1. ¿Tuku xlakata lu xlakaskinka liʼakxilhaw kilhtamaku Akxni lakapastakkan akxni tinilh Cristo? (Lucas 22:​19, 20).

 KILHTAMAKU nema tlakg xlakaskinka liʼakxilhaw xlakskujnin Jehová, wa Akxni lakapastakkan akxni tinilh Cristo. Jesús limapakgsinalh pi xtlawaw uma lu xlakaskinka tamakxtumit (kalikgalhtawakga Lucas 22:​19, 20). ¡Lu lakaskinaw pi kachilha uma kilhtamaku! ¿Tuku xlakata? Kaʼakxilhwi makgapitsi tuku xlakata.

2. ¿Tuku xlakata lakaskinaw pi xlakgchalh akxni nalakapastakkan Cristo?

² Akxni lakapastakkan akxni tinilh Cristo kinkamakgtayayan nalilakpuwanaw la xlilhuwa xtapalh tamakamastan. Kinkamalakapastakayan makgapitsi tuku tlan natlawayaw xlakata nakalimasiyaniyaw Jehová chu Jesús pi kapaxtikatsiniyaw xlakata tamakamastan (2 Cor. 5:​14, 15). Na kinkamaxkiyan talakaskin makxtum nakatatawilayaw kinatalankan chu nalamaʼakgpuwantiniyaw (Rom. 1:12). Akgatunu kata, lhuwa tiku nialh skujnanikgo Jehová ankgo kʼuma tamakxtumit, chu makgapitsi laksakkgo nalakgtaspitparakgo Jehová xlakata xnatalankan kalimasiyanikgo tapaxkit. Nachuna, lhuwa latamanin lu kaks lilakawankgo tuku akxilhkgo chu tuku kgaxmatkgo anta, chu tsukukgo likgalhtawakgakgo Biblia. Putum uma tlawa pi lu xlakaskinka naliʼakxilhaw uma kilhtamaku.

3. ¿La kinkamakgtayayan naʼakxilhaw la makxtum wi xkachikin Jehová akxni lakapastakkan Cristo? (Na kaʼakxilhti dibujo).

³ Atanu tuku xlakata lakaskinaw pi xchilha uma kilhtamaku wa pi kinkamaxkiyan talakaskin naʼakxilhaw la makxtum wi xkachikin Jehová. Kxlikalanka katiyatni, putum xtatayananin Jehová tamakxtumiyaw chuna la tsankgatilha chichini kʼakgatunu kachikin. Putum akinin kgaxmataw akgtum taʼakgchuwin niku lichuwinankan la xlilakaskinka talakgmaxtut, likilhtliyaw akgtiy takilhtlin, matitaxtiyaw kaxtalanchu chu vino, chu tlawakan akgtati  oraciones niku xliputum kinakujkan wanaw «chuna kalalh». Kxlikalanka katiyatni, putum congregaciones tlawakgonit nawan uma kaj akgtum kilhtamaku. Kalilakpuwaw la paxuwakgo Jehová chu Jesús akxni kinkaʼakxilhkgoyan pi kxlikalanka katiyatni kamalankiyaw.

4. ¿Tuku naʼakxilhaw kʼuma artículo?

⁴ Kʼuma artículo nakgalhtiyaw umakgolh takgalhskinin: ¿tuku tlan natlawayaw la uku xlakata tlakg nalitamakgtayayaw akxni nalakapastakkan Cristo?, ¿la tlan nakamakgtayayaw amakgapitsin na nalitamakgtayakgo? chu ¿tuku tlan natlawayaw xlakata nakamakgtayayaw tiku nialh skujnanikgo Jehová? Xatakgalhtin umakgolh takgalhskinin nakinkamakgtayayan nakatsiyaw tuku tlan natlawayaw akxni nachan uma lu xlakaskinka kilhtamaku.

¿TUKU TLAN NATLAWAYAW LA UKU XLAKATA TLAKG NALITAMAKGTAYAYAW AKXNI NALAKAPASTAKKAN CRISTO?

5. 1) ¿Tuku xlakata talakaskin nalilakpuwanaw la xlilhuwa xtapalh kgalhi talakgmaxtut? (Salmo 49:​7, 8). 2) Kalichuwinanti tuku katsini kvideo ¿Tuku xlakata nilh Jesús?

⁵ Pulaktum tuku lu xlakaskinka kilitlawatkan akxni nina chin uma kilhtamaku wa pi nalilakpuwanaw la xlilhuwa xtapalh xtamakamastan Jesucristo. Kiʼakstukan nila xlakgtaxtuniw talakgalhin chu linin (kalikgalhtawakga Salmo 49:​7, 8; na kaʼakxilhti video ¿Tuku xlakata nilh Jesús?). a Wa xlakata Jehová makamilh xKgawasa xlakata xmastalh xlatamat kimpalakatakan, chu xchatiykan lhuwa xtapalh xokgokgolh xlakata xkinkalakgmaxtukgon (Rom. 6:23). Akxni tlakg lilakpuwanaw tuku tlawakgolh Jehová chu Jesús kimpalakatakan, tlakg xtapalh liʼakxilhaw talakgmaxtut. La uku, naʼakxilhaw tuku tlawakgolh Jehová chu Jesús kimpalakatakan. Pero pulana nalichuwinanaw tuku talakgmaxtut chu tuku xlakata xtalakaskin xkinkalakgmaxtukan.

6. ¿Tuku talakgmaxtut chu tuku xlakata xtalakaskin pi xkinkalakgmaxtukan?

⁶ Akgtum talakgmaxtut wa xtapalh nema milixokgot xlakata wi tuku natamawaxtuya o wi tuku namaspitnikana. Xapulana chixku, Adán, ni makglakgalhina xwanit akxni malakatsukika. Pero akxni makglakgalhinalh, nialhla latamalh putum kilhtamaku chu xkamanan na nialhla latamakgolh putum kilhtamaku. Xlakata Jesús tlan xtamawaxtulh tuku Adán xmakgatsankganit, mastalh xlatamat nema ni xkgalhi talakgalhin. Putuminika kilhtamaku nema kilatamachi kKatiyatni, Jesús «nipara akgtum talakgalhin tlawalh na nipara akgsaninalh» (1 Ped. 2:22). Ni xkgalhi talakgalhin akxni nilh, wa xlakata xlatamat xtachuna la latamat nema makgatsankgalh Adán (1 Cor. 15:45; 1 Tim. 2:6).

7. Kalichuwinanti makgapitsi tuku tuwa titaxtulh Jesús.

⁷ Akxni Jesús kilatamachi kKatiyatni, kgalhakgaxmatli xTlat xalak akgapun maski lhuwa tuku tuwa titaxtulh. Akxni aktsujku xwanit, kakgalhakgaxmatli xnatlatni xalak Katiyatni tiku makglakgalhinanin xwankgonit, maski xla ni makglakgalhina xwanit (Luc. 2:51). Akxni aku kstakma, max amakgapitsin xwanikgo pi ni xkakgalhakgaxmatli xnatlatni o xmakgxtakgli Jehová. Chu akxni lankata xwanit, Satanás wilinilh taputsan xlakata xmakgatsankgananilh Jehová (Mat. 4:​1-11). Satanás tlawalh putum tuku matlanilh xlakata xtlawaputun pi Jesús xtlawalh talakgalhin chu nila kxokgolh talakgmaxtut.

8. ¿Tuku atanu tuwa titaxtulh Jesús?

⁸ Akxni xlichuwinama Dios kKatiyatni, Jesús wi tuku atanu tuwa titaxtulh. Akgtum liʼakxilhtit, xtalamakgasitsin putsastalanikgolh chu wanikgolh pi xʼamakgo makgnikgo (Luc. 4:​28, 29; 13:31). Na tatayanilh tuku nitlan xtlawakgo xtamakgalhtawakgen (Mar. 9:​33, 34). Chu akxni mapakgsinanin xlakkaxwilimakgo namakgnikgo, lu makgapatinankgolh chu likgalhkgamanankgolh. Alistalh makgnikgolh chuna la xkamakgnikan  tiku xtlawakgonit tuku lu nitlan chu lu makgapatinankgolh (Heb. 12:​1-3). Chu akxni xʼamaja niy, Jehová nialh makgtayalh, wa xlakata talakaskilh pi xʼakstu xtayanilh tuku xaʼawatiya xliputsananimaka (Mat. 27:46). b

9. ¿Tuku makgkatsiyaw akxni lilakpuwanaw putum tuku tlawalh Jesús kimpalakatakan? (1 Pedro 1:8).

⁹ Liwana tasiya pi Jesús lu lhuwa xtapalh xokgolh xlakata xkinkalakgmaxtun. Akxni lilakpuwanaw putum tuku tlawalh Jesús kimpalakatakan, tlawa pi tlakg napaxkiyaw (kalikgalhtawakga 1 Pedro 1:8).

10. ¿Tuku tlawalh Jehová xlakata xkinkalakgmaxtun?

¹⁰ ¿Tuku tlawalh Jehová xlakata Jesús tlan kxokgolh talakgmaxtut? Chuna la katsiyaw, ni anankgo atanu tiku lu tlan latalalinkgo chuna la Jehová chu xKgawasa (Prov. 8:30). Wa xlakata kalilakpuwaw la makgkatsilh Jehová akxni akxilhli pi Jesús xtitaxtuma lhuwa tuku nitlan unu kKatiyatni. Xlikana pi max lu katsanilh akxni akxilhli pi xKgawasa nitlan xlikatsinimaka, xlakgmakgamaka chu lu xmakgapatinimaka.

11. ¿Tuku liʼakxilhtit kinkamakgtayayan naʼakgatekgsaw tuku makgkatsilh Jehová akxni akxilhli la makgnika Jesús?

¹¹ Natlatni tiku nikgonita xkamanankan liwana katsikgo la tamakgkatsi akxni titaxtukan uma tuku lu tuwa. Maski katsiyaw pi naʼanan talakastakwanat, uma ni mapanu takatsanajwat nema makgkatsiyaw akxni niy tiku lu xpaxkiyaw. Uma liʼakxilhtit kinkamakgtayayan naʼakgatekgsaw la makgkatsilh Jehová kkata 33, akxni akxilhli xKgawasa tiku lu xpaxki pi xpatinama chu nilh (Mat. 3:17). c

12. ¿Tuku tlan natlawayaw akxni nina lakgchan nalakapastakkan Cristo?

¹² Xlakata tsankgajku kilhtamaku nalakapastakkan Cristo, tlakg kalakputsananiw xlakata talakgmaxtut akxni kiʼakstukan kgalhtawakgayaw o akxni kakninaniyaw Dios kfamilia. Tlan nalimaklakaskinaw Liputsan xla xtatayananin Jehová o atanu likgalhtawakga xlakata tlakg nalakputsananiyaw uma. d Nachuna, kalikgalhtawakgaw textos nema lakkaxwilikanit Natalikgalhtawakga Akxni lakapastakkan akxni tinilh Cristo, nema min klikgalhtawakga Xlatamat chu xtaskujut kstalanina Cristo. Chu kaʼakxilhti video Kakninanikan Dios tsisa akxni lakapastakkan akxni tinilh Cristo. Komo natlawayaw putum uma, tlakg nalitamakgtayayaw akxni natalakapastaka Cristo chu tlan nakamakgtayayaw amakgapitsin na nalitamakgtayakgo (Esd. 7:10).

 KAKAMAKGTAYAW AMAKGAPITSIN NALITAMAKGTAYAKGO AKXNI NALAKAPASTAKKAN CRISTO

13. ¿La nakamakgtayayaw amakgapitsin nalitamakgtayakgo akxni nalakapastakkan Cristo?

¹³ ¿La tlan nakamakgtayayaw amakgapitsin nalitamakgtayakgo akxni nalakapastakkan Cristo? Pulana talakaskin nakawaniyaw pi kakinkataʼankgon kʼuma xlakaskinka tamakxtumit. Ni kajwatiya talakaskin namastayaw invitaciones akxni lichuwinanaw Dios kʼakgatunu chiki, na tlan nalhkawiliyaw k’akgtum lista xtuwanikan latamanin tiku kawaniputunaw pi kakinkataʼankgon kʼuma tamakxtumit, max tiku xalak kifamiliajkan, tiku akxtum kataskujaw, tiku akxtum kataʼanaw kʼescuela o amakgapitsi kintalilakgapasnikan. Komo namakgasputaw invitaciones xakapsnat, tlan nakamalakgachaniyaw invitación xa’electrónico. Ni katsiyaw, max lhuwa tiku naʼankgo (Ecl. 11:6).

14. ¿Tuku liʼakxilhtit limasiya pi max lu tlan nakinkakitaxtuniyan akxni wi tiku namaxkiyaw invitación?

¹⁴ Kalakapastakti pi akxni wi tiku maxkiya maktum invitación, max nalilakpuwan naʼan. Akgtum kilhtamaku, chatum tala puskat lu kaks lilakawa akxni xchixku, tiku ni xtatayana Jehová, wanilh pi xʼama taʼan akxni xʼamaka lakapastakkan Cristo. ¿Tuku xlakata uma tala lu kaks lilakawa? Xlakata xla makglhuwata xwaninit pi xtaʼalh, pero xla nikxni xʼanit. ¿Tuku xlakata xchixku lakpuwa naʼan? Xla wanilh pi chatum kgolotsin xalak congregación tiku xla xlakgapasa xmaxkinit maktum invitación. Xchixku uma tala puskat alh akxni lakapastakka Cristo uma kata chu amakgapitsi kata.

15. ¿Tuku kililakapastakatkan akxni wi tiku waniyaw pi kakinkataʼan akxni nalakapastakkan Cristo?

¹⁵ Kalakapastakwi pi akxni wi tiku waniyaw pi kakinkataʼan akxni nalakapastakkan Cristo, max wi tuku nakatsiputun, liwaka komo nikxni anit kʼakgtum tamakxtumit. Wa xlakata tlan nawan nalilakpuwanaw tuku max nakatsiputun chu la tlan xkgalhtiw (Col. 4:6). Akgtum liʼakxilhtit, max tlan nakinkawaniyan: «¿Tuku tlawakan anta? ¿La xlilhuwa makgapala tamakxtumit? ¿La talakaskin naklhakganan? ¿Xokgokan xlakata tlan natanukan? ¿Pukinankan o skinkan tumin?». Wa xlakata tlan nakgalhskinaw tiku waninitaw pi nakinkataʼanan komo wi tuku katsiputun  chu nawaniyaw tuku xla katsiputun. Na tlan nakamaklakaskinaw videos Kalakapastakwi akxni tinilh Cristo chu ¿Tuku tatlawa kPukgalhtawakga? Nachuna, takgalhtawakga 28 xla libro Kalipaxuwa latamat kinkalitachuwinanan tuku tlan nakawaniyaw.

16. ¿Tuku atanu max nakatsiputun tiku naʼanan akxni nalakapastakkan Cristo?

¹⁶ Akxni sputnita nawan uma tamakxtumit, max lataman atanu tuku nakatsiputun. Max nalilakpuwan tuku xlakata niti walh o ni chalhuwa wakgolh kaxtalanchu chu vino. Max na nakatsiputun la xlimakgasni tlawayaw uma lu xlakaskinka tamakxtumit. Chu max nakatsiputun komo putum ktamakxtumit watiya tuku tlawayaw. Maski ktaʼakgchuwin nema mastakan akxni lakapastakkan Cristo lichuwinankan putum uma, max natalakaskin tlakg nalitachuwinanaw xlakata uma. Xlakata nakgalhtiyaw makgapitsi xtakgalhskinin, tlan namaklakaskinaw artículo xla jw.org nema wanikan «¿Tuku xlakata xtatayananin Jehová nichuna tlawakgo xTaway Malana la amakgapitsi takanajla?». Tlawaputunaw putum tuku matlaniyaw akxni nina lakgchan nalakapastakkan Cristo, akxni chanita nawan uma kilhtamaku chu akxni titaxtunita nawan xlakata nakamakgtayayaw latamanin tiku xliputum xnakujkan litamakgtayaputunkgo uma tamakxtumit (Hech. 13:48).

KAKAMAKGTAYAW TIKU NIALH SKUJNANIKGO DIOS

17. ¿Tuku tlan natlawakgo lakgkgolotsin xlakata nakamakgtayakgo tiku nialh skujnanikgo Jehová? (Ezequiel 34:​12, 16).

¹⁷ ¿Tuku tlan natlawakgo lakgkgolotsin xlakata nakamakgtayakgo tiku nialh skujnanikgo Dios akxni lakgchamaja nawan nalakapastakkan Cristo? Nakalimasiyanikgo pi kalilakgaputsakgo chu kapaxkikgo (kalikgalhtawakga Ezequiel 34:​12, 16). Lakgkgolotsin, akxni nina lakgchan nalakapastakkan Cristo, kakatachuwinantit umakgolh natalan. Kakawanitit pi kalilakgaputsayatit chu pi tlawaputunatit putum tuku matlaniyatit xlakata nakamakgtayayatit. Kakawanitit pi kakinkatatamakxtumikgon akxni nalakapastakkan Cristo, chu komo naʼankgo, kakalimasiyanitit tapaxkit chu tlan kakamakgamakglhtinantit. Akxni titaxtunita nawan uma  kilhtamaku, chuntiya kakatachuwinantit chu kakamakgtayatit nalakgtaspitkgo Jehová (1 Ped. 2:25).

18. ¿La tlan nakamakgtayayaw tiku nialh skujnanikgo Jehová? (Romanos 12:10).

¹⁸ Putum natalan xalak congregación tlan nakamakgtayayaw tiku nialh skujnanikgo Jehová akxni xlakan naʼankgo akxni nalakapastakkan Cristo. ¿La tlan nakamakgtayayaw? Nakalimasiyaniyaw tapaxkit, tlan nakalikatsiniyaw chu nakamaxkiyaw kakni (kalikgalhtawakga Romanos 12:10). Kalakapastakwi pi max umakgolh natalan lu tuwa makgkatsikgolh naʼamparakgo ktamakxtumit. Max xlilakgaputsamakgo la xʼamaka kamakgamakglhtinankan. e Wa xlakata, ni kakakgalhskiw chu ni kakawaniw tuku nitlan nalimakgkatsikgo (1 Tes. 5:11). Xlakan chuntiya kinatalankan litaxtukgo chu lu lipaxuwayaw pi akxtum nakatakakninaniparayaw Jehová (Sal. 119:176; Hech. 20:35).

19. ¿La litamakgtayayaw akxni lakapastakaw akxni tinilh Cristo?

¹⁹ Putum tuku akxilhnitaw kinkamasiyaniyan tuku xlakata Jesús kinkalimapakgsin pi xlakapastakwi xtamakamastan akgatunu kata. Akxni chuna tlawayaw, litamakgtayayaw akinin chu nachuna amakgapitsi latamanin (Is. 48:​17, 18). Kinkamakgtayayan tlakg nakapaxkiyaw Jehová chu Jesús. Kinkamaxkiyan talakaskin nakalimasiyaniyaw pi lu kapaxtikatsiniyaw xlakata tuku tlawakgolh kimpalakatakan. Kinkamakgtayayan makxtum nakatatawilayaw kinatalankan chu kinkamaxkiyan talakaskin nakamakgtayayaw amakgapitsin nakatsikgo tuku xlitlawatkan xlakata namakgamakglhtinankgo putum tasikulunalin nema limin talakgmaxtut. Wa xlakata, lu kaliskujwi xlakata tlakg nalitamakgtayayaw akxni nalakapastakkan akxni tinilh Cristo, kilhtamaku nema tlakg xlakaskinka akgatunu kata.