1. Faandi mbei di daka di u ta mëni di dëdë u Jesosi, da di möön gaan daka u di jaa? (Lukasi 22:19, 20)

 DI DAKA di dee sëmbë u Jehovah ta mëni di dëdë u Jesosi, da di möön gaan daka u di jaa da de. Di daka dë nöö da di wan kodo daka di Jesosi piki dee bakama fëën u de ta mëni. (Lesi Lukasi 22:19, 20). Sömëni soni dë di mbei u ta wakiti u di daka dë dou. Boo luku andi da wantu u dee soni dë.

2. Faandi mbei u ta wakiti u di daka dou ka u ta mëni di dëdë u Jesosi?

² Di mëni di u ta mëni di dëdë u Jesosi ta heepi u fuu ta mëni fa di lusupaima bigi tjika. A ta heepi u fuu ta mëni unfa u sa lei taa u ta tei di dëdë di Jesosi ko dëdë da u u bigi (2 Kol. 5:14, 15). A ta da u pasi tu fuu ku dee baaa ku dee sisa fuu sa „miti fuu da u seei taanga” (Lom. 1:12). Hiniwan jaa sömëni baaa ku sisa di an bi ta ko a komakandi möön, ta ko mëni di dëdë u Jesosi ku u. So u de ta bia ko dini Jehovah baka te de si fa dee baaa ku dee sisa ta wai ku de. Boiti di dë, dee soni dee sömëni sëmbë ta si ku dee de ta jei a di komakandi dë, ta mbei taa de ta bigi waka a di pasi di ta tja sëmbë go a teego libi. Wë u hii dee soni aki mbei u ta tei di mëni di u ta mëni di dëdë u Jesosi u bigi!

3. Unfa di mëni di u ta mëni di dëdë u Jesosi, ta mbei u ku dee baaa ku dee sisa fuu ta du soni makandi a hii së u goonliba? (Luku di peentje tu.)

³ Kai pakisei a di fa u ku dee baaa ku dee sisa fuu u hii së u goonliba ta du soni makandi, te u ta mëni di dëdë u Jesosi. Dee Jehovah Kotoigi ta ko makandi a hii së u goonliba. Hii u tuu ta haika wan taki di ta lei u unfa di lusupaima dë fanöudu tjika. U ta kanda tu kanda u gafa Jehovah, u ta tja di bëëë ku di win pasa, söseei u ta taki „amen” ku hii u hati a dee fö pasi  dee u ta begi a di komakandi dë. Hii dee kemeente fuu tuu ta du dee seei soni a di daka dë. Pakisei luku unfa Jehovah ku Jesosi ta wai tjika, te de ta si fa u ta gafa de makandi a hii së u goonliba.

4. Andi woo luku a di woto aki?

⁴ Woo luku dee soni aki a di woto aki: Unfa u sa seeka u hati da di mëni di u ta mëni di dëdë u Jesosi? Unfa u sa heepi wotowan u de feni wini fëën? Unfa u sa heepi dee baaa ku dee sisa dee an ta peleiki möön? Dee piki u dee hakisi aki o heepi u fuu sa dë seekaseeka da di apaiti daka dë.

UNFA U SA SEEKA U HATI DA DI MËNI DI WOO MËNI DI DËDË U JESOSI?

5. (a) Faandi mbei u musu ta kai pakisei a di fasi fa di lusupaima dë fanöudu tjika? (Psalöm 49:7, 8) (b) Andi i lei a di fëlön Faandi mbei Jesosi dëdë?

⁵ Wan u dee möön bunu fasi fa u sa seeka u hati da di mëni di woo mëni di dëdë u Jesosi, da te u ta kai pakisei a di fasi fa di lusupaima u Jesosi dë fanöudu tjika. Nöiti seei u bi o sa puu useei a zöndu ku dëdë basu. (Lesi Psalöm 49:7, 8; luku di fëlön Faandi mbei Jesosi dëdë?) a Fëën mbei Jehovah ku Jesosi bi du wan gaan soni da u. Jehovah bi seeka soni u di Womi Mii fëën bi sa ko dëdë da u (Lom. 6:23). Möön u ta kai pakisei a di soni di Jehovah ku Jesosi du da u, möön woo ta tei di lusupaima u bigi. Woo taki u wantu u dee gaan soni dee Jehovah ku Jesosi bi du u de bi sa paka di lusupaima da u. Ma boo luku fosu andi da di lusupaima, söseei faandi mbei Jesosi bi musu pakëën.

6. Andi da di lusupaima, nöö faandi mbei Jesosi bi musu pakëën?

⁶ Wan lusupaima da wan paima di i ta paka u bai wan soni baka. Adam, di fosu womi di Gadu bi mbei bi dë söndö föutu. Di a du zöndu, hën hën ku dee bakamii fëën tuu lasi di okasi di de bi abi u libi u teego. U di Jesosi bi kë u libisëmbë toona feni di soni di Adam bi lasi, mbei a bi ko dëdë paka paima da u. Di Jesosi bi dë a goonliba aki ’an bi du na wan hogi’ soni, söseei ’an bi taki ganjanganjan soni’ wan daka (1 Pet. 2:22). Di Jesosi dëdë, nöö a bi dë söndö föutu, leti kumafa Adam seei bi dë söndö föutu ufö a du zöndu. Fëën mbei Jesosi bi sa dëdë paka da u fuu sa feni di libi di Adam bi lasi.​—1 Kol. 15:45; 1 Tim. 2:6.

7. Andi da wantu u dee tesi dee bi miti Jesosi di a bi dë a goonliba aki?

⁷ Sömëni tesi bi miti Jesosi di a bi dë a goonliba aki, ma tökuseei hii juu a bi ta piki Jehovah buka a soni. Jesosi bi dë söndö föutu di a bi dë miii, ma tökuseei a bi musu ta saka hënseei nëën mama ku hën tata basu, hii fa de de bi dë zöndu libisëmbë (Luk. 2:51). Di a bi dë wan njönku kijoo, nöö a bi musu ta duwengi hënseei u sëmbë an mbei a pasa Gadu ku dee gaansëmbë fëën buka. Nöö di a bi ko dë gaangaan sëmbë, a bi musu ta hoi hënseei u Saatan an mbei a pasa Gadu buka, hii fa wan pasi Saatan bi ko nëën ko poobëën (Mat. 4:1-11). Saatan bi ta mbei hii möiti u mbei Jesosi du zöndu, sö taa Jesosi an bi sa paka di lusupaima.

8. Un woto tesi bi miti Jesosi?

⁸ Woto tesi bi miti Jesosi, di a bi ta du di diniwooko fëën a goonliba aki. Sëmbë bi ta du ku ën, söseei de bi ta suku u kii ën (Luk. 4:28, 29; 13:31). A bi musu ta libi ku dee bakama fëën hii fa de bi ta mbei föutu (Maik. 9:33, 34). Di de bi tjëën go a kuutu, de bi ta mbei ën fa ta du hogihati soni ku ën. Baka di dë, hën de kii ën a wan hogihati fasi (Heb. 12:1-3). A bi musu tja di lasiti pisi u di tesi  fëën hën wanwan, söndö u Jehovah heepi ën. b​—Mat. 27:46.

9. Unfa di lusupaima di Jesosi ko paka da u ta mbei u ta fii? (1 Petuisi 1:8)

⁹ A dë gbelingbelin u si taa Jesosi bi tja sitaafu gaanfa seei faa bi sa paka di lusupaima da u. Te u pakisei fa a bi dë kabakaba u tja sitaafu da u tjika, nöö di soni dë ta mbei u ko möön lobi ën.​—Lesi 1 Petuisi 1:8.

10. Andi Jehovah bi dë kabakaba u du sö taa Jesosi bi sa paka di lusupaima da u?

¹⁰ Andi Jehovah bi dë kabakaba u du, sö taa Jesosi bi sa paka di lusupaima da u? Jehovah ku Jesosi da tata ku miii, nöö de lobi deseei ka wan tata ku wan mii sa lobi deseei dou (Nöng. 8:30). Wë nöö pakisei fa Jehovah bi ta fii, di a bi ta si fa sömëni tesi bi ta miti Jesosi di a bi dë a goonliba aki. A musu u dë sö taa Jehovah bi ta tjali gaanfa seei di a bi ta si fa sëmbë bi ta libi hogi ku di Womi Mii fëën, fa sëmbë bi ta bia baka dëën, söseei fa a bi ta tja sitaafu.

11. Konda wan woto u lei unfa Jehovah bi ta fii di de kii Jesosi.

¹¹ Hii dee sëmbë dee miii u de lasi libi sabi unfa di soni dë hati tjika. U ta biibi tuutuu taa Gadu o weki dee sëmbë dee dëdë ko a libi baka, ma di soni dë an ta puu taa an ta hati u te wan sëmbë fuu lasi libi. Di woto aki ta heepi u fuu fusutan unfa Jehovah bi ta fii di a bi ta si fa di Womi Mii fëën bi ta tja sitaafu u tefa a dëdë a di jaa 33 baka Keesitu. c​—Mat. 3:17.

12. Andi u sa du ufö di daka di woo mëni di dëdë u Jesosi dou?

¹² I sa du wan soni nöunöu kaa, ufö di daka di woo mëni di dë u Jesosi dou. Kandë i sa lei soni di nama ku di lusupaima te joo lei soni u Bëibel, nasö kandë i ku dee sëmbë fii sa du ën a di Wosudendu Dini fuunu. I sa wooko ku di buku Ondrosuku Bijbel moro fini-Gi Yehovah Kotoigi ee a dë u feni a di töngö fii, söseei i sa wooko ku woto soni di ta heepi u fuu sa öndösuku Bëibel. d Mbei hii möiti tu fii lesi dee pisi u Bëibel de ta taki u di libi u Jesosi, de o dë u feni a Di libi ku di diniwooko fuu kuma Keesitu sëmbë-Komakandi-buku. Boiti di dë, na fëëkëtë u luku di taki di nama ku di daka wöutu u di daka dë. Te u seeka u hati fuu mëni di dëdë u Jesosi, nöö woo sa heepi wotowan u deseei sa feni wini fëën tu.​—Ësl. 7:10.

 HEEPI WOTOWAN U DE FENI WINI U DI MËNI DI U TA MËNI DI DËDË U JESOSI

13. Andi da di fosu soni di u sa du u heepi wotowan u de feni wini u di mëni di u ta mëni di dëdë u Jesosi?

¹³ Unfa u sa heepi wotowan u de feni wini u di mëni di u ta mëni di dëdë u Jesosi? Di fosu soni di u sa du, hën da u sa kai de. Boiti dee sëmbë dee u ta miti a di peleikiwooko, u sa sikifi dee në u dee sëmbë dee u kë kai. Dee sëmbë aki sa dë dee famii fuu, dee sëmbë dee u ku de ta wooko, dee mii dee u ku de nango a di wan siköö, nasö woto sëmbë di u sabi. Aluwasi wa abi pampia hia tjika u kai sëmbë, tökuseei u sa manda wan link u di pampia da de. A sa bigi da u seei te u si fa sëmbë ko hia tjika!​—Peleik. 11:6.

14. Konda un wini a sa tja ko te u kai wan sëmbë faa ko mëni di dëdë u Jesosi ku u.

¹⁴ Na si kuma di sëmbë an o kë ko te i kai ën. Wan daka, a bi bigi da wan sisa di di manu fëën di an dë Kotoigi, bi piki ën taa a o ko mëni di dëdë u Jesosi makandi ku ën. Faandi mbei di soni dë bi bigi dëën? Wë u di a bi kai ën sömëni pasi faa ko ku ën, ma an bi ta ko. Wë nöö andi mbei a bi kë ko di pasi dë? A bi taki taa: „Wan sëmbë kai mi, hën a da mi wan pampia di un ta paati da sëmbë u kai de.” Di manu u di sisa bi konda dëën tu taa wan sëmbë di a bi sabi hën bi kai ën. Di sëmbë dë bi dë wan gaanwomi u di kemeente ka di sisa bi nango. Di manu u di sisa bi go mëni di dëdë u Jesosi di jaa dë, söseei a bi go mëni ën sömëni pasi baka di dë.

15. Andi u musu hoi a pakisei, te u ta kai sëmbë u de ko mëni di dëdë u Jesosi ku u?

¹⁵ A bunu fuu hoi a pakisei taa dee sëmbë dee u ta kai sa kë sabi wantu soni, möönmöön ee de an bi ko mëni di dëdë u Jesosi ku u wan daka. A bunu fuu seeka useei a fesi tu fuu sa sabi unfa u sa piki de (Kol. 4:6). So u de sa ta hakisi deseei dee soni aki: ’Andi o pasa a di komakandi dë?’ ’Un longi a o hoi?’ ’U musu bisi a wan apaiti fasi ö?’ ’Mi musu paka u mi sa go a dendu ö?’ ’De o pii möni a sëmbë u?’ Te u ta kai wan sëmbë u ko mëni di dëdë u Jesosi, nöö u sa hakisi ën nöö taa: „Soni dë di i bi o kë sabi ö?” Nöö ee wan soni dë di di sëmbë  bi o kë sabi, nöö u sa heepi ën ku ën. U sa lei di sëmbë di fëlön Mëni di dëdë u Jesosi ku di fëlön Andi de ta du a wan Könuköndë zali?, sö taa u sa heepi ën faa ko fusutan unfa u ta hoi komakandi. Boiti di dë, woto 28 u di buku I sa dë waiwai u teego! ta taki u sömëni soni di u sa lei de.

16. Un woto soni dee sëmbë dee ko mëni di dëdë u Jesosi sa ta hakisi deseei?

¹⁶ Woto soni dë jeti di so sëmbë sa ta hakisi deseei baka te de ko mëni di dëdë u Jesosi ku u u di fosu pasi. De sa ta hakisi deseei ee faandi mbei na wan sëmbë ta njan di bëëë ta bebe di win, ee nasö faandi mbei wantu sëmbë nöö ta du ën. De sa kë sabi tu ee un mëni pasi u ta mëni di dë u Jesosi a wan jaa. Söseei de sa kë sabi ee hii dee komakandi u dee Jehovah Kotoigi ta hoi a di wan fasi. Di baaa di ta hoi di taki ta taki u sömëni u dee soni dë. Ma tökuseei dee sëmbë dee o ko u di fosu pasi, sa kë ko fusutan so soni möön bunu. Di woto „Fu san ede Yehovah Kotoigi e hori na Avondmaal fu Masra tra fasi leki den tra kerki?”, di dë a jw.org o heepi u fuu sa piki so u dee soni di de o hakisi u. U kë du hii soni di u sa du u heepi ’dee sëmbë dee ta si soni a di soifi fasi’, u de feni wini u di mëni di u ta mëni di dëdë u Jesosi. U kë du dee soni dë ufö u mëni ën, te u ta mëni ën, söseei baka te u mëni ën.​—Tjab. 13:48.

HEEPI DEE BAAA KU DEE SISA DEE AN TA PELEIKI MÖÖN, SÖSEEI DEE AN NANGO A KOMAKANDI MÖÖN

17. Unfa dee gaanwomi sa heepi dee baaa ku dee sisa dee an ta peleiki möön, söseei dee an nango a komakandi möön? (Ezekiëli 34:12, 16)

¹⁷ Te di juu ta zuntu fuu mëni di dëdë u Jesosi, nöö unfa dee gaanwomi sa heepi dee baaa ku dee sisa dee an ta peleiki möön, söseei dee an nango a komakandi möön? Wë de sa buta mëni a de. (Lesi Ezekiëli 34:12, 16.) Ee i dë wan gaanwomi, nöö te di juu ta zuntu fuu mëni di dëdë u Jesosi, nöö mbei möiti bëli de. Be de sabi taa i ta booko i hedi ku de, söseei taa i dë kabakaba u heepi de. Kai de u de ko mëni di dë u Jesosi ku u. Ee de ko, nöö tei  de ku wai. Baka te u mëni di dëdë u Jesosi kaa, nöö mbei möiti fii ta jei fa u de, söseei du hii soni di i sa du u heepi de u de sa ko dini Jehovah baka.​—1 Pet. 2:25.

18. Unfa hiniwan fuu sa heepi dee baaa ku dee sisa dee an ta peleiki möön, söseei dee an nango a komakandi möön? (Loomë 12:10)

¹⁸ Hii dee sëmbë u di kemeente tuu sa heepi dee baaa ku dee sisa dee an ta peleiki möön, söseei dee an nango a komakandi möön. Unfa de sa du ën? Wë te de ta lei de taa de lobi de, te de ta libi suti ku de, söseei te de ta lei de taa de ta lesipeki de. (Lesi Loomë 12:10.) Hoi a pakisei taa kandë a bi taanga da de u de ko a komakandi. Kandë de bi ta fëëë taa sëmbë bi o si de wan fasi. e Fëën mbei a bunu fii ta köni fu ja du soni di sa mbei de fii wan fasi. Köni ku dee soni dee joo taki, söseei ku dee soni dee joo hakisi de (1 Tes. 5:11). De dë baaa ku sisa fuu a di biibi. U ta wai taa u ku de sa dini Gadu makandi baka!​—Ps. 119:176; Tjab. 20:35.

19. Un wini u ta feni te u ta mëni di dë u Jesosi?

¹⁹ U ta tei ën u bigi seei taa Jesosi seti soni da u fuu sa ta mëni di dëdë fëën hiniwan jaa. Te u go mëni di dëdë u Jesosi, nöö u ku wotowan tuu ta feni wini fëën (Jes. 48:17, 18). U ta ko möön lobi Jehovah ku Jesosi. U ta lei unfa u ta tei di soni di de du da u u bigi tjika. U ku dee baaa ku dee sisa fuu ta ko dë möön gaan mati. Boiti di dë, u sa heepi wotowan u de ko sabi unfa deseei sa feni wini u di lusupaima. Wë nöö boo mbei hii möiti fuu sa dë seekaseeka da di mëni di woo mëni di dë u Jesosi di jaa aki. Di daka dë da di möön gaan daka u di jaa!