1. Kaia e fai ei te Fakamanatuga pelā me ko te ‵toe aso tāua eiloa o te tausaga? (Luka 22:​19, 20)

 A TE Fakamanatuga o te mate o Keliso, ko te ‵toe aso tāua eiloa o te tausaga ki tino o Ieova. Tenā fua te fakatasiga ne fakatonu atu ne Iesu ki ana soko ke fakamanatu ne latou. (Faitau te Luka 22:​19, 20.) E isi eiloa ne pogai ‵lei e ‵tau ei o olioli tatou ki te aso o te Fakamanatuga. Ke mafau‵fau nei tatou ki pogai konā.

2. Ne a nisi pogai e olioli ei tatou ki te Fakamanatuga?

² A te Fakamanatuga e fesoasoani mai ke mafaufau ‵loto tatou ki te tāua o te togiola. E fakamasaua mai ei ki a tatou a auala ke fakaasi atu te loto fakafetai ki te taulaga a Iesu. (2 Koli. 5:​14, 15) Kae se avanoaga foki ke mafai ne tatou o “fakatau fakama‵losi” a ‵tou taina mo tuagane. (Loma 1:12) I tausaga takitasi, e isi faeloa ne tino kolā ko ‵mate faka-te-agaga e ‵kau mai. Nisi ko oti ne toe ‵foki mai ki a Ieova ona ko faifaiga a‵lofa ne fakaasi atu ki a latou. Kae ko fia‵fia a tino e tokouke ke kamata o sa‵sale atu i te auala ki te ola ona ko mea ne lavea kae lagona ne latou. E se tioa eiloa o fai a te Fakamanatuga pelā me se mea tāua i ‵tou loto!

3. I te auala fea e fai ei ne te Fakamanatuga ke ‵kau fakatasi a ‵tou kautaina i te lalolagi kātoa? (Onoono foki ki te ata.)

³ Mafaufau foki ki te auala e fai ei ne te Fakamanatuga ke ‵kau fakatasi a ‵tou kautaina i te lalolagi kātoa. E maopoopo fakatasi a Molimau a Ieova i te lalolagi kātoa māfai ko tō a te mata o te la. E fakalogo‵logo tatou ki se lāuga telā e faka‵mafa mai i ei te tāua o te togiola. E usu ne tatou a pese o vikiga e lua, fakateka atu a te falaoa mo te uaina, kae fai atu mo te loto kātoa “amene” ki ‵talo e fa. E fai eiloa ne fakapotopotoga katoa a te fakatokaga tenā i loto i se 24 itula. E mata, e mafai o fakaataata ne koe a te fia‵fia o Ieova mo Iesu māfai ko ‵kilo mai ki a tatou e  ‵kau fakatasi i te lalolagi kātoa o faka‵malu lāua i te auala tenei?.

4. Ne a mea ka sau‵tala tatou ki ei i te mataupu tenei?

⁴ I te mataupu tenei, ka sau‵tala tatou ki fesili konei: E mafai pefea o fakatoka ‵tou loto mō te Fakamanatuga? E mafai pefea o fesoasoani tatou ki nisi tino ke maua ne latou a mea aoga mai i ei? Kae e mafai pefea o fesoasoani tatou ki tino kolā ko ‵mate faka-te-agaga? Ka fesoasoani mai a tali ki fesili konei ke toka tatou mō te fakatasiga ‵malu tenei.

E MAFAI PEFEA O FAKATOKA ‵TOU LOTO MŌ TE FAKAMANATUGA?

5. (a) Kaia e ‵tau ei o mafaufau ‵loto tatou ki te tāua o te togiola? (Salamo 49:​7, 8) (e) Ne a mea ne tauloto ne koe mai te vitio Kaia ne Mate ei a Iesu?

⁵ Tasi o toe auala tāua ke fakatoka ‵tou loto mō te Fakamanatuga, ko te mafaufau ‵loto ki te tāua o te taulaga togiola a Iesu Keliso. E seai se mea e mafai ne tatou o fai ke ‵sao i te agasala mo te mate. (Faitau te Salamo 49:​7, 8; onoono foki ki te vitio Kaia ne Mate ei a Iesu?) a Tenā ne fakatoka ei ne Ieova mo te loto fiafia ke tuku mai te ola o tena Tama pele ko Iesu, telā se mea faigata ‵ki, ke faka‵sao ei tatou. (Loma 6:23) Ko te lasi o te ‵tou mafaufau ‵loto ki te mea ne fai ne Ieova mo Iesu mō tatou, ko te lasi foki o te ‵tou loto fakafetai ona ko te togiola. Ka sau‵tala nei tatou ki nāi mea kolā ne loto fia‵fia a Ieova mo Iesu o fai mō tatou. Kae muamua la, se a te mea ne aofia i te togiola?

6. Se a te mea ne aofia i te togiola?

⁶ A te togiola ko te ‵togi e ‵togi ne koe ke toe maua mai se mea. Ne ‵lei katoatoa a te tagata muamua ko Atamu i te taimi ne faite ei. Kae i te taimi ne agasala ei, ne galo atu i a ia fakatasi foki mo ana tama‵liki katoa a te fakamoemoega ke ola ki te se-gata-mai. Ko te mea ke toe ‵togi mai a te mea telā ne galo i a Atamu, ne ofo atu ei ne Iesu a tena ola ‵lei katoatoa e pelā me se taulaga. I te olaga kātoa o Iesu i te lalolagi, ne “seai sena agasala ne fai, io me se pati loi ne tō mai i tena gutu.” (1 Pe. 2:22) I te taimi o tena mate, ne fetaui ‵lei eiloa a te ola ‵lei katoatoa o Iesu mo te ola telā ne galo atu i a Atamu.—1 Koli. 15:45; 1 Timo. 2:6.

7. Ne a nisi tofotofoga ne fepaki mo Iesu i tena nofoga i te lalolagi?

⁷ Ne tumau a Iesu i te fakalogo ki tena Tamana faka-te-lagi i mea katoa faitalia a tofotofoga e uke ne fepaki mo ia i tena nofoga i te lalolagi. I te taimi koi foliki ei, ne fakalogo a Iesu, telā e ‵lei katoatoa, ki ana mātua kolā e se ‵lei katoatoa. (Luka 2:51) I te taimi ko talavou ei, ne ‵teke atu a ia ki so se fakamalosiga ke se fakalogo io me se fakamaoni. Kae i te taimi ko matua ei, ne ‵teke atu a Iesu ki a Satani te Tiapolo telā ne tofotofo ne ia a tou tagata ke agasala, kae fai ‵tonu atu ki a ia ke mo a ma fakamaoni ki te Atua. (Mata. 4:​1-11) Ne taumafai malosi a Satani o fai ke agasala a Iesu ko te mea ke se mafai o ‵togi ne ia a te togiola.

8. Ne a nisi tofotofoga ne kufaki ne Iesu?

⁸ I tena galuega talai i te lalolagi nei, ne kufaki a Iesu i nisi tofotofoga. Ne fakasaua a ia ne ana fili kae taumafai o tamate a ia. (Luka 4:​28, 29; 13:31) Ne kufaki ne ia a vāivāiga o ana soko. (Male. 9:​33, 34) I te taimi ne fakamasino ei a ia i mua o te fono ke tamate, ne ‵kini kae fakatauemu atu a tino ki a ia. Oti aka, tamate ei a ia i se auala fakalogo‵mae kae fakamasiasi. (Epe. 12:​1-3) Ne kufaki tokotasi ne ia tena toe tofotofoga e aunoa mo te puipuiga a Ieova. b—Mata. 27:46.

9. E pefea ‵tou lagonaga e uiga ki te taulaga a Iesu? (1 Petelu 1:8)

⁹ E manino ‵lei me ne logo‵mae malosi a Iesu,  ko te mea fua ke tuku mai ne ia te togiola. Kafai e mafaufau ‵loto tatou ki te lasi o te loto fiafia o Iesu ke logo‵mae a ia ke tuku mai tena ola mō tatou, e a, e se fai ei ke momea aka te lasi o te ‵tou a‵lofa ki a ia?—Faitau te 1 Petelu 1:8.

10. Ne pokotia pefea a Ieova ona ko te togiola?

¹⁰ Kae e pefea a Ieova? Se a te mea faigata ne talia ne ia ko te mea ke ofo mai ne Iesu tena ola e pelā me se togiola? Ne ‵pili ‵ki te va o Ieova mo Iesu e pelā eiloa mo se tamana mo tena tama tagata. (Faata. 8:30) Mafaufau la ki lagonaga o Ieova i te taimi ne kilokilo mai ki a Iesu e kufaki ne ia a tofotofoga e uke i te lalolagi nei. E seai se fakalotolotolua me ne logo‵mae ‵ki a Ieova ke lavea ne ia a tena Tama e fai fakamasei ne tino, ‵teke atu ki ei kae tofotofogina foki.

11. Taku mai se fakaakoakoga e fakaasi mai ei a lagonaga o Ieova i te taimi ne tamate ei a Iesu.

¹¹ E iloa ‵lei ne so se matua telā ne galo atu tena tama i te mate a lagonaga fanoa‵noa kae fakalogo‵mae e iku mai i vaegā tulaga penā. E malosi ‵ki ‵tou fakatuanaki ki te toetuga, kae kafai ko mate se ‵tou tino pele, e logo‵mae eiloa tatou. E fakaasi mai i te fakaakoakoga tenei a lagonaga o Ieova i te taimi ne kilokilo ifo ki tena Tama pele e logo‵mae kae oti ko mate atu i te tau mafanafana i te 33 T.A. c—Mata. 3:17.

12. Ne a mea e mafai ne tatou o fai i te taimi nei ke oko atu ki te Fakamanatuga?

¹² Mai te taimi nei ke oko atu ki te Fakamanatuga, kaia e se fai ei e pelā me se polotieki totino io me se polotieki i Tapuakiga a Kāiga ke suke‵suke kae mafaufau ‵loto ki te togiola? Fakaaoga a te Research Guide for Jehovah’s Witnesses (māfai e isi i tau ‵gana) io me ko nisi tusi faka-te-Tusi Tapu kolā e maua i ei a fakamatalaga ‵loto ki te mataupu tenei. d E se gata i ei, ke masaua o faitau a Tusi Fai‵tau mō te Fakamanatuga kolā e maua i te ‵Tou Olaga Kelisiano mo te Galuega Talai—Tusi mo Fakatasiga. Kae i te aso o te Fakamanatuga, ke mo a ma puli o onoono ki te polokalame fakapito o Tapuakiga i Taeao. Kafai e ‵saga tatou o fakatoka ‵tou loto mō te Fakamanatuga, ka toka tatou o fesoasoani atu ki nisi tino ke maua foki ne latou a mea aoga mai i ei.—Esela 7:10.

 FESOASOANI KI NISI TINO KE MAUA NE LATOU A MEA AOGA

13. Se a te auala muamua ke fesoasoani atu ki nisi tino ke maua ne latou mea aoga mai te Fakamanatuga?

¹³ E mafai pefea o fesoasoani tatou ki nisi tino ke maua ne latou a mea aoga mai te Fakamanatuga? A te mea muamua, ko te ‵kami mai o latou. I tafa o te ‵kami mai o tino kolā e fetaui mo tatou i te galuega talai, e mafai o tusi ki lalo se fakasologa o igoa o tino ke ‵kami. E aofia i ei a ‵tou kāiga, tino e ga‵lue tasi mo tatou, tama‵liki a‵koga, mo nisi tino. Kafai foki ko se lava ‵tou pepa ‵kami, e mafai o lafo atu ne tatou se ‵kopi o te pepa ‵kami i te neti. Ko oi e iloa ne ia me ka tokouke a tino ka ‵kau mai!—Fai. 11:6.

14. Fakamatala mai te aoga o te pepa ‵kami e tuku atu ne koe ki se tino.

¹⁴ Ke mo a ma manatu māmā ki te aoga o te pepa ‵kami e tuku atu ne koe ki te tino. Ne poi malosi se tuagane i te faiatuga a tena avaga, telā e sē se Molimau, me ka kau atu a ia ki te Fakamanatuga. Kaia ne poi ei tou fafine? Me uke taimi i aso mua ne fakamalosi atu a ia ki tou tagata ke kau mai, kae ne seki kau mai eiloa. Kaia ko ‵kese ei tena kilokiloga i te taimi nei? “Ne maua ne au se ‵kamiga,” ko ana muna, kae fakamatala atu me ne ‵kami a ia ne se toeaina telā e taugasoa lāua. Ne kau atu tena avaga i te tausaga tenā kae penā foki i tausaga e uke fakamuli ifo.

15. Se a te mea e ‵tau o masaua ne tatou māfai e ‵kami mai a tino ki te Fakamanatuga?

¹⁵ Ke masaua me mafai o isi ne fesili a tino kolā e ‵kami ne tatou—maise māfai e seki ‵kau mai eiloa latou ki se fakatasiga a tatou. Tela la, ke mafaufau faka‵lei ki fesili e mafai o faka‵sae aka ne latou kae ke toka o tali atu. (Kolose 4:6) Pelā me se fakaakoakoga, e mafai o mafau‵fau a nisi tino, penei: ‘Ne a mea ka fai i te fakatasiga tenā?’ ‘Ka pefea te leva?’ ‘Ne a vaegā gatu e ‵tau o ‵pei ki ei?’ ‘E mata, e ‵togi te ulu ki loto?’ ‘E mata, e isi ne tupe e ‵tae i ei?’ Kafai ko ‵kami se tino ki te Fakamanatuga, e mafai o fesili atu tatou, “E a, e isi sau fesili?” ko tali ei ne koe so se fesili e fakasae aka ne ia. E mafai foki o fakaaoga ne tatou a vitio pelā mo te Masaua te Mate o Iesu mo te Ne a Mea e Fai i se Kingdom  Hall? ke fesoasoani atu ki te tino ke malamalama i te auala e fai ei a ‵tou fakatasiga. Kae e maua i te mataupu 28 o te tusi ko te Ke Ola ki te Se-Gata-Mai! a nisi manatu ‵gali ke fakaasi atu ne tatou.

16. Ne a nisi fesili e mafai o fai mai ne tino kolā e ‵kau mai ki te Fakamanatuga?

¹⁶ Kafai ne ‵kau mai latou ki te Fakamanatuga, kāti ka isi ne fesili fakaopoopo a tino fia‵fia konā. Kāti ka fesili mai latou me kaia e seai io me mu‵tana fua a tino (māfai e isi) e ‵kai kae inu ki te falaoa mo te uaina. E mafai foki o mafau‵fau latou me fakamanatu fakafia ne tatou a te Fakamanatuga. Kae kāti ka fia iloa ne latou me e mata, tenei foki loa te auala e fai ei a fakatasiga katoa a Molimau a Ieova? E tiga eiloa e aofia a fakamatalaga konei i te lāuga o te Fakamanatuga, kāti e manakogina ne te tino fou a nisi fakamatalaga tai uke atu e uiga ki ei. A te mataupu i te jw.org ko te “Kaia e ‵Kese ei te Fakamanatuga o te ‵Kaiga a te Aliki ne Molimau a Ieova Mai Nisi Lotu?” e mafai o fesoasoani mai ke tali aka a nisi fesili a latou. E ma‵nako tatou o fai so se mea e mafai o fai—mai mua o te Fakamanatuga, i te taimi e fai ei, kae māfai foki ko oti—ke fesoasoani atu ki “tino loto ‵lei” ke maua ne latou a mea aoga mai te fakatasiga tenei.—Galu. 13:48.

FESOASOANI ATU KI TINO KO ‵MATE FAKA-TE-AGAGA

17. E mafai pefea ne toeaina o fesoasoani atu ki a latou kolā ko ‵mate faka-te-agaga? (Esekielu 34:​12, 16)

¹⁷ I te vaitau o te Fakamanatuga, e mafai pefea o fesoasoani atu a toeaina ki a latou kolā ko ‵mate faka-te-agaga? Mai te ‵saga atu mo te a‵lofa ki a latou. (Faitau te Esekielu 34:​12, 16.) Ke masaua o āsi atu ki a latou i taimi e uke mai mua o te Fakamanatuga. Fai atu me alofa koe ki a latou kae manako koe o fesoasoani ki a latou i so se auala e mafai ne koe. ‵Kami mai latou ki te Fakamanatuga. Kafai e ‵kau mai ke tali fiafia ne koe latou. Kafai ko oti a te Fakamanatuga, ke tumau i te fesokotaki atu ki taina mo tuagane pele konā, kae fesoasoani atu ki a latou i te feitu faka-te-agaga ko te mea ke toe ‵foki mai ki a Ieova.—1 Pe. 2:25.

18. E mafai pefea ne tatou katoa o fesoasoani atu ki tino ko ‵mate faka-te-agaga? (Loma 12:10)

 ¹⁸ E mafai ne tino katoa i te fakapotopotoga o fesoasoani atu ki tino ko ‵mate faka-te-agaga kolā e ‵kau mai ki te Fakamanatuga. I auala fea? Mai te fakaasi atu o te alofa, te atafai, mo te āva i otou faifaiga. (Faitau te Loma 12:10.) Masaua me kāti ne faigata ki mamoe pele konei ke ‵kau mai ki se fakatasiga. Kāti e manava‵se i te mea ma se tali faka‵lei latou māfai ko ‵kau mai. e Tela la, ke ‵kalo kea‵tea mai te faiga o fesili kolā e mafai o fakamavale atu ki a latou io me ko pati kolā e mafai o fakalogo‵mae atu. (1 Tesa. 5:11) A taina mo tuagane konei ko ‵tou taina tali‵tonu. E fia‵fia tatou me ko toe mafai o tapuaki fakatasi latou mo tatou!—Sala. 119:176; Galu. 20:35.

19. Ne a mea aoga ka maua ne tatou i te fakamanatuga o te mate o Iesu?

¹⁹ E loto fakafetai eiloa tatou ki te fakatokaga ne fai ne Iesu ke fakamanatu faeloa ne tatou a tena mate i tausaga takitasi, kae e malamalama tatou i te pogai e tāua i ei te mea tenei. Kafai e ‵kau atu tatou, ka maua eiloa ne tatou e pelā foki mo nisi tino a mea aoga e uke. (Isa. 48:​17, 18) Ka gasolo aka eiloa o lasi te ‵tou a‵lofa ki a Ieova mo Iesu. E fakaasi atu ei te lasi o te ‵tou loto fakafetai ki mea ne fai ne lāua mō tatou. E fakamalosi aka i ei a ‵tou fesokotakiga mo ‵tou taina tali‵tonu. Kae e mafai o fesoasoani atu tatou ki nisi tino ke tauloto foki ki te auala ke maua ne latou a fakamanuiaga e auala i te togiola. Tela la, ke na fai ne tatou katoa a mea e mafai o fai, ke toka ‵lei tatou mō te Fakamanatuga i te tausaga nei—te ‵toe aso tāua o te tausaga!