1. Wer mayse ga wur Memoriyal diŋ wur maaga daŋgo nen kiŋgi là? (Lug 22:​19, 20)

 WUR maa ɗig ti ti húuli Kris diŋ wur maaga daŋgo nen kiŋgi nen jar maa ni Jeofan wo no. Se diŋ few maa boŋ ga Yeso hã faage ɓe ne jar maa wer ɓen wo ga á mo joŋ wo mono. (Jaŋ Lug 22:​19, 20.) Wùr go de gorge ga Wur ɗiggi ti húulí Yeson mo a go deparday tu wer fẽẽre po wo ngaɓa. Naa ko wee maa po wo yoo ɓaara mbag ɗa.

2. Wer mayse ga naa gor wur Memoriyal de bay yõõ ti là?

² Memoriyal kay naa maa ɗiggi ti woore raŋsoŋ. Sen fer ɓo’ sug naa ti ɗeŋ maaga naa ngaɓ go ga húulí Yeso diŋ mopo maaga daŋgo nen naa mono. (2 Kor. 5:​14, 15) Á diŋ wur maaga naa jor glog kããra de hẽẽre naa wo pa. (Rom. 1:12) Nen kiŋgi tum, hẽẽrebe wo ngaɓa maaga hay bay wo age ti taygeti wa so, nduu wo ti Memoriyale. Jar maa po yoo ɓaara ɗig wo ga saara mo fer wo goŋ Jeofa wer yããge waare maaga à yãã waare saara de woore mono. Lan jar ngaɓa maaga wo de sãy wããre Baa ti, yãã wo hadge wããre Baa maa da’ tenen maa tum wer fẽẽre maaga saara laa ra, lan ko ra mo pa. Diŋ wer fẽẽre sen wo mo deŋ ga Memoriyal kol go diŋ mopo maaga daŋgo nen naa mono!

3. Memoriyal sa’ holaŋ hẽẽrebe maa ti tamsir wo ɓuy na sa’ge là? (Ko foton lay)

³ Naa gor Memoriyal pa werga naa de koge ga wur sen, naa joŋ de tayge boŋ de hẽẽre naa maa ti tamsir wo ɓuy. Sedeewa Jeofa maa ti tamsir wo ɓuy tay wo ti jag do kẽẽ boŋ de maaga wur go de le’ge gesiŋ mono. Naa laa diŋ siigi wããre se boŋ ga ngaɓ de el raŋsoŋ mono. Naa ‘waa siŋ togodge ɓoge,  à cegaɗ de hoole wo de yii ti holaŋ naa, lan naa yãã “amen” ti tosge wo 4. Wur sen, tayge maa ti tamsir wo ɓuy joŋ wo nen naw sen diŋ fẽn se boŋn ɓuy tu seŋ. Ndo mbo de ɗig ti ti fruygi maaga Jeofa wo de Yeso wo de ɓe de maaga á ko wo naa togoɗ rage de ɗeŋ po boŋ mo yaw?

4. Naa wãã wo ɓil hadge sen la diŋ mayse wo là?

⁴ Ɓil hadge sen la, naa yiŋ jag yaŋ ti wiigi jag maa ti’ wo la no: naa ‘wũy jiili naa go see Memoriyal na ‘wũygi là? Naa kay jar lan wo kayge maaga á mo da’ wo wer Memoriyal lay là? Lan naa kay hẽẽre naa maaga wo go de woo do na kayge lay là? Yiŋgi jag ti wiigi jag sen wo la kay wo naa yaŋ maa bag jag see naa go see wur sen ga daŋgo mono.

NAA ‘WŨY JIILI NAA GO SEE MEMORIYAL NA ‘WŨYGI LÀ?

5. (a) Wer mayse ga naa hay ɗig ti de el raŋsoŋ là? (Siŋ wora 49:​7, 8) (b) Ndo had mayse ti videyo Yeso Húu Go Wer Maylà là?

⁵ Ɗeŋ maa boŋ ga daŋgo yoo maa tigriŋ wo ga naa mo hay ‘wũy jiili naa go see Memoriyal diŋ ɗiggi ti woore húulí Yeso maaga yãã naa go mono. Naa de see naa, naa bay de kããge maa yãã see naa go jag ɓlagge wo de húulí wa. (Jaŋ Siŋ wora 49:​8, 9; ko videyo Yeso Huu Go Wer Maylà? ) a Jeofa joŋ ga Yeso mo hã tenen ɓen go maa yãã naa go. Saara ɓog ɓuy joŋ wo diŋ siigi jag maa kluu debaŋ. (Rom. 6:23) De maaga naa yaŋ ɗiggi de peel ti fẽn maaga Jeofa wo de Yeso hãn wo go wer naa no, raŋsoŋ kol de el nen naa de peel ni. Naa ko ge la diŋ fẽẽre maaga raŋsoŋ wii do Jeofa wo de Yeso mo tawa tu. Amaa taŋgu ɗa, raŋsoŋ da wããge na ga hãylà?

6. Raŋsoŋ da wããge ga hãylà?

⁶ Raŋsoŋ diŋ poɗge maaga à poɗ maa coo mopo le. Adam, jee táabay maa taŋgun hay bay de ɓlagge see de maaga à hay joŋ ne mo wa. De maaga á joŋ ɓlagge mono, se bas go ti tenen maa tum ga hay de hãge ne hẽn mono. Amaa, bas go diŋ se tawa ga, á kaŋ wer weere maa ɓen wo go basge ɓuy lay. Maa ferge coo fẽẽre maaga Adam hay bas ra go le mono, Yeso sii jag go de tenen ɓe. Nen naw ɓe maaga á joŋ gesiŋ la mo ɓuy, Yeso “joŋ ɓlagge ti boŋ ga has, jobo bay de laa wããre gete’ go kalge jag ɓe ti boŋ wa has lay.” (1 Pi. 2:22) Ti wur maaga Yeso húu mono, á hay bay de ɓlagge see wa doo maaga Adam hay taŋgu de maaga á hay bay de joŋ ɓlagge wa ɗa no lay. De maaga Yeso hã tenen ɓe go mono, Yeso poɗ go maa coo naa le.—1 Kor. 15:45; 1 Tim. 2:6.

7. Yeso hay yiŋ de re maa hõn wo de maaga á hay gesiŋ la là?

⁷ Yeso oo de deele hoo sug ti Pan ɓe maa ciŋ no, koh de maaga á hay yiŋ go de wer gayri maa hõnla ɓuy gesiŋ la mono. De maaga á hay klee mono, Yeso hay hoo sug ti pããre ɓe jar téebeere maa de ɓlagge see wo, koh de maaga á hay biŋ mbe bay ɓlagge see mono. (Lug 2:51) De maaga á hay bay go jõõ ɓuy wa ɗa mono, Yeso oo ngiŋ jag jãɗge maaga Manhúulí hay jãɗn mono. Manhúulí wãã ne hẽn ga á mo oo de deele peel Jeofa wa. (Mat. 4:​1-11) Manhúulí hay dur go de ẽgre ɓe ɓuy maaga Yeso mo joŋ ɓlagge, nen maaga á mo hay de kããge maa poɗ raŋsoŋ wa.

8. Yeso hay soɗ bon maa hõn wo pa là?

⁸ Ti siigi wããre ɓe maaga á hay gesiŋ la mono, Yeso hay soɗ re maa tigriŋ wo ngaɓa pa. Jar hee ɓen hay wo joŋ bon ɓe, lan hay kiɗ wo ga saara ii ne go. (Lug 4:​28, 29; 13:31) Sen go tinoo tu ga á hay soɗ hugli jar ɓe maa wer ɓen wo debaŋ pa. (Mark 9:​33, 34) À hay ‘waar Yeso go doo jee iɗ húulí nono, day se jo bon debaŋ. (Heb. 12:​1-3) Á hay soɗ bon maa glog  tawn boŋ ɓe de see ɓe, bay da’ kayge maa ni Jeofa no. b—Mat. 27:46.

9. Húulí Yeso joŋ see ne naa na joŋge là? (1 Piyer 1:8)

⁹ Cwãy tu, Yeso joŋ bon debaŋ de maaga se hã see ɓe go maa coo naa le go jag ɓlagge wo de húulí mono. Ɗiggi ti dage Yeson bay ba age ne naa ɓil de maaga naa ɗig ti ɗeŋ maaga á hã see ɓe go húugi wer naa mo wa yawlà?—Jaŋ 1 Piyer 1:8.

10. Raŋsoŋ hay mbe diŋ mopo maa joŋge gus do Jeofa yaw?

¹⁰ Naa wãã ti Jeofa ga hãy lay là? Á hã mayse go de jiili ɓe ɓuy maaga Yeso mo coo naa le go ne? Holaŋ Jeofa wo de Yeso hay de woore debaŋ doo barge maa ti holaŋ pããbe wo de weel nono. (Jõõ. 8:30) Ɗig ba mbo ti maaga á joŋ see ne Jeofa de maaga á hay ko Yeso soɗ wer bon maa hõnla ɓuy gesiŋ la mo ɗa. Sen go tinoo tu ga á ce see ne Jeofa debaŋ de maaga á kon jag bon, ga jar bay de sãy ɓe ti wa, lan kii ti ɓe mono.

11. Maŋ saɓlaŋ po maaga ngaɓ maaga á joŋ see ne Jeofa joŋge de maaga à go de ĩĩ Yeso la mo ɗa.

¹¹ Diŋ pããbe maaga mbarga ɓe go de húulí tawa ga ko gayri maaga jobo da’ see ɓe nen ɓe blam húulí mbarga ɓe mono. Naa ɓuy mbe de hã ɓil ti birgi húulí maaga Bible wãã ne mono, amaa jee ɓo maaga ndo dan húu we no, se ce debaŋ. Saɓlaŋ sen kay naa maa ko gayri maaga Jeofa hay da’ de maaga á hay ko mbarga ɓe maaga se dan ti bon, lan go de húugi nen kiŋgi 33 N.W.N. c—Mat. 3:17.

12. Naa mo joŋ mayse go nen few Memoriyal là?

¹² Tõõ wara ka’ hã wo da’ wur Memoriyal, ndo bay ba maaga ndo joŋ program fruggi nen wããre Baa maaga ndo boŋ ɓo, noga maa ɓi feele ti raŋsoŋ wa yawlà? Joŋ joŋre de Guide de recherche pour les Témoins de Jéhovah (hayga á yaŋ go de ferge de jag ɓo no) noga kefder maa tigriŋ ga naa wer raŋsoŋ go de woore. d Nen da ga ndo mo jaŋ fẽẽre maaga hres wo ti húulí Yeso ɓil kefder taygeti seele kretiyẽ wo de siigi wããre. Lan wur Memoriyal mono, yõõ ti go bay ko videyo Hadge wããre Baa maa de toŋ wur Memoriyal go wa. Hayga naa ‘wũy jiili naa we go see Memoriyal no, naa joŋ yaŋ de kããge maa kay jar maa da’ge wer Memoriyal lay.—Esdras 7:10.

 KAY JAR LAN WO MAAGA Á MO DA’ WO WER MEMORIYAL LAY

13. Fẽn maa taŋgu maaga ndo kay jar lan wo maaga á mo da’ wo wer Memoriyal lay diŋ maylà?

¹³ Naa kay jar lan wo kayge maaga á mo da’ wo wer Memoriyal lay là? Fẽn maaga ndo joŋ taŋgu diŋ de ɗe rage le ti Memoriyale. Ciŋ ti jar maaga naa yiŋ de ɓaara tum ti siigi wããre mono, naa yer ɗuu jar maaga naa de ko rage, blam naa ɗe ra le lay. Pããre naa wo, kããre naa maa ti ngeel joŋre wo, kããre naa maa ti lakol wo, jar maa tigriŋ wo ga naa de ko rage yoo ɓaara ni lay. Koh kefder maa ɗe jar le mo hay ba do naa wuŋ wa, naa mbe de kããge maa ɓo’ lien ɓe ne jare. Ngaɓa jar maaga maŋ wo ga saara a wur sen ngel naa yaŋ!—Ekl. 11:6.

14. Ngaɓ ẽgre fẽn maaga ndo hã kefder maa ɗe jar le ti Memoriyal mo ɗa.

¹⁴ Maaga naa ɗe jar we le diŋ naa de see naa no, jar sen ko wo see ɓaara de jor glog maa age. Á hay ngel mãygemanbe po ti wur po de maaga war ɓe maaga bay sedeewa Jeofa wa wãã ne hẽn ga se de sãy age see ɓe ti Memoriyal ti mono. Wer mayse ga á hay ngel ne ne? Werga go ɓaale ngaɓa taŋgu, á hay ɗege ɓe le, amaa se hay a ti boŋ ga. Day mayse joŋ de sen la ga á nduu ne? Á wãã ga “Ndi hay da’ kefder maa ɗe jar maa ɓi ti see ɓi,” jee maa peel tayge po ga ndi hay de koge ɓe hay hãn me. War ɓe a ti Memoriyal kal se no, lan nen kiŋgi maa blam wo pa.

15. Naa mo ɗaw mayse ti de maaga naa ɗe jar le ti Memoriyal mo là?

¹⁵ Kaŋ ti ɓo ga jar maaga naa ɗe ra le ti Memoriyal wii gi wo jag naa ti fẽẽre po wo—debaŋ ɓen hayga á bay wo we de age ti boŋ ti taygeti naa po boŋ wa no. Doo sen ne kay, naa ɗig wee go peel bol ti wiigi jag maaga á wii ge wo mono, lan naa bag wee jag see naa go maa yiŋ jag ti wiigi jag ɓaara no. (Kol. 4:6) Sen doo maaga jar maa po wii wo jag see ɓaara ga: ‘Mayse hres ge wo ti wur sen ni là?’ ‘À ig ni gemãy là?’ ‘Õõbe maa hẽẽge ti wur sen ni go de ngaɓge hã’ yawlà?’ ‘À kal wo ni de suŋgu yawlà’?, ‘À tar suŋgu do jar ni yawlà?’ De maaga naa ɗe jobo we le ti Memoriyal no, naa mbe de kããge maa wiigi ɓe ga: “Á de wiigi  jag po wo jag yawlà?” Day blam, yiŋ jag go ti fẽẽre maaga jee ɓen de sãy da’ wer ɓaara ti mo ɓuy. Naa mbe nen joŋ joŋre de videyo Ɗig Wee Ti Húuli Yeso wo de À joŋ mayse ɓil tiŋ twaywaŋ là? Maa kayge ɓe ko maaga à see de taygen naa seege la mono. Lan hadge maa 28 ɓil kefder Hay mbay tenen ti’ tum hã ɗeŋ maa de woore po yaŋ wo ne naa maa kay jare.

16. Wiigi jag maa hõn wo ga jar maaga a wo ti memoriyal wii ra wo pa là?

¹⁶ Blam Memoriyal mono, maapo ga jar maaga a wo waare ni joŋ wo de wiigi jag maa tigriŋ wo jag pa. Maapo á wii gi wo jag ɓo pa ga wer mayse ga maŋ hoolen wo de yii diŋ jar po wo see ɓe me’ là. Maapo saara wii pa ga nday dog joŋ Memoriyal seɓaa ɓaale gãylà. Lan maapo saara joŋ de sãy ko maaga taygeti Sedeewa Jeofa wo ɓuy hres wo de maŋ sen yawlà. Koh à mo fer ba go ti wiigi jag ɓaaran wo ti siigi wããre maa ti Memoriyaln ɓuy laybla no, jar maaga a wo waare joŋ wo de sãy laa wer ɓe ti debaŋ de peel ni. Hadge maa ɓil jw.org ga wãã ga “Pourquoi les Témoins de Jéhovah célèbrent-ils le Répas du Seigneur différemment des autres religions?” kay naa yaŋ maa ferge ti wiigi jag ɓaaran wo. Naa de sãy joŋ fẽn maaga naa kãã maa joŋge ɓe—taŋgu Memoriyale, ti Memoriyale, lan blam Memoriyal—maa kay jar maaga “ɗiggi ɓaara de woore” maaga á mo da’ wo see ɓaara wer Memoriyal mono.—Joŋre 13:48.

KAY JAR MAAGA WO GO DE WOOGE MONO

17. Jar maa peel tayge kay wo hẽẽrebe maaga wo go de woo do na kayge là? (Esekiyel 34:​12, 16)

¹⁷ Nen few Memoriyal mono, Jar maa peel tayge kay wo jar maaga wo go de wooge na kayge là? Ngaɓ wee go ne hara ga nday de ko el ɓaara. (Jaŋ Esekiyel 34:​12, 16.) Taŋgu Memoriyal mono, dur maa ɓo’ sug ɓaara go daŋge ɓuy. Ɓo’ nen go ne hara ga nday ɗig ti ti ɓaara, lan ga nday de sãy kay rage ti de wer ɗeŋ maa hõnlà ɓuy. Ɗe wee ra le maa age ti Memoriyale. Hayga á a wo we no, yãã wee waare ɓaara de woore de dage. Blam Memoriyal mono, hay wee tum ɗe rage ti telefon noga wo wee hee jag ne hẽẽre dage naa sen wo  no, lan kay wee ra ti wããre Baa maaga á wo de sãy ɓe ti maa ferge le see Jeofa mono.—1 Pi. 2:25.

18. Naa ɓuy naa kay hẽẽre naa maaga wo go de wooge na kayge lay là? (Rom wo 12:10)

¹⁸ Jar maa ti taygen ɓuy wo de kããge maa kay hẽẽre naa maaga wo go de wooge maa age ti Memoriyale. De ɗeŋ maa hõn ne? De naa nen dage, ɓil de el, lan hooge sug go see ɓaara. (Jaŋ Rom wo 12:10.) Ɗig wee ga maapo ga á hay bay see ɓaara gus maa age ti taygeti wa. Maapo ga á hay wo joŋ hẽẽne ga wo la à yãã waare saara de woore ga. e Wersen, wii jag ɓaara ti fẽẽre maaga hãy ra wo noga wãã mopo maaga du’ ɓil ɓaara wa pa. (1 Tes. 5:11) Hẽẽre naa sen wo tum diŋ jar maaga naa goŋ Baa naa de kããra. Naa de fruygi ti maaga naa da’ nen maa goŋ Baa de kããra wur sen pa mono!—Siŋ. 119:176; Joŋ. 20:35.

19. Fẽẽre maa de woore ga a wo le wer ɗiggi ti húulí Yeso wo diŋ maylà?

¹⁹ Á hay ngris naa ti maaga Yeso maŋ ga naa mo hay ɗig ti ti húulí se ɓaale boŋ nen kiŋgi tum mo yaw? De maaga naa joŋ ne mono, á mbe de kay naa de jar lan wo ti fẽẽre ngaɓa yaw. (Esa. 48:​17, 18) Dage naa see Jeofa wo de Yeso gẽẽ ciŋ ni lay. Naa ngaɓ go ga fẽẽre maaga á joŋ wo de cõõre jag naa. Naa ya’ holaŋ naa de hẽẽre naa wo ciŋ ni de woore lay. Lan naa kay jar lan wo maaga á mo had wo ɗeŋ maa fruygi wer fẽẽre maaga raŋsoŋ ɓo’ faage ɓe ne naa mo lay. Naa joŋ wee fẽẽre maaga naa de kããge maa joŋ rage ɓuy maaga naa mo hay go de bag jag see naa see wur ɗiggi ti húulí Yeso maa tagla—wur maa de woore maaga daŋgo nen kiŋgin mono!