1. Yini leyenta Sikhumbuto sibe lilanga lelibaluleke kakhulu emnyakeni? (Lukha 22:19, 20)

 KUBANTFU baJehova, Sikhumbuto sekufa kwaKhristu sililanga lelibaluleke kakhulu emnyakeni. Leli kuphela kwelilanga Jesu latjela balandzeli bakhe ngalokucondzile kutsi baligubhe. (Fundza Lukha 22:19, 20.) Sinetizatfu letitsite letenta sisibuke ngalabovu Sikhumbuto. Asesicoce nganati letinye tato.

2. Ngutiphi letinye tizatfu letenta sisibuke ngalabovu Sikhumbuto?

² Sikhumbuto sisisita kutsi sicabange ngekubaluleka kwenhlawulo. Sisikhumbuta ngetindlela lesingakhombisa ngato kutsi siyabonga ngenhlawulo yaJesu. (2 Khor. 5:14, 15) Ngetulu kwaloko, sisinika litfuba ‘lekukhutsatana’ nebazalwane betfu nabodzadze. (Rom. 1:12) Njalo ngemnyaka eSikhumbutweni, kuba khona labatsite lasebaphelelwe ngumdlandla wekukhonta Nkulunkulu. Labanye babo baze bakhutsateke kutsi babuyele kuJehova ngenca yekutsi bemukelwe ngetandla letifutfumele. Ngetulu kwaloko, bantfu labanyenti kuyabajabulisa loko labakubonako nalabakuvako futsi bese bafuna kucala kudadisha liBhayibheli. Konkhe loku kwenta kutsi Sikhumbuto sikhetseke kakhulu kitsi!

3. Sikhumbuto sisisita njani kutsi sibe nebunye nebazalwane betfu nabodzadze emhlabeni wonkhe? (Buka nesitfombe.)

³ Cabanga futsi ngendlela Sikhumbuto lesenta ngayo bazalwane nabodzadze kutsi babe nebunye emhlabeni wonkhe. BoFakazi BaJehova bahlangana ndzawonye nakushona lilanga emhlabeni wonkhe. Sonkhe silalela inkhulumo legcizelela kubaluleka kwenhlawulo. Sihlabela tingoma letimbili tekudvumisa,  sendlulise loko lokumelela ingati yaJesu nemtimba wakhe futsi sitsi “amen” ngalokusuka enhlitiyweni ngemuva kwemithantazo lemine. Kungakapheli ema-awa langu-24, onkhe emabandla asuke sekente lokufanako. Cabanga nje kutsi Jehova naJesu bajabula kangakanani nabasibona sibadvumisa ngebunye emhlabeni wonkhe.

4. Sitawucoca ngani kulesihloko?

⁴ Kulesihloko, sitawucoca nganayi imibuto: Singatilungiselela njani tinhlitiyo tetfu kuze tilungele Sikhumbuto? Singabasita njani labanye kuze bazuze kuso? Singabasita njani labo lasebaphelelwe ngumdlandla wekukhonta Nkulunkulu? Timphendvulo talemibuto titasisita kutsi silungele lomkhosi lobaluleke kakhulu.

SINGATILUNGISELELA NJANI TINHLITIYO TETFU KUZE TILUNGELE SIKHUMBUTO?

5. (a) Kubaluleke ngani kutsi sicabange ngekubaluleka kwenhlawulo? (Tihlabelelo 49:7, 8) (b) Yini loyifundza kule-video letsi Kungani Jesu Afa?

⁵ Lenye indlela lebalulekile lesingenta ngayo tinhlitiyo tetfu kutsi tilungele Sikhumbuto kutsi sicabange ngekutsi inhlawulo yaJesu Khristu ibaluleke kanganani. Besingeke sikhone kutikhulula esonweni nasekufeni. (Fundza Tihlabelelo 49:7, 8; buka ne-video letsi Kungani Jesu Afa?) a Ngako Jehova neNdvodzana yakhe layitsandzako balahlekelwa kakhulu kuze inikele ngekuphila kwayo ngenca yetfu. (Rom. 6:23) Nasichubeka sicabangisisa ngaloko Jehova naJesu labakudzela ngenca yetfu sitawubonga kakhulu ngenhlawulo. Sitawucoca ngetintfo letimbalwa letadzelwa nguJehova naJesu kuze sibe nenhlawulo. Kodvwa asesicale sicoce ngekutsi yini leyenteka kuze kube nenhlawulo.

6. Yini leyenteka kuze kube nenhlawulo?

⁶ Inhlawulo linani lelikhishwako kuze kubhadalelwe lokutsite. Adamu longumuntfu wekucala wadalwa ete sono. Ngesikhatsi ona, walahlekisela yena kanye nabo bonkhe bantfwana bakhe litfuba lekuphila phakadze. Kuze kubhadalwe loko Adamu lakulahla, Jesu wanikela ngekuphila kwakhe lokute sono kwaba ngumhlatjelo. Kuko konkhe kuphila kwakhe alamhlabeni, Jesu “akentanga sono, futsi emlonyeni wakhe akuzange kuphume emanga.” (1 Phet. 2:22) Ngesikhatsi Jesu afa, kuphila kwakhe lokute sono kwalingana ncamashi nekuphila lokwalahlwa ngu-Adamu.​—1 Khor. 15:45; 1 Thim. 2:6.

7. Ngutiphi letinye tilingo Jesu labhekana nato nakalamhlabeni?

⁷ Jesu walalela Babe wakhe wasezulwini kuko konkhe nanobe avivinywa tikhatsi letinyenti nakalamhlabeni. Nakasengumntfwana, kwadzingeka kutsi atitfobe kubatali bakhe labanesono nanobe yena bekete sono. (Luk. 2:51) Nakaseminyakeni yekutfomba, kwadzingeka amelane nanobe ngukuphi kucindzetelwa kutsi angalaleli nobe angetsembeki. Nasekakhulile, kwadzingeka amelane naSathane Develi lowamlinga kutsi one waze wamtjela ngalokucondzile kutsi ayekele kwetsembeka kuNkulunkulu. (Mat. 4:1-11) Sathane bekatimisele kwenta Jesu kutsi one kuze angabi yinhlawulo.

8. Ngutiphi letinye tinkinga Jesu lokwadzingeka atibeketelele?

⁸ Ngesikhatsi Jesu enta umsebenti wekushumayela lamhlabeni, wachubeka acinisela nakavivinywa. Waphatfwa kabi futsi wasongelwa. (Luk. 4:28, 29; 13:31) Kwadzingeka abeketelele emaphutsa ebalandzeli bakhe. (Mak. 9:33, 34) Ngesikhatsi atekiswa licala, waphatfwa ngesibhuku futsi kwahlekiswa ngaye. Ngemuva kwaloko, wabulawa ngendlela lebuhlungu  kakhulu nalelihlazo. (Heb. 12:1-3) Kwadzingeka kutsi abhekane nencenye yekugcina yeluvivinyo lwakhe ayedvwana, ngaphandle kwekuvikelwa nguJehova. b​—Mat. 27:46.

9. Sitiva njani ngenhlawulo yaJesu? (1 Phetro 1:8)

⁹ Kusebaleni kutsi Jesu wahlupheka kakhulu kuze abe yinhlawulo. Nasicabanga ngako konkhe loku, akusenti yini simtsandze kakhulu?​—Fundza 1 Phetro 1:8.

10. Yini Jehova layidzela kuze kube nenhlawulo?

¹⁰ Kutsiwani ngaJehova? Yini layidzela kuze Jesu abe yinhlawulo? Jehova naJesu banebudlelwane lobusondzelene kakhulu longahle ubucabange emkhatsini wababe nendvodzana. (Taga 8:30) Ngako cabanga nje kutsi Jehova wativa njani njengobe abona Jesu abeketelela tinkinga letinyenti nakalamhlabeni. Siyaciniseka kutsi weva buhlungu kakhulu nakabona iNdvodzana yakhe iphatfwa kabi, ingemukelwa futsi ivivinywa.

11. Shano sibonelo lesikhombisa indlela Jehova lokungenteka wativa ngayo ngesikhatsi Jesu abulawa.

¹¹ Nobe ngumuphi umtali loke washonelwa ngumntfwana ubati kahle buhlungu lobungachazeki lobubangelwa nguloko. Sinekukholwa lokucinile kutsi labafile batawuvuka, kodvwa loko akubususi buhlungu lesibuvako nasishonelwa ngumuntfu lesimtsandzako. Lesibonelo sisisita siyicondze kahle indlela lokungenteka Jehova wativa ngayo njengobe abona iNdvodzana yakhe layitsandzako ihlupheka futsi ifa nga-33 C.E. c​—Mat. 3:17.

12. Yini lesingayenta ngemalanga langaphambi kweSikhumbuto?

¹² Kusukela nyalo kuze kube Sikhumbuto, yetama kutsi nawutidadishela liBhayibheli nobe eKukhonteni Kwemndeni ufundze lokunyenti ngenhlawulo. Sebentisa Lithulusi Lekucwaninga LaBoFakazi BaJehova nobe letinye tincwadzi tetfu kuze ufundze lokunyenti ngenhlawulo. d Ngetulu kwaloko, timisele kuhambisana neluhlelo lwekufundvwa kweliBhayibheli kwemalanga eSikhumbuto lolutfolakala encwajaneni letsi Kuphila KwemaKhristu Nemsebenti Wawo—Incwajana Yekubhalela Emihlanganweni. Ngelilanga leSikhumbuto, ungakhohlwa kubukela Kukhonta Kwasekuseni. Nasilungiselela tinhlitiyo tetfu kuze tilungele Sikhumbuto, sitawukhona kusita labanye kutsi nabo bazuze kuso.​—Ezra 7:10.

 SITA LABANYE KUTSI BAZUZE

13. Nguyiphi intfo yekucala lesingayenta kuze sisite labanye bazuze eSikhumbutweni?

¹³ Yini lesingayenta kuze sisite labanye bazuze eSikhumbutweni? Kwekucala kutsi sibameme. Ngetulu kwekumema labo lesibatfola nasenta umsebenti wekushumayela, singaphindze sente luhla lwebantfu lesingabamema. Laba bangafaka ekhatsi tihlobo tetfu, lesisebenta nabo, lesifundza nabo kanye nalabanye. Ngisho nobe site emakhophi lenele lashicilelwe esimemo singabatfumelela ngetintfo tebuchwephesha. Kwatibani nje, mhlawumbe banyenti labangaba khona.​—Shu. 11:6.

14. Shano sibonelo lesikhombisa kutsi kusita ngani kumema umuntfu ngalokucondzile.

¹⁴ Ungakutsatseli phasi kunika bantfu lobatiko simemo. Ngalelinye lilanga lomunye dzadze lonendvodza lengasuye Fakazi wamangala ngesikhatsi imtjela ijabulile kutsi beyifuna kuhamba naye eSikhumbutweni. Yini leyamangalisa lodzadze? Kungenca yekutsi bekayicele tikhatsi letinyenti esikhatsini lesendlulile kodvwa ayizange ihambe naye. Besekushintjeni? Lendvodza yatsi: “Nginikwe simemo,” yachaza kutsi beyimenywe ngulomdzala welibandla leyetayelene naye. Lendvodza yaba khona eSikhumbutweni ngaloyo mnyaka naseminyakeni leminyenti leyalandzela.

15. Yini lesifuna kuhlale siyikhumbula nasimemela bantfu eSikhumbutweni?

¹⁵ Khumbula kutsi labo lesibamemile bangahle babe nemibuto, ikakhulukati nangabe bangazange sebaye emihlanganweni yetfu. Senta kahle ngekucabanga ngemibuto labangahle babe nayo futsi sikulungele kubaphendvula. (Khol. 4:6) Sibonelo nje, kungenteka labanye batibute: ‘Kutawube kwentekani kulomkhosi?’ ‘Utawutsatsa sikhatsi lesinganani?’ ‘Kugcokwa njani?’ ‘Kungenwa ngemali yini?’ ‘Likhona yini lipuleti lemnikelo?’ Nasimema lotsite eSikhumbutweni, singambuta: “Ikhona yini imibuto lonayo?” Ngemuva kwaloko siphendvule nobe ngumiphi imibuto lokungenteka unayo. Singaphindze sisebentise i-video letsi Kukhumbula Kufa KwaJesu naletsi Yini Leyenteka EHholweni LeMbuso? kuze simsite abone kutsi  kwentekani emihlanganweni yetfu. Sifundvo 28 sencwadzi letsi Jabulela Kuphila Kuze Kube Phakadze! sinemaphuzu lalusito lesingawasebentisa.

16. Ngumiphi leminye imibuto lokungenteka babe nayo labo labete eSikhumbutweni?

¹⁶ Ngemuva kweSikhumbuto, labo labacalako kuba khona bangahle babe naleminye imibuto. Kungenteka batibute kutsi kwentiwa yini kutsi babe mbalwa nobe kube bete labanatsa liwayini nalabadla sinkhwa. Bangaphindze batibute kutsi sisigubha kangakhi Sikhumbuto. Kungenteka bafune nekwati kutsi yonkhe imihlangano yaBoFakazi BaJehova ichutjwa ngalendlela yini. Nanobe linyenti lalamaphuzu kucocwa ngawo enkhulumeni yeSikhumbuto, labo labacalako kuta bangahle badzinge kutsi sibachazele kahle. Sihloko lesiku jw.org lesitsi “Yini Leyenta BoFakazi BaJehova Bagubhe Sidlo SeNkhosi Sakusihlwa Ngendlela Leyehlukile Kweyaletinye Tinkholo?” singasisita sikhone kuphendvula leminye yemibuto yabo. Sifuna kwenta konkhe lesingakwenta ngaphambi kweSikhumbuto, ngesikhatsi seSikhumbuto nangemuva kwaso kuze sisite labo “labatimisele kutfola kuphila” kutsi basitakale kulomkhosi.​—Imis. 13:48.

SITA LASEBAPHELELWE NGUMDLANDLA WEKUKHONTA NKULUNKULU

17. Labadzala belibandla bangabasita njani labo lasebaphelelwe ngumdlandla wekukhonta Nkulunkulu? (Hezekeli 34:12, 16)

¹⁷ Ngesikhatsi seSikhumbuto, labadzala belibandla bangabasita njani labo lasebaphelelwe ngumdlandla wekukhonta Nkulunkulu? Bakhombise kutsi uyabatsandza. (Fundza Hezekeli 34:12, 16.) Ngaphambi kweSikhumbuto yetama kushayela labanyenti babo. Bacinisekise ngekutsi uyabatsandza nangesifiso sakho sekubasita nganobe yini longakhona kubasita ngayo. Bameme kutsi babe khona eSikhumbutweni. Nangabe baba khona, bemukele ngemusa. Ngemuva kweSikhumbuto, chubeka ubavakashela nobe ubashayela futsi basite baphindze bacinise buhlobo babo naJehova kuze babuyele kuye.​—1 Phet. 2:25.

18. Yini sonkhe lesingayenta kuze sisite labo lasebaphelelwe ngumdlandla wekukhonta Nkulunkulu? (KubaseRoma 12:10)

 ¹⁸ Bonkhe ebandleni bangabasita labo labaphelelwe ngumdlandla wekukhonta Nkulunkulu lababa khona eSikhumbutweni. Kanjani? Ngekutsi babakhombise lutsandvo, umusa nenhlonipho. (Fundza KubaseRoma 12:10.) Khumbula kutsi kusenekwenteka letimvu letiligugu betingabata kubuyela ebandleni. Kungenteka labazalwane nabodzadze bebesaba kutsi angeke bemukelwe kahle. e Ngako ungababuti imibuto lengabenta badliwe ngemahloni nobe usho lokutsite lokungabavisa buhlungu. (1 Thes. 5:11) Laba bazalwane betfu nabodzadze. Siyajabula kuphindze sikhonte nabo Nkulunkulu!​—Hla. 119:176; Imis. 20:35.

19. Kusisita ngani kukhumbula kufa kwaJesu?

¹⁹ Sibonga kakhulu ngekutsi Jesu wasitjela kutsi sikhumbule kufa kwakhe njalo ngemnyaka, futsi siyacondza kutsi yini leyenta loku kubaluleke. Nasikhumbula kufa kwakhe, loko kusita tsine ngetindlela letinyenti kuphindze kusite nalabanye. (Isa. 48:17, 18) Indlela lesimtsandza ngayo Jehova naJesu iyakhula. Sikhombisa kutsi sibonga kakhulu ngaloko labasentele kona. Sicinisa buhlobo betfu nebazalwane betfu nabodzadze. Ngetulu kwaloko, sisita labanye bafundze kutsi yini labangayenta kuze nabo batfole tibusiso letitawuba khona ngenca yenhlawulo. Ngako shengatsi singenta konkhe lokusemandleni etfu kuze silungele Sikhumbuto salomnyaka, lokulilanga lelibaluleke kakhulu emnyakeni!