1. Juu ya ki busiku bwa Kibukisio ni bwa mana saana mu muaka? (Luka 22:19, 20)

 BANTU bakue Yehova bali bamona busiku bwa Kibukisio kya lufu lwakue Kristu kuya bwali bwa mana saana mu muaka. Kibukisio i kintu sie kimo kyaalandile Yesu basambi bakue baye balanguluka. (Soma Luka 22:19, 20.) Kuli bintu bingi bili byalengia tuye twatona busiku bwa Kibukisio bulenge bufike. Ale tumoneko bintu paleepale.

2. Juu ya ki tuli twatona saana kupembela Kibukisio kilenge kifike?

² Kibukisio kili kyatukwasia kutontonkania juu ya ki kilubula mulandu ni kya mana. Kili kyatukwasia kumana vya kutasia palua kwipeela kwakue Yesu. (2 Bakor. 5:14, 15) Kabili kili kyatupeela fuasi ya kusekelela “kusintulana mu kukoseleziana” pamo ni balupua ni bankazi betu. (Bar. 1:12, NWT) Kila muaka, bakasimika bengi baalia baalekeele kubomba bali basaangua ku Kibukisio. Bange bali bapingula kumubuelela Yehova kine bapokelelua kwa nsaansa. Kabili, bantu bengi bali batona beelia bibali baunvua ni kwimwena, ni keekio kili kyalengia batendeke kusambilila Bibilia. Bebio byonse bili byalengia tumone busiku bwa Kibukisio kuya bwali bwa mana saana!

3. Kibukisio kili kyakwatania balupua ni bankazi mu kyalo kyonse mu nzila ki? (Mona ni foto.)

³ Tontonkania kabili Kibukisio vikili kyakwatania balupua ni bankazi mu kyalo kyonse. Mwaya kyalo, Bakasininkizia Bakue Yehova bali bakita Kibukisio musita koba lukali kaya kazikilila. Fwe bonse tuli twatuilizia lyasi lili lyalangilila juu ya ki kilubula mulandu ni kya mana. Tuli twaimba nghimbo ibili ya kutasia, tuli twapisia mukate ni divai, kabili tuli twaitabila kwa mutima onse  nangue “amen” ku mapepo ana ali akitua. Mu nsa 24 eevi, bilonghaano byonse bili byakita enka evio. Ezia kutontonkania nsaansa ili yaunvua Yehova ni Yesu musita ubali batumona twakolongheene eevi kubakindika mu ezio nzila!

4. Tuli kwasuka biipuzio ki mu leeli lyasi?

⁴ Mu leeli lyasi, tuli kwasuka beebi biipuzio: kunti twateania siani mutima weetu palua Kibukisio? Kunti twakwasia siani bengi eevi banoonkelemo? Kabili, kunti twabakwasia siani bakasimika baalia baalekeele kubomba? Byasuko bya bebio biipuzio bili kutukwasia twiteanie palua bobo busiku bwibeleele.

KUNTI TWATEANIA SIANI MUTIMA WEETU PALUA KIBUKISIO?

5. (a) Juu ya ki tupalile kutontonkania palua kilubula mulandu vikili kyasaangua kyali kya mana? (Malumbo 49:7, 8) (b) Weewe, waakisambilila ki kupitila viideo ilandile Sababu ya ki Yesu Wafuile?

⁵ Imo pakati ka nzila iweeme saana ya kuteania mutima weetu palua Kibukisio ni eezi: Kutontonkania juu ya ki ngeleelo ya kilubula mulandu yakue Yesu Kristu ni ya mana. Te kuli muntu ali ni buviinde bwa kwifumia ye muine mu lizaambi ni lufu. (Soma Malumbo 49:7, 8; mona ni viideo ilandile, Sababu ya ki Yesu Wafuile?) a Keekio i kyaalengiizie Yehova akite mipaango eevi Yesu, Muana wakue, afue juu ya kutupususia. (Bar. 6:23) Kakiine Yehova ni Yesu baaipeele saana. Kine twatontonkania saana Yehova ni Yesu vibaaipeele palwetu, tuli kukila kutasia palua kilubula mulandu. Mu leeli lyasi, tuli kumona bintu paleepale bilangiliile nangue Yehova ni Yesu baaipeele saana palua kilubula mulandu. Ntanzi ya byonse, tumonenke kine kilubula mulandu kibiikile mukati kiki.

6. Kilubula mulandu kyaabiikile mukati kiki?

⁶ Kilubula mulandu ni bei ili yalipua eevi kubueziiziamo kintu kimo. Musita muntu wa kuanza, Adamu, lwaabumbilue, abanga wapuililikile. Lwaakitile lizaambi waazeziizie kiswapilo kyakue pamo ni kya baana bakue kya kwikala loonse. Eevi kubueziiziamo keelia kyaazeziizie Adamu, Yesu waafumiizie bukose bwakue bupuililikile. Musita onse lwaali paanu pa kyalo, Yesu “taabalile [ao taakitile lizaambi] kabili te kuli ata muntu waamunvuile walanda bufi.” (1 Pet. 2:22) Lwaafuile, Yesu waafumiizie bukose bupuililikile bulingheene ni bolia bwaazeziizie Adamu.—1 Bakor. 15:45; 1 Tim. 2:6.

7. Ni meezio ki paleepale aapatile Yesu musita lwabanga wali pa kyalo?

⁷ Lwaali paanu pa kyalo, Yesu waamunakiile Baba wakue mu kila kantu, ata sie kine waapatile meezio engi. Lwaali wakili mwanike, Yesu abanga wabanakila baviazi bakue basiali bapuililikile anzia kine weene abanga wapuililikile. (Luk. 2:51) Lwaalukile mulumendo, paange bantu bange baali bamutinta te kunti abanakile baviazi bakue ao te kunti aye wali wa kisinka kuli Yehova, inzi weene waakeene kukita evio. Lwaalukile mukulu, Yesu waamupingile Sataana Kibanda, olia abanga wamwezia eevi akite lizaambi, ni kumwana paswetele te kunti atwalilile kuya wali wa kisinka kuli Leeza. (Mat. 4:1-11) Sataana abanga wapinguile kumulengia Yesu akite lizaambi eevi te kunti alipe kilubula mulandu.

8. Ni meezio ki ange aapatile Yesu?

⁸ Mu miilo yakue paanu pa kyalo, Yesu waapatile meezio engi. Baluani bakue baali bamukyuzia, kabili baali bakeba kumwipaya. (Luk. 4:28, 29; 13:31) Kabili abanga wapalile kubasipikizia basambi bakue palua bilubo byabo. (Mark. 9:33, 34) Musita lwaali wapingulua palua bukose bwakue, waakyuziiziwe ni kuzyelekaniiwa. Kabili waaipailue nga mubiifi, ni kufua lufu lwa kukisia saana. (Baeb. 12:1-3) Waasipikiziizie ye muine buezio bwakue bwa kupeleezia bila kukingililua na Yehova. b—Mat. 27:46.

9. Tuli twaiunvua siani palua kwipeela kwakue Yesu? (1 Petro 1:8)

 ⁹ Kulanda kisinka, Yesu waaemeenepo saana pa kunti aaluke kilubula mulandu. Kutontonkania Yesu vyaaipeele mu kwitonena palwetu, kupalile kutulengia tumutone saana.—Soma 1 Petro 1:8.

10. Yehova waaipeele mu nzila ki palua kilubula mulandu?

¹⁰ Ale Yehova waaipeele siani mu kwitonena eevi Yesu afikiile kulipa kilubula mulundu? Yehova ni Yesu bali ni burafiki bwa peepi saana, nga bolia buli bwasaangua pakati ka baba ni muana wakue. (Tus Maf. 8:30) Pakaako, ezia kutontonkania Yehova vyaaiunvuile musita lwaamwene Yesu wali mukusipikizia meezio engi saana paanu pa kyalo. Kulanda kisinka, Yehova waakisilue saana lwaamumwene Muana wakue wakitilua bintu bibiipile, wakaanua, ni kweziiwa.

11. Leeta mufuano ulangiliile Yehova vyaaiunvuile musita Yesu lwaaipailue.

¹¹ Muviazi onse olia waafuiliilue kale na muana, ali waikala wamanine buino kufuilua na muana vikuli kwakisa. Tuketekeele saana nangue baalia baafuile bakatuntumunua. Inzi, keekio tekiviinda kulengia twandue kunvua misa kine twafuilua na muntu ututonene. Ozu mufuano watukwasia kumana Yehova vyaaiunvuile musita lwaamwene Muana wakue, olia waali watonene saana, wali mukukyuziiwa ni kufikiila kufua mu muaka wa 33. c—Mat. 3:17.

12. Kunti twakita siani mu milungu ya ntanzi ya Kibukisio?

¹² Kubambila loonu mpaka busiku bwa Kibukisio, tendeka kusambilila bintu bingi saana palua kilubula mulandu mu lisambililo lyobe lya bunke, ao mu Lupupo lwa mu Lupua. Eevi kumana bingi palua kilubula mulandu, bombia kitabu, Musaada wa Kutafuta Habari kwa Ajili ya Mashahidi wa Yehova, ao bombia mpapulo inge elia ili kuviinda kukukwasia. d Kabili, koonka ntantiko ya busomi bwa Bibilia, elia ili mu Miilo ni Buikazi bwa Mukristu​—Libuku lya Kulonghaana. Kukila pakaako, busiku bwa Kibukisio, te kulaba kukoonka ntantiko iibeleele ya Lupupo lwa Lukele-keele. Kine twateania buino mutima weetu palua Kibukisio, tuli kuviinda kukwasia ni bange banoonkelemo.—Ezr. 7:10.

KWASIA BANGE EEVI BANOONKELEMO

13. Ni kiki kya kuanza kitupalile kukita eevi kukwasia bange banoonkele mu Kibukisio?

¹³ Kunti twakita siani eevi kukwasia bange banoonkele mu Kibukisio? Kintu kya kuanza  kitupalile kukita ni keeki: kubakupa ku Kibukisio. Kukila pa bantu batuli twalanziana nabo lyonse mu kusimikila, kunti twakita liste ya bantu batumanine eevi ni beene tubakupe. Babo kunti babiika mukati bantu ba mu lupua lwetu, baalia batuli twabomba nabo, banafunzi neetu, ni bange sie batumanine. Ata sie kine te tukwete mikupo ingi ya mapapie, kunti twabatumina bange musaapu ao lien ya kubatwala ku mukupo wa kielektronike. Bantu bengi kunti basaanguako, ni keekio kunti kyatupapia.—Kas. 11:6.

14. Londolola juu ya ki ni kintu kya mana kumupeela muntu mukupo.

¹⁴ Kulanda kisinka, ni kintu kya mana saana kumupeela muntu mukupo, wa lipapie ao wa kielektronike. Nkazi umo abanga wakwete mulume asili Kasininkizia. Busiku bumo, waapapile musita mulume wakue lwaamuanine nangue bakaba kuya bonse ku Kibukisio. Juu ya ki waapapile? Paantu lwa kale, lingi abanga wamwana mulume wakue asaangueko ku Kibukisio, inzi taasaangilueko ata limo. Eba, ale ni kiki kyaalengiizie etabile kusaanguako mu loolu lwendo? Mulume wakue walanda eevi: “Naapeelue mukupo wa lipapie.” Ozo mwalalume waamubuilile mukazi wakue nangue mukote umo wa mu kilonghaano, olia ubaali bamaneene nakue, i waamukupile. Mulume wakue kwa ozo nkazi waasaangilueko ku Kibukisio ozo muaka, kabili watendekele kusaanguako ni mu miaka ingi yaakoonkelepo.

15. Ni kiki kitupalile kubiika mu maano musita utuli twakupa bantu ku Kibukisio?

¹⁵ Uye walangulukile nangue baalia batuli twakupa, paange kunti basaangua ni biipuzio, asa kine tebanasaangue ata limo ku kulonghaana kwetu. Pakaako, ni kintu kya mana kutontonkania ntanzi biipuzio bibali kuviinda kwipuzia ni kuteania byasuko. (Bakol. 4:6) Kwa mufuano, bamo kunti baipuzia eevi: ‘Ni kiki kyakaba kukitika ku Kibukisio?’ ‘Kyakaba kupua nsa inga?’ ‘Mpalile kuvuala ngubo ya siani?’ ‘Mpalile kulipila pa kwingila?’ ‘Mpalile kulongia sadaka?’ Kine twamukupa muntu ku Kibukisio, kunti twamwipuzia eevi: “Uli ni biipuzio?” kisia kunti twaasuka biipuzio byali kwipuzia. Kabili eevi kumukwasia amane vili vyatungululua kulonghaana kwetu, kunti twabombia viideo ilandile, Languluka  Lufu Lwakue Yesu, pamo ni elia ilandile, Kiki Kiakitika ku Nsesi ya Bukolo? Kabili, mu lisomo lya 28 lya kitabu Sekelela Buikazi Loonse! muli bisinka paleepale bya mana bitupalile kumubuila.

16. Baalia bali basaangua ku Kibukisio kunti baipuzia biipuzio ki binge?

¹⁶ Kisia kusaangua ku Kibukisio, bantu bange baalia bakizako lya kuanza, kabili batonene kumana bingi, kunti basaangua ni biipuzio binge. Kunti baipuzia eevi: Juu ya ki te kuli ata muntu walianga mukate ni kumina divai, ao juu ya ki bantu sie baniini i balianga mukate ni kumina divai? Kabili, kunti batona kumana kine tuli twakita Kibukisio mara inga. Kukila pakaako, kunti batona kumana kine kulonghaana konse kwa Bakasininkizia Bakue Yehova kuli kwakitua sie namuna imo. Ata sie kine bingi pakati ka bebio bintu bili byalondololua mu lyasi lya Kibukisio, baalia baizangako lya kuanza kunti batona kupeelua bulondolozi bunge bukilile pa bolia bubaunvuanga. Lyasi lili ku jw.org leelia lilandile, “Juu ya Nini Mashahidi wa Yehova Wanafanyaka Meza ya Bwana Tofauti na Dini Zingine?” kunti lyatukwasia kwasuka biipuzio bimo pakati ka biipuzio byabo. Tupalile kukita maka saana ntanzi ya Kibukisio, musita wa Kibukisio, ni kisia Kibukisio, kubakwasia baalia bali ni “aali iweeme ya mutima” eevi banoonkele mu Kibukisio.—Miil Bat. 13:48, NWT.

KWASIA BAKASIMIKA BAALIA BAALEKEELE KUBOMBA

17. Bakote kunti bakita siani eevi kubakwasia bakasimika baalia baalekeele kubomba? (Ezekieli 34:12, 16)

¹⁷ Mu kipindi kya Kibukisio, bakote mu kilonghaano kunti bakwasia siani bakasimika baalia baalekeele kubomba? Kunti bakita evio kupitila kubalangilila nangue babatonene. (Soma Ezekieli 34:​12, 16.) Mwe bakote, ntanzi ya Kibukisio, mupalile kubakuuta ku telefone ao kubendela bengi pakati kabo. Muye mwabasininkiziizia nangue mubatonene, kabili nangue mutonene kubakwasia mu nzila yonse kukoonkana ni buviinde bwenu. Bakupe ku Kibukisio. Kine baiza ku Kibukisio, bapokelele kwa nsaansa. Kisia Kibukisio, twalilile kubakuuta ku telefone ni kubendela babo balupua batonua. Kabili, bakwasie mu bintu byonse bya kimupasi  bibakabiile eevi baviinde kumubuelela Yehova.—1 Pet. 2:25.

18. Fwe bonse kunti twakita siani eevi kukwasia bakasimika baalia baalekeele kubomba? (Baroma 12:10)

¹⁸ Balupua ni bankazi bonse mu kilonghaano kunti babakwasia bakasimika baalia baalekeele kubomba musita ubaiza ku Kibukisio. Kunti babakwasia siani? Kupitila kubalangilila ntono, buwaame, ni mukinzi. (Soma Baroma 12:10.) Languluke nangue paange babo bakasimika bamwene kyakolele kutendeka kabili kulonghaana. Paange bakiba batontonkania nangue kine baiza kulonghaana, balupua ni bankazi tebabapokelela buino. e Pakaako, te kubepuzia biipuzio beelia bili kulengia bazielekane, ao kulanda kintu kili kulengia bafipue. (1 Bat. 5:11) Babo ba lupua ni bankazi, ni bazumizi neetu. Tuli ni nsaansa ya kumupupa Yehova pamo nabo kabili!—Malum. 119:176; Miil Bat. 20:35.

19. Kukita Kibukisio kya lufu lwakue Yesu kuli kwaleeta faida ki?

¹⁹ Tuli ni nsaansa saana paantu Yesu waatulandile tuye twakita Kibukisio kya lufu lwakue kila muaka. Kabili, tumanine juu ya ki kukita evio ni kwa mana. Kusaangua ku Kibukisio kuli kwatuleetela faida fwefue pamo ni bantu bange mu nzila ingi. (Is. 48:​17, 18) Tuli twakila kumutona Yehova pamo ni Yesu. Tuli twabatasia palua beelia bibaatukitiile. Tuli twakila kubapalama balupua ni bankazi betu. Kabili, kunti twabakwasia ni bange bamane vibapalile kukita, eevi bakapate mpaalo ilengiiziwe na kilubula mulandu. Kansi, tukite maka etu onse eevi twiteanie kusaangua ku Kibukisio kya onu muaka. Bobo i busiku bwa mana saana mu onu muaka!