1. Chifukwa wuli zuŵa la Chikumbusko ni zuŵa lakuzirwa chomene pa chaka? (Luka 22:​19, 20)

 ŴANTHU ŵa Yehova ŵakuwona kuti zuŵa la kukumbukira Nyifwa ya Khristu ndilo ndakuzirwa chomene pa chaka. Vili nthena chifukwa chakuti ntchakuchitika chekha icho Yesu wakaphalira ŵalondezgi ŵake kuti ŵachitenge chaka chilichose. (Ŵazgani Luka 22:​19, 20.) Tikulindilira mwakunweka chakuchitika ichi, ndipo pali vifukwa vinandi ivyo tikuchitira nthena. Tiyeni tiwone vinyake mwa vifukwa ivi.

2. Kasi ni vifukwa wuli vinyake ivyo tikulindililira mwakunweka Chikumbusko?

² Chikumbusko chikutovwira kughanaghanira kuzirwa kwa sembe yakuwombora. Chikutikumbuska ivyo tingachita kuti tilongore kuti tikuwonga chomene sembe ya Yesu. (2 Kor. 5:​14, 15) Kweniso chikutipa mwaŵi ‘wakukhwimiskana’ na ŵabali na ŵadumbu ŵithu. (Rom. 1:12) Chaka chilichose, ŵakulopwa ŵanandi ŵakwiza pa Chikumbusko. Ndipo ŵanyake ŵakuweleraso kwa Yehova chifukwa chakuti tikuŵapokelera makora pa Chikumbusko. Kweniso ŵanthu ŵanandi ŵakunweka, ŵakwamba kwenda pa nthowa yakuya ku umoyo chifukwa cha ivyo ŵakuwona na kupulika para ŵiza ku Chikumbusko. Lekani tikuwona kuti Chikumbusko ntchakuzirwa chomene.

3. Kasi Chikumbusko chikutovwira wuli kuti tiŵe ŵakukolerana pa charu chose? (Wonaniso chithuzi.)

³ Ghanaghaniraniso umo Chikumbusko chikutovwilira kuti tiŵe ŵakukolerana pa charu chose. Ŵakaboni ŵa Yehova pa charu chose ŵakuwungana kuti ŵachite Chikumbusko para zuŵa lili pafupi kunjira. Tose tikutegherezga nkhani iyo yikudidimizga chomene kuzirwa kwa sembe yakuwombora. Tikwimba sumu ziŵiri zakulumba Chiuta, tikwendeska chingwa na vinyo, ndipo na mtima wose tikuyowoya kuti “ameni” pa malurombo ghose ghanayi. Mu maora pafupifupi 24, mipingo yose yikuŵa kuti yachita vyakuyana pa nkhani ya Chikumbusko. Ghanaghanirani umo Yehova na Yesu ŵakwenera  kuti ŵakukondwera para ŵakuwona kuti tose pa charu chose tikuŵalumba mwakukolerana kwizira mu nthowa iyi.

4. Kasi tidumbiskanenge vichi mu nkhani iyi?

⁴ Mu nkhani iyi, tidumbiskanenge mafumbo agha: Kasi tinganozgekereska wuli mitima yithu apo Chikumbusko chikusendelera? Kasi tingawovwira wuli ŵanji kuti nawo ŵazakasange chandulo? Ndipo kasi tingawovwira wuli ŵakulopwa? Mazgoro gha mafumbo agha ghatovwirenge kuti tiŵe ŵakunozgeka apo chakuchitika chakuzirwa ichi chikusendelera.

KASI TINGANOZGEKERESKA WULI MITIMA YITHU APO CHIKUMBUSKO CHIKUSENDELERA?

5. (a) Chifukwa wuli tikwenera kughanaghanirapo pa kuzirwa kwa sembe yakuwombora? (Salimo 49:​7, 8) (b) Kasi mwasambira vichi mu vidiyo yakuti Chifukwa Wuli Yesu Wakafwa?

⁵ Apo Chikumbusko chikusendelera tikwenera kughanaghanirapo kuzirwa kwa sembe yakuwombora ya Yesu Khristu. Iyi ni nthowa yimoza yakuzirwa chomene iyo tinganozgekereskera mitima yithu apo Chikumbusko chikusendelera. Patekha, tikatenge tijiwomborenge yayi ku kwananga na nyifwa. (Ŵazgani Salimo 49:​7, 8; wonaniso vidiyo yakuti Chifukwa Wuli Yesu Wakafwa?) a Ntheura Yehova wakanozga kuti Yesu wapeleke umoyo wake kuti watiwombore. Pakuchita nthena Yehova na Yesu wose ŵakajikomora chomene. (Rom. 6:23) Para tikughanaghanirapo chomene pa ivyo Yehova na Yesu ŵakachita, tiwongengeso chomene sembe yakuwombora. Mu nkhani iyi, tiwonenge vinthu vichoko waka ivyo Yehova na Yesu ŵakachita kuti sembe yakuwombora yipelekeke. Kweni chakwamba, kasi pakakhumbikwanga vichi kuti sembe yakuwombora yipelekeke?

6. Kasi chikakhumbikwanga ntchivichi kuti sembe yakuwombora yipelekeke?

⁶ Chiwombolero ni malipiro agho munthu wakupeleka kuwombolera chinthu chinyake. Munthu wakwamba, Adamu, wakaŵa wakufikapo apo wakalengekanga. Wakati wananga, wakataya mwaŵi wakuŵa na umoyo wamuyirayira wa iyo pamoza na ŵana ŵake wose. Kuti umoyo uwo Adamu wakataya uweleleposo, Yesu wakapeleka umoyo wake wakufikapo kuŵa sembe yakuwombora. Nyengo yose iyo Yesu wakaŵira pa charu chapasi, “wakachitapo kwananga yayi, nesi upusikizgi ukasangikamo mu mulomo wake yayi.” (1 Pet. 2:22) Chifukwa chakuti Yesu wakafwa wakufikapo, wakapeleka chiwombolero chakuyana ndendende na umoyo uwo Adamu wakataya.—1 Kor. 15:45; 1 Tim. 2:6.

7. Kasi ni viyezgo wuli vinyake ivyo Yesu wakakumana navyo apo wakaŵa pa charu chapasi?

⁷ Apo wakaŵa pa charu chapasi Yesu wakalutilira kupulikira Adada ŵake ŵakuchanya nangauli wakakumana na masuzgo ghanandi. Apo wakaŵa mwana, Yesu wakajilambikanga ku ŵapapi ŵake nangauli ŵakaŵa ŵambura kufikapo. (Luka 2:51) Kweniso apo wakaŵa msepuka, wakwenera kuti wakatonda apo wakachichizgikanga na ŵanji kuti waleke kupulikira ŵapapi ŵake panji Yehova. Ndipo apo wakaŵa mulara, Yesu wakatonda viyezgo vyakufuma kwa Satana Dyabulosi, kusazgapo chiyezgo chakuti waleke kugomezgeka kwa Chiuta. (Mat. 4:​1-11) Satana wakaŵikapo mtima chomene kuti Yesu wanangire Chiuta mwakuti watondeke kupeleka sembe yakuwombora.

8. Kasi ni viyezgo wuli vinyake ivyo Yesu wakazizipizga?

⁸ Apo wakachitanga uteŵeti wake pa charu chapasi, Yesu wakazizipizgaso viyezgo vinyake. Wakatambuzgikanga kweniso ŵalwani ŵake ŵakakhumbanga kumukoma. (Luka 4:​28, 29; 13:31) Wakeneranga kuzizipizga ivyo ŵasambiri ŵake ŵakabudiskanga. (Mrk. 9:​33, 34) Apo wakeruzgikanga, ŵakamutambuzganga na kumunena. Pamanyuma wakafwa nyifwa yakuŵinya chomene kweniso yakukhozga soni. (Heb. 12:​1-3) Kuumaliro kwa umoyo wake, wakeneranga kuzizipizga yekha  chifukwa Yehova wakamuvikilira yayi. b—Mat. 27:46.

9. Kasi mukujipulika wuli na ivyo Yesu wakachita kuti wapeleke sembe yakuwombora? (1 Petrosi 1:8)

⁹ Apa ntchakuwonekerathu kuti Yesu wakasuzgika chomene kuti wapeleke umoyo wake kuŵa sembe yakuwombora. Para tikughanaghanira ivyo Yesu wakachita pakupeleka umoyo wake chifukwa cha ise, vikutipangiska kuti timutemwenge chomene.—Ŵazgani 1 Petrosi 1:8.

10. Kasi ntchivichi chikulongora kuti Yehova wakajikomora chomene kuti sembe yakuwombora yipelekeke?

¹⁰ Wuli pakuyowoya za Yehova? Kasi ntchivichi chikulongora kuti wakajikomora chomene pakuzomerezga kuti Yesu wapeleke umoyo wake kuŵa sembe yakuwombora? Nga umo vikuŵira na dada na mwana wake, Yehova na Yesu ŵakutemwana chomene. (Zinth. 8:30) Ntheura ghanaghanirani waka umo Yehova vikamukhwaskira apo wakawonanga Yesu wakuzizipizga masuzgo ghanandi apo wakaŵa pa charu chapasi. Tikukayika yayi kuti vikamuŵinya chomene kuwona Mwana wake wakusuzgika.

11. Yowoyani chiyelezgero kuti mulongore umo Yehova wakwenera kuti wakajipulikira apo Yesu wakakomekanga.

¹¹ Mupapi waliyose uyo mwana wake wali kufwapo wakumanya umo nyifwa ya mwana yikuŵinyira. Nangauli tikumanya kuti chiwuka chiliko, kweni para wakutemweka withu wafwa vikutiŵinya chomene. Chiyelezgero ichi chikutovwira kumanya umo Yehova wakwenera kuti wakajipulikiranga apo wakawonanga Mwana wake wakutemweka wakusuzgika na kufwa mu 33 C.E. c—Mat. 3:17.

12. Kasi tikwenera kuchita vichi para Chikumbusko chikusendelera?

¹² Kwamba sono m’paka pa Chikumbusko, mungachita makora chomene kusambira vinandi vya Yesu pa sambiro lamwaŵene panji pa Kusopa kwa Mbumba. Gwiliskirani ntchito Buku Lakupenjera Nkhani la Ŵakaboni ŵa Yehova panji mabuku ghanyake ghakusambilira Baibolo kuti mumanye vinandi vya sembe yakuwombora. d Kweniso woneseskani kuti mukulondezga ndondomeko yakuŵazga Baibolo mu nyengo ya Chikumbusko iyo yikuŵa mu Kabuku ka Maungano ka Uteŵeti na Umoyo Wachikhristu. Ndipo pa zuŵa la Chikumbusko, kuluwa yayi kuwonelera pulogiramu yapadera ya Kusopa kwa Mulenji. Para tanozgekereska mtima withu apo Chikumbusko chikusendelera, tovwirenge makora ŵanji kuti nawo ŵazakasange chandulo.—Ezir. 7:10.

 WOVWIRANI ŴANJI KUTI ŴASANGE CHANDULO

13. Kasi ntchinthu wuli chakwamba icho tikwenera kuchita kuti tovwire ŵanji kuti ŵasange chandulo na Chikumbusko?

¹³ Kasi mungawovwira wuli ŵanji kuti ŵasange chandulo na Chikumbusko? Chakwamba mukwenera kuŵachemerako ku Chikumbusko. Padera pa kuchemerako ŵanthu awo tikukumana nawo mu uteŵeti, tingalemba mazina gha ŵanthu ŵanyake awo tikukhumba kuŵachema. Ŵanthu aŵa ŵangaŵa ŵabali ŵithu, awo tikusambira nawo sukulu, awo tikugwira nawo ntchito, kweniso ŵanyake awo tikuŵamanya. Nanga vingaŵa kuti tilije mathirakiti ghakukwana ghakuchemera ŵanthu, tingaŵatumira waka linki ya thirakiti ili. Tingazakazizwa kuwona unandi wa ŵanthu awo ŵangazakiza pa Chikumbusko.—Muph. 11:6.

14. Yowoyani chiyelezgero icho chikulongora kuti ntchakuzirwa chomene kuti munthu uyo tikumumanya timupe kapepara kakumuchera ku Chikumbusko.

¹⁴ Kuwona mwakupepuka yayi mulimo wakuchemera ku Chikumbusko munthu uyo mukumanyana makora. Zuŵa linyake, mudumbu uyo mfumu wake ni Kaboni yayi wakazizwa chomene apo mfumu wake wakamuphalira kuti nayo walutenge ku Chikumbusko. Chifukwa wuli wakazizwa? Chifukwa kumanyuma wakamuchiskapo kanandi waka kweni wakayangako yayi. Kweni chifukwa wuli ulendo uwu wakaluta? Iyo wakati: “Napokera kapepara kakunichemerako ku Chikumbusko.” Wakalongosora kuti mulara wa mu mpingo wa mudumbu uyu uyo ŵakamanyananga makora ndiyo wakamupa kapepara aka. Mfumu wake uyu wakaluta ku Chikumbusko chaka ichi ndipo kufuma apo wakakhalangaso yayi.

15. Kasi tikwenera kukumbuka vichi para tikuchemera ŵanthu ku Chikumbusko?

¹⁵ Kumbukani kuti awo taŵachemerako ku Chikumbusko ŵangaŵa na mafumbo, chomenechomene para ŵandizepo pa maungano ghithu. Ntheura tingaghanaghanira mafumbo agho ŵangaŵa nagho na kunozgekera mazgoro ghake. (Kol. 4:6) Mwachiyelezgero, ŵanyake ŵangafumba kuti: ‘Kasi chikuchitika ntchivichi pa Chikumbusko?’ ‘Kasi chikutora nyengo yitali wuli?’ ‘Kasi nkhwenera kuvwara wuli?’ ‘Kasi mukulipiliska kuti munthu wasangikepo?’ ‘Kasi mukwendeska mbale ya zithero?’ Para tikuchemerako munthu munyake ku Chikumbusko, tingachita  makora kumufumba kuti, “Kasi muli na fumbo lililose?” ndipo pamanyuma zgorani mafumbo agho wangaŵa nagho. Tingagwiliskiraso ntchito vidiyo yakuti Kukumbukira Nyifwa ya Yesu na yakuti Kasi pa Nyumba ya Ufumu Pakuchitika Vichi? kuti tovwire ŵanthu kumanya umo maungano ghithu ghakuchitikira. Kweniso sambiro 28 mu buku la Mungakondwa na Umoyo Kwamuyirayira! lili na fundo ziwemi izo tingaŵaphalirako ŵanthu.

16. Kasi ni mafumbo wuli ghanyake agho ŵangaŵa nagho awo ŵiza ku Chikumbusko?

¹⁶ Pamanyuma pa Chikumbusko, ŵakunweka awo nkhakwamba kwizako ŵangaŵaso na mafumbo ghanyake. Ŵangafumba chifukwa icho mbanthu ŵachoko waka (panji palije waliyose) awo ŵaryapo vimanyikwiro. Ŵangafumbaso kuti tikuchita kalinga Chikumbusko. Ŵangafumbaso usange maungano ghithu ghose ghakuchitika munthowa yakuyana waka. Nangauli fundo zose izi zikulongosoreka mu nkhani ya Chikumbusko, awo nkhakwamba kwizako ŵangakhumbikwiraso kuŵalongosolera makora. Nkhani ya pa jw.org ya mutu wakuti “Chifukwa Wuli Ŵakaboni ŵa Yehova Ŵakupanga Mugonero wa Fumu Mwakupambana na Matchalitchi Ghanyake?” yingatovwira kuzgora ghanyake gha mafumbo ghawo. Tikwenera kuchita vyose ivyo tingafiska, pambere Chikumbusko chindachitike, panyengo ya Chikumbusko, kweniso pamanyuma pa Chikumbusko, kuti tovwire ŵanthu awo ŵali na “maghanoghano ghakwenelera” kuti ŵasange chandulo na Chikumbusko.—Mil. 13:48.

WOVWIRANI AWO MBAKULOPWA

17. Kasi ŵalara ŵangawovwira wuli ŵakulopwa? (Ezekiyeli 34:​12, 16)

¹⁷ Panyengo ya Chikumbusko, kasi ŵalara ŵangawovwira wuli ŵakulopwa? Longorani kuti mukuŵaghanaghanira. (Ŵazgani Ezekiyeli 34:​12, 16.) Pambere Chikumbusko chindafike, woneseskani kuti mwayowoyeskana nawo kanandi waka. Ŵaphalirani kuti mukuŵaghanaghanira kweniso kuti mukukhumba chomene kuŵawovwira munthowa yiliyose iyo mungafiska. Ŵachemeraniko ku Chikumbusko. Ŵapokelerani na mawoko ghaŵiri usange ŵiza pa Chikumbusko. Para Chikumbusko chajumpha, lutilirani kuŵayendera panji kuŵayimbira foni ŵabali na ŵadumbu ŵakutemweka aŵa, ndipo ŵapani wovwiri uliwose  wauzimu uwo ŵakukhumbikwira kuti ŵawelere kwa Yehova.—1 Pet. 2:25.

18. Kasi tose tingawovwira wuli ŵakulopwa? (Ŵaroma 12:10)

¹⁸ Wose mu mpingo ŵangawovwira ŵakulopwa awo ŵakiza ku Chikumbusko. Kasi ŵangaŵawovwira wuli? Pakuchita nawo vinthu mwachitemwa, mwalusungu, kweniso mwantchindi. (Ŵazgani Ŵaroma 12:10.) Kumbukani kuti panji chikaŵa chipusu yayi kuti mberere zakutemweka izi zize ku Chikumbusko. Panji ŵakafipanga mtima kuti ŵazamupokelereka makora yayi. e Ntheura gegani kuŵafumba mafumbo agho ghangaŵakhozga soni panji kuyowoya mazgu agho ghangaŵapweteka. (1 Tes. 5:11) Ŵabali na ŵadumbu aŵa mbabali ŵithu. Tili ŵakukondwa kusopaso nawo lumoza.—Sal. 119:176; Mil. 20:35.

19. Kasi tikusanga vyandulo wuli chifukwa cha kukumbukira nyifwa ya Yesu?

¹⁹ Tili ŵakukondwa kuti Yesu wakatiphalira kuti tikumbukirenge nyifwa yake chaka chilichose, ndipo tikumanyaso chifukwa icho ntchakuzirwa chomene kuchita nthena. Para tikwiza pa Chikumbusko, ise na ŵanyithu tikusanga chandulo munthowa zinandi. (Yes. 48:​17, 18) Tikuŵatemwa chomene Yehova na Yesu. Tikulongora umo tikuwongera pa ivyo ŵali kutichitira. Tikukhozgaso ubwezi withu na ŵabali na ŵadumbu. Ndipo tingawovwiraso ŵanji kumanya umo nawo ŵangasangira vitumbiko chifukwa cha sembe yakuwombora. Ntheura, tiyeni tichite vyose ivyo tingafiska kuti tiŵe ŵakunozgeka apo Chikumbusko cha chaka chino chikusendelera, ilo ni zuŵa lakuzirwa chomene pa chaka.