1. Nagnino ro andro tena lahibey amy ty taogne o Fahatsiarovagneo? (Lioka 22:19, 20)

 TY FAHATSIAROVAGNE ty nimateza i Jesosy, le andro tena lahibey hoahy o vahoa i Jehovah-o isan-taogne. Io avao ty fotoagne manokagne nandilia i Jesosy o mpanonjohy ty lia’eo mba hankalazaegne. (Vakio ty Lioka 22:19, 20.) Maro ty anto’e mahavy antikagne fa tsy mahalìgne ty hiavia izay. Andao tika handineke ty ila’e amy izay.

2. Ino iaby ty anto’e ila’e mahavy antika tsy mahalìgne ty hiavia i Fahatsiarovagney?

² Magnampe antika hisaintsaigne ty maha lahibey i solovoigney i Fahatsiarovagney. Io ty fomba ahafahantika manoro ty fankasitrahantika i sorogne natao i Jesosỳ. (2 Kor. 5:14, 15) Amy io ka ty “ahafahantika mifampahery” amo o rahalahy naho o rahavaveo. (Rom. 1:12) Isan-taogne, le maro amy i ndaty fa tsy mivory sasa rey ro avy amy io. Ty ila’e le manjare miheregne amy i Jehovah indraike noho iareo nirambesegne soa. Maro ka ty ndaty liagne manomboke mianatse Baiboly noho ty raha nitrea’e naho nirei’e tagne. Noho ze raha iaby rezay ty mahavy o Fahatsiarovagneo ho tena lahibey amantika!

3. Nagnino o Fahatsiarovagneo ro mampiharo raike antika magneran-tane? (Henteo i sarey.)

³ Eretsereto tie nagnino o Fahatsiarovagneo ro mampiharo saigne antika magneran-tane. Miarake magnatreke o fotoagne iohoe o Vavolombelo i Jehovah magneran-taneo naho fa manomboke tsofotse i masoandroy. Miarake mitsanogne i lahajaka mirehake miomba ty maha lahibey i solovoigney tikagne iaby amy io. Manao hira roe tikagne, le ampandalovegne i mofo  naho i divaỳ sady miarake manao “amena” iaby tika amy i vavake efatse rey. Agnate ty 24 lera le mitovy hoe izay iaby ty fandaharagne atao o fiangonagneo. Azo’o sare an-tsaigne vao ty hafaleagne tsapa i Jehovah naho i Jesosy naho fa mahatrea antika miharo raike mba hagnomey engegne iareo amo o fotoagne iohoeke?

4. Ino ty hodinehentika amy ty lahatsoratse toy?

⁴ Andao tika handineke ty fagnonteneagne retoa: Akore ty hagnomanantika ty fontika mba ho vognogne amy i Fahatsiarovagney? Akore ty hagnampeantika ty hafa naho ze fa tsy mivory sasa mba handrambe soa amo o fotoagne iohoe? Hagnampe antika ho vognogne amo o fotoagne tena lahibey iohoe ty vale ireo.

AKORE TY HAGNOMANANTIKA TY FONTIKA MBA HO VOGNOGNE AMY I FAHATSIAROVAGNEY?

5. a) Nagnino tika ro toko’e hisaintsaigne ty maha lahibey i solovoigney? (Salamo 49:7, 8) b) Ino ty raha nianara’o boake amy ty video tihoe Nagnino i Jesosy Nimateo?

⁵ Ty fomba tena lahibey hagnomanantika ty fontika, le ty fisaintsaignagne ty maha lahibey i solovoigne natao i Jesosỳ. Tsy afake magnavotse ty vatantika amy ty ota naho ty fate tika. (Vakio ty Salamo 49:7, 8; henteo ka ty video tihoe Nagnino i Jesosy Nimateo?) a Faie ty Jehovah le nagnomey i Jesosy mba hanao sorogne ty fiai’e hagnavotagne antika. (Rom. 6:23) Arakarake ty isaintsaignantika ty raha natao i Jehovah naho i sorogne natao i Jesosỳ ro vao mainke hahavy antika hankasitrake i solovoigney. Handineke raha tsiampeampe tsy nimora tamy i Jehovah naho i Jesosy tika naho fa nagnomey i solovoigney iareo. Faie ino moa ty atao tihoe solovoigne?

6. Ino ty atao tihoe solovoigne?

⁶ Tihoe solovoigne, le vola aloa mba hivilianagne raha raike fa nian-tegna tie taloha. Voririke ty Adama, i lahilahy voaloha’ey naho fa niforognegne. Naho fa nanota reke, le namoe i fiaignagne nainai’ey. Faie tsy ireke avao fa ndra ty tarira’e ka. Mba hagneregnagne indraike i aigne voririke nafoe i Adamay, le nagnomey ty fiai’e voririke mba hatao sorogne ty Jesosy. Tagnate i fotoagne niaigna’e tan-tane etoỳ, le “tsy nanota reke sady tsy nahitagne vande tamy ty falie’ey.” (1 Pet. 2:22) Voririke manahake i Adama tamy ireke mbe tsy nanotay ty Jesosy. Naho fa nimate areke reke le afake nivily i aigne voririke nafoe i Adamay.​—1 Kor. 15:45; 1 Tim. 2:6.

7. Ino iaby ty ila’e amy ty fitsapagne natrehe i Jesosy tamy ireke tan-tane etoỳ?

⁷ Nankatò i Rae’e an-dagnitse agney avao ty Jesosy ndra tie teo aza ty tsapa-hevetse natrehe’e tambone tane etoy. Voririke ty Jesosy naho fa naterake fa i rae aman-drene’e rey ro tsy voririke faie nankatò iareo avao reke. (Lioka 2:51) Tamy i Jesosy mbe nitanora le va’e sinere ty hafa tsy hankatò rae aman-drene naho hivalike amy i Jehovah. Naho fa nibey ty Jesosy, le nila nanohetse ty tsapa-hevetse natao i Satana naho fa nirehake tama’e mivantagne reke mba hivalike aman’Agnahare. (Mat. 4:1-11) Natao i Satana ze hahavy i Jesosy hanota, amy izay reke tsy afake magnomey i solovoigney.

8. Ino ka ty raha sarotse hafa natrehe i Jesosy?

⁸ Tamy i fotoagne nanompoa’e tambone tane etoỳ, le nisy tsapa-hevetse hafa ka natrehe i Jesosy. Nagnenjeke aze o fahavalo’eo sady nite hamono aze. (Lioka 4:28, 29; 13:31) Niatreke ty tsy fahavoririha o mpiana’e reo ka reke. (Mar. 9:33, 34) Naho fa nitsaraegne ka reke le mbe nisy avao ty nampijale naho nitsikike aze. Tafara izay le nivonoegne reke sady  nisalaregne. (Heb. 12:1-3) Io ty raha fara’e natrehe i Jesosy faie tsy niaro aze tamy izay ty Jehovah. b​—Mat. 27:46.

9. Ino ty tsapantika miomba i solovoigne natao i Jesosỳ? (1 Petera 1:8)

⁹ Tena nijale areke ty Jesosy naho fa nagnomey i solovoigney. Naho fa itika misaintsaigne ty raha maro nafoe i Jesosy mba hanoagne sorogne ty fiai’e ho antika, tsy vao mainke mahavy antika hotea aze vao zay?​—Vakio ty 1 Petera 1:8.

10. Ino ty raha nitsapa i Jehovah naho fa nagnomey i solovoigney i Ana-dahi’ey?

¹⁰ Inogne ka ty raha nafoe i Jehovah naho fa nagnomey i solovoigney i Ana-dahi’ey? Mifandrambe marine manahake o rae naho anakeo ty Jehovah naho i Jesosy. (Ohab. 8:30) Mba eretsereto moa ty raha nitsapa i Jehovah naho fa nahavazoho i Ana-dahi’ey niatreke raha sarotse maro tambone tane etoy reke. Azo antoke fa tena nalahelo ty Jehovah nahavazoho aze nampijalé o ndatio, niheje iareo vaho nitsapaegne.

11. Magnomeza ohatse mampiseho ty raha nitsapa i Jehovah naho fa nivonoegne ty Jesosy.

¹¹ Ze rae aman-drene fa nimate anake, le azo antoke fa mahatakatse soa tie tena mafe zay. Tena mino tika tie hatsangagne ty mate faie malahelo tika naho fa misy ndaty teantika mate. Ze ohatse zay, le magnampe antika hahatakatse ty fihetseham-po nitsapa i Jehovah naho fa nahavazoho i Ana-dahi’e tena tea’ey, nijale naho nivonoegne tamy ty taogne 33 A.K. c​—Mat. 3:17.

12. Ino ty azontika atao amy i heregnandro aloha i Fahatsiarovagney?

¹² Amparake ty hiavia i Fahatsiarovagney, le nagnino naho atao’o fianaragne raike ndra fotoam-pivavaha ty keleiagne ty miomba i solovoigney? Ampiasao ty Fitaovagne Fikarohagne Hoahy ty Vavolombelo i Jehovah (naho misy amy ty fireha’o) ndra boke naho gazete hafa mirehake miomba i solovoigney. d Oriho soa ka ty Famakiagne Baiboly hoahy ty Fahatsiarovagne amy ty Fanompoagne Naho ty Fiaignantika Kristiana: Tari-dalagne Hoahy ty Fivoriagne. Amy ty andro i Fahatsiarovagney ka, le ko haligno ty magnente i fandaharagne manokagne Fotoam-pivavahagne Maraindraigney. Naho fa magnomagne ty fontika mba ho vognogne amy i  Fahatsiarovagney tika, le afake hagnampe ty hafa mba handrambe soa amy io ka.​—Ezra 7:10.

AMPEO TY HAFA MBA HANDRAMBE SOA

13. Ino ty raha voaloha’e azontika atao mba hagnampeagne ty hafa handrambe soa amy i Fahatsiarovagney?

¹³ Akore ty hagnampeantika ty hafa mba handrambe soa amy i Fahatsiarovagney? Voaloha’e asao iareo. Ankoatse i ndaty treantika amy i fanompoagne ey rey, le anò lisitse ka ze ndaty fanta’o azo’o asaegne. Agnisa izay zao ty longo’o, ty mpiara-miasa ama’o, ty mpiara-mianatse vaho ty ndaty hafa. Ndra tie tsy ampe ty fanasagne vita pirinty anagnantika le azontika zaraegne i tohy amy internet aoy. Va’e ho tampoke antika ty ho hamaro ty ndaty hoavy!​—Mpito. 11:6.

14. Magnomeza ohatse mampiseho tie misy voka’e soa ty fagnomezagne i fanasagne rey.

¹⁴ Tena misy voka’e soa ty fagnomeza’o i fanasagney. Misy rahavave raike zay manambaly tsy vavolombelogne, le tena nitampoke aze naho fa nirehake tama’e ty vali’e tie hiarake ama’e hagnatreke Fahatsiarovagne. Nagnino zay ro nitampoke aze? Satria tagnate ty taogne maro le nandrisike i vali’e mba hagnatreke i rahavavey faie tsy niavy ty vali’e. Ino ty tsy nampitovy o fotoagne reo? “Nahazo fanasagne raho” hoe i lahilahy vali’ey satria nisy androanavi-pagnahy fanta’e tan-toeragne eo nagnomey fanasagne aze. Nanjare nagnatreke Fahatsiarovagne i vali’ey tamo o taogne iohoe naho tagnate ty taogne maro tafara tatoy.

15. Ino ty raha mila tadidientikagne naho fa manasa ndaty hagnatreke Fahatsiarovagne?

¹⁵ Ko haligno fa va’e hagnontane antika i ndaty asaentika rey lohotsie i aze vaho samba’e magnatreke rey. Azontika atao ty mandineke mialoha ty fagnonteneagne va’e hagnontenea iareo naho magnomagne ty ho vale izay. (Kol. 4:6) Va’e hirehake ohatse iareo tie: ‘Ino ty raha hiseho agne?’ ‘Haharetse lera fire i fandaharagney?’ ‘Lamba manao akore ty hagnisiagne?’ ‘Misy vola aloa vao?’ ‘Misy vola zaraegne vao?’ Naho fa manasa ndaty hagnatreke Fahatsiarovagne rehe le agnonteneo reke tie: “Misy raha tea’o hagnonteneagne vao?”, le  valeo reke. Ampiasao ty video tihoe Tsiarovo ty Nimateza i Jesosy naho tihoe Inogne ty Atao amy i Anjomba i Fanjakagney Agne? mba hagnampeagne i ndatỳ hahafantatse tie akore ty fomba anoagne ty fivoriantika. Misy hevetse fanjaka maro azo’o rehafegne ama’e ka ty lesogne 28 amy ty boke Ankamamio Nainai’e o Fiaignagneo!

16. Ino ty fagnonteneagne hafa va’e hagnontenea ze nagnatreke Fahatsiarovagne?

¹⁶ Afara i Fahatsiarovagney, le va’e hisy ndaty liagne hametrake fagnonteneagne. Ohatse, nagnino ro tsy misy ndra tsy ampe avao ty mihinagne i mofo naho i divaỳ? Impire ty hanoagne i fankalazagney? Va’e tea’e ho fantatse ka tie mitovy amy igne iaby vao ty fomba anoa ty Vavolombelo i Jehovah aze. Ndra tie maro aza ty hevetse rehafegne amy i lahajaka Fahatsiarovagney, le va’e mbe mipay fagnazavagne maro o ndaty vaovaò. Afake magnampe antika hamale ty fagnontenea iareo ty lahatsoratse tihoe “Nagnino ro Tsy Mitovy amy ty Ahy o Fivavahagne Hafao ty Fomba Ankalazà o Vavolombelo i Jehovah-o i Mahakama Hariva i Tompoy?” amy jw.org/tdx ao. Te hanao ze azontika atao tika aloha naho agnate vaho afara i Fahatsiarovagney mba hagnampeagne ze ndaty ‘liagne’ handrambe soa amy i fankalazagney.​—Asa. 13:48.

AMPEO ZE NDATY FA TSY MIVORY SASA

17. Akore ty azo o androanavi-pagnahio agnampeagne ze fa tsy mivory sasa? (Ezekiela 34:12, 16)

¹⁷ Agnate i vanim-potoa i Fahatsiarovagney, le afake magnampe ze fa tsy mivory sasa o androanavi-pagnahio. Atorò iareo tie mitretré iareo rehe. (Vakio ty Ezekiela 34:12, 16.) Aloha i Fahatsiarovagney, le anò azo antoke tie fa niantso iareo arake ze azo atao rehe. Rehafo amy iareo tie te hagnampe iareo rehe sady te hanao ze fara’e soa vita’o. Asao hagnatreke Fahatsiarovagne iareo, le rambeso soa naho fa avy agne. Afara i Fahatsiarovagney, le tohizo avao ty fitiliha’o naho ty fiantsoa’o o rahalahy naho rahavaveo. Omeo iareo ze fagnampeagne ara-pagnahy ilae iareo mba hahavy iareo hiheregne amy i Jehovah.​—1 Pet. 2:25.

18. Akore ty azontika iaby agnampeagne ze fa tsy mivory sasa? (Romanina 12:10)

 ¹⁸ Afake magnampe ze fa tsy mivory sasa mba hagnatreke Fahatsiarovagne tika iaby agnivo fiangonagneo. Amy ty fomba akore? Amy ty alala ty fanehoagne hatea, hasoa fagnahy naho fagnajagne iareo. (Vakio ty Romanina 12:10.) Ko haligno fa va’e ho sarotse amy i ndaty fa tsy mivory sasa rey ty hiheregne hivory ndraike. Va’e hatahotse ohatse iareo tie kera tsy handrambe soa iareo ty ndaty amo o fiangonagneo eo. e Faie ko magnontane ndra mirehake raha va’e hanafintohigne aze. (1 Tes. 5:11) Mbe agnisa ty mpiharo finoagne amantika avao iareo. Tena fale tika naho miarake manompo amantika indraike iareo!​—Sal. 119:176; Asa. 20:35.

19. Ino ty soa rambesentika boake amy ty Fahatsiarovagne ty nimateza i Jesosy?

¹⁹ Tsy mankasitrake i Jesosy vao tika noho ireke nandily antika mba hagnatreke i Fahatsiarovagney sady nagnampe antika hahafantatse ty anto’e anoantika izay? Maro ty soa horambesentika naho ty hafa naho fa magnatreke Fahatsiarovagne. (Isaia 48:17, 18) Hitombo ty hateantika i Jehovah naho i Jesosy. Izay ka ty fomba anoroantika fa tena mankasitrake iareo tika. Hihamafe ka ty fifandrambesantika amo o mpiara-manompò. Afake magnampe ty hafa hahafantatse ka tika tie akore ty handrambesa iareo soa amy ty fitahiagne boake amy i solovoigney. Lonike areke tika hanao ze azontika atao mba ho vognogne hagnatreke Fahatsiarovagne, i andro tena lahibey amy ty taogney!