1. ¿Kʼu yuʼun toj tsots skʼoplal li Konmemorasion ta jpastik jujun jabile? (Lukas 22:​19, 20).

 LI YAJTUNELUTIK Jeovae toj tsots skʼoplal chkiltik li Konmemorasione. Taje jaʼ li tsobajel laj yal Jesus ti skʼan jpastike (kʼelo Lukas 22:​19, 20). ¡Oy xa tajek ta koʼontontik ti jtsob jbatik li ta Konmemorasione! ¿Kʼu yuʼun? Jkʼelbetik batel skʼoplal.

2. ¿Kʼusi srasonaltak oy kuʼuntik ti ta jkʼantik xa xkʼot skʼakʼalil li Konmemorasione?

² Li Konmemorasione tsvules ta joltik ti kʼu yuʼun toj tsots skʼoplal li matanal laj yakʼ Jesuse. Tsvules ta joltik xtok ti kʼuxi xuʼ jtojtik ta vokole (2 Kor. 5:​14, 15). Jech xtok, xuʼ te jpatbe jba koʼontontik xchiʼuk li kermanotaktike (Rom. 1:12). Ta jujun jabile ep ermanoetik ti chibajemik ta mantale chbatik ta Konmemorasion. Junantike chtijbat-o yoʼontonik sventa sutik talel ta stojolal Jeova ta skoj ti lek chchʼamatik yuʼun li ermanoetike. Jech xtok, epal krixchanoetik labal sba chilik ti kʼu yelan chjelav li tsobajele, jaʼ yuʼun chlik xchanik-o Vivlia. Jech oxal, toj tsots skʼoplal chkiltik li Konmemorasione.

3. Li Konmemorasione, ¿kʼuxi chak’ kiltik ti lek jmoj tsobol li steklumal Jeovae? (Kʼelo xtok li lokʼole).

³ Li yan srasonal ti kʼu yuʼun ta jkʼantik xa xkʼot skʼakʼalil li Konmemorasione jaʼ ti ta jkʼantik ti jmojuk tsobolutik xchiʼuk li kermanotaktike. Ta spʼejel balumil li stestigoutik Jeovae jmoj ta jtsob jbatik kʼalal chchʼay xa ox batel li kʼakʼale, ta jchikintatik jun mantal ti bu chal ti  tsots skʼoplal li matanal laj yakʼ Jesuse, ta jkʼejintatik chib kʼejojetik, ta jelubtasbe jbatik li pan xchiʼuk li vinoe xchiʼuk chanib to velta ta jpastik orasion. Ta 24 ora noʼoxe, skotol li tsobobbailetik ta spʼejel balumile jech xa ox spasojik ek. ¿Mi mu xmuyubajuk xanaʼ kuʼuntik Jeova xchiʼuk Jesus kʼalal chilik ti chkichʼtik ta mukʼ ta spʼejel balumile?

4. ¿Kʼusi ta jkʼeltik batel li ta xchanobil liʼe?

⁴ Li ta xchanobil liʼe, ta jkʼelbetik batel skʼoplal liʼe: ¿kʼuxi xuʼ jchapan koʼontontik yoʼ to mu xkʼot skʼakʼalil li Konmemorasione?, ¿kʼuxi xuʼ jkoltatik yantik yoʼ stabeik sbalil eke? xchiʼuk ¿kʼuxi xuʼ jkoltatik li buchʼutik chibajemik ta mantale? Mi la jkʼelbetik skʼoplal taje, jaʼ me tskoltautik yoʼ chapalutik mi kʼot skʼakʼalile.

¿KʼUXI XUʼ JCHAPAN KOʼONTONTIK YOʼ TO MU XKʼOT SKʼAKʼALILE?

5. 1) ¿Kʼu yuʼun skʼan jnopbetik skʼoplal li matanal laj yakʼ Jesuse? (Salmo 49:​7, 8). 2) Alo kʼusi la achan li ta video ¿K’u yuʼun cham li Jesuse?

⁵ Ti kʼu yelan xuʼ jchapan koʼontontik yoʼ to mu xkʼot skʼakʼalil li Konmemorasione, jaʼ ti jnopbetik skʼoplal sbalil li matanal laj yakʼ Jesuse. Yuʼun ta kipal jtuktike mu xuʼ xijkol lokʼel li ta mulil xchiʼuk ta lajelale (kʼelo Salmo 49:​7, 8; kʼelo xtok li video ¿K’u yuʼun cham li Jesuse?). a Jaʼ yuʼun, li Jeovae kʼot ta nopel yuʼun ti chakʼ ta matanal li xkuxlejal Xnichʼone, toj toyol la stojutik xchaʼvoʼalik (Rom. 6:23). Kʼalal mas ta jnopbetik skʼoplal li kʼusi la spasik ta jtojolaltik li Jeova xchiʼuk Jesuse, mas to ep sbalil chkiltik li pojelale. Jkʼeltik batel kʼusitik la spasik ta jtojolaltik li Jeova xchiʼuk Jesuse. Pe baʼyel jkʼeltik kʼusi skʼan xal li pojelale.

6. ¿Kʼusi skʼan xal li pojelale, xchiʼuk kʼu yuʼun persa jech la spas li Jesuse?

⁶ Li pojelale jaʼ kʼalal chichʼ chaʼmanel li kʼusi chʼayem xa ox kuʼuntike. Li Adane tukʼil vinik toʼox kʼalal laj yichʼ pasele. Pe kʼalal la saʼ smule, chʼay yuʼun li kuxlejal sbatel osile xchiʼuk jaʼ jech kʼot ta stojolal skotol li xnichʼnabtake. Sventa xichʼ chaʼtael li kʼusi chʼay yuʼun Adane, li Jesuse laj yakʼ ta matanal li stukʼil kuxlejale. Ti kʼu sjalil ay ta balumil li Jesuse «muʼyuk bu la saʼ smul li stuke mi jaʼuk bu loʼlavan ta skʼopojel» (1 Ped. 2:22). Tukʼil vinik cham, jaʼ yuʼun toj yuʼun li kʼusi la xchʼay Adane (1 Kor. 15:45; 1 Tim. 2:6).

7. ¿Kʼusitik prevaetik la snuptan li Jesuse?

⁷ Kʼalal liʼ toʼox ta balumil li Jesuse, la xchʼunbe smantal li Stot ta vinajel manchuk mi ep kʼusitik tsots la snuptan. Ta sbikʼtal onoʼox la xchʼunbe smantal stot smeʼ akʼo mi jpas muliletik (Luk. 2:51). Kʼalal chex kerem xa oxe, laj van yichʼ sujel sventa stoy sba ta stojolal li stot smeʼe o ti mu xa tukʼuk xakʼ sba ta stojolal Jeovae. Kʼalal vinik xa oxe, akʼat ta preva yuʼun li Satanase. Ep kʼusitik pasbat ti xuʼ ox mu xa tukʼuk xtun ta stojolal Jeovae (Mat. 4:​1-11). Li Satanase oy ox ta yoʼonton ti saʼ smul Jesus sventa muʼyukuk xa sbalil xkuxlejal kʼalal mi laj yakʼ ta matanale.

8. ¿Kʼusitik yan la snuptan li Jesuse?

⁸ Kʼalal la xchol mantal li Jesuse, ep kʼusitik la snuptan, yuʼun kontrainat xchiʼuk chmilat ox (Luk. 4:​28, 29; 13:31). Jech xtok, la stsʼikbe spaltail li yajchankʼoptake (Mar. 9:​33, 34). Kʼalal jaʼo xa chichʼ chapanel sventa xichʼ milele, la smajik  xchiʼuk la slabanik. Laje la smilik kʼuchaʼal jun chopol vinik xchiʼuk toj echʼ xa noʼox laj yil svokol (Ebr. 12:​1-3). Kʼalal te jokʼol ta teʼe, muʼyuk xa koltaat yuʼun li Jeovae, stuk xa la stsʼik li svokole (Mat. 27:46). b

9. ¿Kʼu yelan chkaʼi jbatik kʼalal ta jnopbetik skʼoplal li matanal laj yakʼ Jesuse? (1 Pedro 1:8).

⁹ Toj echʼ xa noʼox toyol la stojutik li Jesuse. Kʼalal ta jnopbetik skʼoplal skotol li kʼusitik la spas Jesus ta jtojolaltike, mas to ta jkʼantik-o (kʼelo 1 Pedro 1:8).

10. ¿Kʼusi lokʼ ta yoʼonton Jeova sventa spojutike?

¹⁰ ¿Kʼusi lokʼ ta yoʼonton spasel Jeova sventa spojutik li Jesuse? Kʼuchaʼal jnaʼojtike toj echʼ xa noʼox lek xil sbaik li Jeova xchiʼuk Jesuse (Prov. 8:30). Jaʼ yuʼun, ¿mi xnop kuʼuntik kʼu to xkʼuxul laj yaʼi Jeova ti laj yil tsots svokol li Jesuse? Kʼux van tajek laj yaʼi kʼalal laj yil ti tsmajik, tslabanik xchiʼuk ti ep laj yakʼbeik svokole.

11. ¿Kʼuxi xuʼ xkaʼibetik smelolal ti kʼu yelan laj yaʼi sba Jeova kʼalal laj yichʼ milel li Jesuse?

¹¹ Li buchʼu chamem junuk skerem o tsebe snaʼojik ti kʼu to xkʼuxul. Akʼo mi jchʼunojtik ti xuʼ xchaʼkuxiik tale, pe taje maʼuk skʼan xal ti muʼyuk xa chkaʼibetik xkʼuxul jutebuk kʼalal oy buchʼu chcham kuʼuntike. Li kʼusi laj kalbetik skʼoplale jaʼ tskoltautik sventa xkaʼibetik smelolal kʼu yelan laj yaʼi sba Jeova li ta 14 yuʼun nisan ta sjabilal 33 kʼalal laj yil svokol xchiʼuk ti laj yichʼ milel li Xnichʼone (Mat. 3:17). c

12. ¿Kʼusi xuʼ jpastik yoʼ to mu xkʼot skʼakʼalil li Konmemorasione?

¹² Yoʼ to mu xkʼot skʼakʼalil li Konmemorasione chanbo mas skʼoplal ta sventa pojelal kʼalal chachanunaj atuk o kʼalal chavichʼ ta mukʼ Dios xchiʼuk avutsʼ avalale. Tuneso li Saʼobil sventa xchanik mas li stestigotak Jeovae o yan vunetik sventa xachanbe mas skʼoplal ta sventa li matanal laj yakʼ Jesuse. d Jech xtok, chano li tekstoetik ti jaʼ chalbe skʼoplal Konmemorasion ti te talem li ta Jkuxlejaltik xchiʼuk Kabteltik sventa Diose. Mu me xchʼay xavaʼi xakʼel xtok li video ta sventa yichʼel ta mukʼ Dios jujun sob sventa Konmemorasione. Mi baʼyel xa onoʼox la jchapan li  koʼontontike, xuʼ me jkoltatik yantik yoʼ stabeik sbalil ek (Esd. 7:10).

JKOLTATIK YANTIK YOʼ STABEIK SBALIL

13. ¿Kʼusi skʼan jpastik sventa xbatik ta Konmemorasion li yantike?

¹³ Sventa xbatik ta Konmemorasion li yantike, skʼan jtaktik ta ikʼel. Pe maʼuk noʼox me ti jpuktik invitasion li ta cholmantale. Xuʼ me jpasbetik slistail xtok li buchʼutik ta jkʼan ta jtaktik ta ikʼele. Jech kʼuchaʼal li kutsʼ kalaltike, li jchiʼiltaktik ta abtele, li jchiʼiltaktik ta chanune o li buchʼutik xkojtikintike. Mi laj kuʼuntik li invitasion ti pasbil imprimire, xuʼ jaʼ xa noʼox jtakbetik batel li s-enlaseale. Mi jech la jpastike, ¡yikʼaluk van oy buchʼu xbat! (Ekl. 11:6).

14. ¿Kʼusi xuʼ xkʼot ta pasel kʼalal chkakʼbetik invitasion junuk krixchanoe?

¹⁴ Mu me jnoptik ti muʼyuk sbalil kʼalal oy buchʼu chkakʼbetik junuk invitasione. Jun veltae labal to sba laj yaʼi jun ermana ti albat yuʼun smalal ti chbat chiʼinatuk ta Konmemorasione. ¿Kʼu yuʼun ti labal sba laj yaʼie? Yuʼun manchuk mi ep ta velta yalojbe ti xbat chiʼinatuke, muʼyuk-o batem jkojuk. Pe ¿kʼu yuʼun ti jaʼ to bate? Li smalale laj yal ti oy jun mol ta tsobobbail ti xojtikin leke akʼbat jun invitasion. Jech oxal, li vaʼ jabile ay ta Konmemorasion xchiʼuk jech la spas li ta yan jabiletike.

15. ¿Kʼusi skʼan teuk ta joltik kʼalal oy buchʼu ta jtaktik ta ikʼele?

¹⁵ Teuk me ta joltik kʼalal oy buchʼu ta jtaktik ta ikʼel ta Konmemorasione, oy van kʼusitik mu xaʼibe smelolal, mas to mi jaʼ to sba velta chbat ta tsobajele. Jech oxal, lek onoʼox ti jchapan jbatike xchiʼuk ti jnaʼtik kʼuxi xuʼ jtakʼbetike (Kol. 4:6). Yikʼaluk van xi tsjakʼbutike: «¿Kʼusi chapasik tey? ¿Kʼu sjalil li tsobajele? ¿Kʼu yelan skʼan jlap batel jkʼuʼ? ¿Mi skʼan tojel li ochebale? ¿Mi chichʼ tsobel takʼin?». Jaʼ yuʼun, xuʼ van jchiʼintik ta loʼil mi oy kʼusi mu xaʼibe smelolale xchiʼuk ti jchapbetik smelolal li kʼusi tskʼan tsnaʼe. Jech xtok,  xuʼ me jtunestik li video Jvules ta joltik li slajel Jesuse xchiʼuk li ¿Kʼu yelan li jtsobajelkutike? Li ta xchanobil 28 li ta livro Kʼupino akuxlejal te to chal kʼusi xuʼ xkalbetik li buchʼu oy kʼusi tsjakʼe.

16. ¿Kʼusi to van tskʼan tsnaʼik li buchʼutik chbatik ta Konmemorasione?

¹⁶ Kʼalal mi laj li Konmemorasione, xuʼ van oy to buchʼu kʼusi tskʼan sjakʼ. Yikʼaluk van tskʼan tsnaʼ ti kʼu yuʼun muʼyuk buchʼu la sveʼ li pane o ti laj yuchʼ li vinoe o ti jun chib noʼox jech la spasike. Yikʼaluk van tskʼan tsnaʼ kʼu sjalikil jech chichʼ pasel li Konmemorasione xchiʼuk mi jaʼ jech chichʼ pasel jujukoj mi la jtsob jbatike. Akʼo mi laj onoʼox yichʼ chapbel smelolal li ta mantale, xuʼ van oy to kʼusitik tskʼan tsnabe smelolal. Sventa xtakʼbe kuʼuntike, xuʼ jtunestik li mantal ta jw.org «¿Kʼu yuʼun li stestigotak Jeova jelel ti kʼu yelan tspasik li Veʼlil ta bat kʼakʼal yuʼun Kajvaltik kʼuchaʼal li yan relijionetike?». Jaʼ yuʼun, kʼalal skʼan toʼox sta yorail li Konmemorasione, kʼalal mi kʼot yoraile xchiʼuk kʼalal mi echʼ xa oxe, kakʼ kipaltik sventa jkoltatik «li buchʼutik oy lek ta yoʼontonik» mantal yoʼ stabeik sbalil li tsobajel ti tsots skʼoplale (Ech. 13:48).

JKOLTATIK LI BUCHʼUTIK CHIBAJEMIK TA MANTALE

17. Li moletike, ¿kʼuxi xuʼ skoltaik li buchʼutik chibajemik ta mantale? (Esekiel 34:​12, 16).

¹⁷ Li moletike xuʼ me skoltaik li buchʼutik chibajemik ta mantal mi chakʼ ta ilel xkʼuxul yoʼontonik xchiʼuk mi chakʼik ta ilel ti skʼanojike (kʼelo Esekiel 34:​12, 16). Moletik, kʼalal skʼan toʼox xkʼot skʼakʼalil li Konmemorasione, akʼik persa ti xachiʼinik ta loʼil skotol li buchʼutik chibajemik ta mantale. Alanbo ti oy ta avoʼonton chakʼan chakoltaane. Albo ti xbatik ta Konmemorasione. Ti mi kʼotike, lek me xachʼam. Mi echʼ xa ox li Konmemorasione, bat me vulaʼano o kʼopono batel li ermanoetike xchiʼuk koltao me ta mantal sventa sutik talel ta stojolal Jeova (1 Ped. 2:25).

18. ¿Kʼuxi xuʼ jkoltatik li buchʼutik chibajemik ta mantale? (Romanos 12:10).

 ¹⁸ Jkotoltik xuʼ me jkoltatik li buchʼutik chibajemik ta mantal yoʼ xkʼotik li ta Konmemorasione. ¿Kʼuxi xuʼ jpastik? Jaʼ mi chkakʼtik ta ilel ti jkʼanojantike, mi kʼux ta koʼontontik xchiʼuk mi chkichʼanantik ta mukʼe (kʼelo Romanos 12:10). Teuk me ta joltik ti xuʼ van vokol chaʼiik sventa xkʼotik ta junuk tsobajele. Xuʼ van svul-o yoʼontonik ti kʼu yelan ch-ilatik yuʼun li ermanoetike. e Jaʼ yuʼun, mu me kʼusi jakʼbetik o ti oy kʼusi xkalbetik ti chopol-o chaʼi sba kuʼuntike (1 Tes. 5:11). Teuk me ta joltik ti jaʼo kermanotaktike xchiʼuk ti xijmuyubaj ti chlik yichʼik ta mukʼ Jeova yan veltae (Sal. 119:176; Ech. 20:35).

19. ¿Kʼusi sbalil ta jtabetik kʼalal ta jtsob jbatik ta Konmemorasione?

¹⁹ Li kʼusi laj xa kalbetik talel skʼoplale chakʼ kiltik ti kʼu yuʼun toj tsots skʼoplal laj yil Jesus ti jvules ta joltik jujun jabil li slajele. Ep sbalil ta jtabetik xchiʼuk tstabeik sbalil li yan krixchanoetik eke (Is. 48:​17, 18). Yuʼun mas ta jkʼantik-o li Jeova xchiʼuk Jesuse. Jech xtok, jaʼ jech xuʼ xkakʼtik ta ilel ti ta jtojtik ta vokol li kʼusi la spasik ta jtojolaltike. Mas jmoj oyutik xchiʼuk li kermanotaktike xchiʼuk jaʼ jech xuʼ jkoltatik yantik sventa snaʼik kʼusi xuʼ spasik yoʼ skʼupinik li bendision chakʼ talel koliyal ti laj yakʼ ta matanal xkuxlejal li Jesuse. Jaʼ yuʼun, kakʼtik persa yoʼ jchapan jbatik yoʼ to mu xkʼot skʼakʼalil li Konmemorasione, li tsobajel mas tsots skʼoplal jujun jabile.