1. Ladjikɛnge lofu lɔ Bokfɔ oyɛwɔ lofu loleka djonyi l’ɔnɔnyi? (Luka 22:19, 20)

 LE ENKAMBI wɛ Yehova, lofu lɔ Bokfɔ djɛ nyɔyi kɛ Kristo lolekɔ lofu loleka djonyi l’ɔnɔnyi. Bokfɔ alekɔ ɛtɔyi kɛ nkambo kɛ Yeso ndakɔkɔmɛ ambeki wande dj’iwɔ mbokfɔka. (Wala Luka 22:19, 20.) Tongokongake Bokfɔ l’oloko lukuluku m’ɔtɛ wɔ donga efula. Nyontshɔ tokoshishima mɔtshi.

2. Donga mɔtshi djɛkɔnge dj’okongelakaso Bokfɔ l’oloko lukuluku?

² Bokfɔ ntokotshɛ́ka djɛ ntɔnɔla lá ntsho djɛ oshinga wɔ mbendo. Ntovungolaka topo t’okokaso nyɛnyɛ djedjɛ tá olambo wɔ Yeso. (2 Kɔ. 5:14, 15) Ntɔpɛyɛka lonkina mbamba k’iso ‘nkembɛna’ la wananyɔ l’ankaana yɛso. (Ɔrɔ. 1:12) Ɛnɔnyi enkfumɔ, anto efula wambɔhɔla lá nyuma ndjingelaka lá Bokfɔ. Amɔtshi wangotshindamake kaanga djɛ nkalɔ te Yehova mande waalongolaka l’osasa w’efula. La koko anto efula wayapɛyɛ lá nsɔsɔlɔ, wangotshindamake djɛ mbanga ndjeka Bible má kɛnɛ k’ɛnawɔ la k’okawɔ. Djɛkondeke Bokfɔ oyɛwɔ la ntshina efula leso!

3. Wopo wɔkɔnge Bokfɔ okotshɛ́kande djɛ ndjila l’osanga nkfumbo kɛ wananyɔ l’ankaana yɛso l’andja w’otondo? (Lenda edjinge ntshango.)

³ Tokokanela lonkina wopo wɔ Bokfɔ okotshɛ́kande djɛ ndjila l’osanga nkfumbo kɛ wananyɔ l’ankaana kel’andja w’otondo. Ewakɛ wɛ Yehova wangosanghanake l’andja w’otondo winá wɔ winá yotadjimbe ndambo ndambo. Isankfumɔ ndjekameyɛka djamba mpika nghɔmɔ ɛnsɔsɔ lá djonyi dj’oshinga wɔ mbendo. Ntshumbaka teembo tope tɔ numɛ Ndjambe, mpeetshɛ́ka mampa la vinyɔ, la ndjawolaka ente “amɛ” lá ndɔmbɔ inɛyi yɛkɔ. Lá lɛdji lɔ winá wɛ ntango etengo 24, ntshumano nkfumɔ dj’andja w’otondo nanghaka ngo wopo wɔkɔ ɔmɔ. Okoka nkanela wopo  wɔ Yehova la Yeso oyalakawɔ l’osasa winá w’ɔtɛnawɔ tombotshumana l’andja w’otondo djɛ ndaapɛyɛ lomo lá lɛdji lɔsɔ?

4. Kɛkɔnge k’otepelaso lɔ lá djamba djɛnɛ?

⁴ Lá djamba djɛnɛ, tongokadjimola weepó wɛnɛ: Wopo wɔkɔnge w’okokaso ndɔngɔsɔla eloko wɛso lá nkambo djɛ Bokfɔ? Wopo wɔkɔnge w’okokaso nkotshɛ́ anto ankina dj’iwɔ mba wapɔ má Bokfɔ? Wopo wɔkɔnge w’okokaso nkotshɛ́ waambɔhɔla lá nyuma? Ndjɔndɔ yɛ weepó wɛnɛ ingotokotshɛ djɛ ndjala entshupa lá nkambo djɛ lofu l’ekina lɔsɔ.

WOPO WƆKƆNGE W’OKOKASO NDƆNGƆSƆLA ELOKO WƐSO LÁ NKAMBO DJƐ BOKFƆ?

5. a) Lamo oyɛso ladjɛ ntɔnɔla lá ntsho dj’oshinga wɔ mbendo? (Yeembo 49:7, 8) b) Olakanyelo wɔkɔnge wɔ ngombowa má video: Lande na kakavu Yeso?

⁵ Wopo ɔmɔtshi wɔ djonyi w’okokaso ndɔngɔsɔla eloko wɛso lá nkambo djɛ Bokfɔ nde má ntɔnɔla lá ntsho djɛ oshinga wɔ mbendo w’olambo wɔ Yeso Kristo. Lako kaanga ekete k’okokaso nangha má wolo wɔso sɔmɛlɛ djɛ ntshungɔ má mpekanto la nyɔyi. (Wala Yeembo 49:7, 8; lenda lonkina video: Pourquoi Jésus est-il mort ?) a Djɛkondeke, Yehova alonghanyɛka djɛ Yeso mpɛyɛ lowiko lɔnde djɛ ntotshungola. Ɔsɔ ayalaka oshinga w’ekekete efula wɔ yafute. (Ɔrɔ. 6:23) Winá wɔ sotaleke ntɔnɔla lá kɛnɛ kɛ Yehova nya Yeso yoyasambɛ lá nkambo djɛso, ndeke songoleka ndjala la djedjɛ t’oshinga wɔ mbendo. Tokoshishimá ngo akambo amangha toko walekisá nkɔta Yehova la Yeso má ofutelo w’oshinga wɔ mbendo. Koko ntondontondo, tokokadjimola lá woopó wɔnɛ: Kɛkɔnge kesakisola oshinga wɔ mbendo?

6. Oye oshinga wɔ mbendo?

⁶ Oshinga wɔ mbendo nde oshinga w’ofutama djɛ ntshungola ekete kɛmɔtshi. Winá wɔ ndatongama, Adama mpame kɛ ntondo, ayalaki djɔ. Winá wɔ ndananghe mpekanto, nde atshutshɛka nkongi djɛ lowiko l’etshinda, ape ngo le nde nyɔmɛlɛ toko, koko ole le wana wande ankfumɔ. Djɛ ntshungola kɛnɛ kɛ Adama ndatshutshɛ, Yeso apɛyɛka lowiko lɔnde lɔ djɔ etengo olambo. L’ilá kɛ lowiko lɔnde lanɛ lá looko, Yeso ‘atanangha mpekanto, la ongolo wotatanema l’ɔlɔmɔ wɔnde.’ (1 Pɛ. 2:22) Lá winá wɔ nyɔyi kɛ Yeso, lowiko lɔnde lɔ djɔ lɛlamaka ngo djɔ la lowiko lotshutshisá Adama.​—1 Kɔ. 15:45; 1 Ti. 2:6.

7. Ehemba ɛmɔtshi wɛkɔnge wepomanisá la Yeso winá wɔ ndayalaka lá looko?

⁷ Yeso alɛmɛyɛka Papa kɛnde kel’olongo lá lɛdji lɔ djɔ kaanga l’anteyi k’ehemba wɛ ndapomana lanɛ lá looko. Winá wɔ ndayalaka ilɛngɛ, Yeso ayalaka la ntshunamo te ambotshi wande wa ntshamba djɛ djɔ, kaanga nde ndayalaka djɔ. (Luka 2:51) Winá wɔ ndakome olangala, nde ayalaka la djonyi djɛ mpikama lá ntondo kɛ anto wakokisá ndoodjimbola djɛ nde mpendola ambotshi wande kana nsamba nkɔmano te Yehova. Edjinge winá wɔ ndakome ekokolo, Yeso ayalaka ladjɛ mpikama la ntondo k’ehemba wɛ Satana Djabolo, ndjila ole kɛnɛ kɛ ndooshimela dj’ipa nde ndjala la nkɔmano te Yehova. (Mat. 4:1-11) Satana ananghaka lá wolo onkfumɔ djɛ nkfɛyɛ Yeso lá mpekanto dj’ipa nde ndjala l’akoka wa mfuta oshinga wɔ mbendo.

8. Ehemba enkina wɛkɔnge wɛ Yeso ndakfulumeyɛ?

⁸ L’ilá k’olemo wɔnde lanɛ lá looko, Yeso akfulumeyɛka ehemba efula. Antonyi wande wɔwɛnyɛka ndjolo la wowanaki djɛ ndooyaka. (Luka 4:28, 29; 13:31) Nde ayalaka ladjɛ nkfulumeyɛ evunga w’ambeki wande. (Mar. 9:33, 34) Winá wɔ yolomboyɛ, wɔwɛnyɛka ndjolo, la wonanghaka efula. Manyi, avɔka nyɔyi kɛ nsɔnyi la kɛ ndjolo efula. (Heb. 12:1-3) Nde ayalaka  ladjɛ nkfulumeyɛ etenyi k’ekomo k’ohemba wɔnde ngo má wolo wɔnde nyɔmɛlɛ, ipa l’elamelo kɛ Yehova. b​—Mat. 27:46.

9. Sokaka ngete mo winá w’ɔtɔnɔlaso l’olambo wɔ Yeso? (1 Pɛtɛlɔ 1:8)

⁹ Ndjokamaka papoo ente Yeso ɛnaka ndjolo efula djɛ nde mfuta oshinga wɔ mbendo. Topakoke ndjala la ngandji k’efula te Yeso winá w’ɔtɔnɔlaso lá wopo wɔ ndoyalambola la ndayale entshupa djɛ ndjawola akambo ankfumɔ wasɔ lá wapɔ waso?​—Wala 1 Pɛtɛlɔ 1:8.

10. Oshinga w’ekekete wɔkɔnge Yehova ndafute m’ɔtɛ w’oshinga wɔ mbendo?

¹⁰ Iya otepelaso mo lá nkambo djɛ Yehova? Kɛkɔnge kɛ ndayale entshupa djɛ ndambola djɛ Yeso mfuta oshinga wɔ mbendo? Yehova nya Yeso wayalaki la djokanelo djɛ ma ma efula etengo djokanelo djalaká l’antenyɛ papa nya wɔna. (Woo. 8:30) Tokokanela yɛnyi y’okisá Yehova, winá wɔ ndɛnaka Yeso akfulumeyɛ ehemba lanɛ lá looko. Ape l’ehamo, Yehova okaka bale djodjo winá wɔ ndɛnaka wɛnyɛ Wɔnande ndjolo, w’otona la w’ohemba.

11. Kɔpɛyɛ ndjɔmbɔmba k’ɛnyɛ wopo wɔ Yehova ndoke winá wɔ Yeso ndayakema.

¹¹ Ombotshi onkfumɔ w’ombovusɛ wɔna, ndjewaka wɔlɔwɔlɔ ante mvusɛ wɔna ndjakalaka yɛnyi y’efula. Tolekɔ la djawo djɛ wolo lá daka dj’ekfundwelo, koko kɛsɔ kepimɛka yɛnyi y’efula yɛ sokaka l’oloko winá w’ovusɛso onto wɔ ngandji. Ndjɔmbɔmba kɛsɔ ketokotshɛ́ djɛ nsipisoyɛ, wopo wɔ Yehova ndoke winá wɔ ndɛnaka, Wɔnande wɔ ngandji ɛna ndjolo lofu lɔ yoyake lá 33 D.D. c​—Mat. 3:17.

12. Kɛkɔnge k’okokaso nangha lá ntondo kɛ Bokfɔ?

¹² Má winá wɔsɔ tii lofu lɔ Bokfɔ, lamo ngopalonghanyɛ djɛ ndjeka akambo efula walendana l’oshinga wɔ mbendo lá wekelo wɔko w’onto nyɔmɛlɛ kana l’Ɔtɛmwɛlɔ wɔ Nkfumbo? Kamba la Dibuku di’eyangelo di’Ɛmɛnyi wa Jehowa (ntsha dekɔ l’otepala wɔnyo) kana la mpeko nkina djɛ wekelo wɔ Bible djɛ ntshimola akambo walendana l’oshinga wɔ mbendo. d Lonkina, nangha la wolo djɛ ndɔnda nonghanyi kɛ badji djɛ Bible kelendana la Bokfɔ kelekɔ́ lá Nkishi djɛ losanghanyɛ, lowiko edjinge olemo wɔso w’Okristo. Edjinge lofu lɔ Bokfɔ, tovungɛke ndenda nonghanyi kɛ Ɔtɛmwɛlɔ wɔ Nkɛsɛ w’otshikitanyi. Ntsha tɔmbɔlɔngɔsɔla eloko wɛso lá nkambo djɛ Bokfɔ, tongoyala l’akoka wa nkotshɛ́ anto ankina dj’iwɔ mba wapɔ ole iwɔ.​—Ɛzr. 7:10.

 KOTSHƐ́ ANTO ANKINA DJ’IWƆ MBA WAPƆ

13. Yopo yɛ ntondo yɛkɔnge y’okokaso nkotshɛ́ anto ankina dj’iwɔ mba wapɔ má Bokfɔ?

¹³ Wopo wɔkɔnge w’okokaso nkotshɛ́ anto ankina dj’iwɔ mba wapɔ má Bokfɔ? Lá nsɔsɔlɔ, yopo yɛ ntondo nde, ndaaweta. Lá djiko djɛ nsawola l’anto w’osawolakaso lawɔ mbala la mbala l’olemo w’ipoposanyɛ, tokoka nangha listɛ lɔ anto w’okokaso ndjeta. Lá listɛ lɔsɔ, tokoka ndjila wiina wa boto djɛso, ambayi yɛso y’olemo, yɛ nkalasa, l’anto ankina. Kaanga ntsha topalekɔ l’akishi wa leeta efula, tokoka ndatomela nkishi djɛ leeta djelá ɛntɛrnɛtɛ. Tokoka nkamɔ lofulo l’anto wakoka ndɔsa nkano djɛ ndjɛ!​—Los. 11:6.

14. Kɔpɛyɛ ndjɔmbɔmba k’ɛnyɛ ente mpɛyɛ onto leeta alekɔ la ntshina efula.

¹⁴ Totavungɛke eposelo wekoka ndjala winá w’ɔpɛyɛso onto nkishi djɛ leeta. Lofu lɔmɔtshi, nkaana kɛmɔtshi kewikaki lá nkfumbo kembokapolana lá wayi w’ɔtɛmwɛlɔ, akamɔka efula winá wɔ womɛnde ndoshimela l’osasa onkfumɔ ante ayalonghanyɛ djɛ ntshɔ nya nde tá Bokfɔ. Ndakamɔ lamo? Ladjikɛnde mbala efula l’etsho w’emboheta, ɔlɔmbaki djɛ nde nsanghana nya nde lá Bokfɔ, koko atakɔpaki kaanga ndambo. Iya kɛkɔnge ketshikitanisá mbala kɛsɔ? Womɛ nkaana kɛsɔ atepela ante: “Wampɛyɛka nkishi djɛ leeta.” Apakisola ante ikokolo imɔtshi yewanaki nya nde, owetaka. Womɛ nkaana kɛso kɛsɔ ingelaka ɔnɔnyi wɔsɔ edjinge ɛnɔnyi enkina efula m’ɔkɔngɔ wɔ lasɔ.

15. Kɛkɔnge k’oyɛso ladjɛ nama lá yimba winá w’etaso anto lá Bokfɔ?

¹⁵ Tewe ente anto wetaso wakoka ndjala la weepó efula, pekapeka ntsha watingelaká ntondo lá nsanghanyɛ yɛso. Angoyala wɔlɔ iso ntɔnɔla ntondo lá weepó wɛwɔ la ndálɔngɔsɔla djɛ ndakadjimola. (Kɔl. 4:6) Ndjɔmbɔmba, amɔtshi nkoka ndáwopola ambɔ: ‘Kɛkɔnge kehetaka lá Bokfɔ?’ ‘Onanghemakawɔ winá emangha?’ ‘Okokami ndɔta wopo wɔkɔnge?’ ‘Wangofutake mfalanga djɛ ndjingela?’ ‘Wangɔwɛkake ɛwɛkɔ l’eteyi?’ Winá w’etaso onto lá Bokfɔ tokoka ndowopola ente: “Olekɔ la nkambo mɔtshi djɛ ndjopola?” ko masɔ, ndokadjimola lá woopó onkfumɔ w’okokande ndjopola. Tokoka lonkina ndawɛnyɛ video: Tovungɔke  nyɔyi kɛ Yeso la video: Onanghakawɔ lá Mvulu k’Onkfumi nke? djɛ ndaakotshɛ́ dj’iwɔ nsipisoyɛ wopo wɔ nsanghanyɛ yɛso ohetakawɔ. La wekelo wɔ 28 w’onkanda Sasanga la lowiko lotshinda lotshinda! nkoka ntɔpɛyɛ tokanyi tɔ wɔlɔ efula t’okokaso nkapana l’anto.

16. Weepó enkina wɛkɔnge wekoka anto wambingelá lá Bokfɔ ndjopola?

¹⁶ Anto efula wamboyapɛyɛ́ lá nsɔsɔlɔ bango, nkoka ndjala la weepó enkina m’ɔkɔngɔ w’iwɔ ndjingela lá Bokfɔ. Wakoka ndjopola lamo ngo anto ndambo daambi (kana lako onto) ndeke lɔlɛka mampa la vinyɔ. Wakoka ndjopola lonkina mbala imangha onanghakaso Bokfɔ l’ɔnɔnyi. La wakoka nkombola ndjewa ntsha nsanghanyɛ inkfumɔ yɛ Ewake wɛ Yehova onanghemakawɔ ngo wopo wɔkɔ ɔmɔ. Kaanga efula kɛ weepó wɛsɔ okokawɔ nkadjimɔma lá djamba djɛ Bokfɔ, waangoyɛ bango nkoka ndjala la djonyi djɛ ndapakisola akambo ankfumɔ wasɔ wɔlɔwɔlɔ. Djamba djelá jw.org: “Pourquoi les Témoins de Jéhovah célèbrent-ils le Repas du Seigneur différemment des autres religions ?” nkoka ntokotshɛ́ djɛ nkadjimola weepó wɛwɔ ɛmɔtshi. Iso nkombolaka nangha kenkfumɔ k’okokaso nangha, lá ntondo, lá winá kana m’ɔkɔngɔ wɔ Bokfɔ, djɛ nkotshɛ́ anto ‘walekɔ́ entshupa’ dj’iwɔ mba wapɔ má ndjingela lá Bokfɔ.​—Ele. 13:48.

KOTSHƐ́ WAAMBƆHƆLA LÁ NYUMA

17. Wopo wɔkɔnge tokokolo okokawɔ nkotshɛ́ waambɔhɔla lá nyuma? (Ezekiyɛlɛ 34:12, 16)

¹⁷ L’eleko kɛ Bokfɔ, wopo wɔkɔnge tokokolo okokawɔ nkotshɛ́ waambɔhɔla lá nyuma? Nyawɛnyɛ ente nyongawilake yimba. (Ezekiyɛlɛ 34:12, 16.) Lá ntondo kɛ Bokfɔ, nyoyashikikɛ djɛ ndjeta anto efula w’okokanyo ndjala l’akoka wa ndjeta. Nyashikikɛ ente nyongakɔpake la nyokombola ndaakotshɛ́ lá lɛdji lonkfumɔ l’okokanyo. Nyawete djɛ ndingela lá Bokfɔ. Ntsha wamboyɛ, nyalongole l’osasango. M’ɔkɔngɔ wɔ Bokfɔ, nyokindjɛ mbembola la ndjeta wananyɔ l’ankaana yɛ ngandji yɛsɔ, la nyapɛyɛ okotshɔ onkfumɔ wɔ nyuma w’oyɛwɔ la djonyi djɛ nkalɔ le Yehova.​—1 Pɛ. 2:25.

18. Wopo wɔkɔnge w’okokaso nkotshɛ́ isankfumɔ waambɔhɔla lá nyuma? (Ɔrɔma 12:10)

¹⁸ Anto ankfumɔ w’otshumano nkoka nkotshɛ́ waambɔhɔla lá nyuma dj’iwɔ ndjɛ lá Bokfɔ.  Lá wopo wɔkɔnge? Má ndawɔsa la dilɛmɛlɔ, l’oloko wɔlɔ ole la ngandji. (Wala Ɔrɔma 12:10.) Tovungɔ ente ɛnkɔkɔ wɛ ngandji wɛsɔ nkoka nkakanda djɛ nkalɔ lá nsanghanyɛ. Mbala imɔtshi wokaki wɔma ambɔ wapangolongwama wɔlɔ. e Djɛkondeke towadjɛ dj’ipa ndawopola weepó w’ekoka ndaapɛyɛ nsɔnyi kana ntepela etepela wekoka ndaakɔta. (1 Te. 5:11) Wananyɔ l’ankaana yɛsɔ oyɛwɔ nde winaso andjawodji. Tolekɔ l’osasa ndakapɔnda wɔ ntɛmɔla lawɔ lonkina!​—Yee. 119:176; Ele. 20:35.

19. Wapɔ wɛkɔnge weyɛka má mvungɔ nyɔyi kɛ Yeso?

¹⁹ Tolekɔ la djedjɛ efula lá wopo wɔ Yeso ndatoshimela djɛ mvungɔka nyɔyi kɛnde ɛnɔnyi enkfumɔ la tosipisoyɛ lamo nkambo djɛsɔ oyɛwɔ djonyi. Winá w’onanghaso nghɔsɔ, iso isɔmɛlɛ l’anto ankina mbaka wapɔ lá topo efula. (Iza. 48:17, 18) Ngandji kɛso te Yehova la te Yeso kengofula. Tɔngɛnyɛ ente tolekɔ la djedjɛ efula tá kɛnɛ kɛ yatonanghela. Tongetela nkembɛ djokanelo djɛso la winaso andjawodji. La tokoka nkotshɛ́ anto ankina djɛ ndjewa wopo w’okokawɔ nsasanga ole iwɔ, l’esako w’eyɛka má oshinga wɔ mbendo. Djɛkondeke, nyontshɔ tonanghe kenkfumɔ k’okokaso nangha, djɛ ndjala entshupa lá nkambo djɛ Bokfɔ dj’ɔnɔnyi wɔnɛ, ntepela ente lofu loleka djonyi l’ɔnɔnyi!