amy rahalahy noho anabavy fa tsy mivory noho tsy mitory sasy rey ro avy manatriky Fahatiarova santao. Ty sisany aza manapa-kevitsy himpoly amy Jehovah mihintsy satria nirambesy soa. Maro koa ty lasa ta hianatsy Baiboly satria nisy vokany aminy ty raha nihitany noho nireny tany. Raha iaby rezay ro mahavy antsika tsy hanao ambanin-draha ty Fahatiarova.

3. Manino ty Fahatiarova ro mampiharo raiky antsika? (Henteo koa sary io.)

³ Tena teantsika koa ty manatriky Fahatiarova satria lasa tafiharo raiky amy rahalahy noho anabavintsika maneran-tany tsika amy andro io. Manatriky Fahatiarova ty Vavolombelon’i Jehovah maneran-tany amy andro io lafa milentiky ty masoandro. Maharè lahateny miresaky ty maha vatan-draha ty vilim-panavota tsika iaby lafa any. Manao hira roe hiderà an’i Jehovah noho Jesosy tsika, mampandalo mofo noho divay. Saky vita koa vavaky efatsy rey le mivola amy fo tsika hoe “amena.”  Samby hanao an’ny fankalazà io ty fiangona iaby anatin’ny 24 lera eo ho eo. Alao sary an-tsay moa ty hafalean’i Jehovah noho Jesosy lafa rozy mahita antsika iaby miaraky manome voninahitsy an-drozy amy fotoa io!

4. Ino ty hodinihintsika ato?

⁴ Akory ty hanomanantsika ty fontsika mba ho parè lafa avy ty Fahatiarova? Akory ty hanampeantsika ty olo hafa handramby soa baka amy raha io? Le ino ty azontsika atao mba hanampea an’ny rahalahy noho anabavintsika fa tsy mivory noho tsy mitory sasy rey? Handiniky an’ny fanontanea reo tsika ato, satria hanampy antsika ho parè amy fotoa miavaky io ty fahaiza ty valini-raha reo.

AKORY TY HANOMANANTSIKA TY FONTSIKA?

5. a) Manino tsika ro tokony hametsivetsy ty maha lafovily ty vilim-panavota? (Salamo 49:7, 8) b) Ino ty nianaranao baka amy video hoe Nanino Jesosy ro Nimaty?

⁵ Toy misy fomba raiky sady bevata azontsika anomana ty fontsika: Mametsivetsy hoe tena lafovily ty soro nataon’i Jesosy. Tsy ho vitantsika mihintsy ty hanavotsy ty vatantsika ho afaky amy ota noho fahafatesa. (Vakio Salamo 49:7, 8; henteo koa ty video hoe Nanino Jesosy ro Nimaty?) a Farany nanao fandahara Jehovah ka nirahiny Jesosy mba hanao soro ty ainy mba hanavota antsika. Samby nahafoy raha bevata zany Jehovah noho Jesosy. (Rom. 6:23) Vomaiky hankasitraky ty vilim-panavota tsika lafa mametsivetsy hoe ino ty raha nafoin’i Jehovah noho Jesosy ho antsika. Tena tsy mora tamin-drozy raha zay fe parè hanao ani-zay ho antsika rozy. Ndao moa hodinihintsika ty sisany amy raha nafoin-drozy ho antsika. Fe alohani-zay, hohenteantsika tse hoe ino ty atao hoe vilim-panavota?

6. Ino ty atao hoe vilim-panavota, le manino Jesosy ro nanome ani-raha io?

⁶ Ty hoe vilim-panavota le raha aloa mba hiviliana raha raiky fa niahinao avao taloha. Nana ay lavorary Adama tamin’ie vo niforony. Lafa nanota ie, le lasa tsy afaky niay mandrakizay. Fe tsy ie raiky avao fa ty taranakiny iaby koa. Ka mba hampimpolia ndraiky ani-raha nafoin’i Adama iny, le nanome ty ainy lavorary Jesosy mba hatao soro. “Tsy nanota” mihintsy Jesosy tamin’ie tan-tany etoy, “sady tsy nisy fitapitaky tam-bavany eo.” (1 Pet. 2:22) Mbo nana ay lavorary, mitovy tanteraky amy azy nafoin’i Adama iny avao Jesosy tamy fotoa nahafaty azy iny. Afaky nandoa ty vilin’ny ay nafoin’i Adama iny zany ie lafa nanao soro ty ainy.​—1 Kor. 15:45; 1 Tim. 2:6.

7. Ino ty sisany amy raha sarotsy natrehin’i Jesosy tamin’ie tan-tany etoy?

⁷ Nanoriky ty safàn’ny Babany an-danitsy any iny avao Jesosy tamin’ie tan-tany etoy, ndre nisarotsy aza ty nanao ani-zay. Tamin’ie mbo nikely, ohatsy, le nankatò ty ray aman-dreniny ie ndre tsy lavorary aza rozy. (Lioka 2:51) Lafa nipamaraky koa ie, le mety nisy olo nitao azy tsy hanoriky ty safàn’ny ray aman-dreniny na hivaliky amy Jehovah. Nila nanohitsy ani-zay ie. Lafa nibe amy zay ie, le tsy maintsy nanohitsy an’i Satana Devoly satria nitao azy mivanta mba hivaliky amy Ndranahary ie. (Mat. 4:1-11) Nataon’i Satana ze hahavy an’i Jesosy hanota, soa ie tsy hahavita handoa an’ny vilim-panavota iny.

8. Ino koa ty raha sarotsy niaretan’i Jesosy?

⁸ Mbo nisy raha sarotsy hafa koa natrehin’i Jesosy tamin’ie nanao ty fanompoany tan-tany etoy. Nanenjiky azy ty fahavalony ka nila fomba hamonoa azy. (Lioka 4:28, 29; 13:31) Tsy lavorary koa mpianatsiny rey ka nanao fahadisoa avao matetiky, le tsy maintsy niaritsy ani-zay Jesosy. (Mar. 9:33, 34) Lafa ie nitsarà  le nampijalijalỳ sady nalà baraka. Bakeo nivonoa manahaky mpamono olo rey ie ka tena nijalijaly. (Heb. 12:1-3) Tsy maintsy nizaka raiky ty fijaleany ie tamy fotoa namonoa azy io satria tsy niaro azy Jehovah. b​—Mat. 27:46.

9. Ino ty tsapanao lafa iha mandiniky ty soro nataon’i Jesosy? (1 Petera 1:8)

⁹ Hita hoe tena nijalijaly Jesosy vo afaky nandoa ty vilim-panavota. Ino ty tsapanao lafa mandiniky ani-zay? Tsy vomaiky tena tea an’i Jesosy va iha lafa hainao hoe niparè hahafoy raha maro ho antsika ie?​—Vakio 1 Petera 1:8.

10. Ino ty raha nafoin’i Jehovah mba hanomeza ty vilim-panavota?

¹⁰ Ka manao akory Jehovah? Ino ty nafoiny amy zay ho afaky hanome ty vilim-panavota Jesosy? Tena nifandramby am-po Jehovah noho Jesosy, manahaky baba noho anaky mifankatea io. (Ohab. 8:30) Mba eritsereto amy zay hoe nanao akory Jehovah lafa nahita an’i Jesosy nijalijaly. Azo antoky fa narary mihintsy ty fony nahita an’ny Anakilahiny io navakavahy, tsy nidarea, noho nampijalijalỳ.

11. Mety nanao akory Jehovah lafa nivonoa Jesosy? Hazavao amy ohatsy.

¹¹ Ty ray aman-dreny fa nimaty anaky ro tena mahatsapa hoe manao akory maty anaky zao. Marina fa tena mino tsika hoe mbo hovelomy ty maty, fe tsy maha afaky ty alahelo tsapantsika raha zay lafa maty ty olo teantsika. Hitantsika baka amy zay hoe mety ho nanao akory Jehovah lafa nahita an’ny Anakilahiny tsy foiny iny nijalijaly noho nimaty, tamy 14 Nisana tao 33 A.K. iny. c​—Mat. 3:17.

12. Ino ty azontsika atao zisiky hiavian’ny Fahatiarova?

¹² Zisiky hiavian’ny Fahatiarova, le miezaha hianatsy misimisy mikasiky ty vilim-panavota lafa manao fianara am-bata na fotoam-pivavahan’ny fianakavia. Ampiasao ty Fitaovana Fikarohana ho An’ny Vavolombelon’i Jehovah, na boky noho gazety miresaky misimisy mikasiky ty vilim-panavota. d Anovo azo antoky koa hoe manaraky an’ny fandahara famakia Baiboly amy Kahiem-pivoria ao iny iha. Lafa amy andron’ny Fahatiarova amy zay, le ka halino ty manenty an’ny fandahara manoka Fotoam-pivavaha Maray iny. Laha manoma ty fontsika tsika, le ho afaky hanampy ty olo hafa handramby soa baka amy Fahatiarova koa.​—Ezra 7:10.

 AMPEO TY OLO HAFA MBA HANDRAMBY SOA

13. Ino ty raha voalohany azontsika atao mba hanampea ty olo hafa handramby soa baka amy Fahatiarova?

¹³ Akory ty hanampeantsika ty olo hafa handramby soa baka amy Fahatiarova? Mazava ho azy fa mila asantsika tse rozy. Tsy ze olo hitantsika amy faritany eny avao ro asantsika fa azontsika atao koa ty manao lista ani-ze olo zatsy antsika. Anatini-zay, ohatsy, ty longontsika, ty mpiaraky miasa, mpiaraky mianatsy, noho ty olo hafa haintsika. Mety tsy ho ampy ty fanasà vita printy ananantsika, fe ndre zay le azontsika atao ty mizara amy endriky elektroniky. Ia ty mahay ndre ho maro biby ty olo ho avy!​—Mpito. 11:6.

14. Manomeza ohatsy mampiseho hoe tena misy heriny ty fanasà olo mivanta.

¹⁴ Tiarovo avao hoe tena misy heriny ty fanasà olo mivanta. Manambaly tsy Vavolombelo, ohatsy, ranabavy raiky zay. Nitseriky biby ie lafa nivola aminy valiny hoe hiaraky aminy hamonjy Fahatiarova. Fa manino? Satria fa nitao azy avao ie bakany zay, fe tsy niavy mihintsy ie. Ka ino ty nampiova hevitsy azy? Nivola ie hoe: “Nisy anti-panahy raiky haiko zay nanome fanasà ahy.” Tena niavy vatany ie. Mbo nanatriky Fahatiarova avao ie, tao maro tafara atoy.

15. Ino ty tokony hotiarovintsika lafa tsika manasa olo hanatriky Fahatiarova?

¹⁵ Tiarovo fa mety hanontanintany mikasiky Fahatiarova io olo asantsika rey, sirtò moa laha vo sambany mivory miaraky amintsika. Soa zany laha eritseretintsika sandrany ty fanontanea mety hapetrakin-drozy, le manoma valiny koa tsika. (Kol. 4:6) Mety hisy hanontany, ohatsy, hoe: ‘Ino ty raha atao amy fivoria zao any?’ ‘Firy lera raha io?’ ‘Ino ty akanjo andesy any?’ ‘Misy drala aloa va?’ ‘Misy rakitsy va?’ Lafa manasa olo hanatriky Fahatiarova tsika, le afaky anontaneantsika ie hoe: “Misy raha teanao hanontanea va?” Bakeo valeantsika fanontaneany iny. Azontsika atao koa ty mampiasa ty video hoe Tiarovo ty Nahafatesani-Jesosy noho ty hoe Ino ty Raha Atao amy Efitrano Fanjakà Any? Ho hain’olo iny amy zay hoe manao akory ty fandehan’ny fivoriantsika. Mbo misy hevitsy soa azontsika resahy aminy koa amy fianara  28, amy boky Ho Azonao Tavy ty Fiaina Zisiky Farany!

16. Ino koa ty fanontanea mety hapetrakin’olo lafa baka nanatriky Fahatiarova rozy?

¹⁶ Mety mbo hametraky fanontanea hafa koa olo vaovao rey lafa vita Fahatiarova iny. Mety hanontany, ohatsy, rozy hoe nanino ro tsy misy mihina mofo noho divay rey, na hoe nanino ro vitsivitsy avao ty olo nihina noho nino tamy raha rey. Mety hanontany koa rozy hoe saky ombia moa Fahatiarova io ro ankalazà. Mety hanontany mihintsy aza rozy hoe manahaky an’iny avao va ty ataontsika saky mivory. Marina fa niresahy tamy lahateny Fahatiarova iny ty ankamaroan’ny hevitsy reo, fe mety mbo ta hahay misimisy mikasiky ani-raha reo avao ty olo vaovao. Afaky manampy antsika hamaly ty sisany amy fanontanean-ndrozy ty lahatsoratsy amy jw.org ao hoe “Nahoana no Tsy Mitovy Amin’ny An’ny Fivavahana Hafa ny Fomba Ankalazan’ny Vavolombelon’i Jehovah ny Sakafo Harivan’ny Tompo?” Teantsika ty hanao ze azontsika atao mba hanampea ani-ze olo ‘mana fo soa’ mba handramby soa amy fankalazà io, ndre alohan’ny Fahatiarova zay, ndre amy fotoan’ny Fahatiarova iny, noho afaran’ny Fahatiarova iny.​—Asa. 13:48.

AMPEO ZE FA TSY MITORY SASY

17. Ino ty azon’ny anti-panahy atao mba hanampea ty olo fa tsy mivory noho tsy mitory sasy? (Ezekiela 34:12, 16)

¹⁷ Ino ty azon’ny anti-panahy atao amy vanim-potoan’ny Fahatiarova iny mba hanampea ty olo fa tsy mivory noho tsy mitory sasy? Asehò an-drozy hoe midary an-drozy iha. (Vakio Ezekiela 34:12, 16.) Miezaha hikaiky an-drozy alohan’ny Fahatiarova iny. Ameo toky rozy hoe teanao ka ta hanao ze azonao atao iha mba hanampea an-drozy. Asao hanatriky Fahatiarova rozy. Rambeso soa rozy laha avy any. Miezaha avao hamangivangy na hikaiky an’ny rahalahy noho anabavintsika rey ndre lafa vita aza Fahatiarova iny, le ampeo himpoly amy Jehovah rozy.​—1 Pet. 2:25.

18. Ino ty azontsika iaby atao mba hanampea ani-ze olo fa tsy mivory noho tsy mitory sasy? (Romanina 12:10)

¹⁸ Samby afaky manampy ty olo fa tsy mivory noho tsy mitory sasy ty olo iaby amy  fiangona eo mba hahafahan-drozy manatriky Fahatiarova. Amy fomba akory? Ho afaky hanampy an-drozy iha laha tea an-drozy, soa fanahy amin-drozy, sady manaja an-drozy. (Vakio Romanina 12:10.) Tiarovo fa mety ho sarotsy amy rahalahy malalantsika rey ty ho avy hivory ndraiky. Mety hatahotsy rozy hoe mba handramby soa an-drozy avao va ty olo amy fiangona eo. e Ka mametraky fanontanea mety hahamenatsy an-drozy zany, na mivola raha mety hampalahelo an-drozy. (1 Tes. 5:11) Mpiara-manompo amintsika rozy. Falifaly tsika lafa tafaraky amintsika ndraiky rozy!​—Sal. 119:176; Asa. 20:35.

19. Ino ty soa azontsika lafa tsika mahatiaro ty nahafatesan’i Jesosy?

¹⁹ Falifaly tsika fa nivolanin’i Jesosy mba hahatiaro ty nahafatesany santao, sady haintsika hoe tena vatan-draha raha io. Laha manatriky Fahatiarova tsika, le maro ty soa ho azontsika. Tsy tsika avao fa ty olo hafa koa. (Isaia 48:17, 18) Vomaiky hitombo ty fitiavantsika an’i Jehovah noho Jesosy. Asehontsika koa hoe tena ankasitrahantsika ty raha nataon-drozy ho antsika. Lasa hifandramby soa amy rahalahy noho anabavintsika reo mihintsy aza tsika. Tsy zay avao fa mety hanampy ty olo hafa koa tsika mba hahay hoe ino ty azon-drozy atao mba hahavy an-drozy hahazo ty fitahia azo baka amy vilim-panavota. Enga anè tsika iaby mba hanao ze azontsika atao mba ho parè amy andro raiky tena miavaky amy tao toy io, tsy ino zay fa ty Fahatiarova!