1. ¿Chúsiá Conmemoración kaachi echi rawé ju japalí wabé natéami ju? (Lucas 22:19, 20).

 ECHI Jeobá puéblowala jitra echi rawé wabé natéami ko ju, Conmemoración kaachi. Alí echi bilepi omáwali bi ju japi Jesús anili japi omawabo (leeri Lucas 22:19, 20). ¡Nirú wiká namuti japi jitra ti ma nakí japi sibama echalí rawé wabé natéami! ¿Chúsiá? Ma inepo jaré echi namuti.

2. ¿Chu iyiri ju jaré namuti japi ta jitra ma we nakí japi nima echi Conmemoración?

² Echi Conmemoración tamó iʼwiri natia japi we natéami ju japi nokali Jeobá alí Jesús tamujé jitra. Alí tamó newalari jaré namuti japi chúriká ti newa nokiboa japi ta we natéami niraa iné japi isili Jesús (2 Cor. 5:14, 15). Ayénachó tamó iʼwiri napawika mochía echi hermanos yúa alí anakupi iʼwérili iyayá (Rom. 1:12). Sinibí bamíali, wiká japi ma riweli napawía echoná congregación checho ku simía Conmemoración kaachi alí jaré echi iʼwérili naré checho ku nijéwimia Jeobá jiti echi hermanos we simá noká echi yúa. Ayénachó nirú pagótami japi we kanili echi jitra japi kipú alí iné, jiti la chotásimi binea japi aní echi Biblia. Suwaba jepuná namuti isimí japi echi Conmemoración wabé natéami nima tamujé jitra.

3. ¿Chúriká néwariwéliti echi Conmemoración japi ta sinéami ka napawika ju? (Ayénachó iné echi imagen).

³ Ayénachó ti nakí japi sibama echalí rawé jiti echalí ju japalí ti we aʼlá iné japi echi Jeobá puéblowala omáana piréami napawika ju. Echi testigo Jeobá omáana Wichimóbachi piréami, napawí ma bokowíachi rayénali japoná echi piré. Sinéami ta kipú bilé nawésali japi ruyé japi we natéami ju japi nokali Jeobá alí Jesús tamujé jitra, ati wikará okuá canciones, ati simeri echi pan alí vino, alí sinéami  ne sulachí jonsa ati aní “amén” japalí niwáliwa echi naó oraciones. Alí pe 24 horas suníachi, suwaba echi congregaciones ma echi riká cho nokali. ¡Jeobá alí Jesús we kanili sinéami tamujé inea japalí ti walubéala ané echi niwaká Conmemoración!

4. ¿Piri binepo jena binelíwami?

⁴ Jenaʼí binelíwami ata binepo jepuná náriwami: ¿piri ti nokisáré jiti we natéami niraa inepo echi Conmemoración?, ¿chúriká ti omeri iʼwiria jarecho pagótami jiti simama alí kanílima Conmemoración kaachi?, alí ¿chúriká ti omero iʼwiria echi japi riweli napawía echoná congregación? Natia jepuná náriwami tamó iʼwírima jiti aʼlárika buwea mochibo echi Conmemoración.

¿PIRI TI NOKISÁRÉ JITI WE NATÉAMI NIRAA INEPO ECHI CONMEMORACIÓN?

5. a) ¿Chúsiá we natéami ju japi ta natabo japi nokali Jeobá alí Jesús tamujé jitra? (Salmo 49:7, 8). b) Ruyé piri mi bineli echoná video ¿Chúsiá mukuli Jesús?

⁵ Bilé namuti japi ta oméripo nokayá kecho séachi echi Conmemoración ko ju, natia japi we natéami ju japi isili Jesús tamujé jitra. Tamujé aboi ke ti omérimili nokayá japi ta ke suwiboa alí japi ta ke cha nokáami nipo (leeri Salmo 49:7, 8; ayénachó iné echi video ¿Chúsiá mukuli Jesús?). a Jeobá ko isili japi binoy Nolá Jesús japi we galé, mukumea tamujé jitra. Japi nokali Jeobá alí Jesús we jilí nili (Rom. 6:23, TNM). Ata aminabi we natásaká japi nokali Jeobá alí Jesús tamujé jitra, ata wabé natéami niraa inepo japi echi nokali. Ma binepo jaré namuti japi Jeobá alí Jesús nokali tamujé jitra tákoré we jilí nili. Nalí bachá ma binepo chúriká nokali.

6. ¿Piri nokali Jeobá alí Jesús tamujé jitra?

⁶ Japalí Jeobá nijili binoy Nolá Jesús jiti mukumea tamujé jitra, echi ko nili japi riká ko natetia japi Adán wikáwili. Echi bacháwala rijoi Adán, sébali aʼlá isíami nili japalí Jeobá niwali. Nalí japalí ke nijéwili echi ko wikáwili japi echi omérima sinibí bitea, nalí ke echi bi, ayénachó suwaba echi kúchuwala. Jiti checho ku olabo japi Adán wikáwili, Jesús ko nijili binoy bitéala japi sébali aʼlá isíami nili. Alí japalí Jesús biteili jenaʼí Wichimóbachi, echi ko ke “siné chati sitíi olali. Alí Binói nirapé siné ʼyékali echi auché jaré” (1 Ped. 2:22). Jesús ko sébali aʼlá isíami nili japalí mukuli, jiti la a omérili natetia japi Adán wikáwili (1 Cor. 15:45; 1 Tim. 2:6).

7. Ruyé jaré namuti jilírami japi ikili Jesús.

⁷ Japalí Jesús biteili jenaʼí Wichimóbachi, echi ko sinibí nijéwili echi Onolá tákoré ikili wiká namuti jilírami. Japi riká, japalí taa towí nili, echi ko nijéwili echi wénwala japi ke sébali aʼlá nokáami nili tákoré echi ko sébali aʼlá isíami nili (Luc. 2:51). Alí japalí remalí nili, a keʼré japi echi ko iʼwérili isili ke nijewia japalí jarecho aneli japi ke nijéwima echi wénwala alí Jeobá. Alí japalí ma waʼlú nili, echi Satanás jiwérili isili japi Jesús ke nijéwima Jeobá alí japi isima jarecho namuti chati (Mat. 4:1-11). Satanás ko jiwérili isili japi Jesús chati isima jiti ke omérima mukuká natetia alí echi riká niyúbitami nima echi pagótami.

8. ¿Piri jarecho namuti jilírami anáchili Jesús?

⁸ Japalí nawesia iyénili, Jesús ko anáchili jarecho namuti we jilírami. Japi riká, echi sayérala najátili alí aneli japi miʼlimea  (Luc. 4:28, 29; 13:31). Ayénachó Jesús kilí anáchili japalí echi najátowala ke aʼlá nokali (Mar. 9:33, 34). Echi oyériami anili japi mukusaa riweili jiti cha isili, echi sayérala risoa olali alí nakawélika raʼíchali echi jitra. Miná ko wijawa uchaari japi riká ko we cha isíami alí we risoa nílili (Heb. 12:1-3, TNM). Alí kecho bijí mukúachi, Jeobá ko ma ke tibuli, jiti la binoy anáchili echi namuti we jilírami (Mat. 27:46). b

9. ¿Chuti nili japalí ti nata japi isili Jesús tamujé jitra? (1 Pedro 1:8).

⁹ Jesús ko wiká namuti we jilírami anáchali jiti tamó niyúbima. Japalí ti nata suwaba echi namuti we jilírami japi ikili Jesús tamujé jitra, ata aminabi we galea nili echi (leeri 1 Pedro 1:8).

10. ¿Piri namuti jilírami anáchili Jeobá tamó niyúbimia?

¹⁰ Alí Jeobá ru, ¿piri namuti jilírami anáchili jiti Jesús omérima mukuká natetia? Jeobá alí Jesús we galé anakupi niraa japi riká bilé onolá echi ranala yúa (Prov. 8:30). Jiti la, Jeobá we risoa nílili japalí ineli japi Jesús ikili namuti we jilírami japalí biteili jenaʼí Wichimóbachi. Ata machí japi Jeobá we risoa nílili inea japalí echi sayérala we kichili binoy Nolá alí we risoa olali.

11. ¿Chu iyiri ejemplo tamó iʼwiri inamia japi chu nílili Jeobá japalí mukuli echi Nolá?

¹¹ Sinéami echi japi kúchuwami ju machí japi chu ju japalí bilé echi ranala mukusaa. Tákoré ata we bichiwi japi ku jawásitami nima echi suwíami, nalí echi ko ke isimí japi ta ke omona nílipo japalí mukusaa bilé japi ta we galé. Na ejemplo tamó iʼwiri aʼlá inamia japi chu nílili Jeobá echi bamíali 33, japalí echi Nolá we risoa nílika mukuli (Mat. 3:17). c

12. ¿Piri ta oméripo nokayá kecho séachi Conmemoración?

¹² Kecho séachi echi Conmemoración, ¿chúsiá mi ke aminabi biné, mujé bineli niraa o mujé téemala yúa, japi nokali Jeobá alí Jesús tamujé jitra? Nee echi Guía de estudio para los testigos de Jehová (a nirúaká japi riká mi raʼicha) o jarecho oselí jiti mi che machimea echi namuti jitra. d Ayénachó leeri japi ta leéripo echoná Biblia Conmemoración kaachi japi chukú echoná Oselí japi binepo echoná napawíliwachi  Nokiboa japi riká isili Cristo. Alí kiti wikawá inea echi video japi ta inepo echalí biʼá Conmemoración kaachi. Ata we aʼlá natásaká japi nokali Jeobá alí Jesús tamujé jitra, ati oméripo iʼwiria jarecho jiti we natéami niraa inema echi Conmemoración (Esd. 7:10).

IʼWÍRIPO JARECHO JITI SIMAMA ALÍ KANÍLIMA ECHONÁ CONMEMORACIÓN

13. ¿Piri ju echi bacháwala namuti japi ta omeri nokayá jiti jarecho achó simama alí kanílima echoná Conmemoración?

¹³ ¿Chúriká iʼwíripo jarecho jiti simama alí kanílima echoná Conmemoración? Echi bachá namuti japi ta omeri nokayá ko ju: ata bayésaré echoná Conmemoración. Ke bi japalí ta simía nawisasia, ayénachó ata omeri osayá jaré pagótami riwalá japi ta bayénali echoná Conmemoración, japi riká tamujé téemala, japi ta yúa nocha, japi ta yúa simía escuela alí jarecho si japi ta machí. Ati ke olásaká echi oselí japi ta jitra bayé, ata omeri júulia bilé enlace echoná celular. ¡Ke ti machí chu kipu echi japi ta bayeli a nolínima! (Ecl. 11:6).

14. ¿Chúsiá we natéami ju japi ta nijibo invitación? Ruyé bilé ejemplo.

¹⁴ Kiti natá japi bilé ke simea japalí mi iyasa bilé invitación. Siné kaachi, bilé hermana ke mayea nílili japalí echi kunala japi ke Testigo nili, aneli echi japi a simea echoná Conmemoración. ¿Chúsiá ke mayeli japi simea? Jiti echi ko wisabé niraa bayeli japi simea, nalí ke siné simili. ¿Chúsiá jipi ko a siminálili? Echi ko anili japi bilé anciano japi machili, echi iyali bilé invitación alí echi kunala ko a simili echalí bamíali alí jarecho si bamíali.

15. ¿Piri ta newalásaré japalí ti bayé bilé echoná Conmemoración?

¹⁵ Ati newalásaré japalí ti bilé bayé echoná Conmemoración a keʼré japi echi machinálima jaré namuti alí wabé japalí ke siné simili echoná napawíliwachi. Jiti la we natéami ju japi ta natabo piri namuti machinálimiré alí chúriká ruyepo (Col. 4:6). Japi riká, a machináliré: “¿Piri  nokiwá echoná? ¿Chu kilí rojorá echi napawíliwami? ¿Chúriká napáchika simísaré? ¿Achi tánima winomí echoná?”. Ati oméripo naria echi japi ta bayeli piri machinali alí echi jitra ruyepo. Alí ati oméripo néea echi videos Natáboré echi Jesús mukúala alí ¿Chu nokiwá japoná napawíliwa? Ayénachó echoná binelíwami 28 echi libro We mi kanílika bitélima aní jaré namuti japi ta oméripo ruyea echi pagótami.

16. ¿Piri jarecho namuti machinálimiré bilé japi ma simili echoná Conmemoración?

¹⁶ Ma simírisa echi Conmemoración, echi pagótami machinálimiré jarecho si namuti. A keʼré echi ko nárima chúsiá ke bilé (o ke sinéami) koʼali echi pan alí bajili echi vino. Ayénachó nárimiré chu kisapi ti niwá echi Conmemoración alí achi sinibí echi riká nokiwá. Tákoré echi nawésali japi nijili echoná Conmemoración raʼíchili wiká echi jitra, nalí echi ko aminabi aʼlá machinálimiré echi jitra. Jiti mi omérima ruyea jaré namuti japi echi machinali, mujé ko omero néea echi artículo japi chukú echoná jw.org riwéami “¿Por qué los testigos de Jehová celebran la Cena del Señor de forma diferente a otras religiones?”. Ati iʼwérili nokinali iʼwiria echi pagótami jiti simama alí kanílima echoná Conmemoración (Hech. 13:48).

IʼWÍRIPO ECHI JAPI RIWELI NAPAWÍA ECHONÁ CONGREGACIÓN

17. ¿Chúriká omérima nokayá echi ancianos jiti iʼwírima echi hermanos japi ma ke napawí echoná congregación? (Ezequiel 34:12, 16).

¹⁷ Conmemoración kaachi, ¿chúriká omérima echi ancianos iʼwiria echi hermanos japi ma ke napawí echoná congregación? Néwariwélitia japi we natéami ju echi jitra alí we simá nokayá echi yúa (leeri Ezequiel 34:12, 16). Ancianos, kecho séachi Conmemoración, iʼwérili nokisí raʼichia sinéami echi yúa japi timí omeri. Anesi japi timí we galé alí japi timí iʼwírinali japalí echi newalé. Alí bayesi jiti simama echoná Conmemoración. A simásaká, we kanila narépisi. Alí ma simírisa echi Conmemoración, kiti riwesi  raʼichia echi hermanos yúa alí iʼwírisi jiti checho ku mulíwima Jeobá (1 Ped. 2:25, TNM).

18. ¿Chúriká ti oméripo iʼwiria sinéami echi japi ma ke napawí tamujé yúa echoná congregación? (Romanos 12:10).

¹⁸ Sinéami hermanos echoná congregación, ati omeri iʼwiria echi japi sili echoná Conmemoración alí japi ma ke tamó yúa napawí. ¿Chúriká nokiboa? Newa nokiboa japi ta we galé echi, simá nokáami nipo alí riwíwipo echi (leeri Romanos 12:10). Newalabo japi echi hermanos jilí niráliré checho ku simíaya echoná napawíliwachi. Alí a keʼré japi nátili chúriká nokimea echi hermanos echi yúa. e Jiti la ke náripo echi namuti japi echi omonáritima (1 Tes. 5:11). Tamujé ko we galé echi hermanos alí ti we kanili napawika ku nóchilia Jeobá echi yúa (Sal. 119:176; Hech. 20:35).

19. ¿Chúriká tamó iʼwiri simíaya echoná Conmemoración?

¹⁹ Japi riká ti ma bineli, ati machí japi we natéami ju japi sinibí bamíali napawipo echoná Conmemoración japi riká Jesús anili. Echi riká nokayá we tamó iʼwiri alí ayénachó we iʼwiri jarecho pagótami (Is. 48:17, 18). Japi riká, tamó iʼwiri aminabi galea Jeobá alí Jesús, ayénachó jiti néwariwélitipo japi ta we natéami niraa iné japi nokali tamujé jitra. Alí tamó iʼwiri aminabi we napawika niya echi hermanos yúa alí jiti iʼwíripo jarecho pagótami jiti machimea piri nokisáré naremia echi namuti aʼláala jiti Jesús ma mukuli. Jiti la, iʼwérili nokiboa ma aʼlárika buwea mochía echi Conmemoración, echi rawé wabé natéami japi ta olá sinibí bamíali.