1. Khu ginani litshigu nya Gidundrugiso li gu litshigu nya lisima ngudzu nya mwaga? (Luka 22:19, 20)

 GA VATHU va Jehovha, litshigu nya Gidundrugiso nya gufe ga Jesu Kristo khilo litshigu nya lisima ngudzu nya mwaga. Buzu wowu khuwo basi Jesu a embedego vapizane vaye gu wu gira. (Leri Luka 22:19, 20.) Ethu ha gu vireya khu maho nyo fuviye litshigu nya Gidundrugiso khu sighelo nya singi. Hongoleni hi hevbulani khu sighelo nyo khaguri.

2. Khu ginani hi vireyago Gidundrugiso khu maho nyo fuviye?

² Gidundrugiso gya gu hi phasa gu dundrugeya khu lisima nya dzegiso ni makategwa hi na ma manago. Gya gu hi phasa gu wona dzindziya hi nga yeyedzago khidzo gubonga khu dzegiso wa Jesu. (2 Kor. 5:14, 15) Gi ngu hi ninga gambe lithomo nya gu hi “tiyisana khu gyathu” ni vandriyathu. (Rom. 1:12) Mwaga ni mwaga, vandriyathu va emidego gu hongola mitshanganoni va ngu manega Gidundrugisotuno. Vambe va ngu bweleya ga Jehovha khu kotani nya lihaladzo va yeyedzwago khu vandriyathu. Nigu vathu nya vangi va ngu tsakeya gu pheya gu hevbula Bhibhiliya khu gu kutswa khesi va si wonago ni gu sipwa. Khu kharato, kha si hi hlamadzise gu Gidundrugiso gi khala gilo nyo hathege ngudzu myonyoni yathu.

3. Gidundrugiso gya gu tshanganisa kharini vandriyathu mafuni gwatshavbo? (Wona fotu.)

³ Hi ngu vireya khu maho nyo fuviye litshigo nya Gidundrugiso, kholu mafuni gwatshavbo hi ngu tshangana gumogo ni vandriyathu. Dzifakazi dza Jehovha dzi ngu tshangana mafuni gwatshavbo tepo khiyo li pfolago lidambo. Hatshavbo hi ngu engiseya ganelo  yi tshingisago lisima nya dzegiso. Hi ngu embeleya dzindzimo dzimbili nya gu dhumise Jehovha, hi vbindrisa pawu ni vhinyu si emeyago givili ni novba wa Jesu hi bwe hi ganeya khu monyo wathu watshavbo khethu “amen” avbo nya 4 milombelo yi girwago. Ndrani nya litshigu limwedo mabandla yatshavbo ma na gira sasimweso. Ina u ngu dundrugeya khu litsako eli Jehovha ni Jesu va lipwago tepo khiyo va hi wonago na hi tshanganide khu ndziya yeyi?

4. Hi na bhula khu ginani avba nya ndrima yeyi?

⁴ Avba nya ndrima yeyi, hi na bhula khu siwudziso sesi: Hi nga dongiseya kharini myonyo yathu gasi gu hongola Gidundrugisotuno? Hi nga phasa kharini vambe gu wuyedwa khu Gidundrugiso? Nigu hi nga phasa kharini vale va emidego guta mitshanganoni? Mihlamulo nya siwudziso sesi yi na hi phasa gu dzi dongiseya gwadi ga gigiro gegi nya lisima.

HI NGA DONGISEYA KHARINI MYONYO YATHU GASI GU HONGOLA GIDUNDRUGISOTUNO?

5. a) Khu ginani hi yedego gu dundrugeya khu lisima nya dzegiso? (Ndzimo 49:7, 8) b) Ginani u gi hevbudego avbo nya vhidhyu yi gu khiyo, Khu ginani Jesu a ngafa?

⁵ Mweyo nya dzindziya hi nga dongiseyago khidzo myonyo yathu gasi gu hongola gidundrugisotuno, khu gu dundrugeya khu lisima nya dzegiso wa Jesu Kristo. Ethu habune, na ha sa si kodza gu dzi tshudzisa avba nya gighoho ni gufa. (Leri Ndzimo 49:7, 8; wona vhidhyu yi gu khiyo, Khu ginani Jesu a ngafa?) a Khu kharato, Jehovha a di gira malulamiselo nya gu Jesu a ningeya womi waye gasi gu hi tshudzisa. Jehovha ni Jesu va giride gudzigaradza nya gukhongolo ngudzu khu kotani yathu. (Rom. 6:23) Tepo hi dundrugeyago khu gudzigaradza ogu Jehovha ni Jesu va gu giridego khu kotani yathu, hi na engedzeya gu ninga lisima dzegiso. Hi na wona silo nyo khaguri esi Jehovha ni Jesu va livbidego gu dhura khu kotani nya dzegiso. Ganiolu, ginani gi pategago avbo nya dzegiso?

6. Ginani dzegiso?

⁶ Dzegiso i tengo wu livbwago gasi gu renga gilo gi luzidwego. Adhamu, mwama nyo pheye, a giridwe nari ni womi nya gu vbeleye. Tepo a nga ghoha, a di luza lithomo nya gu vbanye kala gupindruga gumogo ni sanana saye satshavbo. Gasi gu renga esi si luzidwego khu Adhamu, Jesu a di ningeya womi waye nyo vbeleye kha nga dzegiso. Tepo Jesu a nga ba a romo mafuni “kha ghoha nigu kha ga duga wukanganyisi khu kanani gwaye.” (1 Ped. 2:22) Tepo Jesu a ngafa, a diri ni womi nya gu vbeleye gu fana ni Adhamu na si gu ghohi. Khu kharato, khu gu ba Jesu a ningede womi waye, a di livba khu gu vbeleya womi wu luzidwego khu Adhamu. — 1 Kor. 15:45; 1 Thim. 2:6.

7. Khu sevbini sigaradzo a emisanidego naso Jesu tepo a nga ba a romo mafuni?

⁷ Jesu simamide na tumbegide ga Papayi waye wa ndzadzini, ambari olu a nga ba a emisana ni sigaradzo nya singi tepo a nga ba a romo mafuni. Jesu a diri gyanana nyo vbeleye, ambari ulolo a di gu engisa vavelegi vaye nya mba vbeleya va mafuni. (Luka 2:51) Tepo a nga ba ari ga tanga nya gu dzi tshotshoti, uye a di yede gu simama na tiyide gasi gu pala kutsedzelo nya vambe vathu, wu nga hadzi gu mu gira a si engisi vavelegi vaye ni gu mba tumbega ga Jehovha. Nigu tepo Jesu a nga ba ari khongolo lingidwe khu Sathane, ganiolu a di simama gutumbega ga Nungungulu. (Mat. 4:1-11) Sathane a di dzi emisede gu gira Jesu a ghoha gasi a si si kodzi gu hi dzegisa.

8. Khu sevbini simbe sigaradzo Jesu a nga si timiseya?

⁸ Tepo khiyo a nga ba a gira thumo waye avba mafuni, Jesu timisede sigaradzo. Uye a wugedwe va bwe va vbweta gu mu songa. (Luka 4:28, 29; 13:31) Emisanide ni gu mba vbeleya ga valandreyi vaye. (Marko 9:33, 34) Tepo va nga hunga gu  mu songa, va mu tshaniside ni gu mu hega. Khu gu landreya, a di songwa khu ndziya nya xapi ni dzitshoni. (Hebh. 12:1-3) Uye timisede gilingo gyaye nyo hegise nya mba na giphaso gya Jehovha. b — Mat. 27:46.

9. Ha gu dzipwa kharini khu dzegiso wa Jesu? (1 Pedro 1:8)

⁹ Jesu tshanisekide ngudzu gasi gu hi tshudzisa. Ha gu dundrugeya khu satshavbo esi Jesu a giridego gasi gu hi dzegisa, lihaladzo lathu khuye li na engedzeya. — Leri 1 Pedro 1:8.

10. Jehovha a dzipwide kharini khu kotani nya dzegiso?

¹⁰ Ahati Jehovha, ginani a giridego khu gu dzina gwaye gasi gu hi ninga Jesu kha nga dzegiso? Jehovha ni Jesu va na ni wupari nyo tiye wu nga manegago ga papayi ni gyanana. (Mav. 8:30) Nga dundrugeya edzi Jehovha a dzipwidego khidzo tepo a nga ba a wona Jesu na gu timiseya silingo mafuni. Nya mba kanakana, Jehovha garadzegide ngudzu khu gu wona gyanana gyaye na gi gu tshaniswa, gi nyenywa ni gu lingwa.

11. Ninga giyeyedzo nya edzi Jehovha a dzipwidego khidzo tepo a nga wona Jesu na gu tshaniswa a bwe a songwa.

¹¹ Watshavbo muvelegi a fedwego khu gyanana a ngu guti guvbisa nya gu dugeledwe khu isoso. Hi na ni gukhodwa nyo tiye nya gu wuge ga ava va fudego, ganiolu tepo hi fedwago khu sigodwa sathu, hi ngo simama gupwa guvbisa nya gukhongolo. Giyeyedzo gegi, gi ngu hi phasa gu pwisisa edzi Jehovha a dzipwidego khidzo tepo a nga wona gyanana gyaye a gi golago na gi gu tshaniseka gi bwe gifa khu mwaga nya wu 33 matshigoni yathu. c — Mat. 3:17.

12. Ginani hi nga girago tepo gi hidzimeyago Gidundrugiso?

¹² Gukhugeya olu kala litshigu nya Gidundrugiso, dzi garadzeye guti nya singi khu dzegiso ga gihevbulo gyago nya muthu enga mwendro khu ndranga. Thumisa Libhuku nyo peskizari khilo nya Dzifakazi dza Jehovha mwendro mambe mabhuku gasi guti nya singi khu dzegiso. d Vbavbandze nya isoso, landrisa sasamedzo nya gu lerwi nya Bhibhiliya wu gimbileyanago ni Gidundrugiso wu gomogo avba nya Thumo ni mavbanyelo yathu nya Wukristo — Gibhukwana nya Mitshangano. Nigu ga litshigu nya Gidundrugiso u nga divaledwi gu sixitiri Wukhozeyi wa Vbadzimindrutuno. Tepo hi dongiseyago myonyo yathu gasi gu hongola Gidundrugisotuno, hi na ba hi dongide gu phasa vambe gu wuyedwa khigyo. — Ezira 7:10.

 PHASA VAMBE GU WUYEDWA KHU GIDUNDRUGISO

13. Khu gevbini gilo nyo pheye u na girago gasi gu phasa vambe gu wuyedwa khu Gidundrugiso?

¹³ Hi nga phasa kharini vambe gu wuyedwa Gidundrugisotuno? Gilo nyo pheye gu va rana. Vbavbandze nyo rane basi ava hi va manago thumoni nyo tshumayele hi nga gira sasamedzo nyo khaguri nya ava hi dogoreyago gu va rana. Nya nga valongo vathu, sithumi khwathu, sihevbuli khwathu ni vambe. Ambari ha gu ba hiri mwalo konvhite nyo ghandlwe hi nga mu rumeleya link gasi gu mu rana. Kholu kha hi dziti gu khethu khu mani a na tago! — Muh. 11:6.

14. Tshamuseya esi si giregago wa gu konvhidhari muthu khu wabune gu manega Gidundrugisotuno.

¹⁴ Tepo u hongolago khu wabune u ya konvhidhari muthu guta Gidundrugisotuno a ngu dzipwa nari ni lisima nigu a ngu kutsega gu patega. Ndriyathu nyo khaguri, litshigu limwedo a hlamadzisidwe khu mwama waye a gu siri Fakazi tepo a nga mu embeya gu khuye a gu gira makungo nya gu hongole naye Gidundrugisotuno. Khu ginani a nga hlamala? Khu gu myaga nya yingi yi vbindridego zamide gu kutsa mwama waye gu hongola Gidundrugisotuno, ganiolu kha nga tshuka na dzumede. Ginani gi mu kutsidego gu gira silo nyo hambane? Uye wari, khuye: “Nyi di ningwa konvhite yangu,” khu lidhota nyo khaguri nyi litigo. Ga mwaga wowo a manegide Gidundrugisotuno ni ga yimbe myaga yi nga landreya.

15. Tepo hi konvhidharigo vathu gasi guta Gidundrugisotuno, ginani hi yedego gu dundrugeya khigyo?

¹⁵ Dundruga gu khuwe tepo hi konvhidharigo vathu gu manega Gidundrugisotuno, va nga manega ni siwudziso nya singi maningano khu Gidundrugiso, ngudzu-ngudzu abari gu va nga si pategi ga igyo. Khu kharato, hi nga dzi dongiseya gasi gu hlamula siwudziso va nga hi girago. (Kol. 4:6) Khu giyeyedzo, vambe vakone va nga hi wudzisa gu khavo: ‘Ginani gi na giregago avba nya tshangano wowu?’ ‘Wu na vbedza tepo muni?’ ‘Sombo muni hi yedego gu ambala?’ ‘Kharini gu livbwago gasi gu beya?’ ‘Gu ngu girwa mihengo?’ Tepo hi konvhidharigo muthu gasi guta Gidundrugisotuno hi nga mu wudzisa gu khethu: “U na ni giwudziso nyo khaguri?” nigu khu gulandreya hi yede gu hlamula ni gevbini a na wudzisago. Hi nga thumisa gambe dzivhidhyu dzi gu khidzo, Dundruga gufa ga Jesu ni Ginani  gi Giregago Salawuni nya Mufumu?, gasi gu phasa muthu guti edzi mitshangano yathu yi girwago khidzo. Hi nga thumisa gambe gihevbulo 28 nya libhuku Vbanya nu tsakide kala gupindruga, gasi gu mana mambe mahungu hi nga ma thumisago.

16. Siwudziso muni va nga dzi girago ava va tago Gidundrugisotuno?

¹⁶ Hwane nya gu ba gi vbindride Gidundrugiso, ava va nga yeyedza gutsakeya va nga manega ni simbe siwudziso. Avo va nga dzi wudzisa gu khavo: Khu ginani va nga mba hodza pawu ni gu seya vhinyu? Khu ginani yi nga hodzwa ni gu sedwa khu vathu nya vadugwana? Gidundrugiso gyo girwa gungani khu mwaga? Nigu va nga vbweta guti gu khavo ina mitshangano yatshavbo nya Dzifakazi dza Jehovha yo girwa khu ndziya yayimweyo. Ambari olu siwudziso sesi si hlamudwago avbo nya ganelo nya Gidundrugiso, avo va nga vbweta guti nya singi. Umo nya gipandre gi gomogo omu nya jw.org gi gu khigyo “A Ceia do Senhor – porque é que as Testemunhas de Jeová a celebram de modo diferente?” gi nga va phasa gu mana mihlamulo nya siwudziso savo. Ha gu vbweta gu gira satshavbo hi si kodzago gasi hi dzi dongiseya na gi nga si vbohi Gidundrugiso, tepo gi vbohago ni hwane nya Gidundrugiso, gasi gu phasa ‘vatshavbo va nga dzi emiseya’ gu wuyedwa khigyo. — Mith. 13:48.

PHASA VALE VA EMIDEGO GUTA MITSHANGANONI

17. Madhota ma nga phasa kharini ava va emidego guta mitshanganoni? (Ezekiyeli 34:12, 16)

¹⁷ Tepo gi gimbiyago Gidundrugiso, madhota ma nga phasa kharini vale va emidego guta mitshanganoni. Madhota, ma yede gu va khathaleya khu lihaladzo. (Leri Ezekiyeli 34:12, 16.) Na gi nga si vbohi Gidundrugiso, u nga digi gu konvhidhari vathu nya vangi. Gira satshavbo u si kodzago gasi gu va yeyedza gu khuwe u ngu va khathaleya nigu u ngu dzina gu va phasa. Va konvhidhari gu patega Gidundrugisotuno. Va gu si kodza guta va hakhe khu lihaladzo. Hwane nya Gidundrugiso u nga emi gu bhula navo, simama gu va wuseya mwendro gu va ligareya nigu va khathaleye khu liphuvboni gasi va si kodza gu wuya ga Jehovha. — 1 Ped. 2:25.

18. Hi nga phasa kharini ava va emidego guta mitshanganoni? (Varoma 12:10)

¹⁸ Hatshavbo libandlani hi nga phasa ava va  emidego guta mitshanganoni khu litshigu nya gidundrugiso. Khu ndziya muni? Hi nga va phara khu ndziya nya lihaladzo, ndruda ni wuwadi. (Leri Varoma 12:10.) Dundruga gu khuwe adzina si va garadzede guta mitshanganoni. Adzina va nga thava gu khavo kha va na nga hakhwa gwadi libandlani. e Khu kharato, u nga va giri siwudziso mwendro gu ganeya silo si na va khunguvanyisago. (1 Tes. 5:11) Avo vandriyathu va liphuvboni. Ethu hi ngu tsaka khu gu tshangana gambe navo! — Ndzi. 119:176; Mith. 20:35.

19. Hi na wuyedwa khu ginani khu gu dundruga gufa ga Jesu?

¹⁹ Hi ngu bonga ngudzu Jesu khu gu ba a hi rumide gu dundruga gufa gwaye mwaga ni mwaga, nigu isoso si ngu hi phasa gu pwisisa lisima nya dzegiso. Tepo hi girago isoso, hi ngu wuyedwa ethu vamune ni vambe vathu khu dzindziya nya dzingi. (Isa. 48:17, 18) Lihaladzo lathu khu Jehovha ni Jesu li ngu engedzeya gu dandra. Hi ngu yeyedza edzi hi bongago khidzo khu satshavbo esi va hi giredego. Hi ngu tiyisa gupwanana gwathu ni vandriyathu. Nigu hi nga phasa vambe gu hevbula khedzi va nga wuyedwago khidzo khu makategwa hi ma manago khu kotani nya dzegiso. Hongoleni hi gira satshavbo hi si kodzago gasi gu manega Gidundrugisotuno nya mwaga wowu, kholu litshigu nya lisima ngudzu nya mwaga.